សកម្មពលបរិសុទ្ធផ្ដល់កម្លាំងឲ្យយើងយកឈ្នះទុក្ខលំបាកសព្វបែបយ៉ាង
«ខ្ញុំមានកម្លាំងសម្រាប់អ្វីៗទាំងអស់ ដោយសារលោកដែលផ្ដល់កម្លាំងឲ្យខ្ញុំ»។—ភី. ៤:១៣
១. ហេតុអ្វីរាស្ត្ររបស់ព្រះយេហូវ៉ាប្រឈមមុខនឹងទុក្ខលំបាកជាច្រើន?
រាស្ត្ររបស់ព្រះយេហូវ៉ាមានទុក្ខលំបាកផ្សេងៗ។ ទុក្ខលំបាកខ្លះគឺដោយសារភាពមិនល្អឥតខ្ចោះរបស់យើង ឬបណ្ដាលមកពីរបៀបរបបដែលយើងរស់នៅ។ ទុក្ខលំបាកខ្លះទៀតគឺដោយសារមានការប្រឆាំងគ្នារវាងពួកអ្នកដែលបម្រើព្រះនិងពួកអ្នកដែលមិនបម្រើលោក។ (លោ. ៣:១៥) តាំងពីដើមដំបូងនៃប្រវត្ដិសាស្ត្រ ព្រះបានជួយពួកអ្នកបម្រើស្មោះត្រង់របស់លោកឲ្យទប់ទល់ការបៀតបៀនដោយសារជំនឿសាសនារបស់ពួកគេ ការបង្ខិតបង្ខំដែលនាំឲ្យអន្តរាយរបស់មនុស្សស្រករគ្នានិងឲ្យស៊ូទ្រាំទុក្ខលំបាកឯទៀតសព្វបែបយ៉ាង។ សកម្មពលបរិសុទ្ធរបស់លោកអាចផ្ដល់កម្លាំងឲ្យយើងធ្វើដូច្នោះដែរ។
ការបៀតបៀនដោយសារជំនឿសាសនា
២. តើការបៀតបៀនដោយសារជំនឿសាសនាមានគោលបំណងអ្វី? ហើយតើមានប្រភេទណាខ្លះ?
២ ការបៀតបៀនដោយសារជំនឿសាសនាគឺជាការធ្វើទុក្ខបុកម្នេញឬជាការធ្វើអាក្រក់ដោយចេតនាទៅលើមនុស្សដែលកាន់សាសនានោះ។ គោលបំណងនៃការបៀតបៀននោះគឺបំបាត់ចោលជំនឿសាសនានោះ រារាំងជំនឿសាសនានោះកុំឲ្យរាលដាល ឬធ្វើឲ្យអ្នកជឿរួចហើយឲ្យលែងជឿសាសនានោះទៀត។ ការបៀតបៀតមានច្រើនប្រភេទ ខ្លះដោយចំៗ ខ្លះទៀតពិបាកកត់សម្គាល់។ គម្ពីរបរិសុទ្ធប្រៀបការវាយប្រហាររបស់សាថានទៅនឹងការពាធារបស់តោស្ទាវនិងពស់ហនុមានឬពស់វែក។—សូមអាន ទំនុកតម្កើង ៩១:១៣
៣. តើការបៀតបៀនដែលប្រៀបដូចការពាធារបស់តោនិងពស់វែកមានលក្ខណៈយ៉ាងណា?
៣ ដូចតោសាហាវមួយ ជាញឹកញយ សាថានបានវាយប្រហារដោយចំហ ឬដោយចំៗតាមរយៈអំពើឃោរឃៅ ការចាប់ដាក់គុកឬការដាក់បម្រាម។ (ទំនុក. ៩៤:២០) របាយការណ៍នៃសៀវភៅប្រចាំឆ្នាំជាភាសាអង់គ្លេសដែលរៀបរាប់អំពីសកម្មភាពរបស់សាក្សីព្រះយេហូវ៉ានៅសម័យយើងមានកំណត់ហេតុជាច្រើនអំពីកលល្បិចបែបនេះ។ ហ្វូងមនុស្សខ្លះដែលមិនគោរពច្បាប់ ដែលដឹកនាំដោយពួកបព្វជិតឬពួកអ្នកជ្រុលនិយមខាងនយោបាយបានធ្វើបាបរាស្ត្ររបស់ព្រះនៅកន្លែងផ្សេងៗ។ ការវាយប្រហារទាំងនេះដែលប្រៀបដូចការពាធារបស់តោបណ្ដាលឲ្យអ្នកខ្លះឈប់បម្រើព្រះយេហូវ៉ា។ ម្យ៉ាងទៀត ដូចពស់វែកដែលលាក់ខ្លួន មេកំណាចវាយប្រហារមនុស្សដោយប្រើវិធីដែលពិបាកសម្គាល់ដើម្បីបំពុលចិត្តគំនិតនិងដើម្បីបញ្ឆោតមនុស្សឲ្យធ្វើតាមបំណងប្រាថ្នារបស់វា។ ការវាយប្រហារប្រភេទនេះបានត្រូវរៀបចំឡើងដើម្បីធ្វើឲ្យជំនឿយើងចុះខ្សោយឬបង្ខូចជំនឿនោះ។ ប៉ុន្តែតាមរយៈសកម្មពលបរិសុទ្ធរបស់ព្រះ យើងអាចទប់ទល់នឹងការបៀតបៀនទាំងពីរប្រភេទនេះបាន។
៤, ៥. តើវិធីប្រសើរបំផុតដើម្បីត្រៀមខ្លួនប្រឈមមុខការបៀតបៀនគឺជាអ្វី? ហើយហេតុអ្វី? សូមលើកឧទាហរណ៍មួយ។
៤ ការនឹកគិតអំពីកាលៈទេសៈផ្សេងៗដែលអាចនាំឲ្យមានការបៀតបៀននៅអនាគត មិនមែនជាវិធីល្អបំផុតដើម្បីត្រៀមខ្លួនប្រឈមមុខការបៀតបៀននោះទេ។ ដោយសារយើងមិនអាចដឹងថាយើងប្រហែលជាប្រឈមមុខនឹងការបៀតបៀនបែបណាទេ នោះគ្មានប្រយោជន៍ប៉ុន្មានឲ្យយើងបារម្ភអំពីអ្វីដែលប្រហែលមិនកើតឡើងសោះនោះឡើយ។ ក៏ប៉ុន្តែ មានអ្វីមួយដែលយើងអាចធ្វើ។ យើងអាចសញ្ជឹងគិតអំពីគំរូរបស់ពួកអ្នកបម្រើស្មោះត្រង់របស់ព្រះយេហូវ៉ាដែលមានក្នុងបទគម្ពីរព្រមទាំងសញ្ជឹងគិតអំពីសេចក្ដីបង្រៀននិងគំរូរបស់លោកយេស៊ូ។ មនុស្សភាគច្រើនដែលបានស៊ូទ្រាំការបៀតបៀនដោយជោគជ័យបានធ្វើដូច្នេះដែរ ហើយនេះបានជួយពួកគេឲ្យមានសេចក្ដីស្រឡាញ់ចំពោះព្រះយេហូវ៉ាកាន់តែខ្លាំងឡើង។ ជាលទ្ធផល សេចក្ដីស្រឡាញ់នោះបានជួយពួកគេឲ្យយកឈ្នះទុក្ខលំបាកណាក៏ដោយដែលពួកគេជួបប្រទះ។
៥ សូមពិចារណាគំរូរបស់បងស្រីយើងពីរនាក់នៅប្រទេសម៉ាឡាវី។ ក្នុងគោលបំណងបង្ខំពួកគាត់ឲ្យទិញកាតគណៈបក្សនយោបាយ ហ្វូងមនុស្សដ៏ឃោរឃៅបានវាយ សម្រាត ហើយគំរាមរំលោភពួកគាត់។ ហ្វូងមនុស្សនោះបានកុហកពួកគាត់ថាសូម្បីតែសមាជិកនៃគ្រួសារបេតអែលក៏បានទិញកាតគណៈបក្សដែរ។ តើបងស្រីយើងឆ្លើយយ៉ាងណា? ពួកគាត់ឆ្លើយថា៖ «យើងបម្រើតែព្រះយេហូវ៉ាប៉ុណ្ណោះ។ ដូច្នេះ បើបងប្អូននៅការិយាល័យសាខាបានទិញកាតក៏ដោយ ក៏យើងមិនទិញដែរ។ យើងនឹងមិនផ្លាស់ប្ដូរគំនិតទេ ទោះជាពួកអ្នកសម្លាប់យើងក៏ដោយ!»។ បន្ទាប់ពីពួកគាត់បានកាន់ជំហរយ៉ាងក្លាហានដូច្នោះ ពួកគេបានដោះលែងបងស្រីយើងទៅ។
៦, ៧. តើតាមរបៀបណាដែលព្រះយេហូវ៉ាផ្ដល់កម្លាំងឲ្យពួកអ្នកបម្រើរបស់លោកប្រឈមមុខនឹងការបៀតបៀន?
៦ សាវ័កប៉ូលបានកត់សម្គាល់ថា«ទោះបីមានសេចក្ដីវេទនាជាច្រើនក៏ដោយ» ពួកគ្រិស្តសាសនិកនៅក្រុងថែស្សាឡូនិចបានទទួលយកដំណឹងអំពីសេចក្ដីពិត«ដោយអំណរដែលមកពីសកម្មពលបរិសុទ្ធ»។ (១ថែ. ១:៦) ពិតមែន គ្រិស្តសាសនិកនៅអតីតកាលនិងនៅបច្ចុប្បន្នដែលបានប្រឈមមុខនិងបានស៊ូទ្រាំការបៀតបៀនដោយជោគជ័យ បានរៀបរាប់ថានៅដំណាក់កាលដ៏ពិបាកបំផុតនៃទុក្ខលំបាក ពួកគាត់មានសេចក្ដីសុខសាន្តក្នុងចិត្ត ដែលជាលក្ខណៈមួយនៃផលដែលបង្កើតដោយសកម្មពលរបស់ព្រះ។ (កាឡ. ៥:២២) ជាលទ្ធផល សេចក្ដីសុខសាន្តនោះបានជួយពួកគាត់ឲ្យរក្សាការពារចិត្តនិងសមត្ថភាពរិះគិតរបស់ពួកគាត់។ ព្រះយេហូវ៉ាប្រើសកម្មពលរបស់លោកដើម្បីផ្ដល់កម្លាំងឲ្យពួកអ្នកបម្រើរបស់លោកស៊ូទ្រាំទុក្ខលំបាក ហើយប្រព្រឹត្តយ៉ាងត្រឹមត្រូវពេលមានទុក្ខវេទនា។a
៧ មនុស្សដែលសង្កេតមើលយើងបានភ្ញាក់ផ្អើលដោយឃើញការប្ដេជ្ញាចិត្តរបស់រាស្ត្រព្រះដើម្បីរក្សាចិត្តស្មោះគ្រប់លក្ខណៈសូម្បីតែពេលប្រឈមមុខនឹងការបៀតបៀនដ៏សាហាវក៏ដោយ។ សាក្សីព្រះយេហូវ៉ាហាក់ដូចជាពោរពេញទៅដោយកម្លាំងដែលលើសពីធម្មតា ហើយនេះជាការពិតមែន។ សាវ័កពេត្រុសបានធានាយើងថា៖ «ប្រសិនបើគេជេរប្រមាថអ្នករាល់គ្នាដោយសារនាមរបស់គ្រិស្ត នោះអ្នករាល់គ្នាមានសុភមង្គលហើយ ពីព្រោះសកម្មពលដ៏រុងរឿងរបស់ព្រះសណ្ឋិតលើអ្នករាល់គ្នា»។ (១ពេ. ៤:១៤) ដោយហេតុថាយើងត្រូវគេបៀតបៀនដោយសារយើងគាំទ្រខ្នាតតម្រាដ៏សុចរិត នេះបង្ហាញថាព្រះពេញចិត្តនឹងយើង។ (ម៉ាថ. ៥:១០-១២; យ៉ូន. ១៥:២០) ការដែលព្រះយេហូវ៉ាបានឲ្យសកម្មពលបរិសុទ្ធដល់យើងជាទីសំអាងដែលបញ្ជាក់ថាលោកឲ្យពរយើង នេះនាំឲ្យយើងមានអំណរមែន!
ការបង្ខិតបង្ខំពីមនុស្សស្រករគ្នា
៨. (ក) តើអ្វីបានជួយយ៉ូស្វេនិងកាលែបឲ្យទប់ទល់ការបង្ខិតបង្ខំពីមនុស្សស្រករពួកគាត់? (ខ) តើយើងអាចទាញមេរៀនអ្វីពីគំរូរបស់យ៉ូស្វេនិងកាលែប?
៨ ការបៀតបៀនម្យ៉ាងទៀតដែលពិបាកកត់សម្គាល់ដែលពួកគ្រិស្តសាសនិកត្រូវស៊ូទ្រាំគឺការបង្ខិតបង្ខំពីមនុស្សស្រករគ្នា។ ក៏ប៉ុន្តែ ដោយសារសកម្មពលព្រះយេហូវ៉ាខ្លាំងជាងចិត្តគំនិតរបស់ពិភពលោក យើងអាចទប់ទល់មនុស្សដែលចំអកឲ្យយើង មនុស្សដែលផ្សាយពាក្យមិនពិតអំពីយើង ឬដែលប៉ុនប៉ងបង្ខំយើងឲ្យធ្វើតាមខ្នាតតម្រារបស់ពួកគេ។ ជាឧទាហរណ៍ តើអ្វីបានជួយយ៉ូស្វេនិងកាលែបឲ្យជំទាស់នឹងទស្សនៈរបស់អ្នកស៊ើបការណ៍១០នាក់ដែលបានត្រូវចាត់ឲ្យទៅស្រុកកាណាន? ពួកគាត់បានធ្វើតាមការដឹកនាំរបស់សកម្មពលព្រះ ហើយជាលទ្ធផលមាន«វិញ្ញាណ»ឬចិត្តគំនិតផ្សេង។—សូមអាន ជនគណនា ១៣:៣០; ១៤:៦-១០, ២៤
៩. ហេតុអ្វីគ្រិស្តសាសនិកត្រូវសុខចិត្តខុសពីមនុស្សភាគច្រើន?
៩ ស្រដៀងគ្នាដែរ សកម្មពលបរិសុទ្ធផ្ដល់កម្លាំងឲ្យពួកសាវ័ករបស់លោកយេស៊ូ ស្ដាប់បង្គាប់ព្រះជាជាងពួកអ្នកដែលមនុស្សជាច្រើនគោរពជាគ្រូនៃសាសនាពិត។ (សកម្ម. ៤:២១, ៣១; ៥:២៩, ៣២) មនុស្សភាគច្រើនចូលចិត្តធ្វើអ្វីដែលមនុស្សនៅជុំវិញពួកគេកំពុងធ្វើដើម្បីជៀសវាងពីទំនាស់ឬជម្លោះ។ ក៏ប៉ុន្តែ ជាញឹកញយ គ្រិស្តសាសនិកពិតត្រូវប្រកាន់ជំហរចំពោះអ្វីដែលពួកគេដឹងថាត្រឹមត្រូវ។ សូម្បីតែដូច្នេះក៏ដោយ ដោយសារសកម្មពលរបស់ព្រះបានផ្ដល់កម្លាំងឲ្យពួកគាត់ នោះពួកគាត់មិនខ្លាចខុសគេទេ។ (២ធី. ១:៧) សូមពិចារណាករណីមួយដែលយើងមិនត្រូវចុះចាញ់ការបង្ខិតបង្ខំពីមនុស្សស្រករយើង។
១០. តើគ្រិស្តសាសនិកខ្លះប្រហែលពិបាកសម្រេចចិត្តអំពីរឿងអ្វី?
១០ ជនវ័យក្មេងខ្លះប្រហែលមិនដឹងសម្រេចធ្វើអ្វីពេលពួកគេដឹងថាមិត្តភក្ដិម្នាក់បានប្រព្រឹត្តមិនសមស្របនឹងបទគម្ពីរ។ ពួកគេប្រហែលមានអារម្មណ៍ថាបើពួកគេសុំពួកអ្នកចាស់ទុំឲ្យជួយមិត្តភក្ដិនោះ ពួកគេនឹងក្បត់មិត្តភក្ដិ។ ហេតុនេះ ដោយសារពួកគេយល់ខុសថាអ្វីទៅគឺជាភក្ដីភាព នោះពួកគេមិនព្រមប្រាប់អំពីកំហុសរបស់មិត្តភក្ដិទេ។ អ្នកដែលធ្វើខុសប្រហែលបង្ខំមិត្តភក្ដិគាត់ឲ្យលាក់អំពើខុសឆ្គងរបស់គាត់តទៅទៀត។ មិនមែនតែមនុស្សវ័យក្មេងទេដែលមានបញ្ហាបែបនេះ។ មនុស្សពេញវ័យខ្លះក៏ប្រហែលពិបាកទៅជួបពួកអ្នកចាស់ទុំដើម្បីប្រាប់អំពីអំពើខុសឆ្គងរបស់មិត្តភក្ដិឬសមាជិកគ្រួសាររបស់គាត់ដែរ។ ប៉ុន្តែ តើគ្រិស្តសាសនិកពិតគួរប្រព្រឹត្តយ៉ាងណាចំពោះការបង្ខិតបង្ខំបែបនេះ?
១១, ១២. បើសមាជិកម្នាក់នៃក្រុមជំនុំចង់ឲ្យអ្នកលាក់អំពើខុសឆ្គងរបស់គាត់ តើអ្នកគួរធ្វើយ៉ាងណា? ហើយហេតុអ្វី?
១១ សូមនឹកគិតអំពីស្ថានភាពនេះ។ ឧបមាថាវុធជាប្អូនប្រុសម្នាក់បានដឹងថា ម៉េងជាមិត្តគាត់ម្នាក់ក្នុងក្រុមជំនុំមានទម្លាប់មើលរូបអាសអាភាស។ វុធប្រាប់ម៉េងថាគាត់បារម្ភខ្លាំងណាស់អំពីអ្វីដែលម៉េងកំពុងធ្វើ។ ក៏ប៉ុន្តែ ម៉េងមិនសូវអើពើនឹងសម្ដីរបស់គាត់ទេ។ ពេលដែលវុធដាស់តឿនមិត្តគាត់ឲ្យប្រាប់ពួកអ្នកចាស់ទុំអំពីរឿងនេះ ម៉េងឆ្លើយថាបើពួកគាត់ទាំងពីរនាក់ពិតជាមិត្តនឹងគ្នាមែន វុធនឹងមិនប្រាប់អំពីរឿងគាត់ដល់ពួកអ្នកចាស់ទុំទេ។ តើវុធគួរខ្លាចម៉េងឈប់រាប់រកគាត់ឬ? គាត់ប្រហែលសង្ស័យថាពួកអ្នកចាស់ទុំនឹងជឿអ្នកណា បើម៉េងបដិសេធមិនប្រាប់ការពិតវិញ។ ទោះជាយ៉ាងនោះក្ដី ម៉េងនឹងនៅតែមានបញ្ហានោះ បើវុធនៅស្ងៀម។ ប្រាកដហើយ នេះអាចនាំឲ្យម៉េងបាត់បង់ចំណងមិត្តភាពជាមួយព្រះយេហូវ៉ា។ ជាការល្អឲ្យវុធនឹកចាំថា«ការដែលខ្លាចចំពោះមនុស្ស នោះនាំឲ្យជាប់អន្ទាក់ តែអ្នកណាដែលទុកចិត្តដល់ព្រះយេហូវ៉ាពិត នោះនឹងបានសុខវិញ»។ (សុភ. ២៩:២៥) តើវុធអាចធ្វើអ្វីទៀត? ដោយសេចក្ដីស្រឡាញ់ គាត់ប្រហែលអាចទៅជួបម៉េងម្ដងទៀត ហើយនិយាយត្រង់ៗអំពីកំហុសរបស់ម៉េង។ នេះតម្រូវឲ្យមានចិត្តក្លាហាន។ ប៉ុន្តែលើកនេះ ម៉េងប្រហែលចង់និយាយអំពីបញ្ហារបស់គាត់។ វុធគួរលើកទឹកចិត្តម៉េងម្ដងទៀតឲ្យប្រាប់ពួកអ្នកចាស់ទុំ ហើយប្រាប់ម៉េងថាបើមិនធ្វើដូច្នេះក្នុងរយៈពេលសមគួរ នោះគាត់នឹងប្រាប់ពួកអ្នកចាស់ទុំ។—លេវី. ៥:១
១២ បើអ្នកធ្លាប់ប្រឈមមុខនឹងស្ថានភាពបែបនេះ មិត្តរបស់អ្នក ដំបូងប្រហែលមិនដឹងគុណអ្នកចំពោះការព្យាយាមរបស់អ្នកដើម្បីជួយគាត់ឡើយ។ ប៉ុន្តែ ក្រោយមក គាត់ប្រហែលដឹងថាអ្វីដែលអ្នកកំពុងធ្វើគឺដើម្បីប្រយោជន៍គាត់។ បើបុគ្គលដែលប្រព្រឹត្តអំពើខុសឆ្គងព្រមឲ្យគេជួយ គាត់ប្រហែលដឹងគុណអ្នកជានិច្ចចំពោះសេចក្ដីក្លាហាននិងភក្ដីភាពរបស់អ្នក។ ផ្ទុយទៅវិញ បើគាត់នៅតែខឹងអ្នកដោយសារអ្នកសុំពួកអ្នកចាស់ទុំឲ្យជួយគាត់ តើគាត់ពិតជាមិត្តភក្ដិដែលអ្នកចង់មានឬទេ? ការធ្វើឲ្យព្រះយេហូវ៉ាដែលជាមិត្តភក្ដិល្អបំផុតរបស់យើងពេញចិត្តតែងតែជាអ្វីដែលត្រឹមត្រូវ។ កាលណាយើងចាត់ទុកលោកថាសំខាន់បំផុត អ្នកឯទៀតដែលស្រឡាញ់លោកនឹងគោរពយើងចំពោះភក្ដីភាពរបស់យើង ហើយក្លាយទៅជាមិត្តពិតប្រាកដ។ យើងមិនគួរអនុញ្ញាតឲ្យមេកំណាចមានឱកាសឬមានឥទ្ធិពលលើក្រុមជំនុំសោះឡើយ។ បើយើងធ្វើដូច្នេះ យើងប្រាកដជាធ្វើឲ្យសកម្មពលបរិសុទ្ធរបស់ព្រះយេហូវ៉ាកើតទុក្ខ។ ក៏ប៉ុន្តែ យើងប្រព្រឹត្តសមស្របតាមសកម្មពលបរិសុទ្ធ ដោយខំប្រឹងធ្វើឲ្យក្រុមជំនុំគ្រិស្តសាសនិកស្អាតស្អំ។—អេភ. ៤:២៧, ៣០
ស៊ូទ្រាំទុក្ខវេទនាគ្រប់បែបយ៉ាង
១៣. តើទុក្ខវេទនាបែបណាខ្លះដែលរាស្ត្ររបស់ព្រះយេហូវ៉ាកំពុងប្រឈមមុខ? ហើយហេតុអ្វីទុក្ខវេទនាបែបនោះមានច្រើនម្ល៉េះ?
១៣ ទុក្ខវេទនាអាចមានច្រើនប្រភេទ ដូចជាបញ្ហាខ្វះលុយកាក់ បាត់បង់ការងារ មហន្តរាយធម្មជាតិ ការបាត់បង់បុគ្គលជាទីស្រឡាញ់ បញ្ហាសុខភាពជាដើម។ ដោយសារយើងរស់នៅក្នុង«គ្រាចុងក្រោយបង្អស់» យើងដឹងថាមិនយូរមិនឆាប់យើងទាំងអស់គ្នានឹងត្រូវប្រឈមមុខនឹងទុក្ខលំបាកណាមួយមិនខាន។ (២ធី. ៣:១) កាលណាអ្វីនោះកើតឡើង ជាការសំខាន់ដែលយើងមិនត្រូវតក់ស្លុត។ សកម្មពលបរិសុទ្ធអាចផ្ដល់កម្លាំងឲ្យយើងស៊ូទ្រាំទុក្ខវេទនាសព្វបែបយ៉ាង។
១៤. តើអ្វីផ្ដល់កម្លាំងឲ្យយ៉ូបស៊ូទ្រាំទុក្ខវេទនា?
១៤ យ៉ូបបានរងទុក្ខពីទុក្ខវេទនាមួយទៅទុក្ខវេទនាមួយទៀត។ គាត់បាត់បង់មុខរបររបស់គាត់ កូន មិត្តភក្ដិនិងសុខភាព ហើយភរិយាគាត់លែងទុកចិត្តព្រះយេហូវ៉ាទៀត។ (យ៉ូប ១:១៣-១៩; ២:៧-៩) ទោះជាយ៉ាងនេះក្ដី គាត់បានទទួលការសម្រាលទុក្ខពីអេលីហ៊ូវ។ អ្វីដែលអេលីហ៊ូវប្រាប់យ៉ូបព្រមទាំងចំណុចសំខាន់ដែលព្រះយេហូវ៉ាមានប្រសាសន៍ទៅកាន់យ៉ូបគឺ៖ «សូមឈរឲ្យនឹង ហើយពិចារណាអស់ទាំងការអស្ចារ្យរបស់ព្រះ»។ (យ៉ូប ៣៧:១៤) តើអ្វីបានជួយយ៉ូបឲ្យស៊ូទ្រាំទុក្ខលំបាករបស់គាត់? ហើយតើអ្វីអាចជួយយើងឲ្យស៊ូទ្រាំទុក្ខលំបាករបស់យើង? អ្វីដែលបានជួយយ៉ូបនិងជួយយើងគឺការចាំនិងការសញ្ជឹងគិតអំពីរបៀបផ្សេងៗដែលសកម្មពលបរិសុទ្ធនិងឫទ្ធានុភាពរបស់ព្រះយេហូវ៉ាបានសម្ដែងឲ្យឃើញ។ (យ៉ូប ៣៨:១-៤១; ៤២:១, ២) យើងប្រហែលជាចាំគ្រាផ្សេងៗក្នុងជីវិតយើង ពេលដែលយើងឃើញទីសំអាងដែលបញ្ជាក់ថាព្រះយកចិត្តទុកដាក់នឹងយើងផ្ទាល់។ លោកនៅតែយកចិត្តទុកដាក់នឹងយើង។
១៥. តើអ្វីបានផ្ដល់កម្លាំងឲ្យប៉ូលស៊ូទ្រាំទុក្ខលំបាក?
១៥ ដោយសារជំនឿរបស់គាត់ សាវ័កប៉ូលបានស៊ូទ្រាំទុក្ខវេទនាជាច្រើនស្ទើរបាត់បង់ជីវិត។ (២កូ. ១១:២៣-២៨) តើតាមរបៀបណាដែលគាត់បានរក្សាតុល្យភាពនិងភាពនឹងនរខាងផ្លូវចិត្តក្នុងកាលៈទេសៈដ៏លំបាកទាំងនោះ? គឺដោយអធិដ្ឋាននិងដោយទុកចិត្តព្រះយេហូវ៉ា។ ក្នុងអំឡុងពេលគាត់ទទួលការល្បងលដែលទំនងជាត្រូវគេសម្លាប់ ប៉ូលបានសរសេរថា៖ «លោកម្ចាស់បានឈរក្បែរខ្ញុំ ហើយពង្រឹងកម្លាំងខ្ញុំ ដើម្បីឲ្យខ្ញុំផ្សព្វផ្សាយយ៉ាងសព្វគ្រប់ និងដើម្បីឲ្យប្រជាជាតិទាំងអស់ឮការផ្សព្វផ្សាយ ហើយខ្ញុំបានត្រូវសង្គ្រោះឲ្យរួចពីមាត់តោ»។ (២ធី. ៤:១៧) ហេតុនេះ តាមរយៈអ្វីដែលគាត់បានឆ្លងកាត់ដោយផ្ទាល់ ប៉ូលអាចធានាបងប្អូនរួមជំនឿថាពួកគេមិនចាំបាច់«ខ្វល់ចិត្តអំពីអ្វីឡើយ»។—សូមអាន ភីលីព ៤:៦, ៧, ១៣
១៦, ១៧. សូមលើកឧទាហរណ៍មួយអំពីរបៀបដែលព្រះយេហូវ៉ាផ្ដល់កម្លាំងឲ្យរាស្ត្រលោកប្រឈមមុខនឹងទុក្ខវេទនានៅសព្វថ្ងៃនេះ។
១៦ អ្នកត្រួសត្រាយម្នាក់ឈ្មោះរ៉ូកសាណាគឺជាអ្នកដែលបានឃើញរបៀបដែលព្រះយេហូវ៉ាផ្គត់ផ្គង់រាស្ត្ររបស់លោក។ ពេលដែលនាងសុំនិយោជករបស់នាងឈប់ធ្វើការថ្ងៃខ្លះដើម្បីទៅមហាសន្និបាតមួយរបស់យើង និយោជកឆ្លើយតបទាំងខឹងថាបើនាងទៅមែន គាត់នឹងឈប់ឲ្យនាងធ្វើការទៀត។ ទោះជាយ៉ាងនេះក្ដី រ៉ូកសាណាបានទៅមហាសន្និបាត ដោយអធិដ្ឋានសុំឲ្យនាងអាចមានការងារធ្វើតទៅទៀត។ បន្ទាប់ពីបានអធិដ្ឋាន នាងមានចិត្តស្ងប់។ ពេលដែលនាងចូលធ្វើការវិញនៅថ្ងៃច័ន្ទក្រោយមហាសន្និបាត និយោជករបស់នាងបានបញ្ឈប់នាងពីការងារដូចសម្ដីគាត់មែន។ នេះធ្វើឲ្យរ៉ូកសាណាបារម្ភ ព្រោះនាងត្រូវការការងារនោះដើម្បីជួយគ្រួសារនាង ថ្វីបើការងារនោះបានប្រាក់ខែតិចក៏ដោយ។ នាងអធិដ្ឋានម្ដងទៀត ហើយបានសញ្ជឹងគិតថាព្រះផ្ដល់សេចក្ដីបង្រៀនខាងគម្ពីរនៅមហាសន្និបាតឲ្យនាង ដូច្នេះលោកក៏នឹងផ្ដល់អ្វីដែលនាងត្រូវការដើម្បីចិញ្ចឹមជីវិតដែរ។ កាលដែលនាងដើរទៅផ្ទះវិញ រ៉ូកសាណាបានឃើញស្លាកមួយដែលសរសេរថា«ជ្រើសរើសបុគ្គលិក»ដែលមានបទពិសោធន៍ក្នុងការប្រើម៉ាស៊ីនដេរក្នុងរោងចក្រ ហើយនាងបានដាក់ពាក្យ។ អ្នកចាត់ការបានដឹងថារ៉ូកសាណាគ្មានបទពិសោធន៍ទេ តែទោះជាយ៉ាងនេះក្ដី គាត់បានឲ្យការងារនាងធ្វើ ដែលបានប្រាក់ខែជិតមួយជាពីរនៃប្រាក់ខែនាងពីមុន។ រ៉ូកសាណាមានអារម្មណ៍ថាព្រះបានធ្វើតាមការអធិដ្ឋានរបស់នាង។ ក៏ប៉ុន្តែ ពរដ៏ប្រសើរបំផុតនោះ គឺនាងអាចផ្សព្វផ្សាយដំណឹងល្អដល់អ្នកខ្លះដែលធ្វើការជាមួយនាង។ ប្រាំនាក់ក្នុងចំណោមពួកគេ រួមទាំងអ្នកចាត់ការផងដែរបានទទួលយកសេចក្ដីពិត ហើយបានទទួលការជ្រមុជទឹក។
១៧ ជួនកាល មើលទៅហាក់ដូចជាព្រះមិនធ្វើតាមការអធិដ្ឋានរបស់យើងភ្លាមៗឬមិនធ្វើដូចអ្វីដែលយើងរំពឹងទុកទេ។ បើដូច្នេះ ពិតជាមានមូលហេតុត្រឹមត្រូវ។ ព្រះយេហូវ៉ាជ្រាបអំពីមូលហេតុនោះ តែប្រហែលនៅថ្ងៃក្រោយ យើងនឹងយល់ច្បាស់ពីមូលហេតុនោះវិញ។ មានអ្វីមួយដែលយើងអាចប្រាកដគឺព្រះមិនបោះបង់ចោលពួកអ្នកដែលស្មោះត្រង់នឹងលោកឡើយ។—ហេ. ៦:១០
យកឈ្នះទុក្ខលំបាកនិងការល្បួងផ្សេងៗ
១៨, ១៩. (ក) ហេតុអ្វីយើងដឹងថាយើងនឹងមានទុក្ខលំបាកនិងការល្បួងផ្សេងៗ? (ខ) តើអ្នកអាចយកឈ្នះទុក្ខលំបាកយ៉ាងដូចម្ដេច?
១៨ រាស្ត្ររបស់ព្រះយេហូវ៉ាមិនភ្ញាក់ផ្អើលទេពេលជួបប្រទះការល្បួង ការធ្លាក់ទឹកចិត្ត ការបៀតបៀននិងការបង្ខិតបង្ខំពីមនុស្សស្រករគ្នា។ ជាទូទៅ ពិភពលោកនេះប្រឆាំងយើង។ (យ៉ូន. ១៥:១៧-១៩) ក៏ប៉ុន្តែ សកម្មពលបរិសុទ្ធអាចជួយយើងយកឈ្នះការពិបាកណាក៏ដោយដែលយើងប្រហែលជួបប្រទះពេលយើងបម្រើព្រះ។ ព្រះយេហូវ៉ាមិនឲ្យយើងរងការល្បួងហួសពីសមត្ថភាពស៊ូទ្រាំរបស់យើងឡើយ។ (១កូ. ១០:១៣) លោកប្រាកដជានឹងមិនចាកចេញពីយើងឬក៏មិនបោះបង់ចោលយើងទេ។ (ហេ. ១៣:៥) ការធ្វើតាមបណ្ដាំដែលបានត្រូវសរសេរក្រោមការដឹកនាំរបស់លោក ការពារនិងពង្រឹងកម្លាំងយើង។ ម្យ៉ាងទៀត សកម្មពលព្រះអាចជំរុញចិត្តបងប្អូនរួមជំនឿឲ្យផ្ដល់ជំនួយពេលដែលយើងត្រូវការជំនួយនោះខ្លាំងបំផុត។
១៩ សូមឲ្យយើងទាំងអស់គ្នាបន្តស្វែងរកសកម្មពលបរិសុទ្ធតាមរយៈការអធិដ្ឋាននិងការសិក្សាគម្ពីរ។ សូមឲ្យយើងបន្ត‹ទទួលកម្លាំងខ្លាំងក្លា ដោយសារឫទ្ធានុភាពរុងរឿងរបស់ព្រះ ដើម្បីឲ្យយើងស៊ូទ្រាំនឹងការទាំងអស់ ហើយមានចិត្តធ្ងន់ដោយអំណរ›។—កូឡ. ១:១១
[កំណត់សម្គាល់]
a ជាឧទាហរណ៍ សូមមើលទស្សនាវដ្ដីប៉មយាម ថ្ងៃទី១ ខែសីហា ឆ្នាំ២០០១ ទំព័រ១៥។
តើអ្នកនឹងឆ្លើយយ៉ាងណា?
• តើអ្នកអាចត្រៀមខ្លួនយ៉ាងណាដើម្បីស៊ូទ្រាំការបៀតបៀន?
• តើអ្នកគួរធ្វើយ៉ាងណាបើអ្នកណាម្នាក់បង្ខំអ្នកឲ្យលាក់អំពើខុសឆ្គងរបស់គាត់?
• តើអ្នកអាចមានទំនុកចិត្តយ៉ាងណាពេលប្រឈមមុខនឹងទុក្ខលំបាកណាក៏ដោយ?
[រូបភាពនៅទំព័រ៣០]
តើយើងអាចទាញមេរៀនអ្វីខ្លះពីយ៉ូស្វេនិងកាលែប?
[រូបភាពនៅទំព័រ៣១]
តើតាមរបៀបណាដែលអ្នកអាចជួយមិត្តភក្ដិម្នាក់ដែលប្រព្រឹត្តអំពើខុសឆ្គង?