Esẹro nọ E be k’Obaro——Ọsẹro Iruo Usiuwoma Ota Na
1 Ọsẹro iruo usiuwoma ota na o wo isiuru egaga kpahe oware kpobi nọ u kpomahọ ẹnyaharo iruo usiuwoma ota evaọ ẹkwotọ nọ a ghale kẹ ukoko na. Fikiere o wo abọ ologbo evaọ obọ nọ o re fihọ k’omai ru owha-iruo ovuẹ emamọ usi mai na gba. Wọhọ ọtausiuwoma ajọwha, ọ rẹ k’obaro evaọ ẹme kpobi nọ o kpomahọ usiuwoma ota. Wọhọ obọdẹ owuhrẹ, o re fiobọhọ kẹ iwhowho-uvie kpobi re a riẹ iruo odibọgba rai na ru ziezi.—Ẹf. 4:11, 12.
2 Ọkpako nana họ ọnọ ọ rẹ sẹro iruo idibo iruiruo nọ a kẹ iruo ẹruọsa ebe, emagazini, gbe ekwotọ usiuwoma ota. O rọ owha-iruo riẹ re ọ ruẹ nọ ebe, emagazini, gbe efọmo e riẹ buobu nọ ma re ro ruiruo k’amara k’amara. Ẹsiẹvo ẹgbukpe ọ rẹ jọ efale ẹkwotọ na kiẹ adrẹse iwou nọ a si omai ozọ nọ ma wha usiuwoma te he, o ve vi inievo nọ i te ziezi kpohọ iwou enana.
3 Ọsẹro iruo usiuwoma ota na o wo owha-iruo ẹruọsa abọ sa-sa ọrọ usiuwoma ota, wọhọ isẹri-ise evaọ oria iruo, iyẹrẹ, gbe ifonu. O re muẹro h’otọ re o ru emamọ ọruẹrẹfihotọ re a kokohọ kẹ usiuwoma ota evaọ ẹkpoka na soso, kugbe oke ehọlide. O wo uvi isiuru kpahe iruo obe i wuhrẹ Ebaibol na. Ọ rẹ gwọlọ idhere nọ ọ rẹ rọ rehọ uketha abọ-ẹzi kẹ ahwo nọ a zihe ruọ ẹdhigodo hayo enọ e dobọji evaọ odibọgba na. O wo isiuru egaga kpahe iruo ekobaro na, yọ ọ rẹ sẹro ọruẹrẹfihotọ Ekobaro A re Fiobọhọ k’Amọfa na.
4 Wọhọ omọvo Ogbẹgwae Iruo Ukoko na, ọsẹro iruo usiuwoma ota na ọ rẹ jiroro enwene kpobi nọ o fo evaọ itu ọ Uwuhrẹ Obe Ukoko na. Okenọ o te weze ziọ utu ra, ruẹ nọ whọ rẹ jariẹ je w’obọ kugbe ei evaọ usiuwoma ota.
5 Ahwo kpobi evaọ ukoko na a re yoẹme n’evaze kẹ ọkpọvio nọ ọsẹro usiuwoma ota na ọ rẹ kẹ. Onana u re fiobọhọ k’omai re ma ru ẹgba mai rro haro evaọ iruo aru-ilele na je wo oghọghọ viere evaọ odibọgba mai.