Naq nanumtaak xk’a’uxeb’ li winq. Ma naru natenq’ank li Santil Hu?

K’aru nachalk sa’ laach’ool naq nakaawab’i naq jun li kristi’aan xnumtaak xk’a’uxl?a Maare nakaak’oxla jun li kristi’aan li namemo’k xb’aan li xxiw malaj ra chi sa nawakliik eq’la re naq tixtikib’ chi k’anjelak. Malaj nakaak’oxla jun li kristi’aan li junes chirix li xch’a’ajkilal na’aatinak.

Yaal naq wiib’ oxib’ li poyanam jo’ka’in neke’xk’ul naq nanumtaak xk’a’uxeb’, ab’an li xe’xtz’il rix li na’leb’ a’in xe’xye naq wankeb’ li jalan neke’xk’ul, qayehaq chirixeb’ li winq. Jun li tasal hu kixye naq eb’ li winq naq nanumtaak xk’a’uxeb’ «neke’ok chi uk’ak malaj neke’ruk’ li b’an li nakanob’resink u re xkotzb’al b’ayaq xk’a’uxeb’. Jo’kan naq, maare sa’ xk’ab’a’ naq xnumtaak xk’a’uxl jun li winq junelik na’uk’ak ut wank sut eb’ li winq josq’eb’ malaj ch’ich’i’ reheb’ naq yook xk’a’uxeb’».

Yaal, moko chixjunileb’ ta li winq jo’ka’in neke’na’leb’ak. Ab’an, a’ yaal chanru, li xyaalal a’an naq yook chi numtaak li qak’a’uxl xb’aan naq kaw li wank ut q’axal ch’a’aj xnumsinkil eb’ li kutan (2 Timoteo 3:1). Wi yook chi numtaak laak’a’uxl, ma naru nakatxtenq’a li Santil Hu?

Junjunq xna’leb’ li Santil Hu naq nanumtaak qak’a’uxl

Naq nanumtaak qak’a’uxl sa’ li Santil Hu naru naqataw naab’al li na’leb’. Qilaq oxib’ reheb’:

1. 1. «Maajunwa t-oq eekʼaʼuxl chirix li tkʼulmanq wulaj xbʼaan naq li kutan wulaj tixkʼam chaq li xchʼaʼajkilal. Tzʼaqalaq li chʼaʼajkilal li naxkʼam chaq li junjunq chi kutan» (Mateo 6:34).

   Li xyaalal: Us naq ink’a’ txik li qach’ool chi xk’oxlankil li tqak’ul moqon. Naab’al sut li yooko xk’oxlankil, ink’a’ naqak’ul. Ut wank sut nasach qach’ool rilb’al naq chaab’ilal pe’ naqak’ul.

   Yal xb’aanunkil a’in: K’oxla junsutaq naq xaak’ul junaq li ch’a’ajkilal li xaak’oxla naq tnimanq ru, ab’an sa’ xraqik maak’a’ xk’ulmank. Na’leb’a sa’ xyaalal chirix li yookat chi xk’ulb’al anaqwan ut k’oxla a’in: «Ma yaal tawi’ naq tnimanq ru li ch’a’ajkilal a’in?»

2. 2. «Li ch’iich’ naq’esnaak rik’in ch’iich’; ut li winq, winq ajwi’ taatuqub’anq xna’leb’» (Proverbios 27:17, Li Santil Hu, Sociedad Bíblica de Guatemala, SBG).

   Li xyaalal: Eb’ li poyanam li wankeb’ qik’in naru nokoo’e’xtenq’a naq nanimank li qak’a’uxl…, ab’an, wi naqakanab’ naq too’e’xtenq’a. Naru neke’xk’e qana’leb’ xb’aan naq ak xe’xnumsi li ch’a’ajkilal a’in, malaj naru nokoo’e’xtenq’a re rilb’al naq wank jalan jalanq li na’leb’ li naru nokoo’e’xtenq’a.

   Yal xb’aanunkil a’in: Aatinan rik’in junaq laawamiiw li ak xnumsi li ch’a’ajkilal a’in re naq tixk’e aana’leb’. Patz’ re k’aru kik’anjelak chiru ut k’aru ink’a’.

3. 3. «Qʼaxtesimaq chixjunil leekʼaʼuxl saʼ ruqʼ xbʼaan naq aʼan naxkʼe xchʼool cheerix» (1 Pedro 5:7).

   Li xyaalal: Li Yos naxk’e xch’ool chirixeb’ li neke’xk’ul li rahilal. Naxye qe naq tqate qach’ool chiru ut tqaye re chixjunil li naxk’e qak’a’uxl.

   Yal xb’aanunkil a’in: Tz’iib’a chixjunil li naxk’e aak’a’uxl, moqon seeraq’i re li Yos ut patz’ re naq tatxtenq’a chirixeb’ li junjunq.

Naq maajunwa chik tnumtaaq qak’a’uxl

Li Santil Hu moko ka’aj tawi’ naxk’e qana’leb’ re xkuyb’al naq nanumtaak qak’a’uxl, naxye ajwi’ qe naq chi seeb’ maak’a’ chik tixk’e qak’a’uxl. Chanru tk’ulmanq a’in?

Li X’awab’ejilal li Yos tixsach chixjunil li naxk’e qak’a’uxl (Apocalipsis 21:4). Naq wanqo rub’el li Awab’ejilal a’in, chi moko xjultikankil li hoonal li kixk’e chaq qak’a’uxl tooxrahob’tesi chik (Isaías 65:17).

«Li Yos li nak’ehok tuqtuukilal» naraj a’in cho’q aawe (Romanos 16:20). K’e reetal li naxye: «Laa’in wank sa’ inch’ool k’aru tinb’aanu cho’q eere: twaj texwanq sa’ tuqtuukilal ut ink’a’ sa’ rahilal, re naq toxeetaw xsahil eech’ool chi junelik» (Jeremías 29:11, SBG).