Isẹri Jihova—Etausiuwoma Uzẹme
1 Jesu Kristi o fi owha-iruo usiuwoma ota na họ ilele riẹ kpobi uzou, ọ ta kẹ ae re a ta usiuwoma Uvie na. (Mat. 24:14; Iruẹru 10:42) Ilele ọsosuọ riẹ a fi oriruo h’otọ evaọ onana nọ a jẹ t’ẹme kpahe Uvie na ababọ eriosehọ—orọnikọ evaọ eria egagọ ọvo ho rekọ oria kpobi nọ a jọ nyaku ahwo evaọ ẹgbede jegbe evaọ ẹnya n’uwou ruọ uwou. (Iruẹru 5:42; 20:20) Wọhọ Isẹri Jihova nẹnẹ, ma dhesẹ oma mai no wọhọ etausiuwoma Ileleikristi uzẹme, bi whowho ovuẹ Uvie na evaọ ekwotọ 232 jẹ họ ilele ekpokpọ nọ i bu vi ima ame no evaọ ikpe esa n’ikpo na ọvo! Kọ fikieme iruo usiuwoma ota mai u je wo obokparọ t’ere?
2 Emamọ Usi O rẹ Sasa Omai Oma: Etausiuwoma yọ ekovuẹ, hayo ewhovuẹ, erọ emamọ usi. Fikiere, ma wo uvẹ omosasọ orọ ewhowho Uvie Jihova—emamọ usi uzẹme ovuọvo nọ a sae rọ kẹ ahwo-akpọ nọ i wo ọkora. Ma wo ọwhọ kẹ eriariẹ obaro nọ ma wo kpahe ihru ekpokpọ nọ e te rehọ ẹrẹreokie su otọakpọ ọkpokpọ nọ ahwo-akpọ ẹrọwọ i ru via evaọ Aparadase nọ ọ be tha na. (2 Pita 3:13, 17) Mai ọvo họ ahwo nọ a dede ẹruore ọnana h’oma, yọ oma o be w’omai re ma ghale iẹ kugbe amọfa.
3 Uyoyou Uzẹme O rẹ w’Omai: Usiuwoma ota yọ iruo uzuazọ usiwo. (Rom 1:16) Oye jabọ nọ ma jẹ ruẹ oghọghọ ulogbo evaọ ẹvaha ovuẹ Uvie na. Wọhọ etausiuwoma uzẹme, ma you ahwo, yọ oyena o be w’omai ghale emamọ usi na kugbe ai—iviuwou mai, erivẹ, egbẹrioma, gbe amọfa buobu t’epanọ o rẹ sae lọhọ te. Re ma rehọ ẹwẹ kpobi ru iruo nana yọ edhere jọ nọ o mai woma evaọ edhesẹvia uyoyou uzẹme mai kẹ amọfa.—1 Tẹs. 2:8.
4 Ẹzi Ọghẹnẹ Ọ be Th’Omai Uke: Ẹme Ọghẹnẹ ọ k’omai imuẹro inọ okenọ ma te ru iruo ẹkọ gbe ame-okuhọ ibi Uvie mai no, Jihova họ ọnọ o re ‘ru ei rro.’ Nwanọ oware nọ ma be ruẹ nọ o be via evaọ ukoko mai nẹnẹ oye. (1 Kọr. 3:5-7) Ẹzi Ọghẹnẹ ọ be tha omai uke evaọ iruo usiuwoma ota mai yọ o be k’omai obokparọ ulogbo.—Joẹl 2:28, 29.
5 Fiki uduotahawọ nọ o rọ 2 Timoti 4:5 re a “ru iruo ọta-usiuwoma” na gbe fiki uyoyou mai kẹ ahwo kpobi, j’oma wo ọwhọ re ma ghale emamọ usi Uvie osasa na evaọ uvẹ kpobi, avọ udu nnọ Jihova ọ te gbẹ ghale iruo mai.