Iwuhrẹ E rẹ Wha Iruo Ezi Ze
1 Afẹ ivẹ nọ i w’uzou evaọ egagọ mai họ ekpohọ iwuhrẹ ukoko gbe abọ o wo evaọ usiuwoma ota na. Ivẹ na e rẹ nya usu ovo. Ojọ u re kpomahọ odekọ. Iwuhrẹ Ileleikristi e rẹ wha iruo ezi tha, onọ o mae rọ iruo ezi evaọ usu rai kọ usiuwoma ota Uvie na gbe iruo ọ aru-ilele na. (Hib. 10:24) Otẹrọnọ ma siọ iwuhrẹ ba ẹnya, u re kri re ma tẹ siọ usiuwoma ota ba ha, kemena ma re gbe wo ọwhọ nọ ma re ro ru ei hi.
2 Evaọ iwuhrẹ ọ k’oka k’oka, ma re wo uthubro ẹzi nọ a ruẹrẹhọ re o w’omai nyae ta usiuwoma. A re dhesẹ ovẹrẹ oke na k’omai, nọ o be gb’omai họ re ma rehọ ovuẹ Ebaibol nọ o rẹ kẹ uzuazọ na ro se amọfa. Ma re wo uduotahawọ gbe ọbọga re ma thihakọ evaọ iruo usiuwoma ota na. (Mat. 24:13, 14) Nọ ma tẹ be rehọ uvẹ nọ ma rẹ rọ k’iyo evaọ iwuhrẹ na ro ruiruo, edhesẹ ẹrọwọ mai kẹ amọfa o vẹ reria omai obọ viere. (Hib. 10:23) Ẹkwoma odẹ ufihotọ evaọ Isukulu Odibọgba Ọghẹnẹ na, a je wuhrẹ omai re ma jọ egbodibo nọ i re wo ẹgba vi epaọ ọsosuọ je ru ẹgba ewuhrẹ mai nyaharo.—2 Tim. 4:2.
3 Epanọ Iwuhrẹ Odibọgba E rẹ rọ w’Omai Ta Usiuwoma: A t’uduhọ omai awọ re ma hae kaki se eme ọ Odibọgba Uvie Mai na taure a te ti wuhrẹ iẹe. Evuẹ nana e vẹ nya ro omai iroro nọ ma te kpohọ Ewuhrẹ Odibọgba na jẹ ruẹ idhesẹvia evaọ obọ platfọmo. Nọ ma tẹ rọ usiuwoma ota, ma sai roro kpemu kpahe Odibọgba Uvie Mai, ma vẹ kareghẹhọ idhesẹvia jọ nọ a ru, ma vẹ rehọ ere sisẹri nọ e mai w’ẹgba. Onana họ oware nọ iwhowho-uvie buobu a be hae rọ ẹro ruẹ.
4 Wọhọ ẹnya lele ọ Iwuhrẹ Odibọgba, ejọ i bi ru ọtamuo kugbe amọfa re a ru iruo kugbe evaọ odibọgba na. Igogo eme usiuwoma ota e rẹ gbẹ jọ kpokpọ-kpokpọ evaọ iroro iwhowho-uvie, oma o vẹ jẹ wọ ae re a w’obọ evaọ iruo usiuwoma ota na k’oka k’oka.—Hib. 10:25.
5 A rẹ rehọ oware ofa nwene iwuhrẹ Oleleikristi mai hi, oria nọ ma je kokohọ kugbe ibe egegagọ mai je wo ọwhọ kẹ iruo ezi. Otẹrọnọ odibọgba mai o re vihọ, kiyọ ma re kpohọ iwuhrẹ ukoko na kẹse kẹse. Joma dhesẹ ovuhumuo kẹ ọruẹrẹfihotọ ogbunu ọnana nọ o n’obọ Jihova ze na ẹkwoma ‘oma nọ ma rẹ seba ekugbe he.’—Hib. 10:25.