Kọ Isẹri Jihova A Rọwo Jesu?

MA RE FI ẸRỌWỌ HỌ JESU HRỌ

Anthony: Ẹvẹ obonẹ, Timothy?

Timothy: Ma riẹ.

Anthony: Uwou-Eroro gbe Awake! ekpokpọ nọ i kpozi me ro se owhẹ vẹre. Mẹ riẹ nọ e te were owhẹ gaga.

Timothy: Whẹ kobiruo. O nwani woma gaga nọ whọ nyaze nẹnẹ keme mẹ gwọlọ nọ owhẹ onọ jọ.

Anthony: U woma, didi onọ?

Timothy: Ẹdẹdekọ nọ mẹ avọ ohwo jọ nọ ma gbe bi ruiruo ma jẹ ta ẹme, mẹ tẹ jẹ ta kpahe eware nọ me se ku evaọ emebe nọ whọ kẹ omẹ na. Rekọ ọ tẹ ta kẹ omẹ nọ me gbe se ebe Isẹri Jihova ha keme wha rọwo Jesu hu. Kọ ginọ uzẹme nọ wha rọwo Jesu hu? Mẹ ta kẹe nọ mẹ te nọ owhẹ nọ whọ tẹ nyaze.

Anthony: U woma gaga nọ whọ rọ nọ omẹ. Obọ uzou emeri a rẹ jọ gwọlọ ubiẹro emeri. Whọ tẹ gwọlọ riẹ oware nọ ohwo ọ rọwo, ohwo na ọvo whọ rẹ nọ viukpenọ whọ rẹ nọ omọfa.

Timothy: Ere me roro re.

Anthony: Uzẹme riẹ họ, Isẹri Jihova a fi ẹrọwọ họ Jesu gaga. Ma rọwo nọ ma gbe fi ẹrọwọ Jesu hu ma sai wo esiwo ho.

Timothy: Mẹ riẹ nọ wha rọwo Jesu, rekọ nọ ohwo nọ ma gbe bi ruiruo ọ ta nọ wha rọwo Jesu hu, u te bi gbe omẹ unu. O wọhọ nọ mẹ avọ owhẹ ma re ta kpahe ẹme nana ha.

Anthony: Me ti dhesẹ eria Ebaibol jọ kẹ owhẹ nọ e ta kpahe epanọ u wuzou te re ma fi ẹrọwọ họ Jesu. Mai Isẹri Jihova ma rẹ rehọ eria Ebaibol nana ta usiuwoma kẹ ahwo gaga.

Timothy: U woma.

Anthony: Joma kake ta kpahe ẹme Jesu nọ ọ rrọ obe Jọn 14:6. Ẹme nana yọ ẹme nọ Jesu o lele uko riẹ jọ ta. U se nọ: “Jesu ọ tẹ ta kẹe nọ, ‘Mẹ họ edhere na, gbe uzẹme, gbe uzuazọ; ohwo ọvo o bru Ọsẹ na ze he, rekọ fiki mẹ.’” Wọhọ epanọ oria Ebaibol nana o ta na, ẹkwoma ono ma sae rọ nyabru Ọsẹ na?

Timothy: Ẹkwoma Jesu.

Anthony: Uzẹme. Yọ ere mai Isẹri Jihova ma rọwo re. Jomẹ nọ owhẹ onọ jọ: Rono umutho eware nọ whọ riẹ kpahe Ọghẹnẹ ze, nọ ohwo ọ tẹ be lẹ, odẹ ono ọ rẹ rọ lẹ?

Timothy: Odẹ Jesu a rẹ rọ lẹ.

Anthony: Ginọ uzẹme. Oyejabọ nọ mẹ rẹ rọ rehọ odẹ Jesu ku olẹ kpobi nọ ma rẹ lẹ kugbe owhẹ họ na. Yọ ere ọvona Isẹri Jihova a re ro ku elẹ rai kpobi họ re.

Timothy: Agbẹta!

Anthony: Oria Ebaibol ofa nọ ma ti se họ, obe Jọn 3:16. Nọ a tẹ be ta kpahe eware nọ e via evaọ uzuazọ Jesu gbe okenọ o je ru iruo odibọgba riẹ, oria Ebaibol nana o wha eware kpobi nọ o ru kugbe, oyejabọ nọ ahwo a rọ mae riẹ oria Ebaibol nana gaga. Iviena se oria na ze.

Timothy: U woma. O ta nọ: “Keme Ọghẹnẹ o you akpọ na hrọ, ọ jẹ rehọ Ọmọvo riẹ kẹ, re kohwo kohwo nọ ọ rọwo riẹ o gbe vrẹ hẹ rekọ o re wo uzuazọ ebẹdẹ bẹdẹ.”

Anthony: Whẹ kobiruo. Kọ whọ riẹ oria Ebaibol nana vẹre?

Timothy: Ee, me yo rie unuẹse buobu no, yọ ahwo a re kere iẹe fihọ igbẹhẹ gbe esabọdo.

Anthony: Ahwo a ginẹ riẹe gaga. Who te rri oria ikere na ziezi, Jesu ọ ta nọ: Fiki uyoyou nọ Ọghẹnẹ o wo kẹ omai ma ti ro wo uzuazọ ebẹdẹ bẹdẹ, rekọ eme Jesu ọ ta nọ ma re ru re ma sai wo uzuazọ ebẹdẹ bẹdẹ na?

Timothy: Ma re wo ẹrọwọ.

Anthony: Ginọ ere. Ma rẹ rọwo Jesu nọ ọ rrọ ọmọ otuyẹ Ọghẹnẹ hrọ. Nọ ma te fi ẹrọwọ họ Jesu, ẹsiẹe ma sai ro wo uzuazọ ebẹdẹ bẹdẹ, yọ a jọ ẹwẹ-obe avọ 2 emagazini nọ me ro se owhẹ na ta kpahe onana vevẹ. A jọ etẹe ta kpahe ẹjiroro nọ ma bi ro kere Uwou-Eroro na. Ẹjiroro jọ họ, emagazini nana “o be tuduhọ ahwo awọ re a fi ẹrọwọ họ Jesu Kristi nọ o whu re ma sai wo uzuazọ ebẹdẹ bẹdẹ, ọnọ ọ rrọ Ovie Uvie Ọghẹnẹ, yọ o bi su enẹna.”

Timothy: Ẹhẹẹ, kọ whọ ruẹ? Wha tube kere iei fihọ emagazini obọrai nọ u dhesẹ nọ whai Isẹri Jihova wha rọwo Jesu.

Anthony: Nwanọ ere.

Timothy: Rekọ, fikieme ahwo a be rọ ta nọ wha rọwo Jesu hu?

Anthony: Eware buobu e rẹ sae whae ze nọ ahwo a rẹ rọ ta ere. Ẹsejọ ahwo a rẹ sae ta ere keme a be rọ aro kele amọfa ta ere. Hayo ẹme nọ epastọ ichọche rai ọ ta kẹ ae a rọwo na.

Timothy: O sae jọnọ fikinọ wha bi se omarai Isẹri Jesu hu, rekọ wha bi se omarai Isẹri Jihova, oyejabọ nọ ahwo buobu a be rọ ta nọ wha rọwo Jesu hu na.

Anthony: O sae ginẹ jọ ere re.

Timothy: Fikieme whai Isẹri Jihova wha rẹ mae rọ ta kpahe Jihova?

“ME DHESẸ ODẸ RA KẸ AE”

Anthony: Ma ruẹ nọ u wuzou gaga re ma dhesẹ odẹ Ọghẹnẹ kẹ ahwo wọhọ epanọ Jesu, ọmọ Ọghẹnẹ o ru na. Rri ẹme nọ Jesu ọ ta evaọ okenọ o jẹ lẹ se Ọsẹ riẹ. O rrọ obe Jọn 17:26. Iviena se oria na ze.

Timothy: U woma. “Me dhesẹ odẹ ra kẹ ae, me re dhesẹ i, re uyoyou no who you omẹ o vẹ jọ eva rai, mẹ vẹ jọ eva rai.”

Anthony: Whẹ kobiruo. Oria nana o ta nọ Jesu o dhesẹ odẹ Ọghẹnẹ kẹ amọfa. Kọ fikieme o ro ru ere?

Timothy: Ọọ. Mẹ riẹ hẹ.

Anthony: Whaọ, re ẹme na ọ sai vẹ omai ẹro ziezi, joma se oria ikere ọfa. Obe Iruẹru Ikọ 2:21. O ta nọ: ‘Kohwo kohwo nọ o se odẹ Jihova a re ti si yei.’ Mẹ riẹ nọ whọ te rọwokugbe omẹ nọ re ohwo ọ sai wo esiwo o re se odẹ Jihova hrọ, yọ Jesu ọ riẹ kpahe onana ziezi.

Timothy: Ere o rrọ.

Anthony: Fikiere, re ilele riẹ a sai wo esiwo oye soriẹ nọ Jesu o ro dhesẹ odẹ Ọghẹnẹ kẹ ai, jẹ ta kẹ ae nọ a dhesẹ iẹe kẹ amọfa. Oyejabọ nọ ma be mae rọ ta kpahe odẹ Jihova gaga na. Ma ruẹ vuhumu nọ u wuzou gaga re ma dhesẹ odẹ Ọghẹnẹ kẹ amọfa re a sai se odẹ na re.

Timothy: Rekọ o tẹ make rọnọ ahwo a riẹ odẹ Ọghẹnẹ hẹ hayo a bi se odẹ na ha, nọ a tẹ fodẹ Ọghẹnẹ, a rẹ riẹ ohwo nọ a be ta kpahe na.

Anthony: O sae ginẹ jọ ere. Rekọ nọ ma tẹ riẹ odẹ oma Ọghẹnẹ, u re ru ei lọhọ nọ ma sai ro si kẹle iẹe ziezi.

Timothy: Fikieme whọ rọ ta ere?

Anthony: Ma fake rọ oriruo jọ dhesẹ iẹe: Ma rehọ iẹe nọ ma riẹ odẹ Mosis hi. Ẹsejọhọ ọzae nọ ọ hẹriẹ ame Abade Ọwawae na hayo ọzae nọ Ọghẹnẹ ọ rọ Izi Ikpe na kẹ na ma hai ti ro dhesẹ iẹe. Kọ o hae jọnọ ma riẹ odẹ Noa ha? Ọzae nọ o ku okọ ro siwi uviuwou riẹ gbe erao na ma hae te riẹ. Ere ọvona ma hae te riẹ Jesu wọhọ ọzae jọ nọ o no obọ odhiwu ze ti whu fiki izieraha mai. Ogbẹrọnọ ere o hae jọ?

Timothy: O wọhọ nọ ere.

Anthony: Rekọ Ọghẹnẹ o ru re ma riẹ edẹ oma ahwo nana kpobi. Ikuigbe ahwo nana i mu omai ẹro ziezi keme ma riẹ edẹ oma rai. Dede nọ ma re ruẹ Mosis, Noa, hayo Jesu ẹdọvo ho, ma riẹ nọ a rria evaọ okejọ nọ o vrẹ no keme ma riẹ edẹ rai.

Timothy: Areghẹ ọ rrọ ẹme ra na, rekọ me ri roro kpahe iẹe evaọ oghẹrẹ utiona vẹre he.

Anthony: Oyena yọ oware ofa nọ o soriẹ nọ Isẹri Jihova a bi ro se odẹ Ọghẹnẹ gaga. Ma gwọlọ fiobọhọ kẹ ahwo re a fi ẹrọwọ họ Jihova Ọghẹnẹ, je rri riẹ wọhọ ohwo nọ a rẹ sai si kẹle. Yọ ma rẹ ta kpahe oware nọ Jesu o ru re ma sai wo esiwo gaga re. Joma se oria ikere jọ re u ru ẹme nana vẹ kẹ omai.

Timothy: U woma.

Anthony: Ma se obe Jọn 14:6 ẹsiẹ, oria nọ Jesu ọ jọ ta nọ ọye họ “edhere na, gbe uzẹme, gbe uzuazọ.” Joma se no obọ emuhọ uzou na ze, koyehọ Jọn 14:1. Iviena se urere owọ ọsosuọ na ze.

Timothy: U woma. O ta nọ: “Wha rọwo Ọghẹnẹ, wha rọwo omẹ re.”

Anthony: Whẹ kobiruo. Kọ ohẹriẹ o rrọ ẹrọwọ nọ a re fihọ Jesu gbe ẹrọwọ nọ a re fihọ Jihova?

Timothy: Ijo. Jesu ọ ta nọ ma re fi ẹrọwọ họ aimava re ma sai wo esiwo.

Anthony: Ginọ uzẹme. Yọ orọnikọ unu ọvo ma rẹ rọ ta nọ ma rọwo Ọghẹnẹ avọ Jesu hu. Ma te bi yeri uzuazọ nọ o rọwokugbe oreva Ọghẹnẹ, yọ ma bi gine dhesẹ nọ ma rọwo Ọghẹnẹ avọ Jesu.

Timothy: Ere o rrọ.

Anthony: Rekọ ẹvẹ ohwo ọ sai ro dhesẹ nọ ọ fi ẹrọwọ họ Ọghẹnẹ avọ Jesu? Ẹdẹ ọfa nọ me te zihe ze ma te k’uyo onọ yena.a

Timothy: U woma.