Obọdẹ Uduotahawọ Rọkẹ Ohwohwo
1 Kẹdẹ kẹdẹ nọ ọ rrọ akpọ na ahwo Jihova a rẹ rẹriẹ aro dhe edawọ ẹrọwọ rai. Nọ ọ riẹ nnọ oke riẹ o rẹ kpẹkpẹe na, Ẹdhọ ọ be rọ ofu urere riẹ họre re ọ raha ẹgbakiete mai kẹ Jihova. (Evia. 12:12) O r’oja re ma “kru oma ga eva Ọnowo na gbe eva ogaga eri [riẹ]” re ma “ruẹse mudhe eva edẹ oyoma, nọ [ma] je ru ai kpobi no, [ma] ve mudhe.”—Ẹf. 6:10, 13.
2 Ekokohọ kugbe ibe ẹrọwọ mai yọ ọruẹrẹfihọ nọ o no obọ Jihova ze re u fi obọ họ k’omai wo ẹgba. Pọl ukọ na o vuhu onana mu. U si rie urru re ọ jọ kugbe inievo Ileleikristi riẹ re a ruẹsi “wo oma osasọ kugbe” je ‘kru oma ga.’ (Rom 1:11, 12) Re a bọ omai ga evaọ oreva Ọghẹnẹ uruo, Ugboma Esuo na, ọ rehọ edhere oyoyou ru ọruẹrẹfihotọ no, re ma wo uvẹ nọ ma re ro wo erere udu ota họ awọ mi ohwohwo evaọ Okokohọ Ubrotọ ọrọ “Iwhowho Uvie Ajọwha” na.
3 Jari12ẹ Re Who Wo Erere: Ru ei fihọ ute re whọ jariẹ evaọ edẹ esa na kpobi. Ma re “wo erere” ẹkwoma obei nọ ma re te no taure a tẹ te so ole ọsosuọ na, jẹ jariẹ rite oke “Ami” nọ o re no udu mai ze kẹ olẹ urere na. (Aiz. 48:17, 18) O te gwọlọ re ahwo buobu a m’omaa iruo rai ziezi taure oke u te ti te, re a wo uvẹ nọ a rẹ rọ nya edẹ esa na kpobi. Uzẹme, o rẹ sae jọ lọlọhọ họ re who ru ọga iruo ra re ọ k’owhẹ oke nọ whọ rẹ rọ nya, rekọ ma wo imuẹro Jihova inọ o ti fi obọ họ k’omai ru oreva riẹ. (1 Jọn 5:14, 15) Otẹrọnọ ma ri ru ere no ho, enẹna họ oke nọ ma re ro ru ọruẹrẹfihotọ kẹ ofa gbe oria nọ ma re wohọ, ma du roro nnọ uvẹ na u ti mu rovie he. Ma rẹ sai wo imuẹro inọ Jihova ọ te ghale omodawọ mai re ma jariẹ evaọ edẹ esa na.—Itẹ 10:22.
4 Wo Irẹro kẹ Uduotahawọ Na: Kọ who no okokohọ ubrotọ kpo no ẹdẹjọ nọ whọ jẹ ta nnọ: “Me ri kpohọ okokohọ nọ o woma te enẹ ẹdẹvo ho!” Kọ fikieme whọ sai ro wo iroro itieye na? Fikinọ wọhọ ahwo-akpọ nọ a gba ha ma rẹ sae ruẹ nnọ oma o rẹ lọhọ omai, ma vẹ gwọlọ uduotahawọ abọ-ẹzi. (Aiz. 40:30) Oniọvo-ọmọtẹ jọ o muẹrohọ nnọ: “Eyero nana o re ru oma lọhọ omẹ, rekọ ikokohọ na i re ru omẹ wariẹ tọ ẹro vi eriwo abọ-ẹzi mẹ, kẹ omẹ ẹgba abọ-ẹzi nọ mẹ gwọlọ. O rẹ wọhọ ẹsenọ uduotahawọ na o be tha eva ẹruoke nọ mẹ mae rọ gwọlọ iẹe.” Ẹsejọhọ who wo iroro itieye na no re.
5 Ma re wo uduotahawọ nọ ma gwọlọ orọnikọ ẹkwoma edhere nọ a rọ ta eme na je ru ekiẹriwo na ọvo ho rekọ gbe ẹkwoma abọ owoma efa erọ ikokohọ mai. Oniọvo-ọmọzae jọ ọ ta nnọ: “Oware jọ nọ o were omẹ gaga họ efihiruo ehri-izi Ebaibol na nọ a dhesẹ vevẹ. Uzẹme, edrama na i woma w’umuo ho evaọ edhesẹ epanọ ma rẹ sai ro wo erere no iriruo nọ e vrẹ no ze, te iwoma gbe iyoma. Ebe ekpokpọ nọ a re si obọ no na yọ eware efa nọ me re rẹro rai ẹsikpobi, yọ mẹ rẹ reawere rai oke krẹkri nọ me te te uwou no.”
6 Ikokohọ yọ ọruẹrẹfihotọ nọ o no obọ Jihova ze evaọ “oke ẹbẹbẹ” nana. (2 Tim. 3:1) I re fi obọ họ k’omai yo ẹme kẹ uthubro na nọ o ta nọ: “Wha roro, wha dikihẹ ga evaọ orọwọ, udu u bru owhai hi, wha kru oma ga.” (1 Kọr. 16:13) Fikiere, joma gbae mu re ma jariẹ evaọ abọ na kpobi jẹ reawere uduotahawọ ohwohwo evaọ Okokohọ Ubrotọ “Iwhowho Uvie Ajọwha” mai na!
[Box on page 3]
Ma Omaa re Whọ Nya Edesa na Kpobi
■ Mi uvẹ evaọ obọ iruo.
■ Yare oria nọ whọ rẹ kpahe evaọ obọ ẹwho nọ a je ti ru okokohọ na.
■ Ru ọruẹrẹfihotọ ọrọ ofa kpohọ obọ okokohọ na.