ម្ដេចក៏ព្រះមិនដកចេញមនុស្សអាក្រក់?
សង្គមមនុស្សសព្វថ្ងៃនេះសម្បូរទៅដោយមនុស្សអាក្រក់ដែលនាំឲ្យមានទុក្ខលំបាក។ ណាមួយទៀត មិនមែនមានតែទាហានប៉ុណ្ណោះទេ ដែលស្លាប់ពេលមានសង្គ្រាម។ ឧក្រិដ្ឋកម្មនិងអំពើហិង្សាក៏មានច្រើនដល់ម្ល៉េះ! ពេលថ្មីៗនេះ អ្នកដទៃប្រហែលជាបានមើលងាយលោកអ្នកដោយសារបញ្ហាពូជសាសន៍ ឬប្រព្រឹត្តដោយអយុត្ដិធម៌មកលើខ្លួនអ្នកក៏មាន។ ដោយផ្អែកទៅលើអ្វីដែលអ្នកធ្លាប់ឃើញនិងឆ្លងកាត់នោះ អ្នកប្រហែលជាឆ្ងល់ដែរថា ‹ម្ដេចក៏ព្រះមិនដកចេញមនុស្សអាក្រក់?›។
មិនមានតែមនុស្សនាបច្ចុប្បន្ននេះប៉ុណ្ណោះទេ ដែលបានសួរសំណួរនោះ។ ប្រមាណ៣.៦០០ឆ្នាំមុន លោកយ៉ូបដែលជាអ្នកបម្រើស្មោះត្រង់របស់ព្រះបានសួរថា៖ «ហេតុអ្វីបានជាពួកមនុស្សអាក្រក់មានជីវិតរស់នៅ?»។ (យ៉ូប ២១:៧) លោកយេរេមាជាអ្នកថ្លែងទំនាយរបស់ព្រះដែលរស់ជាង៧០០ឆ្នាំមុនគ.ស. ហើយគាត់ក៏ពិបាកចិត្តដែរពេលឃើញមនុស្សនៅស្រុកគាត់ធ្វើអំពើអាក្រក់។ គាត់ឆ្ងល់ថា៖ «ហេតុអ្វីបានជាដំណើររបស់មនុស្សអាក្រក់តែងតែចំរើនឡើង? ហេតុអ្វីបានជាពួកអ្នកដែលប្រព្រឹត្តដោយកំបត់បាននៅជាឥតកង្វល់ដូច្នេះ?»។ (យេរេមា ១២:១) ទោះជាយ៉ូបនិងយេរេមាជ្រាបថា ព្រះមិនមែនទុច្ចរិតទេ ពួកគេនៅតែឆ្ងល់ពីមូលហេតុដែលមានមនុស្សអាក្រក់ច្រើនម្ល៉េះ! លោកអ្នកក៏ប្រហែលជាមានចម្ងល់ដូចគ្នាដែរ។
ពេលឃើញមនុស្សធ្វើអំពើអាក្រក់ដែលនាំឲ្យមានទុក្ខលំបាកច្រើន អ្នកខ្លះបន្ទោសព្រះវិញ។ មនុស្សឯទៀតចេះតែឆ្ងល់ថា ‹បើព្រះអង្គយុត្ដិធម៌ មានអំណាចខ្លាំងក្លា ហើយពេញទៅដោយសេចក្ដីស្រឡាញ់ ម្ដេចក៏លោកមិនដកចេញមនុស្សអាក្រក់ និងបំបាត់ចោលការឈឺចាប់? ហេតុអ្វីបានជាព្រះអនុញ្ញាតឲ្យមានអំពើអាក្រក់យូរម្ល៉េះ?›។ អត្ថបទបន្ទាប់នឹងឆ្លើយសំណួរទាំងនេះនិងសំណួរឯទៀត។
[អ្នកផ្ដល់សិទ្ធិឲ្យប្រើរូបភាពនៅទំព័រ៣]
AP Photo/Adam Butler