MWBR19 11 Bareferanse ya Mukanda ya Lukutakanu Luzingu mpi Kisalu
NOVEMBRI 4-10
BIMVWAMA YA NDINGA YA NZAMBI | 1 YOANE 1-5
“Beno Zola Ve Nsi-Ntoto mpi Bima Yina Kele na Nsi-Ntoto”
Landa Mbandu Yina Yezu Songaka
13 Bantu ya nkaka lenda tuba nde bima yonso ve yina kele na nsi-ntoto kele mbi. Ata mpidina, nsi-ntoto ti bima na yo yina ke bendaka bantu lenda katula dikebi na beto na kisalu ya Yehowa. Mpi nsi-ntoto ke pesaka ve ata kima mosi yina lenda sadisa beto na kukwenda pene-pene na Nzambi. Yo yina, kana beto ke yedisa zola sambu na bima yina kele na nsi-ntoto, ata na bima yina lenda monana nde yo kele kwa yo mbi ve, beto ke kuditula na kigonsa. (1 Timoteo 6:9, 10) Diaka, bima mingi yina kele na nsi-ntoto kele ya mbi mpenza mpi yo lenda bebisa beto. Kana beto ke tala bafilme to baprograme ya televizio yina ke songaka mubulu, nzala ya kuvanda ti bima mingi, to mansoni, beto lenda yantika na kundima bima yango mpi yo lenda pukumuna beto. Kana beto ke sala kinduku ti bantu yina lukanu na bo ya ntete-ntete ke vandaka ya kutomisa luzingu na bo ya kinsuni to ya kuyedisa mumbongo na bo, beto mpi lenda yantika kutula bima ya mutindu yina na kisika ya ntete.—Matayo 6:24; 1 Korinto 15:33.
Beno Tadila Mutindu ya Bantu Yina Beno Fwete Vanda
18 Beto lenda telamina “bima yina kele na nsi-ntoto” kana beto ke yibuka ntangu yonso bangogo yai ya kupemama ya Yoane: “Nsi-ntoto ke luta, nzala na yo mpi ke luta, kansi muntu yina ke salaka luzolo ya Nzambi ke bikalaka kimakulu.” (1 Yoa. 2:17) Ngidika ya Satana ke monana bonso nde yo ta zinga kimakulu. Kansi, kilumbu kele yo ta kuma na nsuka. Bima yina nsi-ntoto ya Satana ke pesaka ta zinga ve kimakulu. Kuyibuka diambu yina ta sadisa beto na kubwa ve na mitambu ya Diabulu.
Timuna Sambu na Kusosa Bimvwama ya Kimpeve
Bangibusa ya Yehowa Me Fwana na Kutudila Ntima
14 Masonuku ya Kigreki ya Bukristu kele ti bangibusa mingi ya ke monisa nde beto fwete zolana. Yezu tubaka nde nsiku ya zole ya kuluta nene kele ‘kuzola nkweno na nge bonso nge mosi.’ (Mat. 22:39) Mutindu mosi, Yakobo, mpangi ya Yezu ya mama mosi bingaka zola “nsiku ya ntotila.” (Yak. 2:8) Ntumwa Yoane sonikaka nde: “Bampangi ya mono ke zolaka mingi, mono ke sonikila beno, nsiku ya mpa ve, kansi nsiku ya ntama yina beno me bakaka.” (1 Yoa. 2:7, 8) Yoane zolaka kutuba nki na bangogo “nsiku ya ntama”? Yandi vandaka kutubila nsiku ya zola. Yo vandaka “ya ntama” sambu Yezu tubilaka yo bamvula mingi na ntwala, “katuka na luyantiku.” Kansi yo vandaka mpi “ya mpa” sambu yo lombaka kumonisa zola ya kuditambika, yina balongoki fwete monisa ntangu bo ta kutana ti mambu yina bo me kutanaka ntete ve ti yo. Sambu beto kele balongoki ya Kristu, keti beto ke sepelaka na balukebisu yina ya ke sadisaka beto na kumonisa ve nkadilu ya bwimi ya ke monana mingi na nsi-ntoto yai, yina lenda kanga beto nzila na kuzola nkweno?
it-2-F 491 § 1
Kulolula
Yo me fwana nde beto samba Nzambi sambu yandi lolula masumu ya bantu ya nkaka, yo vanda masumu ya dibundu ya mvimba. Moize salaka mutindu yina sambu na dikanda ya Izraele ntangu yandi songaka Nzambi masumu yina bantu ya Izraele salaka mpi lombaka yandi na kulolula bo. Yehowa ndimaka kisambu na yandi. (Kut 14:19, 20) Diaka, na kilumbu ya kupesa tempelo na Nzambi, Salomo sambaka Yehowa sambu yandi lolula bansadi na yandi kana bo sala masumu mpi bo balula ntima. (1Bn 8:30, 33-40, 46-52) Esdrasi vandaka kinati-nsangu yina songaka na meso ya bantu yonso masumu ya bayuda yina vutukaka na bwala na bo. Kisambu ya masonga yina yandi salaka mpi lukebisu yina yandi pesaka sadisaka bantu na kubalula ntima sambu Yehowa kulolula bo. (Esd 9:13–10:4, 10-19, 44) Yakobo siamisaka bantu yina ke bela na kimpeve na kubinga bampangi ya kuyela na dibundu na kusamba sambu na muntu yina mpi “kana yandi salaka masumu, Nzambi ta lolula yandi.” (Yak 5:14-16) Kansi kele ti “disumu yina ke nataka na lufwa,” kusala disumu na mpeve santu; yo kele disumu yina Nzambi lenda lolula ve ata fioti. Mukristu lenda samba ve sambu na bantu yina ke salaka disumu ya mutindu yai.—1Yn 5:16; Mat 12:31; Ebr 10:26, 27.
Lutangu ya Biblia
NOVEMBRI 11-17
BIMVWAMA YA NDINGA YA NZAMBI | 2 YOANE 1–YUDE
“Beto Fwete Nwana Sambu na Kubikala na Kieleka”
“Beno Vanda Ngolo Sambu na Kimvuka na Beno ti Mfumu”
8 Beto me zaba mayele ya Satana sambu Masonuku kemonisa bametode ya yandi kesadilaka mingi. (2 Korinto 2:11) Sambu na kubebisa kwikama ya Yobi muntu ya lunungu, Diabulu bebisaka bima na yandi, yandi fwaka bana na yandi, yandi sadilaka kimbeni ya dibuta, yandi niokulaka nitu na yandi, mpi yandi sadilaka banduku ya luvunu yina yantikaka kukusila yandi makambu. Yobi kumaka mawa-mawa mpi yandi yindulaka nde Nzambi yambulaka yandi. (Yobi 10:1, 2) Bubu yai, ata bampasi ya mutindu yai lenda katuka ve mbala mosi na Satana, yo ke bwilaka Bakristu mingi, mpi Diabulu lenda sadila yo sambu na mambote na yandi.
9 Bigonsa ya kimpeve me kumaka mingi na ntangu yai ya nsuka. Beto ke zinga na kati ya nsi-ntoto mosi yina kusosa kuzwa bima mingi ya kinsuni me bakaka kisika ya balukanu ya kimpeve. Bima yina ke mwangaka bansangu ke monisaka mbala na mbala nde kuvukisa nitu na kati ya bantu ya me kwelanaka ve ke nataka kiese, na kisika ya kumonisa nde yo ke nataka mpasi. Mpi bantu mingi me kumaka ‘kuzola kiese ya nsi-ntoto kansi Nzambi ve.’ (2 Timoteo 3:1-5) Kana beto ‘nwana ve ngolo sambu na lukwikilu,’ bangindu ya mutindu yai lenda tula bukati-kati na beto ya kimpeve na kigonsa.—Yude 3.
Timuna Sambu na Kusosa Bimvwama ya Kimpeve
it-1-F 879
Bankinsi Sambu na Kumonisa Zola
Biblia ke tubilaka ve bankinsi ya kumonisa zola mpi yo ke tubilaka ve mbala ikwa bo vandaka kusala yo. (Yud 12) Mfumu Yezu Kristu to bantumwa na yandi pesaka ve bantu nsiku ya kusala yo; yo yina yo ke tendula ve nde bantu fwete sala yo. Bantu ya nkaka tubaka nde yo vandaka bankinsi yina Bakristu yina vandaka bamvwama vandaka kusala mpi bo vandaka kubingisa bampangi na bo Bakristu. Bantu yonso, yo vanda bayina vandaka ve ti batata, mifwidi, bamvwama mpi bantu ya kukonda mfunu vandaka kudia kisika mosi bonso bampangi.
it-2-F 805
Ditadi
Ziku ngogo ya nkaka ya kigreki spi·lasʹ ke tendula ditadi yina me bumbanaka na nsi ya masa. Yude sadilaka ngogo yai sambu na kutubila babakala ya nkaka yina kotaka na dibundu ya Bukristu ti bikuma ya mbi. Kaka mutindu matadi ya kubumbana na nsi ya masa vandaka kigonsa sambu na bamaswa, babakala yai mpi vandaka kigonsa sambu na bampangi ya nkaka na dibundu. Yude ke tuba nde: “Bo kele matadi yina me bumbanaka na nsi ya masa na bankinsi ya beno ke salaka sambu na kumonisa zola ntangu bo ke diaka ti beno.”—Yude 12.
“Yandi Pesaka Nzambi Kiese”
Mbikudulu ya Enoki vandaka kutuba nki? Yo vandaka kutuba nde: “Beno tala, Yehowa kwisaka ti bamiriade na yandi ya santu sambu na kusambisa bantu yonso, mpi kubedisa bantu yonso yina ke vwezaka Nzambi sambu na bisalu na bo yonso ya kuvweza Nzambi yina bo me salaka, mpi sambu na mambu yonso ya mbi yina bansumuki yina ke vwezaka Nzambi tubaka sambu na yandi.” (Yude 14, 15) Kima ya ntete ya nge lenda mona kele nde Enoki tubaka mambu yina mbikudulu ke tuba bonso nde Nzambi me salaka yo dezia. Bambikudulu mingi yina bo sonikaka na nima salaka mpi mutindu mosi. Ngindu ya mfunu yo yai: Profete ke tubila kima mosi yina ta salama kibeni, yo yina yandi tubilaka yo bonso nde yo me salama dezia!—Yezaya 46:10.
“Yandi Pesaka Nzambi Kiese”
Lukwikilu ya Enoki lenda pusa beto na kudiyula kana beto ke tadilaka nsi-ntoto yai ya beto ke zinga mutindu Nzambi ke tadilaka yo. Nsangu ya lusambisu yina Enoki zabisaka na kikesa yonso kele kaka mfunu bubu yai; yo ke tadila mpi nsi-ntoto ya bubu kaka mutindu yo vandaka kutadila nsi-ntoto na bilumbu ya Enoki. Na kuwakana ti lukebisu ya Enoki, Yehowa nokisaka Mvula ya Ngolo sambu na kufwa bantu ya nsi-ntoto yina vandaka kuvweza Nzambi na bilumbu ya Noa. Mutindu Nzambi fwaka bantu ya mbi na ntangu yina ke monisa nde yandi ta fwa bo diaka mingi kuluta na bilumbu ke kwisa. (Matayo 24:38, 39; 2 Piere 2:4-6) Kaka mutindu yo vandaka na ntangu yina, bubu yai Nzambi kele ya kuyilama ti bamiriade na yandi ya santu sambu na kupesa ndola na bantu ya nsi-ntoto yai ya ke vweza yandi. Beto yonso fwete tula dikebi na lukebisu ya Enoki mpi kuzabisa yo na bantu ya nkaka. Bantu ya dibuta na beto ti banduku na beto lenda telamina beto. Bantangu ya nkaka beto lenda kudiwa beto mosi. Kansi Yehowa yambulaka ve Enoki; yandi ta yambula mpi ve bansadi na yandi ya kwikama bubu yai!
Lutangu ya Biblia
NOVEMBRI 18-24
BIMVWAMA YA NDINGA YA NZAMBI | KUSONGA 1-3
“Mono me zaba bisalu na nge”
Nge Ke monisaka Mpeve ya Nki Mutindu?
8 Sambu na kubuya mpeve ya mutindu yina, beto lenda yibuka nde Biblia ke monisa nde Yezu kele ti “bambwetete nsambwadi na diboko na yandi ya kitata.” “Bambwetete” yina ke tendula bankuluntu ya kupakulama kansi mambu yina verse yai ke tuba sambu na bo lenda tadila mpi bankuluntu yonso na kati ya dibundu. Yezu lenda twadisa “bambwetete” yina kele na diboko na yandi na mutindu yandi ke zola. (Kus. 1:16, 20) Yo yina, sambu Yezu kele Mfumu ya dibundu ya Bukristu, yandi ke zabaka mambu yonso yina ke salamaka na kati ya bimvuka ya bankuluntu. Kana yo ke lomba nde bo sungika nkuluntu mosi, Yezu yina ‘meso na yandi kele bonso tiya ya ke pela’ ta sala yo na ntangu yina me fwana sambu na yandi mpi na mutindu yandi ke zola. (Kus. 1:14) Kansi na ntwala nde Yezu kusala yo, beto fwete landa kuzitisa bantu yina Yehowa ke ponaka na nzila ya mpeve santu sambu Polo sonikaka nde: “Beno lemfukila bantu yina ke twadisaka beno mpi beno wila bo, sambu bo ke langidilaka mioyo na beno ntangu yonso bonso bantu yina ta vutula munoko; na mpila nde bo sala yo ti kiese kansi ve ti kubokuta, sambu yo ta vanda mbi sambu na beno.”—Baeb. 13:17.
w12 1/4 30 § 11
Yehowa Ke Taninaka Beto Sambu na Luguluku
11 Na mbonameso yina kele na Kusonga kapu 2 mpi 3, Yezu Kristu Ntotila kwendaka kutala mabundu nsambwadi ya Asie Mineure. Mbonameso yina ke monisa nde Kristu tadilaka ve mabundu yango na kimvuka kansi mambu ya siki-siki ya konso dibundu. Bantangu ya nkaka, yandi vandaka kutanga nkutu bazina ya bantu mpi bantangu ya nkaka diaka yandi vandaka kusikisa to kupesa bandongisila. Inki ke monisa yo? Ntangu mbonameso yina salamaka, mabundu nsambwadi yina ke monisa Bakristu bapakulami na nima ya mvu 1914 mpi bandongisila yina yandi pesaka na mabundu nsambwadi yina ke tadila mabundu yonso ya Bukristu na nsi-ntoto ya mvimba bubu yai. Yo yina, yo me fwana na kusukisa nde na nzila ya Mwana na yandi, Yehowa ke twadisaka bantu na yandi. Inki mutindu beto lenda baka mambote na lutwadisu yina?
w01 1/2 14 § 20
Tambula Kumosi ti Organizasio ya Yehowa
20 Kutambula kumosi ti organizasio ya Yehowa ya ke kwenda kaka na ntwala ke lomba nde beto ndima kisika yina Nzambi me pesaka Yezu Kristu, disongidila kisika ya “mfumu ya Dibundu.” (Efezo 5:22, 23) Yezaya 55:4 mpi ke tuba mambu ya mfunu, Biblia ke songa beto nde: “Mono [Yehowa] tulaka yandi mfumu na kuyala bantu yonso ya nsi-ntoto, yandi muntu songisaka bo kimfumu na mono.” Ntembe kele ve nde Yezu me zaba kutwadisa. Yandi me zaba mpi mameme na yandi ti mambu yina bo ke salaka. Ntangu yandi kwendaka kutala mabundu nsambwadi ya Asie Mineure, yandi sadilaka mbala tanu bangogo yai: “Mono zaba mambu yina yonso ya nge salaka.” (Kusonga 2:2, 19; 3:1, 8, 15) Bonso Tata na yandi Yehowa, Yezu mpi me zaba mambu ya beto kele na yo mfunu. Na ntwala ya kulonga balongoki na yandi kisambu yina kele Mbandu, Yezu tubaka nde: “Tata na beno ke zabaka na ntwala mambu yina ya beno ke na yo mfunu ntangu beno me lomba yandi yo ntete ve.”—Matayo 6:8-13.
Timuna Sambu na Kusosa Bimvwama ya Kimpeve
Kimfumu ya Nzambi Ke Fwa Bambeni na yo Yonso
10 Ntangu ya kusambisa. Ntangu yina, bambeni yonso ya Kimfumu ya Nzambi ta mona pwelele kima mosi yina ta yika bo mpasi. Yezu ke tuba nde: “Bo ta mona Mwana ya muntu ke kwisa na kati ya matuti ti ngolo ya nene mpi nkembo.” (Mar. 13:26) Mambu yai ya ngolo mpi ya kuyituka ta monisa nde Yezu me kwisa kusambisa bantu. Na kitini ya nkaka ya mbikudulu ya mutindu mosi ya ke tadila bilumbu ya nsuka, Yezu zabisaka mambu mingi ya nkaka ya ke tadila kusambisa na ntangu yai ya siki-siki. Mambu yango kele na kingana ya mameme ti bankombo. (Tanga Matayo 25:31-33, 46.) Bantu ya kwikama yina ke pesaka maboko na Kimfumu ya Nzambi ta vanda “mameme” mpi bo ‘ta tedimisa ba-ntu na bo’ sambu bo ta bakisa nde ‘luguluku na bo me finama.’ (Luka 21:28) Kansi, bambeni ya Kimfumu ta vanda “bankombo” mpi bo “ta kudibula na mawa,” sambu bo ta bakisa nde “lufwa ya mvula na mvula” ke vingila bo.—Mat. 24:30; Kus. 1:7.
Bangindu ya Mfunu ya Mukanda ya Kusonga—I
2:7—“Kilanga ya Nzambi” kele inki? Sambu bo ke tubila mambu yai na Bakristu ya kupakulama, kilanga yai fwete tadila paladisu ya zulu, disongidila na ntwala ya Nzambi yandi mosi. Bapakulami ya kwikama ta baka dikabu ya kudia “bambuma ya nti ya moyo.” Bo ta baka nitu yina lenda fwa ve.—1 Kor. 15:53.
Lutangu ya Biblia
NOVEMBRI 25–DESEMBRI 1
BIMVWAMA YA NDINGA YA NZAMBI | KUSONGA 4-6
“Bantu Iya ya Ke Tambusa Bampunda”
Bantu Iya ya Ke Tambusa Bampunda —Bo Kele Banani?
Nani ke tambusa mpunda ya mpembe? Kima ya ke sadisa beto na kubakisa yo kele na mukanda ya Kusonga, yina ke tuba na nima nde muntu ya kele na zulu mpi ya ke tambusa yo kele “Ndinga ya Nzambi.” (Kusonga 19:11-13) Titre yai, Ndinga, kele ya Yezu Kristu, sambu yandi kele kinati-ndinga ya Nzambi. (Yoane 1:1, 14) Diaka, Biblia ke binga yandi “Ntotila ya bantotila mpi Mfumu ya bamfumu” mpi yo ke tuba nde yandi kele “Kwikama mpi Kieleka.” (Kusonga 19:16) Yo ke pwelele nde, yandi kele ti kiyeka ya kusala bonso ntotila ya ke nwana bitumba, mpi yandi ke sadila ve ngolo na yandi na mutindu ya mbi. Ata mpidina, yo ke basisa mwa bangiufula.
wp17.3 4 § 5
Bantu Iya ya Ke Tambusa Bampunda —Bo Kele Banani?
Inki ntangu bantu ya kele na zulu ya bampunda yantikaka kutambusa yo? Simba nde Yezu, muntu ya ntete ya ke tambusa mpunda, yantikaka kutambusa yo ntangu yandi bakaka mpu ya kimfumu. (Kusonga 6:2) Inki ntangu bo tulaka Yezu Ntotila na zulu? Yo vandaka ve ntangu yandi vutukaka na zulu na nima ya lufwa na yandi. Biblia ke monisa nde nsungi ya kuvingila yantikaka na ntangu yina. (Baebreo 10:12, 13) Yezu pesaka balongoki na yandi kidimbu sambu bo zaba nsuka ya nsungi yina ya kuvingila mpi luyantiku ya luyalu na yandi na zulu. Yandi tubaka nde ntangu yandi ta yantika kuyala, mambu ta beba mingi kibeni na nsi-ntoto. Bitumba, nzala, mpi maladi ta vanda. (Matayo 24:3, 7; Luka 21:10, 11) Ntangu fioti na nima ya Mvita ya Ntete ya Ntoto ya Mvimba yina yantikaka na 1914, yo monanaka pwelele nde bantu kotaka na nsungi yina, ntangu mosi ya mavwanga na ntoto yina Biblia ke bingaka “bilumbu ya nsuka.”—2 Timoteo 3:1-5.
Bantu Iya ya Ke Tambusa Bampunda —Bo Kele Banani?
Muntu yai ke monisa bitumba. Simba nde yandi ke katula ngemba na ntoto ya mvimba kansi na nsi mosi mpamba ve. Na 1914, sambu na mbala ya ntete na luzingu ya bantu, bitumba salamaka na ntoto ya mvimba. Na nima bitumba ya zole ya ntoto ya mvimba salamaka mpi yo fwaka bantu mingi kuluta. Bantu ya nkaka ke tubaka nde ntalu ya bantu yonso yina fwaka na bitumba yai mpi ya nkaka yina salamaka banda 1914 kele bantu kuluta bamilio 100! Diaka, bantu mingi ya nkaka lwalaka ngolo kibeni.
wp17.3 5 § 4-5
Bantu Iya ya Ke Tambusa Bampunda —Bo Kele Banani?
“Mono talaka mpi mono monaka mpunda mosi ya ndombe; muntu yina vandaka na zulu na yo vandaka ti kilo na maboko na yandi. Mono waka bonso ndinga mosi ke katuka na kati ya bigangwa iya ya moyo ke tuba nde: ‘Kilo mosi ya ble sambu na denari mosi, mpi bakilo tatu ya orze sambu na denari mosi; mpi kubebisa ve mafuta ya olive ti vinu.’”—Kusonga 6:5, 6.
Muntu yai ke monisa nzala. Awa beto ke mona mutindu madia ke kuma fioti kibeni yo yina ntalu ya 1, 08 litre ya ble me kuma denari mosi; salere ya bo vandaka kufuta muntu na mvu-nkama ya ntete na kilumbu ya mvimba! (Matayo 20:2) Ti mbongo yina mosi, bo lendaka kusumba 3, 24 litre ya orze, mbuma yina ble me luta yo na mfunu. Yo ta lomba mbongo ikwa sambu na kudisa dibuta ya nene? Yo yina, bo ke songa bantu na kusadila ata madia ya konso kilumbu na mayele; mpi yo ke monana pwelele na bima yina bo vandaka kusadila mingi na ntangu yina, mu mbandu mafuta ya olive mpi vinu.
wp17.3 5 § 8-10
Bantu Iya ya Ke Tambusa Bampunda —Bo Kele Banani?
Muntu ya tatu ke monisa lufwa ya me katuka na maladi mpi bikuma ya nkaka. Ntama mingi ve na nima ya 1914, grippe espagnole fwaka bamilio ya bantu. Ziku bantu kiteso ya bamilio 500 bakaka maladi yina, disongidila muntu mosi na kati ya bantu tatu yina vandaka na luzingu na ntangu yina!
Kansi, grippe espagnole vandaka kaka luyantiku. Bantu ya mayele me monaka nde bamilio mingi ya bantu fwaka na mabobo na mvu-nkama ya 20. Tii bubu yai, SIDA, tiberkiloze, mpi malaria ke fwaka bamilio ya bantu ata minganga ke salaka bansosa ya ngolo.
Mambu yai yonso, bitumba, nzala, to maladi ke nata na lufwa. Maziamu ke lokutaka bamvumbi kukonda kulemba mpi yo ke pesa ve kivuvu.
Timuna Sambu na Kusosa Bimvwama ya Kimpeve
re-F 77 § 8
Nkembo ya Kiti ya Kimfumu ya Yehowa
8 Yoane zabaka nde bo vandaka kupona banganga-nzambi sambu na kusala na nzo-tenta na ntangu ya ntama. Ziku yandi yitukaka mingi ntangu yandi monaka mambu yai ya yandi ke tubila: “Bakiti ya kimfumu 24 vandaka na nziunga ya kiti yina ya kimfumu, mpi mono monaka bankuluntu 24 me vanda na bakiti yai ya kimfumu, bo me lwata bilele ya zulu ya mpembe, mpi bo vandaka ti bampu ya kimfumu ya wolo na ba-ntu na bo.” (Kusonga 4:4) Na kisika ya banganga-nzambi, bo tulaka bankuluntu 24 na bakiti ya kimfumu mpi bo lwataka bampu bonso bantotila. Bankuluntu yango vandaka banani? Bo vandaka Bakristu yina bo me tulaka mafuta, bayina futumukaka mpi kwendaka na zulu sambu na kuvanda na bisika yina Yehowa silaka bo. Inki mutindu beto me zaba yo?
re-F 80 § 19
Nkembo ya Kiti ya Kimfumu ya Yehowa
19 Bigangwa yai ke monisa nki? Mbonameso yina profete Ezekiele tubilaka ke sadisa beto na kubaka mvutu na ngiufula yai. Ezekiele monaka Yehowa me vanda na pusu-pusu mosi ya zulu mpi bigangwa yina ke zingaka yina vandaka bonso bigangwa yina Yoane tubilaka vandaka na lweka ya pusu-pusu yango. (Ezekiele 1:5-11, 22-28) Na nima, yandi monaka diaka bigangwa ya moyo na lweka ya kiti yina vandaka na zulu ya pusu-pusu. Kansi na mbala yai, yandi tubaka nde bigangwa yina ya moyo vandaka kumonisa basherube. (Ezekiele 10:9-15) Bigangwa yina iya ya moyo ya Yoane monaka ke monisa basherube mingi ya Nzambi, disongidila bigangwa ya kuluta zulu na kati ya bawanzio. Yo ke yitukisa ve Yoane na kumona mutindu basherube me vanda pene-pene ya Yehowa sambu na nzo-tenta ya ntama, yo vandaka ti basherube zole ya wolo na zulu ya mufiniku ya sanduku ya kuwakana, sanduku yango vandaka kumonisa kiti ya kimfumu ya Yehowa. Ndinga ya Yehowa vandaka kubasika na kati ya basherube yina sambu na kupesa dikanda bansiku.—Kubasika 25:22; Nkunga 80:1.
‘Tala! Ntambu ya Dikanda ya Yuda’
5 Mbala mingi, bo ke wakanisaka ntambu ti kikesa. Keti nge me telamaka ntete na ntwala ya ntambu ya bakala ya kuyela? Kana yo kele mpidina, yo fwete vanda nde kima mosi vandaka kukabula nge ti mbisi yina mpi kutanina nge, ziku lupangu ya nzo na yandi na zoo. Ata mpidina, eksperiansi ya mutindu yina lenda pesa boma. Na ntangu nge ke tala ilungi ya kigangwa yai ya nene mpi ya ngolo ebuna yandi mpi ke tala nge kukonda kukatula meso, yo kele mpasi na kuyindula nde mbisi yai lenda wa boma mpi kutina na ntwala ya konso kima yina. Biblia ke tubila “bantambu, yina me luta bambisi yonso na ngolo, yo ke tinaka mbisi ya nkaka boma ve.” (Bingana 30:30) Kikesa ya Kristu kele mutindu yina.
6 Bika beto tadila mitindu tatu yina Yezu monisaka kikesa bonso ya ntambu: mutindu yandi nwaninaka kieleka, lunungu, mpi nungaka kimbeni. Beto ta mona mpi nde beto yonso lenda landa mbandu ya Yezu na yina me tala kumonisa kikesa, yo vanda beto me butukaka na yo to ve.