Kuzitisa Ntangu mpi Kukabula yo Mbote

ATA yo kelomba kutula ntetentete dikebi na mutindu ya mbote ya kulonga, yo kelomba mpi kusadila mbote ntangu. Balukutakanu na beto keyantikaka mpi kesukaka na ntangu ya mezabana mbote. Sambu na kulungisa dyambu yai, yo kelomba nde bantu yonso yina kele ti masolo na lukutakanu kusala na bumosi.

Na ntangu ya ntama, mutindu bantu vandaka kuzinga meswaswana ti mutindu bantu kezinga bubu yai na bisika mingi. Bantu vandaka kusadila bangogo bonso “penepene na ntangu ya tatu” to “penepene na ntangu ya kumi” Sambu na kutesa ntangu. (Mat. 20:3-6, NW; Yoa. 1:39, NW) Bantu vandaka kutula ve susi sambu na ntangu ya sikisiki ya bo fwete sala bisalu na bo ya konso kilumbu. Na bisika mingi na inza bubu yai, bo ketadilaka mpi ntangu mutindu mosi.

Kansi, ata bikalulu ya bwala na beto to bantu bo mosi kezolaka ve kuzitisa ntangu, beto lenda baka mambote kana beto ketula dikebi ya kufwana na dyambu yai. Kana bo mepesa bantu mingi masolo na lukutakanu mosi, yo kele mfunu na kuzitisa ntangu ya bo mepesa na konso kitini. Sambu na yina metala kuzitisa ntangu na balukutakanu na beto, beto fwete landa munsiku yai “bika mambu yonso kusalama na nzila ya mbote ti ya luzitu.”​—1 Kor. 14:40.

Mutindu ya Mbote ya Kuzitisa Ntangu. Kima ya ntete kele kudibongisa mbote. Mbala mingi, mitubi kekukaka ve kuzitisa ntangu sambu bo kudibongisaka ve mbote. Bo lenda kuditudila ntima na kiteso mosi ya kuluta ndilu. To bo kekingaka kaka ntangu ya nsuka sambu na kudibongisa. Sambu na kuzitisa ntangu yo kelombaka kuzaba ntete mfunu ya disolo na nge mpi kuvanda na luzolo ya kubongisa yo mbote.

Keti disolo na nge kele lutangu? Ntetentete, talulula Malongi ya 4 tii ya 7, yina ketubila kutuba kukonda mpasi, kupema, kunyata bangogo ya mfunu, mpi kunyata bangindu ya mfunu. Na nima, sadila bandongisila yango ntangu nge ketanga na ndinga ya ngolo malongi yina bo pesaka nge na kutanga. Tala kana nge kezitisa ntangu. Keti yo kelomba nde nge tanga ntinu sambu na kumanisa na minuta ya bo mepesa nge? Matisa vitesi na bitini yina kele ve na mfunu mingi, kansi landa na kupema mpi kulumusa vitesi ya nge ketangila sambu na kunyata bangindu ya mfunu. Vutukila kusala mutindu yai mbala na mbala. Kana nge meyantika kutanga kukonda mpasi, nge tamona ve mpasi na kusadila mbote ntangu na nge.

Keti nge tasadila banoti? Mfunu ya kusonika mambu yonso bonso na diskure maniskri kele ve sambu na kuzitisa ntangu. Ntangu nge salaka Dilongi ya 25, nge longukaka mutindu mosi ya mbote ya kuzitisa ntangu. Kuvila ve mambu tanu yai: (1) Pona malongi ya mbote, kansi yo luta ve mingi. (2) Sosa kubakisa mbote bangindu ya mfunu, kansi kukanga ve bansa yonso na ntu. (3) Sonika na pula na nge minuta ikwa nge tasala na konso kitini to minuta ya nge tasala ntangu nge metubila dezia bangindu mwa mingi. (4) Ntangu nge kebongisa disolo na nge, pona bangindu yina nge lenda katula kana nge memona nde nge kezola kulutisa ntangu. (5) Vutukila devware na nge mbala mingi.

Kuvutukila devware mbala mingi kele mfunu. Na ntangu nge kevutukila yo, tala ntangu ya nge kesala na konso kitini ya disolo na nge. Vutukila disolo na nge mbala na mbala tii kuna nge takuka kusala yo na minuta ya bo mepesa nge. Kusosa ve kutubila bangindu mingi kuluta. Ntangu nge kevutukila, kusadila ve minuta yonso sambu kusala diskure na ntwala ya bantu lenda baka minuta mwa mingi kuluta minuta yina nge vandaka kusala ntangu nge vandaka kuvutukila yo na kingenga.

Mutindu ya Kukabula Disolo na Bitini. Kuzitisa ntangu kekwendaka nzila mosi ti kuzaba kukabula disolo na bitini. Nge fwete lutisa ntangu mingi na kitini ya katikati, sambu bangindu ya mfunu ya malongi kevandaka na kitini yina. Bangogo ya luyantiku fwete vanda nda na kiteso na mpila nde yo lungisa balukanu tatu ya beto tubilaka na Dilongi ya 38. Kitini ya katikati fwete lutana ve nda na mpila nde nge zwa ve ntangu ya kusukisa mbote disolo na nge mutindu Dilongi 39 ketubila yo.

Bikesa ya nge kesala sambu na kuzitisa ntangu tasala nde disolo na nge kuvanda kitoko mpi yo tamonisa nde nge kezitisa bantu yankaka yina kele ti masolo na lukutakanu mpi dibundu ya mvimba.