តើការដឹងចម្លើយសំខាន់ឬទេ?
«អ្នករាល់គ្នានឹងស្គាល់សេចក្ដីពិត ហើយសេចក្ដីពិតនោះនឹងរំដោះអ្នករាល់គ្នាឲ្យមានសេរីភាព»។—យ៉ូហាន ៨:៣២
គម្ពីរប្រាប់អំពីសេចក្ដីពិតដែលជួយយើងឲ្យរួចផុតពីសេចក្ដីបង្រៀនដែលពិបាកយល់ ឬនាំឲ្យភាន់ច្រឡំអំពីលោកយេស៊ូ។ ក៏ប៉ុន្តែ តើអ្វីដែលយើងជឿអំពីលោកយេស៊ូជាការសំខាន់ឬទេ? ពិតជាសំខាន់មែន។ គឺសំខាន់ចំពោះព្រះយេហូវ៉ា សំខាន់ចំពោះលោកយេស៊ូ ហើយនេះក៏គួរតែសំខាន់ចំពោះយើងដែរ។
● ហេតុអ្វីនេះគឺសំខាន់សម្រាប់ព្រះយេហូវ៉ា? បើនិយាយឲ្យស្រួលយល់ទៅ ដោយសារ«ព្រះគឺជាសេចក្ដីស្រឡាញ់»។ (យ៉ូហានទី១ ៤:៨) ព្រះយេហូវ៉ាចង់ឲ្យយើងរស់ជារៀងរហូតដោយមានជីវិតសប្បាយរីករាយ។ លោកយេស៊ូបានមានប្រសាសន៍ថា៖ «ព្រះស្រឡាញ់ពិភពលោក[មនុស្សជាតិ]ដល់ម្ល៉េះបានជាលោកបានឲ្យបុត្រតែមួយរបស់លោក ដើម្បីឲ្យអស់អ្នកដែលបង្ហាញជំនឿលើបុត្រនោះអាចមានជីវិតដែលគ្មានទីបញ្ចប់»។ (យ៉ូហាន ៣:១៦) ព្រះបានចាត់ឲ្យបុត្ររបស់លោកដើម្បីជួយលោះយើងពីភាពខុសឆ្គង ហើយបើកឱកាសឲ្យយើងរស់ជារៀងរហូតនៅលើផែនដីជាសួនឧទ្យាន ស្របតាមគោលបំណងដើមរបស់លោក។ (លោកុប្បត្តិ ១:២៨) ព្រះចង់ផ្ដល់ឲ្យយ៉ាងខ្លាំងនូវជីវិតដែលគ្មានទីបញ្ចប់ដែលជាអំណោយមួយដល់អ្នកដែលរៀនសេចក្ដីពិតអំពីបុត្ររបស់លោក ហើយធ្វើតាមអ្វីដែលពួកគេបានរៀននោះ។—រ៉ូម ៦:២៣
● ហេតុអ្វីនេះគឺសំខាន់សម្រាប់លោកយេស៊ូ? លោកយេស៊ូក៏ស្រឡាញ់មនុស្សជាតិដែរ។ លោកយេស៊ូបានបង្ហាញសេចក្ដីស្រឡាញ់រហូតដល់លះបង់ប្រយោជន៍ខ្លួនដោយបូជាជីវិតដើម្បីយើងទាំងអស់គ្នា។ (យ៉ូហាន ១៥:១៣) លោកបានដឹងថា ការលះបង់ជីវិតរបស់លោកគឺជាវិធីតែមួយគត់ដែលនាំទៅដល់សេចក្ដីសង្គ្រោះ។ (យ៉ូហាន ១៤:៦) ជាការសមហេតុផលដែលលោកយេស៊ូចង់ឲ្យមនុស្សច្រើនបំផុតទទួលប្រយោជន៍ពីគ្រឿងបូជាលោះនោះ មែនទេ? នោះគឺជាមូលហេតុដែលលោកបានបង្គាប់អ្នកកាន់តាមដ៏ស្មោះត្រង់របស់លោកឲ្យទៅបង្រៀនមនុស្សនៅទូទាំងផែនដីអំពីបំណងប្រាថ្នារបស់ព្រះ។—ម៉ាថាយ ២៤:១៤; ២៨:១៩, ២០
● ហេតុអ្វីនេះគួរតែសំខាន់ចំពោះយើង? សូមគិតអំពីអ្វីៗដែលមានតម្លៃចំពោះលោកអ្នក ដូចជាក្រុមគ្រួសារ និងសុខភាពរបស់លោកអ្នកជាដើម។ តើលោកអ្នកចង់មានសុខភាពល្អឬទេ? តើលោកអ្នកចង់ឲ្យខ្លួនលោកអ្នកនិងមនុស្សជាទីស្រឡាញ់មានជីវិតដែលប្រសើរជាងឬទេ? តាមរយៈលោកយេស៊ូ ព្រះយេហូវ៉ាផ្ដល់ឱកាសឲ្យលោកអ្នកនិងមនុស្សជាទីស្រឡាញ់របស់លោកអ្នកមានសុខភាពល្អឥតខ្ចោះ និងជីវិតដែលគ្មានទីបញ្ចប់ក្នុងពិភពលោកថ្មីដែលគ្មានការឈឺចាប់និងទុក្ខវេទនា។ (ទំនុកតម្កើង ៣៧:១១, ២៩; ការបើកបង្ហាញ ២១:៣, ៤) តើអ្នកចង់រស់នៅក្នុងពិភពលោកបែបនោះឬទេ? បើចង់ មានអ្វីមួយដែលអ្នកត្រូវធ្វើ។
សូមមើលម្ដងទៀតនូវបទគម្ពីរដែលបានដកស្រង់ក្រោមចំណងជើង ដែលចែងថា «អ្នករាល់គ្នានឹងស្គាល់សេចក្ដីពិត ហើយសេចក្ដីពិតនោះនឹងរំដោះអ្នករាល់គ្នាឲ្យមានសេរីភាព»។ សេចក្ដីពិតអំពីលោកយេស៊ូនិងតួនាទីរបស់លោកក្នុងការសម្រេចបំណងប្រាថ្នារបស់ព្រះអាចរំដោះយើងឲ្យរួចពីអ្វីដែលអាក្រក់បំផុត ពោលគឺភាពខុសឆ្គងនិងសេចក្ដីស្លាប់។ ប៉ុន្តែ ដើម្បីទទួលបាននូវការរំដោះនោះ លោកអ្នកត្រូវតែ«ស្គាល់សេចក្ដីពិត»។ យើងសូមអញ្ជើញលោកអ្នកឲ្យរៀនថែមទៀតអំពីសេចក្ដីពិតនេះ ហើយអំពីរបៀបដែលលោកអ្នកនិងមនុស្សជាទីស្រឡាញ់របស់លោកអ្នកអាចទទួលប្រយោជន៍ពីសេចក្ដីពិតនោះ។ សាក្សីព្រះយេហូវ៉ានឹងពេញចិត្តជួយលោកអ្នក។