សំបុត្រទី២ជូនចំពោះគ្រិស្តសាសនិកនៅក្រុងកូរិនថូស
១ ពីខ្ញុំ ប៉ូល ដែលជាសាវ័ក*របស់គ្រិស្តយេស៊ូតាមបំណងប្រាថ្នារបស់ព្រះ ព្រមទាំងធីម៉ូថេ+ជាបងប្អូនរបស់យើង ជូនចំពោះក្រុមជំនុំរបស់ព្រះនៅឯក្រុងកូរិនថូស និងពួកអ្នកបរិសុទ្ធទាំងអស់ដែលនៅខេត្តអាខេយ៉ា៖+
២ សូមឲ្យអ្នករាល់គ្នាបានប្រកបដោយគុណដ៏វិសេសលើសលប់និងសេចក្ដីសុខសាន្តពីព្រះជាបិតារបស់យើង និងពីលោកម្ចាស់យេស៊ូគ្រិស្ត។
៣ សូមសរសើរព្រះ ជាបិតារបស់លោកយេស៊ូគ្រិស្តដែលជាម្ចាស់របស់យើង+ ហើយជាបិតានៃសេចក្ដីមេត្តាករុណា+ និងជាព្រះនៃការសម្រាលទុក្ខគ្រប់យ៉ាង+ ៤ លោកសម្រាលទុក្ខ*យើងពីសេចក្ដីវេទនាសព្វបែបយ៉ាង+ ដើម្បីឲ្យយើងអាចសម្រាលទុក្ខពួកអ្នក+ដែលជួបប្រទះការលំបាក*ផ្សេងៗ តាមរយៈការសម្រាលទុក្ខដែលយើងកំពុងទទួលពីព្រះ។+ ៥ ព្រោះដូចយើងរងទុក្ខជាច្រើនដើម្បីគ្រិស្ត+ នោះយើងក៏ទទួលការសម្រាលទុក្ខជាច្រើនតាមរយៈគ្រិស្តដែរ។ ៦ បើយើងជួបការលំបាក* គឺដើម្បីឲ្យអ្នករាល់គ្នាទទួលការសម្រាលទុក្ខនិងសេចក្ដីសង្គ្រោះ ហើយបើយើងទទួលការសម្រាលទុក្ខ នោះអ្នករាល់គ្នាក៏ទទួលការសម្រាលទុក្ខដែរ ហើយនេះនឹងជួយអ្នករាល់គ្នាឲ្យស៊ូទ្រាំទុក្ខលំបាកដូចយើងស៊ូទ្រាំដែរ។ ៧ ដូច្នេះ សេចក្ដីសង្ឃឹមរបស់យើងចំពោះអ្នករាល់គ្នាមិនរង្គោះរង្គើឡើយ ដោយដឹងថាអ្នករាល់គ្នារងទុក្ខលំបាកដូចយើង ហើយអ្នករាល់គ្នាក៏នឹងបានទទួលការសម្រាលទុក្ខដូចយើងដែរ។+
៨ បងប្អូនអើយ យើងចង់ឲ្យអ្នករាល់គ្នាដឹងអំពីសេចក្ដីវេទនាដែលយើងបានជួបប្រទះនៅខេត្តអាស៊ី។*+ នៅទីនោះ យើងមានបន្ទុកធ្ងន់ហួសពីកម្លាំងយើង រហូតដល់ធ្វើឲ្យយើងគិតថាយើងប្រហែលជានឹងបាត់បង់ជីវិត។+ ៩ តាមការពិត យើងមានអារម្មណ៍ថា យើងបានត្រូវកាត់ទោសប្រហារជីវិត។ ប៉ុន្តែ នេះគឺដើម្បីឲ្យយើងទុកចិត្តព្រះ+ដែលប្រោសមនុស្សឲ្យរស់ពីស្លាប់ឡើងវិញ ជាជាងទុកចិត្តខ្លួនយើង។ ១០ ដូច្នេះ លោកបានសង្គ្រោះយើងឲ្យរួចពីស្ថានភាពដែលមានគ្រោះថ្នាក់ដល់ជីវិត ក៏នឹងសង្គ្រោះយើងម្ដងទៀត។ យើងសង្ឃឹមលើលោកថា លោកនឹងសង្គ្រោះយើងតទៅទៀត។+ ១១ អ្នករាល់គ្នាក៏អាចជួយយើងដោយអធិដ្ឋានអង្វរព្រះឲ្យយើងដែរ+ ពីព្រោះព្រះនឹងតបឆ្លើយសេចក្ដីអធិដ្ឋានរបស់មនុស្សជាច្រើន ហើយលោកនឹងជួយយើង។ ជាលទ្ធផល មនុស្សជាច្រើននឹងថ្លែងអំណរគុណដល់ព្រះ។+
១២ យើងអាចមានហេតុអួតអំពីរឿងនេះ៖ សមត្ថភាពវិនិច្ឆ័យរបស់យើងបញ្ជាក់ថា យើងបានប្រព្រឹត្តដោយស្មោះអស់ពីចិត្តនិងដោយសេចក្ដីបរិសុទ្ធដែលមកពីព្រះ កាលដែលយើងនៅក្នុងពិភពលោកនេះ ហើយជាពិសេសក្នុងចំណោមអ្នករាល់គ្នា។ យើងមិនមែនពឹងលើប្រាជ្ញារបស់ពិភពលោកនេះទេ+ តែយើងពឹងលើគុណដ៏វិសេសលើសលប់របស់ព្រះ។ ១៣ ព្រោះតាមពិត យើងសរសេរតែសេចក្ដីដែលអ្នករាល់គ្នាអាចអាន*និងយល់ ជាសេចក្ដីដែលខ្ញុំសង្ឃឹមថាអ្នករាល់គ្នានឹងបន្តយល់យ៉ាងច្បាស់លាស់រហូតដល់ទីបញ្ចប់ ១៤ ដូចអ្នករាល់គ្នាខ្លះបានយល់ហើយថា យើងជាហេតុឲ្យអ្នករាល់គ្នាអួត ដូចដែលយើងនឹងមានហេតុអួតអំពីអ្នករាល់គ្នាដែរ នៅថ្ងៃនៃលោកយេស៊ូជាម្ចាស់របស់យើង។
១៥ ម្ល៉ោះហើយ ដោយមានទំនុកចិត្តដូច្នេះ ពីមុនខ្ញុំមានបំណងមកឯអ្នករាល់គ្នា ដើម្បីឲ្យអ្នករាល់គ្នាមានហេតុអរសប្បាយ*ជាលើកទី២។ ១៦ ព្រោះខ្ញុំមានបំណងទៅលេងអ្នករាល់គ្នា ពេលដែលខ្ញុំធ្វើដំណើរតាមផ្លូវទៅតំបន់ម៉ាសេដូន រួចត្រឡប់មកឯអ្នករាល់គ្នាពេលមកពីតំបន់ម៉ាសេដូនវិញ។ បន្ទាប់មក ឲ្យអ្នករាល់គ្នាជូនដំណើរខ្ញុំទៅតំបន់យូឌា។+ ១៧ ពេលដែលខ្ញុំមានបំណងធ្វើដូច្នោះ ខ្ញុំមិនបានចាត់ទុកថាជារឿងតូចតាចទេ មែនទេ? តើខ្ញុំមានបំណងធ្វើដូច្នោះ ដោយសារខ្ញុំខំស្វែងរកប្រយោជន៍ផ្ទាល់ខ្លួនឬ បានជាខ្ញុំនិយាយថា«មែនៗ» រួចថា«ទេៗ»? ១៨ ប៉ុន្តែ ដូចអ្នករាល់គ្នាទុកចិត្តព្រះ នោះអ្នករាល់គ្នាអាចទុកចិត្តសម្ដីយើងបាន។ យើងមិនមែនថា«មែន» រួចថា«ទេ»វិញឡើយ។ ១៩ ព្រោះយេស៊ូគ្រិស្តដែលជាបុត្រព្រះ និងដែលបានត្រូវផ្សព្វផ្សាយក្នុងចំណោមអ្នករាល់គ្នាតាមរយៈយើង ពោលគឺខ្ញុំប៉ូល ស៊ីលវេនុស* និងធីម៉ូថេ+ លោកមិនបានទៅជា«មែន»ផង ហើយ«ទេ»ផងនោះឡើយ។ ប៉ុន្តែ ក្នុងករណីរបស់លោក «មែន» គឺ«មែន»។ ២០ ទោះជាសេចក្ដីសន្យារបស់ព្រះមានច្រើនយ៉ាងណាក៏ដោយ សេចក្ដីសន្យាទាំងអស់នោះបានទៅជា«មែន»តាមរយៈលោក។+ ដូច្នេះ តាមរយៈលោក យើងនិយាយ«អាមេន»ទៅកាន់ព្រះ+ ដើម្បីយើងអាចលើកតម្កើងព្រះ។ ២១ ប៉ុន្តែ លោកដែលធានាថាយើងនិងអ្នករាល់គ្នាជារបស់គ្រិស្ត ហើយដែលបានរើសតាំងយើង គឺជាព្រះ។+ ២២ លោកក៏បានបោះត្រាលើយើងដែរ+ ហើយឲ្យអ្វីមួយមកយើងទុកជាការបញ្ចាំចិត្ត ពោលគឺឫទ្ធានុភាព+របស់លោកនៅក្នុងចិត្តយើង។
២៣ ឥឡូវ ខ្ញុំសូមស្បថចំពោះព្រះដោយដាក់ជីវិត*ថា ខ្ញុំមិនទាន់មកក្រុងកូរិនថូសទេ ពីព្រោះខ្ញុំមិនចង់ធ្វើឲ្យអ្នករាល់គ្នាពិបាកចិត្តខ្លាំងជាងនេះ។ ២៤ មិនមែនថាយើងជាម្ចាស់លើជំនឿរបស់អ្នករាល់គ្នាទេ+ តែយើងជាអ្នករួមការងារដើម្បីឲ្យអ្នករាល់គ្នាមានអំណរ ព្រោះអ្នករាល់គ្នាកំពុងកាន់ជំហរមាំមួនដោយសារជំនឿរបស់អ្នករាល់គ្នា។
២ ព្រោះខ្ញុំបានសម្រេចចិត្តថា ពេលខ្ញុំមកឯអ្នករាល់គ្នាម្ដងទៀត ខ្ញុំនឹងមិនធ្វើឲ្យអ្នករាល់គ្នាព្រួយចិត្តទេ។ ២ ព្រោះប្រសិនបើខ្ញុំធ្វើឲ្យអ្នករាល់គ្នាព្រួយចិត្ត តើនឹងមានអ្នកណាធ្វើឲ្យខ្ញុំសប្បាយចិត្តវិញ ក្រៅពីអ្នកដែលខ្ញុំធ្វើឲ្យព្រួយចិត្តនោះ? ៣ ខ្ញុំបានសរសេរសេចក្ដីទាំងនេះ ដើម្បីកុំឲ្យពួកអ្នកដែលធ្វើឲ្យខ្ញុំមានអំណរ ទៅជាហេតុឲ្យខ្ញុំព្រួយចិត្តវិញពេលដែលខ្ញុំមកដល់។ ព្រោះខ្ញុំមានទំនុកចិត្តថា អ្វីដែលនាំឲ្យខ្ញុំមានអំណរ ក៏ជាអ្វីដែលនាំឲ្យអ្នករាល់គ្នាមានអំណរដែរ។ ៤ ខ្ញុំបានសរសេរមកកាន់អ្នករាល់គ្នាទាំងមានសេចក្ដីវេទនានិងកើតទុក្ខយ៉ាងខ្លាំងក្នុងចិត្ត ថែមទាំងស្រក់ទឹកភ្នែកទៀតផង មិនមែនដើម្បីធ្វើឲ្យអ្នករាល់គ្នាព្រួយចិត្តឡើយ+ តែដើម្បីឲ្យអ្នករាល់គ្នាដឹងថាខ្ញុំស្រឡាញ់អ្នករាល់គ្នាខ្លាំងណាស់។
៥ ប្រសិនបើមានអ្នកណាធ្វើឲ្យព្រួយចិត្ត+ អ្នកនោះមិនបានធ្វើឲ្យខ្ញុំព្រួយចិត្តទេ។ ប៉ុន្តែ អ្នកនោះបានធ្វើឲ្យអ្នកទាំងអស់គ្នាព្រួយចិត្តខ្លះដែរ តែមិនមែនខ្ញុំចង់និយាយខ្លាំងពេកទេអំពីរឿងនេះ។ ៦ ការប្រដៅតម្រង់ដែលបុរសនោះបានទទួលពីបងប្អូនភាគច្រើន គឺគ្រប់គ្រាន់ហើយ។ ៧ ឥឡូវ អ្នករាល់គ្នាគួរតែមេត្តាអភ័យទោសឲ្យបុរសនោះ ហើយសម្រាលទុក្ខគាត់+ ដើម្បីកុំឲ្យគាត់ព្រួយចិត្ត*ខ្លាំងហួសហេតុពេក។+ ៨ ដូច្នេះ ខ្ញុំចង់បំផុសទឹកចិត្តអ្នករាល់គ្នាឲ្យពង្រឹងទំនុកចិត្តគាត់ថា អ្នករាល់គ្នាស្រឡាញ់គាត់។+ ៩ ព្រោះខ្ញុំក៏បានសរសេរមកកាន់អ្នករាល់គ្នាក្នុងបំណងនេះដែរ គឺដើម្បីឲ្យដឹងថាអ្នករាល់គ្នាស្ដាប់បង្គាប់ក្នុងគ្រប់ការទាំងអស់ឬយ៉ាងណា។ ១០ ប្រសិនបើអ្នករាល់គ្នាអភ័យទោសឲ្យអ្នកណា ខ្ញុំក៏អភ័យទោសឲ្យអ្នកនោះដែរ។ តាមការពិត ប្រសិនបើខ្ញុំបានអភ័យទោសឲ្យ (បើខ្ញុំបានអភ័យទោសឲ្យចំពោះរឿងណាមួយ) នោះគឺដើម្បីឲ្យអ្នករាល់គ្នាទទួលប្រយោជន៍ ដោយមានគ្រិស្តជាសាក្សី ១១ ដើម្បីកុំឲ្យសាថាន*មានឱកាសឈ្នះយើងឡើយ+ ព្រោះមិនមែនយើងមិនដឹងអំពីកលល្បិច*ទាំងប៉ុន្មានរបស់សាថានទេ។+
១២ ពេលដែលខ្ញុំទៅដល់ក្រុងត្រូអាស+ដើម្បីប្រកាសដំណឹងល្អអំពីគ្រិស្ត មានទ្វារមួយបើកចំហឲ្យខ្ញុំបំពេញកិច្ចការរបស់លោកម្ចាស់ ១៣ តែខ្ញុំមិនបានធូរចិត្តសោះ ដោយសារខ្ញុំរកទីតុស+ជាបងប្អូនរបស់ខ្ញុំមិនឃើញ។ ដូច្នេះ ខ្ញុំក៏លាពួកអ្នកកាន់តាមនៅទីនោះ រួចចេញដំណើរទៅតំបន់ម៉ាសេដូន។+
១៤ ប៉ុន្តែ ខ្ញុំអរគុណព្រះដែលតែងតែនាំមុខយើងទាំងអស់គ្នាក្នុងការហែក្បួនអបអរជ័យជម្នះជាមួយនឹងគ្រិស្ត ហើយក្លិនក្រអូបនៃចំណេះអំពីព្រះបានសាយភាយដល់គ្រប់ទីកន្លែងតាមរយៈយើង! ១៥ ព្រោះចំពោះព្រះ យើងជាក្លិនក្រអូបនៃដំណឹងអំពីគ្រិស្តក្នុងចំណោមពួកអ្នកដែលកំពុងទទួលសេចក្ដីសង្គ្រោះ និងក្នុងចំណោមពួកអ្នកដែលកំពុងវិនាស។ ១៦ ចំពោះពួកអ្នកដែលកំពុងវិនាស នោះជាក្លិននៃសេចក្ដីស្លាប់ដែលនាំទៅដល់សេចក្ដីស្លាប់+ តែចំពោះពួកអ្នកដែលកំពុងទទួលសេចក្ដីសង្គ្រោះ នោះជាក្លិននៃជីវិតដែលនាំទៅដល់ជីវិត។ តើអ្នកណាមានគុណសម្បត្តិគ្រប់គ្រាន់ដើម្បីបំពេញកិច្ចការទាំងនេះ? ១៧ យើងមានគុណសម្បត្តិគ្រប់គ្រាន់ ព្រោះយើងមិនមែនជាអ្នកជួញដូរបណ្ដាំរបស់ព្រះ+ ដូចមនុស្សជាច្រើននោះឡើយ តែយើងនិយាយដោយចិត្តស្មោះក្នុងនាមជាអ្នកកាន់តាមគ្រិស្តនៅចំពោះមុខព្រះ និងក្នុងនាមជាអ្នកដែលព្រះបានចាត់ឲ្យទៅ។
៣ តើយើងត្រូវណែនាំខ្លួនឲ្យអ្នករាល់គ្នាស្គាល់ម្ដងទៀតឬ? ហើយតើយើងត្រូវការសំបុត្របញ្ជាក់ពីអ្នករាល់គ្នា ឬត្រូវឲ្យសំបុត្របញ្ជាក់អំពីយើងដល់អ្នករាល់គ្នាដូចមនុស្សឯទៀតទេ? ២ អ្នករាល់គ្នាជាសំបុត្ររបស់យើង+ដែលបានត្រូវចារទុកក្នុងចិត្ត និងជាសំបុត្រដែលមនុស្សជាតិទាំងឡាយកំពុងអាននិងស្គាល់។ ៣ ព្រោះគឺជាក់ស្ដែងថាអ្នករាល់គ្នាជាសំបុត្ររបស់គ្រិស្ត ដែលយើងបានសរសេរក្នុងនាមជាអ្នកបម្រើ+ មិនមែនសរសេរដោយប្រើទឹកខ្មៅទេ តែដោយឫទ្ធានុភាពរបស់ព្រះដែលមានជីវិតរស់នៅ ហើយមិនមែនលើបន្ទះថ្មទេ+ តែលើចិត្តវិញ។+
៤ តាមរយៈគ្រិស្ត យើងមានទំនុកចិត្តបែបនេះចំពោះព្រះ។ ៥ យើងមិនមែនចាត់ទុកថាយើងមានគុណសម្បត្តិគ្រប់គ្រាន់ដោយសារការខំព្យាយាមរបស់យើងទេ តែព្រះធ្វើឲ្យយើងមានគុណសម្បត្តិគ្រប់គ្រាន់វិញ។+ ៦ លោកបានធ្វើឲ្យយើងមានគុណសម្បត្តិគ្រប់គ្រាន់ ដើម្បីធ្វើជាអ្នកបម្រើនៃកិច្ចព្រមព្រៀងថ្មី+ មិនមែននៃក្បួនច្បាប់ជាលាយលក្ខណ៍អក្សរទេ+ តែជាអ្នកបម្រើនៃឫទ្ធានុភាពរបស់ព្រះ ព្រោះក្បួនច្បាប់ជាលាយលក្ខណ៍អក្សរផ្ដន្ទាទោសឲ្យស្លាប់+ តែឫទ្ធានុភាពរបស់ព្រះធ្វើឲ្យមានជីវិតរស់នៅ។+
៧ ម្យ៉ាងទៀត ក្បួនច្បាប់ដែលនាំទៅដល់សេចក្ដីស្លាប់ ហើយដែលបានត្រូវចារឹកលើថ្ម+ បានកើតឡើងប្រកបដោយភាពរុងរឿង។ ហេតុនោះហើយបានជាពួកកូន*អ៊ីស្រាអែលមិនអាចសម្លឹងមើលមុខរបស់ម៉ូសេ ដោយសាររស្មីរុងរឿងដ៏ភ្លឺចេញពីមុខរបស់គាត់+ តែភាពរុងរឿងនោះបានត្រូវធ្វើឲ្យបាត់សូន្យទៅ។ ៨ ដូច្នេះ ការចែកចាយឫទ្ធានុភាពរបស់ព្រះ+គួរតែប្រកបដោយភាពរុងរឿងខ្លាំងជាងនោះទៅទៀត មែនទេ?+ ៩ ព្រោះប្រសិនបើក្បួនច្បាប់ដែលផ្ដន្ទាទោស+គឺប្រកបដោយភាពរុងរឿង+ នោះការចែកចាយភាពសុចរិតច្បាស់ជាប្រកបដោយភាពរុងរឿងខ្លាំងជាងនោះទៅទៀត!+ ១០ តាមការពិត សូម្បីតែអ្វីដែលបានត្រូវធ្វើឲ្យមានភាពរុងរឿងពីមុន អ្វីនោះបានត្រូវដកហូតភាពរុងរឿងនោះចេញវិញ ព្រោះតែភាពរុងរឿងដែលវិសេសជាងនោះទៅទៀត។+ ១១ ព្រោះប្រសិនបើអ្វីដែលត្រូវធ្វើឲ្យបាត់សូន្យទៅ បានត្រូវធ្វើឡើងប្រកបដោយភាពរុងរឿង+ នោះអ្វីដែលនៅគង់វង្សត្រូវប្រកបដោយភាពរុងរឿងខ្លាំងជាងនោះទៅទៀត!+
១២ ដោយសារយើងមានសេចក្ដីសង្ឃឹមនេះ+ យើងនិយាយដោយមានចិត្តក្លាហានក្រៃលែង ១៣ ហើយយើងមិនធ្វើដូចពេលដែលម៉ូសេយកស្បៃមកគ្របមុខគាត់+ ដើម្បីកុំឲ្យពួកកូនអ៊ីស្រាអែលសម្លឹងមើលចុងបញ្ចប់នៃអ្វីដែលត្រូវធ្វើឲ្យបាត់សូន្យទៅ។ ១៤ ប៉ុន្តែ សមត្ថភាពរិះគិតរបស់ពួកគេបានទៅជាស្ពឹក។+ ព្រោះរហូតដល់សព្វថ្ងៃនេះ ពេលដែលពួកគេអានកិច្ចព្រមព្រៀងចាស់+ នោះនៅតែមានស្បៃលើគំនិតរបស់ពួកគេដដែល ពីព្រោះស្បៃនោះអាចត្រូវដកចេញបាន លុះត្រាតែពួកគេមានជំនឿលើគ្រិស្ត។+ ១៥ តាមពិត រហូតដល់សព្វថ្ងៃនេះ ពេលណាពួកគេអានអ្វីដែលម៉ូសេបានសរសេរ+ ស្បៃនោះគឺនៅលើចិត្តរបស់ពួកគេ។+ ១៦ ប៉ុន្តែ ពេលដែលពួកគេបែរមកគោរពប្រណិប័តន៍ព្រះយេហូវ៉ា* ស្បៃនោះក៏ត្រូវដកចេញ។+ ១៧ ឯព្រះយេហូវ៉ា*ជាវិញ្ញាណ+ ហើយកន្លែងណាដែលមានឫទ្ធានុភាពរបស់ព្រះយេហូវ៉ា* កន្លែងនោះមានសេរីភាព។+ ១៨ ឯយើងទាំងអស់គ្នាលែងមានស្បៃគ្របមុខទៀត ហើយយើងប្រៀបដូចជាកញ្ចក់ឆ្លុះដែលជះសិរីរុងរឿងរបស់ព្រះយេហូវ៉ា។* ក្នុងពេលដែលយើងធ្វើដូច្នេះ យើងបានត្រូវធ្វើឲ្យផ្លាស់ប្រែឲ្យកាន់តែមានលក្ខណៈដូចព្រះ ដើម្បីយើងអាចជះសិរីរុងរឿងរបស់លោកកាន់តែខ្លាំងឡើងៗ ដូចដែលព្រះយេហូវ៉ា*ជាវិញ្ញាណធ្វើឲ្យយើងផ្លាស់ប្រែ។+
៤ ហេតុនេះ ដោយសារយើងមានកិច្ចបម្រើនេះតាមរយៈសេចក្ដីមេត្តាករុណាដែលបានត្រូវបង្ហាញចំពោះយើង នោះយើងមិនឈប់តស៊ូទេ។ ២ ប៉ុន្តែ យើងបានលះចោលអំពើលួចលាក់ដែលគួរឲ្យអៀនខ្មាស ហើយមិនប្រព្រឹត្តដោយកិច្ចកល ឬដោយបំប្លែងបណ្ដាំរបស់ព្រះឡើយ។+ ប៉ុន្តែ នៅចំពោះមុខព្រះ យើងធ្វើឲ្យមនុស្សទាំងឡាយស្គាល់សេចក្ដីពិត ដោយទុកគំរូល្អដល់ពួកគេ។*+ ៣ ប្រសិនបើដំណឹងល្អដែលយើងប្រកាសបានត្រូវគ្របបាំង* នោះគឺបានត្រូវគ្របបាំងក្នុងចំណោមពួកអ្នកដែលកំពុងវិនាស។ ៤ ក្នុងករណីអ្នកទាំងនោះ ព្រះនៃរបៀបរបបពិភពលោក*នេះ+បានធ្វើឲ្យគំនិតរបស់ពួកអ្នកមិនជឿទៅជាងងឹត+ ដើម្បីកុំឲ្យពួកគេទទួលពន្លឺនៃដំណឹងល្អដ៏រុងរឿងអំពីគ្រិស្តដែលបង្ហាញឲ្យយើងស្គាល់ព្រះ។+ ៥ ព្រោះយើងមិនផ្សព្វផ្សាយអំពីខ្លួនយើងទេ តែយើងផ្សព្វផ្សាយអំពីលោកយេស៊ូគ្រិស្តថា លោកជាម្ចាស់ ហើយថាយើងជាខ្ញុំបម្រើរបស់អ្នករាល់គ្នាដើម្បីលោកយេស៊ូ។ ៦ ព្រោះគឺជាព្រះដែលមានប្រសាសន៍ថា៖ «ចូរឲ្យពន្លឺភ្លឺចេញពីភាពងងឹត»+ ហើយតាមរយៈផ្ទៃមុខរបស់គ្រិស្ត ព្រះបានចែងចាំងមកលើចិត្តយើង+ ដើម្បីបំភ្លឺចិត្តយើងដោយចំណេះដ៏រុងរឿងអំពីព្រះ។
៧ ក៏ប៉ុន្តែ យើងមានទ្រព្យវិសេសនេះ+ក្នុងភាជនៈដី*+ ដើម្បីសឲ្យឃើញថា ឫទ្ធានុភាពដែលលើសពីធម្មតាបានមកពីព្រះ មិនមែនមកពីយើងទេ។+ ៨ យើងត្រូវគេគាបសង្កត់នៅគ្រប់ច្រកល្ហក តែមិនមែនដោយរើមិនរួចឡើយ យើងទាល់គំនិត តែមិនមែនទាល់ច្រកទេ។*+ ៩ យើងត្រូវគេបៀតបៀន តែមិនបានត្រូវបោះបង់ចោលឡើយ+ យើងត្រូវគេផ្ដួលដល់ដី តែមិនត្រូវគេបំផ្លាញទេ។+ ១០ ទោះជាយើងទៅកន្លែងណាក៏ដោយ យើងត្រូវស៊ូទ្រាំទុក្ខវេទនាដ៏ធ្ងន់ធ្ងរ* ដូចដែលលោកយេស៊ូបានរងទុក្ខដែរ។+ នេះគឺដើម្បីឲ្យជីវិតរបស់លោកយេស៊ូបានត្រូវសឲ្យឃើញក្នុងរូបកាយរបស់យើង។ ១១ ព្រោះយើងដែលនៅរស់ តែងតែប្រឈមមុខនឹងសេចក្ដីស្លាប់+ដើម្បីលោកយេស៊ូ ដើម្បីឲ្យជីវិតរបស់លោកយេស៊ូត្រូវសឲ្យឃើញក្នុងយើង។* ១២ ដូច្នេះ សេចក្ដីស្លាប់កំពុងមានសកម្មភាពក្នុងយើង តែជីវិតកំពុងមានសកម្មភាពក្នុងអ្នករាល់គ្នា។
១៣ នេះជាអ្វីដែលបទគម្ពីរចែងថា៖ «ខ្ញុំមានជំនឿ ដូច្នេះខ្ញុំនិយាយ»។+ យើងក៏ដូចគ្នាដែរ យើងមានជំនឿ ដូច្នេះយើងនិយាយ។ ១៤ ពីព្រោះយើងដឹងថា ព្រះបានប្រោសលោកយេស៊ូឲ្យរស់ឡើងវិញ នោះលោកក៏នឹងប្រោសយើងឲ្យរស់ឡើងវិញ ដូចប្រោសលោកយេស៊ូដែរ ហើយព្រះនឹងប្រគល់យើងនិងអ្នករាល់គ្នាទៅលោកយេស៊ូ។+ ១៥ ព្រោះអ្វីៗទាំងអស់នេះគឺដើម្បីឲ្យអ្នករាល់គ្នាទទួលប្រយោជន៍។ យ៉ាងនេះ គុណដ៏វិសេសលើសលប់នឹងមានកាន់តែច្រើនឡើងៗ ដោយសារមនុស្សជាច្រើនអរគុណព្រះ ដើម្បីឲ្យលោកទទួលការសរសើរតម្កើង។+
១៦ ហេតុនេះ យើងមិនឈប់តស៊ូឡើយ ទោះជារូបកាយរបស់យើងកំពុងខូចទៅក៏ដោយ តែចិត្ត*របស់យើងទទួលកម្លាំងជាថ្មីរាល់ថ្ងៃជានិច្ច។ ១៧ ព្រោះទោះជាសេចក្ដីវេទនា*ដែលយើងជួបប្រទះមានតែមួយរយៈពេលខ្លី ហើយស្រាលក៏ដោយ សេចក្ដីវេទនានោះនាំឲ្យយើងទទួលសិរីរុងរឿងដែលកាន់តែឧត្ដុង្គឧត្ដម និងដែលស្ថិតស្ថេរជារៀងរហូត។+ ១៨ នៅពេលជាមួយគ្នានោះដែរ យើងផ្ដោតអារម្មណ៍ទៅលើអ្វីដែលយើងមើលមិនឃើញ មិនមែនលើអ្វីដែលយើងមើលឃើញនោះទេ។+ ព្រោះអ្វីដែលយើងមើលឃើញ គឺគ្រាន់តែបណ្ដោះអាសន្ន តែអ្វីដែលយើងមើលមិនឃើញ នោះស្ថិតស្ថេរជារៀងរហូត។
៥ ព្រោះយើងដឹងថា បើត្រសាលនេះដែលជាផ្ទះ*របស់យើងនៅផែនដីត្រូវរំលំចោល*+ នោះព្រះនឹងផ្ដល់ឲ្យយើងនូវផ្ទះមួយដែលស្ថិតស្ថេរជារៀងរហូតនៅស្ថានសួគ៌ មិនមែនដូចផ្ទះដែលធ្វើឡើងដោយដៃមនុស្សឡើយ។+ ២ ព្រោះក្នុងផ្ទះ*នេះយើងថ្ងូរ ដោយប្រាថ្នាយ៉ាងខ្លាំងចង់បំពាក់ខ្លួនដោយផ្ទះ*ពីស្ថានសួគ៌ដែលបានត្រូវរៀបចំសម្រាប់យើង។+ ៣ ដូច្នេះ ក្រោយពីយើងបានបំពាក់ខ្លួនដោយផ្ទះនោះហើយ យើងនឹងមិនអាក្រាតទេ។ ៤ តាមការពិត យើងដែលជាអ្នកនៅក្នុងត្រសាលនេះថ្ងូរនិងមានទុក្ខធ្ងន់ ដោយសារយើងមិនចង់ដោះត្រសាលនេះចេញទេ តែយើងចង់បំពាក់ខ្លួនដោយផ្ទះមួយនោះវិញ+ ដើម្បីឲ្យជីវិតដែលគ្មានទីបញ្ចប់លេបបាត់អ្វីដែលអាចស្លាប់បាន។+ ៥ ឯលោកដែលបានរៀបចំយើងសម្រាប់ការនេះ គឺជាព្រះ+ ហើយលោកបានឲ្យអ្វីមួយមកយើងទុកជាការបញ្ចាំចិត្ត ពោលគឺឫទ្ធានុភាពរបស់លោក។+
៦ ដូច្នេះ យើងមានចិត្តក្លាហានជានិច្ច ហើយយើងដឹងថាដរាបណាយើងរស់នៅ*ក្នុងរូបកាយនេះ ដរាបនោះយើងមិននៅជាមួយនឹងលោកម្ចាស់ទេ+ ៧ ព្រោះយើងរស់នៅស្របតាមជំនឿ មិនមែនតាមអ្វីដែលយើងមើលឃើញនោះទេ។ ៨ ប៉ុន្តែ យើងមានចិត្តក្លាហាន ហើយពេញចិត្តតាំងលំនៅ*ជាមួយនឹងលោកម្ចាស់ ជាជាងនៅក្នុងរូបកាយនេះ។+ ៩ ដូច្នេះ យើងតាំងចិត្តធ្វើឲ្យលោកពេញចិត្តយើង ទោះជាយើងមានលំនៅជាមួយនឹងលោក ឬយើងគ្មានលំនៅជាមួយនឹងលោកក៏ដោយ។ ១០ ព្រោះធាតុពិតរបស់យើងទាំងអស់គ្នានឹងត្រូវសឲ្យឃើញនៅមុខកន្លែងកាត់ក្ដីរបស់គ្រិស្ត ដើម្បីឲ្យម្នាក់ៗទទួលរង្វាន់តាមការដែលខ្លួនបានប្រព្រឹត្តតាមរយៈរូបកាយ ទោះជាការប្រព្រឹត្តនោះល្អ ឬអាក្រក់ក៏ដោយ។+
១១ ម្ល៉ោះហើយ ដោយដឹងថាយើងគួរកោតខ្លាចលោកម្ចាស់ យើងបន្តបង្រៀនអ្នកឯទៀតដោយវែកញែកដើម្បីឲ្យគេជឿជាក់ តែព្រះស្គាល់ច្បាស់ថាយើងជាមនុស្សប្រភេទណា។ ប៉ុន្តែ ខ្ញុំសង្ឃឹមថាសមត្ថភាពវិនិច្ឆ័យរបស់អ្នករាល់គ្នា ក៏បានជួយអ្នករាល់គ្នាឲ្យស្គាល់ច្បាស់ថាយើងជាមនុស្សប្រភេទណាដែរ។ ១២ យើងមិនចង់ណែនាំខ្លួនឲ្យអ្នករាល់គ្នាស្គាល់ម្ដងទៀតទេ តែយើងកំពុងលើកទឹកចិត្តអ្នករាល់គ្នាឲ្យអួតអំពីយើង ដើម្បីអ្នករាល់គ្នាអាចឆ្លើយតបនឹងពួកអ្នកដែលអួតអំពីសម្បកក្រៅ+ ជាជាងអួតអំពីអ្វីដែលមាននៅក្នុងចិត្ត។ ១៣ ព្រោះប្រសិនបើយើងវង្វេងស្មារតី+ នោះគឺដើម្បីព្រះ។ ប្រសិនបើយើងមានស្មារតីធម្មតា នោះគឺដើម្បីអ្នករាល់គ្នា។ ១៤ ព្រោះសេចក្ដីស្រឡាញ់របស់គ្រិស្តជំរុញចិត្តយើង ដោយសារយើងយល់ឃើញថា បុរសម្នាក់បានស្លាប់ដើម្បីមនុស្សទាំងអស់+ ពីព្រោះមនុស្សទាំងអស់បានស្លាប់ហើយ។ ១៥ លោកបានស្លាប់ដើម្បីមនុស្សទាំងអស់ ដើម្បីឲ្យអ្នកដែលរស់ អាចរស់ដើម្បីលោកដែលបានស្លាប់ជំនួសពួកគេ ហើយដែលបានត្រូវប្រោសឲ្យរស់ឡើងវិញ មិនមែនរស់ដើម្បីខ្លួនឯងទៀតទេ។+
១៦ ហេតុនេះ ចាប់ពីពេលនេះទៅ ទស្សនៈដែលយើងមានចំពោះអ្នកឯទៀត មិនផ្អែកលើសម្បកក្រៅរបស់ពួកគេឡើយ។+ ទោះជាទស្សនៈដែលយើងមានពីមុនអំពីគ្រិស្តបានផ្អែកលើលក្ខណៈក្រៅរបស់លោកជាមនុស្សក៏ដោយ តែពេលនេះយើងមិនមានទស្សនៈនោះទៀតទេ។+ ១៧ ម្ល៉ោះហើយ ប្រសិនបើអ្នកណារួបរួមជាមួយនឹងគ្រិស្ត អ្នកនោះបានត្រូវបង្កើតជាថ្មី។+ អ្វីៗដែលចាស់បានបាត់សូន្យទៅ មើល! អ្វីៗដែលថ្មីបានកើតឡើង។ ១៨ ប៉ុន្តែ អ្វីៗទាំងអស់មកពីព្រះ ដែលបានផ្សះផ្សាចំណងមិត្តភាពរវាងយើងនិងលោកតាមរយៈគ្រិស្ត+ ហើយព្រះបានប្រគល់កិច្ចបម្រើខាងការផ្សះផ្សាឲ្យយើង+ ១៩ ពោលគឺការប្រកាសថា ព្រះបានផ្សះផ្សាជាមួយនឹងពិភពលោកតាមរយៈគ្រិស្ត+ ហើយមិនបានផ្ដន្ទាទោសពួកគេដោយសារកំហុសរបស់ពួកគេឡើយ+ តែលោកបានប្រគល់ឲ្យយើងនូវដំណឹងអំពីការផ្សះផ្សា។+
២០ ដូច្នេះ យើងជាទូត+តំណាងគ្រិស្ត+ ហាក់ដូចជាព្រះកំពុងអង្វរតាមរយៈយើង។ ក្នុងនាមជាតំណាងគ្រិស្ត យើងអង្វរថា៖ «សូមផ្សះផ្សាជាមួយនឹងព្រះ»។ ២១ ព្រះបានធ្វើឲ្យលោកដែលមិនបានស្គាល់ភាពខុសឆ្គង+ ទៅជាគ្រឿងបូជាសម្រាប់លោះយើងពីភាពខុសឆ្គង ដើម្បីឲ្យយើងទៅជាមនុស្សសុចរិតនៅចំពោះមុខព្រះ តាមរយៈលោក។+
៦ ម្យ៉ាងទៀត ដោយរួមធ្វើការជាមួយនឹងលោក+ យើងលើកទឹកចិត្តអ្នករាល់គ្នាថា កុំទទួលគុណដ៏វិសេសលើសលប់របស់ព្រះដោយឥតប្រយោជន៍។+ ២ ព្រោះលោកមានប្រសាសន៍ថា៖ «នៅគ្រាដែលខ្ញុំពេញចិត្ត ខ្ញុំបានឮអ្នក ហើយនៅថ្ងៃសង្គ្រោះ ខ្ញុំបានជួយអ្នក»។+ មើល! ឥឡូវនេះគឺជាគ្រាដែលលោកពេញចិត្ត។ មើល! ឥឡូវនេះគឺជាថ្ងៃសង្គ្រោះ។
៣ យើងមិនធ្វើអ្វីដែលបណ្ដាលឲ្យអ្នកឯទៀតជំពប់ដួល*ឡើយ ដើម្បីកុំឲ្យគេរិះគន់កិច្ចបម្រើរបស់យើង។+ ៤ ប៉ុន្តែ ក្នុងគ្រប់ការទាំងអស់ យើងបង្ហាញឲ្យឃើញថាយើងជាអ្នកបម្រើរបស់ព្រះ+ ដោយស៊ូទ្រាំអ្វីៗជាច្រើន ដោយរងទុក្ខវេទនា ដោយខ្វះខាត ដោយមានទុក្ខលំបាក+ ៥ ដោយត្រូវគេវាយដំ ដោយជាប់គុក+ ដោយស៊ូទ្រាំក្នុងស្ថានភាពច្របូកច្របល់ ដោយនឿយហត់ ដោយអត់ងងុយ ជួនកាលដោយគ្មានអាហារបរិភោគ+ ៦ ដោយសេចក្ដីបរិសុទ្ធ ដោយចំណេះ ដោយចិត្តអត់ធ្មត់+ ដោយសេចក្ដីសប្បុរស+ ដោយឫទ្ធានុភាពបរិសុទ្ធ ដោយសេចក្ដីស្រឡាញ់ដែលគ្មានពុតត្បុត+ ៧ ដោយនិយាយសេចក្ដីពិត ដោយឫទ្ធានុភាពរបស់ព្រះ+ តាមរយៈអាវុធនៃសេចក្ដីសុចរិត+ដែលនៅក្នុងដៃស្ដាំ* និងនៅក្នុងដៃឆ្វេង។* ៨ យើងបង្ហាញឲ្យឃើញថាយើងជាអ្នកបម្រើរបស់ព្រះ ពេលមានកិត្តិយសនិងអាប់ឱនកិត្តិយស ពេលមានកេរ្ដិ៍ឈ្មោះអាក្រក់និងកេរ្ដិ៍ឈ្មោះល្អ។ គេចាត់ទុកយើងជាអ្នកបោកបញ្ឆោត តែយើងនិយាយសេចក្ដីពិត ៩ គេចាត់ទុកយើងជាអ្នកដែលគ្មានអ្នកណាស្គាល់ តែមានអ្នកដែលទទួលស្គាល់យើង គេចាត់ទុកយើងជាអ្នកដែលកំពុងស្លាប់* តែមើល! យើងនៅរស់នៅឡើយ+ គេចាត់ទុកយើងជាអ្នកដែលបានត្រូវដាក់ទោស* តែមិនដល់ទោសស្លាប់ទេ+ ១០ គេចាត់ទុកយើងជាអ្នកដែលព្រួយចិត្ត តែយើងអរសប្បាយជានិច្ច គេចាត់ទុកយើងជាអ្នកក្រ តែយើងធ្វើឲ្យមនុស្សជាច្រើនទៅជាអ្នកមាន គេចាត់ទុកយើងថាគ្មានអ្វីសោះ តែយើងមានអ្វីៗទាំងអស់។+
១១ បងប្អូនអ្នកក្រុងកូរិនថូសអើយ យើងបាននិយាយត្រង់ៗទៅកាន់អ្នករាល់គ្នា យើងបានបើកចិត្តឲ្យទូលាយហើយ។ ១២ យើងមិនមានចិត្តចង្អៀតចំពោះអ្នករាល់គ្នាឡើយ+ តែគឺអ្នករាល់គ្នាវិញទេ ដែលមានចិត្តចង្អៀតក្នុងការបង្ហាញសេចក្ដីស្រឡាញ់ចំពោះយើង។ ១៣ ដូច្នេះ ខ្ញុំសូមនិយាយទៅកាន់អ្នករាល់គ្នា ហាក់ដូចជាអ្នករាល់គ្នាជាកូនរបស់ខ្ញុំ។ ចូរអ្នករាល់គ្នាបើកចិត្តឲ្យទូលាយយ៉ាងដូច្នោះដែរ។+
១៤ កុំផ្សំផ្គុំខ្លួនជាមួយនឹងអ្នកដែលមិនជឿឡើយ។*+ ព្រោះតើសេចក្ដីសុចរិតនិងការប្រឆាំងច្បាប់មានអ្វីត្រូវគ្នា?+ ឬតើពន្លឺមានចំណែកអ្វីជាមួយនឹងភាពងងឹត?+ ១៥ ម្យ៉ាងទៀត តើគ្រិស្តនិងបេលាល* រួមចិត្តគំនិតគ្នាត្រង់ណា?+ ឬតើអ្នកដែលជឿ*មានចំណែកអ្វីជាមួយនឹងអ្នកដែលមិនជឿ?+ ១៦ ហើយតើវិហាររបស់ព្រះមានអ្វីត្រូវគ្នានឹងរូបព្រះ?+ ព្រោះយើងជាវិហាររបស់ព្រះដែលមានជីវិតរស់នៅ+ ដូចព្រះបានមានប្រសាសន៍ថា៖ «ខ្ញុំនឹងអាស្រ័យនៅក្នុងចំណោមពួកគេ+ ក៏នឹងដើរក្នុងចំណោមពួកគេ ហើយខ្ញុំនឹងធ្វើជាព្រះរបស់ពួកគេ ឯពួកគេនឹងធ្វើជារាស្ដ្ររបស់ខ្ញុំ»។+ ១៧ «ព្រះយេហូវ៉ា*មានប្រសាសន៍ថា៖ ‹ដូច្នេះ ចូរចេញពីចំណោមពួកគេមក ហើយញែកខ្លួនចេញ។ ឈប់ពាល់អ្វីដែលមិនស្អាត›»+ «‹រួចខ្ញុំនឹងទទួលអ្នករាល់គ្នា›»។+ ១៨ «‹ហើយខ្ញុំនឹងធ្វើជាឪពុករបស់អ្នករាល់គ្នា+ ឯអ្នករាល់គ្នានឹងទៅជាកូនប្រុសកូនស្រីរបស់ខ្ញុំ›។+ នេះជាប្រសាសន៍របស់ព្រះយេហូវ៉ា* ជាព្រះដែលមានឫទ្ធានុភាពខ្លាំងក្លាបំផុត»។
៧ ដូច្នេះ មិត្តជាទីស្រឡាញ់អើយ ដោយសារយើងមានសេចក្ដីសន្យាទាំងនេះ+ ចូរយើងសម្អាតចិត្តនិងកាយរបស់យើងឲ្យស្អាតពីអ្វីៗទាំងអស់ដែលនាំឲ្យស្មោកគ្រោក+ ហើយចូរយើងធ្វើឲ្យសេចក្ដីបរិសុទ្ធរបស់យើងឈានទៅរកភាពល្អឥតខ្ចោះ ដោយកោតខ្លាចព្រះ។
២ ចូរឲ្យចិត្តអ្នករាល់គ្នាមានយើងផង។+ យើងមិនបានធ្វើឲ្យអ្នកណាអន្តរាយ មិនបានបង្ខូចចិត្តគំនិតរបស់អ្នកណា ក៏មិនបានកេងយកប្រយោជន៍ពីអ្នកណាដែរ។+ ៣ ខ្ញុំនិយាយដូច្នេះ មិនមែនដើម្បីផ្ដន្ទាទោសអ្នករាល់គ្នាទេ។ ព្រោះខ្ញុំបាននិយាយពីមុនថា អ្នករាល់គ្នានៅក្នុងចិត្តយើង ទោះជាយើងរស់ឬស្លាប់ក៏ដោយ។ ៤ ខ្ញុំនិយាយដោយឥតលាក់លៀមទៅកាន់អ្នករាល់គ្នា។ ខ្ញុំអួតខ្លាំងណាស់អំពីអ្នករាល់គ្នា។ ខ្ញុំបានទទួលការសម្រាលទុក្ខយ៉ាងពេញលេញ ហើយគ្រប់ពេលវេលាដែលយើងរងទុក្ខវេទនា ខ្ញុំមានអំណរដ៏ពោរពេញ។+
៥ តាមពិត ពេលដែលយើងបានទៅដល់តំបន់ម៉ាសេដូន+ យើងមិនបានធូរចិត្តសោះ យើងនៅតែរងទុក្ខគ្រប់បែបយ៉ាង ពោលគឺនៅខាងក្រៅមានការប្រឆាំងយ៉ាងខ្លាំង ហើយនៅខាងក្នុងមានការភ័យខ្លាច។ ៦ ប៉ុន្តែ ព្រះដែលសម្រាលទុក្ខអស់អ្នកដែលធ្លាក់ទឹកចិត្ត+ បានសម្រាលទុក្ខយើងតាមរយៈវត្តមានរបស់ទីតុស។ ៧ យើងមិនគ្រាន់តែទទួលការសម្រាលទុក្ខដោយសារវត្តមានរបស់គាត់ប៉ុណ្ណោះទេ តែដោយសារគាត់បានទទួលកម្លាំងចិត្តពីអ្នករាល់គ្នាដែរ ព្រោះគាត់បានត្រឡប់មកវិញប្រាប់យើងថា អ្នករាល់គ្នាចង់ជួបខ្ញុំ អ្នករាល់គ្នាព្រួយចិត្តយ៉ាងខ្លាំង ហើយក៏ឈឺឆ្អាលនឹងខ្ញុំដោយស្មោះដែរ។ ដូច្នេះ ខ្ញុំត្រេកអរខ្លាំងជាងមុន។
៨ ទោះជាសំបុត្ររបស់ខ្ញុំធ្វើឲ្យអ្នករាល់គ្នាព្រួយចិត្តក៏ដោយ+ ខ្ញុំមិនស្ដាយទេ។ ពិតមែនតែខ្ញុំបានស្ដាយនៅដើមដំបូង (ខ្ញុំឃើញថាសំបុត្រនោះបានធ្វើឲ្យអ្នករាល់គ្នាព្រួយចិត្ត ប៉ុន្តែគ្រាន់តែមួយរយៈពេលខ្លីប៉ុណ្ណោះ) ៩ តែឥឡូវខ្ញុំត្រេកអរវិញ មិនមែនដោយសារអ្នករាល់គ្នាបានព្រួយចិត្តទេ ប៉ុន្តែដោយសារការព្រួយចិត្តបាននាំឲ្យអ្នករាល់គ្នាប្រែចិត្ត ព្រោះអ្នករាល់គ្នាព្រួយចិត្តស្របតាមបំណងប្រាថ្នារបស់ព្រះ។ យ៉ាងនេះ អ្នករាល់គ្នានឹងមិនខាតបង់អ្វីសោះដោយសារយើង។ ១០ ព្រោះការព្រួយចិត្តដែលស្របតាមបំណងប្រាថ្នារបស់ព្រះ នោះនាំទៅដល់ការប្រែចិត្តដើម្បីឲ្យបានសេចក្ដីសង្គ្រោះ ហើយមិនគួរឲ្យស្ដាយក្រោយឡើយ+ តែការព្រួយចិត្តរបស់ពិភពលោកនេះនាំទៅដល់សេចក្ដីស្លាប់។ ១១ ព្រោះការនោះឯង ពោលគឺការព្រួយចិត្តស្របតាមបំណងប្រាថ្នារបស់ព្រះ បានធ្វើឲ្យអ្នករាល់គ្នាខំប្រឹងព្យាយាមខ្លាំងណាស់ ដោយស្ដារកេរ្ដិ៍ឈ្មោះ ដោយទាស់ចិត្ត ដោយកោតខ្លាច ដោយចង់ប្រែចិត្តយ៉ាងខ្លាំង ដោយខ្នះខ្នែង ដោយកែតម្រូវអ្វីដែលខុស!+ ក្នុងគ្រប់ការទាំងអស់ អ្នករាល់គ្នាបានបង្ហាញថា អ្នករាល់គ្នាស្អាតស្អំក្នុងរឿងនោះ។ ១២ ពិតមែនតែខ្ញុំបានសរសេរមកកាន់អ្នករាល់គ្នា ប៉ុន្តែនេះមិនមែនដើម្បីអ្នកដែលបានធ្វើខុសទេ+ ក៏មិនមែនដើម្បីអ្នកដែលបានរងអំពើអាក្រក់នោះដែរ តែខ្ញុំបានសរសេរដើម្បីឲ្យអ្នករាល់គ្នាបង្ហាញនៅចំពោះមុខព្រះថា អ្នករាល់គ្នាពិតជាធ្វើតាមបង្គាប់របស់យើងមែន។ ១៣ ហេតុនេះ យើងបានទទួលការសម្រាលទុក្ខ។
ប៉ុន្តែ ព្រមជាមួយនឹងការសម្រាលទុក្ខនោះ យើងក៏បានត្រេកអរខ្លាំងជាងមុន ដោយសារឃើញទីតុសមានអំណរ ពីព្រោះអ្នកទាំងអស់គ្នាបានធ្វើឲ្យគាត់មានកម្លាំងចិត្តឡើងវិញ។ ១៤ ប្រសិនបើខ្ញុំបានអួតប្រាប់គាត់អំពីអ្នករាល់គ្នា នោះមិនធ្វើឲ្យខ្ញុំអៀនខ្មាសឡើយ ព្រោះអ្វីដែលយើងអួតប្រាប់ទីតុសគឺជាការពិត ដូចអ្វីៗទាំងអស់ដែលយើងបានប្រាប់អ្នករាល់គ្នាដែរ។ ១៥ ម្យ៉ាងទៀត ទីតុសមានមនោសញ្ចេតនាកាន់តែជ្រាលជ្រៅចំពោះអ្នករាល់គ្នា ពេលដែលគាត់នឹកឃើញថាអ្នកទាំងអស់គ្នាបានស្ដាប់បង្គាប់+ ហើយបានទទួលគាត់ដោយការគោរពយ៉ាងជ្រាលជ្រៅ។ ១៦ ខ្ញុំត្រេកអរដែលខ្ញុំទុកចិត្តអ្នករាល់គ្នាទាំងស្រុង។*
៨ ឥឡូវ យើងចង់ប្រាប់បងប្អូនអំពីគុណដ៏វិសេសលើសលប់របស់ព្រះ ដែលលោកបានឲ្យដល់ក្រុមជំនុំទាំងប៉ុន្មាននៅតំបន់ម៉ាសេដូន។+ ២ ក្នុងអំឡុងពេលពួកគាត់ជួបទុក្ខវេទនាដែលជាការល្បងលដ៏ខ្លាំង ពួកគាត់មានអំណរពោរពេញ ហើយទោះជាពួកគាត់ក្រតោកយ៉ាកក៏ដោយ ពួកគាត់បានបង្ហាញចិត្តទូលាយក្រៃលែង។ ៣ ព្រោះពួកគាត់បានឲ្យតាមសមត្ថភាពខ្លួន+ ហើយខ្ញុំសូមបញ្ជាក់ថា តាមពិត ការដែលពួកគាត់ឲ្យនោះគឺលើសពីសមត្ថភាពរបស់ពួកគាត់ទៅទៀត។+ ៤ ពួកគាត់បានអង្វរយើងម្ដងហើយម្ដងទៀតយ៉ាងអស់ពីចិត្ត សុំឲ្យពួកគាត់មានកិត្តិយសជូនអំណោយដោយចិត្តទូលាយ និងរួមចំណែកក្នុងការផ្ដល់ជំនួយសម្រាប់ពួកអ្នកបរិសុទ្ធ*+ ៥ ហើយពួកគាត់បានធ្វើលើសពីអ្វីដែលយើងបានសង្ឃឹមទៅទៀត តែមុនបង្អស់ពួកគាត់បានខំព្យាយាមបម្រើលោកម្ចាស់យ៉ាងអស់ពីចិត្ត ហើយបានជួយយើងស្របតាមបំណងប្រាថ្នារបស់ព្រះ។ ៦ ដូច្នេះ យើងបានលើកទឹកចិត្តទីតុស+ថា គាត់គួរបង្ហើយការប្រមូលអំណោយដ៏សប្បុរសរបស់អ្នករាល់គ្នា ដោយសារគាត់បានចាប់ផ្ដើមធ្វើកិច្ចការនេះក្នុងចំណោមអ្នករាល់គ្នា។ ៧ ទោះជាយ៉ាងនោះក៏ដោយ ចូរអ្នករាល់គ្នាជូនអំណោយដោយចិត្តទូលាយជាបរិបូរ ដូចអ្នករាល់គ្នាក៏មានអ្វីៗទាំងអស់ជាបរិបូរដែរ ពោលគឺជំនឿ ប៉ិនប្រសប់ក្នុងការនិយាយ ចំណេះ ចិត្តខ្នះខ្នែង និងសេចក្ដីស្រឡាញ់ដែលអ្នករាល់គ្នាបានទទួលពីយើង។+
៨ ខ្ញុំនិយាយដូច្នេះមិនមែនដើម្បីបង្គាប់អ្នករាល់គ្នាទេ តែខ្ញុំនិយាយដើម្បីឲ្យអ្នករាល់គ្នាដឹងអំពីចិត្តខ្នះខ្នែងរបស់អ្នកឯទៀត និងដើម្បីល្បងមើលឲ្យដឹងថាសេចក្ដីស្រឡាញ់របស់អ្នករាល់គ្នាស្មោះឬមិនស្មោះ។ ៩ ព្រោះអ្នករាល់គ្នាស្គាល់គុណដ៏វិសេសលើសលប់របស់លោកយេស៊ូគ្រិស្តជាម្ចាស់របស់យើងថា ទោះជាលោកជាអ្នកមានក៏ដោយ លោកបានទៅជាអ្នកក្រដើម្បីអ្នករាល់គ្នា។+ លោកធ្វើដូច្នេះ ដើម្បីឲ្យអ្នករាល់គ្នាទៅជាអ្នកមានតាមរយៈភាពក្រីក្ររបស់លោក។
១០ ខ្ញុំសូមប្រាប់មតិរបស់ខ្ញុំអំពីរឿងនេះថា+ ការធ្វើកិច្ចការនេះនាំឲ្យអ្នករាល់គ្នាទទួលផលប្រយោជន៍ ដោយសារមួយឆ្នាំមុន អ្នករាល់គ្នាមិនត្រឹមតែចង់ធ្វើការនេះប៉ុណ្ណោះទេ តែក៏ចាប់ផ្ដើមធ្វើការនេះដែរ។ ១១ ដូច្នេះឥឡូវ ចូរធ្វើការនេះឲ្យហើយចុះ។ យ៉ាងនោះ អ្នករាល់គ្នានឹងបង្ហើយការនេះតាមលទ្ធភាពរបស់អ្នករាល់គ្នា ដូចអ្នករាល់គ្នាមានចិត្តចង់ធ្វើពីមុន។ ១២ ព្រោះប្រសិនបើមានចិត្តចង់ឲ្យហើយ នោះធ្វើឲ្យព្រះពេញចិត្តណាស់។ ការឲ្យគឺតាមអ្វីដែលខ្លួនមាន+ មិនមែនតាមអ្វីដែលខ្លួនមិនមាននោះទេ។ ១៣ ព្រោះខ្ញុំមិនចង់ធ្វើឲ្យអ្នកឯទៀតស្រួល តែធ្វើឲ្យអ្នករាល់គ្នាពិបាកទេ។ ១៤ ប៉ុន្តែ គឺដើម្បីឲ្យអ្នករាល់គ្នាដែលមានអ្វីលើសពីសេចក្ដីត្រូវការ អាចបំពេញការខ្វះខាតរបស់ពួកគេ ហើយពេលពួកគេមានអ្វីដែលលើសពីសេចក្ដីត្រូវការ ពួកគេអាចបំពេញការខ្វះខាតរបស់អ្នករាល់គ្នាដែរ យ៉ាងនោះនឹងមានភាពស្មើគ្នា។ ១៥ ដូចបទគម្ពីរចែងថា៖ «អ្នកដែលមានច្រើន មិនមានច្រើនពេកទេ ហើយអ្នកដែលមានតិច ក៏មិនមានតិចពេកដែរ»។+
១៦ យើងសូមអរគុណព្រះដែលទីតុសគិតដល់អ្នករាល់គ្នា ដូចយើងគិតដល់អ្នករាល់គ្នាដែរ+ ១៧ ពីព្រោះគាត់មិនត្រឹមតែបានធ្វើអ្វីដែលយើងបានលើកទឹកចិត្តគាត់ឲ្យធ្វើប៉ុណ្ណោះទេ តែដោយសារគាត់មានចិត្តខ្នះខ្នែងខ្លាំងដល់ម្ល៉េះ បានជាគាត់ចេញទៅឯអ្នករាល់គ្នាដោយស្ម័គ្រពីចិត្ត។ ១៨ ប៉ុន្តែ យើងបានចាត់បងប្រុសម្នាក់ទៀតឲ្យទៅជាមួយនឹងគាត់។ បងប្រុសនោះទទួលការសរសើរពីក្រុមជំនុំទាំងអស់ ដោយសារកិច្ចការរបស់គាត់ដែលទាក់ទងនឹងដំណឹងល្អ។ ១៩ មិនត្រឹមតែប៉ុណ្ណោះ ក្រុមជំនុំបានតែងតាំងគាត់ឲ្យរួមដំណើរជាមួយនឹងយើងក្នុងការចាត់ចែងអំណោយដ៏សប្បុរសនេះ ដើម្បីតម្កើងសិរីរុងរឿងរបស់លោកម្ចាស់ និងដើម្បីបញ្ជាក់ថាយើងប្រុងប្រៀបជួយអ្នកឯទៀតជានិច្ច។ ២០ យ៉ាងនេះ យើងមិនបើកឱកាសឲ្យអ្នកណារិះគន់យើងអំពីរបៀបដែលយើងកំពុងចាត់ចែងវិភាគទានជាច្រើននេះទេ។+ ២១ ព្រោះយើង‹ចាត់ចែងកិច្ចការដោយទៀងត្រង់ មិនគ្រាន់តែនៅចំពោះមុខព្រះយេហូវ៉ា*ប៉ុណ្ណោះទេ តែក៏នៅចំពោះមុខមនុស្សដែរ›។+
២២ ម្យ៉ាងទៀត យើងចាត់បងប្រុសម្នាក់ឲ្យទៅជាមួយនឹងពួកគាត់។ យើងធ្លាប់សាកល្បងបងប្រុសនោះជាញឹកញយក្នុងកិច្ចការជាច្រើន ហើយឃើញថាគាត់មានចិត្តខ្នះខ្នែង តែឥឡូវគាត់មានចិត្តខ្នះខ្នែងខ្លាំងជាងមុន ដោយសារគាត់មានទំនុកចិត្តយ៉ាងខ្លាំងលើអ្នករាល់គ្នា។ ២៣ ក៏ប៉ុន្តែ ប្រសិនបើមានការសង្ស័យអំពីទីតុស ខ្ញុំសូមប្រាប់ថា គាត់រួមចំណែកជាមួយនឹងខ្ញុំ និងជាអ្នករួមការងារដើម្បីឲ្យអ្នករាល់គ្នាទទួលប្រយោជន៍។ ប្រសិនបើមានការសង្ស័យអំពីបងប្រុសៗរបស់យើង ខ្ញុំសូមប្រាប់ថា ពួកគាត់ជាសាវ័ករបស់ក្រុមជំនុំ ហើយពួកគាត់នាំឲ្យគ្រិស្តទទួលការលើកតម្កើង។ ២៤ ដូច្នេះ ចូរបង្ហាញឲ្យឃើញថាអ្នករាល់គ្នាស្រឡាញ់ពួកគាត់+ ហើយចូរបង្ហាញក្រុមជំនុំថាអ្វីដែលយើងបានអួតអំពីអ្នករាល់គ្នា គឺជាការពិត។
៩ ចំណែកឯកិច្ចបម្រើសម្រាប់ពួកអ្នកបរិសុទ្ធ+ ខ្ញុំមិនចាំបាច់សរសេរទៅអ្នករាល់គ្នាអំពីរឿងនោះទេ ២ ព្រោះខ្ញុំដឹងថាអ្នករាល់គ្នាស្ម័គ្រចិត្តជួយជានិច្ច ហើយខ្ញុំអួតប្រាប់គ្រិស្តសាសនិកនៅតំបន់ម៉ាសេដូនថា អ្នករាល់គ្នានៅខេត្តអាខេយ៉ាបានប្រុងប្រៀបជួយអស់មួយឆ្នាំហើយ។ ម្យ៉ាងទៀត ចិត្តខ្នះខ្នែងរបស់អ្នករាល់គ្នាបានជំរុញចិត្តពួកគាត់ភាគច្រើនឲ្យធ្វើដូចគ្នាដែរ។ ៣ ប៉ុន្តែ ខ្ញុំនឹងចាត់បងប្រុសៗឲ្យទៅឯអ្នករាល់គ្នា ដើម្បីកុំឲ្យអ្វីដែលយើងបានអួតប្រាប់អំពីអ្នករាល់គ្នាក្នុងរឿងនេះទៅជាអសារឥតការ និងដើម្បីឲ្យអ្នករាល់គ្នាបានប្រុងប្រៀបជាស្រេចពិតមែន ដូចខ្ញុំធ្លាប់ប្រាប់អ្នកឯទៀតអំពីអ្នករាល់គ្នា។ ៤ ពុំនោះសោត បើពួកអ្នកតំបន់ម៉ាសេដូនទៅជាមួយនឹងខ្ញុំ រួចឃើញថាអ្នករាល់គ្នាមិនទាន់ប្រុងប្រៀបជាស្រេច នោះទាំងខ្ញុំទាំងអ្នករាល់គ្នានឹងត្រូវខ្មាសគេ ពីព្រោះយើងបានទុកចិត្តអ្នករាល់គ្នា។ ៥ ដូច្នេះ ខ្ញុំគិតថាខ្ញុំត្រូវលើកទឹកចិត្តបងប្រុសៗឲ្យទៅឯអ្នករាល់គ្នាមុន ហើយរៀបចំអំណោយដ៏សប្បុរសដែលអ្នករាល់គ្នាបានសន្យាជូន ដើម្បីពេលយើងទៅដល់ អំណោយនោះបានរៀបចំជាស្រេច ជាអំណោយដែលអ្នករាល់គ្នាបានឲ្យដោយចិត្តទូលាយ មិនមែនដោយការបង្ខិតបង្ខំទេ។
៦ ប៉ុន្តែ ក្នុងរឿងនេះ អ្នកដែលសាបព្រោះដោយត្បិតត្បៀតនឹងទទួលផលបានតិចតួច ហើយអ្នកដែលសាបព្រោះដោយបរិបូរនឹងប្រមូលផលបានបរិបូរ។+ ៧ ចូរអ្នករាល់គ្នាម្នាក់ៗធ្វើតាមការសម្រេចចិត្តរបស់ខ្លួនចុះ មិនមែនដោយទើសទាល់*ឬដោយមានគេបង្ខំឡើយ+ ព្រោះព្រះស្រឡាញ់អ្នកដែលឲ្យដោយចិត្តសប្បាយ។+
៨ ម្យ៉ាងទៀត ព្រះអាចធ្វើឲ្យគុណដ៏វិសេសលើសលប់របស់លោកមានកាន់តែច្រើនឡើងដល់អ្នករាល់គ្នា ដើម្បីឲ្យអ្នករាល់គ្នាតែងតែមានអ្វីៗទាំងអស់ដែលអ្នករាល់គ្នាត្រូវការ ព្រមទាំងមានជាបរិបូរដើម្បីធ្វើការល្អសព្វបែបយ៉ាង+ ៩ (ដូចបទគម្ពីរចែងថា៖ «គាត់បានចែកចាយដោយចិត្តទូលាយ គាត់បានឲ្យដល់អ្នកក្រីក្រ។ សេចក្ដីសុចរិតរបស់គាត់ស្ថិតស្ថេរជារៀងរហូត»។+ ១០ ព្រះដែលផ្គត់ផ្គង់គ្រាប់ពូជជាបរិបូរដល់អ្នកសាបព្រោះ ហើយផ្គត់ផ្គង់នំប៉័ងជាបរិបូរដល់អ្នកបរិភោគ នោះលោកនឹងផ្គត់ផ្គង់គ្រាប់ពូជជាបរិបូរដល់អ្នករាល់គ្នាដើម្បីសាបព្រោះ ហើយលោកក៏នឹងចម្រើនផលពីសេចក្ដីសុចរិតរបស់អ្នករាល់គ្នាដែរ)។ ១១ ព្រះផ្ដល់ពរគ្រប់បែបយ៉ាងដល់អ្នករាល់គ្នា ដើម្បីឲ្យអ្នករាល់គ្នាអាចឲ្យដល់អ្នកឯទៀតដោយចិត្តទូលាយ ហើយមនុស្សនឹងអរគុណព្រះដោយសារអំណោយដែលអ្នករាល់គ្នាបានឲ្យអ្នកឯទៀតតាមរយៈយើង។ ១២ ពីព្រោះកិច្ចបម្រើសាធារណៈនេះ មិនគ្រាន់តែផ្ដល់អ្វីៗជាបរិបូរដែលពួកអ្នកបរិសុទ្ធត្រូវការប៉ុណ្ណោះទេ+ តែនាំឲ្យមានការថ្លែងអំណរគុណជាច្រើនដល់ព្រះ។ ១៣ តាមរយៈភ័ស្តុតាងដែលបានត្រូវបញ្ជាក់ដោយកិច្ចការផ្ដល់ជំនួយនេះ ពួកគាត់សរសើរតម្កើងព្រះ ដោយសារអ្នករាល់គ្នាចុះចូលធ្វើតាមដំណឹងល្អអំពីគ្រិស្ត ដូចអ្នករាល់គ្នាបានប្រកាសជាសាធារណៈ និងដោយសារអ្នករាល់គ្នាធ្វើវិភាគទានដោយចិត្តទូលាយសម្រាប់ពួកគាត់និងអ្នកឯទៀតទាំងអស់។+ ១៤ មិនត្រឹមតែប៉ុណ្ណោះ ពួកគាត់អង្វរព្រះអំពីអ្នករាល់គ្នា ហើយក៏ស្រឡាញ់អ្នករាល់គ្នាខ្លាំងទៀតផង ដោយសារគុណដ៏វិសេសលើសលប់ដែលព្រះមានចំពោះអ្នករាល់គ្នា។
១៥ សូមអរគុណព្រះចំពោះអំណោយទានដ៏វិសេសវិសាលរកពណ៌នាពុំបានរបស់លោក។
១០ ឯខ្ញុំ ប៉ូល សូមអង្វរអ្នករាល់គ្នាដោយសេចក្ដីស្លូតបូតនិងសេចក្ដីសប្បុរសរបស់គ្រិស្ត+ គឺខ្ញុំដែលអ្នករាល់គ្នាមើលមកថាជាមនុស្សសាមញ្ញធម្មតាពេលដែលនៅជាមួយនឹងអ្នករាល់គ្នា+ តែពេលដែលមិននៅជាមួយ ខ្ញុំជាមនុស្សម៉ឺងម៉ាត់*ចំពោះអ្នករាល់គ្នា។+ ២ ខ្ញុំអង្វរអ្នករាល់គ្នាថា ពេលដែលខ្ញុំនៅជាមួយនឹងអ្នករាល់គ្នា កុំឲ្យខ្ញុំត្រូវម៉ឺងម៉ាត់ដូចដែលខ្ញុំគិតថាខ្ញុំត្រូវចាត់វិធានការតឹងរ៉ឹងចំពោះអ្នកខ្លះដែលវាយតម្លៃថា យើងប្រព្រឹត្តតាមពិភពលោកនេះ។ ៣ ព្រោះទោះជាដំណើរជីវិតរបស់យើងគឺដូចមនុស្សទូទៅក៏ដោយ យើងមិនធ្វើសឹកសង្គ្រាមតាមគំនិតរបស់ពិភពលោកនេះទេ។ ៤ ព្រោះគ្រឿងសស្ត្រាវុធដែលយើងប្រើក្នុងសឹកសង្គ្រាមមិនមែនមកពីពិភពលោកនេះទេ+ តែមកពីឫទ្ធានុភាពរបស់ព្រះ+ ដើម្បីរំលើងអ្វីៗដែលចាក់ឫសជ្រៅ។ ៥ ព្រោះយើងកំពុងរំលំរំលើងការវែកញែក និងអ្វីៗទាំងអស់ដែលឆ្មើងកន្ទ្រើងប្រឆាំងចំណេះអំពីព្រះ+ ហើយយើងកំពុងកាន់កាប់គំនិត*ទាំងអស់ បង្ខំឲ្យស្ដាប់បង្គាប់គ្រិស្ត។ ៦ យើងថែមទាំងបានប្រុងប្រៀបដាក់ទោសអស់អ្នកដែលមិនព្រមស្ដាប់បង្គាប់ក្នុងរឿងណាមួយ+ ក្រោយពេលដែលអ្នករាល់គ្នាបានបង្ហាញថាខ្លួនធ្វើតាមបង្គាប់យ៉ាងសព្វគ្រប់។
៧ អ្នករាល់គ្នាមើលតែសម្បកក្រៅ។ ប្រសិនបើអ្នកណាជឿជាក់ថាខ្លួនជាអ្នកកាន់តាមគ្រិស្ត ត្រូវឲ្យអ្នកនោះគិតពិចារណាម្ដងទៀតអំពីការពិតដូចតទៅនេះថា យើងក៏ជាអ្នកកាន់តាមគ្រិស្ត ដូចអ្នកនោះជាអ្នកកាន់តាមគ្រិស្តដែរ។ ៨ ព្រោះទោះជាខ្ញុំអួតច្រើនបន្តិចអំពីអំណាចដែលលោកម្ចាស់បានផ្ដល់ឲ្យយើងដើម្បីពង្រឹងអ្នករាល់គ្នា មិនមែនដើម្បីបំផ្លាញអ្នករាល់គ្នាក៏ដោយ+ ខ្ញុំនឹងមិនខ្មាសគេទេ។ ៩ ប៉ុន្តែ ខ្ញុំមិនចង់ឲ្យអ្នករាល់គ្នាគិតថា ខ្ញុំព្យាយាមបំភ័យអ្នករាល់គ្នាតាមរយៈសំបុត្រខ្ញុំឡើយ។ ១០ ព្រោះពួកគេនិយាយថា៖ «សំបុត្ររបស់គាត់មានពាក្យធ្ងន់ៗនិងមានឥទ្ធិពលខ្លាំង ប៉ុន្តែពេលដែលគាត់នៅជាមួយនឹងយើង គាត់មិនមានអ្វីគួរឲ្យកោតស្ងើចទេ ហើយសម្ដីរបស់គាត់គ្មានបានការសោះ»។ ១១ ចូរឲ្យមនុស្សបែបនោះពិចារណាអំពីចំណុចដូចតទៅនេះថា យើងនិយាយយ៉ាងណាក្នុងសំបុត្រ យើងក៏នឹងប្រព្រឹត្តយ៉ាងនោះដែរ ពេលដែលនៅជាមួយនឹងអ្នករាល់គ្នា។+ ១២ ព្រោះយើងមិនហ៊ានលើកខ្លួនឲ្យស្មើនឹងអ្នកខ្លះ ឬប្រៀបធៀបខ្លួននឹងអ្នកខ្លះដែលលើកតម្កើងខ្លួននោះទេ។+ អ្នកទាំងនោះគ្មានការយល់ដឹងទេ ព្រោះពួកគេវាយតម្លៃខ្លួន ហើយប្រៀបធៀបខ្លួនតាមខ្នាតតម្រារបស់ខ្លួនឯង។+
១៣ ចំណែកយើងវិញ យើងនឹងមិនអួតហួសកម្រិតឡើយ ប៉ុន្តែយើងអួតតែអំពីអ្វីដែលយើងបានសម្រេចនៅក្នុងដែនកំណត់នៃតំបន់ដែលព្រះបានកំណត់ឲ្យយើង ដែលរួមបញ្ចូលតំបន់របស់អ្នករាល់គ្នាដែរ។+ ១៤ យើងមិនបានធ្វើអ្វីហួសពីដែនកំណត់របស់យើងទេ ពេលដែលយើងមកឯអ្នករាល់គ្នា តែយើងជាអ្នកមុនគេដែលប្រកាសដំណឹងល្អអំពីគ្រិស្តដល់អ្នករាល់គ្នា។+ ១៥ យើងមិនមែនអួតអំពីអ្វីហួសពីដែនកំណត់របស់យើងទេ ពោលគឺយកផលនៃការនឿយហត់របស់អ្នកឯទៀតមកអួត តែយើងសង្ឃឹមថា កាលដែលជំនឿរបស់អ្នករាល់គ្នាកំពុងចម្រើនឡើង នោះយើងនឹងមានសមិទ្ធផលកាន់តែច្រើនឡើងក្នុងដែនកំណត់របស់យើង។ យ៉ាងនោះ យើងនឹងមានសមិទ្ធផលបរិបូរជាងមុនទៅទៀត ១៦ ដើម្បីប្រកាសដំណឹងល្អដល់ស្រុកនានាហួសពីកន្លែងរបស់អ្នករាល់គ្នា ដើម្បីកុំឲ្យយើងអួតអំពីការដែលអ្នកផ្សេងទៀតបានធ្វើរួចជាស្រេចក្នុងដែនកំណត់របស់ពួកគេ។ ១៧ «អ្នកណាដែលអួត ចូរឲ្យអ្នកនោះអួតអំពីព្រះយេហូវ៉ា»។*+ ១៨ ព្រោះព្រះយេហូវ៉ា*មិនពេញចិត្តអ្នកដែលលើកតម្កើងខ្លួនទេ+ តែលោកពេញចិត្តអ្នកដែលលោកលើកតម្កើងវិញ។+
១១ សូមអ្នករាល់គ្នាទ្រាំនឹងខ្ញុំបន្តិច ទោះជាខ្ញុំនិយាយដូចជាមនុស្សឥតវិចារណញ្ញាណក៏ដោយ។ ប៉ុន្តែតាមពិត អ្នករាល់គ្នាកំពុងទ្រាំហើយ! ២ ព្រោះខ្ញុំចង់ហួងហែងអ្នករាល់គ្នា ដូចព្រះចង់ហួងហែងអ្នករាល់គ្នាដែរ ដោយសារខ្ញុំបានទុកដាក់អ្នករាល់គ្នាឲ្យមានប្ដីតែមួយ គឺគ្រិស្ត ហើយខ្ញុំចង់ប្រគល់អ្នករាល់គ្នាក្នុងភាពជាក្រមុំបរិសុទ្ធទៅលោក។+ ៣ ប៉ុន្តែ ដូចសត្វពស់បានល្បួងលួងលោមអេវ៉ាដោយកលល្បិចរបស់វា+ នោះខ្ញុំខ្លាចថា ចិត្តគំនិតរបស់អ្នករាល់គ្នាក៏នឹងត្រូវបង្ខូចតាមរបៀបណាមួយដែរ ហើយអ្នករាល់គ្នានឹងបាត់បង់ចិត្តស្មោះនិងភាពបរិសុទ្ធដែលគ្រិស្តគួរទទួល។+ ៤ ព្រោះថា ប្រសិនបើមានអ្នកណាម្នាក់មកផ្សព្វផ្សាយអំពីលោកយេស៊ូផ្សេងទៀត ក្រៅពីលោកយេស៊ូដែលយើងបានផ្សព្វផ្សាយ ឬបើអ្នករាល់គ្នាទទួលចិត្តគំនិតមួយផ្សេងទៀត ក្រៅពីចិត្តគំនិតដែលអ្នករាល់គ្នាបានទទួលហើយ ឬបើអ្នករាល់គ្នាទទួលដំណឹងល្អផ្សេងទៀត ក្រៅពីដំណឹងល្អដែលអ្នករាល់គ្នាបានជឿហើយ+ អ្នករាល់គ្នាចេះតែទ្រាំ*នឹងអ្នកនោះ។ ៥ ព្រោះខ្ញុំមិនចាត់ទុកថាខ្លួនខ្ញុំអន់ជាងពួកមហាសាវ័ករបស់អ្នករាល់គ្នាក្នុងរឿងណាមួយសោះឡើយ។+ ៦ ប៉ុន្តែ ទោះជាខ្ញុំខ្សោយខាងវោហារក៏ដោយ+ ខ្ញុំមិនខ្សោយខាងចំណេះទេ តែយើងបានបង្ហាញឲ្យអ្នករាល់គ្នាឃើញច្បាស់អំពីចំណេះរបស់យើងក្នុងគ្រប់ការទាំងអស់។
៧ តើខ្ញុំបានធ្វើខុសឬ ដែលខ្ញុំស្ម័គ្រចិត្តប្រកាសដំណឹងល្អរបស់ព្រះដល់អ្នករាល់គ្នាដោយមិនយកថ្លៃ ហើយបានបន្ទាបខ្លួនដើម្បីឲ្យអ្នករាល់គ្នាទទួលការលើកតម្កើង?+ ៨ ខ្ញុំបានបេះពីមាត់ពីករបស់ក្រុមជំនុំឯទៀត ដោយទទួលការឧបត្ថម្ភពីពួកគាត់ ដើម្បីយកមកបម្រើអ្នករាល់គ្នា។+ ៩ ក៏ប៉ុន្តែ ពេលដែលខ្ញុំនៅជាមួយនឹងអ្នករាល់គ្នា ហើយចាប់ផ្ដើមខ្វះខាត ខ្ញុំមិនបានធ្វើជាបន្ទុកដល់អ្នកណាម្នាក់ឡើយ ព្រោះបងប្អូនដែលមកពីតំបន់ម៉ាសេដូនបានផ្គត់ផ្គង់ជាបរិបូរនូវអ្វីៗដែលខ្ញុំត្រូវការ។+ ក្នុងគ្រប់ការទាំងអស់ ខ្ញុំបានរក្សាខ្លួនកុំឲ្យធ្វើជាបន្ទុកដល់អ្នករាល់គ្នា ក៏នឹងបន្តរក្សាខ្លួនតទៅទៀត។+ ១០ ដរាបណាខ្ញុំជាអ្នកកាន់តាមគ្រិស្ត ដរាបនោះខ្ញុំនឹងមិនឈប់អួត+អំពីតំបន់អាខេយ៉ាទេ។ ១១ ហេតុអ្វីខ្ញុំធ្វើដូច្នេះ? តើដោយសារខ្ញុំមិនស្រឡាញ់អ្នករាល់គ្នាឬ? ព្រះជ្រាបថាខ្ញុំស្រឡាញ់អ្នករាល់គ្នា។
១២ ប៉ុន្តែ អ្វីដែលខ្ញុំកំពុងធ្វើ ខ្ញុំនឹងធ្វើតទៅទៀត+ដើម្បីបំបាត់ទីសំអាងរបស់ពួកអ្នកដែលខំតាំងខ្លួនឲ្យស្មើនឹងយើង ដោយអួតអំពីតំណែងរបស់ខ្លួន។ ១៣ ព្រោះបុរសបែបនោះជាសាវ័កក្លែងក្លាយ និងជាមនុស្សឆបោកដែលក្លែងខ្លួនជាសាវ័ករបស់គ្រិស្ត+ ១៤ ហើយគ្មានអ្វីចម្លែកទេ ព្រោះសាថាន*ចេះតែក្លែងខ្លួនជាទេវតានៃពន្លឺ។+ ១៥ ដូច្នេះ មិនមែនជាការអស្ចារ្យទេ ដែលអ្នកបម្រើរបស់វាក៏ចេះតែក្លែងខ្លួនជាអ្នកបម្រើនៃសេចក្ដីសុចរិតដែរ។ ប៉ុន្តែ នៅទីបញ្ចប់ ពួកគេនឹងទទួលផលស្របតាមការដែលពួកគេបានធ្វើ។+
១៦ ខ្ញុំសូមនិយាយម្ដងទៀត៖ កុំឲ្យអ្នកណាគិតថាខ្ញុំឥតវិចារណញ្ញាណឡើយ។ ប៉ុន្តែ ប្រសិនបើអ្នករាល់គ្នាគិតដូច្នោះមែន ចូរទ្រាំនឹងខ្ញុំ ដើម្បីឲ្យខ្ញុំអាចអួតបានបន្តិចបន្តួច ទោះជាអ្នករាល់គ្នាមើលមកខ្ញុំដូចជាមនុស្សឥតវិចារណញ្ញាណក៏ដោយ។ ១៧ អ្វីដែលខ្ញុំនិយាយ ខ្ញុំមិនមែននិយាយតាមគំរូរបស់លោកម្ចាស់ទេ តែខ្ញុំនិយាយដូចជាមនុស្សឥតវិចារណញ្ញាណ ដែលមានអំណួតហើយជឿជាក់លើខ្លួនឯង។ ១៨ ដោយសារមានច្រើននាក់កំពុងអួតអំពីអ្វីៗខាងពិភពលោកនេះ ខ្ញុំក៏នឹងអួតដែរ។ ១៩ ដោយសារអ្នករាល់គ្នាថាខ្លួន«មានវិចារណញ្ញាណ» ហេតុអ្វីអ្នករាល់គ្នាសប្បាយចិត្តទ្រាំ*នឹងអ្នកដែលគ្មានវិចារណញ្ញាណ? ២០ តាមការពិត អ្នករាល់គ្នាទ្រាំ*នឹងអ្នកណាដែលយកអ្នករាល់គ្នាធ្វើជាខ្ញុំបម្រើ អ្នកណាដែលលេបត្របាក់អ្វីៗដែលអ្នករាល់គ្នាមាន អ្នកណាដែលកញ្ឆក់យកអ្វីៗដែលអ្នករាល់គ្នាមាន អ្នកណាដែលតម្កើងខ្លួនលើអ្នករាល់គ្នា និងអ្នកណាដែលវាយមុខអ្នករាល់គ្នា។
២១ ខ្ញុំនិយាយដូច្នេះ ធ្វើឲ្យយើងអាប់ឱនកិត្តិយស ពីព្រោះអ្នកខ្លះគិតថាយើងគ្មានសមត្ថភាពប្រើអំណាចរបស់យើងឲ្យបានត្រឹមត្រូវទេ។
ប៉ុន្តែ ប្រសិនបើអ្នកណាហ៊ានធ្វើអ្វីមួយ ខ្ញុំក៏ហ៊ានដែរ។ ខ្ញុំកំពុងនិយាយដូចជាមនុស្សឥតវិចារណញ្ញាណ។ ២២ តើដើមកំណើតរបស់ពួកគេជាហេប្រឺឬ? ខ្ញុំក៏ដូច្នោះដែរ។+ តើពួកគេជាជនជាតិអ៊ីស្រាអែលឬ? ខ្ញុំក៏ដូច្នោះដែរ។ តើពួកគេជាកូនចៅ*របស់អាប្រាហាំឬ? ខ្ញុំក៏ដូច្នោះដែរ។+ ២៣ តើពួកគេជាអ្នកបម្រើរបស់គ្រិស្តឬ? ខ្ញុំសូមតបឆ្លើយដូចជាមនុស្សឆ្កួតថា ខ្ញុំជាអ្នកបម្រើប្រសើរជាងពួកគេ ព្រោះខ្ញុំធ្វើការច្រើនជាងពួកគេ+ ជាប់គុកច្រើនជាងពួកគេ+ ត្រូវគេវាយច្រើនហួសប្រមាណ និងជិតស្លាប់ជាច្រើនដង។+ ២៤ មានប្រាំដងដែលជនជាតិយូដាបានវាយខ្ញុំ រាល់ដងពួកគេវាយខ្ញុំ៤០រំពាត់ខ្វះមួយ។+ ២៥ ខ្ញុំត្រូវគេវាយនឹងដំបងបីដង+ ត្រូវគេគប់នឹងដុំថ្មមួយដង+ ធ្លាប់លិចសំពៅបីដង+ ធ្លាប់ជាប់នៅសមុទ្រមួយយប់មួយថ្ងៃ។ ២៦ ខ្ញុំធ្វើដំណើរជាញឹកញយ ក៏បានប្រឈមមុខនឹងគ្រោះថ្នាក់នៅទន្លេ គ្រោះថ្នាក់ពីចោរចាំស្ទាក់ប្លន់ គ្រោះថ្នាក់ពីជនរួមជាតិ+ គ្រោះថ្នាក់ពីជនជាតិដទៃ+ គ្រោះថ្នាក់នៅក្នុងក្រុង+ គ្រោះថ្នាក់នៅតំបន់ស្ងាត់ជ្រងំ គ្រោះថ្នាក់នៅសមុទ្រ គ្រោះថ្នាក់ក្នុងចំណោមបងប្អូនក្លែងក្លាយ ២៧ ដោយនឿយលំបាក ដោយអត់ងងុយជាញឹកញយ+ ដោយស្រេកឃ្លាន+ ដោយគ្មានអាហារបរិភោគជាច្រើនដង+ ដោយរងានិងគ្មានសម្លៀកបំពាក់។*
២៨ ក្រៅពីអ្វីៗទាំងនោះ ក៏មានអ្វីដែលអន្ទោលតាមខ្ញុំរៀងរាល់ថ្ងៃ* ពោលគឺកង្វល់អំពីក្រុមជំនុំទាំងឡាយ។+ ២៩ តើអ្នកណាខ្សោយ ហើយខ្ញុំមិនខ្សោយដែរ? តើអ្នកណាជំពប់ដួល ហើយខ្ញុំមិនខឹងឆួល?
៣០ ប្រសិនបើត្រូវអួតខ្លួន ខ្ញុំនឹងអួតអំពីអ្វីដែលបង្ហាញភាពទន់ខ្សោយរបស់ខ្ញុំ។ ៣១ ព្រះដែលជាបិតារបស់លោកម្ចាស់យេស៊ូ និងជាព្រះដែលត្រូវទទួលការសរសើរជារៀងរហូត ជ្រាបថាខ្ញុំមិននិយាយកុហកទេ។ ៣២ នៅក្រុងដាម៉ាស់ អភិបាលក្រោមអំណាចស្ដេចអារេតាស បានឲ្យគេចាំយាមក្រុងដាម៉ាស់ដើម្បីចាប់ខ្ញុំ។ ៣៣ ប៉ុន្តែ មានគេដាក់ខ្ញុំក្នុងកញ្ឆេផ្ដៅ រួចសម្រូតចុះតាមបង្អួចកំពែង។+ ដូច្នេះ ខ្ញុំបានរួចពីកណ្ដាប់ដៃរបស់គាត់។
១២ ខ្ញុំត្រូវតែអួត ទោះជាគ្មានប្រយោជន៍ក៏ដោយ ខ្ញុំសូមនិយាយអំពីអ្វីដែលលោកម្ចាស់បានបើកបង្ហាញឲ្យខ្ញុំឃើញក្នុងគំនិត+ និងដំណឹងដែលលោកបានឲ្យដល់ខ្ញុំ។+ ២ ខ្ញុំស្គាល់បុរសម្នាក់ដែលជាអ្នកកាន់តាមគ្រិស្ត។ ដប់បួនឆ្នាំមុន គាត់បានត្រូវកញ្ឆក់យកទៅស្ថានសួគ៌ទី៣។ ខ្ញុំមិនដឹងថាគាត់បានត្រូវកញ្ឆក់យកទៅទាំងរូបកាយឬយ៉ាងណាទេ តែព្រះជ្រាប។ ៣ ខ្ញុំស្គាល់បុរសនោះ។ ខ្ញុំមិនដឹងថាគាត់បានត្រូវកញ្ឆក់យកទៅទាំងរូបកាយឬយ៉ាងណាទេ តែព្រះជ្រាប។ ៤ កាលដែលបុរសនោះបានត្រូវកញ្ឆក់យកទៅក្នុងសួនឧទ្យាន គាត់បានឮពាក្យដែលគាត់មិនត្រូវប្រាប់ ជាពាក្យដែលមនុស្សមិនមានច្បាប់និយាយទេ។ ៥ ខ្ញុំនឹងអួតអំពីបុរសនោះ តែខ្ញុំនឹងមិនអួតអំពីខ្លួនខ្ញុំទេ គឺខ្ញុំអួតតែអំពីអ្វីដែលបង្ហាញភាពទន់ខ្សោយរបស់ខ្ញុំប៉ុណ្ណោះ។ ៦ ព្រោះបើខ្ញុំចង់អួត ខ្ញុំមិនមែនអួតដោយឥតវិចារណញ្ញាណទេ ពីព្រោះខ្ញុំនឹងនិយាយសេចក្ដីពិត។ ប៉ុន្តែ ខ្ញុំមិនអួតទេ ដើម្បីកុំឲ្យអ្នកណាសរសើរខ្ញុំហួសពីការដែលអ្នកនោះឃើញខ្ញុំធ្វើ ឬឮខ្ញុំនិយាយ ៧ ដោយសារតែមានអ្វីជាច្រើនបានត្រូវបើកបង្ហាញដល់ខ្ញុំ។
ដូច្នេះ ដើម្បីកុំឲ្យខ្ញុំមានមោទនភាពហួសហេតុពេក ខ្ញុំបានទទួលបន្លាមួយក្នុងសាច់ឈាម+ ដែលប្រៀបដូចជាទេវតាមួយរបស់សាថាន*ចាំទះ*ខ្ញុំជានិច្ច ដើម្បីកុំឲ្យខ្ញុំលើកខ្លួនហួសប្រមាណ។ ៨ ខ្ញុំបានអង្វរលោកម្ចាស់បីដងអំពីរឿងនេះ ដើម្បីឲ្យលោកដកបន្លានេះចេញ។ ៩ ប៉ុន្តែ លោកបានមានប្រសាសន៍មកខ្ញុំថា៖ «គុណដ៏វិសេសលើសលប់ដែលខ្ញុំបង្ហាញចំពោះអ្នកគឺគ្រប់គ្រាន់ហើយ ព្រោះក្នុងករណីរបស់អ្នក ឫទ្ធានុភាពរបស់ខ្ញុំបានពេញលក្ខណៈពេលដែលអ្នកទន់ខ្សោយ»។+ ដូច្នេះ ខ្ញុំសប្បាយចិត្តអួតអំពីភាពទន់ខ្សោយរបស់ខ្ញុំ ដើម្បីឲ្យឫទ្ធានុភាពរបស់គ្រិស្តបន្តសណ្ឋិតលើខ្ញុំដូចជាត្រសាល។ ១០ ហេតុនេះ ខ្ញុំពេញចិត្តភាពទន់ខ្សោយ ការតិះដៀល ការខ្វះខាត ការបៀតបៀន និងការលំបាក ដើម្បីគ្រិស្ត។ ព្រោះពេលដែលខ្ញុំខ្សោយ ខ្ញុំមានកម្លាំងខ្លាំងក្លា។+
១១ ខ្ញុំបានទៅជាដូចមនុស្សឥតវិចារណញ្ញាណ។ អ្នករាល់គ្នាបានបង្ខំឲ្យខ្ញុំធ្វើដូច្នេះ ព្រោះអ្នករាល់គ្នាមិនបានប្រាប់អំពីការល្អដែលខ្ញុំបានធ្វើទេ។ ពីព្រោះខ្ញុំមិនអន់ជាងពួកមហាសាវ័ករបស់អ្នករាល់គ្នាក្នុងរឿងណាមួយឡើយ ទោះជាខ្ញុំគ្មានតម្លៃសោះចំពោះអ្នករាល់គ្នាក៏ដោយ។+ ១២ ខ្ញុំបានបង្ហាញភ័ស្តុតាងឲ្យអ្នករាល់គ្នាឃើញថាខ្ញុំជាសាវ័ក ដោយការស៊ូទ្រាំយ៉ាងខ្លាំង+ ដោយធ្វើការអស្ចារ្យ ធ្វើអព្ភូតហេតុ និងធ្វើការដែលប្រកបដោយឫទ្ធានុភាព។+ ១៣ ព្រោះតើអ្នករាល់គ្នាមានអារម្មណ៍ថាអន់ជាងក្រុមជំនុំឯទៀត ដោយសារតែខ្ញុំមិនបានធ្វើជាបន្ទុកដល់អ្នករាល់គ្នាឬ?+ បើដូច្នេះមែន សូមមេត្តាអភ័យទោសឲ្យខ្ញុំចំពោះកំហុសនេះផង។
១៤ មើល! នេះជាលើកទី៣ហើយដែលខ្ញុំប្រុងប្រៀបមកឯអ្នករាល់គ្នា ហើយនៅលើកនេះខ្ញុំក៏នឹងមិនធ្វើជាបន្ទុកដល់អ្នករាល់គ្នាដែរ។ ព្រោះខ្ញុំមិនចង់បានទ្រព្យសម្បត្តិរបស់អ្នករាល់គ្នាទេ+ តែខ្ញុំចង់បានអ្នករាល់គ្នាវិញ។ ពីព្រោះកូន+មិនគួរទុកទ្រព្យឲ្យឪពុកម្ដាយទេ តែឪពុកម្ដាយគួរទុកឲ្យកូនវិញ។ ១៥ ចំណែកខ្ញុំ ខ្ញុំពេញចិត្តចំណាយអ្វីទាំងអស់ដែលខ្ញុំមាន ថែមទាំងជីវិតរបស់ខ្ញុំផង ដើម្បីអ្នករាល់គ្នា។+ ប្រសិនបើខ្ញុំស្រឡាញ់អ្នករាល់គ្នាខ្លាំងយ៉ាងនេះ តើគួរឲ្យអ្នករាល់គ្នាស្រឡាញ់ខ្ញុំតិចជាងនេះឬ? ១៦ ទោះជាយ៉ាងណាក៏ដោយ ខ្ញុំមិនបានធ្វើជាបន្ទុកដល់អ្នករាល់គ្នាទេ+ ប៉ុន្តែអ្នករាល់គ្នានិយាយថាខ្ញុំ«មានឧបាយ» ហើយថាខ្ញុំបានចាប់អ្នករាល់គ្នា«ដោយប្រើកលល្បិច»។ ១៧ ចំណែកពួកអ្នកដែលខ្ញុំបានចាត់ឲ្យទៅឯអ្នករាល់គ្នា តើខ្ញុំបានកេងយកប្រយោជន៍ពីអ្នករាល់គ្នាតាមរយៈពួកអ្នកនោះឬ? ១៨ ខ្ញុំជាអ្នកដែលបានលើកទឹកចិត្តទីតុសឲ្យទៅឯអ្នករាល់គ្នា ហើយក៏បានចាត់បងប្រុសម្នាក់ឲ្យទៅជាមួយនឹងគាត់ដែរ។ ទីតុសមិនបានកេងយកប្រយោជន៍ពីអ្នករាល់គ្នាសោះឡើយ មែនទេ?+ យើងបានបង្ហាញចិត្តគំនិតតែមួយ មែនទេ? ហើយយើងបានដើរតាមលំអានដានតែមួយ មែនទេ?
១៩ ពេលអ្នករាល់គ្នាអានសំបុត្រនេះ តើអ្នករាល់គ្នាគិតស្មានថាយើងកំពុងនិយាយការពារខ្លួននៅចំពោះមុខអ្នករាល់គ្នាឬ? មិនមែនទេ យើងកំពុងនិយាយនៅចំពោះមុខព្រះ ក្នុងនាមជាអ្នកកាន់តាមគ្រិស្ត។ ប៉ុន្តែ បងប្អូនជាទីស្រឡាញ់អើយ អ្វីៗទាំងអស់គឺដើម្បីធ្វើឲ្យអ្នករាល់គ្នាមាំមួនឡើង។ ២០ ព្រោះខ្ញុំខ្លាចថា ពេលដែលខ្ញុំមកដល់ ខ្ញុំប្រហែលជាឃើញថាអ្នករាល់គ្នាមិនមានលក្ខណៈដែលខ្ញុំចង់ឲ្យអ្នករាល់គ្នាមាន ហើយខ្ញុំនឹងមានលក្ខណៈដែលអ្នករាល់គ្នាមិនចង់ឲ្យខ្ញុំមាន។ ផ្ទុយទៅវិញ ខ្ញុំប្រហែលជានឹងឃើញការឈ្លោះប្រកែក ការច្រណែន កំហឹង ការបាក់បែកគ្នា ការបង្កាច់បង្ខូច ការខ្សឹបរអេចរអូច* ភាពក្រអឺតក្រអោង និងការគ្មានសណ្ដាប់ធ្នាប់។ ២១ ប្រហែលជាពេលដែលខ្ញុំមកដល់ម្ដងទៀត ព្រះរបស់ខ្ញុំនឹងធ្វើឲ្យខ្ញុំអាម៉ាស់នៅចំពោះមុខអ្នករាល់គ្នា ហើយខ្ញុំនឹងសោកសៅចំពោះមនុស្សជាច្រើនដែលធ្លាប់ធ្វើអំពើខុសឆ្គង* តែមិនបានប្រែចិត្តពីភាពស្មោកគ្រោក អំពើប្រាសចាកសីលធម៌ខាងផ្លូវភេទ* និងការប្រព្រឹត្តដោយឥតកោតក្រែង*របស់ពួកគេ។
១៣ នេះជាលើកទី៣ហើយដែលខ្ញុំប្រុងប្រៀបខ្លួនទៅឯអ្នករាល់គ្នា។ «ចូរឲ្យគ្រប់រឿងទាំងអស់បានត្រូវទុកជាការពិត ដោយការបញ្ជាក់របស់សាក្សីពីរនាក់ឬបីនាក់»។+ ២ ទោះជាខ្ញុំនៅឆ្ងាយពីអ្នករាល់គ្នាក៏ដោយ ចូរស្ដាប់ពាក្យរបស់ខ្ញុំហាក់ដូចជាខ្ញុំនៅជាមួយនឹងអ្នករាល់គ្នាជាលើកទី២។ ដូច្នេះ ខ្ញុំសូមព្រមានពួកអ្នកដែលបានធ្វើខុស*ពីមុននិងអ្នកឯទៀតទាំងអស់ ទុកជាមុនថា ប្រសិនបើខ្ញុំមកម្ដងទៀត ខ្ញុំនឹងមិនប្រណីពួកគេទេ ៣ ដោយសារអ្នករាល់គ្នាចង់ឃើញភ័ស្តុតាងដែលបញ្ជាក់ថា គ្រិស្តកំពុងមានប្រសាសន៍តាមរយៈខ្ញុំ គឺលោកមិនមែនអន់ខ្សោយចំពោះអ្នករាល់គ្នាទេ តែលោកខ្លាំងក្លាក្នុងចំណោមអ្នករាល់គ្នា។ ៤ ប្រាកដណាស់ លោកបានត្រូវគេប្រហារជីវិតលើបង្គោលឈើ ដោយសារភាពទន់ខ្សោយ តែលោកមានជីវិតរស់នៅដោយសារឫទ្ធានុភាពរបស់ព្រះ។+ ពិតមែន យើងក៏ទន់ខ្សោយជាមួយនឹងលោកដែរ តែយើងនឹងរស់ជាមួយនឹងលោក+ដោយសារឫទ្ធានុភាពរបស់ព្រះសណ្ឋិតលើអ្នករាល់គ្នា។+
៥ ចូរពិនិត្យពិចារណាអំពីខ្លួនឥតឈប់ ដើម្បីឲ្យដឹងថាអ្នកកំពុងកាន់ខ្ជាប់តាមជំនឿឬយ៉ាងណា។ ចូរសឲ្យឃើញជានិច្ចថាអ្នកជាមនុស្សបែបណា។+ តើអ្នករាល់គ្នាមិនទទួលស្គាល់ថាលោកយេស៊ូគ្រិស្តរួបរួមជាមួយនឹងអ្នករាល់គ្នាទេឬ? អ្នករាល់គ្នាគួរតែទទួលស្គាល់ លើកលែងតែព្រះមិនពេញចិត្តអ្នករាល់គ្នាទៀត។ ៦ ខ្ញុំពិតជាសង្ឃឹមថាអ្នករាល់គ្នានឹងទទួលស្គាល់ថា ព្រះពេញចិត្តយើង។
៧ យើងអធិដ្ឋានទៅព្រះ ដើម្បីកុំឲ្យអ្នករាល់គ្នាធ្វើអំពើអាក្រក់ណាមួយឡើយ មិនមែនដើម្បីឲ្យអ្នកឯទៀតពេញចិត្តយើងទេ តែដើម្បីឲ្យអ្នករាល់គ្នាធ្វើអំពើល្អ ទោះជាអ្នកឯទៀតមិនពេញចិត្តយើងក៏ដោយ។ ៨ ព្រោះយើងមិនអាចប្រឆាំងសេចក្ដីពិតបានឡើយ មានតែធ្វើអ្វីដែលគាំទ្រសេចក្ដីពិតប៉ុណ្ណោះ។ ៩ យើងពិតជាអរសប្បាយពេលដែលអ្នករាល់គ្នាមានកម្លាំងខ្លាំងក្លា ទោះជាដំណាលគ្នានោះយើងខ្សោយក៏ដោយ។ យើងតែងតែអធិដ្ឋានសូមឲ្យអ្នករាល់គ្នាកែតម្រង់ខ្លួនឡើងវិញ។ ១០ ហេតុនេះហើយបានជាខ្ញុំសរសេរសេចក្ដីទាំងនេះពេលដែលខ្ញុំមិននៅជាមួយនឹងអ្នករាល់គ្នា ដើម្បីកុំឲ្យខ្ញុំត្រូវប្រព្រឹត្តយ៉ាងម៉ឺងម៉ាត់ពេលដែលខ្ញុំនៅជាមួយនឹងអ្នករាល់គ្នា ព្រោះលោកម្ចាស់បានផ្ដល់អំណាចឲ្យខ្ញុំ+ពង្រឹងអ្នករាល់គ្នា មិនមែនបំផ្លាញអ្នករាល់គ្នាទេ។
១១ ជាទីបញ្ចប់ បងប្អូនអើយ ចូរបន្តអរសប្បាយ ទទួលការកែតម្រង់ ទទួលការសម្រាលទុក្ខ+ មានគំនិតឯកភាព+ មានរបៀបរស់នៅដែលធ្វើឲ្យមានសេចក្ដីសុខសាន្ត។+ យ៉ាងនេះ ព្រះនៃសេចក្ដីស្រឡាញ់និងសេចក្ដីសុខសាន្ត+ នឹងនៅជាមួយនឹងអ្នករាល់គ្នា។ ១២ ចូរសួរសុខទុក្ខគ្នាទៅវិញទៅមកដោយការថើប។* ១៣ ពួកអ្នកបរិសុទ្ធទាំងអស់ផ្ដាំសួរសុខទុក្ខអ្នករាល់គ្នា។
១៤ សូមឲ្យគុណដ៏វិសេសលើសលប់របស់លោកម្ចាស់យេស៊ូគ្រិស្ត សេចក្ដីស្រឡាញ់របស់ព្រះ និងការរួមចំណែកក្នុងឫទ្ធានុភាពបរិសុទ្ធ នៅជាមួយនឹងអ្នកទាំងអស់គ្នា។
ភាសាក្រិច«អាប៉ូស្តូឡូស»មានន័យថា«អ្នកដែលត្រូវគេចាត់ឲ្យទៅ»
ឬ«លើកទឹកចិត្ត»
ឬ«សេចក្ដីវេទនា»
ឬ«សេចក្ដីវេទនា»
មើលនិយមន័យពាក្យ«អាស៊ី»
ឬប្រហែលជាមានន័យថា«សេចក្ដីដែលអ្នករាល់គ្នាបានដឹងច្បាស់រួចហើយ»
ឬប្រហែលជាមានន័យថា«ដើម្បីឲ្យអ្នករាល់គ្នាទទួលប្រយោជន៍»
ក៏មានឈ្មោះថាស៊ីឡាសដែរ
មើលនិយមន័យពាក្យ«ជីវិត»
ឬ«កុំឲ្យគាត់ត្រូវលេបបាត់ដោយការព្រួយចិត្ត»
ភាសាក្រិច«សាថាណាស»មានន័យថា«អ្នកប្រឆាំង»ឬ«សត្រូវ»
ឬ«គម្រោងការ»
ក្នុងគម្ពីរពាក្យ«កូន»ឬ«បុត្រ»អាចសំដៅលើអ្នកណាក៏ដោយដែលកើតក្នុងវង្សត្រកូល
មើលសេចក្ដីពន្យល់បន្ថែម ផ្នែកក៥
មើលសេចក្ដីពន្យល់បន្ថែម ផ្នែកក៥
មើលសេចក្ដីពន្យល់បន្ថែម ផ្នែកក៥
មើលសេចក្ដីពន្យល់បន្ថែម ផ្នែកក៥
មើលសេចក្ដីពន្យល់បន្ថែម ផ្នែកក៥
ន័យត្រង់«ដោយគិតដល់សមត្ថភាពវិនិច្ឆ័យរបស់ពួកគេ»
ឬ«គ្របបាំងដោយស្បៃ»
ឬ«យុគសម័យ»។ មើលនិយមន័យពាក្យ«របៀបរបបពិភពលោក»
ឬ«ក្នុងក្អមធ្វើពីដីឥដ្ឋ»
ឬប្រហែលជាមានន័យថា«មិនមែនអស់សង្ឃឹមទេ»
ឬ«ទុក្ខវេទនាដែលអាចនាំឲ្យបាត់បង់ជីវិត»
ន័យត្រង់«ក្នុងរូបកាយរបស់យើង»
នេះរួមបញ្ចូលលក្ខណៈសម្បត្តិនិងចិត្តគោរពកោតខ្លាចព្រះ
ឬ«ការល្បងល»
ពាក្យ«ផ្ទះ»ឬ«លំនៅ»បានត្រូវប្រើជាន័យធៀប សំដៅលើរូបកាយសាច់ឈាមឬរូបកាយវិញ្ញាណ
ឬ«ត្រូវរលាយសាបសូន្យទៅ»
ឬ«លំនៅ»
ឬ«លំនៅ»
ន័យត្រង់«ដរាបណាយើងមានផ្ទះ»
ឬ«ផ្ទះ»
សំដៅលើការភ្លាត់ធ្វើខុស ឬការជួបប្រទះឧបសគ្គចំពោះជំនឿ
ប្រហែលជាដើម្បីប្រយុទ្ធ
ប្រហែលជាដើម្បីតតាំង
ឬ«អ្នកដែលសមនឹងស្លាប់»
ឬ«ប្រៀនប្រដៅ»
ន័យត្រង់«កុំចូលនៅក្រោមនឹមដែលមិនស្មើ»
ជាពាក្យហេប្រឺ មានន័យថា«ចោលម្សៀត»។ នេះសំដៅលើសាថាន
ឬ«មនុស្សស្មោះត្រង់»
មើលសេចក្ដីពន្យល់បន្ថែម ផ្នែកក៥
មើលសេចក្ដីពន្យល់បន្ថែម ផ្នែកក៥
ឬប្រហែលជាមានន័យថា«ខ្ញុំមានចិត្តក្លាហានដោយសារអ្នករាល់គ្នា»
ឬ«ក្នុងការបម្រើពួកអ្នកបរិសុទ្ធ»
មើលសេចក្ដីពន្យល់បន្ថែម ផ្នែកក៥
ឬ«ដោយស្ទាក់ស្ទើរ»
ឬ«និយាយដោយក្លាហាន»
ន័យត្រង់«បង្ក្រាបគ្រប់គំនិតដូចបង្ក្រាបឈ្លើយសឹក»
មើលសេចក្ដីពន្យល់បន្ថែម ផ្នែកក៥
មើលសេចក្ដីពន្យល់បន្ថែម ផ្នែកក៥
ឬ«ប្រណី»
ភាសាក្រិច«សាថាណាស»មានន័យថា«អ្នកប្រឆាំង»ឬ«សត្រូវ»
ឬ«ប្រណី»
ឬ«ប្រណី»
ន័យត្រង់«ពូជ»
ន័យត្រង់«នៅអាក្រាត»
ឬ«ខ្ញុំក៏មានសម្ពាធរៀងរាល់ថ្ងៃដែរ»
ភាសាក្រិច«សាថាណាស»មានន័យថា«អ្នកប្រឆាំង»ឬ«សត្រូវ»
ឬ«វាយ»
ឬ«ការនិយាយដើម»
សំដៅលើអ្វីក៏ដោយដែលមិនសមស្របតាមបុគ្គលិកលក្ខណៈ ខ្នាតតម្រា ការប្រព្រឹត្ត ឬបំណងប្រាថ្នារបស់ព្រះ ហើយអ្វីក៏ដោយដែលធ្វើឲ្យល្អក់កករដល់ទំនាក់ទំនងជាមួយនឹងព្រះ
ភាសាក្រិច«ផូនៀ»។ មើលនិយមន័យពាក្យ«អំពើប្រាសចាកសីលធម៌ខាងផ្លូវភេទ»
ឬ«ប្រព្រឹត្តដោយឥតអៀនខ្មាស»។ ភាសាក្រិច«អាសិលគា»។ មើលនិយមន័យពាក្យ«ប្រព្រឹត្តដោយឥតកោតក្រែង»
មើលកំណត់សម្គាល់រ៉ូម ៥:១២
គ្រិស្តសាសនិកធ្លាប់សួរសុខទុក្ខគ្នាដោយការថើបពេលជួបគ្នា