Isẹri-Ise kẹ ‘Oghẹrẹ Ahwo Kpobi’
1 Okenọ ma tẹ nyaku ahwo nọ a wo iruemu ẹwho hayo egagọ sa-sa, ma rẹ kareghẹhọ nnọ oreva Jihova họ re o ghẹrẹ “ahwo kpobi a wo usiwo, re a ze te riẹ uzẹme na.” (1 Tim. 2:4) Fiba unu emebe-evẹvẹ gbe ibroshọ nọ a dabe ruẹrẹhọ buobu no, ma wo obọdẹ ebe ivẹ jọ nọ a sai ro ruiruo oke kpobi ro fiobọhọ kẹ ahwo nọ egagọ rai i wuhrẹ i rai uzẹme na kpahe Ọghẹnẹ gbe Kristi hi.
2 Obe na Eriariẹ Nọ I Re Su Kpohọ Uzuazọ Ebẹdẹ Bẹdẹ o rẹ sai fiobọhọ kẹ ahwo evaọ oria kpobi re a rehọ orọwọ rai wawo oware nọ Ebaibol na o wuhrẹ kpahe Ọghẹnẹ uzẹme ọvuọvo na. Evaọ abọdekọ riẹ, ẹkwoma eruvẹ uzuazọ Jesu Kristi, The Greatest Man Who Ever Lived o rẹ sai fiobọhọ kẹ ohwo riẹ kpahe Ọmọ Ọghẹnẹ ziezi je sikẹle iẹe, wọhọ epanọ o jọ kẹ ahwo buobu evaọ ikpe-udhusoi ọsosuọ na. (Jọn 12:32) Oke kpobi nọ u te fo, whọ sae gwọlọ dawo iroro ejẹ enana ro fi ebe enana họ ada.
3 Who te rri rie nọ u fo re who fi obe ọ “Greatest Man” na họ ada kẹ ohwo jọ, whọ sae nọ nnọ:
◼ “Eme ọ rẹ ziọ iroro ra nọ who te roro kpahe Jesu Kristi? [Kuvẹ kẹ uyo.] Igbiku buobu a rọwo Jesu wọhọ ọzae nọ ọ mae rro nọ ọ rria no. [Fodẹ oriruo jọ no eme emuhọ obe Greatest Man na ze.] Ebaibol na o dhesẹ nnọ uzuazọ Jesu o rọ oriruo k’omai re ma raro kele iei.” Se 1 Pita 2:21 gbe edhe-ẹme ọsosuọ eva ẹwẹ-obe urere ọ eme ọ emuhọ evaọ obe Greatest Man na. Otẹrọnọ ọnọ o wo uwou na o wo isiuru re o wuhrẹ kpahe Jesu, fi obe na họ ada kẹe. Taure whọ tẹ te nya vrẹ, se Jọn 17:3 jẹ nọ nnọ, “Ẹvẹ ma sai ro wo eriariẹ nana nọ i re su kpohọ uzuazọ ebẹdẹ bẹdẹ na?” Ru ọruẹrẹfihotọ re who zihe avọ uyo na.
4 Nọ who te zihe re who dhesẹ epanọ a sai ro wo eriariẹ nọ i re siwi uzuazọ na, whọ sae ta nọ:
◼ “Mẹ y’eyaa nọ me ti zihe ze re me dhesẹ epanọ ma sai ro wo eriariẹ nọ i re su kpohọ uzuazọ ebẹdẹ bẹdẹ na k’owhẹ.” Rehọ obe Eriariẹ na kẹe, jẹ rehọ uzoẹme ọsosuọ na dhesẹ uwuhrẹ.
5 Otẹrọnọ whọ gwọlọ fi obe ọ “Eriariẹ Nọ I Re Su Kpohọ Uzuazọ Ebẹdẹ Bẹdẹ” na họ ada, whọ sae nọ nnọ:
◼ “Avọ egagọ sa-sa buobu nọ e rọ nẹnẹ na, kọ who roro no ẹdẹjọ kpahe epanọ ma sae rọ riẹ onọ Ọghẹnẹ ọ jẹrehọ?” Ọ tẹ k’uyo no, who ve rovie obe ọ Eriariẹ na kpohọ ẹwẹ-obe avọ 46. Se edhe-ẹme avọ 6 gbe 7, jẹ nọ sọ ọnọ o wo uwou na ọ rọwo inọ orọnikọ egagọ kpobi i bi “ru oreva Ọsẹ” Jesu nẹnẹ hẹ. Fodẹ nnọ egagọ uzẹme na nẹnẹ o rẹ nyate ẹgwọlọ obehru na. Fi obe na họ ada evaọ unuigho riẹ. Evaọ oke ọ ẹnyavrẹ ra, whọ sae nọ nnọ, “Ẹvẹ egagọ uzẹme i re kpomahọ uruemu ohwo?” Ru ọruẹrẹfihotọ kẹ ozihebro re whọ kẹ uyo na.
6 Nọ who te zihe re who dhesẹ oghẹrẹ nọ egagọ uzẹme i re kpomahọ uzuazọ ohwo, whọ rẹ sae nọ nnọ:
◼ “Ẹvẹ who roro nọ u fo re egagọ i kpomahọ uruemu ahwo? [Kuvẹ kẹ uyo.] Kristi ọ k’omai ute nọ a rẹ rọ wawo egagọ.” Se Matiu 7:17-20. Kẹsena who ve zizie ọnọ o wo uwou na re o se edhẹ-ẹme avọ 18 evaọ ẹwẹ-obe avọ 50-51. Otẹrọnọ oke o riẹ, ta kpahe edhe-ẹme avọ 20 evaọ ẹwẹ-obe avọ 51. Ta nọ who ti zihe ze re wha t’ẹme na haro.
7 Eme nọ A re ro Mu Ẹme Họ: Eme buobu nọ i re fiobọhọ kẹ ewuhrẹ e rọ obe ọ Eriariẹ na, nọ a sai ro mu ẹme họ evaọ iweze ọsosuọ hayo ozihebro. Whọ sai mu ẹme họ ẹkwoma onọ nọ u fo nọ whọ rẹ nọ gheghe. Wọhọ oriruo, muẹrohọ onọ gbe izoẹme enana avọ ewẹ-obe nọ a jọ t’ẹme kpahe ae na:
“Eware nọ E rọ Ebaibol na Eva” (13)
“Whọ rẹ Sai Fievahọ Ebaibol Na?” (15)
“Ọghẹnẹ Uzẹme na o Wo Odẹ” (24)
“Yọrọ Oma Kpahe Ẹghẹ Setan!” (59)
“Eviavia nọ I W’abọ Kpahe Edẹ Urere Na” (99)
“Ẹgwọlọ nọ A rẹ Nya te ro Si Kẹle Ọghẹnẹ” (152)
“Owojẹ nọ U Re Su Kpohọ Uzuazọ Ebẹdẹ Bẹdẹ” (173)
8 Whọ sai rovie kpohọ ẹwẹ-obe hayo ewẹ-obe nọ a salọ na evaọ obe ọ Eriariẹ na who ve je ru eme nọ a be ta na vevẹ. Kẹsena who ve ru ọruẹrẹfihọ kẹ ozihebro ẹkwoma onọ nọ u fo nọ whọ rẹ nọ fih’otọ nọ a sae k’uyo riẹ no ibroshọ Gwọlọ na hayo obe Eriariẹ na ze. Ruẹ nọ who zizie ọnọ o wo uwou na kpohọ Ovuẹ Ogbotu na, jẹ nya siọ obe-uzizie ba kẹe.
9 Oghẹrẹ ahwo udu-oruọzewọ kpobi a be gwọlọ uzẹme na kpahe Ọghẹnẹ gbe Kristi. Ma sai fiobọhọ kẹ ae evaọ iruo isẹri-ise mai. Fikiere, joma gbẹ hae “ruẹ uye, be họra, keme ma rehọ ẹruore mai kpahe Ọghẹnẹ uzuazọ na, ọye nọ rọ Osiwi ahwo kpobi.”—1 Tim. 4:10.