Rehọ Oke Ra Ruiruo Ziezi nọ Whọ tẹ Rrọ Usiuwoma Ota
1 Iruo e gbẹ vọ otọ nọ ma re ru evaọ odibọgba na, yọ oke nọ u kiọkọ u tulo ho. (Jọn 4:35; 1 Kọr. 7:29) Ma tẹ ruẹrẹ iruẹru mai họ ziezi jẹ kake ma omaa kpahotọ, ma te sae rehọ oke nọ ma fihọ kẹ usiuwoma ota ro ruiruo ziezi.
2 Ruẹrẹ Oma Kpahe: Taure who te ti kpohọ oria nọ wha je bi kokohọ kẹ usiuwoma ota, ruẹ nọ whọ ruẹrẹ uzoẹme nọ whọ te rọ ta usiuwoma kpahe no, jẹ ruẹ nọ whọ jọ ẹkpa ra wo ebe nọ who ti fihọ ada. Nọ a tẹ rọ olẹ ku ewuhrẹ omakugbe kẹ usiuwoma ota họ no, nya ovavo kpohọ usiuwoma ota. Onana o te lẹliẹ owhẹ avọ ahwo nọ wha gbẹ rrọ usu rehọ oke usiuwoma ota na ruiruo ziezi.
3 Otẹrọnọ whẹ họ ọnọ o bi ru ewuhrẹ omakugbe kẹ usiuwoma ota, muhọ ẹruoke. Who ru ei kri vrẹ iminiti 10 hayo 15 ho. Taure who te ti ku ewuhrẹ na họ, ruẹ nọ ohwo kpobi ọ riẹ ohwo nọ a gbẹ be nyusu gbe oria nọ a be te jọ ta usiuwoma.
4 Nọ Wha tẹ Rrọ Usiuwoma Ota: Nọ ewuhrẹ kẹ usiuwoma ota na ọ tẹ nwane fa no, whọ raha oke he, muhọ ẹnya kpohọ ẹkwotọ nọ a ghale k’owhẹ. Otẹrọnọ whẹ avọ ahwo nọ wha gbe bi kpohọ usiuwoma ota wha te ro omoto ọvona nya, yọ whọ riẹ nọ whọ te kaki kpozi, ru ọruẹrẹfihotọ obọra nọ who re ro kpo, re ahwo nọ a kiọkọ a gbẹ rọ fiki ra kaki kuhọ họ. Otẹrọnọ ogbotu wha gbẹ rrọ usu, roro kẹ amọfa nọ a be hẹrẹ owhẹ re whọ ruẹ nọ who ru ẹme ra kpẹre. Oyena o sae gwọlọ nọ whọ rọ areghẹ nya siọ ohwo nọ o bi sikẹ ba hayo ru ọruẹrẹfihotọ nọ who re ro zihe bru ohwo nọ o dhesẹ isiuru.—Mat. 10:11.
5 Nọ who te bi ru ozihebro, whọ sai bru oke nọ whọ rẹ raha rọ nya onya kpẹre ẹkwoma ahwo nọ a rrọ udogbe ọvona nọ who re weze bru taure who te ti kpohọ abọfa. O sae gwọlọ nọ whọ rọ ifonu se ahwo nọ whọ gwọlọ weze bru sọ a rrọ uwou re whọ seba ẹnya kufiẹ. (Itẹ 21:5) Otẹrọnọ who roro nọ whọ te jọ oria ohwo jọ krẹkri, whọ sae vuẹ amọfa nọ a rrọ utu ra re a jọ ekẹloma ta usiuwoma hayo kpohọ izihebro efa.
6 Etoke ivuẹvu abọ-ẹzi ilogbo ma rrọ na. (Mat. 9:37, 38) Kẹlena, iruo na i ti serihọ. Fikiere, joma daoma epanọ ma rẹ rọ rehọ oke mai ruiruo ziezi nọ ma tẹ rrọ usiuwoma ota.