សកម្មពលបរិសុទ្ធផ្ដល់កម្លាំងឲ្យយើងយកឈ្នះការល្បួងនិងការធ្លាក់ទឹកចិត្ត
«អ្នករាល់គ្នានឹងទទួលឫទ្ធានុភាព កាលដែលសកម្មពលបរិសុទ្ធរបស់ព្រះមកសណ្ឋិតលើអ្នករាល់គ្នា»។—សកម្ម. ១:៨
១, ២. តើជំនួយអ្វីដែលលោកយេស៊ូបានសន្យានឹងពួកអ្នកកាន់តាមលោក? ហើយហេតុអ្វីពួកគេត្រូវការជំនួយនោះ?
លោកយេស៊ូបានដឹងថាពួកអ្នកកាន់តាមលោកមិនអាចធ្វើតាមអ្វីៗទាំងអស់ដែលលោកបង្គាប់ពួកគេឲ្យធ្វើដោយពឹងលើកម្លាំងរបស់ពួកគេឡើយ។ ដោយគិតអំពីទំហំនៃកិច្ចការផ្សព្វផ្សាយ កម្លាំងនៃពួកអ្នកប្រឆាំងនិងភាពទន់ខ្សោយរបស់ពួកអ្នកកាន់តាមលោក គឺច្បាស់ណាស់ដែលពួកគេត្រូវការឫទ្ធានុភាពលើសពីធម្មតា។ ហេតុនេះ បន្ដិចមុនលោកយេស៊ូឡើងទៅស្ថានសួគ៌វិញ លោកបានពង្រឹងទំនុកចិត្តពួកអ្នកកាន់តាមលោកថា៖ «អ្នករាល់គ្នានឹងទទួលឫទ្ធានុភាព កាលដែលសកម្មពលបរិសុទ្ធរបស់ព្រះមកសណ្ឋិតលើអ្នករាល់គ្នា ហើយអ្នករាល់គ្នានឹងធ្វើជាសាក្សីបញ្ជាក់អំពីខ្ញុំនៅក្រុងយេរូសាឡិម នៅតំបន់យូឌាទាំងមូល នៅស្រុកសាម៉ារី និងរហូតដល់កន្លែងឆ្ងាយបំផុតនៅផែនដី»។—សកម្ម. ១:៨
២ សេចក្ដីសន្យានោះចាប់ផ្ដើមសម្រេចនៅបុណ្យថ្ងៃទី៥០នាឆ្នាំ៣៣ គ.ស. ពេលសកម្មពលបរិសុទ្ធបានផ្ដល់កម្លាំងឲ្យពួកអ្នកកាន់តាមលោកយេស៊ូគ្រិស្តផ្សព្វផ្សាយពេញក្រុងយេរូសាឡិម។ គ្មានការប្រឆាំងណាអាចបញ្ឈប់កិច្ចផ្សព្វផ្សាយបានទេ។ (សកម្ម. ៤:២០) ពួកអ្នកកាន់តាមដ៏ស្មោះត្រង់របស់លោកយេស៊ូដែលរួមទាំងយើងផងដែរ ត្រូវការជាបន្ទាន់នូវកម្លាំងដដែលនោះពីព្រះ«ជារៀងរាល់ថ្ងៃ រហូតដល់គ្រាចុងបញ្ចប់នៃរបៀបរបបពិភពលោកនេះ»។—ម៉ាថ. ២៨:២០
៣. តើឫទ្ធានុភាពពីព្រះយេហូវ៉ាអាចជួយយើងឲ្យធ្វើអ្វីខ្លះ?
៣ លោកយេស៊ូបានសន្យាពួកអ្នកកាន់តាមលោកថា‹ពួកគេនឹងទទួលឫទ្ធានុភាព កាលដែលសកម្មពលបរិសុទ្ធរបស់ព្រះមកសណ្ឋិតលើពួកគេ›។ ឫទ្ធានុភាពដែលព្រះយេហូវ៉ាបានផ្ដល់ឲ្យអ្នកបម្រើរបស់លោកតាមរយៈសកម្មពលបរិសុទ្ធ បានឲ្យយើងម្នាក់ៗមានសមត្ថភាពធ្វើតាមការប្រគល់ខ្លួនរបស់យើងជូនព្រះ ហើយនៅពេលដែលចាំបាច់ ឲ្យយើងមានសមត្ថភាពទប់ទល់នឹងឥទ្ធិពលអាក្រក់ដែលជះមកលើយើង។—សូមអាន មីកា ៣:៨; កូឡុស ១:២៩
៤. ក្នុងអត្ថបទនេះ តើយើងនឹងពិចារណាអំពីអ្វី? ហើយហេតុអ្វី?
៤ តើឫទ្ធានុភាពដែលព្រះឲ្យយើងតាមរយៈសកម្មពលបរិសុទ្ធបានបង្ហាញឲ្យឃើញច្បាស់យ៉ាងដូចម្ដេច? ក្រោមឥទ្ធិពលនៃសកម្មពលនោះ តើយើងអាចមានការប្រព្រឹត្តឬប្រតិកម្មបែបណា? កាលដែលយើងខិតខំបម្រើព្រះដោយស្មោះត្រង់ យើងជួបប្រទះឧបសគ្គជាច្រើនដែលបណ្ដាលមកពីសាថាន របៀបរបបរបស់វា ឬមកពីភាពមិនល្អឥតខ្ចោះរបស់យើង។ ជាការសំខាន់ដែលយើងយកឈ្នះឧបសគ្គបែបនេះដើម្បីព្យាយាមរក្សាខ្លួនជាគ្រិស្តសាសនិក បំពេញកិច្ចបម្រើផ្សាយឲ្យបានទៀងទាត់និងដើម្បីរក្សាចំណងមេត្រីភាពដ៏ល្អជាមួយព្រះយេហូវ៉ា។ ចូរយើងពិចារណាអំពីរបៀបដែលសកម្មពលបរិសុទ្ធជួយយើងឲ្យយកឈ្នះការល្បួង ការអស់កម្លាំងនិងការធ្លាក់ទឹកចិត្ត។
យកឈ្នះការល្បួង
៥. តើតាមរបៀបណាដែលការអធិដ្ឋានផ្ដល់កម្លាំងឲ្យយើង?
៥ លោកយេស៊ូបានបង្រៀនពួកអ្នកកាន់តាមលោកឲ្យអធិដ្ឋានថា៖ «សូមកុំឲ្យយើងចាញ់សេចក្ដីល្បួងឡើយ តែសូមសង្គ្រោះយើងឲ្យរួចពីមេកំណាចវិញ»។ (ម៉ាថ. ៦:១៣) ព្រះយេហូវ៉ានឹងមិនបោះបង់ចោលពួកអ្នកបម្រើដ៏ស្មោះត្រង់របស់លោកដែលអធិដ្ឋានសុំដូច្នេះឡើយ។ នៅពេលមួយ លោកយេស៊ូមានប្រសាសន៍ថា៖ «បិតារបស់អ្នកដែលស្ថិតនៅស្ថានសួគ៌ លោកប្រាកដជានឹងផ្ដល់សកម្មពលបរិសុទ្ធរបស់លោកដល់អ្នកដែលសុំពីលោក»។ (លូក. ១១:១៣) ការដែលព្រះយេហូវ៉ាសន្យាថានឹងឲ្យយើងនូវសកម្មពលរបស់លោកដែលជាជំនួយដ៏ខ្លាំងក្លាដើម្បីយើងអាចធ្វើអ្វីដែលត្រឹមត្រូវ ពិតជាពង្រឹងទំនុកចិត្តយើងមែន! នេះមិនមានន័យថាព្រះយេហូវ៉ានឹងការពារយើងឲ្យរួចពីការល្បួងទេ។ (១កូ. ១០:១៣) ប៉ុន្តែ ពេលយើងប្រឈមមុខនឹងការល្បួង នេះជាពេលដែលយើងត្រូវអធិដ្ឋានកាន់តែខ្លាំងឡើង។—ម៉ាថ. ២៦:៤២
៦. តើលោកយេស៊ូបានឆ្លើយតបនឹងការល្បួងរបស់សាថានដោយផ្អែកលើអ្វី?
៦ ពេលលោកយេស៊ូឆ្លើយតបទៅនឹងការល្បួងរបស់មេកំណាច លោកបានលើកបទគម្ពីរ។ លោកយេស៊ូចាំបណ្ដាំរបស់ព្រះយ៉ាងច្បាស់ ពេលលោកឆ្លើយថា៖ «បទគម្ពីរចែងថា . . . បទគម្ពីរចែងទៀតថា . . . នែ! សាថាន! ចូរទៅឆ្ងាយពីខ្ញុំទៅ! ពីព្រោះបទគម្ពីរចែងថា៖ ‹គឺព្រះយេហូវ៉ាជាព្រះរបស់អ្នក ដែលអ្នកត្រូវគោរពប្រណិប័តន៍ ហើយគឺសម្រាប់តែលោកប៉ុណ្ណោះ ដែលអ្នកត្រូវបំពេញកិច្ចបម្រើពិសិដ្ឋ›»។ សេចក្ដីស្រឡាញ់ចំពោះព្រះយេហូវ៉ានិងបណ្ដាំរបស់លោក បានជំរុញចិត្តលោកយេស៊ូឲ្យបដិសេធអ្វីៗទាក់ទាញចិត្តដែលមេល្បួងបានបង្ហាញលោក។ (ម៉ាថ. ៤:១-១០) ក្រោយពីលោកយេស៊ូបានទប់ទល់ម្ដងហើយម្ដងទៀតនូវការល្បួង សាថានបានចេញពីលោកទៅ។
៧. តើតាមរបៀបណាដែលគម្ពីរជួយយើងឲ្យទប់ទល់ការល្បួង?
៧ ដោយហេតុថាលោកយេស៊ូបានពឹងផ្អែកលើបទគម្ពីរដើម្បីទប់ទល់នឹងការល្បួងរបស់មេកំណាច យើងពិតជាគួរធ្វើដូច្នេះដែរ! ប្រាកដហើយ ដើម្បីយើងអាចទប់ទល់មេកំណាចព្រមទាំងភ្នាក់ងាររបស់វា ដំបូងយើងត្រូវតាំងចិត្តស្គាល់ខ្នាតតម្រារបស់ព្រះ ហើយកាន់ខ្ជាប់តាមខ្នាតតម្រានោះទាំងស្រុង។ មនុស្សជាច្រើនបានត្រូវជំរុញចិត្តឲ្យរស់នៅស្របតាមខ្នាតតម្រាក្នុងគម្ពីរកាលដែលពួកគេសិក្សាគម្ពីរ ហើយបានយល់ ព្រមទាំងឲ្យតម្លៃប្រាជ្ញានិងសេចក្ដីសុចរិតរបស់ព្រះ។ ពិតមែន «បណ្ដាំរបស់ព្រះ»មានឫទ្ធានុភាពបង្ហាញឲ្យឃើញ«គំនិតនិងបំណងចិត្ត»។ (ហេ. ៤:១២) កាលណាយើងកាន់តែអាន ហើយរំពឹងគិតអំពីបទគម្ពីរ នោះយើងកាន់តែមាន‹គំនិតវាងវៃក្នុងសេចក្ដីពិតរបស់ព្រះយេហូវ៉ា›។ (ដាន. ៩:១៣) ហេតុនេះ ជាការល្អឲ្យយើងរំពឹងគិតអំពីបទគម្ពីរដែលទាក់ទិននឹងភាពទន់ខ្សោយជាក់លាក់ណាមួយរបស់យើង។
៨. តើយើងអាចទទួលបាននូវសកម្មពលបរិសុទ្ធតាមរយៈអ្វី?
៨ លោកយេស៊ូអាចទប់ទល់ការល្បួងបាន ដោយសារលោកមិនត្រឹមតែស្គាល់បទគម្ពីរប៉ុណ្ណោះទេ តែលោកបាន«ពេញដោយសកម្មពលបរិសុទ្ធរបស់ព្រះ»។ (លូក. ៤:១) ដើម្បីមានកម្លាំងនិងសមត្ថភាពប្រហាក់ប្រហែលនឹងនេះ យើងត្រូវចូលទៅជិតព្រះយេហូវ៉ាដោយទាញយកប្រយោជន៍យ៉ាងពេញលេញពីរបៀបដែលលោកឲ្យសកម្មពលបរិសុទ្ធដល់យើង ដូចជាការសិក្សាគម្ពីរ ការអធិដ្ឋាននិងការសេពគប់ជាមួយបងប្អូនរួមជំនឿរបស់យើង។ (យ៉ា. ៤:៧, ៨) បងប្អូនជាច្រើននាក់បានយល់អំពីប្រយោជន៍ដែលមកពីការជាប់រវល់ក្នុងកិច្ចការរបស់គ្រិស្តសាសនិក ដែលជួយពួកគាត់ឲ្យប្រមូលអារម្មណ៍ទៅលើអ្វីដែលលើកទឹកចិត្តដែលមកពីការបម្រើព្រះ។
៩, ១០. (ក) តើការល្បួងណាខ្លះដែលមានជាធម្មតាក្នុងតំបន់អ្នក? (ខ) តើតាមរបៀបណាដែលការសញ្ជឹងគិតនិងការអធិដ្ឋានអាចផ្ដល់កម្លាំងដល់អ្នកឲ្យយកឈ្នះការល្បួង សូម្បីតែនៅពេលដែលអ្នកអស់កម្លាំងក៏ដោយ?
៩ តើអ្នកត្រូវទប់ទល់ការល្បួងណាខ្លះ? តើអ្នកធ្លាប់មានការល្បួងឲ្យចែចង់អ្នកណាម្នាក់ដែលមិនមែនជាគូអាពាហ៍ពិពាហ៍របស់អ្នកឬទេ? បើអ្នកមិនទាន់រៀបការទេ តើអ្នកធ្លាប់មានចិត្តចង់មានទំនាក់ទំនងស្នេហាជាមួយអ្នកមិនជឿឬទេ? ពេលមើលទូរទស្សន៍ឬប្រើអ៊ីនធឺណិត ប្រហែលស្រាប់តែមានអ្វីដែលទាក់ទាញអ្នកឲ្យមើលអ្វីដែលអាក្រក់ នៅពេលនោះតើអ្នកមានប្រតិកម្មយ៉ាងណា? ជាការល្អឲ្យអ្នកសញ្ជឹងគិតថាអំពើខុសឆ្គងមួយអាចនាំឲ្យប្រព្រឹត្តអំពើខុសឆ្គងមួយទៀត ហើយបន្ទាប់មកនាំឲ្យប្រព្រឹត្តអំពើខុសឆ្គងធ្ងន់ធ្ងរ។ (យ៉ា. ១:១៤, ១៥) សូមគិតថាអំពើមិនស្មោះត្រង់មួយអាចបណ្ដាលឲ្យព្រះយេហូវ៉ា ក្រុមជំនុំនិងគ្រួសាររបស់អ្នកមានការឈឺចាប់យ៉ាងណា។ ផ្ទុយទៅវិញ បើអ្នករក្សាភក្ដីភាពចំពោះគោលការណ៍របស់ព្រះ អ្នកអាចមានសមត្ថភាពវិនិច្ឆ័យដែលមិនផ្ដន្ទាទោស។ (សូមអាន ទំនុកតម្កើង ១១៩:៣៧; សុភាសិត ២២:៣) កាលណាអ្នកប្រឈមមុខនឹងការល្បងលបែបនេះ ចូរតាំងចិត្តអធិដ្ឋានសូមកម្លាំងពីព្រះដើម្បីទប់ទល់ការល្បងលនោះ។
១០ មានចំណុចមួយទៀតដែលយើងត្រូវចាំអំពីការល្បួងរបស់សាថាន។ វាបានមកជួបលោកយេស៊ូ បន្ទាប់ពីលោកបានតមអាហារអស់៤០ថ្ងៃនៅតំបន់ស្ងាត់ជ្រងំ។ មេកំណាចច្បាស់ជាគិតថានេះជា«ឱកាសល្អ»មួយដើម្បីល្បងលចិត្តស្មោះគ្រប់លក្ខណៈរបស់លោកយេស៊ូ។ (លូក. ៤:១៣) សាថានក៏រកឱកាសល្អដើម្បីល្បងលចិត្តស្មោះគ្រប់លក្ខណៈរបស់យើងដែរ។ ដូច្នេះ សំខាន់បំផុតឲ្យយើងរក្សាខ្លួនឲ្យមានចំណងមិត្តភាពរឹងមាំជាមួយព្រះយេហូវ៉ា។ សាថានតែងតែវាយប្រហារកាលណាវាឃើញអ្នកដែលជាគោលដៅរបស់វាកំពុងទន់ខ្សោយបំផុត។ ដូច្នេះ កាលណាយើងអស់កម្លាំងឬធ្លាក់ទឹកចិត្ត យើងគួរតាំងចិត្តលើសជាងពេលណាទាំងអស់ដើម្បីសុំព្រះយេហូវ៉ានូវជំនួយដែលការពារយើងនិងសុំសកម្មពលបរិសុទ្ធ។—២កូ. ១២:៨-១០
យកឈ្នះការអស់កម្លាំងនិងការធ្លាក់ទឹកចិត្ត
១១, ១២. (ក) សព្វថ្ងៃ ហេតុអ្វីមនុស្សជាច្រើនធ្លាក់ទឹកចិត្ត? (ខ) តើអ្វីអាចផ្ដល់កម្លាំងឲ្យយើងទប់ទល់ការធ្លាក់ទឹកចិត្ត?
១១ ដោយសារយើងជាមនុស្សមិនល្អឥតខ្ចោះ ជួនកាលយើងធ្លាក់ទឹកចិត្ត។ នេះជាការពិត ជាពិសេសសព្វថ្ងៃនេះ ពីព្រោះគ្រាដែលយើងរស់នៅជាគ្រាដែលមានការតានតឹងចិត្តខ្លាំង។ យើងកំពុងឆ្លងកាត់គ្រាដែលប្រហែលជាគ្រាពិបាកបំផុតដែលមនុស្សជាតិមិនធ្លាប់ឆ្លងកាត់។ (២ធី. ៣:១-៥) កាលដែលសង្គ្រាមហាម៉ាគេដូនជិតមកដល់ ការគាបសង្កត់ខាងសេដ្ឋកិច្ច ខាងផ្លូវចិត្ត និងការគាបសង្កត់ឯទៀតមានកាន់តែច្រើនឡើង។ ដូច្នេះយើងមិនគួរភ្ញាក់ផ្អើលទេដោយឃើញអ្នកខ្លះមានការពិបាកកាន់តែខ្លាំងក្នុងការបំពេញភារកិច្ចរបស់ខ្លួនដើម្បីថែទាំនិងផ្គត់ផ្គង់ក្រុមគ្រួសាររបស់ខ្លួន។ ពួកគេអស់កម្លាំង ល្វើយខ្លាំង ហើយបាក់កម្លាំងទាំងផ្លូវកាយទាំងផ្លូវចិត្ត។ បើអ្នកកំពុងប្រឈមមុខនឹងការគាបសង្កត់បែបនេះ តើអ្នកអាចពុះពារយ៉ាងដូចម្ដេចបាន?
១២ សូមចាំថាលោកយេស៊ូបានធានាពួកអ្នកកាន់តាមលោកថាលោកនឹងឲ្យអ្នកជួយម្នាក់ដល់ពួកគេ ពោលគឺសកម្មពលបរិសុទ្ធរបស់ព្រះ។ (សូមអាន យ៉ូហាន ១៤:១៦, ១៧) សកម្មពលនេះជាកម្លាំងដ៏ខ្លាំងបំផុតក្នុងសកលលោក។ ដោយមានសកម្មពលនេះ ព្រះយេហូវ៉ាអាចផ្ដល់កម្លាំង«ហួស»ពីអ្វីដែលយើងត្រូវការដើម្បីស៊ូទ្រាំនឹងទុក្ខលំបាកណាក៏ដោយ។ (អេភ. ៣:២០) ដោយពឹងផ្អែកលើសកម្មពលនោះ សាវ័កប៉ូលបានស្រដីថាយើងទទួល«ឫទ្ធានុភាពដែលលើសពីធម្មតា» ទោះជាយើង«ត្រូវគេគាបសង្កត់នៅគ្រប់ច្រកល្ហក»ក៏ដោយ។ (២កូ. ៤:៧, ៨) ព្រះយេហូវ៉ាមិនសន្យាថាលោកដកការតានតឹងចិត្តចេញទេ តែលោកធានាយើងថា តាមរយៈសកម្មពលរបស់លោក លោកនឹងផ្ដល់កម្លាំងឲ្យយើងប្រឈមមុខការតានតឹងចិត្តនោះ។—ភី. ៤:១៣
១៣. (ក) តើតាមរបៀបណាដែលប្អូនស្រីវ័យក្មេងម្នាក់បានទទួលកម្លាំងដើម្បីស៊ូទ្រាំនឹងស្ថានភាពដ៏ពិបាកមួយ? (ខ) តើអ្នកដឹងឧទាហរណ៍ស្រដៀងគ្នានេះឬទេ?
១៣ សូមពិចារណាអំពីឧទាហរណ៍របស់ស្តេផានីជាអ្នកត្រួសត្រាយពេញពេលម្នាក់អាយុ១៩ឆ្នាំ។ ពេលគាត់មានអាយុ១២ឆ្នាំ គាត់មានជំងឺដាច់សរសៃខួរក្បាល ហើយការវិនិច្ឆ័យរោគបានឲ្យដឹងថាគាត់មានជំងឺមហារីកខួរក្បាល។ តាំងពីនោះមក គាត់ទទួលការវះកាត់ពីរដង ទទួលការព្យាបាលដោយកាំរស្មី ហើយរងការដាច់សរសៃខួរក្បាលពីរដងទៀតដែលធ្វើឲ្យខ្លួននាងខាងឆ្វេងកម្រើកបានតែបន្ដិចបន្តួច ហើយមើលមិនច្បាស់។ ស្តេផានីត្រូវសំចៃកម្លាំងទុកសម្រាប់កិច្ចការដែលគាត់ចាត់ទុកថាសំខាន់ជាង ដូចជាកិច្ចប្រជុំគ្រិស្តសាសនិកនិងកិច្ចផ្សព្វផ្សាយ។ ក៏ប៉ុន្តែ គាត់មានអារម្មណ៍ថាសកម្មពលព្រះយេហូវ៉ាកំពុងជួយគាត់ឲ្យស៊ូទ្រាំតាមរបៀបជាច្រើន។ បទពិសោធន៍ផ្សេងៗរបស់បងប្អូនរួមជំនឿដែលចុះក្នុងសៀវភៅដែលមានមូលដ្ឋានលើគម្ពីរ បានលើកទឹកចិត្តគាត់ ពេលគាត់ធ្លាក់ទឹកចិត្ត។ បងប្អូនប្រុសស្រីបានគាំទ្រគាត់ដោយផ្ញើសំបុត្រមកគាត់ឬដោយនិយាយលើកទឹកចិត្តគាត់មុននិងក្រោយកិច្ចប្រជុំ។ មនុស្សដែលមានចំណាប់អារម្មណ៍ក៏បានបង្ហាញការដឹងគុណដែរចំពោះអ្វីដែលស្តេផានីបង្រៀនពួកគេដោយទៅផ្ទះគាត់ដើម្បីទទួលការណែនាំពីគម្ពីរ។ ស្តេផានីមានអារម្មណ៍ថាគាត់ជំពាក់គុណព្រះយេហូវ៉ាច្រើនណាស់ចំពោះអ្វីៗទាំងអស់នេះ។ បទគម្ពីរដែលគាត់ចូលចិត្តជាងគេគឺទំនុកតម្កើង ៤១:៣ ដែលគាត់ជឿជាក់ថាត្រូវនឹងករណីរបស់គាត់។
១៤. តើយើងមិនត្រូវធ្វើអ្វីកាលណាយើងធ្លាក់ទឹកចិត្ត? ហើយហេតុអ្វី?
១៤ ពេលដែលយើងអស់កម្លាំងឬរងការគាបសង្កត់ យើងមិនត្រូវគិតសោះថាយើងត្រូវកាត់បន្ថយសកម្មភាពផ្សេងៗក្នុងកិច្ចបម្រើព្រះទើបអាចស៊ូទ្រាំនឹងការតានតឹងចិត្តបាន។ នេះជាអ្វីដែលយើងមិនត្រូវធ្វើសោះឡើយ។ ហេតុអ្វី? ពីព្រោះសកម្មភាពបែបនេះ ដូចជាការសិក្សាគម្ពីរដោយខ្លួនឯងនិងជាគ្រួសារ កិច្ចផ្សព្វផ្សាយនិងការទៅកិច្ចប្រជុំ គឺជាវិធីដែលយើងទទួលសកម្មពលបរិសុទ្ធដែលផ្ដល់កម្លាំងដល់យើង។ សកម្មភាពរបស់គ្រិស្តសាសនិកតែងតែធ្វើឲ្យយើងមានកម្លាំងចិត្តឡើងវិញ។ (សូមអាន ម៉ាថាយ ១១:២៨, ២៩) ជាញឹកញយ បងប្អូនប្រុសស្រីមកកិច្ចប្រជុំទាំងអស់កម្លាំង តែពេលត្រឡប់មកផ្ទះវិញ ពួកគាត់ហាក់ដូចជាមានថាមពលឡើងវិញដូចអាគុយទើបនឹងបញ្ចូលភ្លើង!
១៥. (ក) តើព្រះយេហូវ៉ាសន្យាថាលោកនឹងធ្វើឲ្យគ្រិស្តសាសនិកមានជីវិតរស់នៅដោយឥតត្រូវខំប្រឹងឬ? សូមពន្យល់ដោយប្រើបទគម្ពីរ។ (ខ) តើព្រះសន្យាអ្វីនឹងយើង? ហើយតើនេះនាំឲ្យមានសំណួរអ្វី?
១៥ ប៉ុន្តែ នេះមិនមានន័យថា ការធ្វើជាអ្នកកាន់តាមគ្រិស្តគ្មានអ្វីពិបាកទេ។ យើងត្រូវខំប្រឹងទើបអាចធ្វើជាគ្រិស្តសាសនិកដែលស្មោះត្រង់បាន។ (ម៉ាថ. ១៦:២៤-២៦; លូក. ១៣:២៤) ទោះជាយ៉ាងនេះក្ដី តាមរយៈសកម្មពលបរិសុទ្ធ ព្រះយេហូវ៉ាអាចផ្ដល់កម្លាំងឲ្យអ្នកដែលអស់កម្លាំង។ អេសាយជាអ្នកប្រកាសទំនាយបានសរសេរថា៖ «អស់អ្នកណាដែលសង្ឃឹមដល់ព្រះយេហូវ៉ាវិញ នោះនឹងមានកំឡាំងចំរើនជានិច្ច គេនឹងហើរឡើងទៅលើដោយស្លាបដូចជាឥន្ទ្រី គេនឹងរត់ទៅឥតដែលហត់ ហើយនឹងដើរឥតដែលល្វើយឡើយ»។ (អេ. ៤០:២៩-៣១) បើដូច្នេះមែន យើងគួរសួរខ្លួនយើងថា តើអ្វីជាមូលហេតុពិតប្រាកដដែលយើងមានអារម្មណ៍ថាសកម្មភាពគ្រិស្តសាសនិកធ្វើឲ្យយើងនឿយហត់?
១៦. តើយើងអាចធ្វើអ្វីដើម្បីកម្ចាត់ដើមហេតុដែលអាចធ្វើឲ្យយើងអស់កម្លាំងឬធ្លាក់ទឹកចិត្ត?
១៦ បណ្ដាំព្រះយេហូវ៉ាដាស់តឿនយើងថាឲ្យ«ពិចារណាឲ្យដឹងប្រាកដថាការអ្វីដែលសំខាន់ជាង»។ (ភី. ១:១០) ដោយប្រៀបដំណើរជីវិតគ្រិស្តសាសនិកទៅនឹងការរត់ប្រណាំងដែលមានប្រវែងឆ្ងាយ ព្រះបានដឹកនាំសាវ័កប៉ូលឲ្យសរសេរថា៖ «ចូរយើងចោលអ្វីៗគ្រប់យ៉ាងដែលធ្ងន់ . . . ហើយរត់ដោយស៊ូទ្រាំក្នុងទីប្រណាំងដែលបានត្រូវកំណត់ឲ្យយើង»។ (ហេ. ១២:១) គាត់ចង់បញ្ជាក់ថាយើងត្រូវជៀសវាងការស្វែងរកអ្វីដែលមិនចាំបាច់ ដែលប្រៀបដូចអ្វីដែលធ្ងន់ឥតប្រយោជន៍ដែលធ្វើឲ្យយើងល្វើយ។ អ្នកខ្លះក្នុងចំណោមយើងប្រហែលខំប្រឹងធ្វើអ្វីច្រើនពេកក្នុងជីវិតដែលមមាញឹកស្រាប់ហើយនោះ។ ដូច្នេះ បើជាញឹកញយ អ្នកអស់កម្លាំង ហើយរងការគាបសង្កត់ នោះប្រហែលជាការល្អឲ្យអ្នកពិនិត្យឡើងវិញថាអ្នកចំណាយកម្លាំងច្រើនប៉ុណ្ណាដើម្បីធ្វើការងារចិញ្ចឹមជីវិត លេងកីឡាឬចំណាយពេលប៉ុន្មានដើម្បីលម្ហែកាយ ហើយប៉ុន្មានដងដែលអ្នកធ្វើដំណើរកម្សាន្ត។ ការចេះប្រមាណនិងការមានគំនិតសមហេតុសមផលគួរជំរុញចិត្តយើងទាំងអស់គ្នាឲ្យទទួលស្គាល់ថាកម្លាំងរបស់យើងមានកម្រិត ហើយកាត់បន្ថយសកម្មភាពដែលមិនចាំបាច់។
១៧. ហេតុអ្វីអ្នកខ្លះប្រហែលមានអារម្មណ៍ធ្លាក់ទឹកចិត្ត? ប៉ុន្តែតើព្រះយេហូវ៉ាធានាយើងយ៉ាងណាអំពីរឿងនេះ?
១៧ អ្នកខ្លះក្នុងចំណោមយើងក៏ប្រហែលមានអារម្មណ៍ធ្លាក់ទឹកចិត្តមួយកម្រិតដែរ ដោយសារទីបញ្ចប់នៃរបៀបរបបនេះមិនមកដល់ឆាប់ដូចយើងបានរំពឹងទុកនោះទេ។ (សុភ. ១៣:១២) ក៏ប៉ុន្តែ អ្នកណាដែលមានអារម្មណ៍បែបនេះអាចទទួលការលើកទឹកចិត្តពីពាក្យនៅហាបាគុក ២:៣ដែលថា៖ «ការជាក់ស្តែងនេះ ទុកសំរាប់ដល់វេលាកំណត់ ក៏កំពុងស្រូតឲ្យដល់ពេលនោះហើយ នៅគ្រានោះ នឹងមិនកុហកទេ បើសិនជាបង្អង់យូរ ក៏ចូររង់ចាំចុះ ដ្បិតនឹងមកជាពិត ឥតរារង់ឡើយ»។ ព្រះយេហូវ៉ាបានធានាយើងថា ទីបញ្ចប់នៃរបៀបរបបនេះនឹងមកដល់ចំពេលដែលលោកបានកំណត់!
១៨. (ក) តើពាក្យសន្យាអ្វីខ្លះដែលធ្វើឲ្យអ្នកមានកម្លាំង? (ខ) តើអត្ថបទបន្ទាប់នឹងជួយយើងយ៉ាងណា?
១៨ ប្រាកដហើយ ពួកអ្នកបម្រើស្មោះត្រង់ទាំងអស់របស់ព្រះយេហូវ៉ាទន្ទឹងរង់ចាំគ្រាដែលលែងមានការអស់កម្លាំងនិងការធ្លាក់ទឹកចិត្ត កាលដែលអ្នកទាំងអស់ដែលមានជីវិតរស់នៅនឹងមានកម្លាំង«ដូចកាលនៅក្មេងវិញ»។ (យ៉ូប ៣៣:២៥) សូម្បីតែឥឡូវនេះ យើងអាចមានកម្លាំងចិត្តខ្លាំងក្លា តាមរយៈសកម្មពលបរិសុទ្ធ ពេលដែលយើងចូលរួមក្នុងសកម្មភាពដែលទាក់ទងនឹងកិច្ចបម្រើព្រះ។ (២កូ. ៤:១៦; អេភ. ៣:១៦) សូមកុំឲ្យការនឿយហត់ធ្វើឲ្យអ្នកឈប់ទទួលពរដែលស្ថិតស្ថេរជារៀងរហូត។ រាល់ទុក្ខលំបាក ទោះជាបណ្ដាលមកពីការល្បួង ការអស់កម្លាំងឬការធ្លាក់ទឹកចិត្តក៏ដោយ នោះនឹងលែងមាន បើមិនឥឡូវ គឺនៅពិភពលោកថ្មីរបស់ព្រះ។ នៅអត្ថបទបន្ទាប់ យើងនឹងពិនិត្យមើលអំពីរបៀបដែលសកម្មពលបរិសុទ្ធផ្ដល់កម្លាំងឲ្យគ្រិស្តសាសនិកស៊ូទ្រាំការបៀតបៀន ទប់ទល់ការបង្ខិតបង្ខំពីមនុស្សស្រករគ្នា ហើយតស៊ូនឹងទុក្ខលំបាកផ្សេងៗឯទៀត។
តើអ្នកនឹងឆ្លើយយ៉ាងណា?
• តើអំណានគម្ពីរផ្ដល់កម្លាំងឲ្យយើងយ៉ាងដូចម្ដេច?
• តើតាមរបៀបណាដែលការអធិដ្ឋាននិងការសញ្ជឹងគិតផ្ដល់កម្លាំងឲ្យយើង?
• តើយើងអាចកម្ចាត់ចោលយ៉ាងដូចម្ដេចនូវដើមហេតុនៃការធ្លាក់ទឹកចិត្ត?
[រូបភាពនៅទំព័រ២៦]
កិច្ចប្រជុំគ្រិស្តសាសនិកអាចធ្វើឲ្យយើងមានកម្លាំង