ការបើកបង្ហាញចំពោះយ៉ូហាន
១ ការបើកបង្ហាញដោយលោកយេស៊ូគ្រិស្ត* ជាអ្វីដែលព្រះបានផ្ដល់ឲ្យលោក ដើម្បីបង្ហាញពួកខ្ញុំបម្រើរបស់លោកឲ្យឃើញអ្វីដែលត្រូវកើតឡើងក្នុងពេលឆាប់ៗខាងមុខនេះ។ លោកបានចាត់ទេវតារបស់លោក ហើយតាមរយៈទេវតានោះ លោកប្រើនិមិត្តរូបដើម្បីបើកបង្ហាញការទាំងនោះដល់ខ្ញុំបម្រើរបស់លោក គឺយ៉ូហាន ២ ដែលបានធ្វើជាសាក្សីបញ្ជាក់អំពីបណ្ដាំរបស់ព្រះ និងអំពីសក្ខីភាពរបស់លោកយេស៊ូគ្រិស្ត គឺគាត់បានបញ្ជាក់អំពីអ្វីៗទាំងអស់ដែលគាត់ឃើញ។ ៣ អ្នកណាដែលអានទំនាយនេះឲ្យអ្នកឯទៀតស្ដាប់ និងអ្នកដែលឮហើយប្រព្រឹត្តតាមអ្វីដែលបានត្រូវសរសេរក្នុងទំនាយនេះ អ្នកទាំងនោះមានសុភមង្គលហើយ ពីព្រោះពេលកំណត់គឺជិតដល់ហើយ។
៤ ពីខ្ញុំ យ៉ូហាន ជូនចំពោះក្រុមជំនុំទាំងប្រាំពីរនៅតំបន់អាស៊ី៖*
សូមឲ្យអ្នករាល់គ្នាបានប្រកបដោយគុណដ៏វិសេសលើសលប់និងសេចក្ដីសុខសាន្តពី«លោកដែលមានជីវិតរស់នៅកាលពីមុន ដែលមានជីវិតរស់នៅឥឡូវនេះ ហើយដែលនឹងមកដល់» ព្រមទាំងពីសកម្មពល* ទាំងប្រាំពីរដែលនៅមុខបល្ល័ង្ករបស់លោក ៥ ហើយពីលោកយេស៊ូគ្រិស្ត ដែលជា«សាក្សីដ៏ស្មោះត្រង់» ជា«បុត្រច្បងនិងជាអ្នកដែលបានរស់ពីស្លាប់ឡើងវិញមុនគេ» និងជា«អ្នកគ្រប់គ្រងលើស្តេចទាំងឡាយនៅផែនដី»។
លោកស្រឡាញ់យើង ហើយបានរំដោះយើងពីការខុសឆ្គង* របស់យើងតាមរយៈឈាមរបស់លោកផ្ទាល់ ៦ រួចលោកធ្វើឲ្យយើងទៅជាស្តេចនិងជាសង្ឃរបស់ព្រះដែលជាបិតារបស់លោក។ សូមឲ្យលោកបានប្រកបដោយសិរីរុងរឿងនិងកម្លាំងខ្លាំងក្លាជារៀងរហូត។ អាមេន។
៧ មើល! លោកនឹងមកជាមួយនឹងពពក ហើយភ្នែកមនុស្សទាំងអស់នឹងឃើញលោក រួមទាំងពួកអ្នកដែលបានចាក់លោក។ ហើយដោយសារលោក កុលសម្ព័ន្ធទាំងអស់នៅផែនដីនឹងគក់ទ្រូងដោយក្ដីទុក្ខព្រួយ។ មែនហើយ អាមេន។
៨ ព្រះយេហូវ៉ាដែលជាព្រះមានប្រសាសន៍ថា៖ «ខ្ញុំជាអាលផានិងអូមេហ្គា* ជាអ្នកដែលមានជីវិតរស់នៅកាលពីមុន ដែលមានជីវិតរស់នៅឥឡូវនេះ និងដែលនឹងមកដល់ ហើយដែលមានឫទ្ធានុភាពខ្លាំងក្លាបំផុត»។
៩ ខ្ញុំ យ៉ូហាន ដែលជាបងប្រុសរបស់អ្នករាល់គ្នានិងជាអ្នករួមចំណែកជាមួយនឹងអ្នករាល់គ្នាក្នុងសេចក្ដីវេទនា ក្នុងរាជាណាចក្រ និងក្នុងការស៊ូទ្រាំក្នុងនាមជាអ្នកកាន់តាមលោកយេស៊ូបាននៅកោះហៅថាប៉ាត់ម៉ុស ដោយសារខ្ញុំនិយាយអំពីព្រះនិងធ្វើជាសាក្សីបញ្ជាក់អំពីលោកយេស៊ូ។ ១០ ដោយឥទ្ធិពលនៃសកម្មពលរបស់ព្រះ ខ្ញុំបាននៅថ្ងៃរបស់លោកម្ចាស់ ហើយនៅខាងក្រោយខ្ញុំ ខ្ញុំឮសំឡេងមួយលាន់ឮយ៉ាងខ្លាំង ដូចសំឡេងត្រែ។ ១១ សំឡេងនោះបន្លឺឡើងថា៖ «អ្វីដែលអ្នកឃើញ ចូរសរសេរក្នុងរមូរមួយ ហើយផ្ញើទៅក្រុមជំនុំទាំងប្រាំពីរ គឺក្រុមជំនុំនៅក្រុងអេភេសូរ ក្រុងស្មៀរណា ក្រុងពើកាម៉ុម ក្រុងធាទេរ៉ា ក្រុងសាដេស ក្រុងភីឡាដិលភា និងក្រុងឡៅឌីសេ»។
១២ រួចខ្ញុំបែរទៅរកសំឡេងដែលកំពុងបន្លឺមកកាន់ខ្ញុំ ហើយខ្ញុំឃើញជើងចង្កៀងមាសប្រាំពីរ ១៣ នៅកណ្ដាលជើងចង្កៀងទាំងនោះ ខ្ញុំឃើញមនុស្សម្នាក់ដូចកូនមនុស្ស ដែលមានសម្លៀកបំពាក់វែងដល់ជើង ហើយមានខ្សែក្រវាត់មាសក្រវាត់នៅដើមទ្រូង។ ១៤ ម្យ៉ាងទៀត សក់ក្បាលរបស់លោកសស្គុសដូចរោមចៀម ឯភ្នែករបស់លោកភ្លឺដូចអណ្ដាតភ្លើង ១៥ ជើងរបស់លោកដូចស្ពាន់សុទ្ធដែលកំពុងភ្លឺក្នុងឡ ហើយសំឡេងលោកដូចសន្ធឹកទឹកហូរ។ ១៦ លោកមានផ្កាយប្រាំពីរនៅក្នុងដៃស្ដាំរបស់លោក ហើយមានដាវមួយវែងយ៉ាងមុតដែលមានមុខពីរចេញពីមាត់របស់លោក ឯមុខរបស់លោកភ្លឺដូចថ្ងៃពេលដែលកំពុងពេញកម្ដៅ។ ១៧ ពេលដែលខ្ញុំឃើញលោក ខ្ញុំដួលនៅក្បែរជើងរបស់លោក ដូចមនុស្សស្លាប់។
រួចលោកដាក់ដៃស្ដាំលើខ្ញុំ ហើយមានប្រសាសន៍ថា៖ «កុំខ្លាចឡើយ។ ខ្ញុំជាអ្នកមុនបង្អស់ និងជាអ្នកក្រោយបង្អស់ ១៨ ហើយជាអ្នកដែលមានជីវិតរស់នៅ ខ្ញុំបានស្លាប់ តែមើល! ខ្ញុំរស់ជារៀងរហូត ហើយខ្ញុំមានកូនសោនៃសេចក្ដីស្លាប់និងកូនសោនៃផ្នូរ។* ១៩ ដូច្នេះ ចូរសរសេរអ្វីៗដែលអ្នកបានឃើញ អ្វីៗដែលកំពុងកើតឡើង និងអ្វីៗដែលនឹងកើតឡើងបន្ទាប់ពីនេះ។ ២០ ចំណែកអាថ៌កំបាំងដ៏ពិសិដ្ឋអំពីផ្កាយប្រាំពីរដែលអ្នកបានឃើញនៅក្នុងដៃស្ដាំរបស់ខ្ញុំ និងអំពីជើងចង្កៀងមាសប្រាំពីរ៖ ផ្កាយទាំងប្រាំពីរតំណាងពួកទេវតានៃក្រុមជំនុំទាំងប្រាំពីរ ហើយជើងចង្កៀងទាំងប្រាំពីរ តំណាងក្រុមជំនុំប្រាំពីរ។
២ «ចូរសរសេរទៅកាន់ទេវតានៃក្រុមជំនុំនៅក្រុងអេភេសូរថា៖ លោកដែលកាន់ផ្កាយទាំងប្រាំពីរនៅក្នុងដៃស្ដាំ ហើយដែលដើរនៅកណ្ដាលជើងចង្កៀងមាសទាំងប្រាំពីរមានប្រសាសន៍ដូចតទៅនេះថា៖ ២ ‹ខ្ញុំស្គាល់ការប្រព្រឹត្តរបស់អ្នក ក៏ដឹងថាអ្នកធ្វើការនឿយហត់ ហើយខ្ញុំស្គាល់ការស៊ូទ្រាំរបស់អ្នក ក៏ដឹងថាអ្នកមិនអាចទ្រាំទ្រនឹងមនុស្សអាក្រក់បានឡើយ។ ខ្ញុំដឹងថាអ្នកសាកល្បងពួកអ្នកដែលអះអាងថាពួកគេជាសាវ័ក* តែតាមពិតពួកគេមិនមែនជាសាវ័កទេ ហើយអ្នកឃើញថាពួកគេជាអ្នកភូតភរ។ ៣ អ្នកកំពុងស៊ូទ្រាំដែរ ក៏បានទ្រាំការលំបាកជាច្រើនដើម្បីឈ្មោះរបស់ខ្ញុំ ហើយមិនបានអស់កម្លាំងចិត្តឡើយ។ ៤ ទោះជាយ៉ាងនោះក៏ដោយ ខ្ញុំប្រកាន់ទោសអ្នកអំពីរឿងមួយ គឺអ្នកបានបាត់បង់សេចក្ដីស្រឡាញ់ដែលអ្នកធ្លាប់មានកាលពីដើមដំបូង។
៥ «‹ដូច្នេះ ចូរនឹកឃើញនូវអ្វីដែលអ្នកបានបាត់បង់ ហើយចូរប្រែចិត្ត រួចប្រព្រឹត្តដូចដើមវិញ។ ពុំនោះសោត ខ្ញុំនឹងមកឯអ្នក ហើយដកជើងចង្កៀងរបស់អ្នកចេញ បើអ្នកមិនប្រែចិត្ត។ ៦ ប៉ុន្តែអ្នកនៅមានលក្ខណៈល្អមួយ គឺអ្នកស្អប់ការប្រព្រឹត្តរបស់និកាយនីកុឡាស ដូចខ្ញុំក៏ស្អប់ដែរ។ ៧ ចូរឲ្យអ្នកដែលមានត្រចៀក ស្ដាប់អ្វីដែលសកម្មពល* ប្រាប់ដល់ក្រុមជំនុំទាំងឡាយ៖ ខ្ញុំនឹងអនុញ្ញាតឲ្យអ្នកណាដែលឈ្នះ បរិភោគផ្លែពីដើមឈើដែលផ្ដល់ជីវិត ដែលនៅក្នុងសួនឧទ្យានរបស់ព្រះ›។
៨ «ចូរសរសេរទៅកាន់ទេវតានៃក្រុមជំនុំនៅក្រុងស្មៀរណាថា៖ លោកដែល‹ជាអ្នកមុនបង្អស់និងជាអ្នកក្រោយបង្អស់› ដែលបានស្លាប់ ហើយរស់ឡើងវិញ មានប្រសាសន៍ដូចតទៅនេះថា៖ ៩ ‹ខ្ញុំស្គាល់សេចក្ដីវេទនានិងភាពក្រីក្ររបស់អ្នក តែអ្នកជាអ្នកមាន ខ្ញុំក៏ដឹងពីការជេរប្រមាថរបស់ពួកអ្នកដែលអះអាងថាពួកគេជាជនជាតិយូដា តែតាមពិតពួកគេមិនមែនជាជនជាតិយូដាទេ គឺជាបក្សពួករបស់សាថាន* វិញ។ ១០ កុំខ្លាចទុក្ខលំបាកដែលអ្នកនឹងរងឡើយ។ មើល! មេកំណាច* នឹងបោះអ្នករាល់គ្នាខ្លះទៅក្នុងគុកម្ដងហើយម្ដងទៀត ដើម្បីឲ្យអ្នករាល់គ្នាទទួលការល្បងលយ៉ាងពេញលេញ ហើយដើម្បីឲ្យអ្នករាល់គ្នាមានសេចក្ដីវេទនាអស់ដប់ថ្ងៃ។ ចូររក្សាសេចក្ដីស្មោះត្រង់រហូតដល់ស្លាប់ ហើយខ្ញុំនឹងឲ្យមកុដនៃជីវិត។ ១១ ចូរអ្នកដែលមានត្រចៀក ស្ដាប់អ្វីដែលសកម្មពលប្រាប់ដល់ក្រុមជំនុំទាំងឡាយ៖ អ្នកណាដែលឈ្នះនឹងមិនឆ្លងកាត់សេចក្ដីស្លាប់ទីពីរសោះឡើយ›។
១២ «ចូរសរសេរទៅកាន់ទេវតានៃក្រុមជំនុំនៅក្រុងពើកាម៉ុមថា៖ លោកដែលមានដាវមួយវែងយ៉ាងមុតដែលមានមុខពីរមានប្រសាសន៍ដូចតទៅនេះថា៖ ១៣ ‹ខ្ញុំដឹងថាអ្នកអាស្រ័យនៅកន្លែងណា គឺនៅកន្លែងដែលមានបល្ល័ង្ករបស់សាថាន ហើយទោះជាយ៉ាងនោះក៏ដោយ អ្នកនៅតែកាន់ខ្ជាប់តាមឈ្មោះរបស់ខ្ញុំ ក៏មិនបានបដិសេធថាមិនជឿលើខ្ញុំ សូម្បីតែនៅសម័យអាន់ទីប៉ាស ដែលជាសាក្សីរបស់ខ្ញុំ និងជាអ្នកស្មោះត្រង់ដែលបានត្រូវគេសម្លាប់នៅក្បែរអ្នករាល់គ្នា នៅកន្លែងដែលសាថានអាស្រ័យនៅ។
១៤ «‹ទោះជាយ៉ាងនោះក៏ដោយ ខ្ញុំប្រកាន់ទោសអ្នកអំពីរឿងមួយចំនួន គឺនៅទីនោះ អ្នកមានមនុស្សខ្លះកាន់ខ្ជាប់តាមសេចក្ដីបង្រៀនរបស់បាឡាម ដែលជាអ្នកបង្រៀនបាឡាក់ឲ្យទាក់ទាញពួកកូនអ៊ីស្រាអែលឲ្យធ្វើអំពើខុសឆ្គង គឺឲ្យបរិភោគអ្វីដែលបានត្រូវបូជាដល់រូបព្រះ ហើយធ្វើអំពើប្រាសចាកសីលធម៌ខាងផ្លូវភេទ។* ១៥ នៅទីនោះ អ្នកក៏មានមនុស្សដែលកាន់ខ្ជាប់តាមសេចក្ដីបង្រៀនរបស់និកាយនីកុឡាសដែរ។ ១៦ ដូច្នេះ ចូរប្រែចិត្តចុះ។ ពុំនោះសោត ខ្ញុំនឹងមកឯអ្នកយ៉ាងឆាប់ រួចច្បាំងនឹងអ្នកទាំងនោះដោយដាវវែងដែលចេញពីមាត់របស់ខ្ញុំ។
១៧ «‹ចូរឲ្យអ្នកដែលមានត្រចៀក ស្ដាប់អ្វីដែលសកម្មពលប្រាប់ដល់ក្រុមជំនុំទាំងឡាយ៖ ខ្ញុំនឹងឲ្យនំម៉ាណាខ្លះដែលលាក់កំបាំង ដល់អ្នកណាដែលឈ្នះ ក៏នឹងឲ្យក្រួសពណ៌សមួយ ហើយលើក្រួសនោះឈ្មោះថ្មីមួយបានត្រូវសរសេរ ជាឈ្មោះដែលគ្មានអ្នកណាស្គាល់ទេក្រៅពីអ្នកដែលទទួលក្រួសនោះ›។
១៨ «ចូរសរសេរទៅកាន់ទេវតានៃក្រុមជំនុំនៅក្រុងធាទេរ៉ាថា៖ បុត្រព្រះ ដែលមានភ្នែកដូចអណ្ដាតភ្លើង ហើយជើងដូចស្ពាន់សុទ្ធមានប្រសាសន៍ដូចតទៅនេះថា៖ ១៩ ‹ខ្ញុំស្គាល់ការប្រព្រឹត្ត សេចក្ដីស្រឡាញ់ ជំនឿ កិច្ចបម្រើ និងការស៊ូទ្រាំរបស់អ្នក ក៏ដឹងថាការប្រព្រឹត្តរបស់អ្នកឥឡូវនេះ គឺល្អប្រសើរជាងការប្រព្រឹត្តរបស់អ្នកកាលពីមុន។
២០ «‹ទោះជាយ៉ាងនោះក៏ដោយ ខ្ញុំប្រកាន់ទោសអ្នកអំពីរឿងមួយ គឺអ្នកប្រណីដល់យេសិបិល ជាស្ត្រីដែលអះអាងថាខ្លួនជាអ្នកប្រកាសទំនាយ ហើយដែលបង្រៀននិងបំភាន់ពួកខ្ញុំបម្រើរបស់ខ្ញុំឲ្យប្រព្រឹត្តអំពើប្រាសចាកសីលធម៌ខាងផ្លូវភេទ និងបរិភោគអ្វីដែលបានត្រូវបូជាដល់រូបព្រះ។ ២១ ហើយខ្ញុំបានទុកពេលឲ្យនាងប្រែចិត្ត តែនាងមិនព្រមប្រែចិត្តពីអំពើប្រាសចាកសីលធម៌ខាងផ្លូវភេទរបស់នាងទេ។ ២២ មើល! ខ្ញុំហៀបនឹងធ្វើឲ្យនាងឈឺងើបមិនរួច ហើយធ្វើឲ្យអ្នកដែលផិតក្បត់ជាមួយនឹងនាងមានសេចក្ដីវេទនាជាខ្លាំង បើពួកគេមិនប្រែចិត្តពីការប្រព្រឹត្តដែលដូចការប្រព្រឹត្តរបស់នាង។ ២៣ ហើយខ្ញុំនឹងប្រហារជីវិតកូនរបស់នាងដោយជំងឺដែលនាំឲ្យស្លាប់ ដើម្បីឲ្យក្រុមជំនុំទាំងឡាយដឹងថា ខ្ញុំជាអ្នកដែលស្ទង់មើលចិត្តនិងថ្លើម* ក៏សងដល់អ្នករាល់គ្នា តាមការប្រព្រឹត្តរៀងៗខ្លួន។
២៤ «‹ក៏ប៉ុន្តែចំណែកពួកអ្នកទាំងប៉ុន្មានទៀតនៅក្រុងធាទេរ៉ាដែលមិនកាន់តាមសេចក្ដីបង្រៀនរបស់យេសិបិល គឺពួកអ្នកដែលមិនដឹងសោះអំពីអ្វីដែលគេហៅថា«សេចក្ដីជ្រាលជ្រៅរបស់សាថាន» ខ្ញុំប្រាប់ថា៖ ខ្ញុំមិនបន្ថែមបន្ទុកលើអ្នករាល់គ្នាឡើយ។ ២៥ ទោះជាយ៉ាងនោះក៏ដោយ ចូរកាន់ខ្ជាប់តាមអ្វីដែលអ្នករាល់គ្នាមាន រហូតដល់ខ្ញុំមក។ ២៦ ឯអ្នកណាដែលឈ្នះ ហើយកាន់តាមការប្រព្រឹត្តរបស់ខ្ញុំរហូតដល់ទីបញ្ចប់ ខ្ញុំនឹងឲ្យអ្នកនោះមានអំណាចលើប្រជាជាតិទាំងឡាយ ២៧ ហើយអ្នកនោះនឹងឃ្វាលបណ្ដាជនដោយដំបងដែក ដើម្បីធ្វើឲ្យពួកគេបែកខ្ចាយដូចភាជនៈដី ដូចអំណាចដែលខ្ញុំបានទទួលពីបិតារបស់ខ្ញុំ ២៨ ហើយខ្ញុំនឹងឲ្យផ្កាយព្រឹកដល់អ្នកនោះ។ ២៩ ចូរឲ្យអ្នកដែលមានត្រចៀក ស្ដាប់អ្វីដែលសកម្មពលប្រាប់ដល់ក្រុមជំនុំទាំងឡាយ›។
៣ «ហើយចូរសរសេរទៅកាន់ទេវតានៃក្រុមជំនុំនៅក្រុងសាដេសថា៖ លោកដែលមានសកម្មពល* ទាំងប្រាំពីររបស់ព្រះ និងផ្កាយទាំងប្រាំពីរមានប្រសាសន៍ដូចតទៅនេះថា៖ ‹ខ្ញុំស្គាល់ការប្រព្រឹត្តរបស់អ្នក ហើយដឹងថាអ្នកមានឈ្មោះថាជាអ្នករស់រានមានជីវិត តែអ្នកបានស្លាប់ហើយ។ ២ ចូរប្រុងប្រយ័ត្ន ហើយពង្រឹងកម្លាំងដល់អ្វីៗដែលជិតស្លាប់ ព្រោះខ្ញុំឃើញថាការប្រព្រឹត្តរបស់អ្នក គឺមិនពេញលក្ខណៈនៅចំពោះមុខព្រះរបស់ខ្ញុំទេ។ ៣ ដូច្នេះ ចូរចាំជាប់នូវអ្វីដែលអ្នកបានទទួលនិងអ្វីដែលអ្នកបានឮ ហើយចូរកាន់ខ្ជាប់តាមសេចក្ដីនោះ ព្រមទាំងប្រែចិត្ត។ ប្រសិនបើអ្នកមិនភ្ញាក់ខ្លួនទេ ខ្ញុំប្រាកដជានឹងមកដូចចោរ ហើយអ្នកនឹងមិនដឹងថាខ្ញុំមកនៅពេលណាឡើយ។
៤ «‹ទោះជាយ៉ាងនោះក៏ដោយ មានមនុស្សខ្លះនៅក្រុងសាដេស ដែលមិនបានធ្វើឲ្យសម្លៀកបំពាក់ក្រៅរបស់ខ្លួនសៅហ្មងឡើយ ហើយអ្នកទាំងនោះនឹងដើរជាមួយនឹងខ្ញុំដោយមានសម្លៀកបំពាក់ស ពីព្រោះពួកគេសមនឹងធ្វើដូច្នេះ។ ៥ អ្នកណាដែលឈ្នះ អ្នកនោះនឹងបានសម្លៀកបំពាក់ស ហើយខ្ញុំនឹងមិនលុបឈ្មោះរបស់អ្នកនោះចេញពីសៀវភៅជីវិតឡើយ តែខ្ញុំនឹងទទួលស្គាល់ឈ្មោះរបស់អ្នកនោះនៅមុខបិតារបស់ខ្ញុំ ហើយនៅមុខបណ្ដាទេវតារបស់លោក។ ៦ ចូរអ្នកដែលមានត្រចៀក ស្ដាប់អ្វីដែលសកម្មពលប្រាប់ដល់ក្រុមជំនុំទាំងឡាយ›។
៧ «ហើយចូរសរសេរទៅកាន់ទេវតានៃក្រុមជំនុំនៅក្រុងភីឡាដិលភាថា៖ លោកដែលបរិសុទ្ធ ដែលពិតប្រាកដ ដែលមានកូនសោរបស់ដាវីឌ និងជាលោកដែលបើកហើយគ្មានអ្នកណាអាចបិទបាន ក៏បិទហើយគ្មានអ្នកណាអាចបើកបាន មានប្រសាសន៍ដូចតទៅនេះថា៖ ៨ ‹ខ្ញុំស្គាល់ការប្រព្រឹត្តរបស់អ្នក (មើល! ខ្ញុំបានបើកទ្វារមួយនៅមុខអ្នក ដែលគ្មានអ្នកណាអាចបិទបានឡើយ) ខ្ញុំដឹងថាអ្នកមានកម្លាំងបន្ដិចបន្តួច ក៏បានកាន់តាមពាក្យរបស់ខ្ញុំ ហើយមិនបានក្បត់ឈ្មោះខ្ញុំទេ។ ៩ មើល! ចំណែកពួកអ្នកពីបក្សពួក* របស់សាថាន* ដែលនិយាយថាពួកគេជាជនជាតិយូដា ប៉ុន្តែតាមពិតមិនមែនជាជនជាតិយូដាទេ តែពួកគេកំពុងភូតភរវិញ ខ្ញុំនឹងប្រគល់ពួកគេ ហើយធ្វើឲ្យពួកគេមកសម្ដែងការគោរពនៅជិតជើងរបស់អ្នក ថែមទាំងធ្វើឲ្យពួកគេដឹងថាខ្ញុំស្រឡាញ់អ្នក។ ១០ ដោយសារអ្នកបានកាន់តាមអ្វីដែលអ្នកបានឮស្តីអំពីការស៊ូទ្រាំរបស់ខ្ញុំ នោះខ្ញុំនឹងរក្សាការពារអ្នកនៅគ្រាល្បងល ដែលនឹងកើតឡើងពេញផែនដីទាំងមូល ដើម្បីល្បងលពួកអ្នកដែលអាស្រ័យនៅផែនដី។ ១១ ខ្ញុំនឹងមកយ៉ាងឆាប់។ ចូរកាន់ខ្ជាប់តាមអ្វីដែលអ្នកមាន ដើម្បីកុំឲ្យអ្នកណាយកមកុដរបស់អ្នក។
១២ «‹ខ្ញុំនឹងធ្វើឲ្យអ្នកណាដែលឈ្នះទៅជាសសរមួយក្នុងវិហាររបស់ព្រះនៃខ្ញុំ ហើយអ្នកនោះនឹងមិនចេញទៅវិញឡើយ។ នៅលើអ្នកនោះខ្ញុំនឹងសរសេរនាមរបស់ព្រះនៃខ្ញុំ និងឈ្មោះនៃក្រុងរបស់ព្រះនៃខ្ញុំ ពោលគឺក្រុងយេរូសាឡិមថ្មី ដែលចុះមកពីស្ថានសួគ៌ពីព្រះនៃខ្ញុំ ហើយខ្ញុំក៏នឹងសរសេរឈ្មោះថ្មីរបស់ខ្ញុំនៅលើអ្នកនោះដែរ។ ១៣ ចូរអ្នកដែលមានត្រចៀក ស្ដាប់អ្វីដែលសកម្មពលប្រាប់ដល់ក្រុមជំនុំទាំងឡាយ›។
១៤ «ហើយចូរសរសេរទៅកាន់ទេវតានៃក្រុមជំនុំនៅក្រុងឡៅឌីសេថា៖ លោកដែលជាអាមេន ជាសាក្សីស្មោះត្រង់និងពិតត្រង់ និងជាអ្នកដំបូងបង្អស់ដែលព្រះបានបង្កើតមានប្រសាសន៍ដូចតទៅនេះថា៖ ១៥ ‹ខ្ញុំស្គាល់ការប្រព្រឹត្តរបស់អ្នក អ្នកគឺមិនត្រជាក់ហើយក៏មិនក្ដៅដែរ ខ្ញុំចង់ឲ្យអ្នកត្រជាក់ ឬក៏ក្ដៅ។ ១៦ ដូច្នេះ ដោយសារអ្នកក្ដៅឧណ្ហៗ មិនត្រជាក់ហើយមិនក្ដៅ នោះខ្ញុំនឹងខ្ជាក់អ្នកចេញពីមាត់ខ្ញុំ។ ១៧ ពីព្រោះអ្នកនិយាយថា៖ «ខ្ញុំជាអ្នកមាន ក៏មានទ្រព្យសម្បត្ដិបរិបូរ ហើយខ្ញុំមិនត្រូវការអ្វីសោះ» តែអ្នកមិនដឹងថាអ្នកមានទុក្ខវេទនា ក៏គួរឲ្យអាណិត ក្រីក្រ ងងឹតភ្នែក និងអាក្រាតទេ ១៨ ខ្ញុំទូន្មានអ្នកឲ្យទិញមាសពីខ្ញុំ ជាមាសដែលបានត្រូវសម្រាំងដោយភ្លើងដើម្បីឲ្យអ្នកក្លាយទៅជាអ្នកមាន ហើយទិញសម្លៀកបំពាក់ស មកស្លៀកពាក់ ដើម្បីកុំឲ្យអ្នកឯទៀតឃើញអ្នកនៅអាក្រាត រួចអ្នកត្រូវខ្មាសគេ។ ចូរទិញថ្នាំលាបភ្នែកដែរ ដើម្បីអ្នកអាចមើលឃើញ។
១៩ «‹ខ្ញុំកែតម្រង់ ហើយប្រដៅអស់អ្នកដែលខ្ញុំស្រឡាញ់។ ដូច្នេះ ចូរមានចិត្តខ្នះខ្នែង ហើយប្រែចិត្តចុះ។ ២០ មើល! ខ្ញុំកំពុងឈរគោះទ្វារ។ ប្រសិនបើអ្នកណាឮសំឡេងខ្ញុំហើយបើកទ្វារ ខ្ញុំនឹងចូលក្នុងផ្ទះរបស់អ្នកនោះ ហើយបរិភោគអាហារល្ងាចជាមួយនឹងអ្នកនោះ ហើយអ្នកនោះនឹងបរិភោគជាមួយនឹងខ្ញុំ។ ២១ ខ្ញុំនឹងអនុញ្ញាតឲ្យអ្នកណាដែលឈ្នះ អង្គុយជាមួយនឹងខ្ញុំលើបល្ល័ង្ករបស់ខ្ញុំ ដូចខ្ញុំបានឈ្នះ ហើយអង្គុយជាមួយនឹងបិតារបស់ខ្ញុំលើបល្ល័ង្ករបស់លោក។ ២២ ចូរឲ្យអ្នកដែលមានត្រចៀក ស្ដាប់អ្វីដែលសកម្មពលប្រាប់ដល់ក្រុមជំនុំទាំងឡាយ›»។
៤ បន្ទាប់ពីការទាំងនោះ មើល! ខ្ញុំឃើញទ្វារមួយបើកចំហនៅស្ថានសួគ៌ ហើយសំឡេងដែលខ្ញុំបានឮដំបូង គឺសំឡេងដូចត្រែ បានបន្លឺមកកាន់ខ្ញុំថា៖ «ចូរឡើងមកទីនេះ ហើយខ្ញុំនឹងបង្ហាញឲ្យអ្នកឃើញនូវអ្វីៗដែលត្រូវកើតឡើង»។ ២ បន្ទាប់ពីការនោះ សកម្មពល* បរិសុទ្ធចាប់ផ្ដើមមានឥទ្ធិពលលើខ្ញុំភ្លាម៖ មើល! មានបល្ល័ង្កមួយនៅស្ថានសួគ៌ ហើយមានអ្នកអង្គុយលើបល្ល័ង្កនោះ។ ៣ ហើយអ្នកដែលអង្គុយលើបល្ល័ង្កនោះមានលក្ខណៈដូចត្បូងយ៉ាស្បា* និងត្បូងវិសេសពណ៌ក្រហម ហើយនៅជុំវិញបល្ល័ង្កនោះមានឥន្ទធនូដែលមានលក្ខណៈដូចត្បូងមរកត។
៤ មានបល្ល័ង្កម្ភៃបួនទៀតនៅជុំវិញបល្ល័ង្កនោះ ហើយមានអ្នកចាស់ទុំម្ភៃបួននាក់អង្គុយលើបល្ល័ង្កទាំងនោះ។ អ្នកចាស់ទុំទាំងនោះមានសម្លៀកបំពាក់ក្រៅពណ៌ស ហើយពាក់មកុដមាសលើក្បាល។ ៥ មានផ្លេកបន្ទោរ សំឡេងនិយាយ និងផ្គរលាន់កំពុងចេញពីបល្ល័ង្កមក ហើយមានចង្កៀងភ្លើងប្រាំពីរដែលកំពុងឆេះនៅមុខបល្ល័ង្ក ហើយចង្កៀងទាំងនោះតំណាងសកម្មពលទាំងប្រាំពីររបស់ព្រះ។ ៦ នៅមុខបល្ល័ង្កមានអ្វីដែលមើលទៅដូចជាសមុទ្រដែលដូចកញ្ចក់ ដូចកែវចរណៃ។
ហើយនៅកណ្ដាលបល្ល័ង្កនិងនៅជុំវិញបល្ល័ង្ក មានចេរូប៊ីនបួនរូបពេញទៅដោយភ្នែកទាំងមុខទាំងក្រោយ។ ៧ ចេរូប៊ីនទីមួយគឺដូចសត្វតោ ហើយចេរូប៊ីនទីពីរគឺដូចគោឈ្មោលស្ទាវ ឯចេរូប៊ីនទីបីមានមុខដូចមនុស្ស ហើយចេរូប៊ីនទីបួនគឺដូចឥន្ទ្រីដែលហោះហើរ។ ៨ ចំណែកចេរូប៊ីនទាំងបួននោះ ពួកគេម្នាក់ៗមានស្លាបប្រាំមួយ ហើយនៅជុំវិញនិងនៅខាងក្រោមស្លាបទាំងនោះមានពេញទៅដោយភ្នែក។ ចេរូប៊ីនទាំងនោះនិយាយឥតឈប់ឈរទាំងយប់ទាំងថ្ងៃថា៖ «បរិសុទ្ធ បរិសុទ្ធ បរិសុទ្ធ គឺព្រះយេហូវ៉ា ជាព្រះដែលមានឫទ្ធានុភាពខ្លាំងក្លាបំផុត ដែលមានជីវិតរស់នៅកាលពីមុន មានជីវិតរស់នៅឥឡូវនេះ ហើយនឹងមកដល់»។
៩ ហើយពេលណាចេរូប៊ីនទាំងនោះផ្ដល់សិរីរុងរឿង កិត្ដិយស និងថ្លែងអំណរគុណដល់លោកដែលអង្គុយលើបល្ល័ង្ក គឺលោកដែលរស់ជារៀងរហូត ១០ នោះអ្នកចាស់ទុំម្ភៃបួននាក់លំឱនកាយនៅមុខបល្ល័ង្ក ហើយគោរពប្រណិប័តន៍លោកដែលរស់ជារៀងរហូត ក៏បោះមកុដខ្លួននៅមុខបល្ល័ង្កហើយជម្រាបថា៖ ១១ «ព្រះយេហូវ៉ាជាព្រះរបស់យើងអើយ លោកសមនឹងទទួលសេចក្ដីសរសើរដោយសារសិរីរុងរឿង កិត្ដិយស និងឫទ្ធានុភាព ពីព្រោះលោកបានបង្កើតអ្វីៗទាំងអស់ ហើយអ្វីៗទាំងអស់នោះបានកើតមក ក៏មាននៅផង ដោយសារបំណងប្រាថ្នារបស់លោក»។
៥ ហើយខ្ញុំឃើញរមូរមួយនៅក្នុងដៃរបស់លោកដែលកំពុងអង្គុយលើបល្ល័ង្ក។ រមូរនោះមានអក្សរទាំងខាងក្នុងទាំងខាងក្រៅ ហើយបានត្រូវបិទដោយត្រាប្រាំពីរ។ ២ រួចខ្ញុំឃើញទេវតាខ្លាំងក្លាមួយរូបប្រកាសដោយសំឡេងយ៉ាងខ្លាំងថា៖ «តើអ្នកណាសមនឹងបកត្រាទាំងនេះហើយបើករមូរ?»។ ៣ ប៉ុន្តែគ្មានអ្នកណាម្នាក់នៅស្ថានសួគ៌ នៅផែនដី ឬនៅក្រោមដីអាចបើកមើលរមូរនោះទេ។ ៤ ហើយខ្ញុំចាប់ផ្ដើមយំយ៉ាងខ្លាំង ពីព្រោះគ្មានអ្នកណាសមនឹងបើកមើលរមូរនោះទេ។ ៥ ប៉ុន្តែអ្នកចាស់ទុំម្នាក់ប្រាប់ខ្ញុំថា៖ «ឈប់យំទៅ។ មើល! លោកដែលជាតោពីកុលសម្ព័ន្ធយូដា និងជាឫសនៃដាវីឌបានឈ្នះ ដូច្នេះ លោកសមនឹងបកត្រាទាំងប្រាំពីរនោះហើយបើករមូរ»។
៦ ខ្ញុំឃើញកូនចៀមមួយដែលមើលទៅដូចជាបានត្រូវគេសម្លាប់កំពុងឈរនៅជិតបល្ល័ង្កនិងនៅកណ្ដាលចេរូប៊ីនទាំងបួននិងពួកអ្នកចាស់ទុំ។ កូនចៀមនោះមានស្នែងប្រាំពីរនិងភ្នែកប្រាំពីរ ហើយភ្នែកទាំងនោះតំណាងសកម្មពល* ទាំងប្រាំពីររបស់ព្រះ ដែលបានត្រូវចាត់ឲ្យទៅពេញផែនដីទាំងមូល។ ៧ រួចមក កូនចៀមបានទៅយករមូរនោះភ្លាមពីដៃរបស់លោកដែលកំពុងអង្គុយលើបល្ល័ង្ក។ ៨ ពេលដែលកូនចៀមយករមូរនោះ ចេរូប៊ីនបួនរូបនិងពួកអ្នកចាស់ទុំម្ភៃបួននាក់បានលំឱនកាយនៅមុខកូនចៀម ដោយមានពិណនិងចានគោមមាសម្នាក់មួយ ហើយចានគោមនោះគឺពេញទៅដោយគ្រឿងក្រអូប។ ឯគ្រឿងក្រអូបនោះតំណាងសេចក្ដីអធិដ្ឋានរបស់ពួកអ្នកបរិសុទ្ធ។ ៩ ហើយពួកគាត់ច្រៀងចម្រៀងថ្មីមួយថា៖ «លោកសមនឹងយករមូរនិងបកត្រាទាំងនោះ ពីព្រោះលោកបានត្រូវសម្លាប់ ហើយបានទិញមនុស្សសម្រាប់ព្រះ ជាមនុស្សពីគ្រប់កុលសម្ព័ន្ធ គ្រប់ភាសា គ្រប់ពូជសាសន៍ និងគ្រប់ប្រជាជាតិ ដោយឈាមរបស់លោក ១០ រួចលោកធ្វើឲ្យពួកគេទៅជារាជាណាចក្រមួយនិងជាសង្ឃរបស់ព្រះនៃយើង ហើយពួកគេនឹងធ្វើជាស្តេចគ្រប់គ្រងលើផែនដី»។
១១ ខ្ញុំឃើញ ហើយឮសំឡេងទេវតាជាច្រើននៅជុំវិញបល្ល័ង្ក ចេរូប៊ីនបួនរូប និងពួកអ្នកចាស់ទុំ ឯទេវតាទាំងនោះមានចំនួនរាប់ម៉ឺនគុណនឹងរាប់ម៉ឺន និងរាប់ពាន់គុណនឹងរាប់ពាន់ ១២ ហើយពួកគេនិយាយដោយសំឡេងយ៉ាងខ្លាំងថា៖ «កូនចៀមដែលបានត្រូវសម្លាប់គឺសមនឹងទទួលឫទ្ធានុភាព ទ្រព្យសម្បត្ដិ ប្រាជ្ញា កម្លាំងខ្លាំងក្លា កិត្ដិយស សិរីរុងរឿង និងពរ»។
១៣ ខ្ញុំឮអ្វីៗទាំងអស់ដែលមានជីវិតនៅស្ថានសួគ៌ នៅផែនដី នៅក្រោមដី នៅក្នុងសមុទ្រ និងអ្វីៗទាំងអស់ដែលនៅទីនោះថា៖ «សូមឲ្យលោកដែលអង្គុយលើបល្ល័ង្កនិងកូនចៀមប្រកបដោយពរ កិត្ដិយស សិរីរុងរឿង និងកម្លាំងខ្លាំងក្លាជារៀងរហូត»។ ១៤ រួចមក ចេរូប៊ីនទាំងបួនបាននិយាយថា៖ «អាមេន!» រួចពួកអ្នកចាស់ទុំបានលំឱនកាយគោរពប្រណិប័តន៍ព្រះ។
៦ ហើយខ្ញុំឃើញកូនចៀមបកត្រាមួយពីចំណោមត្រាទាំងប្រាំពីរ រួចខ្ញុំឮចេរូប៊ីនមួយពីចំណោមចេរូប៊ីនទាំងបួននោះនិយាយដោយសំឡេងដូចផ្គរលាន់ថា៖ «មក!» ២ បន្ទាប់មក មើល! ខ្ញុំឃើញសេះមួយសម្បុរស ហើយអ្នកដែលជិះសេះនោះមានធ្នូ ក៏ទទួលមកុដ រួចអ្នកនោះចេញទៅយកជ័យជម្នះ ហើយដើម្បីបង្ហើយជ័យជម្នះរបស់លោក។
៣ ពេលដែលកូនចៀមបកត្រាទីពីរ ខ្ញុំឮចេរូប៊ីនទីពីរនិយាយថា៖ «មក!» ៤ បន្ទាប់មក មានសេះមួយទៀតមក ជាសេះសម្បុរក្រហមដូចភ្លើង ហើយអ្នកដែលជិះសេះនោះបានត្រូវអនុញ្ញាតឲ្យដកយកសន្ដិភាពចេញពីផែនដី ដើម្បីឲ្យមនុស្សសម្លាប់គ្នាដោយឥតមេត្ដា ហើយអ្នកនោះក៏ទទួលដាវធំមួយ។
៥ ពេលដែលកូនចៀមបកត្រាទីបី ខ្ញុំឮចេរូប៊ីនទីបីនិយាយថា៖ «មក!» បន្ទាប់មក មើល! ខ្ញុំឃើញសេះមួយសម្បុរខ្មៅ ហើយអ្នកដែលជិះសេះនោះមានជញ្ជីងនៅដៃ។ ៦ រួចមក ខ្ញុំឮសំឡេងមួយហាក់ដូចជាចេញពីចំណោមចេរូប៊ីនទាំងបួនថា៖ «ស្រូវសាលីមួយលីត្រតម្លៃមួយឌីណារី* ហើយស្រូវ* បីលីត្រតម្លៃមួយឌីណារី ហើយកុំប៉ះពាល់ប្រេងអូលីវឬស្រាទំពាំងបាយជូរឡើយ»។
៧ ពេលដែលកូនចៀមបកត្រាទីបួន ខ្ញុំឮចេរូប៊ីនទីបួននិយាយថា៖ «មក!» ៨ បន្ទាប់មក មើល! ខ្ញុំឃើញសេះមួយសម្បុរស្លាំង ឯអ្នកដែលជិះសេះនោះមានឈ្មោះថាសេចក្ដីស្លាប់។ ហើយផ្នូរ* កំពុងតាមអ្នកនោះយ៉ាងប្រកិត។ ពួកគេបានទទួលអំណាចលើមួយភាគបួននៃផែនដី ដើម្បីសម្លាប់ដោយដាវវែង ដោយការខ្វះស្បៀងអាហារ ដោយជំងឺដែលនាំឲ្យស្លាប់ និងដោយសត្វសាហាវនៅផែនដី។
៩ ពេលដែលកូនចៀមបកត្រាទីប្រាំ ខ្ញុំឃើញថានៅខាងក្រោមទីបូជាមានឈាម* របស់ពួកអ្នកដែលបានត្រូវគេសម្លាប់ដោយសារបណ្ដាំរបស់ព្រះ និងដោយសារកិច្ចការជាសាក្សីដែលពួកគេធ្លាប់ធ្វើ។ ១០ ហើយពួកគេបានស្រែកឡើងដោយសំឡេងយ៉ាងខ្លាំងថា៖ «ម្ចាស់ដ៏ឧត្តមបំផុត បរិសុទ្ធ និងពិតប្រាកដអើយ តើពេលណាទើបលោកនឹងវិនិច្ឆ័យទោស ហើយសងសឹកពួកអ្នកដែលបានសម្លាប់ពួកយើងនៅផែនដី?»។ ១១ រួចមក ពួកគេម្នាក់ៗបានទទួលអាវវែងពណ៌សមួយ ហើយបានត្រូវប្រាប់ឲ្យចាំបន្ដិច រហូតដល់បង្គ្រប់ចំនួនបងប្អូនរបស់ពួកគេ និងខ្ញុំបម្រើឯទៀតដែលរួមការងារជាមួយនឹងពួកគេ ដែលហៀបនឹងត្រូវសម្លាប់ដូចពួកគេដែរ។
១២ ខ្ញុំឃើញកូនចៀមបកត្រាទីប្រាំមួយ រួចមក ដីក៏រញ្ជួយយ៉ាងខ្លាំង ហើយថ្ងៃក៏ក្លាយទៅជាងងឹតដូចបាវ* ពណ៌ខ្មៅ ខែទាំងមូលបានក្លាយទៅជាពណ៌ក្រហមដូចឈាម ១៣ ផ្កាយទាំងឡាយនៅលើមេឃក៏ធ្លាក់ចុះដល់ផែនដី ដូចពេលដែលខ្យល់បក់ខ្លាំងអង្រួនដើមល្វាឲ្យជ្រុះផ្លែខ្ចី។ ១៤ ហើយមេឃក៏បាត់ទៅដូចរមូរដែលត្រូវគេមូរ ហើយភ្នំនិងកោះទាំងអស់ក៏ត្រូវដកចេញ។ ១៥ ឯស្តេចទាំងឡាយនៅផែនដី ពួកមន្ត្រីជាន់ខ្ពស់ ពួកមេបញ្ជាការកងទ័ព ពួកអ្នកមាន ពួកអ្នកខ្លាំងពូកែ គ្រប់ទាំងខ្ញុំបម្រើនិងអស់អ្នកដែលមានសេរីភាព សុទ្ធតែបានលាក់ខ្លួននៅក្នុងរូងភ្នំនិងតាមផ្ទាំងថ្មនានា។ ១៦ ហើយពួកគេនិយាយទៅកាន់ភ្នំនិងផ្ទាំងថ្មម្ដងហើយម្ដងទៀតថា៖ «រលំលើយើងមក ហើយលាក់បាំងយើងពីមុខលោកដែលអង្គុយលើបល្ល័ង្ក និងពីកំហឹងរបស់កូនចៀម ១៧ ពីព្រោះថ្ងៃដ៏ធំនៃកំហឹងរបស់លោកទាំងពីរបានមកដល់ ហើយតើអ្នកណាអាចឈរបាន?»។
៧ បន្ទាប់ពីការនោះ ខ្ញុំឃើញទេវតាបួនរូបឈរនៅជ្រុងទាំងបួននៃផែនដី ដោយទប់ខ្យល់ទាំងបួននៃផែនដី មិនឲ្យបក់មកលើផែនដី សមុទ្រ ឬដើមឈើណាមួយឡើយ។ ២ រួចមក ខ្ញុំឃើញទេវតាមួយទៀតឡើងមកពីទិសថ្ងៃរះ ដោយមានត្រារបស់ព្រះដែលមានជីវិតរស់នៅ ហើយទេវតានោះបន្លឺសំឡេងយ៉ាងខ្លាំងប្រាប់ទេវតាទាំងបួនដែលបានទទួលការអនុញ្ញាតឲ្យបង្ខូចផែនដីនិងសមុទ្រ ៣ ថា៖ «កុំបង្ខូចផែនដី សមុទ្រ ឬដើមឈើឡើយ ទាល់តែយើងបានបោះត្រាលើថ្ងាសពួកខ្ញុំបម្រើនៃព្រះរបស់យើងហើយ»។
៤ ខ្ញុំបានឮពីចំនួនពួកអ្នកដែលបានត្រូវបោះត្រានោះ គឺមួយសែនបួនម៉ឺនបួនពាន់នាក់ ពីកុលសម្ព័ន្ធទាំងអស់នៃពួកកូនអ៊ីស្រាអែល បានត្រូវបោះត្រា៖
៥ ពីកុលសម្ព័ន្ធយូដា មានមួយម៉ឺនពីរពាន់នាក់បានត្រូវបោះត្រា
ពីកុលសម្ព័ន្ធរូបេនមានមួយម៉ឺនពីរពាន់នាក់
ពីកុលសម្ព័ន្ធកាដមានមួយម៉ឺនពីរពាន់នាក់
៦ ពីកុលសម្ព័ន្ធអេស៊ើរមានមួយម៉ឺនពីរពាន់នាក់
ពីកុលសម្ព័ន្ធណែបថាលីមានមួយម៉ឺនពីរពាន់នាក់
ពីកុលសម្ព័ន្ធម៉ាណាសេមានមួយម៉ឺនពីរពាន់នាក់
៧ ពីកុលសម្ព័ន្ធស៊ីម្មានមានមួយម៉ឺនពីរពាន់នាក់
ពីកុលសម្ព័ន្ធលេវីមានមួយម៉ឺនពីរពាន់នាក់
ពីកុលសម្ព័ន្ធអ៊ីសាខារមានមួយម៉ឺនពីរពាន់នាក់
៨ ពីកុលសម្ព័ន្ធសេប៊ូឡូនមានមួយម៉ឺនពីរពាន់នាក់
ពីកុលសម្ព័ន្ធយ៉ូសែបមានមួយម៉ឺនពីរពាន់នាក់
ពីកុលសម្ព័ន្ធបេនយ៉ាមីនមានមួយម៉ឺនពីរពាន់នាក់ដែលបានត្រូវបោះត្រា។
៩ បន្ទាប់ពីការទាំងនោះ មើល! ខ្ញុំឃើញមនុស្សមួយក្រុមធំ ដែលគ្មានមនុស្សណាម្នាក់អាចរាប់ចំនួនបានឡើយ។ ពួកគេចេញពីគ្រប់ប្រជាជាតិ គ្រប់កុលសម្ព័ន្ធ គ្រប់ជាតិសាសន៍ និងគ្រប់ភាសា ហើយកំពុងឈរនៅមុខបល្ល័ង្កនិងនៅមុខកូនចៀម ដោយពាក់អាវវែងពណ៌ស ព្រមទាំងកាន់ធាងលម៉ើនៅដៃ។ ១០ ហើយពួកគេបន្លឺសំឡេងយ៉ាងខ្លាំងឥតឈប់ថា៖ «សេចក្ដីសង្គ្រោះរបស់យើងមកពីព្រះរបស់យើង ដែលអង្គុយលើបល្ល័ង្ក និងពីកូនចៀម»។
១១ ឯទេវតាទាំងឡាយកំពុងឈរនៅជុំវិញបល្ល័ង្ក និងពួកអ្នកចាស់ទុំ និងចេរូប៊ីនទាំងបួន រួចពួកគេក្រាបក្បាលនៅមុខបល្ល័ង្កគោរពប្រណិប័តន៍ព្រះ ១២ ហើយនិយាយថា៖ «អាមេន! ពរ សិរីរុងរឿង ប្រាជ្ញា អំណរគុណ កិត្ដិយស ឫទ្ធានុភាព និងកម្លាំងជារបស់ព្រះនៃយើងជារៀងរហូត។ អាមេន»។
១៣ បន្ទាប់មក អ្នកចាស់ទុំម្នាក់សួរខ្ញុំថា៖ «តើអ្នកទាំងនេះដែលពាក់អាវវែងពណ៌សជាអ្នកណា? ហើយតើពួកគេមកពីណា?»។ ១៤ ម្ល៉ោះហើយ ខ្ញុំនិយាយទៅគាត់ភ្លាមថា៖ «ម្ចាស់ខ្ញុំអើយ អ្នកដឹងហើយ»។ គាត់និយាយមកខ្ញុំថា៖ «អ្នកទាំងនោះគឺជាអ្នកដែលចេញផុតពីគ្រាទុក្ខវេទនាដ៏ខ្លាំង ហើយពួកគេបានបោកសម្អាតអាវវែងរបស់ពួកគេឲ្យសក្នុងឈាមរបស់កូនចៀម។ ១៥ ហេតុនេះហើយបានជាពួកគេនៅមុខបល្ល័ង្ករបស់ព្រះ ហើយពួកគេកំពុងបំពេញកិច្ចបម្រើពិសិដ្ឋជូនលោកទាំងយប់ទាំងថ្ងៃក្នុងវិហាររបស់លោក ឯលោកដែលអង្គុយលើបល្ល័ង្កនឹងរៀបចំត្រសាលមួយដើម្បីការពារពួកគេ។ ១៦ ពួកគេនឹងមិនស្រេកឬឃ្លានទៀតឡើយ ហើយថ្ងៃនឹងមិនជះកម្ដៅខ្លាំងពេកមកលើពួកគេទៀតដែរ ១៧ ពីព្រោះកូនចៀមដែលនៅក្បែរបល្ល័ង្កនឹងឃ្វាលពួកគេ ហើយនាំទៅឯរន្ធទឹកដែលផ្ដល់ជីវិត។ ឯព្រះនឹងជូតអស់ទាំងទឹកភ្នែកចេញពីភ្នែករបស់ពួកគេ»។
៨ ពេលដែលកូនចៀមបកត្រាទីប្រាំពីរ ស្ថានសួគ៌បានទៅជាស្ងាត់ច្រៀបអស់កន្លះម៉ោង។ ២ ខ្ញុំក៏ឃើញទេវតាទាំងប្រាំពីរដែលឈរនៅមុខព្រះ ហើយពួកគេបានទទួលត្រែប្រាំពីរ។
៣ រួចមក ទេវតាមួយទៀតបានមកដល់ ហើយឈរនៅក្បែរទីបូជា ដោយកាន់ភាជនៈមាសសម្រាប់ដាក់គ្រឿងក្រអូប។ បន្ទាប់មក ទេវតានោះទទួលគ្រឿងក្រអូបជាច្រើនដើម្បីបូជាលើទីបូជាដែលនៅមុខបល្ល័ង្ក កាលដែលពួកអ្នកបរិសុទ្ធទាំងអស់គ្នាអធិដ្ឋាន។ ៤ ហើយផ្សែងពីគ្រឿងក្រអូបបានហុយឡើងពីដៃរបស់ទេវតានោះនៅមុខព្រះ ជាមួយនឹងសេចក្ដីអធិដ្ឋានរបស់ពួកអ្នកបរិសុទ្ធ។ ៥ ប៉ុន្តែទេវតានោះយកភ្លើងពីទីបូជាភ្លាម ហើយដាក់ពេញភាជនៈសម្រាប់ដាក់គ្រឿងក្រអូប រួចបោះទៅផែនដី។ បន្ទាប់មក មានផ្លេកបន្ទោរ ផ្គរលាន់ សំឡេងនិយាយ និងការរញ្ជួយផែនដី។ ៦ ហើយទេវតាប្រាំពីរដែលមានត្រែប្រាំពីរត្រៀមផ្លុំត្រែ។
៧ ពេលទេវតាទីមួយផ្លុំត្រែរបស់គាត់ ដុំព្រិលនិងភ្លើងលាយជាមួយនឹងឈាមបានត្រូវបោះទៅផែនដី ហើយមួយភាគបីនៃផែនដីបានឆេះសុស មួយភាគបីនៃដើមឈើទាំងឡាយបានឆេះសុស និងតិណជាតិទាំងអស់បានឆេះសុស។
៨ ពេលទេវតាទីពីរផ្លុំត្រែរបស់គាត់ អ្វីដែលមើលទៅដូចជាភ្នំដ៏ធំមួយដែលមានភ្លើងឆេះបានត្រូវបោះទៅក្នុងសមុទ្រ ហើយមួយភាគបីនៃសមុទ្របានក្លាយទៅជាឈាម ៩ ហើយមួយភាគបីនៃអ្វីដែលមានជីវិត* ក្នុងសមុទ្របានស្លាប់ ហើយមួយភាគបីនៃសំពៅទាំងឡាយបានខូចអស់ទៅ។
១០ ពេលទេវតាទីបីផ្លុំត្រែរបស់គាត់ ផ្កាយដ៏ធំមួយដែលកំពុងឆេះដូចចង្កៀងបានធ្លាក់ពីលើមេឃទៅលើមួយភាគបីនៃទន្លេនិងរន្ធទឹក។ ១១ ផ្កាយនោះឈ្មោះដើមល្វីង។ ហើយមួយភាគបីនៃទឹកបានក្លាយទៅជាល្វីង រួចមនុស្សជាច្រើនបានស្លាប់ដោយសារទឹកនោះបានក្លាយទៅជាល្វីង។
១២ ពេលទេវតាទីបួនផ្លុំត្រែរបស់គាត់ មួយភាគបីនៃថ្ងៃ មួយភាគបីនៃខែ និងមួយភាគបីនៃផ្កាយបានត្រូវវាយ ដើម្បីធ្វើឲ្យមួយភាគបីនៃរបស់ទាំងនោះក្លាយទៅជាងងឹត ហើយដើម្បីនៅពេលថ្ងៃមិនឲ្យមានពន្លឺមួយភាគបី ហើយពេលយប់ក៏ដូច្នេះដែរ។
១៣ ហើយខ្ញុំឃើញនិងឮឥន្ទ្រីមួយហោះនៅកណ្ដាលមេឃនិយាយដោយបន្លឺសំឡេងយ៉ាងខ្លាំងថា៖ «វេទនា វេទនា វេទនាដល់អស់អ្នកដែលរស់នៅផែនដី ដោយសារសំឡេងត្រែទាំងប៉ុន្មានទៀតរបស់ទេវតាបីរូបដែលហៀបនឹងផ្លុំត្រែរបស់ពួកគេ!»។
៩ ពេលដែលទេវតាទីប្រាំផ្លុំត្រែរបស់គាត់ ខ្ញុំឃើញផ្កាយមួយដែលបានធ្លាក់ដល់ផែនដី។ ផ្កាយនោះបានទទួលកូនសោនៃទីជ្រៅបំផុត។ ២ ពេលដែលផ្កាយនោះបើកទីជ្រៅបំផុត មានផ្សែងចេញមកពីរណ្ដៅនោះ ដូចផ្សែងពីឡដ៏ធំមួយ ហើយថ្ងៃនិងមេឃបានទៅជាងងឹតដោយសារផ្សែងពីរណ្ដៅនោះ។ ៣ មានកណ្ដូបចេញពីផ្សែងនោះមកលើផែនដី។ កណ្ដូបទាំងនោះបានទទួលអំណាចដូចអំណាចរបស់ខ្យាដំរីនៅផែនដី។ ៤ ហើយពួកគេបានត្រូវប្រាប់មិនឲ្យបង្ខូចតិណជាតិណានៅផែនដី ឬរុក្ខជាតិ ឬដើមឈើឡើយ គ្រាន់តែធ្វើទុក្ខដល់មនុស្សដែលមិនមានត្រារបស់ព្រះនៅថ្ងាសពួកគេប៉ុណ្ណោះ។
៥ ហើយកណ្ដូបបានទទួលការអនុញ្ញាត មិនមែនឲ្យសម្លាប់មនុស្សទាំងនោះទេ តែដើម្បីធ្វើទារុណកម្មដល់ពួកគេអស់ប្រាំខែ ហើយទារុណកម្មដែលពួកគេទទួលគឺដូចពេលដែលខ្យាដំរីទិចមនុស្ស។ ៦ នៅគ្រានោះ មនុស្សនឹងរកវិធីស្លាប់ តែរកមិនឃើញ ហើយពួកគេចង់ស្លាប់ តែសេចក្ដីស្លាប់នឹងរត់ចេញពីពួកគេ។
៧ ឯលក្ខណៈរបស់កណ្ដូបទាំងនោះគឺស្រដៀងនឹងសេះដែលបានត្រូវរៀបចំសម្រាប់ចម្បាំង ហើយលើក្បាលកណ្ដូបទាំងនោះមានអ្វីដែលមើលទៅដូចមកុដមាស ឯមុខគឺដូចមុខមនុស្ស ៨ តែសក់របស់កណ្ដូបទាំងនោះគឺដូចសក់ស្ត្រី ហើយធ្មេញគឺដូចធ្មេញតោ ៩ កណ្ដូបទាំងនោះមានអាវការពារដើមទ្រូងដូចអាវការពារធ្វើពីដែក ឯសន្ធឹកស្លាបគឺដូចសន្ធឹករទេះសេះជាច្រើនកំពុងស្រូតទៅច្បាំង។ ១០ ម្យ៉ាងទៀត កន្ទុយនិងទ្រនិចរបស់កណ្ដូបទាំងនោះគឺដូចកន្ទុយនិងទ្រនិចរបស់ខ្យាដំរី ហើយក្នុងកន្ទុយមានអំណាចធ្វើទុក្ខដល់មនុស្សទាំងនោះអស់ប្រាំខែ។ ១១ កណ្ដូបទាំងនោះមានស្តេច ពោលគឺទេវតានៃទីជ្រៅបំផុត។ ទេវតានោះមានឈ្មោះថាអាបាដូន* ជាភាសាហេប្រឺ តែជាភាសាក្រិចលោកមានឈ្មោះថាអាប៉ូលីយ៉ូន។*
១២ សេចក្ដីវេទនាទីមួយបានកន្លងផុតទៅហើយ។ មើល! សេចក្ដីវេទនាពីរទៀតនឹងមកបន្ទាប់ពីការទាំងនេះ។
១៣ ពេលដែលទេវតាទីប្រាំមួយផ្លុំត្រែរបស់គាត់ ខ្ញុំឮសំឡេងមួយបន្លឺចេញមកពីជ្រុង* ទាំងប៉ុន្មានរបស់ទីបូជាធ្វើពីមាស ដែលនៅមុខព្រះ។ ១៤ សំឡេងនោះបន្លឺទៅកាន់ទេវតាទីប្រាំមួយដែលមានត្រែថា៖ «ចូរស្រាយទេវតាទាំងបួនដែលជាប់ចំណងនៅទន្លេអឺប្រាត ជាទន្លេដ៏ធំ»។ ១៥ រួចគាត់ស្រាយទេវតាទាំងបួននោះ ដែលបានត្រូវរៀបចំសម្រាប់ម៉ោង ថ្ងៃ ខែ និងឆ្នាំ ដើម្បីសម្លាប់មួយភាគបីនៃមនុស្សទាំងនោះ។
១៦ ឯចំនួនទាហានសេះគឺពីរម៉ឺនគុណនឹងមួយម៉ឺន ខ្ញុំបានឮអំពីចំនួនពួកគេ។ ១៧ ក្នុងអ្វីដែលបានត្រូវបង្ហាញឲ្យខ្ញុំឃើញក្នុងគំនិត ខ្ញុំឃើញថាសេះនិងពួកអ្នកដែលជិះសេះទាំងនោះមានលក្ខណៈដូចតទៅនេះ៖ អាវការពារដើមទ្រូងរបស់ពួកគេ មានពណ៌ក្រហមដូចភ្លើង ពណ៌ខៀវចាស់ និងពណ៌លឿងដូចស្ពាន់ធ័រ ឯក្បាលសេះទាំងនោះគឺដូចក្បាលតោ ហើយមានភ្លើង ផ្សែងនិងស្ពាន់ធ័រចេញពីមាត់សេះទាំងនោះ។ ១៨ មួយភាគបីនៃមនុស្សទាំងនោះបានត្រូវសម្លាប់ដោយសេចក្ដីវេទនាទាំងបីនេះ គឺភ្លើង ផ្សែង និងស្ពាន់ធ័រដែលចេញពីមាត់សេះទាំងនោះ។ ១៩ ព្រោះអំណាចរបស់សេះទាំងនោះគឺនៅក្នុងមាត់និងកន្ទុយរបស់ពួកវា ព្រោះកន្ទុយរបស់ពួកវាដូចពស់ ក៏មានក្បាល ហើយពួកវាធ្វើទុក្ខដោយអ្វីៗទាំងនោះ។
២០ ប៉ុន្តែមនុស្សទាំងប៉ុន្មានទៀតដែលមិនបានត្រូវសម្លាប់ដោយសេចក្ដីវេទនាទាំងនោះ មិនបានប្រែចិត្តពីស្នាដៃរបស់ពួកគេដោយឈប់គោរពបូជាពួកវិញ្ញាណកំណាច* និងរូបព្រះធ្វើពីប្រាក់ មាស ស្ពាន់ ថ្ម និងឈើ ជារូបដែលមើលមិនឃើញ ស្ដាប់មិនឮ ហើយដើរមិនបាននោះទេ។ ២១ ពួកគេក៏មិនបានប្រែចិត្តពីឃាតកម្ម ការទាក់ទងនឹងពួកវិញ្ញាណអាក្រក់ អំពើប្រាសចាកសីលធម៌ខាងផ្លូវភេទ* និងពីចោរកម្មរបស់ពួកគេដែរ។
១០ ហើយខ្ញុំឃើញទេវតាខ្លាំងពូកែមួយទៀតចុះពីស្ថានសួគ៌* មក ដោយដណ្ដប់ពពក ហើយមានឥន្ទធនូនៅលើក្បាល។ មុខរបស់ទេវតានោះភ្លឺដូចថ្ងៃ ហើយជើងរបស់លោកគឺដូចសសរភ្លើង។ ២ ទេវតានោះមានរមូរតូចមួយដែលបើកស្រាប់នៅដៃ។ លោកដាក់ជើងស្ដាំលើសមុទ្រ តែដាក់ជើងឆ្វេងលើផែនដី ៣ ហើយលោកបន្លឺសំឡេងយ៉ាងខ្លាំង ដូចតោគ្រហឹម។ ពេលដែលលោកបន្លឺឡើង ផ្គរលាន់ទាំងប្រាំពីរក៏បន្លឺឡើងដែរ។
៤ នៅពេលដែលផ្គរលាន់ទាំងប្រាំពីរនិយាយ ខ្ញុំហៀបនឹងសរសេរ ប៉ុន្តែខ្ញុំឮសំឡេងបន្លឺចេញពីមេឃ* ថា៖ «ចូរបំបិទអ្វីៗដែលផ្គរលាន់ទាំងប្រាំពីរបាននិយាយ ដូចបិទដោយត្រា កុំសរសេរការទាំងនោះឡើយ»។ ៥ ហើយទេវតាដែលខ្ញុំឃើញឈរនៅសមុទ្រនិងផែនដីបានលើកដៃស្ដាំរបស់លោកទៅលើមេឃ ៦ រួចមក លោកស្បថដោយអាងលោកដែលរស់ជារៀងរហូត គឺលោកដែលបានបង្កើតមេឃនិងអ្វីៗលើមេឃ ផែនដីនិងអ្វីៗនៅផែនដី ហើយសមុទ្រនិងអ្វីៗក្នុងសមុទ្រ។ ទេវតានោះបានស្បថថា៖ «គ្រារង់ចាំបានផុតហើយ ៧ ប៉ុន្តែនៅគ្រាដែលទេវតាទីប្រាំពីរបន្លឺឡើង ពេលដែលគាត់ហៀបនឹងផ្លុំត្រែរបស់គាត់ អាថ៌កំបាំងដ៏ពិសិដ្ឋរបស់ព្រះនឹងត្រូវសម្រេច។ នោះជាដំណឹងល្អដែលលោកបានប្រកាសប្រាប់ដល់ពួកអ្នកប្រកាសទំនាយដែលជាខ្ញុំបម្រើរបស់លោក»។
៨ សំឡេងដែលខ្ញុំបានឮបន្លឺចេញពីស្ថានសួគ៌ក៏បន្លឺមកកាន់ខ្ញុំម្ដងទៀតថា៖ «ចូរទៅយករមូរដែលបើកស្រាប់ពីក្នុងដៃទេវតាដែលកំពុងឈរលើសមុទ្រនិងលើផែនដី»។ ៩ ខ្ញុំក៏ចេញទៅឯទេវតាហើយសុំលោកឲ្យរមូរតូចនោះមកខ្ញុំ។ ទេវតានោះប្រាប់ខ្ញុំថា៖ «ចូរយកទៅ ហើយបរិភោគចុះ។ រមូរនេះនឹងធ្វើឲ្យល្វីងក្នុងពោះរបស់អ្នក ប៉ុន្តែក្នុងមាត់របស់អ្នក រមូរនោះនឹងផ្អែមដូចទឹកឃ្មុំ»។ ១០ បន្ទាប់មក ខ្ញុំយករមូរតូចនោះពីដៃរបស់ទេវតា រួចក៏បរិភោគទៅ ហើយក្នុងមាត់ខ្ញុំ រមូរនោះគឺផ្អែមដូចទឹកឃ្មុំ ប៉ុន្តែពេលដែលខ្ញុំបានបរិភោគហើយ នោះបានធ្វើឲ្យពោះខ្ញុំល្វីង។ ១១ រួចខ្ញុំឮសំឡេងបន្លឺឡើងថា៖ «អ្នកត្រូវប្រកាសទំនាយម្ដងទៀត ស្តីអំពីជាតិសាសន៍ ប្រជាជាតិ ភាសា និងស្តេចជាច្រើន»។
១១ បន្ទាប់មក ខ្ញុំទទួលដើមត្រែងមួយដែលវែងដូចដំបង ហើយខ្ញុំបានត្រូវប្រាប់ថា៖ «ចូរក្រោកឡើងទៅវាស់បន្ទប់បរិសុទ្ធនៅវិហាររបស់ព្រះ ហើយវាស់ទីបូជា និងពួកអ្នកដែលកំពុងគោរពបូជានៅទីនោះ។ ២ ប៉ុន្តែចំណែកទីធ្លានៅខាងក្រៅបន្ទប់បរិសុទ្ធនៅវិហារ អ្នកមិនត្រូវវាស់ទេ* ពីព្រោះទីនោះបានត្រូវប្រគល់ដល់ប្រជាជាតិនានា ហើយពួកគេនឹងជាន់ឈ្លីក្រុងបរិសុទ្ធអស់សែសិបពីរខែ។ ៣ ខ្ញុំក៏នឹងចាត់សាក្សីទាំងពីរនាក់របស់ខ្ញុំឲ្យទៅប្រកាសទំនាយអស់រយៈពេលមួយពាន់ពីររយហុកសិបថ្ងៃដោយស្លៀកបាវ»។ ៤ អ្នកទាំងនោះត្រូវតំណាងដោយដើមអូលីវពីរដើម និងជើងចង្កៀងពីរដែលឈរនៅមុខម្ចាស់នៃផែនដី។
៥ ប្រសិនបើអ្នកណាចង់ធ្វើបាបសាក្សីទាំងនោះ ភ្លើងនឹងចេញពីមាត់ពួកគេទៅបញ្ឆេះពួកសត្រូវទាំងនោះ។ ប្រសិនបើអ្នកណាចង់ធ្វើបាបពួកគេ អ្នកនោះត្រូវស្លាប់តាមរបៀបនេះ។ ៦ សាក្សីទាំងនោះមានអំណាចធ្វើឲ្យមេឃរាំង មិនឲ្យភ្លៀងធ្លាក់មកក្នុងគ្រាដែលពួកគេប្រកាសទំនាយ ហើយពួកគេមានអំណាចធ្វើឲ្យទឹកក្លាយទៅជាឈាម ហើយមានអំណាចប្រើសេចក្ដីវេទនាសព្វបែបយ៉ាងដើម្បីវាយដំផែនដីតាមតែពួកគេចង់។
៧ នៅពេលដែលពួកគេបានបញ្ចប់កិច្ចការជាសាក្សីហើយ នោះសត្វសាហាវដែលឡើងមកពីទីជ្រៅបំផុតនឹងច្បាំងជាមួយនឹងពួកគេ ហើយឈ្នះ រួចក៏សម្លាប់ពួកគេ។ ៨ ឯសពរបស់ពួកគេនឹងនៅលើផ្លូវធំនៃក្រុងដ៏ខ្លាំងក្លាដែលត្រូវហៅថាសូដុមនិងអេស៊ីបក្នុងន័យធៀប ជាកន្លែងដែលម្ចាស់របស់ពួកគេបានត្រូវសម្លាប់ដែរ។ ៩ បណ្ដាជនពីជាតិសាសន៍នានា កុលសម្ព័ន្ធនានា ភាសាផ្សេងៗ និងប្រជាជាតិផ្សេងៗនឹងមើលសពរបស់ពួកគេអស់បីថ្ងៃកន្លះ ហើយមិនឲ្យគេបញ្ចុះសពពួកគេក្នុងផ្នូរឡើយ។ ១០ ឯមនុស្សដែលរស់នៅផែនដីនឹងរីករាយហើយអរសប្បាយដោយសារសាក្សីទាំងនោះបានស្លាប់ ក៏នឹងឲ្យអំណោយគ្នាទៅវិញទៅមក ពីព្រោះអ្នកប្រកាសទំនាយពីររូបនោះធ្លាប់ធ្វើទារុណកម្មដល់មនុស្សនៅផែនដី។
១១ បន្ទាប់ពីបីថ្ងៃកន្លះ កម្លាំងជីវិត* ពីព្រះបានចូលក្នុងពួកគេ ហើយពួកគេក៏ក្រោកឈរឡើង រួចអស់អ្នកដែលឃើញពួកគេតាំងភ័យខ្លាចយ៉ាងខ្លាំង។ ១២ រួចពួកគេឮសំឡេងមួយបន្លឺយ៉ាងខ្លាំងចេញពីលើមេឃថា៖ «ចូរឡើងមកទីនេះ»។ ពួកគេក៏ឡើងទៅលើមេឃក្នុងពពក ហើយពួកសត្រូវរបស់ពួកគេក៏បានឃើញ។ ១៣ នៅម៉ោងនោះឯង ផែនដីបានរញ្ជួយយ៉ាងខ្លាំង មួយភាគដប់នៃក្រុងនោះបានរលំ ហើយមនុស្សប្រាំពីរពាន់នាក់បានត្រូវសម្លាប់ដោយការរញ្ជួយនោះ ឯអ្នកទាំងប៉ុន្មានទៀតតាំងភ័យខ្លាច ក៏បានសរសើរតម្កើងព្រះ។
១៤ សេចក្ដីវេទនាទីពីរបានកន្លងផុតទៅហើយ។ មើល! សេចក្ដីវេទនាទីបីកំពុងមកដល់យ៉ាងលឿន។
១៥ ពេលទេវតាទីប្រាំពីរផ្លុំត្រែរបស់គាត់ មានសំឡេងមួយចំនួនបន្លឺឡើងយ៉ាងខ្លាំងនៅលើមេឃ* ថា៖ «រាជាណាចក្រនៃពិភពលោកនេះបានក្លាយទៅជារាជាណាចក្រនៃម្ចាស់របស់យើងនិងគ្រិស្តរបស់លោក ហើយលោកនឹងគ្រប់គ្រងជាស្តេចជារៀងរហូត»។
១៦ ហើយពួកអ្នកចាស់ទុំម្ភៃបួននាក់ដែលកំពុងអង្គុយលើបល្ល័ង្កនៅមុខព្រះ បានក្រាបក្បាលគោរពប្រណិប័តន៍ព្រះ ១៧ ដោយជម្រាបថា៖ «ព្រះយេហូវ៉ាជាព្រះ ដែលមានឫទ្ធានុភាពខ្លាំងក្លាបំផុត និងជាលោកដែលមានជីវិតរស់នៅកាលពីមុន ដែលមានជីវិតរស់នៅឥឡូវនេះអើយ យើងសូមអរគុណលោក ពីព្រោះលោកបានយកឫទ្ធានុភាពមហិមារបស់លោក ហើយចាប់ផ្ដើមគ្រប់គ្រងជាស្តេច។ ១៨ ប៉ុន្តែប្រជាជាតិនានាបានខឹង លោកក៏បានសម្ដែងកំហឹងរបស់លោកដែរ ហើយពេលកំណត់បានមកដល់សម្រាប់វិនិច្ឆ័យមនុស្សស្លាប់និងឲ្យរង្វាន់ដល់ពួកអ្នកប្រកាសទំនាយ ដែលជាខ្ញុំបម្រើរបស់លោក និងពួកអ្នកបរិសុទ្ធ ព្រមទាំងពួកអ្នកដែលកោតខ្លាចនាមរបស់លោក រួមទាំងអ្នកធំនិងអ្នកតូច ហើយសម្រាប់បំផ្លាញពួកអ្នកដែលកំពុងបង្ខូចផែនដី»។
១៩ រួចមក បន្ទប់បរិសុទ្ធនៅវិហាររបស់ព្រះនៅស្ថានសួគ៌បានត្រូវបើកឡើង ហើយហឹបនៃកិច្ចព្រមព្រៀងរបស់លោកបានត្រូវឃើញក្នុងបន្ទប់បរិសុទ្ធនៅវិហាររបស់លោក។ ហើយមានផ្លេកបន្ទោរ សំឡេងនិយាយ ផ្គរលាន់ ការរញ្ជួយផែនដី ហើយដុំព្រិលធ្លាក់មកយ៉ាងខ្លាំង។
១២ និមិត្តរូបដ៏សំខាន់មួយបានលេចមកនៅស្ថានសួគ៌ គឺស្ត្រីមួយរូបដណ្ដប់ថ្ងៃ ហើយខែនៅខាងក្រោមជើងរបស់នាង ឯក្បាលនាងមានមកុដធ្វើពីផ្កាយដប់ពីរ ២ នាងមានផ្ទៃពោះ ហើយក៏ស្រែកឡើងដោយឈឺចាប់និងដោយកើតទុក្ខយ៉ាងខ្លាំងពេលដែលសម្រាលកូន។
៣ មាននិមិត្តរូបមួយទៀតលេចមកនៅស្ថានសួគ៌ ហើយមើល! នាគដ៏ធំមួយដែលមានសម្បុរក្រហមដូចភ្លើង ហើយមានក្បាលប្រាំពីរនិងស្នែងដប់ ហើយក្បាលរបស់វាមានមកុដប្រាំពីរ ៤ កន្ទុយរបស់វាទាញមួយភាគបីនៃផ្កាយលើមេឃ ហើយបោះទៅផែនដី។ នាគនោះបានឈរនៅមុខស្ត្រីដែលហៀបនឹងសម្រាលកូន ដើម្បីវាអាចលេបត្របាក់កូនរបស់នាង កាលណានាងសម្រាលកូនហើយ។
៥ បន្ទាប់មក នាងសម្រាលកូនប្រុសមួយ ដែលជាបុរសដែលត្រូវឃ្វាលប្រជាជាតិទាំងឡាយដោយដំបងដែក។ ឯកូនរបស់នាងបានត្រូវយកយ៉ាងលឿនទៅឯព្រះនិងបល្ល័ង្ករបស់លោក។ ៦ រួចស្ត្រីនោះបានរត់ទៅតំបន់ស្ងាត់ជ្រងំ។ នៅទីនោះមានកន្លែងដែលព្រះបានរៀបចំសម្រាប់នាង ដើម្បីនាងអាចទទួលអាហារបរិភោគនៅទីនោះ អស់មួយពាន់ពីររយហុកសិបថ្ងៃ។
៧ សង្គ្រាមបានផ្ទុះឡើងនៅស្ថានសួគ៌៖ មីកែលនិងបណ្ដាទេវតារបស់លោកបានច្បាំងនឹងនាគនិងបណ្ដាទេវតារបស់វា ៨ ប៉ុន្តែវាមិនបានឈ្នះទេ ហើយមិនមានកន្លែងសម្រាប់ពួកវានៅស្ថានសួគ៌ទៀតឡើយ។ ៩ ដូច្នេះ នាគដ៏ធំបានត្រូវបោះទម្លាក់ គឺពស់ដំបូងបង្អស់ ជាអ្នកដែលត្រូវហៅថាមេកំណាចនិងសាថាន* និងជាអ្នកដែលកំពុងបំភាន់ពិភពលោកទាំងមូល វាបានត្រូវបោះទម្លាក់ទៅផែនដី ហើយបណ្ដាទេវតារបស់វាក៏បានត្រូវបោះទម្លាក់ទៅជាមួយនឹងវាដែរ។ ១០ រួចមក ខ្ញុំឮសំឡេងមួយបន្លឺឡើងយ៉ាងខ្លាំងពីលើមេឃ* ថា៖
«មើល! ព្រះបាននាំមកនូវសេចក្ដីសង្គ្រោះ! ឫទ្ធានុភាពរបស់លោកបានទទួលជ័យជម្នះ! រាជាណាចក្ររបស់លោកបានត្រូវស្ថាបនាឡើង! គ្រិស្តរបស់លោកចាប់ផ្ដើមកាន់អំណាចហើយ! ពីព្រោះអ្នកដែលចោទប្រកាន់បងប្អូនរបស់យើងបានត្រូវបោះទម្លាក់ទៅ គឺជាអ្នកដែលចោទប្រកាន់ពួកគេទាំងយប់ទាំងថ្ងៃ! ១១ ហើយពួកគេបានឈ្នះអ្នកនោះ ដោយសារឈាមរបស់កូនចៀម និងអ្វីដែលពួកគេប្រកាស* ហើយទោះជាពួកគេប្រឈមមុខនឹងសេចក្ដីស្លាប់ក៏ដោយ ក៏ពួកគេមិនបានស្រឡាញ់ជីវិត* ខ្លួនឡើយ។ ១២ ហេតុនេះ ស្ថានសួគ៌និងអស់អ្នកដែលអាស្រ័យនៅស្ថានសួគ៌អើយ ចូររីករាយចុះ តែវេទនាដល់ផែនដី និងសមុទ្រ ពីព្រោះមេកំណាចបានចុះទៅឯអ្នករាល់គ្នាទាំងមានកំហឹងយ៉ាងខ្លាំង ដោយដឹងថាវាមានពេលតែបន្ដិចបន្តួច»។
១៣ ពេលដែលនាគឃើញថាវាបានត្រូវបោះទម្លាក់ទៅផែនដី នោះវាបៀតបៀនស្ត្រីនោះដែលបានសម្រាលកូនប្រុស។ ១៤ ប៉ុន្តែស្ត្រីនោះបានទទួលស្លាបដ៏ធំពីរ ពីឥន្ទ្រី ដើម្បីឲ្យនាងហោះទៅតំបន់ស្ងាត់ជ្រងំ ហើយនៅទីនោះនាងនឹងទទួលអាហារបរិភោគមួយគ្រា ពីរគ្រា និងកន្លះគ្រា នៅឆ្ងាយពីមុខរបស់ពស់។
១៥ ពស់នោះបញ្ចេញទឹកច្រើនដូចទន្លេចេញពីមាត់វាឲ្យហូរតាមស្ត្រីនោះ ដើម្បីធ្វើឲ្យនាងលង់ទឹកទន្លេនោះ។ ១៦ ប៉ុន្តែផែនដីមកជួយនាង ហើយផែនដីហាមាត់លេបទឹកទន្លេដែលនាគនោះបានបញ្ចេញពីមាត់វា។ ១៧ រួចនាគនោះចាប់ផ្ដើមខឹងនឹងស្ត្រីនោះ ហើយចេញទៅច្បាំងនឹងពួកអ្នកដែលនៅសល់ពីពូជរបស់នាង ជាអ្នកដែលកាន់តាមបញ្ញត្ដិរបស់ព្រះ និងជាអ្នកដែលមានកិច្ចការធ្វើជាសាក្សីបញ្ជាក់អំពីលោកយេស៊ូ។
១៣ បន្ទាប់មកវាទៅឈរលើខ្សាច់នៅឆ្នេរសមុទ្រ។
រួចខ្ញុំឃើញសត្វសាហាវមួយឡើងមកពីសមុទ្រ។ សត្វនោះមានស្នែងដប់ ក្បាលប្រាំពីរ ហើយស្នែងរបស់វាមានមកុដដប់ ប៉ុន្តែនៅលើក្បាលវាមានឈ្មោះផ្សេងៗដែលប្រមាថព្រះ។ ២ ឯសត្វសាហាវដែលខ្ញុំឃើញគឺដូចខ្លារខិន តែជើងរបស់វាដូចខ្លាឃ្មុំ ហើយមាត់របស់វាគឺដូចមាត់តោ។ រួចនាគឲ្យកម្លាំងខ្លាំងក្លា បល្ល័ង្ក និងអំណាចយ៉ាងធំដល់សត្វនោះ។
៣ ខ្ញុំឃើញក្បាលមួយរបស់សត្វនោះ មើលទៅដូចជាបានត្រូវកាប់ឲ្យរបួសដល់ស្លាប់ ប៉ុន្តែរបួសរបស់វាបានជាសះស្បើយ ហើយផែនដីទាំងមូលបានទៅតាមសត្វសាហាវដោយស្ងើចសរសើរ។ ៤ ពួកគេក៏គោរពប្រណិប័តន៍នាគនោះ ពីព្រោះវាជាអ្នកឲ្យអំណាចដល់សត្វសាហាវនោះ ហើយពួកគេបានគោរពប្រណិប័តន៍សត្វសាហាវនោះដោយពាក្យថា៖ «តើអ្នកណាដូចសត្វសាហាវនោះ ហើយតើអ្នកណាអាចច្បាំងនឹងសត្វនោះបាន?»។ ៥ វាបានទទួលមាត់មួយដែលនិយាយអួតនិងនិយាយប្រមាថព្រះ ហើយវាក៏បានទទួលអំណាចធ្វើសកម្មភាពអស់សែសិបពីរខែ។ ៦ វាហាមាត់ប្រមាថព្រះ និងប្រមាថនាម ព្រមទាំងលំនៅរបស់លោក ពោលគឺអស់អ្នកដែលអាស្រ័យនៅស្ថានសួគ៌។ ៧ វាបានទទួលការអនុញ្ញាតឲ្យច្បាំងឈ្នះពួកអ្នកបរិសុទ្ធ ក៏បានទទួលអំណាចលើគ្រប់កុលសម្ព័ន្ធ គ្រប់ជាតិសាសន៍ គ្រប់ភាសា និងគ្រប់ប្រជាជាតិ។ ៨ អស់អ្នកដែលអាស្រ័យនៅផែនដីនឹងគោរពប្រណិប័តន៍វា។ តាំងពីកំណើតពិភពលោកមក ឈ្មោះរបស់អ្នកទាំងនោះមិននៅក្នុងបញ្ជីជីវិតរបស់កូនចៀមដែលបានត្រូវសម្លាប់ទេ។
៩ ចូរឲ្យអ្នកណាដែលមានត្រចៀកស្ដាប់ចុះ។ ១០ ប្រសិនបើអ្នកណាត្រូវក្លាយទៅជាឈ្លើយ អ្នកនោះនឹងត្រូវនាំចេញទៅជាឈ្លើយ។ ប្រសិនបើអ្នកណានឹងសម្លាប់ដោយដាវ អ្នកនោះនឹងត្រូវសម្លាប់ដោយដាវ។ នេះតម្រូវឲ្យពួកអ្នកបរិសុទ្ធចេះស៊ូទ្រាំនិងមានជំនឿ។
១១ ខ្ញុំឃើញសត្វសាហាវមួយទៀតឡើងមកពីផែនដី ហើយវាមានស្នែងពីរដូចស្នែងចៀម ប៉ុន្តែវាចាប់ផ្ដើមនិយាយដូចនាគ។ ១២ វាប្រើអំណាចទាំងអស់របស់សត្វសាហាវទីមួយ ក្រោមក្រសែភ្នែកសត្វនោះ។ វាធ្វើឲ្យផែនដីនិងអស់អ្នកដែលរស់នៅផែនដីគោរពប្រណិប័តន៍សត្វសាហាវទីមួយដែលបានត្រូវរបួសដល់ស្លាប់តែបានជាសះស្បើយ។ ១៣ ហើយវាធ្វើសញ្ញាសម្គាល់អស្ចារ្យជាច្រើន រហូតដល់ធ្វើឲ្យភ្លើងធ្លាក់ពីលើមេឃមកផែនដី ក្រោមក្រសែភ្នែករបស់មនុស្សទាំងឡាយ។
១៤ វាបំភាន់ពួកអ្នកដែលអាស្រ័យនៅផែនដី ដោយសារសញ្ញាសម្គាល់ដែលវាបានត្រូវអនុញ្ញាតឲ្យធ្វើក្រោមក្រសែភ្នែកសត្វសាហាវនោះ កាលដែលវាប្រាប់ពួកអ្នកដែលអាស្រ័យនៅផែនដីឲ្យធ្វើរូបសត្វសាហាវនោះដែលបានត្រូវរបួសដោយដាវតែបានជាឡើងវិញ។ ១៥ ហើយវាបានត្រូវអនុញ្ញាតឲ្យផ្ដល់ដង្ហើមជីវិតឲ្យរូបសត្វសាហាវនោះ ដើម្បីឲ្យរូបនោះនិយាយនិងធ្វើឲ្យអស់អ្នកដែលមិនគោរពប្រណិប័តន៍រូបសត្វសាហាវនោះទទួលការប្រហារជីវិត។
១៦ វាបង្ខំមនុស្សទាំងអស់ អ្នកតូចនិងអ្នកធំ អ្នកមាននិងអ្នកក្រ អ្នកមានសេរីភាពនិងពួកខ្ញុំបម្រើ ដើម្បីឲ្យទទួលសញ្ញាមួយនៅលើដៃស្ដាំឬនៅលើថ្ងាស ១៧ ហើយដើម្បីកុំឲ្យអ្នកណាអាចទិញឬលក់ ក្រៅពីអ្នកដែលមានសញ្ញានោះ មានឈ្មោះរបស់សត្វសាហាវ ឬមានលេខនៃឈ្មោះរបស់វា។ ១៨ ចំណុចនេះតម្រូវឲ្យមានប្រាជ្ញា៖ ចូរឲ្យអ្នកដែលមានសមត្ថភាពរិះគិត គណនាលេខនៃសត្វសាហាវនោះ ព្រោះលេខនោះជាលេខរបស់មនុស្ស។ លេខរបស់វាគឺប្រាំមួយរយហុកសិបប្រាំមួយ។
១៤ ហើយមើល! ខ្ញុំឃើញកូនចៀមកំពុងឈរនៅលើភ្នំស៊ីយ៉ូន ហើយមានមួយសែនបួនម៉ឺនបួនពាន់នាក់ឈរជាមួយនឹងលោកដែរ ហើយនាមរបស់លោកនិងនាមរបស់បិតាលោកបានត្រូវសរសេរនៅលើថ្ងាសពួកគេ។ ២ រួចមក ខ្ញុំឮសំឡេងមួយបន្លឺចេញពីលើមេឃ* ដូចសន្ធឹកទឹកហូរ និងដូចសំឡេងផ្គរលាន់យ៉ាងខ្លាំង ឯសំឡេងដែលខ្ញុំឮ គឺដូចសំឡេងអ្នកចម្រៀងដែលកំពុងច្រៀងផងដេញពិណបន្ទរតាមផង។ ៣ ពួកគេកំពុងច្រៀងចម្រៀងដែលហាក់ដូចជាចម្រៀងថ្មី នៅមុខបល្ល័ង្ក នៅមុខចេរូប៊ីនទាំងបួន និងនៅមុខពួកអ្នកចាស់ទុំ ហើយគ្មានអ្នកណាអាចច្រៀងចម្រៀងនោះបានស្ទាត់ឡើយ ក្រៅពីមួយសែនបួនម៉ឺនបួនពាន់នាក់ដែលបានត្រូវទិញពីផែនដី។ ៤ អ្នកទាំងនោះជាអ្នកដែលបានរក្សាខ្លួនឲ្យស្អាតបរិសុទ្ធ ដោយមិនរួមដំណេកជាមួយនឹងស្ត្រីឡើយ តាមពិត ពួកគេគឺដូចក្រមុំបរិសុទ្ធ។ ពួកគេដើរតាមកូនចៀមជាប់ ទោះជាលោកទៅកន្លែងណាក៏ដោយ។ ពួកគេបានត្រូវទិញពីចំណោមមនុស្សជាតិ ទុកជាផលដំបូងជូនព្រះនិងកូនចៀម ៥ គ្មានពាក្យភូតភរណាក្នុងមាត់ពួកគេឡើយ ពួកគេឥតខ្ចោះ។
៦ រួចមក ខ្ញុំឃើញទេវតាមួយទៀតដែលកំពុងហោះនៅកណ្ដាលមេឃ ហើយគាត់មានដំណឹងល្អដែលស្ថិតស្ថេរជានិរន្តរ៍ ជាដំណឹងដែលនាំឲ្យរីករាយសម្រាប់ប្រកាសប្រាប់ដល់អស់អ្នកដែលអាស្រ័យនៅផែនដី និងដល់គ្រប់ប្រជាជាតិ គ្រប់កុលសម្ព័ន្ធ គ្រប់ភាសា និងគ្រប់ជាតិសាសន៍ ៧ គាត់បន្លឺសំឡេងយ៉ាងខ្លាំងថា៖ «ចូរកោតខ្លាចព្រះ ហើយសរសើរតម្កើងលោក ពីព្រោះគ្រាដែលលោកនឹងធ្វើការវិនិច្ឆ័យបានមកដល់ហើយ ដូច្នេះ ចូរគោរពប្រណិប័តន៍លោកដែលបានបង្កើតមេឃនិងផែនដី សមុទ្រ និងរន្ធទឹកទាំងឡាយ»។
៨ ទេវតាមួយទៀតបានមកតាមក្រោយ គឺទេវតាទីពីរ ហើយប្រាប់ថា៖ «ក្រុងនោះបានរលំហើយ! បាប៊ីឡូនដ៏ខ្លាំងក្លាបានរលំហើយ! គឺក្រុងដែលបានធ្វើឲ្យប្រជាជាតិទាំងអស់ផឹកស្រានៃកំហឹង នៃអំពើប្រាសចាកសីលធម៌ខាងផ្លូវភេទរបស់ក្រុងនោះ!»។
៩ ហើយមានទេវតាមួយទៀតមកតាមក្រោយ គឺទេវតាទីបី។ ទេវតានោះបន្លឺសំឡេងយ៉ាងខ្លាំងថា៖ «ប្រសិនបើអ្នកណាគោរពប្រណិប័តន៍សត្វសាហាវនិងរូបរបស់វា ព្រមទាំងទទួលសញ្ញានៅលើថ្ងាសឬនៅលើដៃ ១០ អ្នកនោះនឹងផឹកស្រានៃកំហឹងរបស់ព្រះដែលនឹងត្រូវចាក់ដោយឥតលាយទៅក្នុងពែងនៃសេចក្ដីក្រោធរបស់លោក ហើយអ្នកនោះនឹងទទួលទារុណកម្មដោយភ្លើងនិងស្ពាន់ធ័រ ក្រោមក្រសែភ្នែករបស់បណ្ដាទេវតាបរិសុទ្ធនិងកូនចៀម។ ១១ ឯផ្សែងដែលចេញពីទារុណកម្មរបស់អ្នកទាំងនោះហុយឡើងជានិរន្តរ៍ ហើយពួកគេទទួលទារុណកម្មទាំងយប់ទាំងថ្ងៃឥតស្រាកស្រាន្ត គឺអស់អ្នកដែលគោរពប្រណិប័តន៍សត្វសាហាវនិងរូបរបស់វា និងអ្នកណាដែលទទួលសញ្ញាសម្គាល់ពីឈ្មោះរបស់វា។ ១២ ការនោះតម្រូវឲ្យពួកអ្នកបរិសុទ្ធចេះស៊ូទ្រាំ គឺអ្នកដែលកាន់តាមបញ្ញត្ដិរបស់ព្រះ និងកាន់ខ្ជាប់តាមជំនឿលោកយេស៊ូ»។
១៣ បន្ទាប់មក ខ្ញុំឮសំឡេងមួយបន្លឺចេញពីលើមេឃថា៖ «ចូរសរសេរដូចតទៅនេះថា៖ ចាប់ពីពេលនេះទៅ អ្នកណាដែលស្លាប់ដោយរួបរួមជាមួយនឹងលោកម្ចាស់ អ្នកនោះមានសុភមង្គលហើយ។ សកម្មពល* ប្រាប់ថា ចូរឲ្យពួកគេសម្រាកពីការនឿយហត់របស់ពួកគេ ពីព្រោះអ្វីៗដែលពួកគេបានធ្វើក៏ទៅជាមួយនឹងពួកគេដែរ»។
១៤ ហើយមើល! ខ្ញុំឃើញពពកសមួយ ហើយនៅលើពពកនោះមានអ្នកអង្គុយដែលមើលទៅដូចជាកូនមនុស្ស ហើយលោកមានមកុដមាសលើក្បាលនិងកាន់កណ្ដៀវមុតមួយនៅដៃ។
១៥ រួចមក ទេវតាមួយទៀតបានចេញពីបន្ទប់បរិសុទ្ធនៅវិហារ ដោយបន្លឺសំឡេងយ៉ាងខ្លាំងប្រាប់លោកដែលអង្គុយលើពពកថា៖ «ចូរលូកដៃដែលកាន់កណ្ដៀវទៅច្រូតចុះ ពីព្រោះគ្រាដែលត្រូវច្រូតបានមកដល់ ដោយសារចម្រូតនៅផែនដីគឺទុំអស់ហើយ»។ ១៦ លោកដែលអង្គុយលើពពកបានលូកដៃដែលកាន់កណ្ដៀវទៅច្រូតចម្រូតនៅផែនដី។
១៧ ទេវតាមួយទៀតក៏ចេញពីបន្ទប់បរិសុទ្ធនៅវិហារដែលនៅស្ថានសួគ៌ ដោយកាន់កណ្ដៀវមុតមួយដែរ។
១៨ រួចទេវតាមួយទៀតបានចេញពីទីបូជា ហើយគាត់មានអំណាចលើភ្លើង។ ទេវតានោះបន្លឺសំឡេងយ៉ាងខ្លាំងប្រាប់អ្នកដែលកាន់កណ្ដៀវមុតនោះថា៖ «ចូរលូកដៃដែលកាន់កណ្ដៀវមុតនោះទៅច្រូតចង្កោមទំពាំងបាយជូរពីវល្លិទំពាំងបាយជូរនៃផែនដីចុះ ពីព្រោះទំពាំងបាយជូរទាំងនោះទុំហើយ»។ ១៩ ហើយទេវតានោះក៏លូកដៃដែលកាន់កណ្ដៀវទៅផែនដីច្រូតវល្លិទំពាំងបាយជូរនៃផែនដី រួចបោះទៅក្នុងអាងធំសម្រាប់ជាន់ផ្លែយកទឹកធ្វើស្រា ដែលជាតំណាងកំហឹងរបស់ព្រះ។ ២០ ហើយទំពាំងបាយជូរទាំងនោះបានត្រូវជាន់នៅខាងក្រៅក្រុង ហើយឈាមបានចេញពីអាងនោះឡើងខ្ពស់ដល់បង្ហៀរសេះ ចម្ងាយមួយពាន់ប្រាំមួយរយស្ដាដ។*
១៥ ខ្ញុំឃើញនិមិត្តរូបមួយទៀតនៅស្ថានសួគ៌ ជានិមិត្តរូបដ៏អស្ចារ្យនិងប្រសើរក្រៃលែង គឺទេវតាប្រាំពីរដែលមានសេចក្ដីវេទនាប្រាំពីរមកជាមួយ។ នេះជាសេចក្ដីវេទនាចុងក្រោយ ពីព្រោះកំហឹងរបស់ព្រះនឹងត្រូវសម្រេចរួចរាល់អស់តាមរយៈសេចក្ដីវេទនាទាំងនោះ។
២ ខ្ញុំក៏ឃើញអ្វីដែលមើលទៅដូចជាសមុទ្រដែលដូចកញ្ចក់លាយជាមួយនឹងភ្លើង ហើយអស់អ្នកដែលបានឈ្នះសត្វសាហាវនិងរូបវា ព្រមទាំងលេខនៃឈ្មោះរបស់វាកំពុងឈរនៅក្បែរសមុទ្រដែលដូចកញ្ចក់ ហើយពួកគេកំពុងកាន់ពិណរបស់ព្រះ។ ៣ ពួកគេកំពុងច្រៀងចម្រៀងរបស់ម៉ូសេដែលជាខ្ញុំបម្រើរបស់ព្រះ និងចម្រៀងរបស់កូនចៀមថា៖
«ព្រះយេហូវ៉ាដែលជាព្រះមានឫទ្ធានុភាពខ្លាំងក្លាបំផុតអើយ អ្វីៗដែលលោកបានធ្វើគឺអស្ចារ្យ ហើយប្រសើរក្រៃលែង។ ស្តេចដែលរស់ជារៀងរហូតអើយ ផ្លូវរបស់លោកគឺសុចរិតនិងគួរឲ្យទុកចិត្ត។ ៤ ព្រះយេហូវ៉ាអើយ តើអ្នកណានឹងមិនកោតខ្លាចលោក ហើយមិនសរសើរតម្កើងនាមរបស់លោក? ព្រោះមានតែលោកប៉ុណ្ណោះដែលមានភក្ដីភាព។ គ្រប់ប្រជាជាតិនឹងមកគោរពប្រណិប័តន៍នៅមុខលោក ពីព្រោះបង្គាប់ដ៏សុចរិតយុត្ដិធម៌របស់លោកបានត្រូវបង្ហាញឲ្យឃើញជាក់ស្តែង»។
៥ បន្ទាប់ពីការទាំងនោះ ខ្ញុំឃើញថា ត្រសាលនៃសក្ខីភាពបានត្រូវបើកឡើងនៅស្ថានសួគ៌ ៦ ហើយទេវតាប្រាំពីររូបដែលមានសេចក្ដីវេទនាប្រាំពីរបានចេញមកពីបន្ទប់បរិសុទ្ធ ដោយស្លៀកពាក់ក្រណាត់សាច់ល្អដែលស្អាតហើយភ្លឺ ក៏មានក្រវាត់មាសនៅដើមទ្រូង។ ៧ ចេរូប៊ីនមួយពីចំណោមចេរូប៊ីនទាំងបួន បានឲ្យចានគោមមាសប្រាំពីរដល់ទេវតាទាំងប្រាំពីរនោះ។ ចានគោមទាំងនោះគឺពេញទៅដោយកំហឹងរបស់ព្រះដែលរស់នៅជារៀងរហូត។ ៨ រួចមក បន្ទប់បរិសុទ្ធបានពេញទៅដោយផ្សែងដោយសារសិរីរុងរឿងរបស់ព្រះ និងដោយសារឫទ្ធានុភាពរបស់លោក ហើយគ្មានអ្នកណាអាចចូលក្នុងបន្ទប់បរិសុទ្ធ រហូតដល់សេចក្ដីវេទនាទាំងប្រាំពីររបស់ទេវតាទាំងប្រាំពីរបានចប់ហើយ។
១៦ ខ្ញុំឮសំឡេងមួយបន្លឺឡើងយ៉ាងខ្លាំងចេញពីបន្ទប់បរិសុទ្ធ។ សំឡេងនោះបន្លឺទៅកាន់ទេវតាទាំងប្រាំពីរនោះថា៖ «ចូរទៅចាក់អ្វីដែលនៅក្នុងចានគោមទាំងប្រាំពីរនៃកំហឹងរបស់ព្រះទៅលើផែនដី»។
២ ទេវតាទីមួយក៏ទៅ ហើយចាក់អ្វីដែលនៅក្នុងចានគោមរបស់គាត់ទៅលើផែនដី។ រួចមនុស្សដែលមានសញ្ញានៃសត្វសាហាវ ហើយគោរពប្រណិប័តន៍សត្វនោះបានកើតដំបៅរលួយដែលធ្វើទុក្ខណាស់។
៣ ទេវតាទីពីរចាក់អ្វីដែលនៅក្នុងចានគោមរបស់គាត់ទៅលើសមុទ្រ។ ហើយសមុទ្របានក្លាយទៅជាឈាមដូចឈាមរបស់មនុស្សស្លាប់ ហើយអ្វីៗ* ទាំងអស់ក្នុងសមុទ្របានស្លាប់។
៤ ទេវតាទីបីចាក់អ្វីដែលនៅក្នុងចានគោមរបស់គាត់ទៅលើទន្លេនិងរន្ធទឹកនានា ហើយទឹកទាំងអស់នោះបានក្លាយទៅជាឈាម។ ៥ ខ្ញុំក៏ឮទេវតាដែលមានអំណាចលើទឹកជម្រាបថា៖ «លោកអើយ ជាអ្នកដែលមានជីវិតរស់នៅកាលពីមុន ដែលមានជីវិតរស់នៅឥឡូវនេះ និងជាអ្នកដែលមានភក្ដីភាព លោកគឺសុចរិត ពីព្រោះលោកបានវិនិច្ឆ័យសេចក្ដីដូច្នេះ ៦ ដោយសារពួកគេបានបង្ហូរឈាមរបស់ពួកអ្នកបរិសុទ្ធនិងពួកអ្នកប្រកាសទំនាយ នោះលោកបានឲ្យឈាមពួកគេផឹក។ ពួកគេសមនឹងទទួល»។ ៧ រួចមក ខ្ញុំឮទីបូជាជម្រាបថា៖ «មែនហើយ ព្រះយេហូវ៉ាដែលជាព្រះមានឫទ្ធានុភាពខ្លាំងក្លាបំផុត ការវិនិច្ឆ័យរបស់លោកគឺសុចរិតនិងគួរឲ្យទុកចិត្ត»។
៨ ទេវតាទីបួនចាក់អ្វីដែលនៅក្នុងចានគោមរបស់គាត់ទៅលើថ្ងៃ ហើយថ្ងៃបានត្រូវអនុញ្ញាតឲ្យរោលមនុស្សទាំងនោះដោយភ្លើង។ ៩ ហើយមនុស្សទាំងនោះបានត្រូវរោលដោយកម្ដៅក្ដៅក្រៃលែង ប៉ុន្តែពួកគេបាននិយាយប្រមាថនាមព្រះដែលមានអំណាចលើសេចក្ដីវេទនាទាំងនេះ ហើយពួកគេមិនបានប្រែចិត្ត រួចសរសើរតម្កើងលោកទេ។
១០ ទេវតាទីប្រាំបានចាក់អ្វីដែលនៅក្នុងចានគោមរបស់គាត់ទៅលើបល្ល័ង្ករបស់សត្វសាហាវ។ រួចរាជាណាចក្ររបស់វាបានក្លាយទៅជាងងឹត ហើយមនុស្សចាប់ផ្ដើមខាំអណ្ដាតរបស់ខ្លួនដោយសារការឈឺចាប់។ ១១ ប៉ុន្តែពួកគេបាននិយាយប្រមាថព្រះនៃស្ថានសួគ៌ដោយសារការឈឺចាប់និងដំបៅរលួយរបស់ពួកគេ ហើយពួកគេមិនបានប្រែចិត្តពីការប្រព្រឹត្តរបស់ពួកគេឡើយ។
១២ ទេវតាទីប្រាំមួយបានចាក់អ្វីដែលនៅក្នុងចានគោមរបស់គាត់ទៅលើទន្លេធំ គឺទន្លេអឺប្រាត ហើយទឹកទន្លេនោះបានរីងអស់ទៅ ដើម្បីបើកផ្លូវឲ្យស្តេចដែលមកពីទិសថ្ងៃរះ។
១៣ ហើយខ្ញុំឃើញបណ្ដាំ* ស្មោកគ្រោកបីដែលមើលទៅដូចជាកង្កែប ចេញពីមាត់នាគ ពីមាត់សត្វសាហាវ និងពីមាត់អ្នកប្រកាសទំនាយមិនពិត។ ១៤ តាមការពិត នោះជាបណ្ដាំពីពួកវិញ្ញាណកំណាច ហើយបណ្ដាំទាំងនោះចេញទៅឯស្តេចទាំងឡាយនៅគ្រប់ទីអាស្រ័យនៅផែនដី ដោយធ្វើសញ្ញាសម្គាល់ ដើម្បីប្រមូលស្តេចទាំងនោះសម្រាប់សង្គ្រាមដែលនឹងកើតឡើងនៅថ្ងៃដ៏ធំរបស់ព្រះដែលមានឫទ្ធានុភាពខ្លាំងក្លាបំផុត។
១៥ «មើល! ខ្ញុំនឹងមកដូចចោរ។ អ្នកណាដែលមិនដេកលក់ហើយដែលមិនបាត់សម្លៀកបំពាក់ក្រៅរបស់ខ្លួន អ្នកនោះមានសុភមង្គល ហើយនឹងមិនដើរដោយគ្មានសម្លៀកបំពាក់* ឲ្យមនុស្សឃើញការអាម៉ាស់មុខរបស់ខ្លួន»។
១៦ ហើយពួកគេបានប្រមូលស្តេចទាំងនោះទៅឯកន្លែងដែលភាសាហេប្រឺហៅថាហាម៉ាគេដូន។
១៧ ទេវតាទីប្រាំពីរបានចាក់អ្វីដែលនៅក្នុងចានគោមរបស់គាត់ទៅលើអាកាស។ រួចមក ខ្ញុំឮសំឡេងមួយបន្លឺឡើងយ៉ាងខ្លាំងចេញពីបន្ទប់បរិសុទ្ធ ពីបល្ល័ង្កថា៖ «អ្វីៗបានចប់សព្វគ្រប់ហើយ!»។ ១៨ បន្ទាប់មក មានផ្លេកបន្ទោរ សំឡេងនិយាយ ផ្គរលាន់ ហើយមានការរញ្ជួយផែនដីយ៉ាងខ្លាំង។ ចាប់តាំងពីកើតមានមនុស្សនៅលើផែនដី មិនដែលមានការរញ្ជួយដ៏ធំនិងខ្លាំងដូច្នេះទេ។ ១៩ ហើយក្រុងដ៏ខ្លាំងក្លាបានបែកជាបី ឯក្រុងរបស់ប្រជាជាតិនានាបានរលំ ហើយព្រះបាននឹកឃើញបាប៊ីឡូនដ៏ខ្លាំងក្លា ព្រមទាំងឲ្យពែងដែលមានស្រាទំពាំងបាយជូរនៃសេចក្ដីក្រោធរបស់លោកដល់ក្រុងនោះ។ ២០ ម្យ៉ាងទៀត កោះទាំងអស់បានបាត់ទៅ ហើយលែងមានភ្នំទៀត។ ២១ ដុំព្រិលបានធ្លាក់យ៉ាងខ្លាំងទៅលើមនុស្សទាំងនោះ ដោយដុំព្រិលនីមួយៗមានទម្ងន់ប្រហែលមួយថាលិន* ហើយមនុស្សទាំងនោះបាននិយាយប្រមាថព្រះដោយសារសេចក្ដីវេទនាពីការធ្លាក់ដុំព្រិល ពីព្រោះសេចក្ដីវេទនានោះគឺខ្លាំងក្រៃលែង។
១៧ ទេវតាមួយពីចំណោមទេវតាទាំងប្រាំពីរដែលមានចានគោមប្រាំពីរបានមកប្រាប់ខ្ញុំថា៖ «ចូរមក ខ្ញុំនឹងបង្ហាញឲ្យអ្នកឃើញការវិនិច្ឆ័យទោសមេស្ត្រីពេស្យាដែលអង្គុយលើទឹកជាច្រើន ២ ដែលបានធ្វើអំពើប្រាសចាកសីលធម៌ខាងផ្លូវភេទជាមួយនឹងស្តេចនានានៅលើផែនដី រីឯពួកអ្នកដែលរស់នៅផែនដីបានស្រវឹងដោយសារស្រានៃអំពើប្រាសចាកសីលធម៌ខាងផ្លូវភេទរបស់នាង»។
៣ រួចគាត់នាំខ្ញុំទៅដោយសកម្មពល* របស់ព្រះ ចូលក្នុងតំបន់ស្ងាត់ជ្រងំ។ ហើយខ្ញុំឃើញស្ត្រីម្នាក់អង្គុយលើសត្វសាហាវមួយដែលមានសម្បុរក្រហមឆ្អៅ ក៏ពេញទៅដោយឈ្មោះដែលប្រមាថព្រះ ព្រមទាំងមានក្បាលប្រាំពីរនិងស្នែងដប់។ ៤ ស្ត្រីនោះស្លៀកពាក់ពណ៌ស្វាយនិងពណ៌ក្រហមឆ្អៅ ហើយក៏ពាក់មាស គជ់ខ្យង និងត្បូងថ្លៃវិសេស។ នៅក្នុងដៃនាងមានពែងមាសមួយដែលពេញទៅដោយរបស់គួរឲ្យស្អប់ខ្ពើមនិងរបស់ស្មោកគ្រោកពីអំពើប្រាសចាកសីលធម៌ខាងផ្លូវភេទដែលនាងប្រព្រឹត្ត។ ៥ ឈ្មោះមួយបានត្រូវសរសេរនៅលើថ្ងាសរបស់នាង ជាឈ្មោះអាថ៌កំបាំង៖ «បាប៊ីឡូនដ៏ខ្លាំងក្លា ដែលជាម្ដាយនៃស្រីពេស្យាទាំងឡាយ និងនៃអ្វីៗដែលគួរឲ្យស្អប់ខ្ពើមនៅផែនដី»។ ៦ ហើយខ្ញុំឃើញថានាងស្រវឹងឈាមរបស់ពួកអ្នកបរិសុទ្ធនិងឈាមរបស់ពួកសាក្សីរបស់លោកយេស៊ូ។
ពេលដែលខ្ញុំឃើញនាង ខ្ញុំងឿងឆ្ងល់ខ្លាំងណាស់។ ៧ ដូច្នេះ ទេវតានោះនិយាយមកកាន់ខ្ញុំថា៖ «ហេតុអ្វីអ្នកឆ្ងល់? ខ្ញុំនឹងប្រាប់អ្នកអំពីអាថ៌កំបាំងទាក់ទងនឹងស្ត្រីនោះ និងសត្វសាហាវដែលមានក្បាលប្រាំពីរនិងស្នែងដប់ដែលនាងអង្គុយលើ៖ ៨ សត្វសាហាវដែលអ្នកឃើញ ធ្លាប់មានពីមុន តែក្រោយមកមិនមាន រួចហៀបនឹងឡើងមកពីទីជ្រៅបំផុត ហើយនឹងត្រូវបំផ្លាញចោល។ ពេលដែលមនុស្សឃើញថាសត្វសាហាវធ្លាប់មានពីមុន តែមិនមាន រួចនឹងមានទៀត នោះពួកអ្នកដែលរស់នៅផែនដីនឹងស្ងើចសរសើរ ប៉ុន្តែឈ្មោះរបស់ពួកគេមិនបានត្រូវសរសេរក្នុងបញ្ជីជីវិតតាំងពីកំណើតពិភពលោកទេ។
៩ «នេះតម្រូវឲ្យមានប្រាជ្ញាជាមួយនឹងសមត្ថភាពរិះគិត៖ ក្បាលប្រាំពីរនោះតំណាងភ្នំប្រាំពីរដែលស្ត្រីនោះអង្គុយលើ។ ១០ ហើយនោះតំណាងស្តេចប្រាំពីរ៖ ស្តេចប្រាំបានរលំហើយ ស្តេចមួយនៅមាន ស្តេចមួយទៀតមិនទាន់មកដល់ តែកាលមកដល់ហើយ ស្តេចនោះត្រូវនៅមួយរយៈពេលខ្លីប៉ុណ្ណោះ។ ១១ ឯសត្វសាហាវដែលធ្លាប់មានពីមុន តែក្រោយមកមិនមាន គឺជាស្តេចទីប្រាំបី តែកើតចេញពីស្តេចទាំងប្រាំពីរ រួចមកវានឹងត្រូវបំផ្លាញចោល។
១២ «ហើយស្នែងទាំងដប់ដែលអ្នកឃើញ នោះតំណាងស្តេចដប់ដែលមិនទាន់ទទួលរាជាណាចក្រមួយនៅឡើយ ប៉ុន្តែស្តេចទាំងនោះទទួលអំណាចគ្រប់គ្រងជាស្តេចមួយម៉ោងជាមួយនឹងសត្វសាហាវ។ ១៣ ស្តេចទាំងនោះមានគំនិតតែមួយ ហើយពួកគេផ្ដល់ឫទ្ធានុភាពនិងអំណាចរបស់ពួកគេដល់សត្វសាហាវនោះ។ ១៤ អ្នកទាំងនោះនឹងច្បាំងនឹងកូនចៀម តែដោយសារលោកជាម្ចាស់លើម្ចាស់ទាំងអស់ និងស្តេចលើស្តេចទាំងអស់ នោះកូនចៀមនឹងឈ្នះពួកគេ។ ម្យ៉ាងទៀត ពួកអ្នកដែលនៅជាមួយនឹងលោក ដែលបានត្រូវហៅ និងជ្រើសរើស ហើយស្មោះត្រង់ក៏នឹងឈ្នះដែរ»។
១៥ ហើយគាត់ប្រាប់ខ្ញុំថា៖ «ទឹកដែលអ្នកឃើញស្ត្រីពេស្យានោះកំពុងអង្គុយលើ តំណាងជាតិសាសន៍ផ្សេងៗ មហាជននានា ប្រជាជាតិផ្សេងៗ និងភាសាផ្សេងៗ។ ១៦ ស្នែងទាំងដប់ដែលអ្នកឃើញ និងសត្វសាហាវនឹងស្អប់ស្ត្រីពេស្យានោះ ហើយនឹងបំផ្លាញនាងព្រមទាំងធ្វើឲ្យនាងនៅអាក្រាត ក៏នឹងស៊ីសាច់នាង ហើយដុតនាងចោលក្នុងភ្លើង។ ១៧ ព្រោះព្រះបណ្ដាលចិត្តពួកគេឲ្យធ្វើតាមគំនិតរបស់លោក ពោលគឺ ធ្វើតាមគំនិតតែមួយរបស់ពួកគេ ដោយប្រគល់រាជាណាចក្ររបស់ពួកគេដល់សត្វសាហាវ រហូតដល់ប្រសាសន៍របស់ព្រះបានត្រូវសម្រេចហើយ។ ១៨ ឯស្ត្រីដែលអ្នកឃើញ តំណាងក្រុងដ៏ខ្លាំងក្លា ដែលគ្រប់គ្រងលើស្តេចនានានៅលើផែនដី»។
១៨ បន្ទាប់ពីការទាំងនោះ ខ្ញុំឃើញទេវតាមួយទៀតចុះពីលើស្ថានសួគ៌* ដោយមានអំណាចខ្លាំងក្លា ហើយសិរីរុងរឿងរបស់ទេវតានោះបានបំភ្លឺផែនដី។ ២ ទេវតានោះបន្លឺសំឡេងយ៉ាងខ្លាំងថា៖ «នាងបានរលំហើយ! បាប៊ីឡូនដ៏ខ្លាំងក្លាបានរលំ ហើយក្លាយទៅជាលំនៅរបស់ពួកវិញ្ញាណកំណាច* និងជាកន្លែងដែលពេញទៅដោយខ្យល់ពុល ហើយជាជម្រករបស់សត្វស្លាបទាំងអស់ដែលស្មោកគ្រោកនិងគួរឲ្យស្អប់ខ្ពើម! ៣ ព្រោះប្រជាជាតិទាំងអស់បានរងគ្រោះដោយសារស្រានៃកំហឹងនៃអំពើប្រាសចាកសីលធម៌ខាងផ្លូវភេទ* របស់នាង ហើយស្តេចទាំងឡាយនៅផែនដីបានធ្វើអំពើប្រាសចាកសីលធម៌ខាងផ្លូវភេទជាមួយនឹងនាង ឯពួកអ្នកធ្វើដំណើរជួញដូរនៅផែនដីបានក្លាយទៅជាអ្នកមាន ដោយសារភាពសម្បូរសប្បាយហួសហេតុរបស់នាង»។
៤ រួចខ្ញុំឮសំឡេងមួយទៀតបន្លឺពីលើមេឃថា៖ «រាស្ត្រខ្ញុំអើយ ចូរចេញពីក្រុងនោះមក ប្រសិនបើអ្នករាល់គ្នាមិនចង់មានចំណែកក្នុងអំពើខុសឆ្គងរបស់នាង ហើយប្រសិនបើអ្នករាល់គ្នាមិនចង់ទទួលចំណែកពីសេចក្ដីវេទនារបស់នាង។ ៥ ព្រោះអំពើខុសឆ្គងរបស់ក្រុងនោះបានគរឡើងរហូតដល់ស្ថានសួគ៌ ហើយព្រះបាននឹកឃើញការដែលនាងបានធ្វើដោយអយុត្ដិធម៌។ ៦ ចូរសងដល់នាងតាមតែក្រុងនោះបានធ្វើដល់គេហើយចូរសងដល់នាងមួយជាពីរ គឺមួយជាពីរនៃអ្វីដែលនាងបានធ្វើ។ ក្នុងពែងដែលនាងបានលាយ ចូរលាយមួយជាពីរឲ្យនាងវិញ។ ៧ នាងលើកតម្កើងខ្លួននិងរស់នៅដោយភាពសម្បូរសប្បាយហួសហេតុដល់កម្រិតណា ចូរធ្វើទារុណកម្មដល់នាងនិងធ្វើឲ្យមានទុក្ខព្រួយដល់កម្រិតនោះដែរ។ ពីព្រោះនាងនិយាយក្នុងចិត្តថា៖ ‹ខ្ញុំគ្រប់គ្រងជាមហាក្សត្រី ហើយខ្ញុំមិនមែនជាស្ត្រីមេម៉ាយទេ ខ្ញុំនឹងមិនមានទុក្ខព្រួយឡើយ›។ ៨ ហេតុនោះហើយបានជាសេចក្ដីវេទនារបស់នាងនឹងមកក្នុងមួយថ្ងៃ គឺសេចក្ដីស្លាប់ ទុក្ខព្រួយ និងការអត់ឃ្លាន ហើយនាងនឹងត្រូវដុតចោលដោយភ្លើង ពីព្រោះព្រះយេហូវ៉ាដែលជាព្រះវិនិច្ឆ័យទោសនាង លោកខ្លាំងក្លា។
៩ «ឯស្តេចទាំងឡាយនៅផែនដី ដែលបានធ្វើអំពើប្រាសចាកសីលធម៌ខាងផ្លូវភេទជាមួយនឹងនាង ហើយបានរស់នៅដោយភាពសម្បូរសប្បាយហួសហេតុ នឹងយំគក់ទ្រូងដោយកើតទុក្ខអំពីនាង ពេលដែលពួកគេមើលផ្សែងដែលកំពុងហុយឡើងពីការដុតនាង ១០ កាលដែលពួកគេឈរនៅឆ្ងាយ ដោយសារខ្លាចទារុណកម្មរបស់នាងហើយនិយាយថា៖ ‹ស្ដាយណាស់! ស្ដាយណាស់ក្រុងដ៏ខ្លាំងក្លា បាប៊ីឡូនដែលជាក្រុងមាំមួន ពីព្រោះការវិនិច្ឆ័យទោសរបស់អ្នកបានមកដល់ក្នុងរយៈពេលតែមួយម៉ោង!›។
១១ «ម្យ៉ាងទៀត ពួកអ្នកធ្វើដំណើរជួញដូរនៅផែនដីក៏យំ ហើយកើតទុក្ខដោយសារនាង ពីព្រោះលែងមានអ្នកណាទិញទំនិញដែលពួកគេបានប្រមូលទុកយ៉ាងច្រើន ១២ បានប្រមូលមាស ប្រាក់ ត្បូងវិសេស គជ់ខ្យង ក្រណាត់សាច់ល្អ ក្រណាត់ពណ៌ស្វាយ ក្រណាត់សូត្រ ក្រណាត់ពណ៌ក្រហមឆ្អៅ របស់ទាំងអស់ដែលធ្វើពីឈើក្រអូប និងរបស់គ្រប់យ៉ាងដែលធ្វើពីភ្លុក និងរបស់សព្វបែបយ៉ាងដែលធ្វើពីឈើវិសេស ពីស្ពាន់ ពីដែក និងពីថ្មកែវ ១៣ ហើយឈើអែម គ្រឿងទេសពីឥណ្ឌា ធូប ប្រេងក្រអូប ធូបស ស្រាទំពាំងបាយជូរ ប្រេងអូលីវ ម្សៅហ្មត់ ស្រូវសាលី ហ្វូងគោ ហ្វូងចៀម សេះ រទេះ ពួកខ្ញុំបម្រើ និងជីវិត* មនុស្ស។ ១៤ ផ្លែឈើល្អៗដែលអ្នកចង់បាន បានបាត់ពីអ្នកទៅ ហើយរបស់ប្រណីត និងរបស់ស្អាតៗរបស់អ្នកបានសាបសូន្យអស់ទៅ ហើយមនុស្សនឹងរកមិនឃើញអ្វីៗទាំងនោះទេ។
១៥ «ពួកអ្នកដែលធ្វើដំណើរជួញដូររបស់ទាំងនោះ និងដែលបានក្លាយទៅជាអ្នកមានដោយសារនាង នឹងឈរនៅឆ្ងាយ ដោយសារខ្លាចទារុណកម្មរបស់នាង ហើយពួកគេនឹងយំ ហើយកើតទុក្ខ ១៦ និងនិយាយថា៖ ‹ស្ដាយណាស់! ស្ដាយណាស់ក្រុងដ៏ខ្លាំងក្លា ដែលស្លៀកពាក់ក្រណាត់សាច់ល្អ ក្រណាត់ពណ៌ស្វាយ និងក្រណាត់ពណ៌ក្រហមឆ្អៅ និងដែលពាក់អលង្ការមាស ត្បូងវិសេស និងគជ់ខ្យងជាច្រើន ១៧ ពីព្រោះក្នុងរយៈពេលតែមួយម៉ោង ទ្រព្យសម្បូរហូរហៀរទាំងនោះបានត្រូវបំផ្លាញអស់ទៅ!›។
«ឯមេសំពៅទាំងអស់ និងមនុស្សទាំងឡាយដែលធ្វើដំណើរតាមសំពៅ និងពួកអ្នកដើរសំពៅ ហើយអស់អ្នកដែលចិញ្ចឹមជីវិតដោយសារសមុទ្របានឈរនៅឆ្ងាយ ១៨ ហើយស្រែកឡើងពេលដែលពួកគេមើលផ្សែងហុយឡើងពីការដុតនាង។ ពួកគេនិយាយថា៖ ‹តើមានក្រុងណាដែលដូចក្រុងដ៏ខ្លាំងក្លានោះ?›។ ១៩ ពួកគេបាចធូលីដីលើក្បាលរបស់ពួកគេ ក៏ស្រែកយំដោយកើតទុក្ខ ហើយនិយាយថា៖ ‹ស្ដាយណាស់! ស្ដាយណាស់ក្រុងដ៏ខ្លាំងក្លា ជាកន្លែងដែលអស់អ្នកដែលមានសំពៅលើសមុទ្របានក្លាយទៅជាអ្នកមានដោយសារភាពស្តុកស្តម្ភរបស់នាង ពីព្រោះនាងបានត្រូវបំផ្លាញក្នុងរយៈពេលតែមួយម៉ោង!›។
២០ «ស្ថានសួគ៌អើយ! រួមទាំងអ្នករាល់គ្នាដែលជាអ្នកបរិសុទ្ធ ជាសាវ័ក* និងជាអ្នកប្រកាសទំនាយ ចូរត្រេកអរដោយសារអ្វីដែលបានកើតឡើងដល់នាង ពីព្រោះព្រះបានវិនិច្ឆ័យក្ដីឲ្យអ្នករាល់គ្នាដោយដាក់ទោសនាង!»។
២១ រួចមក ទេវតាខ្លាំងពូកែមួយរូបបានលើកថ្មត្បាល់កិនធំមួយហើយបោះទៅក្នុងសមុទ្រ ដោយនិយាយថា៖ «ក្រុងបាប៊ីឡូនដ៏ខ្លាំងក្លានឹងត្រូវបោះទម្លាក់ទៅយ៉ាងរហ័សដូច្នេះដែរ ហើយគ្មានអ្នកណានឹងប្រទះឃើញវាម្ដងទៀតទេ ២២ នឹងលែងមានសំឡេងអ្នកចម្រៀងដែលច្រៀងផងដេញពិណបន្ទរតាមផង និងសូរសំឡេងអ្នកលេងភ្លេង និងអ្នកផ្លុំខ្លុយ និងអ្នកផ្លុំត្រែក្នុងអ្នកទៀត ហើយនឹងលែងមានជាងជំនាញគ្រប់មុខក្នុងអ្នកទៀត ហើយសូរត្បាល់កិនក៏លែងមានក្នុងអ្នកទៀតដែរ ២៣ នឹងលែងមានចង្កៀងភ្លឺក្នុងអ្នកទៀត ហើយនឹងលែងមានសំឡេងកូនកំលោះ កូនក្រមុំក្នុងអ្នកទៀតដែរ ពីព្រោះពួកអ្នកធ្វើដំណើរជួញដូររបស់អ្នក គឺជាអ្នកមានមុខមាត់ធំដុំនៅផែនដី ហើយពីព្រោះប្រជាជាតិទាំងអស់បានត្រូវបំភាន់ដោយការប្រព្រឹត្តរបស់អ្នកដែលទាក់ទងនឹងពួកវិញ្ញាណអាក្រក់។ ២៤ នៅក្នុងនាង មានឈាមរបស់ពួកអ្នកប្រកាសទំនាយ ពួកអ្នកបរិសុទ្ធ និងអស់អ្នកដែលបានត្រូវសម្លាប់នៅផែនដី»។
១៩ បន្ទាប់ពីការទាំងនោះ ខ្ញុំឮសំឡេងមួយបន្លឺឡើងយ៉ាងខ្លាំង ហាក់ដូចជាសំឡេងជនមួយក្រុមធំនៅស្ថានសួគ៌។ ពួកគេនិយាយថា៖ «ចូរអ្នករាល់គ្នាសរសើរយ៉ា!* សេចក្ដីសង្គ្រោះ សិរីរុងរឿង និងឫទ្ធានុភាពគឺជារបស់ព្រះនៃយើង ២ ពីព្រោះការវិនិច្ឆ័យរបស់លោកគឺគួរឲ្យទុកចិត្ត ហើយក៏សុចរិតយុត្ដិធម៌។ ព្រោះលោកបានដាក់ទោសមេស្ត្រីពេស្យាដែលបានបង្ខូចផែនដីដោយអំពើប្រាសចាកសីលធម៌ខាងផ្លូវភេទរបស់នាង ហើយលោកបានសងសឹកឲ្យពួកខ្ញុំបម្រើរបស់លោកដែលនាងបានសម្លាប់»។ ៣ ភ្លាមនោះ ពួកគេនិយាយជាលើកទីពីរថា៖ «ចូរអ្នករាល់គ្នាសរសើរយ៉ា! ហើយផ្សែងពីការដុតនាងនឹងហុយឡើងជារៀងរហូត»។
៤ ឯពួកអ្នកចាស់ទុំម្ភៃបួននាក់និងចេរូប៊ីនទាំងបួនបានលំឱនកាយគោរពប្រណិប័តន៍ព្រះដែលអង្គុយលើបល្ល័ង្ក ដោយពោលថា៖ «អាមេន! ចូរអ្នករាល់គ្នាសរសើរយ៉ា!»។
៥ ម្យ៉ាងទៀត មានសំឡេងមួយបន្លឺចេញពីបល្ល័ង្កថា៖ «អ្នករាល់គ្នាដែលជាខ្ញុំបម្រើរបស់ព្រះ ដែលកោតខ្លាចលោក ទាំងអ្នកតូចទាំងអ្នកធំ ចូរសរសើរព្រះរបស់យើង»។
៦ ហើយខ្ញុំឮសំឡេងមួយ ហាក់ដូចជាសំឡេងជនមួយក្រុមធំ និងដូចសន្ធឹកទឹកហូរ និងដូចសំឡេងផ្គរលាន់ឮយ៉ាងខ្លាំង។ ពួកគេនិយាយថា៖ «ចូរអ្នករាល់គ្នាសរសើរយ៉ា ពីព្រោះព្រះយេហូវ៉ាដែលជាព្រះរបស់យើង និងជាព្រះដែលមានឫទ្ធានុភាពខ្លាំងក្លាបំផុត បានចាប់ផ្ដើមគ្រប់គ្រងជាស្តេចហើយ។ ៧ ចូរយើងអរសប្បាយនិងត្រេកអរឲ្យខ្លាំង ហើយចូរយើងសរសើរតម្កើងលោក ពីព្រោះវេលាសម្រាប់ពិធីមង្គលការរបស់កូនចៀមបានមកដល់ហើយ ឯភរិយារបស់លោកបានរៀបចំខ្លួន។ ៨ ព្រោះនាងបានត្រូវអនុញ្ញាតឲ្យស្លៀកពាក់ក្រណាត់សាច់ល្អដែលស្អាតហើយភ្លឺ ពីព្រោះក្រណាត់សាច់ល្អនោះតំណាងការប្រព្រឹត្តដ៏សុចរិតរបស់ពួកអ្នកបរិសុទ្ធ»។
៩ ហើយទេវតានោះប្រាប់ខ្ញុំថា៖ «ចូរសរសេរដូចតទៅនេះថា៖ អស់អ្នកដែលបានត្រូវអញ្ជើញឲ្យចូលរួមពិសាភោជនាហារនៅពិធីមង្គលការរបស់កូនចៀម មានសុភមង្គល»។ គាត់ក៏ប្រាប់ខ្ញុំថា៖ «សេចក្ដីនេះជាប្រសាសន៍របស់ព្រះ ជាប្រសាសន៍ដ៏គួរឲ្យទុកចិត្ត»។ ១០ រួចខ្ញុំលំឱនកាយនៅជិតជើងទេវតានោះដើម្បីគោរពប្រណិប័តន៍គាត់។ ប៉ុន្តែទេវតានោះប្រាប់ខ្ញុំថា៖ «ចូរប្រយ័ត្ន! កុំធ្វើដូច្នោះ! ខ្ញុំគ្រាន់តែជាខ្ញុំបម្រើដូចអ្នកនិងដូចបងប្អូនរបស់អ្នក ដែលមានកិច្ចការធ្វើជាសាក្សីអំពីលោកយេស៊ូ។ ចូរគោរពប្រណិប័តន៍ព្រះ ព្រោះការធ្វើជាសាក្សីអំពីលោកយេស៊ូ ជាគោលបំណងនៃការប្រកាសទំនាយ»។
១១ ហើយខ្ញុំឃើញមេឃបើកចំហឡើង ហើយមើល! មានសេះសម្បុរស។ លោកដែលអង្គុយលើសេះនោះមាននាមថា ស្មោះត្រង់និងពិតត្រង់ ហើយលោកវិនិច្ឆ័យនិងធ្វើសង្គ្រាមដោយសុចរិតយុត្ដិធម៌។ ១២ ភ្នែករបស់លោកដូចជាអណ្ដាតភ្លើង ហើយមានមកុដជាច្រើនលើក្បាលលោក។ លោកមាននាមមួយដែលបានត្រូវសរសេរ ដែលគ្មានអ្នកណាស្គាល់ក្រៅពីលោកឡើយ ១៣ សម្លៀកបំពាក់ក្រៅរបស់លោកបានត្រូវប្រោះដោយឈាម ហើយនាមរបស់លោកគឺបណ្ដាំរបស់ព្រះ។ ១៤ ម្យ៉ាងទៀត បណ្ដាកងទ័ពនៅស្ថានសួគ៌កំពុងជិះសេះសម្បុរសមកតាមក្រោយលោក ហើយពួកគេស្លៀកពាក់ក្រណាត់សាច់ល្អស្អាតពណ៌ស។ ១៥ មានដាវមួយវែងយ៉ាងមុតចេញពីមាត់របស់លោក ដើម្បីឲ្យលោកប្រហារប្រជាជាតិនានា ហើយលោកនឹងឃ្វាលពួកគេដោយដំបងដែក។ លោកក៏ជាន់ទំពាំងបាយជូរក្នុងអាងធំសម្រាប់ជាន់ផ្លែយកទឹកធ្វើស្រា គឺអាងកំហឹងនៃសេចក្ដីក្រោធរបស់ព្រះដែលមានឫទ្ធានុភាពខ្លាំងក្លាបំផុត។ ១៦ លោកមាននាមមួយដែលបានត្រូវសរសេរលើសម្លៀកបំពាក់ក្រៅរបស់លោកនៅលើភ្លៅ។ នាមនោះគឺ ស្តេចលើស្តេចទាំងអស់ និងម្ចាស់លើម្ចាស់ទាំងអស់។
១៧ ខ្ញុំក៏ឃើញទេវតាមួយឈរនៅមុខថ្ងៃ ហើយគាត់បន្លឺសំឡេងយ៉ាងខ្លាំងទៅកាន់សត្វស្លាបទាំងអស់ដែលហើរនៅកណ្ដាលមេឃថា៖ «ចូរប្រមូលគ្នាមកក្នុងការជប់លៀងដ៏ធំរបស់ព្រះ ១៨ ដើម្បីស៊ីសាច់ពួកស្តេច សាច់ពួកមេបញ្ជាការកងទ័ព សាច់ពួកអ្នកខ្លាំងពូកែ សាច់សេះ និងសាច់ពួកអ្នកដែលជិះសេះទាំងនោះ ហើយស៊ីសាច់មនុស្សទាំងឡាយ ទាំងពួកអ្នកមានសេរីភាពទាំងពួកខ្ញុំបម្រើ ទាំងអ្នកតូចទាំងអ្នកធំ»។
១៩ ហើយខ្ញុំឃើញសត្វសាហាវនិងស្តេចទាំងឡាយនៅផែនដីព្រមទាំងកងទ័ពរបស់ពួកគេ មូលគ្នាដើម្បីច្បាំងនឹងលោកដែលកំពុងជិះលើសេះ ហើយច្បាំងនឹងកងទ័ពរបស់លោក។ ២០ ហើយសត្វសាហាវបានត្រូវចាប់ រួមទាំងអ្នកប្រកាសទំនាយមិនពិតដែលបានធ្វើសញ្ញាសម្គាល់ក្រោមក្រសែភ្នែកសត្វនោះ ដើម្បីបំភាន់ពួកអ្នកដែលបានទទួលសញ្ញានៃសត្វសាហាវ និងបំភាន់ពួកអ្នកដែលគោរពប្រណិប័តន៍រូបសត្វសាហាវនោះ។ កាលដែលនៅរស់នៅឡើយ ពួកគេទាំងពីរបានត្រូវបោះទៅក្នុងបឹងដែលឆេះដោយភ្លើងនិងស្ពាន់ធ័រ។ ២១ ប៉ុន្តែមនុស្សទាំងប៉ុន្មានទៀតបានត្រូវសម្លាប់ដោយដាវវែងរបស់លោកដែលជិះលើសេះ ជាដាវដែលចេញពីមាត់លោក។ ឯសត្វស្លាបទាំងអស់បានស៊ីសាច់របស់អ្នកទាំងនោះឆ្អែត។
២០ ខ្ញុំឃើញទេវតាមួយរូបចុះពីស្ថានសួគ៌* មក ដោយកាន់កូនសោនៃទីជ្រៅបំផុតនិងច្រវាក់ដ៏ធំមួយនៅដៃ។ ២ ទេវតានោះចាប់នាគ ជាពស់ដំបូងបង្អស់ ដែលជាមេកំណាចនិងជាសាថាន* រួចបានចងវាទុកអស់មួយពាន់ឆ្នាំ។ ៣ ទេវតានោះបោះវាទៅក្នុងទីជ្រៅបំផុត រួចបិទជិត ហើយបិទត្រាលើទីជ្រៅបំផុតដើម្បីឃុំវា មិនឲ្យបំភាន់ប្រជាជាតិនានាទៀត រហូតដល់ផុតគ្រាមួយពាន់ឆ្នាំ។ បន្ទាប់ពីនោះ វានឹងត្រូវដោះលែងមួយរយៈពេលខ្លី។
៤ រួចមក ខ្ញុំឃើញបល្ល័ង្កផ្សេងៗ ក៏មានអ្នកដែលអង្គុយលើបល្ល័ង្កទាំងនោះ ហើយពួកគេបានទទួលអំណាចដើម្បីធ្វើការវិនិច្ឆ័យ។ ខ្ញុំក៏ឃើញពួកអ្នកដែលបានត្រូវគេប្រហារជីវិតដោយពូថៅ ដោយសារពួកគេធ្វើជាសាក្សីបញ្ជាក់អំពីលោកយេស៊ូ និងបាននិយាយអំពីព្រះ គឺពួកអ្នកដែលមិនបានគោរពប្រណិប័តន៍សត្វសាហាវ ឬរូបរបស់វា ក៏មិនបានទទួលសញ្ញានោះនៅលើថ្ងាស ឬនៅលើដៃរបស់ពួកគេ។ ពួកគេបានរស់ឡើងវិញ រួចគ្រប់គ្រងជាស្តេចជាមួយនឹងគ្រិស្តអស់មួយពាន់ឆ្នាំ។ ៥ (មនុស្សស្លាប់ទាំងប៉ុន្មានទៀតមិនបានរស់ឡើងវិញទេ ទាល់តែបានផុតគ្រាមួយពាន់ឆ្នាំ)។ នេះជាការប្រោសឲ្យរស់ឡើងវិញមុនដំបូង។ ៦ អ្នកដែលមានចំណែកក្នុងការប្រោសឲ្យរស់ឡើងវិញមុនដំបូង មានសុភមង្គល ហើយក៏បរិសុទ្ធ។ សេចក្ដីស្លាប់ទីពីរគ្មានអំណាចលើអ្នកទាំងនោះឡើយ តែពួកគេនឹងធ្វើជាសង្ឃរបស់ព្រះនិងរបស់គ្រិស្ត ក៏នឹងគ្រប់គ្រងជាស្តេចជាមួយនឹងលោកអស់មួយពាន់ឆ្នាំ។
៧ ពេលដែលគ្រាមួយពាន់ឆ្នាំផុតភ្លាម សាថាននឹងត្រូវដោះលែងពីគុក ៨ វានឹងចេញទៅបំភាន់ប្រជាជាតិនានានៅជ្រុងទាំងបួននៃផែនដី គឺកូកនិងម៉ាកូក ដើម្បីប្រមូលពួកគេសម្រាប់សង្គ្រាម។ ចំនួនអ្នកទាំងនោះគឺដូចខ្សាច់នៅសមុទ្រ។ ៩ ពួកគេឡើងទៅពេញផែនដី ហើយឡោមព័ទ្ធជំរំរបស់ពួកអ្នកបរិសុទ្ធនិងក្រុងជាទីស្រឡាញ់។ ប៉ុន្តែភ្លើងបានធ្លាក់ពីលើមេឃមកបញ្ឆេះពួកគេអស់ទៅ។ ១០ ហើយមេកំណាចដែលបានបំភាន់ពួកគេបានត្រូវបោះទៅក្នុងបឹងដែលឆេះដោយភ្លើងនិងស្ពាន់ធ័រ ជាកន្លែងដែលសត្វសាហាវនិងអ្នកប្រកាសទំនាយមិនពិតនៅរួចហើយ។ ពួកគេនឹងទទួលទារុណកម្មទាំងយប់ទាំងថ្ងៃជារៀងរហូតតទៅ។
១១ រួចមក ខ្ញុំឃើញបល្ល័ង្កពណ៌សយ៉ាងធំមួយនិងលោកដែលអង្គុយលើបល្ល័ង្កនោះ។ ផែនដីនិងមេឃបានចេញបាត់ពីមុខលោក គ្មានកន្លែងសម្រាប់ផែនដីនិងមេឃទៀតឡើយ។ ១២ ខ្ញុំឃើញមនុស្សស្លាប់ ទាំងអ្នកធំទាំងអ្នកតូចកំពុងឈរនៅមុខបល្ល័ង្ក ហើយរមូរផ្សេងៗបានត្រូវបើកឡើង។ ប៉ុន្តែបញ្ជីមួយទៀតបានត្រូវបើកឡើង គឺជាបញ្ជីជីវិត។ ឯមនុស្សស្លាប់បានត្រូវវិនិច្ឆ័យយោងទៅតាមអ្វីដែលបានត្រូវសរសេរក្នុងរមូរទាំងនោះ ស្របតាមការប្រព្រឹត្តរបស់ពួកគេ។ ១៣ សមុទ្របានប្រគល់មនុស្សស្លាប់នៅក្នុងនោះមកវិញ ហើយសេចក្ដីស្លាប់និងផ្នូរ* បានប្រគល់មនុស្សស្លាប់នៅក្នុងនោះមកវិញដែរ ហើយពួកគេបានត្រូវវិនិច្ឆ័យរៀងៗខ្លួន ស្របតាមការប្រព្រឹត្តរបស់ពួកគេ។ ១៤ ឯសេចក្ដីស្លាប់និងផ្នូរបានត្រូវបោះទៅក្នុងបឹងភ្លើង។ បឹងភ្លើងគឺជាតំណាងសេចក្ដីស្លាប់ទីពីរ។ ១៥ ម្យ៉ាងទៀត អ្នកណាដែលគ្មានឈ្មោះក្នុងសៀវភៅជីវិតបានត្រូវបោះទៅក្នុងបឹងភ្លើង។
២១ ខ្ញុំឃើញមេឃថ្មីនិងផែនដីថ្មី ព្រោះមេឃនិងផែនដីដែលមានពីមុនបានកន្លងបាត់ទៅហើយ ឯសមុទ្រក៏លែងមានទៀត។ ២ ខ្ញុំក៏ឃើញក្រុងបរិសុទ្ធ គឺក្រុងយេរូសាឡិមថ្មីចុះមកពីព្រះនៅស្ថានសួគ៌ ហើយក្រុងនោះបានត្រូវរៀបចំដូចកូនក្រមុំដែលបានតុបតែងខ្លួនដើម្បីស្វាមីរបស់នាង។ ៣ រួចមក ខ្ញុំឮសំឡេងមួយបន្លឺយ៉ាងខ្លាំងចេញពីបល្ល័ង្កមកថា៖ «មើល! ត្រសាលរបស់ព្រះនៅជាមួយនឹងមនុស្សជាតិ ហើយលោកនឹងអាស្រ័យនៅជាមួយនឹងពួកគេ ឯពួកគេនឹងធ្វើជារាស្ត្ររបស់លោក។ ហើយព្រះនឹងនៅជាមួយនឹងពួកគេដោយខ្លួនលោកផ្ទាល់។ ៤ លោកនឹងជូតអស់ទាំងទឹកភ្នែកចេញពីភ្នែករបស់ពួកគេ ហើយសេចក្ដីស្លាប់នឹងលែងមានទៀត ទុក្ខព្រួយ ការស្រែកយំ និងការឈឺចាប់ក៏នឹងលែងមានទៀតដែរ។ អ្វីៗដែលធ្លាប់កើតឡើងពីមុន នោះបានកន្លងបាត់អស់ហើយ»។
៥ លោកដែលអង្គុយលើបល្ល័ង្កមានប្រសាសន៍ថា៖ «មើល! ខ្ញុំកំពុងធ្វើអ្វីៗទាំងអស់ថ្មី»។ ម្យ៉ាងទៀត លោកមានប្រសាសន៍ថា៖ «ចូរសរសេរ ពីព្រោះពាក្យទាំងនេះគួរឲ្យទុកចិត្ត ហើយក៏ពិតត្រង់»។ ៦ លោកក៏មានប្រសាសន៍មកខ្ញុំថា៖ «ការទាំងនោះបានសម្រេចហើយ! ខ្ញុំជាអាលផានិងអូមេហ្គា* ជាដើមនិងជាចុង។ ខ្ញុំនឹងឲ្យទឹកពីរន្ធនៃទឹកដែលផ្ដល់ជីវិតដល់អ្នកណាដែលស្រេក ដោយឥតគិតថ្លៃ។ ៧ អ្នកណាដែលឈ្នះនឹងទទួលអ្វីៗទាំងនោះជាមត៌ក ហើយខ្ញុំនឹងធ្វើជាព្រះរបស់អ្នកនោះ ឯអ្នកនោះនឹងធ្វើជាកូនរបស់ខ្ញុំ។ ៨ ប៉ុន្តែពួកអ្នកដែលកំសាក ពួកអ្នកដែលគ្មានជំនឿ ពួកអ្នកដែលកខ្វក់និងគួរឲ្យស្អប់ខ្ពើម ពួកឃាតករ ពួកអ្នកដែលធ្វើអំពើប្រាសចាកសីលធម៌ខាងផ្លូវភេទ ពួកអ្នកដែលទាក់ទងនឹងវិញ្ញាណអាក្រក់ ពួកអ្នកដែលគោរពបូជារូបព្រះ និងអស់អ្នកដែលភូតភរ ពួកគេនឹងទទួលចំណែកក្នុងបឹងដែលឆេះដោយភ្លើងនិងស្ពាន់ធ័រ។ នេះតំណាងសេចក្ដីស្លាប់ទីពីរ»។
៩ ក្រោយមក ទេវតាមួយពីចំណោមទេវតាទាំងប្រាំពីរដែលមានចានគោមពេញទៅដោយសេចក្ដីវេទនាទាំងប្រាំពីរចុងក្រោយ បានមកហើយនិយាយមកកាន់ខ្ញុំថា៖ «ចូរមក ខ្ញុំនឹងបង្ហាញឲ្យអ្នកឃើញកូនក្រមុំដែលជាភរិយារបស់កូនចៀម»។ ១០ ដូច្នេះ គាត់យកខ្ញុំដោយសកម្មពល* របស់ព្រះទៅឯភ្នំដ៏ធំនិងខ្ពស់ត្រដែតមួយ រួចគាត់បង្ហាញឲ្យខ្ញុំឃើញក្រុងយេរូសាឡិម ជាក្រុងបរិសុទ្ធ កំពុងចុះពីព្រះនៅស្ថានសួគ៌ ១១ ប្រកបដោយសិរីរុងរឿងរបស់ព្រះ។ រស្មីរបស់ក្រុងនោះគឺដូចត្បូងល្អវិសេស ដូចត្បូងយ៉ាស្បាដែលភ្លឺថ្លាដូចកែវចរណៃ។ ១២ ក្រុងនោះមានកំពែងដ៏ធំនិងខ្ពស់ណាស់ ព្រមទាំងមានទ្វារកំពែងដប់ពីរ ហើយនៅទ្វារកំពែងទាំងនោះមានទេវតាដប់ពីរ។ ម្យ៉ាងទៀត ឈ្មោះរបស់កុលសម្ព័ន្ធនៃកូនអ៊ីស្រាអែលទាំងដប់ពីរបានត្រូវសរសេរលើទ្វារទាំងនោះ។ ១៣ នៅខាងកើតមានទ្វារបី នៅខាងជើងមានទ្វារបី នៅខាងត្បូងមានទ្វារបី ហើយនៅខាងលិចមានទ្វារបី។ ១៤ កំពែងក្រុងនោះក៏មានថ្មគ្រឹះដប់ពីរ ហើយលើថ្មទាំងនោះមានឈ្មោះរបស់សាវ័កទាំងដប់ពីររបស់កូនចៀម។
១៥ ឯអ្នកដែលកំពុងនិយាយជាមួយនឹងខ្ញុំកាន់ដើមត្រែងមាសមួយនៅដៃ ដើម្បីប្រើជាប្រដាប់វាស់ក្រុងនោះ ព្រមទាំងទ្វារនិងកំពែងរបស់ក្រុងនោះផង។ ១៦ ក្រុងនោះមានរាងបួនជ្រុងស្មើ ឯបណ្ដោយនិងទទឹងនៃក្រុងនោះគឺស្មើគ្នា។ រួចគាត់យកដើមត្រែងនោះ ហើយវាស់ក្រុងនោះឃើញមានមួយម៉ឺនពីរពាន់ស្ដាដ។* បណ្ដោយ ទទឹង និងកម្ពស់នៃក្រុងនោះគឺស្មើគ្នា។ ១៧ គាត់ក៏វាស់កំពែងក្រុងនោះ ឃើញមានមួយរយសែសិបបួនហត្ថ* តាមរង្វាស់របស់មនុស្សដែលជារង្វាស់របស់ទេវតាដែរ។ ១៨ កំពែងក្រុងនោះធ្វើពីត្បូងយ៉ាស្បា ហើយក្រុងនោះធ្វើពីមាសសុទ្ធដែលថ្លាដូចកញ្ចក់។ ១៩ គ្រឹះនានានៃកំពែងស្អាតរបស់ក្រុងនោះបានត្រូវធ្វើពីត្បូងវិសេសគ្រប់ប្រភេទ៖ គ្រឹះទីមួយបានត្រូវធ្វើពីត្បូងយ៉ាស្បា ទីពីរត្បូងកណ្ដៀង ទីបីត្បូងខាលសេដូនី ទីបួនត្បូងមរកត ២០ ទីប្រាំត្បូងសាដូនិច ទីប្រាំមួយត្បូងសាដៀស ទីប្រាំពីរត្បូងគ្រីសូឡែត ទីប្រាំបីត្បូងបេរីល ទីប្រាំបួនត្បូងថូផាស ទីដប់ត្បូងគ្រីសូប្រេស ទីដប់មួយត្បូងហៃយ៉ាស៊ីន ទីដប់ពីរត្បូងអេម៉ាទេស។ ២១ ម្យ៉ាងទៀត ទ្វារទាំងដប់ពីរ គឺជាគជ់ខ្យងដប់ពីរ ដោយទ្វារនីមួយៗធ្វើពីគជ់ខ្យងមួយ។ ហើយផ្លូវធំក្នុងក្រុងនោះធ្វើពីមាសសុទ្ធ ហើយក៏ថ្លាដូចកញ្ចក់។
២២ ខ្ញុំមិនឃើញវិហារនៅក្នុងក្រុងនោះទេ ព្រោះព្រះយេហូវ៉ាដែលជាព្រះមានឫទ្ធានុភាពខ្លាំងក្លាបំផុត លោកនិងកូនចៀមជាវិហារនៃក្រុងនោះ។ ២៣ មិនត្រូវការថ្ងៃឬខែបំភ្លឺក្រុងនោះទេ ពីព្រោះសិរីរុងរឿងរបស់ព្រះបានបំភ្លឺក្រុងនោះ ហើយកូនចៀមជាចង្កៀងនៃក្រុងនោះ។ ២៤ ប្រជាជាតិនានានឹងដើរដោយសារពន្លឺនៃក្រុងនោះ ហើយស្តេចទាំងឡាយនៅផែនដីនឹងនាំសិរីរុងរឿងរបស់ពួកគេចូលក្នុងក្រុងនោះ។ ២៥ ទ្វារក្រុងនោះនឹងមិនត្រូវបិទនៅពេលថ្ងៃឡើយ ហើយនៅក្រុងនោះនឹងគ្មានយប់ទេ។ ២៦ សិរីរុងរឿងនិងកិត្ដិយសនៃប្រជាជាតិនានានឹងត្រូវនាំចូលក្រុងនោះ។ ២៧ ប៉ុន្តែអ្វីដែលមិនពិសិដ្ឋ ពួកអ្នកដែលប្រព្រឹត្តអំពើគួរឲ្យស្អប់ខ្ពើម ហើយភូតភរនឹងមិនចូលក្នុងក្រុងនោះទេ មានតែពួកអ្នកដែលមានឈ្មោះក្នុងបញ្ជីជីវិតរបស់កូនចៀមប៉ុណ្ណោះនឹងចូល។
២២ ហើយគាត់បង្ហាញឲ្យខ្ញុំឃើញទន្លេដែលមានទឹកដែលផ្ដល់ជីវិត ថ្លាដូចកែវចរណៃ កំពុងចេញពីបល្ល័ង្ករបស់ព្រះនិងរបស់កូនចៀម ២ ហូរកាត់កណ្ដាលផ្លូវធំនៃក្រុងនោះ។ ហើយនៅខាងនាយនិងខាងអាយទន្លេនោះ មានដើមឈើដែលផ្ដល់ជីវិត ដែលផ្លែដប់ពីរដងរាល់ឆ្នាំ ដោយផ្លែមួយដងរៀងរាល់ខែ។ ឯស្លឹកឈើទាំងនោះគឺសម្រាប់ធ្វើឲ្យប្រជាជាតិទាំងអស់ជាសះស្បើយ។
៣ ហើយនឹងលែងមានបណ្ដាសាតទៅទៀត។ ប៉ុន្តែបល្ល័ង្ករបស់ព្រះនិងរបស់កូនចៀមនឹងនៅក្នុងក្រុងនោះ ហើយពួកខ្ញុំបម្រើរបស់ព្រះនឹងបំពេញកិច្ចបម្រើពិសិដ្ឋជូនលោក ៤ ពួកគេនឹងឃើញមុខរបស់លោក ហើយនាមលោកនឹងនៅលើថ្ងាសរបស់ពួកគេ។ ៥ ម្យ៉ាងទៀត យប់ក៏នឹងលែងមានដែរ ហើយពួកគេមិនត្រូវការភ្លើងចង្កៀង ក៏មិនមានពន្លឺថ្ងៃ ពីព្រោះព្រះយេហូវ៉ានិងបញ្ចាំងពន្លឺទៅលើពួកគេ ហើយពួកគេនឹងគ្រប់គ្រងជាស្តេចជារៀងរហូតតទៅ។
៦ រួចទេវតានោះនិយាយមកកាន់ខ្ញុំថា៖ «ពាក្យទាំងនេះគួរឲ្យទុកចិត្ត ហើយក៏ពិតត្រង់។ ពិតមែន ព្រះយេហូវ៉ាជាព្រះដែលមានប្រសាសន៍តាមរយៈពួកអ្នកប្រកាសទំនាយ បានចាត់ទេវតារបស់លោកឲ្យទៅបង្ហាញពួកខ្ញុំបម្រើរបស់លោកឲ្យឃើញអ្វីដែលត្រូវកើតឡើងក្នុងពេលឆាប់ៗខាងមុខនេះ។ ៧ ហើយមើល! ខ្ញុំនឹងមកយ៉ាងឆាប់។ អ្នកណាដែលប្រព្រឹត្តតាមសេចក្ដីក្នុងទំនាយដែលមាននៅក្នុងរមូរនេះ អ្នកនោះមានសុភមង្គល»។
៨ ខ្ញុំ យ៉ូហាន ជាអ្នកដែលបានឮនិងឃើញការទាំងនោះ។ លុះឃើញនិងឮហើយ ខ្ញុំបានលំឱនកាយដើម្បីគោរពប្រណិប័តន៍នៅជិតជើងរបស់ទេវតាដែលបានបង្ហាញការទាំងនោះដល់ខ្ញុំ។ ៩ ប៉ុន្តែទេវតានោះប្រាប់ខ្ញុំថា៖ «ចូរប្រយ័ត្ន! កុំធ្វើដូច្នោះ! ខ្ញុំគ្រាន់តែជាខ្ញុំបម្រើដូចអ្នកនិងដូចបងប្អូនរបស់អ្នក ដែលជាអ្នកប្រកាសទំនាយ និងអ្នកដែលកំពុងប្រព្រឹត្តតាមសេចក្ដីក្នុងរមូរនេះ។ ចូរគោរពប្រណិប័តន៍ព្រះ»។
១០ លោកក៏ប្រាប់ខ្ញុំថា៖ «កុំបិទត្រាលើសេចក្ដីក្នុងទំនាយដែលមាននៅក្នុងរមូរនេះឡើយ ពីព្រោះពេលកំណត់គឺជិតដល់ហើយ។ ១១ ចូរឲ្យអ្នកដែលប្រព្រឹត្តអំពើមិនសុចរិត ប្រព្រឹត្តអំពើមិនសុចរិតតទៅទៀត ឯអ្នកដែលកខ្វក់ ចូរឲ្យអ្នកនោះធ្វើឲ្យខ្លួនកខ្វក់តទៅទៀត តែចូរឲ្យអ្នកដែលសុចរិត ប្រព្រឹត្តអំពើសុចរិតតទៅទៀត ហើយចូរឲ្យអ្នកដែលបរិសុទ្ធ ធ្វើឲ្យខ្លួនបរិសុទ្ធតទៅទៀត។
១២ «‹មើល! ខ្ញុំនឹងមកយ៉ាងឆាប់ ហើយរង្វាន់ដែលខ្ញុំឲ្យក៏នៅជាមួយនឹងខ្ញុំដែរ ដើម្បីចែកឲ្យម្នាក់ៗតាមការប្រព្រឹត្តរបស់ពួកគេរៀងៗខ្លួន។ ១៣ ខ្ញុំជាអាលផានិងអូមេហ្គា* ជាអ្នកដំបូងបង្អស់ និងជាអ្នកក្រោយបង្អស់ ជាដើមនិងជាចុង។ ១៤ អ្នកណាដែលបោកអាវវែងរបស់ពួកគេ អ្នកនោះមានសុភមង្គល ព្រោះអ្នកនោះនឹងមានសិទ្ធិទៅឯដើមឈើដែលផ្ដល់ជីវិត ហើយអាចចូលក្រុងនោះតាមទ្វារកំពែង។ ១៥ នៅខាងក្រៅមានពួកឆ្កែ ពួកអ្នកដែលទាក់ទងនឹងពួកវិញ្ញាណអាក្រក់ ពួកអ្នកដែលប្រព្រឹត្តអំពើប្រាសចាកសីលធម៌ខាងផ្លូវភេទ ពួកឃាតករ ពួកអ្នកដែលគោរពបូជារូបព្រះ និងអស់អ្នកដែលភូតភរ ហើយចូលចិត្តការភូតភរ›។
១៦ «‹ខ្ញុំ យេស៊ូ បានចាត់ទេវតារបស់ខ្ញុំឲ្យទៅធ្វើជាសាក្សីបញ្ជាក់ប្រាប់អ្នករាល់គ្នាអំពីការទាំងនេះ ដើម្បីជាប្រយោជន៍ដល់ក្រុមជំនុំទាំងឡាយ។ ខ្ញុំជាឫសនិងជាពូជពង្សរបស់ដាវីឌ ក៏ជាផ្កាយព្រឹកដ៏ភ្លឺចិញ្ចាច›»។
១៧ សកម្មពលនិងកូនក្រមុំនិយាយឥតឈប់ថា៖ «មកចុះ!» ហើយអ្នកណាដែលបានឮ ចូរនិយាយថា៖ «មកចុះ!» ហើយចូរឲ្យអ្នកណាដែលស្រេក មកចុះ ចូរឲ្យអ្នកណាដែលចង់បានទឹកដែលផ្ដល់ជីវិត មកយកដោយឥតគិតថ្លៃ។
១៨ «ចំពោះអស់អ្នកដែលឮសេចក្ដីក្នុងទំនាយដែលនៅក្នុងរមូរនេះ ខ្ញុំបញ្ជាក់ប្រាប់ថា៖ ប្រសិនបើអ្នកណាបន្ថែមអ្វីទៅលើពាក្យទាំងនេះ ព្រះនឹងបន្ថែមសេចក្ដីវេទនាដែលមាននៅក្នុងរមូរនេះទៅលើអ្នកនោះ ១៩ ហើយប្រសិនបើអ្នកណាដកពាក្យណាចេញពីទំនាយក្នុងរមូរនេះ ព្រះនឹងដកចំណែករបស់អ្នកនោះចេញពីអ្វីដែលបានត្រូវសរសេរក្នុងរមូរនេះ ពោលគឺលោកនឹងមិនអនុញ្ញាតឲ្យអ្នកនោះបរិភោគផ្លែពីដើមឈើដែលផ្ដល់ជីវិត ហើយនឹងមិនឲ្យអ្នកនោះចូលក្នុងក្រុងបរិសុទ្ធឡើយ។
២០ «លោកដែលធ្វើជាសាក្សីបញ្ជាក់អំពីការទាំងនេះមានប្រសាសន៍ថា៖ ‹ខ្ញុំនឹងមកយ៉ាងឆាប់›»។
«អាមេន! លោកម្ចាស់យេស៊ូ សូមអញ្ជើញមក»។
២១ សូមឲ្យពួកអ្នកបរិសុទ្ធបានប្រកបដោយគុណដ៏វិសេសលើសលប់របស់លោកម្ចាស់យេស៊ូគ្រិស្ត។
[កំណត់សម្គាល់]
មើលសេចក្ដីពន្យល់បន្ថែមផ្នែកទី៤
មើលកំណត់សម្គាល់សកម្ម ២:៩
ភាសាក្រិច«ភ្នូម៉ា»។ មើលសេចក្ដីពន្យល់បន្ថែមផ្នែកទី៦ខ
មើលកំណត់សម្គាល់រ៉ូម ៥:១២
អាលផានិងអូមេហ្គាជាតួអក្សរទីមួយនិងតួអក្សរចុងក្រោយគេបង្អស់ក្នុងភាសាក្រិច
ភាសាក្រិច«ហាដេស»។ មើលសេចក្ដីពន្យល់បន្ថែមផ្នែកទី៧
ភាសាក្រិច«អាប៉ូស្តូឡូស»។ មានន័យថា«អ្នកដែលត្រូវគេចាត់ឲ្យទៅ»
ភាសាក្រិច«ភ្នូម៉ា»។ មើលសេចក្ដីពន្យល់បន្ថែមផ្នែកទី៦ខ
ភាសាក្រិច«សាថាណាស»។ មានន័យថា«អ្នកប្រឆាំង»ឬ«សត្រូវ»
ភាសាក្រិច«ឌីអាបូឡូស»។ មានន័យថា«អ្នកបង្កាច់បង្ខូច»
ភាសាក្រិច«ផូនៀ»។ សំដៅទៅការប្រព្រឹត្តគ្រប់បែបយ៉ាងខាងផ្លូវភេទ ដែលមិនត្រឹមត្រូវតាមច្បាប់របស់ព្រះ។ មើលសេចក្ដីពន្យល់បន្ថែមផ្នែកទី៣
ន័យត្រង់«បេះដូងនិងតម្រងនោម»
ភាសាក្រិច«ភ្នូម៉ា»។ មើលសេចក្ដីពន្យល់បន្ថែមផ្នែកទី៦ខ
ន័យត្រង់«សាលាប្រជុំ»
ភាសាក្រិច«សាថាណាស»។ មានន័យថា«អ្នកប្រឆាំង»ឬ«សត្រូវ»
ភាសាក្រិច«ភ្នូម៉ា»។ មើលសេចក្ដីពន្យល់បន្ថែមផ្នែកទី៦ខ
អ្នកខ្លះអះអាងថាយ៉ាស្បាសំដៅទៅត្បូងពេជ្រ
ភាសាក្រិច«ភ្នូម៉ា»។ មើលសេចក្ដីពន្យល់បន្ថែមផ្នែកទី៦ខ
មើលកំណត់សម្គាល់ម៉ាថ ២០:២
ភាសាក្រិច«គ្រីធី»។ មើលកំណត់សម្គាល់យ៉ូន ៦:៩
ភាសាក្រិច«ហាដេស»។ មើលសេចក្ដីពន្យល់បន្ថែមផ្នែកទី៧
ភាសាក្រិច«ផ្ស៊ីគី»
នេះសំដៅទៅក្រណាត់ពណ៌ខ្មៅដែលធ្វើពីរោមសត្វហើយប្រើសម្រាប់ធ្វើបាវ
ភាសាក្រិច«ផ្ស៊ីគី»។ មើលសេចក្ដីពន្យល់បន្ថែមផ្នែកទី៦ក
ភាសាហេប្រឺ មានន័យថា«សេចក្ដីហិនវិនាស»
ភាសាក្រិច មានន័យថា«អ្នកបំផ្លាញ»
ជ្រុងដែលមានរាងដូចស្នែង
ភាសាក្រិច«ដាយម៉ូនីអន»។ សំដៅទៅពួកទេវតាអាក្រក់
ភាសាក្រិច«ផូនៀ»។ សំដៅទៅការប្រព្រឹត្តគ្រប់បែបយ៉ាងខាងផ្លូវភេទ ដែលមិនត្រឹមត្រូវតាមច្បាប់របស់ព្រះ។ មើលសេចក្ដីពន្យល់បន្ថែមផ្នែកទី៣
ឬ«មេឃ»
ឬ«ស្ថានសួគ៌»
ឬ«បោះចោលទាំងស្រុង»
ភាសាក្រិច«ភ្នូម៉ា»។ មើលសេចក្ដីពន្យល់បន្ថែមផ្នែកទី៦ខ
ឬ«ស្ថានសួគ៌»
ន័យត្រង់«ឌីអាបូឡូស(អ្នកបង្កាច់បង្ខូច) និងសាថាណាស(អ្នកប្រឆាំង)»
ឬ«ស្ថានសួគ៌»
ន័យត្រង់«សក្ខីភាពរបស់ពួកគេ»
ភាសាក្រិច«ផ្ស៊ីគី»។ មើលសេចក្ដីពន្យល់បន្ថែមផ្នែកទី៦ក
ឬ«ស្ថានសួគ៌»
ភាសាក្រិច«ភ្នូម៉ា»។ មើលសេចក្ដីពន្យល់បន្ថែមផ្នែកទី៦ខ
ប្រហែល២៩៦គីឡូម៉ែត្រ
ភាសាក្រិច«ផ្ស៊ីគី»។ មើលសេចក្ដីពន្យល់បន្ថែមផ្នែកទី៦ក
ភាសាក្រិច«ភ្នូម៉ា»។ មើលសេចក្ដីពន្យល់បន្ថែមផ្នែកទី៦ខ
ន័យត្រង់«ដើរអាក្រាត»។ ពាក្យភាសាក្រិច«ជីមណូស» ក៏មានន័យថា«បិទបាំងខ្លួនតែបន្ដិចបន្តួចឬមានតែសម្លៀកបំពាក់ក្នុង»
ប្រហែល២០,៤ គីឡូក្រាម
ភាសាក្រិច«ភ្នូម៉ា»។ សូមមើលសេចក្ដីពន្យល់បន្ថែមផ្នែកទី៦ខ
ឬ«មេឃ»
ភាសាក្រិច«ដាយម៉ូនីអន»។ សំដៅទៅពួកទេវតាអាក្រក់
ភាសាក្រិច«ផូនៀ»។ សំដៅទៅការប្រព្រឹត្តគ្រប់បែបយ៉ាងខាងផ្លូវភេទ ដែលមិនត្រឹមត្រូវតាមច្បាប់របស់ព្រះ។ មើលសេចក្ដីពន្យល់បន្ថែមផ្នែកទី៣
ភាសាក្រិច«ផ្ស៊ីគី»។ មើលសេចក្ដីពន្យល់បន្ថែមផ្នែកទី៦ក
ភាសាក្រិច«អាប៉ូស្តូឡូស»។ មានន័យថា«អ្នកដែលត្រូវគេចាត់ឲ្យទៅ»
ភាសាក្រិច«ហាឡេលូអ៊ីយ៉ា»
ឬ«មេឃ»
ន័យត្រង់«ឌីអាបូឡូស(អ្នកបង្កាច់បង្ខូច) និងសាថាណាស(អ្នកប្រឆាំង)»
ភាសាក្រិច«ហាដេស»។ មើលសេចក្ដីពន្យល់បន្ថែមផ្នែកទី៧
មើលកំណត់សម្គាល់បប ១:៨
ភាសាក្រិច«ភ្នូម៉ា»។ មើលសេចក្ដីពន្យល់បន្ថែមផ្នែកទី៦ខ
ប្រហែល២.២២០គីឡូម៉ែត្រ
ប្រហែល៦៤ម៉ែត្រ
មើលកំណត់សម្គាល់បប ១:៨