KUTANGA

1 Yehowa solulaka ti Moize na ntoto-makanga ya Sinai,+ na tenta ya lukutakanu,+ na kilumbu ya ntete ya ngonda ya zole, na mvula ya zole tuka bo basikaka na insi ya Ezipte.+ Yandi tubaka nde: 2 “Beno tanga ntalu+ ya kimvuka ya mvimba ya bantu ya Izraele,* muntu mosi-mosi,* na kutadila mabuta na bo, na kutadila banzo ya batata na bo, na kutadila ntalu ya bazina ya babakala yonso. 3 Nge ti Aroni, beno ta sonika bazina ya bantu yonso yantika na bamvula 20 mata,+ yina lenda sala kisalu ya kisoda na Izraele; beno ta sonika yo na kutadila bimvuka na bo.*

4 “Beno baka bakala mosi na konso dikanda; konso muntu fwete vanda mfumu ya nzo ya batata na yandi.+ 5 Yai bazina ya babakala yina ta sala ti beno: na dikanda ya Rubeni, Elisure+ mwana ya Shedeure; 6 na dikanda ya Simeoni, Shelumiele+ mwana ya Surishadai; 7 na dikanda ya Yuda, Nashoni+ mwana ya Aminadabi; 8 na dikanda ya Isakare, Netanele+ mwana ya Suare; 9 na dikanda ya Zebuloni, Eliabi+ mwana ya Heloni; 10 na bana ya Yozefi: na dikanda ya Efrayimi,+ Elishama mwana ya Amihudi; na dikanda ya Manase, Gamaliele mwana ya Pedasure; 11 na dikanda ya Benyamini, Abidani+ mwana ya Gideoni; 12 na dikanda ya Dani, Ahiezere+ mwana ya Amishadai; 13 na dikanda ya Asere, Pagiele+ mwana ya Okrani; 14 na dikanda ya Gadi, Eliasafi+ mwana ya Deuele; 15 na dikanda ya Naftali, Ahira+ mwana ya Enani. 16 Bayai kele bantu yina bo bingaka na kati ya kimvuka ya bantu. Bo kele bamfumu+ ya makanda ya batata na bo, bamfumu ya mafunda ya Izraele.”+

17 Ebuna Moize ti Aroni bakaka bantu yai ya bo bingaka na bazina. 18 Bo vukisaka kimvuka ya mvimba ya bantu na kilumbu ya ntete ya ngonda ya zole, sambu na kusonika bazina na bo na kutadila zina ya konso muntu, ya dibuta na yandi, mpi ya banzo ya batata na bo, yantika na bamvula 20 mata,+ 19 kaka mutindu Yehowa songaka Moize. Yo yina yandi sonikaka bazina na bo na ntoto-makanga ya Sinai.+

20 Bana ya Rubeni, bana ya mwana ya ntete ya Izraele,+ bo sonikaka bo na lisiti na kutadila zina, dibuta, mpi banzo ya batata na bo. Bo tangaka babakala yonso, mosi-mosi, yantika na bamvula 20 mata, yina lenda sala kisalu ya kisoda, 21 mpi ntalu ya bantu yina bo sonikaka bazina na dikanda ya Rubeni vandaka 46 500.

22 Bo sonikaka bana ya Simeoni+ na lisiti na kutadila zina, dibuta, mpi banzo ya batata na bo. Bo tangaka babakala yonso, mosi-mosi, yantika na bamvula 20 mata, yina lenda sala kisalu ya kisoda, 23 mpi ntalu ya bantu yina bo sonikaka bazina na dikanda ya Simeoni vandaka 59 300.

24 Bo sonikaka bana ya Gadi+ na lisiti na kutadila zina, dibuta, mpi banzo ya batata na bo. Bo tangaka babakala yonso yantika na bamvula 20 mata, yina lenda sala kisalu ya kisoda, 25 mpi ntalu ya bantu yina bo sonikaka bazina na dikanda ya Gadi vandaka 45 650.

26 Bo sonikaka bana ya Yuda+ na lisiti na kutadila zina, dibuta, mpi banzo ya batata na bo. Bo tangaka babakala yonso yantika na bamvula 20 mata, yina lenda sala kisalu ya kisoda, 27 mpi ntalu ya bantu yina bo sonikaka bazina na dikanda ya Yuda vandaka 74 600.

28 Bo sonikaka bana ya Isakare+ na lisiti na kutadila zina, dibuta, mpi banzo ya batata na bo. Bo tangaka babakala yonso yantika na bamvula 20 mata, yina lenda sala kisalu ya kisoda, 29 mpi ntalu ya bantu yina bo sonikaka bazina na dikanda ya Isakare vandaka 54 400.

30 Bo sonikaka bana ya Zebuloni+ na lisiti na kutadila zina, dibuta, mpi banzo ya batata na bo. Bo tangaka babakala yonso yantika na bamvula 20 mata, yina lenda sala kisalu ya kisoda, 31 mpi ntalu ya bantu yina bo sonikaka bazina na dikanda ya Zebuloni vandaka 57 400.

32 Bo sonikaka bana ya Yozefi na nzila ya Efrayimi+ na lisiti na kutadila zina, dibuta, mpi banzo ya batata na bo. Bo tangaka babakala yonso yantika na bamvula 20 mata, yina lenda sala kisalu ya kisoda, 33 mpi ntalu ya bantu yina bo sonikaka bazina na dikanda ya Efrayimi vandaka 40 500.

34 Bo sonikaka bana ya Manase+ na lisiti na kutadila zina, dibuta, mpi banzo ya batata na bo. Bo tangaka bantu yonso yantika na bamvula 20 mata, yina lenda sala kisalu ya kisoda, 35 mpi ntalu ya bantu yina bo sonikaka bazina na dikanda ya Manase vandaka 32 200.

36 Bo sonikaka bana ya Benyamini+ na lisiti na kutadila zina, dibuta, mpi banzo ya batata na bo. Bo tangaka babakala yonso yantika na bamvula 20 mata, yina lenda sala kisalu ya kisoda, 37 mpi ntalu ya bantu yina bo sonikaka bazina na dikanda ya Benyamini vandaka 35 400.

38 Bo sonikaka bana ya Dani+ na lisiti na kutadila zina, dibuta, mpi banzo ya batata na bo. Bo tangaka babakala yonso yantika na bamvula 20 mata, yina lenda sala kisalu ya kisoda, 39 mpi ntalu ya bantu yina bo sonikaka bazina na dikanda ya Dani vandaka 62 700.

40 Bo sonikaka bana ya Asere+ na lisiti na kutadila zina, dibuta, mpi banzo ya batata na bo. Bo tangaka babakala yonso yantika na bamvula 20 mata, yina lenda sala kisalu ya kisoda, 41 mpi ntalu ya bantu yina bo sonikaka bazina na dikanda ya Asere vandaka 41 500.

42 Bo sonikaka bana ya Naftali+ na lisiti na kutadila zina, dibuta, mpi banzo ya batata na bo. Bo tangaka babakala yonso yantika na bamvula 20 mata, yina lenda sala kisalu ya kisoda, 43 mpi ntalu ya bantu yina bo sonikaka bazina na dikanda ya Naftali vandaka 53 400.

44 Moize sonikaka bazina ya bantu yai kumosi ti Aroni mpi bamfumu 12 ya Izraele, konso muntu vandaka kumonisa nzo ya batata na yandi. 45 Bo sonikaka bazina ya bantu yonso ya Izraele yantika na bamvula 20 mata, yina lenda sala kisalu ya kisoda na Izraele na kutadila nzo ya batata na bo, 46 mpi ntalu yonso ya bantu yina bo sonikaka bazina vandaka 603 550.+

47 Kansi bo sonikaka ve bazina ya Balevi+ nzila mosi ti mabuta ya nkaka na kutadila dikanda ya batata na bo.+ 48 Yo yina Yehowa tubilaka Moize nde: 49 “Nge ta sonika ve bazina ya bantu ya dikanda ya Levi, mpi nge fwete tanga ve ntalu na bo na kati ya bantu ya nkaka ya Izraele.+ 50 Nge fwete tula Balevi na kisalu ya kutala nzo-tenta ya Kimbangi,+ bisadilu na yo yonso, mpi bima na yo yonso.+ Bo ta nataka nzo-tenta mpi bisadilu+ na yo yonso, mpi bo ta salaka kuna,+ mpi bo ta tula camp na bo na nziunga ya nzo-tenta.+ 51 Konso ntangu yina bo ta katula nzo-tenta, Balevi bantu ta panza yo;+ mpi ntangu yina bo ta vukisa nzo-tenta, Balevi bantu ta tedimisa yo; ebuna konso muntu ya kele ve ti nswa* yina ke pusana pene-pene, bo fwete fwa+ yandi.

52 “Konso muntu ya Izraele fwete tedimisa tenta na yandi na camp yina bo me pesaka yandi, konso muntu na kulanda kimvuka na yandi*+ ya makanda tatu, na kutadila bimvuka na bo.* 53 Mpi Balevi fwete tula batenta na bo na nziunga ya nzo-tenta ya Kimbangi, sambu mono wila ve kimvuka ya bantu ya Izraele+ makasi; mpi Balevi fwete vanda na kisalu ya kutala* nzo-tenta ya Kimbangi.”+

54 Bantu ya Izraele salaka mambu yonso yina Yehowa songaka Moize. Bo salaka kaka mutindu yina.

2 Ebuna Yehowa tubilaka Moize ti Aroni nde: 2 “Bantu ya Izraele fwete tula camp na bo na kisika yina bo me pesaka kimvuka na bo ya makanda tatu,+ konso muntu pene-pene ya kidimbu ya nzo ya batata na yandi. Bo fwete tula camp na bo ke talana ti tenta ya lukutakanu, na nziunga na yo.

3 “Bantu yina ta tula camp na ndambu ya esti, na ndambu yina ntangu ke basikaka, ta vanda kimvuka ya makanda tatu ya camp ya Yuda na kutadila bimvuka na bo;* mfumu ya bana ya Yuda kele Nashoni+ mwana ya Aminadabi. 4 Bantu yina bo sonikaka bazina na makesa na yandi kele 74 600.+ 5 Dikanda ya Isakare ta tula camp na lweka na yandi; mfumu ya bana ya Isakare kele Netanele+ mwana ya Suare. 6 Bantu yina bo sonikaka bazina na makesa na yandi kele 54 400.+ 7 Na nima dikanda ya Zebuloni; mfumu ya bana ya Zebuloni kele Eliabi+ mwana ya Heloni. 8 Bantu yina bo sonikaka bazina na makesa na yandi kele 57 400.+

9 “Bantu yonso yina bo sonikaka bazina na makesa ya camp ya Yuda kele 186 400. Bo fwete katula camp bantu ya ntete.+

10 “Kimvuka ya makanda tatu ya camp ya Rubeni+ na kutadila bimvuka na bo* ta vanda na ndambu ya sudi; mfumu ya bana ya Rubeni kele Elisure+ mwana ya Shedeure. 11 Bantu yina bo sonikaka bazina na makesa na yandi kele 46 500.+ 12 Dikanda ya Simeoni ta tula camp na lweka na yandi; mfumu ya bana ya Simeoni kele Shelumiele+ mwana ya Surishadai. 13 Bantu yina bo sonikaka bazina na makesa na yandi kele 59 300.+ 14 Na nima dikanda ya Gadi; mfumu ya bana ya Gadi kele Eliasafi+ mwana ya Rewele. 15 Bantu yina bo sonikaka bazina na makesa na yandi kele 45 650.+

16 “Bantu yonso yina bo sonikaka bazina na makesa ya camp ya Rubeni kele 151 450, mpi bo fwete katula camp bantu ya zole.+

17 “Ntangu bo ta katula+ tenta ya lukutakanu, camp ya Balevi fwete vanda na kati-kati ya bacamp yina ya nkaka.

“Bo ta sala nzietelo na kulanda ndonga yina bo ke tulaka camp,+ konso muntu na kisika na yandi, na kulanda bimvuka na bo ya makanda tatu.

18 “Kimvuka ya makanda tatu ya camp ya Efrayimi na kutadila bimvuka na bo* ta vanda na ndambu ya westi; mfumu ya bana ya Efrayimi kele Elishama+ mwana ya Amihudi. 19 Bantu yina bo sonikaka bazina na makesa na yandi kele 40 500.+ 20 Dikanda ya Manase+ ta vanda na lweka na yandi; mfumu ya bana ya Manase kele Gamaliele+ mwana ya Pedasure. 21 Bantu yina bo sonikaka bazina na makesa na yandi kele 32 200.+ 22 Na nima dikanda ya Benyamini; mfumu ya bana ya Benyamini kele Abidani+ mwana ya Gideoni. 23 Bantu yina bo sonikaka bazina na makesa na yandi kele 35 400.+

24 “Bantu yonso yina bo sonikaka bazina na makesa ya camp ya Efrayimi kele 108 100, mpi bo fwete katula camp bantu ya tatu.+

25 “Kimvuka ya makanda tatu ya camp ya Dani na kutadila bimvuka na bo* ta vanda na ndambu ya nordi; mfumu ya bana ya Dani kele Ahiezere+ mwana ya Amishadai. 26 Bantu yina bo sonikaka bazina na makesa na yandi kele 62 700.+ 27 Dikanda ya Asere ta tula camp na lweka na yandi; mfumu ya bana ya Asere kele Pagiele+ mwana ya Okrani. 28 Bantu yina bo sonikaka bazina na makesa na yandi kele 41 500.+ 29 Na nima dikanda ya Naftali; mfumu ya bana ya Naftali kele Ahira+ mwana ya Enani. 30 Bantu yina bo sonikaka bazina na makesa na yandi kele 53 400.+

31 “Bantu yonso yina bo sonikaka bazina na makesa ya camp ya Dani kele 157 600. Bo fwete katula camp bantu ya nsuka,+ na kulanda bimvuka na bo ya makanda tatu.”

32 Bayai kele bantu ya Izraele yina bo sonikaka bazina na kutadila banzo ya batata na bo; ntalu ya bantu yonso yina vandaka na bacamp yina bo sonikaka bazina sambu na kisalu ya kisoda vandaka 603 550.+ 33 Kansi bo sonikaka+ ve bazina ya Balevi nzila mosi ti bantu ya nkaka ya Izraele,+ kaka mutindu Yehowa songaka Moize. 34 Bantu ya Izraele salaka mambu yonso yina Yehowa songaka Moize. Yai mutindu bo vandaka kusala camp na bo na bimvuka ya makanda tatu+ mpi mutindu bo vandaka kukatula camp,+ konso muntu na kutadila dibuta na yandi mpi na kutadila banzo ya batata na bo.

3 Yai bandonga ya mabuta* ya Aroni mpi ya Moize na kilumbu yina Yehowa solulaka ti Moize na Ngumba ya Sinai.+ 2 Yai bazina ya bana ya Aroni: mwana-ntete Nadabi, mpi Abihu,+ Eleazare,+ ti Itamare.+ 3 Yai bazina ya bana ya Aroni, banganga-nzambi ya bo tulaka mafuta, yina bo tulaka* sambu na kusala bonso banganga-nzambi.+ 4 Kansi, Nadabi ti Abihu fwaka na ntwala ya Yehowa ntangu bo pesaka tiya yina nsiku vandaka ve kupesa bo nswa ya kupesa na ntwala ya Yehowa,+ na ntoto-makanga ya Sinai, mpi bo vandaka ve ti bana. Kansi Eleazare+ ti Itamare+ landaka kusala bonso banganga-nzambi ti tata na bo Aroni.

5 Ebuna Yehowa tubilaka Moize nde: 6 “Nata dikanda ya Levi,+ mpi tedimisa bo na ntwala ya nganga-nzambi Aroni, mpi bo ta sadila+ yandi. 7 Bo ta lungisa bisalu na bo sambu na yandi mpi sambu na dibundu ya mvimba na ntwala ya tenta ya lukutakanu na ntangu bo ke sala kisalu na bo yina me tala nzo-tenta. 8 Bo fwete keba bima+ yonso ya tenta ya lukutakanu mpi kulungisa bisalu na bo sambu na bantu ya Izraele na ntangu bo ke sala bisalu yina me tala nzo-tenta.+ 9 Nge fwete pesa Balevi na maboko ya Aroni ti ya bana na yandi. Bo kele bantu yina bo me pesa yandi bonso makabu na kati ya bantu ya Izraele.+ 10 Nge fwete tula Aroni mpi bana na yandi, mpi bo fwete lungisa bisalu na bo ya kinganga-nzambi,+ mpi konso muntu ya kele ve ti nswa* yina ke pusana pene-pene, bo fwete fwa+ yandi.”

11 Yehowa landaka kutubila Moize nde: 12 “Kansi mono, mono ke baka Balevi na kati ya bantu ya Izraele na kisika ya bana yonso ya ntete* ya bantu ya Izraele,+ mpi Balevi ta kuma ya mono. 13 Sambu konso mwana ya ntete kele ya mono.+ Na kilumbu yina mono fwaka konso mwana ya ntete na insi ya Ezipte,+ mono santisaka sambu na mono mosi konso mwana ya ntete na Izraele yantika na muntu tii na mbisi.+ Bo fwete kuma ya mono. Mono kele Yehowa.”

14 Yehowa tubilaka diaka Moize na ntoto-makanga ya Sinai+ nde: 15 “Sonika bazina ya bana ya Levi na kutadila banzo ya batata na bo mpi mabuta na bo. Nge fwete sonika zina ya konso mwana-bakala yantika na ngonda mosi mata.”+ 16 Ebuna Moize sonikaka bazina na bo na kulanda nsiku ya Yehowa, kaka mutindu bo songaka yandi. 17 Bazina ya bana ya Levi yo yai: Gershoni, Kohati, mpi Merari.+

18 Bazina ya bana ya Gershoni na kutadila mabuta na bo yo yai: Libni ti Shimei.+

19 Bana ya Kohati na kutadila mabuta na bo, bo yai: Amrami, Yisare, Ebroni, mpi Uziele.+

20 Bana ya Merari na kutadila mabuta na bo, bo yai: Mali+ ti Mushi.+

Yai mabuta ya Balevi na kutadila banzo ya batata na bo.

21 Dibuta ya bana ya Libni+ mpi ya bana ya Shimei katukaka na Gershoni. Yai mabuta ya bana ya Gershoni. 22 Ntalu ya babakala na bo yonso yantika na ngonda mosi mata, yina bo sonikaka bazina vandaka 7 500.+ 23 Mabuta ya bana ya Gershoni salaka camp na bo na nima ya nzo-tenta,+ na ndambu ya westi. 24 Mfumu ya nzo ya batata ya bana ya Gershoni vandaka Eliasafi mwana ya Laele. 25 Kisalu ya bana ya Gershoni+ na tenta ya lukutakanu vandaka ya kukeba nzo-tenta mpi tenta,+ lele ya kufika yo,+ rido+ ya munoko ya tenta ya lukutakanu, 26 barido+ ya ke lela ya kibansala, rido+ ya munoko ya kibansala yina kele na nziunga ya nzo-tenta mpi mesa-kimenga, bansinga na yo ya tenta, mpi bisalu yonso ya me tala bima yai.

27 Dibuta ya bana ya Amrami, dibuta ya bana ya Yisare, dibuta ya bana ya Ebroni, mpi dibuta ya bana ya Uziele katukaka na Kohati. Yai mabuta ya bana ya Kohati.+ 28 Ntalu ya babakala yonso yantika na ngonda mosi mata vandaka 8 600; bo vandaka ti kisalu ya kukeba kisika ya santu.+ 29 Mabuta ya bana ya Kohati salaka camp na bo na ndambu ya sudi ya nzo-tenta.+ 30 Mfumu ya nzo ya batata ya mabuta ya bana ya Kohati vandaka Elisafani mwana ya Uziele.+ 31 Bo vandaka ti kiyeka ya kutala Sanduku,+ mesa,+ kima ya kutudila minda,+ bamesa-kimenga,+ bisadilu+ yina bo ke sadilaka sambu na kusala kisalu na kisika ya santu, rido,+ mpi bisalu yonso ya me tala bima yai.+

32 Mfumu ya bamfumu ya Balevi vandaka Eleazare+ mwana ya nganga-nzambi Aroni, yina vandaka kukengila bantu yina vandaka kulungisa bisalu ya kisika ya santu.

33 Dibuta ya bana ya Mali mpi dibuta ya bana ya Mushi katukaka na Merari. Yai mabuta ya bana ya Merari.+ 34 Ntalu ya babakala yonso yina bo sonikaka bazina yantika na ngonda mosi mata vandaka 6 200.+ 35 Mfumu ya nzo ya batata ya mabuta ya bana ya Merari vandaka Suriele mwana ya Abihaile. Bo salaka camp na bo na ndambu ya nordi ya nzo-tenta.+ 36 Bana ya Merari vandaka na kisalu ya kukengila makunzi+ ya nzo-tenta, banti+ na yo, makunzi+ na yo ya nene, mabulu na yo, bisadilu+ na yo yonso, mpi bisalu yonso ya me tala bima yai,+ 37 mpi makunzi yina vandaka na nziunga ya kibansala mpi mabulu,+ bapike ya tenta, mpi bansinga ya tenta.

38 Moize ti Aroni mpi bana na yandi salaka camp na bo na ntwala ya nzo-tenta na ndambu ya esti, na ntwala ya tenta ya lukutakanu na ndambu yina ntangu ke basikaka. Bo vandaka na kisalu ya kukeba kisika ya santu, yo vandaka kisalu na bo sambu na mambote ya bantu ya Izraele. Konso muntu yina kele ve ti nswa* yina ke pusana pene-pene, bo fwete fwa+ yandi.

39 Balevi yonso ya babakala yantika na ngonda mosi mata, yina Moize ti Aroni sonikaka bazina na kutadila mabuta na bo na kulanda nsiku ya Yehowa, vandaka 22 000.

40 Ebuna Yehowa tubilaka Moize nde: “Sonika bazina ya bana-babakala yonso ya ntete ya bantu ya Izraele yantika na ngonda mosi mata,+ tanga bo, mpi sonika bazina na bo na lisiti. 41 Nge fwete baka Balevi sambu na mono—mono kele Yehowa—na kisika ya bana yonso ya ntete ya bantu ya Izraele,+ mpi baka bambisi ya bwala ya Balevi na kisika ya bana ya ntete yonso ya bambisi ya bwala ya bantu ya Izraele.”+ 42 Moize sonikaka bazina ya bana yonso ya ntete ya bantu ya Izraele, kaka mutindu Yehowa songaka yandi. 43 Ntalu ya bana-babakala yonso ya ntete yina bo sonikaka bazina yantika na ngonda mosi mata vandaka 22 273.

44 Yehowa landaka kutubila Moize nde: 45 “Baka Balevi na kisika ya bana yonso ya ntete ya bantu ya Izraele, mpi baka bambisi ya bwala ya Balevi na kisika ya bambisi ya bwala ya bantu ya Izraele, mpi Balevi fwete kuma ya mono. Mono kele Yehowa. 46 Bonso nkudulu+ ya bana ya ntete 273 ya bantu ya Izraele, yina me lutana na zulu ya Balevi,+ 47 nge fwete baka bashekele* tanu sambu na muntu mosi-mosi,+ na kutadila shekele ya kisika ya santu.* Shekele mosi kele bagera* 20.+ 48 Nge fwete pesa Aroni mpi bana na yandi mbongo yina bonso ntalu ya nkudulu ya bantu yina me luta na zulu na bo.” 49 Moize bakaka mbongo ya ntalu ya kusumba diaka bantu sambu na bantu yina lutaka na zulu ya ntalu ya nkudulu ya Balevi. 50 Yandi bakaka mbongo yina na bana ya ntete ya bantu ya Izraele, bashekele 1 365, na kutadila shekele ya kisika ya santu. 51 Ebuna Moize pesaka mbongo ya ntalu ya nkudulu na Aroni mpi na bana na yandi na kulanda ndinga* ya Yehowa, kaka mutindu Yehowa songaka Moize.

4 Yehowa tubilaka Moize ti Aroni nde: 2 “Beno fwete tanga ntalu ya bana-babakala ya Kohati+ na kati ya bana ya Levi, na kutadila mabuta na bo mpi na kutadila banzo ya batata na bo, 3 bantu yonso ya kele ti bamvula yantika 30+ tii na 50+ yina kele na kimvuka ya bo me solaka na kusala na tenta ya lukutakanu.+

4 “Yai kisalu ya bana ya Kohati na tenta ya lukutakanu.+ Yo kele kima ya kuluta santu: 5 Ntangu bo ke katula camp, Aroni ti bana na yandi ta kwisa mpi ta katula rido+ yina ke fikaka, ebuna bo ta fika sanduku ya Kimbangi+ ti rido yina. 6 Bo ta tula lele ya mpusu ya mbisi ya bo ke bingaka foke na zulu na yo mpi ta tandula lele ya ble ya ngolo na zulu na yo mpi bo ta kotisa banti+ ya kunatila yo na bisika na yo.

7 “Bo ta tandula mpi lele ya ble na zulu ya mesa ya mampa ya kumonisa,+ mpi bo ta tula malonga, makopa, babolo, mpi mabungu ya dikabu ya malafu+ na zulu na yo; dikabu ya mampa+ ya ntangu yonso fwete bikala na zulu na yo. 8 Bo ta tandula lele ya mbwaki mingi na zulu na yo mpi ta fika yo ti lele ya mpusu ya mbisi ya bo ke bingaka foke, mpi bo ta kotisa banti+ ya kunatila yo na bisika na yo. 9 Na nima bo ta baka lele ya ble mpi ta fika kima ya kutudila minda+ sambu na nsemo, kumosi ti minda,+ bapense, bima ya kunatila tiya,+ mpi mabungu na yo yonso ya bo ke tudilaka mafuta yina bo ke sadilaka sambu na kuyidika yo. 10 Bo ta kangisa yo ti bisadilu na yo yonso na lele mosi ya mpusu ya mbisi ya bo ke bingaka foke mpi ta tula yo na zulu ya nti ya kunatila. 11 Mpi bo ta tandula lele mosi ya ble na zulu ya mesa-kimenga ya wolo,+ bo ta fika yo ti lele ya mpusu ya mbisi ya bo ke bingaka foke, ebuna bo ta tula banti+ ya kunatila yo na bisika na yo. 12 Na nima, bo ta baka bima+ yonso ya kisalu yina bo ke sadilaka ntangu yonso na kisika ya santu mpi ta tula yo na lele mosi ya ble mpi ta fika yo ti lele ya mpusu ya mbisi ya bo ke bingaka foke, ebuna bo ta tula yo na zulu ya nti ya kunatila.

13 “Bo fwete katula putulu ya tiya* na mesa-kimenga+ mpi kutandula lele ya lene ya mbwaki-ble na zulu na yo. 14 Bo ta tula na zulu na yo bisadilu na yo yonso yina bo ke sadilaka ntangu bo ke salaka kisalu na mesa-kimenga: bima ya kunatila tiya, bansomo, bapawu, mpi babolo, bisadilu yonso ya mesa-kimenga;+ mpi bo fwete tandula lele ya mpusu ya mbisi ya bo ke bingaka foke na zulu na yo mpi kutula banti+ ya kunatila yo na bisika na yo.

15 “Aroni ti bana na yandi fwete manisa kufika kisika ya santu+ mpi bima yonso ya kisika ya santu ntangu bo ke katula camp. Ebuna bana ya Kohati ta kwisa sambu na kunata yo,+ kansi bo fwete simba ve kisika ya santu kana ve bo ta fwa.+ Yai kele kisalu* ya bana ya Kohati na yina me tala tenta ya lukutakanu.

16 “Eleazare,+ mwana ya nganga-nzambi Aroni, kele ti kisalu ya kukengila mafuta ya kupedisila+ minda, ndumbu ya nsudi ya kitoko,+ dikabu ya mbuma ya bo fwete pesa mbala na mbala, mpi mafuta ya santu.+ Yandi kele ti kisalu ya kukengila nzo-tenta ya mvimba ti bima yonso yina kele na kati na yo, mpi kisika ya santu ti bisadilu na yo.”

17 Yehowa tubilaka diaka Moize ti Aroni nde: 18 “Beno bika ve nde dikanda ya mabuta ya bana ya Kohati+ kumana na kufwa na kati ya Balevi. 19 Beno sala mambu yai sambu na bo na mpila nde bo bikala na luzingu mpi bo fwa ve sambu bo me pusana pene-pene ya bima ya kuluta santu.+ Aroni ti bana na yandi ta kota mpi ta pesa konso muntu kisalu na yandi mpi bima yina ya yandi fwete nata. 20 Bo fwete kota ve mpi kumona bima ya santu ata sambu na ntangu fioti, kana ve bo ta fwa.”+

21 Ebuna Yehowa tubilaka Moize nde: 22 “Nge fwete tanga ntalu ya bana-babakala ya Gershoni+ na kutadila banzo ya batata na bo mpi mabuta na bo. 23 Nge fwete sonika bazina ya bantu yonso yina kele ti bamvula yantika 30 tii na 50 yina kele na kimvuka ya bo me solaka na kusala na tenta ya lukutakanu. 24 Yai kele bima yina bo me pesa mabuta ya bana ya Gershoni na kukeba mpi na kunata:+ 25 Bo ta nata bilele ya tenta ya nzo-tenta,+ tenta ya lukutakanu, lele ya kufika yo mpi lele ya mpusu ya mbisi ya bo ke bingaka foke yina kele na zulu na yo,+ rido ya munoko ya tenta ya lukutakanu,+ 26 barido ya ke lela ya kibansala,+ rido ya munoko ya kibansala+ yina kele na nziunga ya nzo-tenta mpi ya mesa-kimenga, bansinga ya tenta na yo mpi bisadilu na yo yonso, mpi bima yonso yina bo ke sadilaka na kisalu na yo. Yai kele kisalu na bo. 27 Aroni ti bana na yandi fwete kengila bisalu yonso mpi bizitu yonso ya bana ya Gershoni;+ beno ta pesa bo bizitu yai yonso bonso kisalu na bo. 28 Yai kisalu yina mabuta ya bana ya Gershoni fwete sala na tenta ya lukutakanu,+ mpi bisalu na bo kele na nsi ya lutwadisu ya Itamare+ mwana ya nganga-nzambi Aroni.

29 “Sambu na bana ya Merari,+ nge ta sonika bazina na bo na kutadila mabuta na bo mpi nzo ya batata na bo. 30 Nge ta sonika bazina na bo yantika bamvula 30 tii na 50, bantu yonso yina kele na kimvuka ya bo me solaka sambu na kisalu ya tenta ya lukutakanu. 31 Yai bima yina bo fwete nata+ na kutadila kisalu na bo na tenta ya lukutakanu: makunzi+ ya nzo-tenta, banti+ na yo, makunzi+ na yo ya nene, mabulu na yo;+ 32 makunzi+ ya nziunga ya kibansala, mabulu na yo,+ bapike+ ya tenta, mpi bansinga ya tenta kumosi ti bima na yo yonso mpi bisalu yonso ya ke tadila bima yai. Na kutadila bazina na bo, nge ta pesa bo bima yina bo kele ti kisalu ya kunata. 33 Yai mutindu mabuta ya bana ya Merari+ fwete sala kisalu na tenta ya lukutakanu, na nsi ya lutwadisu ya Itamare mwana ya nganga-nzambi Aroni.”+

34 Moize ti Aroni mpi bamfumu+ ya kimvuka ya bantu sonikaka bazina ya bana ya Kohati+ na kutadila mabuta na bo mpi nzo ya batata na bo, 35 bantu yonso ya kele ti bamvula yantika 30 tii na 50 yina vandaka na kimvuka yina bo me solaka na kusala na tenta ya lukutakanu.+ 36 Ntalu ya bantu yonso yina bo sonikaka bazina na kutadila mabuta na bo vandaka 2 750.+ 37 Bo sonikaka bazina ya bantu yai na mabuta ya bana ya Kohati, bantu yonso yina vandaka kusala na tenta ya lukutakanu. Moize ti Aroni sonikaka bazina na bo na kulanda nsiku yina Yehowa pesaka na nzila ya Moize.+

38 Bo sonikaka bazina ya bana ya Gershoni+ na kutadila mabuta na bo mpi nzo ya batata na bo, 39 bantu yonso ya kele ti bamvula yantika 30 tii na 50 yina vandaka na kimvuka yina bo me solaka na kusala na tenta ya lukutakanu. 40 Ntalu ya bantu yonso yina bo sonikaka bazina na kutadila mabuta na bo mpi na kutadila nzo ya batata na bo vandaka 2 630.+ 41 Yai mutindu bo sonikaka bazina ya mabuta ya bana ya Gershoni, bantu yonso yina vandaka kusala na tenta ya lukutakanu. Moize ti Aroni sonikaka bazina na bo na nsiku ya Yehowa.+

42 Bo sonikaka bazina ya bana ya Merari na kutadila mabuta na bo mpi nzo ya batata na bo, 43 bantu yonso ya kele ti bamvula yantika 30 tii na 50 yina vandaka na kimvuka yina bo me solaka na kusala na tenta ya lukutakanu.+ 44 Ntalu ya bantu yonso yina bo sonikaka bazina na kutadila mabuta na bo vandaka 3 200.+ 45 Yai mutindu bo sonikaka bazina ya mabuta ya bana ya Merari, yina Moize ti Aroni sonikaka bazina na bo na kulanda nsiku yina Yehowa pesaka na nzila ya Moize.+

46 Moize ti Aroni mpi bamfumu ya Izraele sonikaka bazina ya Balevi yai yonso na kutadila mabuta na bo mpi na kutadila banzo ya batata na bo; 47 bo vandaka ti bamvula yantika 30 tii na 50, mpi bo solaka bo yonso na kusala mpi kunata bizitu ya ke tadila tenta ya lukutakanu.+ 48 Ntalu ya bantu yonso yina bo sonikaka bazina vandaka 8 580.+ 49 Bo sonikaka bazina na bo na kulanda nsiku yina Yehowa pesaka na nzila ya Moize, konso muntu na kutadila kisalu yina bo pesaka yandi mpi kizitu na yandi; bo sonikaka bazina na bo kaka mutindu Yehowa songaka Moize.

5 Yehowa tubilaka diaka Moize nde: 2 “Songa bantu ya Izraele na kubasisa na camp konso muntu yina me bela maladi ya lepre,+ konso muntu yina masa+ ke basika yandi, mpi konso muntu yina me kuma mvindu sambu yandi me simba muntu ya kufwa.*+ 3 Yo vanda bakala to nkento, beno fwete basisa bo. Beno fwete basisa bo na nganda ya camp, sambu bo kumisa ve mvindu+ bacamp ya bantu yina mono ke zinga na kati na bo.”+ 4 Yo yina, bantu ya Izraele salaka mutindu yina mpi bo basisaka bo na camp. Bantu ya Izraele salaka kaka mutindu Yehowa songaka Moize.

5 Yehowa landaka kutubila Moize nde: 6 “Tubila bantu ya Izraele nde, ‘Kana bakala to nkento mosi kusala konso disumu yina bantu ke salaka mpi kusala mambu kukonda kwikama na ntwala ya Yehowa, muntu* yina me sala mbi.+ 7 Yandi* fwete funguna+ disumu yina yandi me sala* mpi kuvutula ntalu ya mvimba sambu na kufuta mbi na yandi mpi kuyika ndambu mosi na kati ya bandambu tanu ya ntalu na yo;+ yandi fwete pesa yo na muntu yina yandi salaka mbi. 8 Kansi kana muntu yina bo me sala mbi kele ve ti mpangi ya menga sambu yandi baka kima yina bo ke futa, bo fwete vutula yo na Yehowa mpi yo ta vanda ya nganga-nzambi, katula dimeme ya bakala ya kufika masumu yina nganga-nzambi ta pesa sambu na kufika masumu na yandi.+

9 “‘Konso dikabu ya santu+ ya bantu ya Izraele yina bo ke pesa na nganga-nzambi ta kuma ya yandi.+ 10 Bima ya santu ya konso muntu ta bikala ya yandi. Konso kima yina muntu ke pesa nganga-nzambi, yo ta vanda ya nganga-nzambi.’”

11 Yehowa landaka kutubila Moize nde: 12 “Tubila bantu ya Izraele mpi songa bo nde, ‘Yai mambu ya beno fwete sala kana nkento ya muntu mosi me vila nzila mpi me konda kwikama na bakala na yandi, 13 mpi bakala ya nkaka me vukisa nitu ti yandi,+ kansi bakala na yandi zabaka ve mpi yo me bikala kinsweki, na mpila nde yandi me kudikumisa mvindu kansi mbangi kele ve sambu na kufunda yandi mpi bo me kanga yandi ve: 14 Kana bakala yina me kuma kimpala mpi ke tula ntembe na kwikama ya nkento na yandi ntangu nkento me kudikumisa mvindu, to kana bakala yina me kuma kimpala mpi ke tula ntembe na kwikama ya nkento na yandi ntangu nkento me kudikumisa ve mvindu, 15 bakala yina fwete nata nkento na yandi na nganga-nzambi kumosi ti dikabu sambu na nkento na yandi, ndambu mosi na kati ya bandambu kumi ya efa* ya fufu ya orze. Yandi fwete tiamuna ve mafuta na zulu na yo to kutula ndumbu ya mpembe na zulu na yo, sambu yo kele dikabu ya mbuma ya kimpala, dikabu ya mbuma yina ke yibusa mbi yina salamaka.

16 “‘Nganga-nzambi ta nata nkento yina na ntwala mpi ta tedimisa yandi na ntwala ya Yehowa.+ 17 Nganga-nzambi ta baka masa ya santu na dibungu mpi yandi ta baka ndambu ya mfututu ya ntoto ya nzo-tenta mpi ta tula yo na masa yina. 18 Ebuna nganga-nzambi ta tedimisa nkento yina na ntwala ya Yehowa, ta kangula nsuki ya nkento yina mpi ta tula dikabu ya mbuma na bipala-pala ya maboko ya nkento yina sambu yo vanda ngibusa, disongidila, dikabu ya mbuma ya kimpala,+ mpi nganga-nzambi ta vanda ti masa ya ndudi ya ke singaka+ na diboko na yandi.

19 “‘Ebuna nganga-nzambi ta songa nkento yina na kuzenga kieleka, mpi ta tubila yandi nde: “Kana bakala ya nkaka vukisaka ve nitu ti nge ntangu nge vandaka na nsi ya kiyeka ya bakala+ na nge mpi nge vilaka ve nzila mpi kudikumisaka ve mvindu, bika nde masa yai ya ndudi ya ke singaka kusala nge kima ve. 20 Kansi kana nge vilaka nzila ntangu nge vandaka na nsi ya kiyeka ya bakala na nge na kudikumisaka mvindu, mpi nge vukisaka nitu ti bakala ya nkaka+—” 21 Ebuna nganga-nzambi ta songa nkento yina na kudia ndefi ya ke singaka, mpi nganga-nzambi ta tubila yandi nde: “Bika nde Yehowa kukumisa nge mbandu yina bantu ta sadilaka ntangu bo ke singa mpi ke dia ndefi, ntangu Yehowa ke yumisa* mbendi* na nge mpi ke vimbisa divumu na nge. 22 Masa yai ya ke singaka ta kota na misopo na nge sambu yo vimbisa divumu na nge mpi yo yumisa* mbendi* na nge.” Ebuna nkento yina ta tuba nde: “Amen! Amen!”*

23 “‘Ebuna nganga-nzambi fwete sonika balusingu yai na mukanda mpi kuvwansa yo na masa yina ya ndudi. 24 Na nima, yandi ta nwisa nkento yina masa ya ndudi yina ke singaka, ebuna masa yina ke singaka ta kota na misopo na yandi mpi ta buta kima mosi ya ndudi. 25 Nganga-nzambi fwete baka dikabu ya mbuma ya kimpala+ na maboko ya nkento yina mpi kunikisa yo na ntwala mpi na nima na ntwala ya Yehowa, mpi yandi ta nata yo pene-pene ya mesa-kimenga. 26 Nganga-nzambi ta baka ndambu ya dikabu ya mbuma na diboko bonso dikabu ya kifwani mpi yandi ta yoka yo na zulu ya mesa-kimenga sambu yo basisa midinga,+ na nima yandi ta nwisa nkento yina masa yina. 27 Ntangu yandi ta nwisa nkento yina masa, kana yandi kudikumisaka mvindu mpi salaka diambu ya kukonda kwikama na ntwala ya bakala na yandi, masa ya ke singaka ta kota na nitu na yandi mpi yo ta kuma kima ya ndudi, divumu na yandi ta vimba, mpi mbendi* na yandi ta yuma,* ebuna nkento yina ta kuma kima ya bo me singa na kati ya bantu. 28 Kansi, kana nkento yina kudikumisaka ve mvindu mpi yandi kele bunkete, yandi ta baka ve ndola ya mutindu yai, mpi yandi ta baka divumu mpi ta buta bana.

29 “‘Yai nsiku ya ke tadila kimpala,+ kana nkento mosi me vila nzila mpi me kudikumisa mvindu ntangu yandi kele na nsi ya kiyeka ya bakala na yandi, 30 to kana bakala mosi me kuma kimpala mpi ke yindula nde nkento na yandi me konda kwikama; yandi fwete tedimisa nkento na yandi na ntwala ya Yehowa, mpi nganga-nzambi fwete zitisa nsiku yai yonso sambu na yandi. 31 Bakala ta vanda ve na makambu, kansi nkento na yandi ta vutula munoko sambu na makambu na yandi.’”

6 Yehowa tubilaka diaka Moize nde: 2 “Tubila bantu ya Izraele mpi songa bo nde, ‘Kana bakala to nkento mosi kusala lusilu ya mfunu ya kuzinga bonso Nazire*+ sambu na Yehowa, 3 yandi fwete buya vinu mpi malafu ya nkaka ya ke lawusaka. Yandi fwete nwa ve masa ya ngani ya vinu to masa ya ngani ya konso kima yina ke lawusaka.+ Yandi fwete nwa ve konso masa yina bo me sala ti bambuma ya vinu, to kudia bambuma ya vinu, yo vanda ya mubisu to ya kuyuma. 4 Bilumbu yonso ya Kinazire na yandi, yandi fwete dia ve bima yonso yina bo me sala ti bambuma ya vinu, yo vanda bambuma ya vinu ya mubisu to bampusu na yo.

5 “‘Bilumbu yonso ya lusilu na yandi ya Kinazire, lutebu ta luta ve na ntu na yandi.+ Yandi fwete bikala santu mpi kubikisa nsuki ya ntu na yandi yo yela tii kuna bilumbu yina bo me tula yandi na kingenga sambu na Yehowa ta lunga. 6 Yandi fwete pusana ve pene-pene* ya muntu* ya kufwa na bilumbu yonso ya bo me tula yandi na kingenga sambu na Yehowa. 7 Ata tata na yandi, mama na yandi, mpangi na yandi ya bakala to ya nkento kufwa, yandi lenda kudikumisa ve mvindu,+ sambu kidimbu ya Kinazire na yandi sambu na Nzambi na yandi kele na ntu na yandi.

8 “‘Yandi kele santu sambu na Yehowa bilumbu yonso ya Kinazire na yandi. 9 Kansi kana muntu kufwa na kintulumukina na lweka na yandi+ mpi yandi kumisa mvindu nsuki yina kele kidimbu ya ke monisa nde bo me tulaka yandi na kingenga sambu na Nzambi,* yandi fwete zenga nsuki na yandi+ na kilumbu yina bo ke ndima nde yandi me kuma bunkete. Yandi fwete zenga yo na kilumbu ya nsambwadi. 10 Na kilumbu ya nana yandi fwete nata mayembe zole to bana-bapizio zole na nganga-nzambi na munoko ya tenta ya lukutakanu. 11 Nganga-nzambi ta pesa mosi bonso dikabu sambu na disumu mpi ya nkaka bonso dikabu ya kuyoka mpi ta fika disumu+ na yandi sambu yandi kumaka mvindu sambu na muntu ya kufwa.* Na nima yandi fwete santisa ntu na yandi na kilumbu yina. 12 Yandi fwete kuditula diaka na kingenga sambu na Yehowa sambu na bilumbu ya Kinazire na yandi, mpi yandi ta nata mwana-dimeme ya bakala yina kele na mvula na yo ya ntete bonso dikabu sambu na makambu. Kansi, bo ta tanga ve bilumbu ya ntete sambu yandi kumisaka Kinazire na yandi mvindu.

13 “‘Yai nsiku ya me tala Nazire: Ntangu yandi me lungisa bilumbu ya Kinazire na yandi,+ bo ta nata yandi na munoko ya tenta ya lukutakanu. 14 Kuna yandi fwete pesa dikabu na yandi na Yehowa: mwana-dimeme mosi ya bakala ya kukonda kifu yina kele na mvula na yo ya ntete bonso dikabu ya kuyoka,+ mwana-dimeme mosi ya nkento ya kukonda kifu yina kele na mvula na yo ya ntete bonso dikabu sambu na disumu,+ dimeme mosi ya bakala ya kukonda kifu bonso kimenga ya kinduku,+ 15 kitunga ya mampa ya kukonda levire ya bo me sala bonso lupetu na fufu ya kitoko ya bo me vukisa ti mafuta, bagaleti ya kukonda levire ya bo me pakula mafuta, makabu na yo ya mbuma+ mpi makabu na yo ya malafu.+ 16 Nganga-nzambi ta pesa yo na ntwala ya Yehowa mpi ta pesa dikabu na yandi sambu na disumu mpi dikabu na yandi ya kuyoka. 17 Yandi ta pesa dimeme ya bakala bonso kimenga ya kinduku na Yehowa nzila mosi ti kitunga ya mampa ya kukonda levire; nganga-nzambi ta pesa dikabu na yo ya mbuma+ mpi dikabu na yo ya malafu.

18 “‘Ebuna, Nazire fwete zenga nsuki ya ntu na yandi*+ yina yandi vandaka kuzenga ve na munoko ya tenta ya lukutakanu; yandi ta baka nsuki ya ntu na yandi yina yelaka na ntangu ya Kinazire na yandi mpi ta tula yo na tiya yina kele na nsi ya kimenga ya kinduku. 19 Nganga-nzambi fwete baka diboko ya dimeme ya bakala yina bo me tokisa,+ mpi kubaka na kitunga dimpa mosi ya kukonda levire ya bo me sala bonso lupetu, ti galeti mosi ya kukonda levire, ebuna yandi ta tula yo na bipala-pala ya maboko ya Nazire na nima ya kuzenga kidimbu ya Kinazire na yandi. 20 Nganga-nzambi fwete nikisa yo na nima mpi na ntwala bonso dikabu ya kunikisa na ntwala ya Yehowa.+ Yo kele kima ya santu sambu na nganga-nzambi, kumosi ti ntulu ya dikabu ya kunikisa mpi dikulu ya dikabu yina.+ Na nima, Nazire lenda nwa vinu.

21 “‘Yai nsiku ya me tala Nazire+ yina me sala lusilu: Kana yandi sala lusilu mpi yandi lenda pesa Yehowa dikabu yina me luta mambu ya bo ke lomba sambu na Kinazire na yandi, yandi fwete lungisa lusilu na yandi sambu na nsiku ya Kinazire na yandi.’”

22 Na nima, Yehowa tubilaka Moize nde: 23 “Songa Aroni ti bana na yandi nde, ‘Yai mutindu beno fwete sakumuna+ bantu ya Izraele. Beno tubila bo nde:

24 “Bika Yehowa kusakumuna nge+ mpi kutanina nge.

25 Bika Yehowa kusala nde luse na yandi kusema na zulu na nge,+ mpi yandi ndima nge.

26 Bika Yehowa kutombula luse na yandi na ntwala na nge mpi kupesa nge ngemba.”’+

27 Bo fwete tula zina na mono na bantu ya Izraele,+ sambu mono sakumuna bo.”+

7 Kilumbu yina Moize manisaka kutedimisa nzo-tenta,+ yandi tulaka yo mafuta+ mpi santisaka yo, kumosi ti bima na yo yonso, mesa-kimenga, mpi bisadilu+ na yo yonso. Ntangu yandi tulaka bima yai+ mafuta mpi santisaka yo, 2 bamfumu ya Izraele,+ bamfumu ya banzo ya batata na bo, pesaka dikabu. Bamfumu yai ya makanda yina twadisaka kisalu ya kusonikisa bazina 3 nataka dikabu na bo na ntwala ya Yehowa: bapusu-pusu sambanu ya bo me fika mpi bangombe 12, pusu-pusu mosi sambu na bamfumu zole mpi ngombe mosi sambu na konso mfumu; mpi bo pesaka yo na ntwala ya nzo-tenta. 4 Yehowa tubilaka Moize nde: 5 “Ndima bima yai ya bo ke pesa, sambu beno ta sadila yo sambu na kisalu ya tenta ya lukutakanu, mpi nge fwete pesa yo na Balevi, na konso muntu mutindu bisalu na yandi ke lomba.”

6 Yo yina Moize ndimaka na kubaka bapusu-pusu ti bangombe yina mpi yandi pesaka yo na Balevi. 7 Yandi pesaka bapusu-pusu zole ti bangombe iya na bana ya Gershoni, na kutadila bima yina bo vandaka na yo mfunu sambu na bisalu na bo;+ 8 yandi pesaka bapusu-pusu iya ti bangombe nana na bana ya Merari, na kutadila bima yina bo vandaka na yo mfunu sambu na bisalu na bo, na nsi ya lutwadisu ya Itamare mwana ya nganga-nzambi Aroni.+ 9 Kansi yandi pesaka ve ata kima mosi na bana ya Kohati sambu bisalu na bo vandaka kutadila kisalu ya kisika ya santu,+ mpi bo vandaka kunata bima ya santu na mapeka na bo.+

10 Kansi bamfumu pesaka dikabu na bo sambu na kuyantika kusadila+ mesa-kimenga, na kilumbu yina bo tulaka yo mafuta. Ntangu bamfumu pesaka dikabu na bo na ntwala ya mesa-kimenga, 11 Yehowa tubilaka Moize nde: “Konso mfumu ta pesa dikabu na yandi sambu na kuyantika kusadila mesa-kimenga, mfumu mosi kilumbu mosi, na bilumbu ya ke landana.”

12 Muntu yina pesaka dikabu na yandi na kilumbu ya ntete vandaka Nashoni,+ mwana ya Aminadabi, ya dikanda ya Yuda. 13 Dikabu na yandi vandaka dilonga mosi ya arza yina kilo na yo vandaka bashekele* 130 mpi bolo mosi ya arza yina kilo na yo vandaka bashekele 70 na kutadila shekele ya kisika ya santu,*+ yonso zole vandaka ya kufuluka na fufu ya kitoko ya bo me vukisa ti mafuta, sambu na dikabu ya mbuma;+ 14 dikopa* ya wolo yina kilo na yo vandaka bashekele 10, ya kufuluka ti ndumbu; 15 mwana-ngombe mosi ya bakala, dimeme mosi ya bakala, mpi mwana-dimeme mosi ya bakala yina kele na mvula na yo ya ntete sambu na dikabu ya kuyoka;+ 16 mwana-nkombo mosi sambu na dikabu sambu na disumu;+ 17 mpi sambu na kimenga ya kinduku:+ bangombe zole, mameme tanu ya babakala, bankombo tanu ya babakala, mpi bana-mameme tanu ya babakala, konso mbisi vandaka ti mvula mosi. Yai dikabu ya Nashoni mwana ya Aminadabi.+

18 Na kilumbu ya zole, Netanele+ mwana ya Suare, mfumu ya dikanda ya Isakare, pesaka dikabu. 19 Sambu na dikabu na yandi, yandi pesaka dilonga mosi ya arza yina kilo na yo vandaka bashekele 130 mpi bolo mosi ya arza yina kilo na yo vandaka bashekele 70 na kutadila shekele ya kisika ya santu,+ yonso zole vandaka ya kufuluka na fufu ya kitoko ya bo me vukisa ti mafuta, sambu na dikabu ya mbuma;+ 20 dikopa mosi ya wolo yina kilo na yo vandaka bashekele 10, ya kufuluka ti ndumbu; 21 mwana-ngombe mosi ya bakala, dimeme mosi ya bakala, mpi mwana-dimeme mosi ya bakala yina kele na mvula na yo ya ntete sambu na dikabu ya kuyoka;+ 22 mwana-nkombo mosi sambu na dikabu sambu na disumu;+ 23 mpi sambu na kimenga ya kinduku:+ bangombe zole, mameme tanu ya babakala, bankombo tanu ya babakala, mpi bana-mameme tanu ya babakala, konso mbisi vandaka ti mvula mosi. Yai dikabu ya Netanele mwana ya Suare.

24 Na kilumbu ya tatu, mfumu ya bana ya Zebuloni, Eliabi+ mwana ya Heloni, 25 pesaka dikabu na yandi: dilonga mosi ya arza yina kilo na yo vandaka bashekele 130 mpi bolo mosi ya arza yina kilo na yo vandaka bashekele 70 na kutadila shekele ya kisika ya santu,+ yonso zole vandaka ya kufuluka na fufu ya kitoko ya bo me vukisa ti mafuta, sambu na dikabu ya mbuma;+ 26 dikopa mosi ya wolo yina kilo na yo vandaka bashekele 10, ya kufuluka ti ndumbu; 27 mwana-ngombe mosi ya bakala, dimeme mosi ya bakala, mpi mwana-dimeme mosi ya bakala yina kele na mvula na yo ya ntete sambu na dikabu ya kuyoka;+ 28 mwana-nkombo mosi sambu na dikabu sambu na disumu;+ 29 mpi sambu na kimenga ya kinduku:+ bangombe zole, mameme tanu ya babakala, bankombo tanu ya babakala, mpi bana-mameme tanu ya babakala, konso mbisi vandaka ti mvula mosi. Yai dikabu ya Eliabi+ mwana ya Heloni.

30 Na kilumbu ya iya, mfumu ya bana ya Rubeni, Elisure+ mwana ya Shedeure, 31 pesaka dikabu na yandi: dilonga mosi ya arza yina kilo na yo vandaka bashekele 130 mpi bolo mosi ya arza yina kilo na yo vandaka bashekele 70 na kutadila shekele ya kisika ya santu,+ yonso zole vandaka ya kufuluka na fufu ya kitoko ya bo me vukisa ti mafuta, sambu na dikabu ya mbuma;+ 32 dikopa mosi ya wolo yina kilo na yo vandaka bashekele 10, ya kufuluka ti ndumbu; 33 mwana-ngombe mosi ya bakala, dimeme mosi ya bakala, mpi mwana-dimeme mosi ya bakala yina kele na mvula na yo ya ntete sambu na dikabu ya kuyoka;+ 34 mwana-nkombo mosi sambu na dikabu sambu na disumu;+ 35 mpi sambu na kimenga ya kinduku:+ bangombe zole, mameme tanu ya babakala, bankombo tanu ya babakala, mpi bana-mameme tanu ya babakala, konso mbisi vandaka ti mvula mosi. Yai dikabu ya Elisure+ mwana ya Shedeure.

36 Na kilumbu ya tanu, mfumu ya bana ya Simeoni, Shelumiele+ mwana ya Surishadai, 37 pesaka dikabu na yandi: dilonga mosi ya arza yina kilo na yo vandaka bashekele 130 mpi bolo mosi ya arza yina kilo na yo vandaka bashekele 70 na kutadila shekele ya kisika ya santu,+ yonso zole vandaka ya kufuluka na fufu ya kitoko ya bo me vukisa ti mafuta, sambu na dikabu ya mbuma;+ 38 dikopa mosi ya wolo yina kilo na yo vandaka bashekele 10, ya kufuluka ti ndumbu; 39 mwana-ngombe mosi ya bakala, dimeme mosi ya bakala, mpi mwana-dimeme mosi ya bakala yina kele na mvula na yo ya ntete sambu na dikabu ya kuyoka;+ 40 mwana-nkombo mosi sambu na dikabu sambu na disumu;+ 41 mpi sambu na kimenga ya kinduku:+ bangombe zole, mameme tanu ya babakala, bankombo tanu ya babakala, mpi bana-mameme tanu ya babakala, konso mbisi vandaka ti mvula mosi. Yai dikabu ya Shelumiele+ mwana ya Surishadai.

42 Na kilumbu ya sambanu, mfumu ya bana ya Gadi, Eliasafi+ mwana ya Deuele, 43 pesaka dikabu na yandi: dilonga mosi ya arza yina kilo na yo vandaka bashekele 130 mpi bolo mosi ya arza yina kilo na yo vandaka bashekele 70 na kutadila shekele ya kisika ya santu,+ yonso zole vandaka ya kufuluka na fufu ya kitoko ya bo me vukisa ti mafuta, sambu na dikabu ya mbuma;+ 44 dikopa mosi ya wolo yina kilo na yo vandaka bashekele 10, ya kufuluka ti ndumbu; 45 mwana-ngombe mosi ya bakala, dimeme mosi ya bakala, mpi mwana-dimeme mosi ya bakala yina kele na mvula na yo ya ntete sambu na dikabu ya kuyoka;+ 46 mwana-nkombo mosi sambu na dikabu sambu na disumu;+ 47 mpi sambu na kimenga ya kinduku:+ bangombe zole, mameme tanu ya babakala, bankombo tanu ya babakala, mpi bana-mameme tanu ya babakala, konso mbisi vandaka ti mvula mosi. Yai dikabu ya Eliasafi+ mwana ya Deuele.

48 Na kilumbu ya nsambwadi, mfumu ya bana ya Efrayimi, Elishama+ mwana ya Amihudi, 49 pesaka dikabu na yandi: dilonga mosi ya arza yina kilo na yo vandaka bashekele 130 mpi bolo mosi ya arza yina kilo na yo vandaka bashekele 70 na kutadila shekele ya kisika ya santu,+ yonso zole vandaka ya kufuluka na fufu ya kitoko ya bo me vukisa ti mafuta, sambu na dikabu ya mbuma;+ 50 dikopa mosi ya wolo yina kilo na yo vandaka bashekele 10, ya kufuluka ti ndumbu; 51 mwana-ngombe mosi ya bakala, dimeme mosi ya bakala, mpi mwana-dimeme mosi ya bakala yina kele na mvula na yo ya ntete sambu na dikabu ya kuyoka;+ 52 mwana-nkombo mosi sambu na dikabu sambu na disumu;+ 53 mpi sambu na kimenga ya kinduku:+ bangombe zole, mameme tanu ya babakala, bankombo tanu ya babakala, mpi bana-mameme tanu ya babakala, konso mbisi vandaka ti mvula mosi. Yai dikabu ya Elishama+ mwana ya Amihudi.

54 Na kilumbu ya nana, mfumu ya bana ya Manase, Gamaliele+ mwana ya Pedasure, 55 pesaka dikabu na yandi: dilonga mosi ya arza yina kilo na yo vandaka bashekele 130 mpi bolo mosi ya arza yina kilo na yo vandaka bashekele 70 na kutadila shekele ya kisika ya santu,+ yonso zole vandaka ya kufuluka na fufu ya kitoko ya bo me vukisa ti mafuta, sambu na dikabu ya mbuma;+ 56 dikopa mosi ya wolo yina kilo na yo vandaka bashekele 10, ya kufuluka ti ndumbu; 57 mwana-ngombe mosi ya bakala, dimeme mosi ya bakala, mpi mwana-dimeme mosi ya bakala yina kele na mvula na yo ya ntete sambu na dikabu ya kuyoka;+ 58 mwana-nkombo mosi sambu na dikabu sambu na disumu;+ 59 mpi sambu na kimenga ya kinduku:+ bangombe zole, mameme tanu ya babakala, bankombo tanu ya babakala, mpi bana-mameme tanu ya babakala, konso mbisi vandaka ti mvula mosi. Yai dikabu ya Gamaliele+ mwana ya Pedasure.

60 Na kilumbu ya uvwa, mfumu+ ya bana ya Benyamini, Abidani+ mwana ya Gideoni, 61 pesaka dikabu na yandi: dilonga mosi ya arza yina kilo na yo vandaka bashekele 130 mpi bolo mosi ya arza yina kilo na yo vandaka bashekele 70 na kutadila shekele ya kisika ya santu,+ yonso zole vandaka ya kufuluka na fufu ya kitoko ya bo me vukisa ti mafuta, sambu na dikabu ya mbuma;+ 62 dikopa mosi ya wolo yina kilo na yo vandaka bashekele 10, ya kufuluka ti ndumbu; 63 mwana-ngombe mosi ya bakala, dimeme mosi ya bakala, mpi mwana-dimeme mosi ya bakala yina kele na mvula na yo ya ntete sambu na dikabu ya kuyoka;+ 64 mwana-nkombo mosi sambu na dikabu sambu na disumu;+ 65 mpi sambu na kimenga ya kinduku:+ bangombe zole, mameme tanu ya babakala, bankombo tanu ya babakala, mpi bana-mameme tanu ya babakala, konso mbisi vandaka ti mvula mosi. Yai dikabu ya Abidani+ mwana ya Gideoni.

66 Na kilumbu ya kumi, mfumu ya bana ya Dani, Ahiezere+ mwana ya Amishadai, 67 pesaka dikabu na yandi: dilonga mosi ya arza yina kilo na yo vandaka bashekele 130 mpi bolo mosi ya arza yina kilo na yo vandaka bashekele 70 na kutadila shekele ya kisika ya santu,+ yonso zole vandaka ya kufuluka na fufu ya kitoko ya bo me vukisa ti mafuta, sambu na dikabu ya mbuma;+ 68 dikopa mosi ya wolo yina kilo na yo vandaka bashekele 10, ya kufuluka ti ndumbu; 69 mwana-ngombe mosi ya bakala, dimeme mosi ya bakala, mpi mwana-dimeme mosi ya bakala yina kele na mvula na yo ya ntete, sambu na dikabu ya kuyoka;+ 70 mwana-nkombo mosi sambu na dikabu sambu na disumu;+ 71 mpi sambu na kimenga ya kinduku:+ bangombe zole, mameme tanu ya babakala, bankombo tanu ya babakala, mpi bana-mameme tanu ya babakala, konso mbisi vandaka ti mvula mosi. Yai dikabu ya Ahiezere+ mwana ya Amishadai.

72 Na kilumbu ya 11, mfumu ya bana ya Asere, Pagiele+ mwana ya Okrani, 73 pesaka dikabu na yandi: dilonga mosi ya arza yina kilo na yo vandaka bashekele 130 mpi bolo mosi ya arza yina kilo na yo vandaka bashekele 70 na kutadila shekele ya kisika ya santu,+ yonso zole vandaka ya kufuluka na fufu ya kitoko ya bo me vukisa ti mafuta, sambu na dikabu ya mbuma;+ 74 dikopa mosi ya wolo yina kilo na yo vandaka bashekele 10, ya kufuluka ti ndumbu; 75 mwana-ngombe mosi ya bakala, dimeme mosi ya bakala, mpi mwana-dimeme mosi ya bakala yina kele na mvula na yo ya ntete sambu na dikabu ya kuyoka;+ 76 mwana-nkombo mosi sambu na dikabu sambu na disumu;+ 77 mpi sambu na kimenga ya kinduku:+ bangombe zole, mameme tanu ya babakala, bankombo tanu ya babakala, mpi bana-mameme tanu ya babakala, konso mbisi vandaka ti mvula mosi. Yai dikabu ya Pagiele+ mwana ya Okrani.

78 Na kilumbu ya 12, mfumu ya bana ya Naftali, Ahira+ mwana ya Enani, 79 pesaka dikabu na yandi: dilonga mosi ya arza yina kilo na yo vandaka bashekele 130 mpi bolo mosi ya arza yina kilo na yo vandaka bashekele 70 na kutadila shekele ya kisika ya santu,+ yonso zole vandaka ya kufuluka na fufu ya kitoko ya bo me vukisa ti mafuta, sambu na dikabu ya mbuma;+ 80 dikopa mosi ya wolo yina kilo na yo vandaka bashekele 10, ya kufuluka ti ndumbu; 81 mwana-ngombe mosi ya bakala, dimeme mosi ya bakala, mpi mwana-dimeme mosi ya bakala yina kele na mvula na yo ya ntete sambu na dikabu ya kuyoka;+ 82 mwana-nkombo mosi sambu na dikabu sambu na disumu;+ 83 mpi sambu na kimenga ya kinduku:+ bangombe zole, mameme tanu ya babakala, bankombo tanu ya babakala, mpi bana-mameme tanu ya babakala, konso mbisi vandaka ti mvula mosi. Yai dikabu ya Ahira+ mwana ya Enani.

84 Yai dikabu ya kuyantika kusadila+ mesa-kimenga yina bamfumu ya Izraele pesaka ntangu bo tulaka yo mafuta: malonga ya arza 12, babolo ya arza 12, makopa ya wolo 12;+ 85 kilo ya konso dilonga ya arza vandaka bashekele 130, mpi kilo ya konso bolo vandaka bashekele 70, arza yonso yina vandaka na malonga vandaka bashekele 2 400 na kutadila shekele ya kisika ya santu;+ 86 kilo ya konso dikopa na kati ya makopa ya wolo 12 yina vandaka ya kufuluka ti ndumbu vandaka bashekele 10 na kutadila shekele ya kisika ya santu, wolo yonso ya makopa vandaka bashekele 120. 87 Bambisi yonso sambu na dikabu ya kuyoka vandaka: bangombe ya babakala 12, mameme ya babakala 12, bana-mameme ya babakala 12, konso mbisi vandaka ti mvula mosi mpi makabu na yo ya mbuma, mpi bana-bankombo ya babakala 12 sambu na dikabu sambu na disumu; 88 mpi bambisi yonso sambu na dikabu ya kinduku vandaka: bangombe ya babakala 24, mameme ya babakala 60, bankombo ya babakala 60, bana-mameme ya babakala 60, konso mbisi vandaka ti mvula mosi. Yai dikabu ya kuyantika kusadila+ mesa-kimenga na nima ya kutula yo mafuta.+

89 Konso ntangu yina Moize vandaka kukota na tenta ya lukutakanu sambu na kusolula ti Nzambi,*+ yandi vandaka kuwa ndinga yina vandaka kusolula ti yandi katuka na mufiniku+ ya sanduku ya Kimbangi, na kati-kati ya basherube+ zole; mpi Nzambi vandaka kusolula ti yandi.

8 Yehowa tubilaka Moize nde: 2 “Tubila Aroni mpi songa yandi nde, ‘Ntangu nge ke pedisa minda, minda nsambwadi fwete temuna kisika yina kele na ntwala ya kima ya kutudila minda.’”+ 3 Aroni salaka mambu yai: Yandi pedisaka minda na yo sambu na kisika yina kele na ntwala ya kima ya kutudila minda,+ kaka mutindu Yehowa songaka Moize. 4 Bo salaka kima ya kutudila minda mutindu yai: Bo sadilaka marto sambu na kusala yo na wolo; yantika na nti na yo tii na bintuntu na yo, yo vandaka kima ya bo me sala na marto.+ Bo salaka kima ya kutudila minda na kulanda mbona-meso+ yina Yehowa songaka Moize.

5 Yehowa tubilaka diaka Moize nde: 6 “Baka Balevi na kati ya bantu ya Izraele, mpi kumisa bo bunkete.+ 7 Nge ta kumisa bo bunkete mutindu yai: Mwangila bo masa ya ke kumisaka bunkete, mpi bo fwete zenga mika ya nitu na bo ya mvimba ti lutebu, kuyobisa bilele na bo mpi kudikumisa bunkete.+ 8 Na nima, bo ta baka mwana-ngombe mosi ya bakala+ mpi dikabu na yo ya mbuma+ ya fufu ya kitoko ya bo me vukisa ti mafuta, mpi nge ta baka mwana-ngombe ya nkaka ya bakala sambu na dikabu sambu na disumu.+ 9 Mpi nge fwete nata Balevi na ntwala ya tenta ya lukutakanu mpi kuvukisa kimvuka ya mvimba ya bantu ya Izraele.+ 10 Ntangu nge ke nata Balevi na ntwala ya Yehowa, bantu ya Izraele fwete tula maboko na bo na zulu ya Balevi.+ 11 Mpi Aroni fwete pesa* Balevi na ntwala ya Yehowa bonso dikabu ya kunikisa+ ya me katuka na bantu ya Izraele, ebuna bo ta salaka kisalu ya Yehowa.+

12 “Na nima, Balevi ta tula maboko na bo na zulu ya ba-ntu ya bangombe yina ya babakala.+ Na nima, bo ta pesa ngombe mosi bonso dikabu sambu na disumu mpi ya nkaka bonso dikabu ya kuyoka na Yehowa sambu na kufika masumu+ sambu na Balevi. 13 Nge ta tedimisa Balevi na ntwala ya Aroni ti ya bana na yandi mpi ta pesa* bo bonso dikabu ya kunikisa sambu na Yehowa. 14 Nge fwete katula Balevi na kati ya bantu ya Izraele, mpi Balevi ta kuma ya mono.+ 15 Na nima, Balevi ta kota sambu na kusala na tenta ya lukutakanu. Yai mutindu nge fwete kumisa bo bunkete mpi kupesa* bo bonso dikabu ya kunikisa. 16 Sambu bo kele bantu yina bo me pesa mono bonso makabu na kati ya bantu ya Izraele. Na kisika ya bana yonso ya ntete* ya bantu ya Izraele,+ mono ta baka bo sambu na mono mosi. 17 Sambu konso mwana ya ntete na kati ya bantu ya Izraele kele ya mono, mwana ya muntu mpi ya mbisi.+ Mono santisaka bo sambu na mono mosi kilumbu yina mono fwaka konso mwana ya ntete na insi ya Ezipte.+ 18 Mono ta baka Balevi na kisika ya bana yonso ya ntete na kati ya bantu ya Izraele. 19 Mono ta pesa Balevi bonso makabu na Aroni ti na bana na yandi na kati ya bantu ya Izraele, sambu na kusala kisalu sambu na bantu ya Izraele na tenta ya lukutakanu+ mpi sambu na kufika masumu sambu na bantu ya Izraele, mpidina mpasi mosi ve ta bwila bantu ya Izraele+ sambu bo me pusana pene-pene ya kisika ya santu.”

20 Moize ti Aroni mpi kimvuka ya mvimba ya bantu ya Izraele salaka mambu yai sambu na Balevi. Na kutadila mambu yonso yina Yehowa songaka Moize sambu na Balevi, bantu ya Izraele sadilaka bo mambu mutindu yina. 21 Yo yina, Balevi kudikumisaka bunkete mpi yobisaka bilele na bo;+ na nima Aroni pesaka* bo bonso dikabu ya kunikisa na ntwala ya Yehowa.+ Ebuna Aroni fikaka masumu na bo sambu na kukumisa bo bunkete.+ 22 Na nima, Balevi kotaka sambu na kusala kisalu na tenta ya lukutakanu na ntwala ya Aroni mpi ya bana na yandi. Kaka mutindu Yehowa songaka Moize sambu na Balevi, bo sadilaka bo mambu mutindu yina.

23 Ebuna Yehowa tubilaka Moize nde: 24 “Mambu yai ke tadila Balevi: Yantika na bamvula 25 mata muntu ta kota na kimvuka ya bantu yina ke salaka na tenta ya lukutakanu. 25 Kansi, kana yandi me lungisa bamvula 50, yandi ta katuka na kimvuka ya kisalu mpi ta sala diaka ve. 26 Yandi lenda sadila bampangi na yandi yina ke sala bisalu na tenta ya lukutakanu, kansi yandi fwete sala ve kisalu kuna. Yai mambu ya nge fwete sala sambu na Balevi mpi bisalu na bo.”+

9 Na ngonda ya ntete,+ na mvula ya zole na nima ya kubasika na bo na insi ya Ezipte, Yehowa tubilaka Moize na ntoto-makanga ya Sinai nde: 2 “Bantu ya Izraele fwete yidika kimenga+ ya Paki na ntangu na yo.+ 3 Na kilumbu ya 14 ya ngonda yai na nkokila,* beno fwete yidika yo na ntangu na yo. Beno fwete yidika yo na kulanda bansiku na yo yonso mpi mitindu na yo yonso ya kusala mambu, yina bo me tulaka.”+

4 Yo yina Moize songaka bantu ya Izraele na kuyidika kimenga ya Paki. 5 Ebuna bo yidikaka kimenga ya Paki na ngonda ya ntete, na kilumbu ya 14 ya ngonda yina na nkokila,* na ntoto-makanga ya Sinai. Bantu ya Izraele salaka mambu na kulanda mambu yonso yina Yehowa songaka Moize.

6 Kuvandaka ti bantu yina kumaka mvindu sambu bo simbaka mvumbi,*+ yo yina bo vandaka ve na mpila ya kuyidika kimenga ya Paki na kilumbu yina. Bo kwendaka kudimonisa na Moize ti Aroni na kilumbu yina+ 7 mpi bo tubilaka yandi nde: “Beto kele mvindu sambu beto simbaka mvumbi.* Sambu na nki bo fwete buyisa beto na kupesa Yehowa dikabu na ntangu na yo na kati ya bantu ya Izraele?”+ 8 Ebuna Moize tubilaka bo nde: “Beno kinga kuna, mpi bika mono wa mambu yina Yehowa ta tuba sambu na beno.”+

9 Ebuna Yehowa tubilaka Moize nde: 10 “Songa bantu ya Izraele nde, ‘Kana muntu mosi na kati na beno to na bandonga na beno ya bantu yina ke kwisa kukuma mvindu sambu yandi me simba mvumbi*+ to yandi me sala nzietelo mosi ya nda, yandi fwete yidika kaka kimenga ya Paki sambu na Yehowa. 11 Bo fwete yidika yo na ngonda ya zole,+ na kilumbu ya 14 na nkokila.* Bo fwete dia yo ti mampa ya kukonda levire mpi matiti ya ndudi.+ 12 Bo fwete bikisa ve ata ndambu na yo tii na suka,+ mpi bo fwete buka ve ata mukwa na yo mosi.+ Bo fwete yidika yo na kulanda bansiku yonso ya Paki. 13 Kansi kana muntu vandaka bunkete to vandaka ve na nzietelo mpi yandi buyaka kuyidika kimenga ya Paki, bo fwete katula* muntu* yina na kati ya bantu na yandi,+ sambu yandi pesaka ve dikabu ya Yehowa na ntangu na yo. Muntu yina ta vutula munoko sambu na disumu na yandi.

14 “‘Mpi kana munzenza mosi ke zinga ti beno, yandi fwete yidika mpi kimenga ya Paki sambu na Yehowa.+ Yandi fwete sala yo na kulanda nsiku ya Paki mpi mutindu na yo ya kusala mambu, yina bo me tulaka.+ Nsiku fwete vanda mosi sambu na beno, yo vanda sambu na munzenza mpi sambu na munkwa-nsi.’”+

15 Na kilumbu yina bo tedimisaka nzo-tenta,+ dituti fikaka nzo-tenta, tenta ya Kimbangi, kansi na nkokila kima yina vandaka kumonika bonso tiya bikalaka na zulu ya nzo-tenta tii na suka.+ 16 Yai mambu yina vandaka kusalama: Dituti vandaka kufika yo na ntangu, mpi yo vandaka kumonana bonso tiya na mpimpa.+ 17 Konso ntangu yina dituti vandaka kukatuka na zulu ya tenta, bantu ya Izraele vandaka kukwenda kukonda kusukinina,+ mpi bo vandaka kusala camp+ na bo kisika yina dituti vandaka kutelama. 18 Bantu ya Izraele vandaka kukatuka na kulanda nsiku ya Yehowa, mpi bo vandaka kusala camp+ na kulanda nsiku ya Yehowa. Ntangu yonso yina dituti vandaka kubikala na zulu ya nzo-tenta, bo vandaka kukatula ve camp na bo. 19 Ntangu dituti vandaka kubikala na zulu ya nzo-tenta bilumbu mingi, bantu ya Izraele vandaka kulemfukila Yehowa mpi bo vandaka kukwenda ve.+ 20 Bantangu ya nkaka dituti vandaka kubikala bilumbu fioti na zulu ya nzo-tenta. Bo vandaka kubikala na camp na bo na kulanda nsiku ya Yehowa, mpi bo vandaka kukwenda na kulanda nsiku ya Yehowa. 21 Bantangu ya nkaka dituti vandaka kubikala kaka katuka na nkokila tii na suka, mpi ntangu dituti vandaka kukatuka na suka, bo vandaka kukwenda. Yo vanda na ntangu to na mpimpa, kana dituti kukatuka, bo vandaka kukwenda.+ 22 Yo vanda dituti kubikala na zulu ya nzo-tenta bilumbu zole, ngonda mosi, to ntangu mingi, bantu ya Izraele vandaka kubikala na camp mpi bo vandaka kukwenda ve. Kansi ntangu yo vandaka kukatuka, bo vandaka kukwenda. 23 Bo vandaka kusala camp na bo na kulanda nsiku ya Yehowa, mpi bo vandaka kukwenda na kulanda nsiku ya Yehowa. Bo vandaka kulemfukila Yehowa na kulanda nsiku yina Yehowa pesaka na nzila ya Moize.

10 Yehowa tubilaka Moize nde: 2 “Kudisadila bampungi zole;+ sala yo na arza yina bo me tuta na marto, mpi sadila yo sambu na kubingila bantu ya Izraele mpi sambu na kukatula bacamp. 3 Kana bo bula bampungi yina zole, bo fwete binga bantu yonso ya Izraele sambu bo kwisa na nge na munoko ya tenta ya lukutakanu.+ 4 Kana bo bula kaka mpungi mosi, bo ta binga kaka bamfumu, bamfumu ya mafunda ya Izraele na kukwisa kisika nge+ kele.

5 “Kana beno bula mpungi ya ke basisa makelele yina ke tombuka mpi ke kulumuka, bacamp ya bantu yina kele na esti+ fwete kwenda. 6 Kana beno bula mpungi ya ke basisa makelele yina ke tombuka mpi ke kulumuka sambu na mbala ya zole, bacamp ya bantu yina kele na sudi+ fwete kwenda. Bo ta bula mpungi mutindu yina konso ntangu yina camp mosi ke kwenda.

7 “Ebuna, ntangu beno ke binga dibundu, beno fwete bula bampungi,+ kansi ve ti makelele yina ke tombuka mpi ke kulumuka. 8 Bana ya Aroni, banganga-nzambi, fwete bula bampungi,+ mpi mutindu ya kusadila yo ta vanda nsiku ya mvula na mvula sambu na beno, na bandonga na beno yonso ya bantu.

9 “Kana beno ke kwenda na bitumba na insi na beno sambu na kunwana ti muniokudi yina ke niokula beno, beno fwete bula bampungi+ sambu na kuvukisa basoda sambu na bitumba, mpi Yehowa Nzambi na beno ta yibuka beno mpi ta gulusa beno na bambeni na beno.

10 “Diaka, na bantangu+ na beno ya kiese, na bankinsi+ na beno mpi na luyantiku ya bangonda na beno, beno fwete bula bampungi na zulu ya makabu na beno ya kuyoka+ mpi ya bimenga na beno ya kinduku;+ yo ta sala nde Nzambi na beno kuyibuka beno. Mono kele Yehowa Nzambi na beno.”+

11 Kansi na mvula ya zole, na ngonda ya zole, na kilumbu ya 20 ya ngonda,+ dituti katukaka na zulu ya nzo-tenta+ ya Kimbangi. 12 Yo yina, bantu ya Izraele katukaka na ntoto-makanga ya Sinai na ndonga yina bo tulaka sambu bo landa yo ntangu bo ke kwenda,+ mpi dituti kwendaka kutelama na ntoto-makanga ya Parani.+ 13 Yai mbala ya ntete ya bo kwendaka na kulanda nsiku yina Yehowa pesaka na nzila ya Moize.+

14 Kimvuka ya makanda tatu ya camp ya bana ya Yuda kwendaka bantu ya ntete na kutadila bimvuka na bo,* mpi Nashoni+ mwana ya Aminadabi vandaka kutwadisa kimvuka yina. 15 Netanele+ mwana ya Suare vandaka kutwadisa kimvuka ya dikanda ya bana ya Isakare. 16 Eliabi+ mwana ya Heloni vandaka kutwadisa kimvuka ya dikanda ya bana ya Zebuloni.

17 Ntangu bo panzaka+ nzo-tenta, bana ya Gershoni+ mpi bana ya Merari,+ yina vandaka kunata nzo-tenta, kwendaka.

18 Na nima, kimvuka ya makanda tatu ya camp ya bana ya Rubeni kwendaka na kutadila bimvuka na bo,* mpi Elisure+ mwana ya Shedeure vandaka kutwadisa kimvuka yina. 19 Shelumiele+ mwana ya Surishadai vandaka kutwadisa kimvuka ya dikanda ya bana ya Simeoni. 20 Eliasafi+ mwana ya Deuele vandaka kutwadisa kimvuka ya dikanda ya bana ya Gadi.

21 Na nima, bana ya Kohati, bayina ke nataka bima ya kisika ya santu,+ kwendaka. Yo lombaka nde bo tedimisa nzo-tenta ntangu bo ta kuma.

22 Na nima, kimvuka ya makanda tatu ya camp ya bana ya Efrayimi kwendaka na kutadila bimvuka na bo,* mpi Elishama+ mwana ya Amihudi vandaka kutwadisa kimvuka yina. 23 Gamaliele+ mwana ya Pedasure vandaka kutwadisa kimvuka ya dikanda ya bana ya Manase. 24 Abidani+ mwana ya Gideoni vandaka kutwadisa kimvuka ya dikanda ya bana ya Benyamini.

25 Na nima, kimvuka ya makanda tatu ya camp ya bana ya Dani kwendaka na kutadila bimvuka na bo,* bo salaka kimvuka ya bantu yina vandaka kukengila bacamp yonso na nima, mpi Ahiezere+ mwana ya Amishadai vandaka kutwadisa kimvuka yina. 26 Pagiele+ mwana ya Okrani vandaka kutwadisa kimvuka ya dikanda ya bana ya Asere. 27 Ahira+ mwana ya Enani vandaka kutwadisa kimvuka ya dikanda ya bana ya Naftali. 28 Yai ndonga yina bantu ya Izraele mpi bimvuka na bo* vandaka kulanda ntangu bo vandaka kukwenda.+

29 Ebuna Moize tubilaka Obabi mwana ya Rewele*+ muntu ya Madiani, bokilo na yandi ya bakala nde: “Beto ke kwenda na kisika yina Yehowa tubaka nde, ‘Mono ta pesa beno yo.’+ Kwisa ti beto,+ mpi beto ta sadila nge mambu ya mbote, sambu Yehowa me sila Izraele+ bima ya mbote.” 30 Kansi yandi tubilaka Moize nde: “Mono ta kwenda ve. Mono ta vutuka na insi na mono mpi na bampangi na mono.” 31 Ebuna Moize tubaka nde: “Pardo, kubikisa beto ve, sambu nge me zaba kisika beto fwete tula camp na ntoto-makanga, mpi nge lenda vanda muntu ya ke songa beto nzila.* 32 Kana nge kwisa ti beto,+ beto ta monisila nge kibeni bumbote yonso yina Yehowa ta monisila beto.”

33 Yo yina, bo katukaka na ngumba ya Yehowa+ mpi salaka nzietelo ya bilumbu tatu, mpi sanduku+ ya kuwakana ya Yehowa kwendaka na ntwala na bo na nzietelo yina ya bilumbu tatu sambu na kusosila bo kisika ya kupema.+ 34 Dituti ya Yehowa+ vandaka na zulu na bo na mwini ntangu bo katulaka camp na bo mpi kwendaka.

35 Konso ntangu yina bo vandaka kubaka Sanduku, Moize vandaka kutuba nde: “O Yehowa,+ telama, mpi bika nde bambeni na nge kupanzana, mpi bika nde bantu yina ke mengaka nge kutina na ntwala na nge.” 36 Mpi ntangu bo vandaka kutulula Sanduku, yandi vandaka kutuba nde: “O Yehowa, kwisa kuvutuka na mafunda ya Izraele+ yina bo lenda tanga ve.”*

11 Kansi bantu yantikaka kubokuta ngolo na ntwala ya Yehowa. Ntangu Yehowa waka yo, yandi waka makasi ya ngolo, ebuna tiya yina katukaka na Yehowa yantikaka kupela na kati na bo mpi kuyoka bantu ya nkaka na bandilu ya camp. 2 Ntangu bantu yantikaka kudidila Moize, yandi bondilaka Yehowa,+ ebuna tiya fwaka. 3 Yo yina bo pesaka kisika yina zina Tabera,* sambu tiya yina katukaka na Yehowa pelaka na kati na bo.+

4 Kimvuka ya bantu ya mutindu na mutindu*+ yina vandaka na kati na bo monisaka nzala ya bwimi;+ bantu ya Izraele mpi yantikaka kudila diaka mpi kutuba nde: “Nani ta pesa beto musuni ya kudia?+ 5 Beto ke yibuka kibeni mbisi ya masa yina beto vandaka kudia ya ofele na Ezipte, ti bakonkombre, bapasteki, bapwaro, matungulu, mpi ayi!+ 6 Kansi ntangu yai beto* ke fwa. Beto ke mona kima mosi ve katula kaka mana+ yai.”

7 Kansi, mana+ vandaka bonso mbuma ya koriandre,+ mpi yo vandaka kumonika bonso deliumi.* 8 Bantu vandaka kupanzana mpi kulokuta yo, mpi kunika yo na bima ya kunikila bambuma na maboko to kututa yo na kibuka. Na nima bo vandaka kulamba yo na banzungu to kusala yo mampa yina kele bonso dimbuma,+ mpi ntomo na yo vandaka bonso gato ya kitoko ya bo me vukisa ti mafuta. 9 Ntangu malulu vandaka kubwa na camp na mpimpa, mana vandaka mpi kubwa na camp.+

10 Moize waka bantu ke dila, na dibuta mosi-mosi, konso muntu na munoko ya tenta na yandi. Yehowa waka makasi mingi,+ ebuna Moize mpi waka kiese ve ata fioti. 11 Moize tubilaka Yehowa nde: “Sambu na nki nge me monisa nsadi na nge mpasi? Sambu na nki nge me ndima mono ve, sambu nge tula kizitu ya bantu yai na zulu na mono?+ 12 Keti mono muntu bakaka divumu ya bantu yai yonso? Keti mono muntu butaka bo, sambu nge songa mono nde, ‘Nata bo na ntulu na nge, mutindu ndesi* ke nataka mwana yina bo ke nwisa,’ na insi yina nge zengaka kieleka na kupesa na ba-nkaka+ na bo? 13 Na wapi mono ta zwa musuni sambu na kupesa bantu yai yonso? Sambu bo ke landa kudila na ntwala na mono nde, ‘Pesa beto musuni ya kudia!’ 14 Mono ke kuka ve kunata kizitu ya bantu yai yonso mono mosi; yo me lutila mono.+ 15 Kana nge ta sadila mono mambu mutindu yai, pardo fwa mono kaka sesepi yai.+ Kana nge me ndima mono, kubika ve nde mono mona diaka mpasi.”

16 Yehowa vutudilaka Moize nde: “Sola bantu 70 na kati ya bankuluntu ya Izraele, babakala yina nge me zaba nde bo kele bankuluntu mpi bamfumu ya bantu,+ mpi nata bo na tenta ya lukutakanu, ebuna songa bo, bo telama kuna ti nge. 17 Mono ta kwisa kukulumuka+ mpi ta solula ti nge kuna,+ mpi mono ta katula ndambu ya mpeve+ yina kele na nge mpi ta tula yo na bo, ebuna bo ta sadisa nge na kunata kizitu ya bantu sambu nge nata yo ve nge mosi.+ 18 Nge ta tubila bantu nde, ‘Beno kudisantisa sambu na mbasi,+ sambu beno ta dia kibeni musuni, sambu beno me dila na makutu+ ya Yehowa mpi me tuba nde: “Nani ta pesa beto musuni ya kudia? Beto vandaka mbote kibeni na Ezipte.”+ Yehowa ta pesa beno kibeni musuni, mpi beno ta dia.+ 19 Beno ta dia yo ve kaka kilumbu mosi to bilumbu 2 to bilumbu 5 to bilumbu 10 to bilumbu 20, 20 kansi ngonda ya mvimba, tii kuna yo ta basika beno na bambombo mpi yo ta kuma nzanzi sambu na beno,+ sambu beno buyaka Yehowa, yina kele na kati na beno, mpi beno dilaka na ntwala na yandi nde: “Sambu na nki beto basikaka na Ezipte?”’”+

21 Ebuna Moize tubaka nde: “Bantu yina mono kele na kati na bo kele babakala 600 000+ yina ke tambulaka na makulu, kansi nge me tuba nde, ‘Mono ta pesa bo musuni, mpi bo ta dia yo kibeni ngonda ya mvimba’! 22 Kana bo fwa bimvuka ya mvimba ya mameme mpi ya bangombe, keti yo ta fwana sambu na bo? To kana bo kanga bambisi yonso ya nzadi-mungwa, keti yo ta fwana sambu na bo?”

23 Ebuna Yehowa tubilaka Moize nde: “Keti diboko ya Yehowa kele nkufi?+ Ntangu yai nge ta mona kana mambu ya mono ke tuba ta kumina nge to ve.”

24 Yo yina Moize basikaka mpi zabisaka bantu mambu yina Yehowa tubaka. Mpi yandi solaka babakala 70 na kati ya bankuluntu ya bantu mpi songaka bo na kutelama na nziunga ya tenta.+ 25 Ebuna Yehowa kulumukaka na dituti+ mpi solulaka ti yandi,+ ebuna yandi katulaka ndambu ya mpeve+ yina vandaka na Moize mpi tulaka yo na bankuluntu 70. Ntangu mpeve kulumukaka na zulu na bo, bo yantikaka kusala mambu bonso bambikudi,*+ kansi bo salaka yo diaka ve.

26 Kuvandaka ti babakala zole yina bikalaka na camp. Bazina na bo Eldadi mpi Medadi. Ebuna mpeve yantikaka kukulumuka na zulu na bo, sambu bo vandaka na kati ya bantu yina bo sonikaka bazina, kansi bo kwendaka ve na tenta. Yo yina bo yantikaka kusala mambu bonso bambikudi na camp. 27 Leke mosi ya bakala kwendaka ntinu kusonga Moize nde: “Eldadi ti Medadi ke sala mambu bonso bambikudi na camp!” 28 Ebuna Yozue+ mwana ya Nuni, nsadi ya Moize tuka kileke na yandi, vutulaka nde: “Mfumu na mono Moize, kanga bo nzila!”+ 29 Kansi Moize tubilaka yandi nde: “Keti nge ke wa kimpala sambu na mono? Ve, mono ke zola nde bantu yonso ya Yehowa kuvanda bambikudi mpi nde Yehowa kutula mpeve na yandi na zulu na bo!” 30 Na nima, Moize vutukaka na camp ti bankuluntu ya Izraele.

31 Ebuna mupepe yina katukaka na Yehowa bulaka mpi yantikaka kubaka bandeke yina vandaka bonso bangwadi katuka na nzadi-mungwa mpi kubwisa yo na nziunga ya camp,+ na kiteso ya kitamina ya nzietelo ya kilumbu mosi na ndambu yai mpi ya nzietelo ya kilumbu mosi na ndambu yina ya nkaka, na nziunga ya camp, mpi nda na yo vandaka kiteso ya maboko* zole na ntoto. 32 Yo yina, kilumbu yina ya mvimba mpi mpimpa ya mvimba mpi kilumbu yina landaka ya mvimba, bantu lalaka ve mpi bo lokutaka bandeke yina vandaka bonso bangwadi. Muntu mosi ve lokutaka fioti na nsi ya ba homere* kumi, mpi bo landaka kuyanika yo na nziunga ya camp sambu na bo mosi. 33 Kansi ntangu musuni vandaka kaka na meno na bo, na ntwala nde bo tafuna yo, Yehowa wilaka bantu makasi ya ngolo, mpi Yehowa fwaka+ bantu mingi kibeni.

34 Yo yina bo pesaka kisika yina zina Kibroti-hatava,*+ sambu kuna bo zikaka bantu yina monisaka nzala ya bwimi.+ 35 Bantu katukaka na Kibroti-hatava, bo kwendaka na Azeroti,+ mpi bo bikalaka kuna.

12 Kansi, Miriami ti Aroni yantikaka kutuba mambu ya mbi sambu na Moize sambu na nkento ya insi ya Kushi+ yina yandi kwelaka. 2 Bo vandaka kutuba nde: “Keti Yehowa tubaka kaka na nzila ya Moize? Keti yandi tubaka mpi ve na nzila na beto?”+ Mpi Yehowa vandaka kuwa.+ 3 Kansi, Moize vandaka muntu ya kudikulumusa kibeni kuluta bantu yonso+ yina vandaka na nsi-ntoto ya mvimba.

4 Na mbala mosi, Yehowa tubilaka Moize, Aroni, mpi Miriami nde: “Beno tatu, beno basika mpi beno kwenda na tenta ya lukutakanu.” Ebuna bo kwendaka bo tatu. 5 Na nima, Yehowa kwisaka kukulumuka na dikunzi ya dituti,+ telamaka na munoko ya tenta, mpi bingaka Aroni ti Miriami. Bo zole pusanaka pene-pene. 6 Ebuna yandi tubaka nde: “Pardo, beno wa mambu ya mono ke tuba. Kana mbikudi ya Yehowa vandaka na kati na beno, mono zolaka kudimonisa na yandi na mbona-meso,+ mpi mono zolaka kusolula ti yandi na ndosi.+ 7 Kansi, yo kele ve mutindu yina sambu na nsadi na mono Moize! Mono me pesa yandi nzo na mono ya mvimba.*+ 8 Mono ke solulaka ti yandi+ meso na meso,* na mutindu ya pwelele, kansi ve na bingana; mpi yandi ke monaka mutindu Yehowa ke monanaka. Ebuna, sambu na nki beno waka boma ve ya kutuba mambu ya mbi sambu na nsadi na mono Moize?”

9 Ebuna Yehowa wilaka bo makasi mingi, mpi yandi katukaka na ntwala na bo. 10 Dituti katukaka na zulu ya tenta, mpi tala! Maladi ya lepre yina vandaka mpembe bonso mvula ya mpembe*+ simbaka Miriami. Na nima, Aroni talaka Miriami, mpi yandi monaka nde maladi ya lepre+ me simba Miriami. 11 Na mbala mosi, Aroni tubilaka Moize nde: “Mono ke bondila nge, mfumu na mono! Pardo, kutangila beto ve disumu yai! Beto me sala mambu na buzoba na diambu yai. 12 Pardo, kubika ve nde yandi landa kuvanda bonso muntu ya kufwa, yina ndambu ya nsuni na yandi kele ya kupola na lubutuku!” 13 Mpi Moize yantikaka kudidila Yehowa nde: “O Nzambi, pardo, belula yandi! Pardo!”+

14 Yehowa vutudilaka Moize nde: “Kana tata na yandi kulosila yandi mate na luse, keti yandi zolaka ve kuvanda na nsoni bilumbu nsambwadi? Beno tula yandi na kingenga bilumbu nsambwadi na nganda ya camp,+ mpi na nima beno lenda vutula yandi.” 15 Yo yina, bo tulaka Miriami na kingenga bilumbu nsambwadi+ na nganda ya camp, mpi bantu katulaka ve camp tii kuna bo vutulaka Miriami. 16 Ebuna bantu katukaka na Azeroti+ mpi bo kwendaka kusala camp na bo na ntoto-makanga ya Parani.+

13 Ebuna Yehowa tubilaka Moize nde: 2 “Tinda bantu sambu bo kwenda kutala insi ya Kanana na mayele, yina mono ke pesa bantu ya Izraele. Beno fwete tinda muntu mosi na konso dikanda ya batata na yandi, konso muntu fwete vanda mfumu+ na kati na bo.”+

3 Yo yina, na kulanda nsiku ya Yehowa, Moize tindaka bo katuka na ntoto-makanga ya Parani.+ Bantu yonso vandaka bamfumu ya bantu ya Izraele. 4 Bazina na bo yo yai: na dikanda ya Rubeni, Shamua mwana ya Zakure; 5 na dikanda ya Simeoni, Shafati mwana ya Hori; 6 na dikanda ya Yuda, Kalebi+ mwana ya Yefune; 7 na dikanda ya Isakare, Yigale mwana ya Yozefi; 8 na dikanda ya Efrayimi, Oshea+ mwana ya Nuni; 9 na dikanda ya Benyamini, Palti mwana ya Rafu; 10 na dikanda ya Zebuloni, Gadiele mwana ya Sodi; 11 na dikanda ya Yozefi,+ sambu na dikanda ya Manase,+ Gadi mwana ya Susi; 12 na dikanda ya Dani, Amiele mwana ya Gemali; 13 na dikanda ya Asere, Seture mwana ya Mikaele; 14 na dikanda ya Naftali, Nabi mwana ya Vofsi; 15 na dikanda ya Gadi, Geuele mwana ya Maki. 16 Yai bazina ya bantu yina Moize tindaka sambu na kutala insi yina na mayele. Mpi Moize pesaka Oshea mwana ya Nuni zina Yozue.*+

17 Ntangu Moize vandaka kutinda bo sambu bo kwenda kutala insi ya Kanana na mayele, yandi tubilaka bo nde: “Beno tombuka kuna na Negebi, na nima beno tombuka na ntoto ya bangumba.+ 18 Beno fwete tala kana yo kele insi ya nki mutindu+ mpi kana bantu yina ke zingaka kuna kele ngolo to ve, kana bo kele fioti to mingi; 19 kana yo kele insi ya mbote to ya mbi mpi kana bambanza yina bo ke zingaka kele ti bacamp to ti balupangu ya ngolo. 20 Diaka, beno zikisa kana ntoto yina ke butaka bima mingi to ve,+ mpi kana yo kele ti banti to ve. Beno fwete vanda kikesa+ mpi kubaka ndambu ya bambuma ya insi yina.” Yo vandaka nsungi yina bambuma ya ntete ya vinu me yela.+

21 Yo yina bo tombukaka mpi talaka insi yina katuka na ntoto-makanga ya Zini+ tii na Rehobi,+ pene-pene ya Lebo-amati.*+ 22 Ntangu bo tombukaka na Negebi, bo kumaka na Ebroni,+ kisika Ahimani, Sheshai, mpi Talmai,+ bana ya Anaki,+ vandaka kuzinga. Kansi, bo tungaka Ebroni bamvula nsambwadi na ntwala ya kutunga Soani ya Ezipte. 23 Ntangu bo kumaka na Muwanda ya Eshkole,+ kuna bo zengaka lutangu mosi yina vandaka ti kisuka ya bambuma ya vinu, yina yo lombaka nde bantu zole na kati na bo kunata na nti, kumosi ti ndambu ya bagrenade mpi ya bafige.+ 24 Bo pesaka kisika yina zina Muwanda ya Eshkole*+ sambu na kisuka ya bambuma yina bantu ya Izraele zengaka kuna.

25 Na nsuka ya bilumbu 40,+ bo vutukaka na nima ya kutala insi yina na mayele. 26 Bo kwisaka kuvutuka kisika Moize, Aroni ti kimvuka ya mvimba ya bantu ya Izraele vandaka na ntoto-makanga ya Parani, na Kadeshi.+ Bo kwisaka kunatila bantu yonso ya Izraele nsangu mpi bo songaka bo bambuma ya insi yina. 27 Yai nsangu yina bo pesaka Moize: “Beto kotaka na insi yina nge tindaka beto, mpi yo kele kibeni ti mabele mpi bwiki mingi,+ mpi tala bambuma na yo.+ 28 Kansi, bantu ya insi yina kele ngolo, mpi bambanza ya ngolo kele nene kibeni. Beto monaka mpi bana ya Anaki kuna.+ 29 Bantu ya Amaleki+ ke zingaka na insi ya Negebi,+ mpi bantu ya Heti, bantu ya Yebusi,+ ti bantu ya Amore+ ke zingaka na ntoto ya bangumba, mpi bantu ya Kanana+ ke zingaka na lweka ya nzadi-mungwa+ mpi pene-pene ya Yordani.”

30 Ebuna Kalebi mekaka kubwisa bantu ntima ntangu bo telamaka na ntwala ya Moize mpi tubaka nde: “Beto tombuka kukonda kusukinina, mpi ntembe kele ve nde beto ta baka yo, sambu beto lenda nunga yo+ kibeni.” 31 Kansi bantu yina kwendaka ti yandi tubaka nde: “Beto lenda nwana ve ti bantu yina, sambu bo kele ngolo kuluta beto.”+ 32 Bo landaka kupesa bantu ya Izraele nsangu ya mbi+ sambu na insi yina bo kwendaka kutala na mayele nde: “Insi yina beto lutaka na kati na yo sambu na kutala kele insi yina ke fwaka bantu na yo, mpi bantu yonso yina beto monaka kuna kele bantu ya nda-nda.+ 33 Kuna beto monaka Banefilimi, bana ya Anaki,+ yina me katukaka na* Banefilimi, beto vandaka kumonana bonso bampasu na meso na beto mosi mpi na meso na bo.”

14 Ebuna kimvuka ya mvimba ya bantu tombulaka ndinga, mpi bantu landaka kutula milolo mpi kudila mpimpa yina+ ya mvimba. 2 Bantu yonso ya Izraele yantikaka kubokutila Moize ti Aroni,+ mpi kimvuka ya mvimba ya bantu tubaka mambu ya mbi sambu na bo nde: “A kana beto fwaka na insi ya Ezipte, to kana beto fwaka na ntoto-makanga yai! 3 Sambu na nki Yehowa ke nata beto na insi yai sambu beto fwa na mbele ya bitumba?+ Bankento na beto mpi bana na beto ta kuma bima ya bo me botula na bitumba.+ Keti yo kele ve mbote nde beto vutuka na Ezipte?”+ 4 Bo vandaka nkutu kutuba bo na bo nde: “Bika beto sola ntwadisi mpi beto vutuka na Ezipte!”+

5 Ebuna Moize ti Aroni fukamaka luse na ntoto na ntwala ya dibundu ya mvimba ya bantu ya Izraele yina vukanaka. 6 Yozue+ mwana ya Nuni mpi Kalebi+ mwana ya Yefune, yina vandaka na kati ya bantu yina kwendaka kutala insi yina, pasulaka bilele na bo, 7 mpi bo tubilaka kimvuka ya mvimba ya bantu ya Izraele nde: “Insi yina beto lutaka na kati na yo sambu na kutala na mayele kele insi+ mosi ya mbote, ya mbote kibeni. 8 Kana Yehowa kundima beto, yandi ta kotisa beto kibeni na ntoto yina mpi ta pesa beto yo, insi yina mabele ti bwiki kele mingi.+ 9 Kansi beno fwete kolama ve na Yehowa, mpi beno fwete wa ve bantu ya insi+ yina boma, sambu beto ta bedisa bo kukonda mpasi.* Bo me katula bo lutaninu, mpi Yehowa kele ti beto.+ Beno wa bo boma ve.”

10 Kansi kimvuka ya mvimba ya bantu tubaka nde bo losila bo+ matadi. Ata mpidina, nkembo ya Yehowa monikaka na zulu ya tenta ya lukutakanu na meso ya bantu ya Izraele yonso.+

11 Ebuna Yehowa tubilaka Moize nde: “Tii nki ntangu bantu yai ta sadila mono mambu kukonda luzitu,+ mpi tii nki ntangu bo ta tula ve lukwikilu na mono ata mono me sala bidimbu yonso yai na kati na bo?+ 12 Bika mono pesa bo kipupa mpi mono kula bo, mpi bika mono kumisa nge dikanda mosi ya nene mpi ya ngolo kuluta bo.”+

13 Kansi Moize tubilaka Yehowa nde: “Ebuna bantu ya Ezipte, yina nge basisaka bantu yai na kati na bo ti ngolo na nge, ta wa,+ 14 mpi bo ta zabisa yo na bantu ya insi yai. Bantu yina mpi waka nde nge, Yehowa, nge kele na kati ya bantu yai+ mpi nge me monanaka na bo meso na meso.+ Nge kele Yehowa, mpi dituti na nge kele ya kutelama na zulu na bo, mpi nge ke kwendaka na ntwala na bo na dikunzi ya dituti na mwini mpi na dikunzi ya tiya na mpimpa.+ 15 Kana nge fwa bantu yai yonso na mbala mosi,* makanda yina waka nsangu ya lukumu na nge ta tuba nde: 16 ‘Yehowa vandaka ve na mpila ya kunata bantu yai na ntoto yina yandi zengaka kieleka na kupesa bo, yo yina yandi fwaka bo na ntoto-makanga.’+ 17 Ntangu yai, pardo, Yehowa, bika nde ngolo na nge kuvanda nene, mutindu nge silaka ntangu nge tubaka nde: 18 ‘Yehowa, muntu yina ke waka makasi nswalu ve mpi yina kele ya kufuluka na zola ya kwikama,*+ yina ke lolulaka kifu mpi mambi, kansi yandi ta pesa kibeni ndola na muntu yina me sala mbi, mpi yandi ke pesaka ndola na bana, na ndonga ya tatu ya bantu mpi na ndonga ya iya ya bantu+ sambu na kifu ya batata.’ 19 Pardo, lolula kifu ya bantu yai na kutadila zola na nge ya kwikama ya nene, kaka mutindu nge me lolulaka bantu yai katuka na Ezipte tii ntangu yai.”+

20 Ebuna Yehowa tubaka nde: “Mono me lolula bo mutindu nge me tuba.+ 21 Kansi ya kieleka, mutindu mono kele na luzingu, ntoto ya mvimba ta fuluka ti nkembo ya Yehowa.+ 22 Ata mpidina, muntu mosi ve na kati ya bantu yina monaka nkembo na mono mpi bidimbu+ yina mono salaka na Ezipte mpi na ntoto-makanga kansi yina me landa kumeka mono+ mbala kumi yai, mpi yina me wa ve ndinga na mono,+ 23 ta mona ntoto yina mono zengaka kieleka na batata na bo. Ve, muntu mosi ve na kati ya bantu yina ke sadila mono mambu kukonda luzitu ta mona yo.+ 24 Kansi sambu nsadi na mono Kalebi+ vandaka ti mpeve ya mutindu ya nkaka mpi landaka kusadila mono na ntima ya mvimba, mono ta kotisa yandi kibeni na insi yina yandi kwendaka, mpi bana na yandi ta baka yo.+ 25 Sambu bantu ya Amaleki mpi bantu ya Kanana+ ke zingaka na muwanda yai,* mbasi beno fwete baluka mpi kukwenda na ndambu ya ntoto-makanga, na nzila ya Nzadi-Mungwa ya Mbwaki.”+

26 Ebuna Yehowa tubilaka Moize ti Aroni nde: 27 “Tii nki ntangu kimvuka yai ya bantu ya mbi ta landa kubokutila mono?+ Mono me wa mambu yina bantu ya Izraele ke bokutila mono.+ 28 Tubila bo nde, ‘“Ya kieleka, mutindu mono kele na luzingu,” Yehowa muntu me tuba, “mono ta sala beno kaka mutindu mono me wa beno ke tuba!+ 29 Bamvumbi na beno ta lala+ na ntoto-makanga yai, ee, beno yonso yantika na bantu yina kele ti bamvula 20 mata, bayina bo sonikaka bazina, beno yonso bantu yina bokutilaka mono.+ 30 Ata muntu mosi ve na kati na beno ta kota na ntoto yina mono zengaka kieleka* nde beno ta zinga kuna,+ katula kaka Kalebi mwana ya Yefune mpi Yozue mwana ya Nuni.+

31 “‘“Mono ta kotisa bana na beno, yina beno tubaka nde bo ta kuma bima ya bo me botula na bitumba,+ mpi bo ta zaba insi yina beno me buya.+ 32 Kansi bamvumbi na beno ta lala na ntoto-makanga yai. 33 Bana na beno ta kuma bangungudi na ntoto-makanga bamvula 40,+ mpi bo fwete vutula munoko sambu na mambu na beno ya kukonda kwikama* tii kuna mvumbi ya nsuka na kati na beno ta lala na ntoto-makanga.+ 34 Na kulanda ntalu ya bilumbu yina beno talaka insi yina, bilumbu 40,+ kilumbu mosi sambu na mvula mosi, kilumbu mosi sambu na mvula mosi, beno ta vutula munoko sambu na bifu na beno bamvula 40,+ mpidina beno ta zaba kana kutelamina mono* ke tendula nki.

35 “‘“Mono, Yehowa, muntu me tuba. Yai mambu ya mono ta sala kimvuka yai ya mvimba ya bantu ya mbi, bantu yina me vukana sambu na kunwanisa mono: Bo ta suka na ntoto-makanga yai, mpi bo ta fwa+ awa. 36 Bantu yina Moize tindaka sambu na kutala insi na mayele mpi yina pusaka kimvuka ya mvimba ya bantu na kubokutila yandi ntangu bo vutukaka na nsangu ya mbi sambu na insi yina,+ 37 ee, bantu yina nataka nsangu ya mbi sambu na insi yina, bo ta bula bo mpi bo ta fwa na ntwala ya Yehowa.+ 38 Kansi Yozue mwana ya Nuni mpi Kalebi mwana ya Yefune, yina vandaka na kati ya bantu yina kwendaka kutala insi yina na mayele, ta bikala kibeni na luzingu.”’”+

39 Ntangu Moize tubilaka bantu yonso ya Izraele mambu yai, bantu yantikaka kuwa mawa mingi kibeni. 40 Diaka, bo telamaka na suka-suka mpi bo mekaka kutombuka na nsongi ya ngumba; bo tubaka nde: “Beto kele ya kuyilama na kukwenda na kisika yina Yehowa tubaka, sambu beto me sala disumu.”+ 41 Kansi Moize tubaka nde: “Sambu na nki beno ke zitisa ve nsiku ya Yehowa? Beno ta nunga ve. 42 Beno tombuka ve, sambu Yehowa kele ve ti beno; mpi bambeni+ na beno ta bedisa beno. 43 Sambu bantu ya Amaleki mpi bantu ya Kanana kele pana sambu na kunwanisa beno;+ mpi beno ta fwa na mbele ya bitumba. Sambu beno me buya kulanda Yehowa, Yehowa ta vanda ve ti beno.”+

44 Ata mpidina, bo kwendaka na lulendo yonso na ndambu ya nsongi ya ngumba,+ kansi sanduku ya kuwakana ya Yehowa mpi Moize katukaka ve na kati-kati ya camp.+ 45 Ebuna bantu ya Amaleki mpi bantu ya Kanana yina vandaka kuzinga na ngumba yina, kwisaka kukulumuka mpi bulaka bo, mpi bo kulaka bo tii na Orma.+

15 Yehowa tubilaka diaka Moize nde: 2 “Tubila bantu ya Izraele mpi songa bo nde, ‘Nsuka-nsuka ntangu beno ta kota na insi yina mono ke pesa beno sambu na kuzinga kuna,+ 3 mpi beno ke pesa Yehowa dikabu ya kuyoka ya me katuka na bangombe to na mameme, yo vanda dikabu ya kuyoka+ to kimenga sambu na kusala lusilu mosi ya mfunu to dikabu ya luzolo ya mbote+ to dikabu na bankinsi na beno yina fwete salama na bansungi,+ sambu yo basisa nsudi ya kitoko* sambu na Yehowa,+ 4 muntu yina ke pesa dikabu na yandi fwete pesa mpi Yehowa dikabu ya mbuma ya fufu ya kitoko,+ ndambu mosi na kati ya bandambu kumi ya efa,* ya bo me vukisa ti ndambu mosi na kati ya bandambu iya ya hini* ya mafuta. 5 Kumosi ti dikabu ya kuyoka+ to kimenga ya konso mwana-dimeme ya bakala, nge fwete pesa mpi vinu bonso makabu ya malafu, ndambu mosi na kati ya bandambu iya ya hini. 6 To sambu na dimeme ya bakala, nge fwete pesa dikabu ya mbuma ya bandambu zole na kati ya bandambu kumi ya efa ya fufu ya kitoko, ya bo me vukisa ti ndambu mosi na kati ya bandambu tatu ya hini ya mafuta. 7 Mpi nge fwete pesa vinu bonso dikabu ya malafu, ndambu mosi na kati ya bandambu tatu ya hini, bonso dikabu ya nsudi ya kitoko* sambu na Yehowa.

8 “‘Kansi kana nge ke pesa ngombe ya bakala bonso dikabu ya kuyoka+ to kimenga sambu na kusala lusilu mosi ya mfunu+ to bimenga ya kinduku na Yehowa,+ 9 kumosi ti ngombe ya bakala, nge fwete pesa mpi dikabu ya mbuma+ ya bandambu tatu na kati ya bandambu kumi ya efa ya fufu ya kitoko, ya bo me vukisa ti kati-kati ya hini ya mafuta. 10 Nge fwete pesa mpi vinu bonso makabu ya malafu,+ kati-kati ya hini, bonso dikabu yina bo me yoka na tiya, bonso dikabu ya nsudi ya kitoko* sambu na Yehowa. 11 Yai mutindu bo ta sala sambu na konso ngombe ya bakala to sambu na konso dimeme ya bakala to sambu na konso mwana-dimeme ya bakala to sambu na bankombo. 12 Ata ntalu ya bambisi yina nge ke pesa kele ikwa, yai mambu ya nge fwete sala sambu na konso mbisi, na kulanda ntalu na yo. 13 Yai mutindu konso munkwa-nsi ya Izraele fwete pesa dikabu yina bo me yoka na tiya, bonso dikabu ya nsudi ya kitoko* sambu na Yehowa.

14 “‘Kana munzenza yina ke zinga ti beno to muntu yina ke zingaka na kati na beno katuka bandonga mingi ya bantu na beno ke zola kupesa mpi dikabu yina bo me yoka na tiya, bonso dikabu ya nsudi ya kitoko* sambu na Yehowa, yandi fwete sala kaka mutindu beno ke sala.+ 15 Nsiku ta vanda mosi sambu na beno bantu ya kele na dibundu mpi munzenza yina ke zinga na kati na beno. Yo ta vanda nsiku ya mvula na mvula sambu na bandonga na beno yonso ya bantu. Munzenza fwete vanda kiteso mosi ti beno na ntwala ya Yehowa.+ 16 Nsiku mpi nkanu fwete vanda mosi mpamba sambu na beno mpi sambu na munzenza yina ke zinga ti beno.’”

17 Yehowa tubilaka diaka Moize nde: 18 “Tubila bantu ya Izraele mpi songa bo nde, ‘Ntangu beno ta kota na insi yina mono ke nata beno, 19 mpi beno ta dia mampa* ya insi yina,+ beno fwete pesa Yehowa dikabu. 20 Beno fwete pesa dikabu ya fufu ya ntete ya bambuma na beno ya ntete+ yina beno me sala mampa ya kele bonso lupetu. Beno fwete pesa yo mutindu beno ke pesaka dikabu yina me katuka na kisika ya bo ke tutaka bambuma sambu na kukatula yo bampusu. 21 Beno fwete pesa ndambu ya fufu ya ntete ya bambuma na beno ya ntete bonso dikabu na Yehowa na bandonga na beno yonso ya bantu.

22 “‘Kansi, kana nge sala kifu mpi nge zitisa ve bansiku yai yonso ya Yehowa me tubila Moize, 23 mambu yonso yina Yehowa songaka beno na nzila ya Moize katuka na kilumbu yina Yehowa pesaka nsiku tii na bandonga na beno ya bantu yina ke kwisa, 24 mpi kana yo salamaka na kidiba mpi kimvuka ya bantu zabaka ve, kimvuka ya mvimba ya bantu fwete tambika mwana-ngombe ya bakala bonso dikabu ya kuyoka sambu yo pesa nsudi ya kitoko* sambu na Yehowa, kumosi ti dikabu na yo ya mbuma mpi dikabu na yo ya malafu na kulanda mutindu bo ke salaka mbala na mbala,+ mpi kupesa mwana-nkombo bonso dikabu sambu na disumu.+ 25 Nganga-nzambi ta fika masumu sambu na kimvuka ya mvimba ya bantu ya Izraele, mpi bo ta lolula bo,+ sambu yo vandaka kifu, mpi bo nataka bonso makabu na bo dikabu yina bo me yoka na tiya sambu na Yehowa mpi dikabu na bo sambu na disumu na ntwala ya Yehowa sambu na kifu na bo. 26 Bo ta lolula kimvuka ya mvimba ya bantu ya Izraele mpi munzenza yina ke zinga na kati na bo, sambu bantu yonso salaka yo na kidiba.

27 “‘Kana muntu* kusala disumu na kidiba, yandi fwete pesa nkombo ya nkento yina kele na mvula na yo ya ntete bonso dikabu sambu na disumu.+ 28 Nganga-nzambi ta fika masumu ya muntu* yina salaka kifu na mutindu yandi salaka disumu kukonda kukana na ntwala ya Yehowa, sambu na kufika disumu yina, ebuna bo ta lolula yandi yo.+ 29 Sambu na munkwa-nsi na kati ya bantu ya Izraele mpi munzenza yina ke zinga na kati na bo, nsiku fwete vanda mosi mpamba sambu na beno na yina me tala kusala diambu kukonda kukana.+

30 “‘Kansi muntu* yina me sala disumu na luzolo yonso,+ yo vanda yandi kele munkwa-nsi to munzenza, yandi me vweza Yehowa mpi bo fwete katula* yandi na kati ya bantu na yandi. 31 Sambu yandi me mona mpamba mambu ya Yehowa ke tuba mpi yandi me fwa nsiku na yandi, bo fwete fwa kibeni+ muntu* yina. Kifu na yandi kele na ntu na yandi.’”+

32 Ntangu bantu ya Izraele vandaka na ntoto-makanga, bo monaka muntu mosi ke lokuta bankuni na kilumbu ya Kisabatu.+ 33 Bantu yina monaka yandi ke lokuta bankuni nataka yandi na Moize, na Aroni, mpi na kimvuka ya mvimba ya bantu. 34 Bo tulaka bantu na kukeba yandi,+ sambu nsiku tubaka ve na sikisiki mambu yina bo fwete sala yandi.

35 Yehowa tubilaka Moize nde: “Bo fwete fwa kibeni+ muntu yina, mpi kimvuka ya mvimba ya bantu fwete losila yandi matadi na nganda ya camp.”+ 36 Yo yina, kimvuka ya mvimba ya bantu nataka yandi na nganda ya camp mpi losilaka yandi matadi ebuna yandi fwaka, kaka mutindu Yehowa songaka Moize.

37 Yehowa tubilaka diaka Moize nde: 38 “Tubila bantu ya Izraele mpi songa bo nde bo fwete sala malenda na nsongi ya bilele na bo na bandonga na bo yonso ya bantu, mpi bo fwete tula nsinga ya ble na zulu ya malenda na nsongi ya lele.+ 39 ‘Beno fwete vanda ti malenda yai na nsongi ya lele sambu beno mona yo mpi beno yibuka bansiku yonso ya Yehowa mpi kuzitisa yo.+ Beno fwete landa ve ntima mpi meso na beno, yina ke nata beno na kusala bizumba ya kimpeve.+ 40 Yo ta sadisa beno na kuyibuka, mpi beno ta zitisa bansiku na mono yonso mpi beno ta vanda santu sambu na Nzambi na beno.+ 41 Mono kele Yehowa Nzambi na beno, yina basisaka beno na insi ya Ezipte sambu mono vanda Nzambi na beno.+ Mono kele Yehowa Nzambi na beno.’”+

16 Ebuna Kora+ mwana ya Yisare,+ mwana ya Kohati,+ mwana ya Levi,+ telamaka kumosi ti Datani mpi Abirami bana ya Eliabi,+ mpi Oni mwana ya Peleti, yina vandaka bana ya Rubeni.+ 2 Bantu yai, kumosi ti babakala 250 ya Izraele, bamfumu ya bantu ya Izraele, bantu ya bo solaka na dibundu, babakala ya lukumu, bo telaminaka Moize. 3 Yo yina, bo vukanaka sambu na kutelamina+ Moize ti Aroni mpi tubilaka bo nde: “Beto me lemba beno! Kimvuka ya mvimba ya bantu kele santu,+ bo yonso, mpi Yehowa kele na kati na bo.+ Ebuna, sambu na nki beno ke kuditula na zulu ya dibundu ya Yehowa?”

4 Ntangu Moize waka mambu yai, yandi fukamaka mbala mosi luse na ntoto. 5 Ebuna yandi tubilaka Kora ti bantu yonso yina vandaka kukotila yandi nde: “Na suka, Yehowa ta songa nani kele muntu na yandi,+ nani kele santu, mpi nani fwete pusana pene-pene na yandi,+ ebuna muntu yina yandi ta sola,+ yandi muntu ta pusana pene-pene na yandi. 6 Beno sala diambu yai: Nge Kora ti bantu yina ke kotila nge,+ beno baka+ bima ya kunatila tiya, 7 beno tula tiya na kati, mpi beno tula ndumbu na zulu na yo mbasi na ntwala ya Yehowa, ebuna muntu yina Yehowa ta sola,+ yandi muntu kele santu. Beno bana ya Levi,+ beno me lutisa ndilu!”

8 Ebuna Moize tubilaka Kora nde: “Beno wa, pardo, beno bana ya Levi. 9 Keti yo kele diambu ya fioti mutindu Nzambi ya Izraele me kabulaka beno ti kimvuka ya bantu ya Izraele+ mpi me pesaka beno nzila ya kupusana pene-pene na yandi sambu na kusala kisalu ya nzo-tenta ya Yehowa mpi kutelama na ntwala ya kimvuka ya bantu sambu na kusadila bo,+ 10 mpi mutindu yandi me nataka nge ti bampangi na nge yonso bana ya Levi pene-pene na yandi? Keti beno ke meka mpi kubaka kinganga-nzambi?+ 11 Yo yina, nge ti bantu yonso ya me vukana yina ke kotila nge, beno ke nwanisa Yehowa. Ebuna Aroni kele nani sambu beno bokutila yandi?”+

12 Na nima, Moize tindaka bantu na kubinga Datani ti Abirami+ bana ya Eliabi, kansi bo tubaka nde: “Beto ta kwisa ve! 13 Keti yo kele diambu ya fioti mutindu nge me basisaka beto na insi yina miliki* ti bwiki kele mingi sambu na kufwa beto na ntoto-makanga yai?+ Ntangu yai, keti nge ke zola mpi kudikumisa mfumu na beto na kingolo-ngolo?* 14 Na kutuba ya mbote, nge me nataka beto ve na insi yina miliki* ti bwiki kele mingi+ mpi nge me pesaka beto ve dikabu ya bilanga to ya kilanga ya vinu. Keti nge ke zola kutobula meso ya bantu yai? Beto ta kwisa ve!”

15 Yo yina, Moize waka makasi mingi mpi tubilaka Yehowa nde: “Kundima ve dikabu na bo ya mbuma. Mono me bakaka ve ata mpunda na bo mosi, mpi mono me salaka ve ata muntu mosi na kati na bo mbi.”+

16 Na nima Moize tubilaka Kora nde: “Nge ti bantu yonso yina ke pesa nge maboko, beno kwisa kudimonisa mbasi na ntwala ya Yehowa, nge, bo, mpi Aroni. 17 Konso muntu fwete baka kima na yandi ya kunatila tiya mpi kutula ndumbu na zulu na yo, mpi konso muntu ta monisa kima na yandi ya kunatila tiya na ntwala ya Yehowa, bima ya kunatila tiya 250, kumosi ti nge mpi Aroni, konso muntu ti kima na yandi ya kunatila tiya.” 18 Yo yina konso muntu bakaka kima na yandi ya kunatila tiya, tulaka tiya mpi ndumbu na zulu na yo, mpi bo telamaka na munoko ya tenta ya lukutakanu kumosi ti Moize mpi Aroni. 19 Ntangu Kora vukisaka bantu yina vandaka kupesa yandi maboko+ sambu na kutelamina bo na munoko ya tenta ya lukutakanu, nkembo ya Yehowa kwisaka kumonika na kimvuka ya mvimba ya bantu.+

20 Ebuna Yehowa tubilaka Moize ti Aroni nde: 21 “Beno kabwana ti kimvuka yai, sambu mono manisa bo na mbala mosi.”+ 22 Bo fukamaka luse na ntoto mpi bo tubaka nde: “O Nzambi, Nzambi yina ke pesaka bantu yonso luzingu,*+ keti disumu ya muntu mosi ta pusa nge na kuwila kimvuka ya mvimba ya bantu+ makasi?”

23 Ebuna Yehowa tubilaka Moize nde: 24 “Tubila kimvuka ya bantu mpi songa bo nde, ‘Beno katuka na nziunga ya batenta ya Kora, Datani, mpi Abirami!’”+

25 Na nima, Moize telamaka mpi kwendaka kisika Datani ti Abirami vandaka, mpi bankuluntu+ ya Izraele kwendaka ti yandi. 26 Yandi songaka kimvuka ya bantu nde: “Pardo, beno katuka pene-pene ya batenta ya bantu yai ya mbi mpi beno simba ve bima na bo, sambu bo fwa beno ve sambu na masumu na bo yonso.” 27 Na mbala mosi bo katukaka pene-pene ya batenta ya Kora, Datani, ti Abirami, na balweka yonso, ebuna Datani ti Abirami basikaka, bo telamaka na munoko ya batenta na bo, kumosi ti bankento na bo, bana na bo, mpi bana na bo ya fioti.

28 Ebuna Moize tubaka nde: “Na diambu yai, beno ta zaba nde Yehowa muntu me tinda mono na kusala mambu yai yonso, nde mono ke sala yo ve na luzolo na mono mosi:* 29 Kana bantu yai kufwa mutindu bantu yonso ke fwaka mpi kana ndola na bo kele mutindu mosi ti ndola ya bantu yonso, tuba nde Yehowa tindaka+ mono ve. 30 Kansi, kana Yehowa kusala diambu mosi ya kuyituka sambu na bo mpi ntoto kukanguka* mpi kumina bo ti bima na bo yonso ebuna bo kulumuka ya moyo na Maziamu,* beno ta zaba kibeni nde bantu yai me sadila Yehowa mambu kukonda luzitu.”

31 Ntangu yandi manisaka kutuba mambu yai yonso, ntoto yina vandaka na nsi na bo pasukaka.+ 32 Ebuna ntoto kangukaka mpi minaka bo, kumosi ti bantu ya banzo na bo mpi konso muntu yina vandaka muntu ya Kora+ mpi bima na bo yonso. 33 Yo yina, bo ti bantu na bo yonso kulumukaka ya moyo na Maziamu, mpi ntoto fikaka bo, ebuna bo vilaka na kati ya dibundu.+ 34 Bantu ya Izraele yonso yina vandaka na nziunga na bo tinaka ntangu bo waka milolo na bo, sambu bo tubaka nde: “Beto ke wa boma nde ntoto kumina beto!” 35 Ebuna tiya katukaka na Yehowa+ mpi yokaka babakala 250 yina vandaka kupesa ndumbu.+

36 Na nima Yehowa tubilaka Moize nde: 37 “Songa Eleazare, mwana ya nganga-nzambi Aroni na kukatula na tiya bima ya kunatila tiya,+ sambu yo kele santu. Songa yandi diaka na kupanza tiya ntama. 38 Bima ya kunatila tiya ya bantu yina fwaka sambu bo salaka disumu,* beno fwete kumisa yo manzanza ya fioti-fioti sambu na kupakula mesa-kimenga,+ sambu bo pesaka yo na ntwala ya Yehowa, mpi yo kumaka santu. Yo ta vanda kidimbu sambu na bantu ya Izraele.”+ 39 Yo yina, nganga-nzambi Eleazare bakaka bima ya kwivre ya kunatila tiya, yina bantu yina tiya yokaka pesaka, mpi tutaka yo sambu na kupakula mesa-kimenga, 40 kaka mutindu Yehowa songaka yandi na nzila ya Moize. Yo vandaka kuyibusa bantu ya Izraele nde muntu mosi ve ya kele ve ti nswa,* yina kele ve na kati ya bana ya Aroni fwete kwisa kuyoka ndumbu na ntwala ya Yehowa+ mpi nde muntu mosi ve fwete kuma bonso Kora ti bantu yina vandaka kukotila yandi.+

41 Kaka na kilumbu yina landaka, kimvuka ya mvimba ya bantu ya Izraele yantikaka kubokutila Moize ti Aroni+ nde: “Beno zole bantu me fwa bantu ya Yehowa.” 42 Ntangu kimvuka ya bantu vukanaka sambu na kutelamina Moize ti Aroni, bo balukaka sambu na kutala na ndambu ya tenta ya lukutakanu, ebuna tala! dituti fikaka yo, mpi nkembo ya Yehowa yantikaka kumonika.+

43 Moize ti Aroni kwendaka na ntwala ya tenta ya lukutakanu,+ 44 mpi Yehowa tubilaka Moize nde: 45 “Beno katuka na kati ya kimvuka yai ya bantu, sambu mono manisa bo na mbala mosi.”+ Bo fukamaka luse na ntoto.+ 46 Ebuna Moize tubilaka Aroni nde: “Baka kima ya kunatila tiya mpi tula tiya ya me katuka na mesa-kimenga+ na kati mpi tula ndumbu na zulu na yo mpi kwenda nswalu kisika kimvuka ya bantu kele mpi fika masumu sambu na bo,+ sambu Yehowa me wila bo makasi. Mpasi me yantika!” 47 Aroni bakaka yo na mbala mosi, kaka mutindu Moize tubaka, mpi yandi kwendaka ntinu na kati-kati ya dibundu, mpi tala! mpasi yantikaka na kati ya bantu. Yo yina, yandi tulaka ndumbu na kima ya kunatila tiya mpi yantikaka kufika masumu sambu na bantu. 48 Yandi telamaka kwaku bafwa kwaku bantu ya moyo, ebuna nsuka-nsuka mpasi yina manaka. 49 Ntalu ya bantu yina fwaka na mpasi yina vandaka 14 700, katula bantu yina fwaka sambu na Kora. 50 Nsuka-nsuka ntangu Aroni vutukaka kisika Moize vandaka na munoko ya tenta ya lukutakanu, mpasi yina vandaka me mana.

17 Ebuna Yehowa tubilaka Moize nde: 2 “Solula ti bantu ya Izraele mpi baka na maboko na bo nti mosi sambu na konso nzo ya batata na bo, na maboko ya bamfumu ya konso nzo ya batata na bo,+ banti 12 na kimvuka. Sonika zina ya konso muntu na nti na yandi. 3 Nge fwete sonika zina ya Aroni na nti ya Levi, sambu nti kele kaka mosi sambu na mfumu ya konso nzo ya batata na bo. 4 Tula banti yina na tenta ya lukutakanu na ntwala ya Kimbangi,+ kisika mono ke kudimonisaka na beno+ mbala na mbala. 5 Nti ya muntu yina mono ta sola+ ta basisa bintuntu, mpi mono ta sukisa kubokuta yina bantu ya Izraele ke bokutila mono,+ mpi yina bo ke bokutila beno+ mpi.”

6 Yo yina Moize solulaka ti bantu ya Izraele, ebuna bamfumu na bo yonso pesaka yandi banti, nti mosi sambu na konso mfumu ya nzo ya batata na bo, disongidila banti 12, mpi nti ya Aroni vandaka na kati ya banti na bo. 7 Ebuna Moize tululaka banti yina na ntwala ya Yehowa na tenta ya Kimbangi.

8 Na kilumbu yina landaka, ntangu Moize kotaka na tenta ya Kimbangi, nti ya Aroni sambu na nzo ya Levi basisaka matiti mpi yo vandaka kubasisa matiti ti bintuntu mpi yo vandaka kubuta bambuma ya amande ya kuyela. 9 Na nima, Moize bakaka banti yonso yina vandaka na ntwala ya Yehowa mpi nataka yo na bantu ya Izraele yonso. Bo talaka yo mpi konso muntu bakaka nti na yandi.

10 Na nima, Yehowa tubilaka Moize nde: “Vutula nti ya Aroni+ na ntwala ya Kimbangi sambu yo vanda kima ya bo fwete bumba bonso kidimbu+ sambu na bana ya kukolama,+ sambu kubokuta yina bo ke bokutila mono kumana mpi sambu bo fwa ve.” 11 Na mbala mosi Moize salaka kaka mutindu Yehowa songaka yandi. Yandi salaka kaka mutindu yina.

12 Ebuna bantu ya Izraele tubilaka Moize nde: “Ntangu yai beto ta fwa, beto ta mana kibeni, beto yonso ta mana! 13 Konso muntu yina ta pusana ata pene-pene ya nzo-tenta ya Yehowa, ta fwa!+ Keti beto fwete mana na kufwa mutindu yai?”+

18 Yehowa tubilaka Aroni nde: “Nge ti bana na nge mpi nzo ya batata na nge, beno ta vutula munoko sambu na konso kifu yina bantu ta sala na kisika ya santu,+ mpi nge ti bana na nge, beno ta vutula munoko sambu na konso kifu yina bantu ta sala na kinganga-nzambi na beno.+ 2 Diaka nata bampangi na nge ya dikanda ya Levi, dikanda ya ba-nkaka na nge, sambu bo vukana ti nge mpi bo sadila nge+ ti bana na nge na ntwala ya tenta ya Kimbangi.+ 3 Bo fwete salaka bisalu na bo na ntwala na nge mpi na tenta ya mvimba.+ Kansi bo fwete pusana ve pene-pene ya bisadilu ya kisika ya santu mpi ya mesa-kimenga, sambu beno fwa+ ve yo vanda bo to nge. 4 Bo ta vukana ti nge mpi ta salaka bisalu na bo ya me tala tenta ya lukutakanu mpi bisalu yonso ya tenta; muntu mosi ve ya kele ve ti nswa* lenda pusana pene-pene na beno.+ 5 Beno fwete sala kisalu na beno ya me tala kisika ya santu+ mpi mesa-kimenga,+ sambu mono wila diaka ve bantu ya Izraele makasi.+ 6 Mono me bakaka bampangi na beno, Balevi, na kati ya bantu ya Izraele, bonso dikabu sambu na beno.+ Bo me pesaka bo na Yehowa sambu bo sala kisalu ya tenta ya lukutakanu.+ 7 Nge ti bana na nge, beno ta vanda ti kiyeka ya kusala bisalu na beno ya kinganga-nzambi ya me tala mesa-kimenga mpi ya bima yina kele na nima ya rido,+ mpi beno fwete salaka kisalu yina.+ Mono me pesaka beno kisalu ya kinganga-nzambi bonso dikabu, mpi konso muntu ya kele ve ti nswa* yina ke pusana pene-pene, bo fwete fwa+ yandi.”

8 Yehowa tubilaka diaka Aroni nde: “Mono me pesa nge kiyeka ya kutala makabu yina bo ke pesaka mono.+ Mono me pesa nge ti bana na nge dikabu ya bima yonso ya santu yina bantu ya Izraele ke pesaka, sambu yo vanda dikabu na beno ya kimakulu.+ 9 Bima yai ta vanda ya beno na makabu ya kuluta santu yina bo ke yoka na tiya: makabu yonso ya bo ke pesa, yika mpi makabu na bo ya mbuma,+ makabu na bo sambu na disumu,+ mpi makabu na bo sambu na makambu,+ yina bo ke natila mono. Yo kele kima ya kuluta santu sambu na nge ti bana na nge. 10 Nge fwete dia yo+ na kisika mosi ya kuluta santu. Konso bakala lenda dia yo. Yo ta vanda kima ya santu sambu na nge.+ 11 Bima yai mpi kele ya nge: makabu yina bo ke pesa+ kumosi ti makabu yonso ya kunikisa+ ya bantu ya Izraele. Mono me pesaka yo na nge mpi na bana na nge ya babakala ti ya bankento bonso dikabu na beno ya kimakulu.+ Konso muntu yina kele bunkete na nzo na nge lenda dia yo.+

12 “Mafuta yonso ya kuluta kitoko, vinu yonso ya mpa ya kuluta kitoko, mpi bambuma yonso ya kuluta kitoko, disongidila bima na bo ya ntete,+ yina bo ke pesa Yehowa, mono me pesa nge yo.+ 13 Bambuma ya ntete ya kuyela ya bima yonso ya me katuka na ntoto na bo, yina bo ta natila Yehowa, ta kuma ya nge.+ Konso muntu yina kele bunkete na nzo na nge lenda dia yo.

14 “Konso kima yina bo me tula na kingenga sambu na lukanu ya santu* na Izraele fwete kuma ya nge.+

15 “Konso mwana ya ntete ya bima yonso ya ke zingaka,*+ yina bo ta pesa na Yehowa, yo vanda ya muntu to ya mbisi, fwete kuma ya nge. Kansi, nge fwete sumba diaka kibeni mwana ya ntete ya muntu,+ mpi nge fwete sumba diaka+ mwana ya ntete ya bambisi ya mvindu. 16 Nge fwete sumba yo diaka ti ntalu ya kusumba diaka ntangu yo kele ti ngonda mosi mata, na kutadila ntalu ya bashekele* tanu ya arza,+ yina bo me zengaka na kutadila shekele ya kisika ya santu.* Yo kele bagera* 20. 17 Kansi nge fwete sumba diaka+ ve ngombe ya bakala yina kele mwana ya ntete to mwana-dimeme ya bakala yina kele mwana ya ntete to mwana-nkombo ya ntete. Yo kele kima ya santu. Nge fwete mwanga menga na yo na zulu ya mesa-kimenga,+ mpi nge fwete yoka mafuta na yo sambu yo basisa midinga bonso dikabu yina bo me yoka na tiya sambu yo pesa nsudi ya kitoko* sambu na Yehowa.+ 18 Musuni na yo ta kuma ya nge. Bonso ntulu ya dikabu ya kunikisa mpi bonso dikulu ya kitata, yo ta kuma ya nge.+ 19 Makabu yonso ya santu yina bantu ya Izraele ta pesa Yehowa,+ mono me pesa yo na nge mpi na bana na nge ya babakala ti ya bankento bonso dikabu ya kimakulu.+ Yo kele kuwakana ya mungwa* ya mvula na mvula na ntwala ya Yehowa sambu na nge mpi bana na nge.”

20 Yehowa tubilaka diaka Aroni nde: “Nge ta baka ve dikabu na ntoto na bo, mpi kitini mosi ve ya ntoto na kati na bo ta kuma ya nge.+ Mono kele dikabu na nge mpi kimvwama na nge na kati ya bantu ya Izraele.+

21 “Mono me pesaka bana ya Levi ndambu mosi na kati ya bandambu yonso ya kumi+ na Izraele bonso dikabu sambu na kisalu ya bo ke sala, kisalu ya tenta ya lukutakanu. 22 Bantu ya Izraele lenda pusana diaka ve pene-pene ya tenta ya lukutakanu, kana ve bo ta sala disumu mpi bo ta fwa. 23 Balevi bo mosi fwete sala kisalu ya tenta ya lukutakanu, mpi bo bantu ta vutula munoko sambu na kifu na bo.+ Yo kele nsiku ya mvula na mvula na bandonga na beno yonso ya bantu, nde bo ta baka ve dikabu na kati ya bantu ya Izraele.+ 24 Sambu mono me pesa Balevi ndambu mosi na kati ya bandambu kumi ya makabu ya bantu ya Izraele bonso dikabu, yina bo ta pesaka na Yehowa. Yo yina mono me tubila bo nde, ‘Bo ta baka ve dikabu+ na kati ya bantu ya Izraele.’”

25 Ebuna Yehowa tubilaka Moize nde: 26 “Nge ta songa Balevi nde, ‘Beno ta baka na maboko ya bantu ya Izraele ndambu mosi na kati ya bandambu kumi ya bima yina mono me baka na bo mpi me pesa beno sambu yo vanda dikabu+ na beno, mpi na ndambu yina mosi na kati ya bandambu kumi, beno fwete baka ndambu mosi na kati ya bandambu kumi mpi kupesa yo dikabu na Yehowa.+ 27 Yo ta vanda dikabu yina beno ke pesa, ata yo vandaka bambuma yina me katuka na kisika ya kututa bambuma sambu na kukatula yo bampusu,+ to bima mingi ya me katuka na kikamuninu ya vinu to ya mafuta. 28 Na mutindu yai beno ta pesa mpi dikabu na Yehowa ya me katuka na bandambu yonso ya kumi yina beno ta baka na bantu ya Izraele; mpi na bima yina beno ta baka na bo, beno fwete pesa dikabu sambu na Yehowa na nganga-nzambi Aroni. 29 Beno ta pesa makabu ya mitindu yonso na Yehowa, makabu ya me katuka na makabu yonso ya kuluta kitoko ya bo ta pesa beno,+ bonso kima ya santu.’

30 “Nge fwete tubila bo nde, ‘Ntangu beno ke pesa bima ya kuluta kitoko na kati na yo, bo ta tadila yo sambu na Balevi bonso bima yina me katuka na kisika ya kututa bambuma sambu na kukatula yo bampusu mpi bonso bima yina me katuka na kikamuninu ya vinu to ya mafuta. 31 Beno ti bantu ya banzo na beno lenda dia yo na konso kisika yina, sambu yo kele lufutu na beno sambu na kisalu yina beno ke salaka na tenta ya lukutakanu.+ 32 Beno ta sala ve disumu na diambu yai kana beno ke pesa bima ya kuluta kitoko na kati na yo, mpi beno fwete vweza ve bima ya santu ya bantu ya Izraele, kana ve beno ta fwa.’”+

19 Yehowa tubilaka diaka Moize ti Aroni nde: 2 “Yai nsiku yina Yehowa me pesa, ‘Songa bantu ya Izraele nde bo bakila nge ngombe mosi ya nkento ya mbwaki yina kele ve ti kifu+ mpi yina bo me tulaka ntete ve vangu na zulu na yo. 3 Beno fwete pesa yo na nganga-nzambi Eleazare, yandi ta nata yo na nganda ya camp, mpi bo ta fwa yo na meso na yandi. 4 Na nima, nganga-nzambi Eleazare ta baka ndambu ya menga na yo na musapi na yandi mpi ta mwanga yo mbala nsambwadi na ndambu ya munoko ya tenta ya lukutakanu.+ 5 Ebuna bo ta yoka ngombe yina ya nkento na meso na yandi. Bo ta yoka+ mpusu na yo, musuni na yo, mpi menga na yo kumosi ti tufi na yo. 6 Nganga-nzambi ta baka nti ya sedre, izope,+ mpi lele ya mbwaki mingi, ebuna yandi ta losa yo na tiya kisika bo ke yoka ngombe yina ya nkento. 7 Na nima, nganga-nzambi ta yobisa bilele na yandi mpi yandi ta yobila* na masa, mpi na nima yandi lenda kota na camp; kansi nganga-nzambi ta vanda mvindu tii na nkokila.

8 “‘Muntu yina ta yoka ngombe yina ya nkento ta yobisa bilele na yandi na masa mpi ta yobila* na masa, ebuna yandi ta vanda mvindu tii na nkokila.

9 “‘Muntu mosi yina kele bunkete ta vukisa mfututu ya ngombe yina ya nkento+ ya bo yokaka mpi yandi ta tulula yo na nganda ya camp na kisika mosi ya bunkete, mpi kimvuka ya bantu ya Izraele fwete bumba yo sambu na kuyidika masa yina bo ta sadilaka sambu na kukumisa bunkete.+ Yo kele dikabu sambu na disumu. 10 Muntu yina ta vukisa mfututu ya ngombe yina ya nkento ta yobisa bilele na yandi mpi ta vanda mvindu tii na nkokila.

“‘Diambu yai ta vanda nsiku+ ya mvula na mvula sambu na bantu ya Izraele mpi munzenza yina ke zinga na kati na bo. 11 Konso muntu yina ke simba muntu ya kufwa ta vanda mvindu bilumbu nsambwadi.+ 12 Muntu ya mutindu yina fwete kudikumisa bunkete na masa* na kilumbu ya tatu, mpi na kilumbu ya nsambwadi yandi ta vanda bunkete. Kansi, kana yandi kudikumisa ve bunkete na kilumbu ya tatu, na kilumbu ya nsambwadi yandi ta vanda ve bunkete. 13 Konso muntu yina ke simba nitu ya konso muntu yina me fwa* mpi yina ke kudikumisa ve bunkete, yandi me kumisa nzo-tenta+ ya Yehowa mvindu, mpi bo fwete katula* muntu* yina na kati ya Izraele.+ Sambu bo mwangilaka yandi ve masa ya kukumisa bunkete,+ yandi kele kaka mvindu. Mvindu na yandi kele kaka na zulu na yandi.

14 “‘Yai nsiku yina beno ta sadila kana muntu me fwa na kati ya tenta: Konso muntu yina ke kota na tenta yina mpi konso muntu yina vandaka na kati ya tenta yina ta vanda mvindu bilumbu nsambwadi. 15 Konso dibungu ya kukanguka, yina bo me kanga ve mufiniku na zulu na yo kele mvindu.+ 16 Konso muntu yina kele na nseke mpi yina me simba muntu ya bo me fwa na mbele ya bitumba to mvumbi to mukwa ya muntu to maziamu, yandi ta vanda mvindu bilumbu nsambwadi.+ 17 Bo fwete bakila muntu yina ya mvindu ndambu ya mfututu ya dikabu sambu na disumu yina bo yokaka mpi kutula masa ya ke kulumuka na zulu na yo na kati ya dibungu. 18 Ebuna muntu mosi ya bunkete+ ta baka izope,+ ta dindisa yo na masa yina, mpi ta mwanga yo na tenta, na mabungu yonso, na bantu yina vandaka muna, mpi na muntu yina simbaka mukwa to muntu ya bo fwaka to mvumbi to maziamu. 19 Muntu ya bunkete ta mwangila yo muntu ya mvindu na kilumbu ya tatu mpi na kilumbu ya nsambwadi,+ mpi yandi ta kumisa yandi bunkete na disumu na yandi na kilumbu ya nsambwadi; ebuna yandi fwete yobisa bilele na yandi mpi kuyobila na masa, mpi yandi ta kuma bunkete na nkokila.

20 “‘Kansi muntu yina kele mvindu mpi yina ta kudikumisa ve bunkete, bo fwete katula* muntu* yina na dibundu,+ sambu yandi me kumisa kisika ya santu ya Yehowa mvindu. Bo mwangilaka yandi ve masa ya kukumisa bunkete, yo yina yandi kele mvindu.

21 “‘Diambu yai ta vanda nsiku ya mvula na mvula sambu na bo: Muntu yina ke mwanga masa ya kukumisa bunkete+ fwete yobisa bilele na yandi, mpi muntu yina ke simba masa ya kukumisa bunkete ta vanda mvindu tii na nkokila. 22 Konso kima yina muntu ya kele mvindu ke simba ta vanda mvindu, mpi muntu* yina ke simba yo ta vanda mvindu tii na nkokila.’”+

20 Na ngonda ya ntete, kimvuka ya mvimba ya bantu ya Izraele kumaka na ntoto-makanga ya Zini, mpi bo yantikaka kuzinga na Kadeshi.+ Miriami+ fwaka na kisika yina mpi bo zikaka yandi kuna.

2 Ntangu yai, masa vandaka ve sambu na kimvuka ya bantu,+ ebuna bo vukanaka sambu na kutelamina Moize ti Aroni. 3 Bantu vandaka kuswanisa Moize+ nde: “A kana beto fwaka ntangu bampangi na beto fwaka na ntwala ya Yehowa! 4 Sambu na nki nge nataka dibundu ya Yehowa na ntoto-makanga yai sambu beto ti bitwisi na beto kufwa awa?+ 5 Sambu na nki nge basisaka beto na Ezipte mpi nge me nata beto na kisika yai ya mbi?+ Yo kele ve kisika ya kukuna bankeni, bafige, banti ya vinu mpi ya bagrenade, mpi masa ya kunwa+ kele ve.” 6 Na nima, Moize ti Aroni bikisaka dibundu mpi kwendaka na munoko ya tenta ya lukutakanu mpi bo fukamaka luse na ntoto, ebuna nkembo ya Yehowa yantikaka kumonana na bo.+

7 Ebuna Yehowa tubilaka Moize nde: 8 “Baka nti mpi binga kimvuka ya bantu na kuvukana, nge ti mpangi na nge Aroni, mpi beno tubila ditadi na meso na bo sambu yo basisa masa na yo, ebuna nge ta basisila bo masa na ditadi yina mpi nge ta pesa dibundu ti bitwisi na bo masa.”+

9 Yo yina, Moize bakaka nti na ntwala ya Yehowa,+ kaka mutindu Nzambi songaka yandi. 10 Ebuna Moize ti Aroni bingaka dibundu na ntwala ya ditadi, mpi yandi tubilaka bo nde: “Beno wa ntangu yai, beno bankolami! Keti beto ta basisila beno masa na ditadi yai?”+ 11 Ebuna Moize tombulaka diboko na yandi mpi bulaka nti na yandi mbala zole na ditadi yina; masa mingi yantikaka kubasika, ebuna bantu ya Izraele mpi bitwisi na bo yantikaka kunwa masa.+

12 Na nima, Yehowa tubilaka Moize ti Aroni nde: “Sambu beno me kwikila ve na mono mpi beno me santisa mono ve na meso ya bantu ya Izraele, beno ta kotisa ve dibundu yai na ntoto yina mono ta pesa bo.”+ 13 Yai kele bamasa ya Meriba,*+ kisika bantu ya Izraele swanisaka Yehowa, ebuna yandi santisamaka na kati na bo.

14 Na nima, katuka na Kadeshi Moize tindilaka ntotila ya Edomi+ binati-nsangu sambu na kusonga yandi nde: “Mpangi na nge Izraele+ ke tuba nde, ‘Nge me zaba mbote bampasi yonso yina beto me kutana ti yo. 15 Batata na beto kwendaka na Ezipte,+ mpi beto zingaka kuna bamvula* mingi,+ mpi bantu ya Ezipte niokulaka beto ti batata na beto.+ 16 Nsuka-nsuka, beto didilaka Yehowa,+ yandi waka beto, tindaka wanzio,+ ebuna yandi basisaka beto na Ezipte, mpi ntangu yai beto kele na Kadeshi, mbanza yina kele na bandilu ya teritware na nge. 17 Pardo, pesa beto nzila ya kuluta na insi na nge. Beto ta luta ve ata na kilanga mosi to na kilanga ya vinu, mpi beto ta nwa ve masa ata ya dibulu mosi. Beto ta luta na Nzila ya Ntotila, beto ta baluka ve na diboko ya kitata to ya kimama tii kuna beto ta luta na teritware na nge.’”+

18 Kansi, Edomi tubilaka yandi nde: “Nge ta luta ve na teritware na beto. Kana nge luta, mono ta basika ti mbele ya bitumba sambu na kukutana ti nge.” 19 Ebuna bantu ya Izraele tubilaka yandi nde: “Beto ta kwenda na nzila ya nene, mpi kana beto ti bitwisi na beto kunwa masa na nge, beto ta futa sambu na yo.+ Kima ya beto ke zola kele kaka kuluta na makulu.”+ 20 Kansi, yandi tubaka nde: “Nge ta luta ve.”+ Ebuna Edomi basikaka ti bantu mingi mpi basoda* ya ngolo sambu na kukutana ti yandi. 21 Na mutindu yina, Edomi buyaka kupesa Izraele nzila ya kuluta na teritware na yandi; yo yina, Izraele balukaka+ mpi lutaka na nzila ya nkaka.

22 Bantu ya Izraele, kimvuka ya mvimba ya bantu, katukaka na Kadeshi mpi kwisaka na Ngumba ya Ore.+ 23 Ebuna Yehowa tubilaka Moize ti Aroni na Ngumba ya Ore, na bandilu ya insi ya Edomi nde: 24 “Bo ta vukisa Aroni ti bantu na yandi.*+ Yandi ta kota ve na insi yina mono ta pesa bantu ya Izraele, sambu beno zole kolamaka na nsiku na mono ya ke tadila bamasa ya Meriba.+ 25 Baka Aroni ti mwana na yandi Eleazare mpi nata bo na Ngumba ya Ore. 26 Katula Aroni bilele+ na yandi ya kinganga-nzambi mpi lwatisa yo mwana na yandi Eleazare,+ ebuna Aroni ta fwa kuna.”*

27 Yo yina, Moize salaka kaka mutindu Yehowa songaka yandi, mpi bo tombukaka na Ngumba ya Ore na meso ya kimvuka ya mvimba ya bantu. 28 Ebuna Moize katulaka Aroni bilele na yandi mpi lwatisaka yo mwana na yandi Eleazare. Na nima, Aroni fwaka kuna na nsongi ya ngumba.+ Ebuna Moize ti Eleazare kwisaka kukulumuka na ngumba. 29 Ntangu kimvuka ya mvimba ya bantu monaka nde Aroni me fwa, nzo ya mvimba ya Izraele dilaka yandi bilumbu 30.+

21 Ntangu ntotila ya Aradi,+ muntu ya Kanana, yina vandaka kuzinga na Negebi, waka nde Izraele kwisaka na nzila ya Atarimi, yandi nwanisaka Izraele mpi nataka bantu ya nkaka bonso bampika. 2 Yo yina Izraele salaka lusilu yai na Yehowa: “Kana nge pesa bantu yai na maboko na mono, mono ta fwa kibeni bambanza na bo.” 3 Yehowa waka ndinga ya Izraele mpi pesaka bantu ya Kanana na maboko na bo, ebuna bantu ya Izraele fwaka bo ti bambanza na bo. Yo yina bo pesaka kisika yina zina Orma.*+

4 Ntangu bo landaka kusala nzietelo na bo katuka na Ngumba ya Ore+ na nzila ya Nzadi-Mungwa ya Mbwaki sambu na kuziunga insi ya Edomi,+ bantu* lembaka sambu na nzietelo. 5 Bo landaka kutuba mambu ya mbi sambu na Nzambi mpi Moize+ nde: “Sambu na nki beno basisaka beto na Ezipte sambu beto fwa na ntoto-makanga? Madia mpi masa+ kele ve, mpi beto* me kuma kumenga dimpa+ yai ya nzanzi.” 6 Ebuna Yehowa tindaka banioka ya ndikila* na kati ya bantu, mpi yo vandaka kutatika bo, yo yina bantu mingi ya Izraele fwaka.+

7 Ebuna bantu kwisaka na Moize mpi tubaka nde: “Beto me sala disumu na mutindu beto me tuba mambu ya mbi sambu na Yehowa mpi sambu na nge.+ Bondila Yehowa sambu yandi katula banioka na kati na beto.” Ebuna Moize bondilaka Nzambi sambu na bo.+ 8 Na nima Yehowa tubilaka Moize nde: “Sala kifwanisu ya nioka ya ndikila* mpi tula yo na nti. Ebuna kana nioka me tatika muntu, yandi fwete tala yo sambu yandi bikala na luzingu.” 9 Na mbala mosi Moize salaka nioka ya kwivre+ mpi tulaka yo na nti;+ konso ntangu yina nioka vandaka kutatika muntu, kana yandi tala nioka yina ya kwivre, yandi vandaka kuguluka.+

10 Na nima, bantu ya Izraele katukaka pana mpi salaka camp na Oboti.+ 11 Bo katukaka na Oboti mpi salaka camp na Iye-abarimi,+ na ntoto-makanga yina ke talana ti Moabi, na ndambu ya esti. 12 Bo katukaka kuna mpi salaka camp pene-pene ya Muwanda ya Zeredi.+ 13 Bo katukaka kuna mpi salaka camp pene-pene ya Arnoni,+ yina kele na ntoto-makanga yina ke yantika na ndilu ya bantu ya Amore, sambu Arnoni kele ndilu ya Moabi, na kati ya Moabi mpi bantu ya Amore. 14 Yo yina mukanda ya Bitumba ya Yehowa ke tubila “Vahebi na Sufa mpi miwanda ya Arnoni, 15 mpi ngumba ya miwanda, yina ke kwenda tii na kisika yina Are kele mpi yo ke kutana ti ndilu ya Moabi.”

16 Na nima, bo kwendaka na Beere. Yai dibulu ya masa yina Yehowa tubilaka Moize sambu na yo nde: “Vukisa bantu, mpi bika nde mono pesa bo masa.”

17 Na ntangu yina, Izraele yimbaka nkunga yai:

“Basisa masa, O dibulu!—Beno yimbila* yo!

Na nima bo katukaka na ntoto-makanga mpi kwendaka na Matana, 19 bo katukaka na Matana mpi kwendaka na Nahalieli, mpi bo katukaka na Nahalieli mpi kwendaka na Bamoti.+ 20 Bo katukaka na Bamoti mpi kwendaka na muwanda yina kele na ntoto* ya Moabi,+ na nsongi ya Pisga,+ yina ke monanaka na Yeshimoni.*+

21 Ebuna Izraele tindaka binati-nsangu sambu na kusonga Sihoni, ntotila ya bantu ya Amore, nde:+ 22 “Pesa beto nzila ya kuluta na insi na nge. Beto ta baluka ve sambu na kuluta na bilanga to na kilanga mosi ya vinu. Beto ta nwa ve masa ata ya dibulu mosi. Beto ta tambula na Nzila ya Ntotila tii kuna beto ta luta teritware na nge.”+ 23 Kansi Sihoni pesaka ve Izraele nzila ya kuluta na teritware na yandi. Nkutu, yandi vukisaka bantu na yandi yonso mpi kwendaka kunwanisa Izraele na ntoto-makanga ebuna yandi kumaka na Yahasi mpi yantikaka kunwanisa Izraele.+ 24 Kansi Izraele bedisaka yandi na mbele ya bitumba+ mpi bakaka insi na yandi+ katuka na Arnoni+ tii na Yaboki,+ pene-pene ya bantu ya Amoni, sambu Yazere+ kele na bandilu ya teritware ya bantu ya Amoni.+

25 Yo yina bantu ya Izraele bakaka bambanza yai yonso, mpi bo yantikaka kuzinga na bambanza yonso ya bantu ya Amore,+ na Eshboni mpi na babwala yonso yina kele na nziunga na yo. 26 Sambu Eshboni vandaka mbanza ya Sihoni, ntotila ya bantu ya Amore, yina nwanaka ti ntotila ya Moabi mpi bakaka ntoto na yandi yonso tii na Arnoni. 27 Diambu yai me basisaka kingana yai ya kuvweza:

“Beno kwisa na Eshboni.

Bika bo tunga mbanza ya Sihoni mpi bo kumisa yo ngolo.

28 Sambu tiya basikaka na Eshboni, ludimi ya tiya katukaka na bwala Sihoni.

Yo me yoka Are ya Moabi, bamfumu ya bisika ya kunanguka ya Arnoni.

29 Mawa na nge, Moabi! O beno bantu ya Kemoshi,+ bo ta fwa beno!

Yandi ke kumisa bana na yandi ya babakala bantu ya ke tina mpi bana na yandi ya bankento bampika ya Sihoni, ntotila ya bantu ya Amore.

31 Ebuna Izraele yantikaka kuzinga na insi ya bantu ya Amore. 32 Moize tindaka bantu ya nkaka sambu na kutala Yazere+ na mayele. Bo botulaka babwala yina vandaka na nziunga na yo mpi bo kulaka bantu ya Amore yina vandaka pana. 33 Na nima, bo balukaka mpi tombukaka na Nzila ya Bashani. Ebuna Ogi+ ntotila ya Bashani basikaka ti bantu na yandi yonso sambu na kunwanisa bo na Edrei.+ 34 Yehowa tubilaka Moize nde: “Kuwa yandi boma ve,+ sambu mono ta pesa yandi, bantu na yandi yonso, mpi insi na yandi, na maboko na nge;+ mpi nge ta sala yandi kaka mutindu nge salaka Sihoni, ntotila ya bantu ya Amore, yina vandaka kuzinga na Eshboni.”+ 35 Yo yina bo fwaka yandi, ti bana na yandi mpi bantu na yandi yonso, tii kuna ata muntu na yandi mosi ve gulukaka,+ ebuna bo bakaka insi na yandi.+

22 Ebuna bantu ya Izraele katukaka mpi kwendaka kusala camp na ntoto ya zelo na zelo ya Moabi na simu ya nkaka ya Yordani yina ke talana ti Yeriko.+ 2 Balaki+ mwana ya Sipore monaka mambu yonso yina Izraele salaka bantu ya Amore, 3 ebuna Moabi kumaka na boma ya mingi sambu na bantu ya Izraele,+ sambu bo vandaka mingi kibeni; ya kieleka, Moabi yantikaka kutekita na boma sambu na bo. 4 Yo yina Moabi tubilaka bankuluntu ya Madiani+ nde: “Dibundu yai ta dia bima yonso ya kele na nziunga na beto, kaka mutindu ngombe ke diaka matiti na kilanga.”

Na ntangu yina Balaki mwana ya Sipore vandaka ntotila ya Moabi. 5 Yandi tindilaka Balami, mwana ya Beore, binati-nsangu na Petore,+ yina kele pene-pene ya Nzadi* na insi yina yandi butukaka. Yandi bingaka yandi mpi tubaka nde: “Kele ti bantu yina me basika na Ezipte. Bo me fulusa ntoto* ya mvimba,+ mpi bo ke zinga kaka na ntwala na mono. 6 Pardo, kwisa mpi singila mono+ bantu yai, sambu bo kele ngolo kuluta mono. Mbala ya nkaka mono lenda bedisa bo mpi kukula bo na insi yai, sambu mono me zaba mbote nde muntu yina nge ke sakumunaka ke bakaka lusakumunu, mpi muntu yina nge ke singaka ke bakaka lusingu.”

7 Yo yina, bankuluntu ya Moabi ti bankuluntu ya Madiani salaka nzietelo; na maboko na bo, bo vandaka ti dikabu ya kupesa muntu yina ke zabisaka na ntwala mambu yina ta bwa, bo kwendaka kisika Balami+ vandaka, mpi bo pesaka yandi nsangu ya Balaki. 8 Ebuna yandi tubilaka bo nde: “Beno lala awa, mpi mono ta kwisa kuzabisa beno mambu yonso yina Yehowa ta songa mono.” Yo yina, bamfumu ya Moabi lalaka na nzo ya Balami.

9 Ebuna Nzambi kwisaka na Balami mpi tubaka nde:+ “Bantu yina kele ti nge kele banani?” 10 Balami tubilaka Nzambi ya kieleka nde: “Balaki mwana ya Sipore, ntotila ya Moabi, me tindila mono nsangu nde, 11 ‘Bantu yina me basika na Ezipte me fulusa ntoto ya mvimba. Kwisa mpi singila mono+ bo. Mbala ya nkaka mono lenda kuka kunwana ti bo mpi kukula bo.’” 12 Kansi Nzambi tubilaka Balami nde: “Nge fwete kwenda ve ti bo. Nge fwete singa ve bantu ya Izraele, sambu bo kele bantu ya bo me sakumunaka.”+

13 Balami telamaka na suka mpi tubilaka bamfumu ya Balaki nde: “Beno kwenda na insi na beno, sambu Yehowa me buya kupesa mono nzila ya kukwenda ti beno.” 14 Yo yina, bamfumu ya Moabi kwendaka, bo vutukaka na Balaki, mpi bo tubaka nde: “Balami me buya kukwisa ti beto.”

15 Kansi, Balaki tindaka diaka bamfumu mingi ya nkaka yina vandaka ti lukumu mingi kuluta bayina ya ntete. 16 Bo kumaka kisika Balami vandaka mpi bo tubilaka yandi nde: “Balaki mwana ya Sipore me tuba nde, ‘Pardo, kubika ve nde ata kima mosi kukanga nge nzila ya kukwisa na mono, 17 sambu mono ta pesa nge lukumu mingi mpi mono ta sala konso kima yina nge ta songa mono na kusala. Yo yina kwisa, pardo, mpi singila mono bantu yai.’” 18 Kansi Balami vutudilaka bansadi ya Balaki nde: “Ata kana Balaki zolaka kupesa mono nzo na yandi ya kufuluka ti arza mpi wolo, mono zolaka ve kusala ata diambu mosi yina Yehowa Nzambi na mono me pesa ve nsiku, yo vanda ya fioti to ya nene.+ 19 Kansi, pardo beno lala awa mpimpa yai mpi, sambu mono zaba mambu ya nkaka yina Yehowa ta songa mono.”+

20 Ebuna Nzambi kwisaka na Balami na mpimpa mpi tubilaka yandi nde: “Kana bantu yai me kwisa kubinga nge, kwenda ti bo. Kansi nge ta tuba kaka mambu yina mono ta songa nge na kutuba.”+ 21 Yo yina, Balami telamaka na suka, yidikaka mpunda na yandi,* mpi kwendaka ti bamfumu ya Moabi.+

22 Kansi, Nzambi waka makasi mingi sambu Balami vandaka kukwenda, ebuna wanzio ya Yehowa telamaka na nzila sambu na kunwanisa yandi. Balami vandaka kutambula na zulu ya mpunda na yandi, mpi bansadi na yandi zole vandaka ti yandi. 23 Ntangu mpunda monaka wanzio ya Yehowa me telama na nzila mpi me simba mbele ya bitumba na diboko na yandi, mpunda yina mekaka kubaluka sambu na kukota na nseke. Kansi Balami yantikaka kubula yo sambu na kuvutula yo na nzila. 24 Ebuna wanzio ya Yehowa telamaka na nzila ya fioti na kati-kati ya bilanga zole ya vinu, mpi kibaka ya matadi vandaka na konso ndambu. 25 Ntangu mpunda monaka wanzio ya Yehowa, yo yantikaka kukangama ti kibaka mpi yo kangisaka dikulu ya Balami na kibaka, ebuna Balami yantikaka kubula yo diaka.

26 Wanzio ya Yehowa lutaka diaka mpi telamaka na kisika yina nzila vandaka fioti, kisika yina mpila ya kubaluka na diboko ya kitata to ya kimama vandaka ve. 27 Ntangu mpunda monaka wanzio ya Yehowa, yo lalaka na nsi ya Balami, ebuna Balami waka makasi mpi landaka kubula mpunda ti nti na yandi. 28 Nsuka-nsuka, Yehowa salaka nde mpunda kutuba,*+ ebuna yo tubilaka Balami nde: “Mono me sala nge nki sambu nge bula mono mbala tatu yai?”+ 29 Balami vutudilaka mpunda nde: “Yo kele sambu nge me seka mono. A kana mono vandaka ti mbele ya bitumba na diboko na mono, mono zolaka kufwa nge!” 30 Mpunda tubilaka Balami nde: “Keti mono kele ve mpunda na nge yina nge me tambulaka na zulu na yo luzingu na nge ya mvimba tii bubu yai? Keti mono me sadilaka nge ntete mambu mutindu yai?” Balami vutulaka nde: “Ve!” 31 Ebuna Yehowa kangulaka meso ya Balami,+ mpi yandi monaka wanzio ya Yehowa me telama na nzila yandi me simba mbele ya bitumba na diboko na yandi. Na mbala mosi yandi bwaka na ntoto mpi fukamaka luse na ntoto.

32 Ebuna wanzio ya Yehowa tubilaka yandi nde: “Sambu na nki nge me bula mpunda na nge mbala tatu yai? Tala! Mono mosi basikaka sambu na kutelamina nge, sambu mambu ya nge ke sala ke wakana ve ti luzolo na mono.+ 33 Mpunda monaka mono mpi yo mekaka kutina mono mbala tatu yai.+ Inki zolaka kusalama kana yo tinaka mono ve? Mono zolaka kufwa nge ntama mpi kubika mpunda na luzingu.” 34 Balami tubilaka wanzio ya Yehowa nde: “Mono me sala disumu, sambu mono zabaka ve nde nge muntu telamaka na nzila sambu na kukutana ti mono. Mpi ntangu yai, kana yo kele mbi na meso na nge, mono ta vutuka.” 35 Kansi wanzio ya Yehowa tubilaka Balami nde: “Kwenda ti bo, kansi nge ta tuba kaka mambu yina mono ta songa nge.” Yo yina, Balami landaka kukwenda ti bamfumu ya Balaki.

36 Ntangu Balaki waka nde Balami me kwisa, na mbala mosi yandi basikaka sambu na kukutana ti Balami na mbanza Moabi, yina kele na lweka ya Arnoni na ndilu ya teritware. 37 Balaki tubilaka Balami nde: “Keti mono tindaka ve bantu sambu na kubinga nge? Sambu na nki nge kwisaka ve? Keti nge yindulaka nde mono lenda pesa nge ve lukumu mingi?”+ 38 Balami vutudilaka Balaki nde: “Ee, mono me kwisa ntangu yai na nge. Kansi, keti mono kele na nswa ya kutuba diambu mosi? Mono ta tuba kaka mambu yina Nzambi ta tula na munoko na mono.”+

39 Yo yina Balami kwendaka ti Balaki, mpi bo kumaka na Kiriati-usoti. 40 Balaki tambikaka bangombe ti mameme mpi tindaka ya nkaka na Balami mpi na bamfumu yina vandaka ti yandi. 41 Na suka, Balaki bakaka Balami mpi matisaka yandi na Bamoti-baale; na kisika yina, yandi lendaka kumona bantu yonso.+

23 Ebuna Balami tubilaka Balaki nde: “Tunga bamesa-kimenga+ nsambwadi na kisika yai, mpi yidikila mono bangombe ya babakala nsambwadi ti mameme ya babakala nsambwadi.” 2 Na mbala mosi Balaki salaka kaka mutindu Balami tubaka. Ebuna Balaki ti Balami tambikaka ngombe mosi ya bakala ti dimeme mosi ya bakala na konso mesa-kimenga.+ 3 Ebuna Balami tubilaka Balaki nde: “Bikala awa pene-pene ya dikabu na nge ya kuyoka, mpi mono ta kwenda. Mbala ya nkaka Yehowa ta solula ti mono. Konso diambu yina yandi ta songa mono, mono ta zabisa nge.” Ebuna yandi kwendaka na nsongi ya ngumba mosi ya fioti.

4 Ebuna Nzambi solulaka ti Balami;+ mpi Balami tubilaka yandi nde: “Mono me tunga bamesa-kimenga nsambwadi na bandonga, mpi mono me pesa ngombe mosi ya bakala ti dimeme mosi ya bakala na konso mesa-kimenga.” 5 Yehowa tulaka mambu yai na munoko ya Balami:+ “Vutuka na Balaki, mpi yai mambu ya nge fwete tuba.” 6 Yo yina yandi vutukaka mpi monaka nde Balaki ti bamfumu yonso ya Moabi vandaka ya kutelama pene-pene ya dikabu na yandi ya kuyoka. 7 Ebuna yandi tubaka kingana yai:+

‘Kwisa kusingila mono Yakobi.

Ee, kwisa kutungulula Izraele.’+

 8 Inki mutindu mono lenda singa bantu yina Nzambi me singa ve?

Mpi nki mutindu mono lenda tungulula bantu yina Yehowa me tungulula ve?+

11 Ebuna Balaki tubilaka Balami nde: “Inki nge me sala mono? Mono nataka nge sambu nge singa bambeni na mono, kansi tala nge me sakumuna bo.”+ 12 Yandi vutulaka nde: “Keti mono fwete tuba ve mambu yonso yina Yehowa ke tula na munoko na mono?”+

13 Balaki tubilaka yandi nde: “Pardo, kwisa ti mono na kisika ya nkaka, kisika nge lenda mona bo. Nge ta mona kaka ndambu na bo; nge ta mona bo yonso ve. Singila mono+ bo kuna.” 14 Yo yina, yandi nataka Balami na kilanga ya Sofimi, na nsongi ya Pisga,+ yandi tungaka bamesa-kimenga nsambwadi mpi tambikaka ngombe mosi ya bakala ti dimeme mosi ya bakala na konso mesa-kimenga.+ 15 Yo yina, Balami tubilaka Balaki nde: “Bikala awa pene-pene ya dikabu na nge ya kuyoka na ntangu mono ke solula ti yandi kuna.” 16 Ebuna Yehowa solulaka ti Balami mpi tulaka bangogo yai na munoko na yandi:+ “Vutuka na Balaki, mpi yai mambu ya nge fwete tuba.” 17 Yo yina yandi kwisaka kisika Balaki vandaka mpi monaka nde yandi vandaka kuvingila pene-pene ya dikabu na yandi ya kuyoka, mpi bamfumu ya Moabi vandaka ti yandi. Balaki yulaka yandi nde: “Yehowa me tuba inki?” 18 Na nima yandi tubaka kingana yai:+

“Balaki, telama, mpi widikila.

Wa mono, O mwana ya Sipore.

Kana yandi tuba diambu mosi, keti yandi ta sala yo ve?

Kana yandi tuba, keti yandi ta lungisa+ yo ve?

22 Nzambi ke basisa bo na Ezipte.+

Yandi kele bonso bibongo ya mpakasa sambu na bo.+

Na ntangu yai bo lenda tuba sambu na Yakobi mpi Izraele nde:

‘Tala mambu yina Nzambi me sala!’

25 Ebuna Balaki tubilaka Balami nde: “Kana nge lenda singa yandi ve, nge fwete sakumuna yandi mpi ve.” 26 Balami vutudilaka Balaki nde: “Keti mono tubilaka nge ve nde, ‘Mono ta sala mambu yonso yina Yehowa ke tuba’?”+

27 Balaki tubilaka Balami nde: “Pardo kwisa mpi bika mono nata nge na kisika ya nkaka diaka. Mbala ya nkaka yo ta vanda mbote na meso ya Nzambi ya kieleka nde nge singila mono yandi kuna.”+ 28 Yo yina Balaki nataka Balami na nsongi ya Peore, yina ke tala na ndambu ya Yeshimoni.*+ 29 Ebuna Balami tubilaka Balaki nde: “Tunga bamesa-kimenga nsambwadi na kisika yai, mpi yidikila mono+ bangombe ya babakala nsambwadi ti mameme ya babakala nsambwadi.” 30 Balaki salaka kaka mutindu Balami tubaka, mpi yandi tambikaka ngombe mosi ya bakala ti dimeme mosi ya bakala na konso mesa-kimenga.

24 Ntangu Balami monaka nde yo sepedisaka* Yehowa na kusakumuna Izraele, yandi kwendaka diaka ve kisika ya nkaka sambu na kusosa bidimbu ya mambu ya mbi yina ke kwisa,+ kansi yandi balusaka luse na yandi na ndambu ya ntoto-makanga. 2 Ntangu Balami talaka mpi monaka Izraele me sala camp na kutadila makanda na yandi,+ mpeve ya Nzambi kwisilaka yandi.+ 3 Na nima yandi tubaka kingana yai:+

10 Ebuna Balaki wilaka Balami makasi ya ngolo. Balaki bulaka maboko na kuvweza yonso mpi tubilaka Balami nde: “Mono bingaka nge+ sambu na kusinga bambeni na mono, kansi ntangu yai nge me sakumuna bo mbala tatu yai. 11 Ntangu yai, vutuka mbala mosi na insi na nge. Mono vandaka ti dibanza ya kupesa nge lukumu mingi,+ kansi Yehowa me yimina nge lukumu.”

12 Balami vutudilaka Balaki nde: “Keti mono tubilaka ve binati-nsangu yina nge tindaka nde, 13 ‘Ata Balaki zolaka kupesa mono nzo na yandi ya kufuluka ti arza mpi wolo, na luzolo na mono mosi,* mono zolaka ve kusala ata diambu mosi yina Yehowa me pesa ve nsiku, yo vanda ya mbote to ya mbi. Mono ta tuba kaka mambu yina Yehowa ta songa mono’?+ 14 Mpi ntangu yai, mono ke vutuka na bantu na mono. Kwisa, mono songa nge mambu yina bantu yai ta sala bantu na nge na bilumbu yina ke kwisa.”* 15 Ebuna yandi tubaka kingana yai:+

20 Ntangu yandi monaka Amaleki, yandi landaka kutuba kingana na yandi:

21 Ntangu yandi monaka bantu ya Keni,+ yandi landaka kutuba kingana na yandi:

“Kisika na nge ya kuzinga kele na lutaninu, mpi nzo na nge kele na kati ya ditadi.

22 Kansi muntu mosi ta yoka Kayini tiya.

Ntangu ikwa na ntwala nde Asiria kunata nge na kimpika?”

23 Mpi yandi landaka kutuba kingana na yandi:

“Mawa! Nani ta guluka ntangu Nzambi ta sala diambu yai?

Kansi yandi mpi ta fwa kibeni.”

25 Na nima, Balami+ telamaka, kwendaka, mpi vutukaka na insi na yandi. Balaki mpi kwendaka na nzila na yandi.

25 Ntangu Izraele vandaka kuzinga na Shitimi,+ bantu yantikaka kusala pite ti bana-bankento ya Moabi.+ 2 Bankento yina bingaka bantu ya Izraele na bimenga ya banzambi na bo,+ mpi bo yantikaka kudia bimenga mpi kufukimina banzambi na bo.+ 3 Yo yina Izraele vukanaka na lusambu ya* Baale ya Peore,+ ebuna Yehowa wilaka Izraele makasi ya ngolo. 4 Yehowa tubilaka Moize nde: “Baka bantwadisi* yonso ya bantu yai mpi tula bo bansinga na nkingu na ntwala ya Yehowa na kati-kati ya ntangu,* sambu makasi ya ngolo yina Yehowa me wila Izraele kumana.” 5 Ebuna Moize tubilaka bazuzi ya Izraele+ nde: “Konso muntu na kati na beno fwete fwa bantu na yandi yina vukanaka na lusambu ya* Baale ya Peore.”+

6 Kansi kaka na ntangu yina, muntu mosi ya Izraele kwisaka kunata nkento+ mosi ya Madiani pene-pene ya bampangi na yandi, na meso ya Moize mpi ya kimvuka ya mvimba ya bantu ya Izraele, ntangu bo vandaka kudila na munoko ya tenta ya lukutakanu. 7 Ntangu Fineasi,+ mwana ya Eleazare mwana ya nganga-nzambi Aroni, monaka yo, yandi telamaka na mbala mosi na kati ya kimvuka ya bantu mpi bakaka dikonga na diboko na yandi. 8 Ebuna yandi landaka muntu yina ya Izraele na tenta mpi tobulaka bo zole, muntu yina ya Izraele ti nkento yina na kinkento na yandi. Ebuna mpasi yina bantu ya Izraele vandaka na yo manaka.+ 9 Bantu yina fwaka na mpasi yina vandaka 24 000.+

10 Ebuna Yehowa tubilaka Moize nde: 11 “Fineasi+ mwana ya Eleazare mwana ya nganga-nzambi Aroni me katula makasi yina mono wilaka bantu ya Izraele, sambu yandi pesaka ve nzila ata fioti nde mono vanda na kimbanda na kati na bo.+ Yo yina, mono me manisa ve bantu ya Izraele, ata mono ke lombaka nde bo kangama kaka na mono.+ 12 Yo yina tuba nde, ‘Mono ke sala kuwakana ya ngemba ti yandi. 13 Mpi yo ta vanda kuwakana ya kinganga-nzambi ya mvula na mvula sambu na yandi mpi bana na yandi,+ sambu yandi pesaka ve nzila nde Nzambi na yandi+ kuvanda na kimbanda mpi yandi fikaka masumu sambu na bantu ya Izraele.’”

14 Zina ya muntu ya Izraele yina bo fwaka kumosi ti nkento ya Madiani vandaka Zimri mwana ya Salu, mfumu ya nzo mosi ya batata ya bana ya Simeoni. 15 Zina ya nkento ya Madiani yina bo fwaka vandaka Kozbi mwana ya Sure;+ Sure vandaka ntwadisi ya makanda ya nzo mosi ya batata na Madiani.+

16 Na nima, Yehowa tubilaka Moize nde: 17 “Niokula bantu ya Madiani, mpi fwa bo,+ 18 sambu bo me niokula beno na mutindu bo me sadila beno mambu ti mayele ya mbi na diambu ya Peore+ mpi ya Kozbi mwana ya mfumu mosi ya Madiani, mpangi na bo ya nkento yina bo fwaka+ na kilumbu ya mpasi yina basikaka sambu na diambu ya Peore.”+

26 Na nima ya mpasi yina,+ Yehowa tubilaka Moize mpi Eleazare mwana ya nganga-nzambi Aroni nde: 2 “Beno tanga ntalu ya kimvuka ya mvimba ya bantu ya Izraele yantika na bamvula 20 mata, na kutadila banzo ya batata na bo, bantu yonso yina lenda sala kisalu ya kisoda na Izraele.”+ 3 Ebuna Moize mpi nganga-nzambi Eleazare+ solulaka ti bo na ntoto ya zelo na zelo ya Moabi+ na lweka ya Yordani pene-pene ya Yeriko+ nde: 4 “Beno tanga ntalu na bo yantika na bamvula 20 mata, kaka mutindu Yehowa songaka Moize.”+

Bana ya Izraele yina basikaka na insi ya Ezipte vandaka: 5 Rubeni,+ mwana ya ntete ya Izraele; bana ya Rubeni+ bo yai: na Anoki, dibuta ya bana ya Anoki; na Palu, dibuta ya bana ya Palu; 6 na Esroni, dibuta ya bana ya Esroni; na Karmi, dibuta ya bana ya Karmi. 7 Yai mabuta ya bana ya Rubeni, mpi bantu na bo yina bo sonikaka bazina vandaka 43 730.+

8 Mwana ya Palu vandaka Eliabi. 9 Bana ya Eliabi vandaka Nemuele, Datani, ti Abirami. Datani ti Abirami yai vandaka bantu yina bo solaka na kati ya bantu ya Izraele bayina telaminaka Moize+ ti Aroni, kumosi ti kimvuka ya Kora+ ntangu bo nwanisaka Yehowa.+

10 Ebuna ntoto kangukaka* mpi minaka bo. Kansi Kora, yandi fwaka ti bantu yina vandaka kukotila yandi ntangu tiya yokaka bantu 250.+ Mpi bo kumaka mbandu ya ke kebisa.+ 11 Kansi, bana ya Kora fwaka ve.+

12 Bana ya Simeoni+ na kutadila mabuta na bo, bo yai: na Nemuele, dibuta ya bana ya Nemuele; na Yamini, dibuta ya bana ya Yamini; na Yakini, dibuta ya bana ya Yakini; 13 na Zera, dibuta ya bana ya Zera; na Shaule, dibuta ya bana ya Shaule. 14 Yai mabuta ya bana ya Simeoni, mpi ntalu ya bantu na bo yina bo sonikaka bazina vandaka 22 200.+

15 Bana ya Gadi+ na kutadila mabuta na bo, bo yai: na Sefoni, dibuta ya bana ya Sefoni; na Agi, dibuta ya bana ya Agi; na Shuni, dibuta ya bana ya Shuni; 16 na Ozni, dibuta ya bana ya Ozni; na Eri, dibuta ya bana ya Eri; 17 na Arodi, dibuta ya bana ya Arodi; na Areli, dibuta ya bana ya Areli. 18 Yai mabuta ya bana ya Gadi, mpi bantu na bo yina bo sonikaka bazina vandaka 40 500.+

19 Bana ya Yuda+ vandaka Ere ti Onani.+ Kansi, Ere ti Onani fwaka na insi ya Kanana.+ 20 Mpi bana ya Yuda na kutadila mabuta na bo, bo yai: na Shela,+ dibuta ya bana ya Shela; na Peresi,+ dibuta ya bana ya Peresi; na Zera,+ dibuta ya bana ya Zera. 21 Bana ya Peresi bo yai: na Esroni,+ dibuta ya bana ya Esroni; na Amule,+ dibuta ya bana ya Amule. 22 Yai mabuta ya bana ya Yuda, mpi bantu na bo yina bo sonikaka bazina vandaka 76 500.+

23 Bana ya Isakare+ na kutadila mabuta na bo, bo yai: na Tola,+ dibuta ya bana ya Tola; na Puva, dibuta ya bana ya Puni; 24 na Yashubi, dibuta ya bana ya Yashubi; na Shimroni, dibuta ya bana ya Shimroni. 25 Yai mabuta ya bana ya Isakare, mpi bantu na bo yina bo sonikaka bazina vandaka 64 300.+

26 Bana ya Zebuloni+ na kutadila mabuta na bo, bo yai: na Seredi, dibuta ya bana ya Seredi; na Eloni, dibuta ya bana ya Eloni; na Yaleele, dibuta ya bana ya Yaleele. 27 Yai mabuta ya bana ya Zebuloni, mpi bantu na bo yina bo sonikaka bazina vandaka 60 500.+

28 Bana ya Yozefi+ na kutadila mabuta na bo, bo yai: Manase mpi Efrayimi.+ 29 Bana ya Manase+ vandaka: na Makire,+ dibuta ya bana ya Makire; mpi Makire butaka Gileadi;+ na Gileadi, dibuta ya bana ya Gileadi. 30 Yai bana ya Gileadi: na Yezere, dibuta ya bana ya Yezere; na Eleki, dibuta ya bana ya Eleki; 31 na Asriele, dibuta ya bana ya Asriele; na Shekemi, dibuta ya bana ya Shekemi; 32 na Shemida, dibuta ya bana ya Shemida; na Hefere, dibuta ya bana ya Hefere. 33 Kansi, Selofehadi mwana ya Hefere vandaka ve ti bana-babakala, kaka bana-bankento,+ mpi bazina ya bana-bankento ya Selofehadi+ vandaka Mala, Noa, Ogla, Milka, mpi Tirsa. 34 Yai mabuta ya bana ya Manase, mpi bantu na bo yina bo sonikaka bazina vandaka 52 700.+

35 Bana ya Efrayimi+ na kutadila mabuta na bo, bo yai: na Shutela, dibuta ya bana ya Shutela;+ na Bekere, dibuta ya bana ya Bekere; na Tahani, dibuta ya bana ya Tahani. 36 Mpi yai bana ya Shutela: na Erani, dibuta ya bana ya Erani. 37 Yai mabuta ya bana ya Efrayimi, mpi bantu na bo yina bo sonikaka bazina vandaka 32 500.+ Yai bana ya Yozefi na kutadila mabuta na bo.

38 Bana ya Benyamini+ na kutadila mabuta na bo, bo yai: na Bela,+ dibuta ya bana ya Bela; na Ashbele, dibuta ya bana ya Ashbele; na Ahirami, dibuta ya bana ya Ahirami; 39 na Shefufami, dibuta ya bana ya Shufami; na Ufami, dibuta ya bana ya Ufami. 40 Bana ya Bela vandaka Ardi mpi Namani:+ na Ardi, dibuta ya bana ya Ardi; na Namani, dibuta ya bana ya Namani. 41 Yai bana ya Benyamini na kutadila mabuta na bo, mpi bantu na bo yina bo sonikaka bazina vandaka 45 600.+

42 Bana ya Dani+ na kutadila mabuta na bo, bo yai: na Shuhami, dibuta ya bana ya Shuhami. Yai mabuta ya Dani na kutadila mabuta na bo. 43 Mabuta yonso ya bana ya Shuhami, na bantu na bo yina bo sonikaka bazina, vandaka 64 400.+

44 Bana ya Asere+ ya babakala na kutadila mabuta na bo, bo yai: na Yimna, dibuta ya bana ya Yimna; na Yishvi, dibuta ya bana ya Yishvi; na Beria, dibuta ya bana ya Beria; 45 na bana ya Beria: na Hebere, dibuta ya bana ya Hebere; na Malkiele, dibuta ya bana ya Malkiele. 46 Zina ya mwana ya Asere ya nkento vandaka Sera. 47 Yai mabuta ya bana ya Asere, mpi bantu na bo yina bo sonikaka bazina vandaka 53 400.+

48 Bana ya Naftali+ na kutadila mabuta na bo, bo yai: na Yaseele, dibuta ya bana ya Yaseele; na Guni, dibuta ya bana ya Guni; 49 na Yesere, dibuta ya bana ya Yesere; na Shilemi, dibuta ya bana ya Shilemi. 50 Yai mabuta ya Naftali na kutadila mabuta na bo, mpi bantu na bo yina bo sonikaka bazina vandaka 45 400.+

51 Ntalu ya bantu yonso ya Izraele yina bo sonikaka bazina kele 601 730.+

52 Na nima, Yehowa tubilaka Moize nde: 53 “Na kati ya bantu yai, bo fwete kabisa insi bonso dikabu na kutadila lisiti ya bazina.*+ 54 Sambu na bimvuka ya nene, nge fwete kumisa dikabu nene, mpi sambu na bimvuka ya fioti, nge fwete fiotuna dikabu.+ Nge fwete pesa konso kimvuka dikabu na yo na kutadila ntalu ya bantu yina bo sonikaka bazina. 55 Kansi, bo fwete bula zeke sambu na kukabisa ntoto.+ Bo fwete baka dikabu na bo na kutadila bazina ya makanda ya batata na bo. 56 Bo ta bula zeke sambu na kuzaba konso dikabu, mpi kukabisa yo na kati ya bimvuka ya nene mpi ya fioti.”

57 Yai Balevi+ yina bo sonikaka bazina na kutadila mabuta na bo: na Gershoni, dibuta ya bana ya Gershoni; na Kohati,+ dibuta ya bana ya Kohati; na Merari, dibuta ya bana ya Merari. 58 Yai mabuta ya Balevi: dibuta ya bana ya Libni,+ dibuta ya bana ya Ebroni,+ dibuta ya bana ya Mali,+ dibuta ya bana ya Mushi,+ dibuta ya bana ya Kora.+

Kohati butaka Amrami.+ 59 Zina ya nkento ya Amrami vandaka Yokebedi,+ mwana ya Levi, yina nkento ya Levi butilaka yandi na Ezipte. Mpi Yokebedi butilaka Amrami Aroni ti Moize, mpi mpangi na bo ya nkento Miriami.+ 60 Na nima, Aroni butaka Nadabi, Abihu, Eleazare, mpi Itamare.+ 61 Kansi Nadabi ti Abihu fwaka sambu bo pesaka na ntwala ya Yehowa+ tiya yina nsiku pesaka ve nswa.

62 Ntalu ya bantu yonso yina bo sonikaka bazina vandaka 23 000, babakala yonso yantika na ngonda mosi mata.+ Bo sonikaka ve bazina na bo na kati ya bantu ya Izraele,+ sambu yo lombaka ve nde bo pesa bo dikabu na kati ya bantu ya Izraele.+

63 Yai bantu yina Moize ti nganga-nzambi Eleazare sonikaka bazina ntangu bo sonikaka bazina ya bantu ya Izraele na ntoto ya zelo na zelo ya Moabi na lweka ya Yordani pene-pene ya Yeriko. 64 Kansi na kati na bo kuvandaka ve ti bantu yina Moize ti nganga-nzambi Aroni sonikaka bazina ntangu bo tangaka ntalu ya bantu ya Izraele na ntoto-makanga ya Sinai.+ 65 Sambu Yehowa tubaka mambu yai sambu na bo: “Bo ta fwa kibeni na ntoto-makanga.”+ Yo yina, ata muntu mosi ve bikalaka na kati na bo katula kaka Kalebi mwana ya Yefune mpi Yozue mwana ya Nuni.+

27 Ebuna bana-bankento ya Selofehadi,+ mwana ya Hefere, mwana ya Gileadi, mwana ya Makire, mwana ya Manase, na mabuta ya Manase mwana ya Yozefi, pusanaka pene-pene. Bazina ya bana na yandi ya bankento vandaka Mala, Noa, Ogla, Milka, mpi Tirsa. 2 Bo telamaka na ntwala ya Moize, ya nganga-nzambi Eleazare, ya bamfumu,+ mpi ya kimvuka ya mvimba ya bantu na munoko ya tenta ya lukutakanu, mpi bo tubaka nde: 3 “Tata na beto fwaka na ntoto-makanga, kansi yandi vandaka ve na kimvuka ya bantu yina vukanaka sambu na kutelamina Yehowa, bantu yina vandaka kukotila Kora,+ kansi yandi fwaka sambu na disumu na yandi mosi mpi yandi vandaka ve ti bana-babakala. 4 Sambu na nki zina ya tata na beto fwete vila na dibuta na yandi sambu yandi vandaka ve ti mwana-bakala? Pesa beto ntoto na kati ya bampangi ya tata na beto.” 5 Moize nataka diambu na bo na ntwala ya Yehowa.+

6 Ebuna Yehowa tubilaka Moize nde: 7 “Bana-bankento ya Selofehadi me tuba mbote. Nge fwete pesa bo kibeni ntoto bonso dikabu na kati ya bampangi ya tata na bo, mpi nge fwete pesa bo dikabu ya tata na bo.+ 8 Songa bantu ya Izraele nde, ‘Kana bakala mosi me fwa mpi yandi kele ve na mwana-bakala, beno fwete pesa dikabu na yandi na mwana na yandi ya nkento. 9 Ebuna kana yandi kele ve na mwana-nkento, beno ta pesa dikabu na yandi na bampangi na yandi ya babakala. 10 Kana yandi kele ve na bampangi ya babakala, beno ta pesa dikabu na yandi na bampangi ya babakala ya tata na yandi. 11 Kana tata na yandi kele ve na bampangi ya babakala, beno ta pesa dikabu na yandi na mpangi na yandi ya menga kibeni na dibuta na yandi, mpi yandi ta baka yo. Nkanu yai ta vanda nsiku sambu na bantu ya Izraele, kaka mutindu Yehowa me songa Moize.’”

12 Na nima Yehowa tubilaka Moize nde: “Tombuka na ngumba yai ya Abarimi,+ mpi tala insi yina mono ta pesa bantu ya Izraele.+ 13 Ntangu nge ta mona yo, bo ta vukisa nge mpi ti bantu na nge,*+ kaka mutindu bo vukisaka+ mpangi na nge Aroni ti bantu na yandi, 14 sambu ntangu bantu ya Izraele swanisaka mono na ntoto-makanga ya Zini, beno kolamaka na nsiku na mono mpi beno santisaka mono ve na ntwala na bo ntangu mono basisaka masa.+ Yai masa ya Meriba+ na Kadeshi+ na ntoto-makanga ya Zini.”+

15 Ebuna Moize tubilaka Yehowa nde: 16 “Bika nde Yehowa, Nzambi yina ke pesaka bantu yonso luzingu,* kutula muntu yina ta twadisa bantu ya Izraele, 17 yina ta basika mpi ta kota na ntwala na bo mpi yina ta basisa bo mpi ta kotisa bo, sambu kimvuka ya bantu ya Yehowa kukuma ve bonso mameme yina me konda ngungudi.” 18 Ebuna Yehowa tubilaka Moize nde: “Baka Yozue mwana ya Nuni, muntu yina kele ti mpeve, mpi tula yandi+ maboko. 19 Na nima, tedimisa yandi na ntwala ya nganga-nzambi Eleazare mpi na ntwala ya kimvuka ya mvimba ya bantu, mpi nge fwete tula yandi bonso ntwadisi na meso na bo.+ 20 Nge fwete pesa yandi+ ndambu ya kiyeka* na nge, sambu kimvuka ya mvimba ya bantu ya Izraele kuwila yandi.+ 21 Yandi ta telama na ntwala ya nganga-nzambi Eleazare, yina ta yula sambu na yandi na nsadisa ya lusambisu ya Urimi+ na ntwala ya Yehowa. Bo ta basika na kulanda nsiku na yandi mpi bo ta kota na kulanda nsiku na yandi, yandi ti bantu yonso ya Izraele yina kele ti yandi mpi kimvuka ya mvimba ya bantu.”

22 Yo yina Moize salaka kaka mutindu Yehowa songaka yandi. Yandi bakaka Yozue mpi tedimisaka yandi na ntwala ya nganga-nzambi Eleazare mpi na ntwala ya kimvuka ya mvimba ya bantu, 23 ebuna yandi tulaka yandi maboko mpi tulaka yandi bonso ntwadisi,+ kaka mutindu Yehowa tubaka na nzila ya Moize.+

28 Na nima Yehowa tubilaka Moize nde: 2 “Pesa bantu ya Izraele nsiku mpi songa bo nde, ‘Beno fwete sala keba na kupesa mono dikabu na mono, dimpa na mono. Beno fwete pesa makabu na mono ya kuyoka na tiya bonso makabu ya nsudi ya kitoko* sambu na mono na bantangu na yo ya bo me tulaka.’+

3 “Mpi tubila bo nde, ‘Yai dikabu ya bo me yoka na tiya yina beno ta pesa Yehowa: konso kilumbu beno ta pesa bana-mameme zole ya babakala ya kukonda kifu yina me lungisa mvula mosi bonso dikabu ya kuyoka, mbala na mbala.+ 4 Nge ta pesa mwana-dimeme mosi ya bakala na suka, mpi nge ta pesa mwana-dimeme yina ya nkaka na nkokila.*+ 5 Kumosi ti makabu yai nge fwete pesa dikabu ya mbuma,+ ndambu mosi na kati ya bandambu kumi ya efa* ya fufu ya kitoko ya bo me vukisa ti ndambu mosi na kati ya bandambu iya ya hini* ya mafuta yina bo me tuta. 6 Yo kele dikabu ya kuyoka+ ya mbala na mbala, yina bo yantikisaka na Ngumba ya Sinai bonso dikabu ya nsudi ya kitoko,* dikabu yina bo me yoka na tiya sambu na Yehowa, 7 kumosi ti dikabu na yo ya malafu, ndambu mosi na kati ya bandambu iya ya hini sambu na konso mwana-dimeme ya bakala.+ Tiamuna malafu yina ke lawusaka na kisika ya santu bonso dikabu ya malafu sambu na Yehowa. 8 Mpi nge ta pesa mwana-dimeme ya bakala yina ya nkaka na nkokila.* Nge ta pesa yo bonso dikabu yina bo me yoka na tiya, bonso dikabu ya nsudi ya kitoko* sambu na Yehowa,+ kumosi ti dikabu ya mbuma ya kiteso mosi ti yina nge pesaka na suka mpi kumosi ti dikabu na yo ya malafu ya kiteso mosi.

9 “‘Kansi, na kilumbu ya Kisabatu,+ dikabu ya beno ta pesa fwete vanda bana-mameme zole ya babakala ya kukonda kifu mpi bandambu zole na kati ya bandambu kumi ya efa ya fufu ya kitoko yina bo me vukisa ti mafuta bonso dikabu ya mbuma, kumosi ti dikabu na yo ya malafu. 10 Yai dikabu ya kuyoka sambu na Kisabatu, kumosi ti dikabu ya kuyoka ya mbala na mbala mpi dikabu na yo ya malafu.+

11 “‘Na luyantiku ya konso ngonda,* beno ta pesa bonso dikabu ya kuyoka sambu na Yehowa bana-bangombe zole ya babakala, dimeme mosi ya bakala, bana-mameme ya babakala nsambwadi ya kukonda kifu yina me lungisa mvula mosi,+ 12 mpi bandambu tatu na kati ya bandambu kumi ya bitesilu ya fufu ya kitoko ya bo me vukisa ti mafuta bonso dikabu ya mbuma+ sambu na konso ngombe ya bakala mpi bandambu zole na kati ya bandambu kumi ya bitesilu ya fufu ya kitoko ya bo me vukisa ti mafuta bonso dikabu ya mbuma sambu na dimeme ya bakala,+ 13 mpi ndambu mosi na kati ya bandambu kumi ya kitesilu ya fufu ya kitoko ya bo me vukisa ti mafuta bonso dikabu ya mbuma sambu na konso mwana-dimeme ya bakala, bonso dikabu ya kuyoka, dikabu ya nsudi ya kitoko,*+ dikabu yina bo me yoka na tiya sambu na Yehowa. 14 Makabu na yo ya malafu fwete vanda kati-kati ya hini ya vinu sambu na ngombe ya bakala+ mpi ndambu mosi na kati ya bandambu tatu ya hini sambu na dimeme ya bakala+ mpi ndambu mosi na kati ya bandambu iya ya hini sambu na mwana-dimeme mosi ya bakala.+ Yai dikabu ya kuyoka ya ngonda mosi, ya beno ta pesa konso ngonda na mvula ya mvimba. 15 Diaka, beno fwete pesa Yehowa mwana-nkombo mosi bonso dikabu sambu na disumu na zulu ya dikabu ya kuyoka ya mbala na mbala kumosi ti dikabu ya malafu.

16 “‘Na ngonda ya ntete, na kilumbu ya 14 ya ngonda, yo ta vanda Paki ya Yehowa.+ 17 Mpi na kilumbu ya 15 ya ngonda yai, yo ta vanda nkinsi. Beno ta dia mampa ya kukonda levire bilumbu nsambwadi.+ 18 Kilumbu ya ntete ta vanda lukutakanu ya santu. Beno fwete sala ve ata kisalu mosi ya ngolo. 19 Mpi beno ta pesa bonso dikabu yina bo me yoka na tiya sambu na Yehowa bana-bangombe zole ya babakala, dimeme mosi ya bakala, mpi bana-mameme ya babakala nsambwadi yina me lungisa mvula mosi. Beno fwete pesa bambisi ya kukonda kifu.+ 20 Beno fwete pesa yo ti makabu na yo ya mbuma ya fufu ya kitoko ya bo me vukisa ti mafuta,+ bandambu tatu na kati ya bandambu kumi ya efa sambu na ngombe mosi ya bakala mpi bandambu zole na kati ya bandambu kumi ya efa sambu na dimeme ya bakala. 21 Beno ta pesa ndambu mosi na kati ya bandambu kumi ya efa sambu na konso mwana-dimeme na kati ya bana-mameme ya babakala nsambwadi, 22 mpi nkombo mosi ya bakala bonso dikabu sambu na disumu sambu na kufika masumu na beno. 23 Beno ta pesa makabu yai na zulu ya dikabu ya kuyoka ya suka, yina kele sambu na dikabu ya kuyoka ya mbala na mbala. 24 Beno ta pesa bima yai na mutindu mosi konso kilumbu na nsungi ya bilumbu nsambwadi bonso madia,* dikabu ya bo me yoka na tiya bonso kima ya nsudi ya kitoko* sambu na Yehowa. Beno fwete pesa yo kumosi ti dikabu ya kuyoka ya mbala na mbala mpi dikabu na yo ya malafu. 25 Na kilumbu ya nsambwadi, beno fwete sala lukutakanu ya santu.+ Beno fwete sala ve ata kisalu mosi ya ngolo.+

26 “‘Na kilumbu ya bambuma ya ntete ya kuyela,+ ntangu beno ta pesa dikabu ya mbuma ya mpa na Yehowa,+ beno fwete sala lukutakanu ya santu na nkinsi na beno ya bamposo.+ Beno fwete sala ve ata kisalu mosi ya ngolo.+ 27 Beno ta pesa bonso dikabu ya kuyoka sambu yo pesa nsudi ya kitoko* sambu na Yehowa: bana-bangombe zole ya babakala, dimeme mosi ya bakala, mpi bana-mameme ya babakala nsambwadi yina me lungisa mvula mosi,+ 28 mpi bonso makabu na yo ya mbuma ya fufu ya kitoko ya bo me vukisa ti mafuta, bandambu tatu na kati ya bandambu kumi ya efa sambu na konso ngombe ya bakala, bandambu zole na kati ya bandambu kumi ya efa sambu na dimeme ya bakala, 29 ndambu mosi na kati ya bandambu kumi ya efa sambu na konso mwana-dimeme na kati ya bana-mameme ya babakala nsambwadi, 30 mpi mwana-nkombo mosi sambu na kufika masumu na beno.+ 31 Beno ta pesa yo na zulu ya dikabu ya kuyoka ya mbala na mbala mpi dikabu na yo ya mbuma. Yo fwete vanda bambisi ya kukonda kifu,+ kumosi ti makabu na yo ya malafu.

29 “‘Mpi na ngonda ya nsambwadi, na kilumbu ya ntete ya ngonda, beno fwete sala lukutakanu mosi ya santu. Beno fwete sala ve ata kisalu mosi ya ngolo.+ Yo kele kilumbu yina bo fwete bula mpungi.+ 2 Beno ta pesa bonso dikabu ya kuyoka sambu yo pesa nsudi ya kitoko* sambu na Yehowa: mwana-ngombe mosi ya bakala, dimeme mosi ya bakala, mpi bana-mameme ya babakala nsambwadi yina me lungisa mvula mosi, bambisi yonso fwete vanda ya kukonda kifu, 3 mpi dikabu na yo ya mbuma ya fufu ya kitoko ya bo me vukisa ti mafuta, bandambu tatu na kati ya bandambu kumi ya efa sambu na ngombe ya bakala, bandambu zole na kati ya bandambu kumi ya efa sambu na dimeme ya bakala, 4 mpi ndambu mosi na kati ya bandambu kumi ya kitesilu mosi sambu na konso mwana-dimeme na kati ya bana-mameme ya babakala nsambwadi, 5 mpi mwana-nkombo mosi ya bakala bonso dikabu sambu na disumu sambu na kufika masumu na beno. 6 Beno ta pesa yo na zulu ya dikabu ya kuyoka ya konso ngonda mpi dikabu na yo ya mbuma+ mpi dikabu ya kuyoka ya mbala na mbala ti dikabu na yo ya mbuma,+ kumosi ti makabu na yo ya malafu,+ na kutadila mutindu bo ke salaka mbala na mbala sambu na yo, bonso dikabu ya nsudi ya kitoko,* dikabu yina bo me yoka na tiya sambu na Yehowa.

7 “‘Na kilumbu ya kumi ya ngonda yai ya nsambwadi, beno fwete sala lukutakanu mosi ya santu,+ mpi beno fwete kudimonisa* mpasi. Beno fwete sala ve ata kisalu mosi.+ 8 Ebuna beno ta pesa bonso dikabu ya kuyoka sambu na Yehowa, bonso dikabu ya nsudi ya kitoko,* mwana-ngombe mosi ya bakala, dimeme mosi ya bakala, bana-mameme ya babakala nsambwadi yina me lungisa mvula mosi, bambisi yonso fwete vanda ya kukonda kifu.+ 9 Mpi bonso dikabu na yo ya mbuma ya fufu ya kitoko yina bo me vukisa ti mafuta, bandambu tatu na kati ya bandambu kumi ya efa sambu na ngombe ya bakala, bandambu zole na kati ya bandambu kumi ya efa sambu na dimeme ya bakala, 10 ndambu mosi na kati ya bandambu kumi ya efa sambu na konso mwana-dimeme na kati ya bana-mameme ya babakala nsambwadi, 11 mpi mwana-nkombo mosi bonso dikabu sambu na disumu, katula dikabu sambu na disumu sambu na kufika masumu+ na beno mpi dikabu ya kuyoka ya mbala na mbala mpi dikabu na yo ya mbuma, kumosi ti makabu na yo ya malafu.

12 “‘Na kilumbu ya 15 ya ngonda ya nsambwadi, beno fwete sala lukutakanu mosi ya santu. Beno fwete sala ve ata kisalu mosi ya ngolo, mpi beno fwete sala nkinsi sambu na Yehowa bilumbu nsambwadi.+ 13 Ebuna beno ta pesa bonso dikabu ya kuyoka,+ dikabu yina bo me yoka na tiya bonso dikabu ya nsudi ya kitoko* sambu na Yehowa, bana-bangombe ya babakala 13, mameme ya babakala 2, mpi bana-mameme ya babakala 14 yina me lungisa mvula mosi, bambisi yonso fwete vanda ya kukonda kifu.+ 14 Mpi bonso dikabu na yo ya mbuma ya fufu ya kitoko ya bo me vukisa ti mafuta, bandambu tatu na kati ya bandambu kumi ya efa sambu na konso ngombe na kati ya bangombe ya babakala 13, bandambu zole na kati ya bandambu kumi ya efa sambu na konso dimeme na kati ya mameme 2 ya babakala, 15 mpi ndambu mosi na kati ya bandambu kumi ya efa sambu na konso mwana-dimeme na kati ya bana-mameme ya babakala 14, 16 mpi mwana-nkombo mosi bonso dikabu sambu na disumu, katula dikabu ya kuyoka ya mbala na mbala, dikabu na yo ya mbuma mpi dikabu na yo ya malafu.+

17 “‘Na kilumbu ya zole, bana-bangombe ya babakala 12, mameme ya babakala 2, mpi bana-mameme ya babakala 14 yina me lungisa mvula mosi, bambisi yonso fwete vanda ya kukonda kifu,+ 18 mpi dikabu na yo ya mbuma mpi makabu na yo ya malafu sambu na bangombe ya babakala, mameme ya babakala, mpi bana-mameme ya babakala na kulanda ntalu na yo na kutadila mutindu bo ke salaka mbala na mbala, 19 mpi mwana-nkombo mosi bonso dikabu sambu na disumu, katula dikabu ya kuyoka ya mbala na mbala mpi dikabu na yo ya mbuma, kumosi ti makabu na yo ya malafu.+

20 “‘Na kilumbu ya tatu, bangombe ya babakala 11, mameme ya babakala 2, mpi bana-mameme ya babakala 14 yina me lungisa mvula mosi, bambisi yonso fwete vanda ya kukonda kifu,+ 21 mpi dikabu na yo ya mbuma mpi makabu na yo ya malafu sambu na bangombe ya babakala, mameme ya babakala, mpi bana-mameme ya babakala na kulanda ntalu na yo na kutadila mutindu bo ke salaka mbala na mbala, 22 mpi nkombo mosi ya bakala bonso dikabu sambu na disumu, katula dikabu ya kuyoka ya mbala na mbala mpi dikabu na yo ya mbuma mpi dikabu na yo ya malafu.+

23 “‘Na kilumbu ya iya, bangombe ya babakala 10, mameme ya babakala 2, mpi bana-mameme ya babakala 14 yina me lungisa mvula mosi, bambisi yonso fwete vanda ya kukonda kifu,+ 24 dikabu na yo ya mbuma mpi makabu na yo ya malafu sambu na bangombe ya babakala, mameme ya babakala, mpi bana-mameme ya babakala na kulanda ntalu na yo na kutadila mutindu bo ke salaka mbala na mbala, 25 mpi mwana-nkombo mosi bonso dikabu sambu na disumu, katula dikabu ya kuyoka ya mbala na mbala, dikabu na yo ya mbuma, mpi dikabu na yo ya malafu.+

26 “‘Na kilumbu ya tanu, bangombe ya babakala 9, mameme ya babakala 2, mpi bana-mameme ya babakala 14 yina me lungisa mvula mosi, bambisi yonso fwete vanda ya kukonda kifu,+ 27 mpi dikabu na yo ya mbuma mpi makabu na yo ya malafu sambu na bangombe ya babakala, mameme ya babakala, mpi bana-mameme ya babakala na kulanda ntalu na yo na kutadila mutindu bo ke salaka mbala na mbala, 28 mpi nkombo mosi ya bakala bonso dikabu sambu na disumu, katula dikabu ya kuyoka ya mbala na mbala mpi dikabu na yo ya mbuma mpi dikabu na yo ya malafu.+

29 “‘Na kilumbu ya sambanu, bangombe ya babakala 8, mameme ya babakala 2, mpi bana-mameme ya babakala 14 yina me lungisa mvula mosi, bambisi yonso fwete vanda ya kukonda kifu,+ 30 mpi dikabu na yo ya mbuma mpi makabu na yo ya malafu sambu na bangombe ya babakala, mameme ya babakala, mpi bana-mameme ya babakala na kutadila ntalu na yo mpi na kutadila mutindu bo ke salaka mbala na mbala, 31 mpi nkombo mosi ya bakala bonso dikabu sambu na disumu, katula dikabu ya kuyoka ya mbala na mbala, dikabu na yo ya mbuma, mpi makabu na yo ya malafu.+

32 “‘Na kilumbu ya nsambwadi, bangombe ya babakala 7, mameme ya babakala 2, mpi bana-mameme ya babakala 14 yina me lungisa mvula mosi, bambisi yonso fwete vanda ya kukonda kifu,+ 33 mpi dikabu na yo ya mbuma mpi makabu na yo ya malafu sambu na bangombe ya babakala, mameme ya babakala, mpi bana-mameme ya babakala na kulanda ntalu na yo na kutadila mutindu bo ke salaka mbala na mbala sambu na yo, 34 mpi nkombo mosi ya bakala bonso dikabu sambu na disumu, katula dikabu ya kuyoka ya mbala na mbala, dikabu na yo ya mbuma, mpi dikabu na yo ya malafu.+

35 “‘Na kilumbu ya nana, beno fwete sala lukutakanu mosi ya santu. Beno fwete sala ve ata kisalu mosi ya ngolo.+ 36 Beno ta pesa bonso dikabu ya kuyoka, dikabu yina bo me yoka na tiya bonso dikabu ya nsudi ya kitoko* sambu na Yehowa, ngombe mosi ya bakala, dimeme mosi ya bakala, mpi bana-mameme ya babakala nsambwadi yina me lungisa mvula mosi, bambisi yonso fwete vanda ya kukonda kifu,+ 37 mpi dikabu na yo ya mbuma mpi makabu na yo ya malafu sambu na ngombe ya bakala, dimeme ya bakala, mpi bana-mameme ya babakala na kulanda ntalu na yo na kutadila mutindu bo ke salaka mbala na mbala, 38 mpi nkombo mosi ya bakala bonso dikabu sambu na disumu, katula dikabu ya kuyoka ya mbala na mbala mpi dikabu na yo ya mbuma mpi dikabu na yo ya malafu.+

39 “‘Beno ta pesa Yehowa makabu yai na bankinsi na beno yina fwete salama na bansungi,+ katula makabu na beno ya lusilu+ mpi makabu na beno ya luzolo ya mbote+ bonso makabu na beno ya kuyoka+ mpi makabu na beno ya mbuma+ mpi makabu na beno ya malafu+ mpi bimenga na beno ya kinduku.’”+ 40 Moize zabisaka bantu ya Izraele mambu yonso yina Yehowa songaka yandi.

30 Ebuna Moize tubilaka bamfumu+ ya makanda ya Izraele nde: “Yehowa me tuba nde: 2 Kana muntu me sala lusilu+ na Yehowa to me dia ndefi+ sambu na kuditudila* lusilu ya kubuya kima mosi, yandi fwete zitisa kaka mambu yina yandi tubaka.+ Yandi fwete sala mambu yonso yina yandi silaka nde yandi ta sala.+

3 “Kana nkento mosi me sala lusilu na Yehowa to me kuditudila lusilu ya kubuya kima mosi ntangu yandi kele leke mpi ke zinga na nzo ya tata na yandi 4 ebuna tata ya nkento yina me wa lusilu na yandi to lusilu na yandi ya kubuya kima mosi yina yandi me kuditudila* mpi tata na yandi me tuba kima ve sambu na kubuya, balusilu yonso ya nkento yina ta bikala, mpi konso lusilu ya kubuya kima mosi yina yandi me kuditudila ta bikala. 5 Kansi kana tata ya nkento yina kubuyisa yandi ntangu yandi me wa nde yandi me kuditudila balusilu to balusilu ya kubuya kima mosi, yo ta bikala ve. Yehowa ta lolula nkento yina sambu tata na yandi me buyisa yandi.+

6 “Kansi kana nkento yina kukwela ntangu yandi kele na nsi ya lusilu na yandi to ya lusilu ya kukonda kuyindula yina yandi me kuditudila, 7 ebuna bakala na yandi me wa yo kansi na kilumbu yina yandi me wa yo, yandi me tuba ve ata kima sambu na kubuya, balusilu ya nkento yina to balusilu na yandi ya kubuya kima mosi yina yandi me kuditudila ta bikala. 8 Kansi kana bakala na yandi kubuyisa yandi na kilumbu yina yandi me wa yo, bakala na yandi lenda katula lusilu yina to lusilu ya kukonda kuyindula yina yandi kuditudilaka,+ mpi Yehowa ta lolula yandi.

9 “Kansi kana mufwidi ya nkento to nkento yina me fwaka makwela me sala lusilu, yandi ta lungisa mambu yonso ya yandi me kuditudila.

10 “Ata mpidina, kana nkento mosi kuditudilaka lusilu to lusilu ya kubuya kima mosi ntangu yandi kele na nzo ya bakala na yandi, 11 ebuna bakala na yandi me wa yo mpi me tuba kima ve sambu na kubuya mpi me buya yo ve, balusilu na yandi yonso mpi konso lusilu ya kubuya kima mosi yina yandi kuditudilaka ta bikala. 12 Kansi kana na kilumbu yina bakala na yandi me wa yo yandi me katula kibeni konso lusilu to lusilu ya kubuya kima mosi yina nkento salaka, yo ta bikala ve.+ Bakala na yandi me katula yo, mpi Yehowa ta lolula nkento yina. 13 Na yina me tala konso lusilu to konso ndefi ya ke tadila kubuya kima mosi to kikalulu ya kudibuyisa bima,* bakala na yandi fwete ndima yo to fwete katula yo. 14 Kansi kana na nima ya bilumbu mingi bakala na yandi ke tuba ve ata kima sambu na kubuya, yandi me ndima mpi balusilu yonso ya nkento na yandi to balusilu na yandi yonso ya kubuya kima mosi yina yandi me bakaka. Yandi me ndima yo sambu, na kilumbu yina yandi waka nkento na yandi me sala yo, yandi tubaka ve ata kima sambu na kubuya. 15 Kansi kana yandi katula yo na nima, mwa ntangu na nima ya kilumbu yina yandi waka yo, bakala ta buka mbuma ya mambu yina nkento na yandi salaka.+

16 “Yai bansiku yina Yehowa songaka Moize ya ke tadila bakala ti nkento na yandi, mpi tata ti mwana na yandi ya nkento yina ke zinga na nzo na yandi.”

31 Ebuna Yehowa songaka Moize nde: 2 “Vutula mbi+ na bantu ya Madiani+ sambu na bantu ya Izraele. Na nima, bo ta vukisa nge ti bantu na nge.”*+

3 Ebuna Moize tubilaka bantu nde: “Beno pesa babakala yina kele na kati na beno binwaninu sambu na kunwana* ti Madiani mpi bo vutudila Madiani mbi sambu na Yehowa. 4 Na konso dikanda na kati ya makanda yonso ya Izraele, beno fwete tinda bantu 1 000 na bitumba.” 5 Yo yina, na kati ya mafunda ya Izraele,+ bo solaka bantu 1 000 na konso dikanda, bantu 12 000 yina vandaka ti binwaninu sambu na bitumba.*

6 Ebuna Moize tindaka bo na bitumba, bantu 1 000 na konso dikanda, kumosi ti Fineasi+ mwana ya Eleazare nganga-nzambi ya bitumba, yina bisadilu ya santu mpi bampungi+ ya kubingila bantu vandaka na maboko na yandi. 7 Bo nwanaka bitumba ti Madiani, kaka mutindu Yehowa songaka Moize, mpi bo fwaka babakala yonso. 8 Kumosi ti bantu ya nkaka yina bo fwaka, bo fwaka bantotila ya Madiani, disongidila, Evi, Rekemi, Sure, Hure, mpi Reba, bantotila tanu ya Madiani. Bo fwaka mpi Balami+ mwana ya Beore na mbele ya bitumba. 9 Kansi bantu ya Izraele nataka bankento ti bana ya Madiani na kimpika. Bo botulaka mpi bambisi na bo yonso ya bwala, bitwisi na bo yonso, mpi bima na bo yonso. 10 Bambanza na bo yonso yina bo vandaka kuzinga mpi bacamp na bo yonso,* bo yokaka yo tiya. 11 Ebuna bo bakaka bima yonso yina bo botulaka, bantu ti bambisi. 12 Na nima, bo bakaka bampika ti bima yina bo botulaka mpi bo nataka bo na Moize, na nganga-nzambi Eleazare, mpi na kimvuka ya bantu ya Izraele, na camp na ntoto ya zelo na zelo ya Moabi+ pene-pene ya Yordani, na Yeriko.

13 Ebuna Moize ti nganga-nzambi Eleazare mpi bamfumu yonso ya bantu ya Izraele basikaka sambu na kukutana ti bo na nganda ya camp. 14 Kansi Moize waka makasi sambu na bantu yina bo tulaka na kutwadisa bantu yina kwendaka na bitumba, bamfumu ya mafunda mpi bamfumu ya bankama yina vandaka kuvutuka na bitumba. 15 Moize tubilaka bo nde: “Sambu na nki beno me bika bankento yonso na luzingu? 16 Si bo bantu landaka mambu yina Balami tubaka mpi pusaka bantu ya Izraele na kusadila Yehowa mambu kukonda kwikama+ na diambu ya Peore,+ ebuna mpasi bwilaka kimvuka ya bantu ya Yehowa.+ 17 Ntangu yai beno fwete fwa bana-babakala yonso mpi konso nkento yina me vukisaka nitu ti bakala. 18 Kansi, beno lenda bika na luzingu bana-bankento yonso yina me vukisaka ve nitu ti babakala.+ 19 Beno fwete bikala na nganda ya camp bilumbu nsambwadi. Konso muntu yina fwaka muntu* ya nkaka mpi konso muntu yina simbaka muntu ya kufwa+ fwete kudikumisa+ bunkete na kilumbu ya tatu mpi na kilumbu ya nsambwadi, beno ti bampika na beno. 20 Beno fwete kumisa bunkete konso lele, konso kima ya bo me sala na mpusu, konso kima ya bo me sala na mika ya nkombo, mpi konso kima ya bo me sala na dibaya.”

21 Ebuna nganga-nzambi Eleazare tubilaka basoda yina katukaka na bitumba nde: “Yai nsiku yina Yehowa pesaka Moize, 22 ‘Kaka wolo, arza, kwivre, kibende, eteni, mpi plomb, 23 konso kima yina lenda pia ve na tiya, beno fwete yoka yo tiya,* mpi yo ta vanda bunkete. Kansi, beno fwete kumisa yo mpi bunkete na masa ya kukumisa bunkete.+ Konso kima yina lenda pia tiya, beno fwete lutisa yo na masa. 24 Mpi beno fwete yobisa bilele na beno na kilumbu ya nsambwadi mpi kuvanda bunkete, na nima beno lenda kota na camp.’”+

25 Ebuna Yehowa tubilaka Moize nde: 26 “Tanga bima yina bo me botula, tanga bampika ya bantu mpi bambisi; sala yo ti nganga-nzambi Eleazare mpi bamfumu ya banzo ya batata ya bantu ya Izraele. 27 Na nima, kabisa bima yina bo botulaka na bandambu zole mpi kabudila yo basoda yina kwendaka na bitumba ti bantu ya Izraele yonso ya nkaka yina me bikala.+ 28 Nge ta baka moyo* mosi na kati ya mioyo 500, ya bantu, ya bangombe, ya bampunda, mpi ya mameme, na maboko ya basoda yina kwendaka na bitumba, bonso mpaku sambu na Yehowa. 29 Nge ta baka yo na dikabu na bo mpi nge ta pesa yo na nganga-nzambi Eleazare bonso dikabu ya Yehowa.+ 30 Na dikabu yina bo pesaka bantu ya Izraele, nge ta baka ndambu mosi na kati ya bandambu 50, ya bantu, ya bangombe, ya bampunda, ya mameme, mpi ya bambisi ya bwala ya mitindu yonso, mpi nge ta pesa yo na Balevi,+ yina ke salaka bisalu ya me tala nzo-tenta ya Yehowa.”+

31 Ebuna Moize ti nganga-nzambi Eleazare salaka kaka mutindu Yehowa songaka Moize. 32 Bima yina bo botulaka, bima yina bikalaka na bima yina bantu ya katukaka na bitumba bakaka, vandaka: mameme 675 000, 33 bangombe 72 000, 34 mpi bampunda 61 000. 35 Bankento yina vukisaka ve nitu ti babakala+ vandaka bankento* 32 000. 36 Ndambu yina vandaka dikabu ya bantu yina kwendaka na bitumba vandaka mameme 337 500. 37 Mpaku ya Yehowa yina bo bakaka na mameme vandaka bitwisi 675. 38 Bangombe vandaka 36 000, mpi mpaku na yo yina bo bakaka sambu na Yehowa vandaka bangombe 72. 39 Bampunda vandaka 30 500, mpi mpaku na yo yina bo bakaka sambu na Yehowa vandaka bampunda 61. 40 Bantu* vandaka 16 000, mpi mpaku na bo yina bo bakaka sambu na Yehowa vandaka bantu* 32. 41 Na nima, Moize pesaka nganga-nzambi+ Eleazare mpaku bonso dikabu ya Yehowa, kaka mutindu Yehowa songaka Moize.

42 Na dikabu ya bantu ya Izraele, yina Moize kabulaka ti dikabu ya bantu yina kwendaka na bitumba, 43 dikabu yina vandaka: mameme 337 500, 44 bangombe 36 000, 45 bampunda 30 500, 46 mpi bantu* 16 000. 47 Ebuna na dikabu ya Izraele, Moize bakaka ndambu mosi na kati ya bandambu 50, ya bantu mpi ya bambisi, mpi yandi pesaka yo na Balevi,+ yina ke salaka kisalu ya me tala nzo-tenta ya Yehowa,+ kaka mutindu Yehowa songaka Moize.

48 Ebuna bantu ya bo solaka yina vandaka na kati ya mafunda ya basoda,+ bamfumu ya mafunda mpi bamfumu ya bankama, kwisaka na Moize, 49 mpi bo tubilaka yandi nde: “Bansadi na nge me tanga babakala ya bitumba yina kele na nsi ya kiyeka na beto, mpi ata muntu mosi ve me konda na kati beto.+ 50 Yo yina, bika beto pesa bonso dikabu ya Yehowa, bima yina beto bakaka, bima ya wolo, mayaka ya makulu, mitaku, balupetu ya kutudila kidimbu, bima-makutu, mpi bima ya nkaka ya kukumisa nitu kitoko, sambu na kufika masumu na beto* na ntwala ya Yehowa.”

51 Yo yina, Moize mpi nganga-nzambi Eleazare ndimaka wolo yina bo pesaka, bima yonso ya kukumisa nitu kitoko. 52 Wolo yonso ya dikabu yina bo pesaka Yehowa vandaka bashekele* 16 750, yina katukaka na bamfumu ya mafunda mpi na bamfumu ya bankama. 53 Konso soda bakaka dikabu na yandi ya bima yina bo botulaka. 54 Moize ti nganga-nzambi Eleazare ndimaka wolo yina katukaka na bamfumu ya mafunda mpi na bamfumu ya bankama mpi nataka yo na tenta ya lukutakanu sambu yo vanda kima ya kuyibuka* sambu na bantu ya Izraele na ntwala ya Yehowa.

32 Kansi, bana ya Rubeni+ mpi bana ya Gadi+ vandaka ti bitwisi mingi kibeni, mpi bo monaka nde insi ya Yazere+ mpi insi ya Gileadi vandaka ntoto ya mbote sambu na bitwisi. 2 Yo yina, bana ya Rubeni mpi bana ya Gadi kwisaka na Moize, na nganga-nzambi Eleazare, mpi na bamfumu ya bantu ya Izraele, mpi bo tubaka nde: 3 “Ataroti, Diboni, Yazere, Nimra, Eshboni,+ Eleale, Sebami, Nebo,+ mpi Beoni,+ 4 insi yina Yehowa bedisaka na ntwala ya bantu ya Izraele,+ kele ntoto ya mbote sambu na bitwisi, mpi bansadi na nge kele ti bitwisi mingi.”+ 5 Bo yikaka nde: “Kana nge me ndima beto, bika bo pesa bansadi na nge ntoto yai sambu yo vanda ya bo. Kubika ve nde beto sabuka Yordani.”

6 Ebuna Moize tubilaka bana ya Gadi mpi bana ya Rubeni nde: “Keti bampangi na beno fwete kwenda bitumba na ntangu beno ke landa kuzinga awa? 7 Sambu na nki beno ke lembisa bantu ya Izraele nitu sambu bo sabuka ve mpi bo kota na ntoto yina Yehowa ke pesa bo kibeni? 8 Yai mambu yina batata na beno salaka ntangu mono tindaka bo katuka na Kadeshi-barnea sambu na kukwenda kutala ntoto yina.+ 9 Ntangu bo tombukaka na Muwanda ya Eshkole+ mpi bo monaka ntoto yina, bo lembisaka bantu ya Izraele nitu sambu bo kota ve na ntoto yina Yehowa zolaka kupesa bo.+ 10 Yehowa waka makasi ya ngolo kilumbu yina, yo yina yandi zengaka kieleka+ nde: 11 ‘Bantu yina basikaka na Ezipte bayina kele ti bamvula yantika na 20 mata, bo ta mona ve ntoto yina+ mono diaka ndefi na Abrahami, na Izaki, mpi na Yakobi,+ sambu bo landaka mono ve na ntima ya mvimba, 12 katula kaka Kalebi+ mwana ya Yefune muntu ya Kenizi mpi Yozue+ mwana ya Nuni, sambu bo landaka Yehowa na ntima ya mvimba.’+ 13 Ebuna Yehowa wilaka Izraele makasi ya ngolo mpi yandi salaka nde bo yungana na ntoto-makanga bamvula 40,+ tii kuna ndonga yonso ya bantu yina vandaka kusala mambu ya mbi na meso ya Yehowa manaka.+ 14 Ntangu yai, beno bantu ya masumu beno ke sala kaka mambu yina batata na beno salaka mpi beno ke kumisa diaka makasi ya Yehowa ngolo sambu na Izraele. 15 Kana beno yambula kulanda yandi, yandi ta yambula bo diaka kibeni na ntoto-makanga, mpi beno ta natila bantu yai yonso lufwa.”

16 Na nima, bo pusanaka pene-pene na yandi mpi tubaka nde: “Pesa beto nzila ya kutunga awa balupangu ya matadi sambu na bitwisi na beto mpi bambanza sambu na bana na beto. 17 Kansi beto ta vanda kaka ya kuyilama sambu na bitumba+ mpi beto ta kwenda na ntwala ya bantu ya Izraele tii kuna beto ta nata bo na kisika na bo, kansi bana na beto ta zinga na lutaninu na bambanza ya ngolo, mpi bantu ya insi yai ta sala bo ve mbi. 18 Beto ta vutuka ve na banzo na beto tii kuna konso muntu ya Izraele ta baka ntoto na yandi bonso dikabu.+ 19 Sambu beto ta baka ve dikabu ti bo na simu yina ya nkaka ya Yordani tii kuna, sambu beto me baka dikabu na beto na simu ya esti ya Yordani.”+

20 Moize vutudilaka bo nde: “Kana beno ta sala diambu yai: Beno baka binwaninu na ntwala ya Yehowa sambu na bitumba;+ 21 mpi kana konso muntu na kati na beno kubaka binwaninu mpi kusabuka Yordani na ntwala ya Yehowa ntangu yandi ke kula bambeni na yandi na ntwala na yandi+ 22 tii kuna ntoto yina ta kuma na nsi ya kiyeka ya Yehowa,+ na nima beno lenda vutuka+ mpi beno ta vanda ve ti makambu na ntwala ya Yehowa mpi ya Izraele. Ebuna ntoto yai ta kuma dikabu na beno na ntwala ya Yehowa.+ 23 Kansi kana beno sala ve diambu yai, beno ta sala disumu na ntwala ya Yehowa. Na diambu yai, beno zaba nde disumu na beno ta kanga beno. 24 Yo yina, beno tunga bambanza sambu na bana na beno mpi balupangu sambu na bitwisi na beno,+ kansi beno fwete sala mambu yina beno me sila.”

25 Bana ya Gadi mpi bana ya Rubeni tubilaka Moize nde: “Bansadi na nge ta sala kaka mutindu mfumu na mono ke tuba. 26 Bana na beto, bankento na beto, bitwisi na beto, mpi bambisi na beto yonso ya bwala ta bikala kuna na bambanza ya Gileadi,+ 27 kansi bansadi na nge ta sabuka, konso muntu me baka binwaninu sambu na bitumba na ntwala ya Yehowa,+ kaka mutindu mfumu na mono ke tuba.”

28 Ebuna Moize pesaka ntuma sambu na bo na nganga-nzambi Eleazare, na Yozue mwana ya Nuni, mpi na bamfumu ya banzo ya batata ya makanda ya Izraele. 29 Moize tubilaka bo nde: “Kana bana ya Gadi mpi bana ya Rubeni kusabuka Yordani ti beno, konso muntu ti binwaninu ya bitumba, na ntwala ya Yehowa, ebuna insi yina kukuma na nsi ya kiyeka na beno, beno ta pesa bo insi ya Gileadi sambu yo vanda ya bo.+ 30 Kansi kana bo baka ve binwaninu mpi kusabuka ve ti beno, bo ta zinga na kati na beno na insi ya Kanana.”

31 Ebuna bana ya Gadi mpi bana ya Rubeni vutulaka nde: “Beto ta sala mambu yina Yehowa me tubila bansadi na nge. 32 Beto ta baka binwaninu mpi ta sabuka na ntwala ya Yehowa sambu na kukwenda na insi ya Kanana,+ kansi beto ta baka dikabu na beto na simu yai ya Yordani.” 33 Ebuna Moize pesaka bo—bana ya Gadi, bana ya Rubeni,+ mpi ndambu ya dikanda ya Manase+ mwana ya Yozefi—kimfumu ya Sihoni+ ntotila ya bantu ya Amore mpi kimfumu ya Ogi+ ntotila ya Bashani, ntoto yina vandaka sambu na bambanza na yo na bateritware yina, mpi bambanza ya insi ya nziunga.

34 Bana ya Gadi tungaka* Diboni,+ Ataroti,+ Aroere,+ 35 Atroti-shofani, Yazere,+ Yogbeha,+ 36 Bete-nimra,+ mpi Bete-arami,+ bambanza ya ngolo, mpi bo tungaka balupangu ya matadi sambu na bitwisi. 37 Mpi bana ya Rubeni tungaka Eshboni,+ Eleale,+ Kiriatayimi,+ 38 Nebo,+ mpi Baale-meoni+—bo sobaka bazina na yo—mpi Sibma; ebuna bo yantikaka kupesa bazina ya nkaka na bambanza yina bo tungaka diaka.

39 Bana ya Makire+ mwana ya Manase kwendaka na Gileadi, bo botulaka yo, mpi bo kulaka bana ya Amore yina vandaka kuna. 40 Yo yina Moize pesaka Gileadi na Makire mwana ya Manase, mpi yandi yantikaka kuzinga kuna.+ 41 Yaire mwana ya Manase kwendaka mpi botulaka babwala na bo ya batenta, mpi yandi yantikaka kubinga yo Avoti-yaire.*+ 42 Noba kwendaka mpi botulaka Kenati mpi babwala yina kele na nziunga na yo, ebuna yandi yantikaka kubinga yo Noba, na zina na yandi mosi.

33 Yai mutindu bantu ya Izraele vandaka kusala nzietelo ntangu bo basikaka na insi ya Ezipte+ na kutadila bimvuka na bo,*+ na lutwadisu ya Moize ti Aroni.+ 2 Moize vandaka kusonika bisika yina bo vandaka kukatuka na nzietelo na bo na kulanda nsiku ya Yehowa, mpi yai mutindu bo vandaka kusala nzietelo katuka na kisika mosi tii na kisika ya nkaka:+ 3 Bo katukaka na Ramesesi+ na ngonda ya ntete, na kilumbu ya 15 ya ngonda ya ntete.+ Kaka na kilumbu yina landaka Paki,+ bantu ya Izraele basikaka na meso ya bantu yonso ya Ezipte ti kutula ntima.* 4 Na ntangu yina, bantu ya Ezipte yonso vandaka kuzika bana na bo yonso ya ntete yina Yehowa fwaka na kati na bo,+ sambu Yehowa sambisaka banzambi na bo mpi pesaka bo ndola.+

5 Ebuna bantu ya Izraele katukaka na Ramesesi mpi bo salaka camp na Sukoti.+ 6 Bo katukaka na Sukoti mpi bo salaka camp na Etame,+ yina kele pene-pene ya ntoto-makanga. 7 Bo katukaka na Etame mpi bo vutukaka na ndambu ya Pihahiroti, yina ke talana ti Baale-sefoni,+ mpi bo salaka camp na ntwala ya Migdole.+ 8 Na nima, bo katukaka na Pihahiroti mpi bo lutaka na kati-kati ya nzadi-mungwa,+ bo kwendaka na ntoto-makanga+ mpi bo salaka nzietelo ya bilumbu tatu na ntoto-makanga ya Etame+ ebuna bo salaka camp na Mara.+

9 Na nima, bo katukaka na Mara mpi bo kwisaka na Elimi. Na Elimi, kuvandaka ti banto ya masa 12 mpi maba 70, ebuna bo salaka camp kuna.+ 10 Bo katukaka na Elimi mpi bo salaka camp pene-pene ya Nzadi-Mungwa ya Mbwaki. 11 Bo katukaka na Nzadi-Mungwa ya Mbwaki mpi bo salaka camp na ntoto-makanga ya Sini.+ 12 Bo katukaka na ntoto-makanga ya Sini mpi bo salaka camp na Dofka. 13 Na nima, bo katukaka na Dofka mpi bo salaka camp na Alushi. 14 Bo katukaka na Alushi mpi bo salaka camp na Refidimi,+ kisika masa vandaka ve sambu bantu kunwa. 15 Na nima, bo katukaka na Refidimi mpi bo salaka camp na ntoto-makanga ya Sinai.+

16 Bo katukaka na ntoto-makanga ya Sinai mpi bo salaka camp na Kibroti-hatava.+ 17 Bo katukaka na Kibroti-hatava mpi bo salaka camp na Azeroti.+ 18 Bo katukaka na Azeroti mpi bo salaka camp na Ritma. 19 Bo katukaka na Ritma mpi bo salaka camp na Rimoni-peresi. 20 Bo katukaka na Rimoni-peresi mpi bo salaka camp na Libna. 21 Bo katukaka na Libna mpi bo salaka camp na Risa. 22 Bo katukaka na Risa mpi bo salaka camp na Kehelata. 23 Bo katukaka na Kehelata mpi bo salaka camp na Ngumba ya Shefere.

24 Na nima, bo katukaka na Ngumba ya Shefere mpi bo salaka camp na Arada. 25 Bo katukaka na Arada mpi bo salaka camp na Makeloti. 26 Bo katukaka+ na Makeloti mpi bo salaka camp na Tahati. 27 Bo katukaka na Tahati mpi bo salaka camp na Tera. 28 Bo katukaka na Tera mpi bo salaka camp na Mitka. 29 Bo katukaka na Mitka mpi bo salaka camp na Ashemona. 30 Bo katukaka na Ashemona mpi bo salaka camp na Moseroti. 31 Bo katukaka na Moseroti mpi bo salaka camp na Bene-yakani.+ 32 Bo katukaka na Bene-yakani mpi bo salaka camp na Hore-hagidgadi. 33 Bo katukaka na Hore-hagidgadi mpi bo salaka camp na Yotbata.+ 34 Bo katukaka na Yotbata mpi bo salaka camp na Abrona. 35 Bo katukaka na Abrona mpi bo salaka camp na Esioni-gebere.+ 36 Bo katukaka na Esioni-gebere mpi bo salaka camp na ntoto-makanga ya Zini,+ disongidila, Kadeshi.

37 Na nima, bo katukaka na Kadeshi mpi bo salaka camp na Ngumba ya Ore,+ na ndilu ya insi ya Edomi. 38 Mpi nganga-nzambi Aroni tombukaka na Ngumba ya Ore na nsiku ya Yehowa mpi yandi fwaka kuna na mvula ya 40 katuka ntangu yina bantu ya Izraele basikaka na insi ya Ezipte, na ngonda ya tanu, na kilumbu ya ntete ya ngonda.+ 39 Aroni vandaka ti bamvula 123 ntangu yandi fwaka na Ngumba ya Ore.

40 Ntangu yai ntotila ya Aradi,+ muntu ya Kanana yina vandaka kuzinga na Negebi na insi ya Kanana, waka nde bantu ya Izraele ke kwisa.

41 Na nima, bo katukaka na Ngumba ya Ore+ mpi bo salaka camp na Salmona. 42 Bo katukaka na Salmona mpi bo salaka camp na Punoni. 43 Bo katukaka na Punoni mpi bo salaka camp na Oboti.+ 44 Bo katukaka na Oboti mpi bo salaka camp na Iye-abarimi, na ndilu ya Moabi.+ 45 Na nima, bo katukaka na Iyimi mpi bo salaka camp na Diboni-gadi.+ 46 Bo katukaka na Diboni-gadi mpi bo salaka camp na Almoni-diblatayimi. 47 Bo katukaka na Almoni-diblatayimi mpi bo salaka camp na bangumba ya Abarimi+ na ntwala ya Nebo.+ 48 Nsuka-nsuka, bo katukaka na bangumba ya Abarimi mpi bo salaka camp na ntoto ya zelo na zelo ya Moabi na lweka ya Yordani pene-pene ya Yeriko.+ 49 Bo landaka kusala camp na lweka ya Yordani, katuka na Bete-yeshimoti tii na Abele-shitimi,+ na ntoto ya zelo na zelo ya Moabi.

50 Yehowa tubilaka Moize na ntoto ya zelo na zelo ya Moabi na lweka ya Yordani pene-pene ya Yeriko nde: 51 “Tubila bantu ya Izraele mpi songa bo nde, ‘Beno ke sabuka Yordani sambu na kukota na insi ya Kanana.+ 52 Beno fwete kula bantu yonso ya ke zingaka na insi yina na ntwala na beno mpi beno fwete fwa biteki na bo yonso ya bo me sala na matadi+ mpi biteki na bo yonso ya bibende,*+ mpi beno fwete fwa bisika na bo yonso ya kunanguka ya santu.+ 53 Beno ta baka insi yina mpi beno ta zinga muna, sambu mono ta pesa beno kibeni insi yina sambu yo vanda ya beno.+ 54 Beno fwete bula zeke+ sambu na kukabisa ntoto na kati ya mabuta na beno. Sambu na kimvuka ya nene beno fwete kumisa dikabu na yandi nene, mpi sambu na kimvuka ya fioti beno fwete fiotuna dikabu+ na yandi. Dikabu ya konso muntu ta vanda kisika yina zeke ta bwa. Beno ta baka ntoto na beno bonso dikabu na kutadila makanda ya batata na beno.+

55 “‘Kansi, kana beno kula ve bantu ya insi yina na ntwala na beno,+ bantu yina beno ta bika na luzingu ta vanda bonso bima ya ke tatika na meso na beno mpi bonso bansende na lweka na beno, mpi bo ta niokula beno na insi yina beno ta zinga.+ 56 Ebuna mono ta sala beno mambu yina mono kanaka kusala bo.’”+

34 Yehowa tubilaka diaka Moize nde: 2 “Pesa bantu ya Izraele bantuma yai: ‘Ntangu beno ta kota na insi ya Kanana,+ yai insi yina bo ta pesa beno bonso dikabu, insi ya Kanana na kutadila bandilu na yo.+

3 “‘Ndilu na beno ya sudi ta yantika na ntoto-makanga ya Zini na lweka ya Edomi, mpi ndilu na beno ya sudi, na ndambu ya esti, ta vanda yantika na nsuka ya Nzadi ya Mungwa.*+ 4 Ndilu na beno ta baluka sambu yo luta na sudi ya ngumba ya Akrabimi+ mpi yo ta kwenda tii na Zini, mpi nsuka na yo ta vanda na sudi ya Kadeshi-barnea.+ Na nima, yo ta luta na Azare-adare mpi yo ta kwenda tii na Asmoni.+ 5 Ndilu yina ta baluka na Asmoni, mpi ta kwenda tii na Muwanda* ya Ezipte, mpi nsuka na yo ta vanda na Nzadi-Mungwa.*+

6 “‘Ndilu na beno ya westi ta vanda Nzadi-Mungwa ya Nene* mpi dibungu. Yai ta kuma ndilu na beno ya westi.+

7 “‘Yai ta vanda ndilu na beno ya nordi: Yantika na Nzadi-Mungwa ya Nene beno ta tula ndilu na beno tii na Ngumba ya Ore. 8 Yantika na Ngumba ya Ore, beno ta tula ndilu tii na Lebo-amati,*+ mpi nsuka ya ndilu yina ta vanda na Sedadi.+ 9 Ndilu yina ta kwenda tii na Zifroni, mpi nsuka na yo ta vanda na Azare-enani.+ Yai ta kuma ndilu na beno ya nordi.

10 “‘Ebuna beno ta tula ndilu na beno ya esti yantika na Azare-enani tii na Shefami. 11 Ndilu yina ta kwenda yantika na Shefami tii na Ribla, na esti ya Ayini, ebuna yo ta kulumuka mpi ta kutana ti lweka ya Nzadi-Mungwa ya Kinereti.*+ 12 Ndilu yina ta kwenda tii na Yordani, mpi nsuka na yo ta vanda na Nzadi ya Mungwa.+ Yai ta vanda insi+ na beno mpi bandilu yina ta ziunga yo.’”

13 Ebuna Moize songaka bantu ya Izraele nde: “Yai insi yina beno ta budila zeke+ sambu na kukabisa bonso dikabu na beno, kaka mutindu Yehowa tubaka na kupesa yo na makanda uvwa ti ndambu. 14 Sambu dikanda ya bana ya Rubeni na kutadila nzo ya batata na bo, dikanda ya bana ya Gadi na kutadila nzo ya batata na bo, mpi ndambu ya dikanda ya Manase me bakaka ntama dikabu+ na bo. 15 Makanda yina zole ti ndambu me bakaka ntama dikabu na bo na ndambu ya esti ya Yordani pene-pene ya Yeriko, na ndambu yina ntangu ke basikaka.”+

16 Yehowa tubilaka diaka Moize nde: 17 “Yai bazina ya bantu yina ta kabisila beno insi yina sambu beno baka yo: nganga-nzambi Eleazare+ mpi Yozue+ mwana ya Nuni. 18 Beno ta baka mfumu mosi na konso dikanda sambu na kukabisa insi bonso dikabu+ na beno. 19 Yai bazina ya bantu yina: na dikanda ya Yuda,+ Kalebi+ mwana ya Yefune; 20 na dikanda ya bana ya Simeoni,+ Shemuele mwana ya Amihudi; 21 na dikanda ya Benyamini,+ Elidadi mwana ya Kisloni; 22 na dikanda ya bana ya Dani,+ mfumu mosi, Buki mwana ya Yogli; 23 na bana ya Yozefi,+ na dikanda ya bana ya Manase,+ mfumu mosi, Aniele mwana ya Efodi; 24 na dikanda ya bana ya Efrayimi,+ mfumu mosi, Kemuele mwana ya Shiftani; 25 na dikanda ya bana ya Zebuloni,+ mfumu mosi, Elisafani mwana ya Parnaki; 26 na dikanda ya bana ya Isakare,+ mfumu mosi, Paltiele mwana ya Azani; 27 na dikanda ya bana ya Asere,+ mfumu mosi, Ahihudi mwana ya Shelomi; 28 na dikanda ya bana ya Naftali,+ mfumu mosi, Pedahele mwana ya Amihudi.” 29 Yai bazina ya bantu yina Yehowa tubaka nde bo ta kabisila bantu ya Izraele ntoto na insi ya Kanana.+

35 Yehowa tubilaka diaka Moize na ntoto ya zelo na zelo ya Moabi na lweka ya Yordani+ pene-pene ya Yeriko nde: 2 “Songa bantu ya Izraele nde na dikabu yina bo ta baka,+ bo fwete pesa Balevi bambanza sambu bo zinga kuna, mpi bo fwete pesa Balevi banseke yina kele na nziunga ya bambanza yina.+ 3 Bo ta zinga na bambanza yina, mpi banseke yina ta vanda sambu na bitwisi na bo, bima na bo, mpi bambisi na bo yonso ya nkaka. 4 Banseke ya bambanza yina beno ta pesa Balevi ta vanda nda maboko* 1 000 yantika na kibaka ya mbanza tii na nganda, na nziunga na yo. 5 Beno fwete tesa na nganda ya mbanza maboko 2 000 na ndambu ya esti, maboko 2 000 na ndambu ya sudi, maboko 2 000 na ndambu ya westi, mpi maboko 2 000 na ndambu ya nordi, mpi mbanza yina ta vanda na kati-kati. Yai ta vanda banseke ya bambanza na bo.

6 “Bambanza yina beno ta pesa Balevi ta vanda bambanza 6 ya kutinina,+ yina beno ta pesa sambu muntu yina me fwa muntu kutina kuna,+ mpi beno ta pesa bo bambanza 42 ya nkaka. 7 Na kimvuka, beno fwete pesa Balevi bambanza 48, kumosi ti banseke na yo.+ 8 Bambanza yina beno ta pesa bo ta katuka na dikabu ya bantu ya Izraele.+ Na kimvuka ya nene beno ta baka bambanza mingi, mpi na kimvuka ya fioti beno ta baka bambanza fioti.+ Konso kimvuka ta pesa Balevi ndambu ya bambanza na yo na kutadila nene ya dikabu yina bo me bakaka.”

9 Yehowa landaka kutubila Moize nde: 10 “Tubila bantu ya Izraele mpi songa bo nde, ‘Beno ke sabuka Yordani sambu na kukota na insi ya Kanana.+ 11 Beno fwete sola bambanza yina me fwana sambu na beno sambu yo vanda bambanza ya kutinina, kisika muntu yina me fwa muntu* kukonda kukana fwete tina.+ 12 Bambanza yai ta vanda bisika ya beno ta tinaka muntu yina ke vutula mbi sambu na menga,+ sambu bo fwa ve muntu yina me fwa muntu tii kuna bo ta sambisa yandi na ntwala ya bantu ya Izraele.+ 13 Bambanza sambanu ya kutinina yina beno ta pesa ta lungisa lukanu yai. 14 Beno ta pesa bambanza tatu na simu yai ya Yordani+ mpi bambanza tatu na insi ya Kanana+ sambu yo vanda bambanza ya kutinina. 15 Bambanza sambanu yai ta vanda bisika yina bantu ya Izraele, munzenza,+ muntu yina me kwisaka kuzinga na kati na bo, mpi konso muntu yina me fwa muntu*+ kukonda kukana ta tinaka kuna.

16 “‘Kansi kana yandi me bula yandi kisadilu ya kibende mpi yandi me fwa, yandi kele muntu yina me fwa muntu. Bo fwete fwa kibeni+ muntu yina me fwa muntu. 17 Kana yandi me bula yandi ditadi yina lenda fwa muntu mpi yandi me fwa, yandi kele muntu yina me fwa muntu. Bo fwete fwa kibeni muntu yina me fwa muntu. 18 Kana yandi me bula yandi kisadilu ya dibaya yina lenda fwa muntu mpi yandi me fwa, yandi kele muntu yina me fwa muntu. Bo fwete fwa kibeni muntu yina me fwa muntu.

19 “‘Muntu yina ke vutula mbi sambu na menga muntu ta fwa muntu yina me fwa muntu. Kana yandi kutana ti yandi, yandi mosi muntu ta fwa muntu yina. 20 Kana lufwa yina vandaka sambu muntu yina pusaka yandi sambu yandi vandaka kumenga yandi to losilaka yandi kima mosi ti ngindu ya mbi,*+ 21 to yandi bulaka yandi ti diboko na yandi sambu yandi vandaka kumenga yandi, ebuna yandi fwaka, bo ta fwa kibeni muntu yina bulaka yandi. Yandi kele muntu yina me fwa muntu. Muntu yina ke vutula mbi sambu na menga ta fwa muntu yina me fwa muntu kana yandi kutana ti yandi.

22 “‘Kansi, kana yandi pusaka yandi to losilaka yandi konso kima kukonda ngindu ya mbi*+ mpi yo salamaka na kintulumukina mpi yandi vandaka ve kumenga yandi, 23 to kana yandi monaka yandi ve ebuna ditadi bwilaka yandi, kansi yandi vandaka ve mbeni na yandi mpi vandaka ve kusosa kusala yandi mbi, ebuna muntu yina fwaka, 24 bantu ya Izraele fwete sambisa muntu yina bulaka yandi mpi muntu yina ke vutula mbi sambu na menga, na kuwakana ti bantuma yai.+ 25 Bantu ya Izraele fwete gulusa muntu yina me fwa muntu na maboko ya muntu yina ke vutula mbi sambu na menga mpi kuvutula yandi na mbanza ya kutinina yina yandi tinaka, mpi yandi fwete zinga kuna tii na lufwa ya nganga-nzambi ya nene yina bo tulaka mafuta ya santu.+

26 “‘Kansi kana muntu yina me fwa muntu kubasika na ndilu ya mbanza ya kutinina yina yandi tinaka 27 mpi muntu yina ke vutula mbi sambu na menga kumona yandi na nganda ya ndilu ya mbanza yina yandi tininaka mpi kufwa yandi, yandi kele ve ti mfuka ya menga. 28 Sambu yandi fwete zinga na mbanza yina yandi tininaka tii na lufwa ya nganga-nzambi ya nene. Kansi na nima ya lufwa ya nganga-nzambi ya nene, muntu yina me fwa muntu lenda vutuka na ntoto na yandi.+ 29 Mambu yai ta vanda nsiku ya kusambisa sambu na beno na bandonga na beno yonso ya bantu na bisika yonso ya beno ke zingaka.

30 “‘Konso muntu yina me fwa muntu* bo fwete fwa yandi bonso muntu yina me fwa muntu,+ kana bambangi+ mingi me ta kimbangi;* kansi beno fwete fwa ve muntu* kana mbangi mosi mpamba me ta kimbangi. 31 Beno fwete baka ve nkudulu sambu na luzingu* ya muntu yina me fwa muntu yina me fwana na kufwa, sambu bo fwete fwa yandi kibeni.+ 32 Mpi beno fwete baka ve nkudulu sambu na muntu yina me tina na mbanza na yandi ya kutinina, mpi kupesa yandi nzila sambu na kuvutuka kuzinga na ntoto na yandi na ntwala ya lufwa ya nganga-nzambi ya nene.

33 “‘Beno fwete bebisa ve insi yina beno ke zinga, sambu menga ke bebisaka insi,+ mpi mpila ta vanda ve ya kufika masumu sambu na menga yina bo me tiamuna na insi, katula kaka menga ya muntu yina tiamunaka yo.+ 34 Nge fwete kumisa ve insi yina beno ke zinga mvindu, insi yina mono ke zinga na kati na yo; sambu mono, Yehowa, mono ke zinga na kati ya bantu ya Izraele.’”+

36 Bamfumu ya mabuta ya bantekolo ya Gileadi mwana ya Makire+ mwana ya Manase na mabuta ya bana ya Yozefi kwisaka mpi tubaka na ntwala ya Moize mpi na ntwala ya bamfumu, bamfumu ya dibuta ya bantu ya Izraele. 2 Bo tubaka nde: “Yehowa songaka mfumu na mono na kubula zeke+ sambu na kukabudila bantu ya Izraele insi bonso dikabu; ebuna Yehowa songaka mfumu na mono na kupesa dikabu ya mpangi na beto Selofehadi na bana na yandi ya bankento.+ 3 Kana bo kwela babakala ya dikanda ya nkaka ya Izraele, bo ta katula mpi dikabu ya bankento yina na dikabu ya batata na beto mpi bo ta yika yo na dikabu ya dibuta yina bo me kwela, ebuna bo ta katula yo na dikabu yina beto bakaka na nima ya kubula zeke. 4 Ntangu Yubile+ ta salama sambu na bantu ya Izraele, bo ta yika mpi dikabu ya bankento yina na dikabu ya dikanda yina bo me kwela, ebuna bo ta katula dikabu na bo na dikabu ya dikanda ya batata na beto.”

5 Na nima, Yehowa pesaka Moize ntuma ebuna Moize songaka bantu ya Izraele nde: “Mambu yina dikanda ya bana ya Yozefi ke tuba kele mbote. 6 Yehowa me tuba mambu yai sambu na bana-bankento ya Selofehadi: ‘Bo lenda kwela konso muntu yina bo me zola. Kansi, bo fwete kwela muntu ya dikanda ya batata na bo. 7 Dikabu ya bantu ya Izraele fwete katuka ve na dikanda mosi mpi kukwenda na dikanda ya nkaka, sambu bantu ya Izraele fwete kangama na dikabu ya dikanda ya ba-nkaka na bo. 8 Konso mwana-nkento yina kele ti dikabu na kati ya makanda ya Izraele fwete kuma nkento ya muntu mosi ya dikanda ya tata na yandi,+ sambu bantu ya Izraele kutanina dikabu ya ba-nkaka na bo. 9 Dikabu mosi ve fwete katuka na dikanda mosi mpi kukwenda na dikanda ya nkaka, sambu makanda ya Izraele fwete kangama na dikabu na bo.’”

10 Bana-bankento ya Selofehadi salaka kaka mutindu Yehowa songaka Moize.+ 11 Yo yina, Mala, Tirsa, Ogla, Milka, mpi Noa, bana-bankento ya Selofehadi,+ kwelaka bana ya bampangi ya babakala ya tata na bo. 12 Bo kumaka bankento ya babakala ya mabuta ya Manase, mwana ya Yozefi, sambu dikabu na bo kubikala na dikanda ya dibuta ya tata na bo.

13 Yai bansiku mpi bankanu yina Yehowa pesaka bantu ya Izraele na nzila ya Moize na ntoto ya zelo na zelo ya Moabi na lweka ya Yordani pene-pene ya Yeriko.+