Ọruẹrẹfihotọ Okokohọ Obọdẹ Ọkpokpọ
1 Nọ ekwakwa awhusi gbe ewuhrẹ akpọ e be duọ orro họ efe iwo na, Ẹme Ọghẹnẹ ọ tuduhọ omai awọ re ma “Fe eva Iruo Iwoma.” (1 Tim. 6:18) Oye họ uzoẹme ọ ọruẹrẹfihotọ ẹdẹ okokohọ obọdẹ nọ o ti muhọ evaọ March 2003 na. Didi uduotahawọ ma ti wo evaọ okokohọ nana?
2 Ọsẹro okogho na ọ te ta kpahe oware nọ u dhesẹ re a “Fe eva Aro Ọghẹnẹ,” yọ ọ te kiẹ ahwo jọ riwi enọ e be yaa re a wo efe abọ-ẹzi. Evaọ ẹme ọsosuọ riẹ, oruẹme ọrara na o ti dhesẹ epanọ ahwo Ọghẹnẹ a bi ro ru “Iruo Iwoma Evaọ Oke Ivuẹvu Nana.” A te tuduhọ omai omomọvo awọ re ma roro kpahe epanọ ma re ro w’obọ vọvọ viere evaọ iruo ivuẹvu nọ Ọghẹnẹ o kuenu kẹ nọ a bi ru gba nẹnẹ na.
3 Ẹvẹ eva e rẹ were omai te nọ ma tẹ ruẹ izoge Ileleikristi nọ i bi le efe abọ-ẹzi! Onana o rẹ wha orro se Jihova je fi obọ họ kẹ izoge na re a fi emamọ otọhotọ họ kẹ uvẹ iruo evaọ obaro. Ẹme na “Ujiro Orọkẹ Izoge Fiki Iruo Iwoma nọ A bi ro Jiri Jihova” o ti fielo họ iruo iwoma nọ izoge Ileleikristi obonẹ a bi ru.
4 Eme o re no iruo iwoma nọ a re le ze? Oruẹme ọrara na ọ te ta kpahe onana evaọ ẹme urere riẹ, “Ruabọhọ Iruo Iwoma Re Who Vu Eghale Jihova.” Ọ te ta kpahe abane nọ ma rẹ jọ wo eghale ilogbo: (1) omobọ mai, (2) iviuwou mai, (3) ukoko mai obonẹ, gbe (4) ukoko akpọ soso mai.
5 Ahwo nọ a roma mudhe kẹ Jihova no a ti wo uvẹ nọ a rẹ rọ họ-ame. Otẹrọnọ whọ ruẹrẹ oma kpahe no re whọ jẹ owọ yena, vuẹ ọsẹro ukoko ra ababọ oke oraha.
6 Okenọ a te whowho ẹdẹ okokohọ rai no, muọ omaa nọ whọ rẹ rọ nya họ eruo ababọ oke oraha. Daoma re whọ kaki t’obei re whọ ruẹsi w’obọ evaọ ole gbe olẹ emuhọ na. Ma tẹ nya jẹ gaviezọ evaọ etoke ọruẹrẹfihotọ ẹdẹ okokohọ obọdẹ na soso, o te bọ omai ga re ma ruabọhọ ele edhere nọ o re ghine ru omai fe evaọ eriwo Ọghẹnẹ mai, Jihova.