Nsangu ya Kimfumu No. 38 Yina Beto Ta Kabula na Novembri!

1. Inki bangiufula bantu ke kudiyulaka na yina me tala bafwa, mpi nki mutindu beto ta pesa bamvutu na bangiufula yai na Novembri?

¹ Lufwa kele mbeni ya bantu yonso, kukonda kutadila balukwikilu na bo. (1 Bak. 15:26) Bantu mingi ke kudiyulaka kana bafwa kele na wapi mpi kana bo ta mona bo diaka. Yo yina, mabundu yonso na ntoto ya mvimba ta kabula Nsangu ya Kimfumu No. 38 na nsungi ya ngonda mosi; ntu-diambu na yo kele: Keti ya Kieleka Bafwa Lenda Zinga Diaka? Kampanye yai ya sipesiali ta yantika na Novembri 1. Na nima ya kampanye yango, beto ta sadila Nsangu ya Kimfumu No. 38 bonso trakiti na kisalu na beto ya kusamuna.

2. Inki mutindu bo me yidika Nsangu ya Kimfumu No. 38?

² Mutindu Bo Me Yidika Mambu na Kati: Bo me yidika Nsangu ya Kimfumu No. 38 na mpila nde kana beto me konika yo na bunda, lutiti ya zulu kumonisa ntu-diambu ya ke benda dikebi yina kele ti bangogo: “Nge ta tuba nde . . . ee? ve? mbala ya nkaka?” Ntangu mutangi ke kangula Nsangu ya Kimfumu, yandi ta mona mvutu yina Biblia ke pesa na ngiufula ya ntu-diambu, mpi kana lusilu ya Biblia ke tendula nki sambu na yandi. Yandi ta mona mpi bikuma yina lenda pusa yandi na kukwikila na Biblia. Lutiti ya nsuka ya Nsangu ya Kimfumu kele ti ngiufula mosi ya ke benda dikebi, yina ta sadisa muntu na kuyindulula mpi kupusa yandi na kulonguka mambu mingi.

3. Inki mutindu beto ta kabula Nsangu ya Kimfumu No. 38?

³ Mutindu Beto Ta Kabula Yo: Kampanye yai ta vanda kiteso mosi ti bakampanye ya kukabula baimvitasio ya Lusungiminu mpi ya lukutakanu ya distrike. Bankuluntu ta songa beno mutindu ya kukabula yo na teritware na beno na kuwakana ti mukanda ya Aprili 1, 2013 yina bo bakaka. Mabundu yina kele ti teritware ya fioti lenda sadisa mabundu ya pene-pene yina kele ti teritware ya nene. Ntangu nge ta baka Nsangu ya Kimfumu No. 38, yibuka na kubaka kaka ntalu yina nge ta sadila na mposo ya mvimba. Na nsungi ya kampanye, beto lenda kabula yo na kisalu ya kuta kimbangi na bisika ya bantu mingi na nima ya kukabula yo nzo na nzo na teritware na beto. Kana beto me kabula bakopi yonso na ntwala nde ngonda kumana, beto ta kabula mikanda yina beto fwete kukabula na ngonda yina. Na Sabala ya ntete, beto ta sala kaka kampanye yai ya sipesiali na kisika ya kuyantika kulonguka Biblia ti bantu. Kana mpila kele, beto fwete pesa mpi bazulunalu na bawikendi. Keti nge ke baka bangidika sambu na kusala mingi na kampanye yai ya sipesiali?