W’Obọ “Whawha” Evaọ Odibọgba Ra
1 Okenọ ma te se nọ Pọl ukọ na o je ruiruo wọhọ ọbebabọ uwou-owhre evaọ okenọ ọ jọ Kọrint, ma rẹ sai ku ei họ nọ onana u bru uvẹ usiuwoma ota riẹ kpotọ. Rekọ, Iruẹru 18:5 o ta nọ: ‘Pọl ọ jẹ vuẹ ahwo Ju whawha avọ ududu nọ Jesu họ Kristi na.’ Fikieme Pọl o je duoma kpobi họ iruo usiuwoma ota na tere? Dede nọ ibuobu evaọ Kọrint a zihe ro enọ e rọwo no, Olori na ọ kẹ imuẹro inọ ilele buobu e gbẹ riẹ nọ a te jọ okpẹwho oyena ru. (Iruẹru 18:8-11) Kọ ma wo ẹjiroro ọvona nọ ma re ro w’obọ whawha evaọ odibọgba mai? E. Ahwo buobu a gbẹ riẹ nọ a rẹ sai duku je wuhrẹ uzẹme na.
2 Raha Oke Viere Evaọ Odibọgba na Evaọ Etoke April: Ẹsejọhọ o rọ ute ra re whọ hai w’obọ ziezi evaọ ewhowho emamọ usi na k’amara k’amara. Rekọ emerae jọ e rẹ k’omai uvẹ viere nọ ma re ro w’obọ “whawha” evaọ iruẹru nana. Enana i kugbe amara April, uzedhe ezi ehaa Ekareghẹhọ na. Kọ uyero ra o k’owhẹ uvẹ nọ who bi ro ru iruo ọkobaro obufihọ na hayo fiba omodawọ ra viere evaọ odibọgba na evaọ etoke nana? Iwhowho-uvie buobu nọ i bi ru ere a wo eghale buobu no. (2 Kọr. 9:6) Otẹrọnọ whọ be dao utho ẹgba ra kpobi, kareghẹhọ inọ eva e rẹ were Jihova kpahe egagọ ẹwẹ-kpobi ra. (Luk 21:2-4) Epanọ uyero ra o rọ kpobi, ru ei fihọ ute ra re who w’obọ “whawha” evaọ odibọgba ra evaọ etoke April. Yọ a jọ o thọrọ owhẹ ẹro ho re whọ n’iyẹrẹ usiuwoma ota ra eva urere amara na re a sai kele omodawọ ra kugbe erọ ahwo Jihova nọ i kiọkọ.
3 Weze Bru Ahwo Ekpokpọ nọ E Nyaze Ekareghẹhọ Na: Ukpe nọ u kpo na evaọ Nigeria, ahwo nọ i kpohọ Ekareghẹhọ na a bu te 575,530. Ma gbẹ be hẹrẹ unu ahwo nọ e nyaze evaọ ukpe onana. Ghele na, iyẹrẹ i dhesẹ nọ irẹro ẹvi igbunu rọkẹ “ivuẹvu” ilogbo e riẹ. (Mat. 9:37, 38) Fikiere, ababọ oke oraha, ruẹrẹhọ re who weze bru ahwo nọ i wo isiuru nọ e nyaze Ekareghẹhọ na re who fiobọhọ kẹ ae evaọ abọ-ẹzi. Re a va iweze itieye o rẹ kuvẹ kẹ ‘oyoma na re ọ nyaze te soro ovuẹ uvie na nọ a kọ họ eva rai na no.’ (Mat. 13:19) Iweze ababọ oke oraha u re dhesẹ nọ who bi ghine w’obọ “whawha” evaọ odibọgba ra.
4 Gbẹ Hai Fiobọhọ kẹ Enọ E Siọ Iruo Uvie Ba no Riẹriẹriẹ: Evaọ February a muọ omodawọ obọdẹ họ re a fiobọhọ kẹ enọ e siọ iruo uvie ba no riẹriẹriẹ. Otẹrọnọ ejọ e riẹ nọ a ti ru iweze ẹruorote bru hu, ekpako na a re ru ọruẹrẹfihotọ re a weze bru ae taure April o te ti re. Ekpako na a rẹ daoma riẹ oware nọ o be wha ẹbẹbẹ ohwo na ze gbe epanọ a sae mai ro fiobọhọ kẹe re ọ wariẹ mu Jihova họ ẹgọ jajaja. Obufihọ uyoyou onana u re dhesẹ nnọ ekpako na a se owha-iruo rai wọhọ esẹro ‘uthuru Ọghẹnẹ’ gboja. (1 Pita 5:2; Iruẹru 20:28) Ukere Uwou-Eroro Na ọrọ September 15, 1993 (ọrọ Oyibo), ẹwẹ-obe avọ 22-23, o kẹ iroro-ejẹ obọdẹ nọ ekpako na a sai ro ruiruo evaọ okenọ a tẹ be t’ẹme kpahe ojọ evaọ igogo ebẹbẹ isoi nọ e rẹ sai kpomahọ enọ e se iruo uvie ba no riẹriẹriẹ na. U muẹro inọ, a rẹ sai ru ejọ re a wariẹ jọ jajaja evaọ iruo odibọgba na evaọ etoke April.
5 Fiobọhọ kẹ Amọfa re A Zihe Ro Iwhowho-Uvie nọ E te Họ-Ame He: Kọ emọ ra a te no wọhọ iwhowho-uvie ekpokpọ erọ emamọ usi na? Kọ ẹvẹ kpahe amọfa nọ who bi lele wuhrẹ Ebaibol na? Otẹrọnọ ekpako na a kuenu kẹ ahwo itieye na, kọ April ọ gbẹ rọ oke nọ u fo kẹ ae nọ a re ro mu usiuwoma ota họ? Otẹrọnọ ohwo jọ o bi ru ẹnyaharo yọ o wuhrẹ ibroshọ Gwọlọ na gbe obe Eriariẹ na reno, a rẹ sai ru uwuhrẹ Ebaibol na haro evaọ obe avivẹ—Okugbe Evaọ Egagọ. Ute ra họ re who fiobọhọ kẹ ọmọ-uwuhrẹ na wo orimuo viere kpahe uzẹme na, te wọhọ owhowho-uvie nọ ọ te họ-ame he, je zihe ro Osẹri Jihova nọ ọ rehọ oma mudhe jẹ họ-ame no.—Ẹf. 3:17-19; 1 Tim. 1:12; 1 Pita 3:21.
6 Uvi isiuru ẹsikpobi ra kpahe emọ-uwuhrẹ Ebaibol ra o sai fiobọhọ kẹ ae re a ru uzẹme na họ ọrai. Osẹri jọ ọ nyaku imava-orọo jọ nọ e kpako no enọ e rọwo avọ ọwhọ re a ru uwuhrẹ Ebaibol kugbe ai. Rekọ imava-orọo na a tẹ va ẹdẹ uwuhrẹ na eka esa ususu. Uwhremu na a te muọ uwuhrẹ na họ. Kẹsena, imava-orọo na a tẹ be hae va ẹdẹ uwuhrẹ na enwenọ eka ivẹ kpobi. Ghele na, uwhremu na aye na ọ tẹ nyaharo te ame-ọhọ. Oniọvo na ọ kareghẹhọ inọ: “Nọ ọ họ-ame no, ibiaro riẹ e tẹ vọ avọ irui-oviẹ evawere, onọ o wha irui-oviẹ evawere ro s’omẹ avọ aye mẹ.” Ẹhẹ, a te bi w’obọ “whawha” evaọ emamọ usi na o rẹ wha oghọghọ ulogbo ze!
7 Eruẹaruẹ Ebaibol gbe eviavia akpọ i dhesẹ nọ ma rria kodo ruọ oke urere na no. Enẹna họ okenọ ahwo Ọghẹnẹ kpobi a re ro w’obọ “whawha” evaọ ewhowho emamọ usi na kẹ amọfa. Pọl ukọ na ọ k’imuẹro inọ iruo itieye na “eva Ọnowo na e rọ ivrẹvru hu.”—1 Kọr. 15:58.