ការសហការគ្នារវាងប្ដីនិងប្រពន្ធគឺប្រៀបដូចជាអ្នកបើកយន្តហោះនិងជំនួយការអ្នកបើកយន្តហោះដែលធ្វើដំណើរជាមួយគ្នាដោយមានទិសដៅតែមួយ
សម្រាប់ប្ដីប្រពន្ធ
២ ការរួមសហការគ្នា
តើមានន័យយ៉ាងណា?
ពេលប្ដីប្រពន្ធចេះសហការគ្នាក្នុងអាពាហ៍ពិពាហ៍ ពួកគេគឺប្រៀបដូចជាអ្នកបើកយន្តហោះនិងជំនួយការអ្នកបើកយន្តហោះដែលធ្វើដំណើរជាមួយគ្នាទៅទិសដៅតែមួយ។ ស្រដៀងគ្នាដែរ គូម្នាក់ៗគិតនិងធ្វើជាមួយគ្នា មិនមែនតែម្នាក់ឯងទេ សូម្បីតែពេលមានបញ្ហាកើតឡើងក្ដី។
គោលការណ៍គម្ពីរ៖ «ពួកគេលែងជាពីរទៀតហើយ ប៉ុន្តែជាសាច់ឈាមតែមួយវិញ»។—ម៉ាថាយ ១៩:៦
បុរសម្នាក់ឈ្មោះគ្រិស្តតូហ្វើនិយាយថា៖ «ប្ដីប្រពន្ធត្រូវសហការគ្នាដើម្បីឲ្យអាពាហ៍ពិពាហ៍របស់ពួកគេជោគជ័យ»។
ហេតុអ្វីសំខាន់?
ពេលមានជម្លោះ ប្ដីនិងប្រពន្ធដែលមិនសហការគ្នានឹងខំយកឈ្នះចាញ់គ្នាជាជាងដោះស្រាយបញ្ហានោះ។ បញ្ហាតូចតាចនឹងទៅជាបញ្ហាធំ។
អាឡិចសាន់ត្រារៀបរាប់ថា៖ «ការសហការគ្នាគឺសំខាន់ណាស់ក្នុងអាពាហ៍ពិពាហ៍។ បើខ្ញុំនិងប្ដីខ្ញុំមិនសហការគ្នាទេ យើងគឺដូចជាមនុស្សពីរនាក់ដែលគ្រាន់តែរស់នៅក្រោមដំបូលតែមួយប៉ុណ្ណោះ។ ដូច្នេះគឺពិបាកពេលយើងត្រូវធ្វើការសម្រេចចិត្តសំខាន់ៗ»។
អ្វីដែលអ្នកអាចធ្វើ
សូមពិសោធអំពីខ្លួនអ្នក
តើលុយទាំងអស់ដែលខ្ញុំរកបានត្រូវតែជា«របស់ខ្ញុំ»ឬទេ?
បើខ្ញុំចង់សម្រាកយ៉ាងស្រួល តើខ្ញុំត្រូវនៅឲ្យឆ្ងាយពីគូរបស់ខ្ញុំឬទេ?
តើខ្ញុំរក្សាគម្លាតពីសាច់ញាតិរបស់គូខ្ញុំឬទេ ទោះជាពួកគេស្និទ្ធស្នាលជាមួយគូខ្ញុំក្ដី?
សូមពិភាក្សាជាមួយគូរបស់អ្នកអំពីសំណួរដូចតទៅនេះ
ក្នុងអាពាហ៍ពិពាហ៍ តើយើងសហការគ្នាក្នុងរឿងណាខ្លះ?
តើក្នុងរឿងណាខ្លះដែលយើងអាចរៀនឲ្យចេះសហការគ្នាថែមទៀត?
តើយើងអាចធ្វើអ្វីខ្លះដើម្បីឲ្យកាន់តែចេះសហការគ្នា?
យោបល់
សូមកុំធ្វើដូចជាកីឡាករវាយកូនបាល់ដែលនៅម្នាក់ម្ខាងដើម្បីប្រកួតគ្នានោះឡើយ តែសូមធ្វើដូចជាកីឡាករដែលចេះសហការក្នុងក្រុមជាមួយគ្នា។ តើអ្នកអាចធ្វើដូច្នេះយ៉ាងដូចម្ដេច?
ជាជាងគិតថា ‹តើខ្ញុំអាចឈ្នះយ៉ាងដូចម្ដេច?› សូមគិតថា ‹តើយើងទាំងពីរអាចឈ្នះយ៉ាងដូចម្ដេច?›
បុរសម្នាក់ឈ្មោះអ៊ីថិនប្រាប់ថា៖ «អ្នកណាខុសអ្នកណាត្រូវគឺមិនសំខាន់ទេ។ អ្វីដែលសំខាន់គឺការមានភាពសុខសាន្តនិងសាមគ្គីភាពក្នុងអាពាហ៍ពិពាហ៍»។
គោលការណ៍គម្ពីរ៖ «ចូរបន្តយកចិត្តទុកដាក់ចំពោះអ្នកឯទៀត មិនត្រូវគិតតែអំពីរឿងផ្ទាល់ខ្លួនប៉ុណ្ណោះទេ»។—ភីលីព ២:៣, ៤