តើសេចក្ដីពិតនៅតែសំខាន់ទេ?
តាមមើលទៅ សព្វថ្ងៃនេះយើងកាន់តែពិបាកសម្គាល់ថាអ្វីគឺពិតអ្វីគឺមិនពិត មែនទេ? មនុស្សសព្វថ្ងៃហាក់ដូចជាជឿអ្វីៗតាមតែអារម្មណ៍និងគំនិតរបស់ពួកគេ ជាជាងជឿទៅលើអ្វីដែលពិតនិងជាក់ស្ដែង។ បច្ចុប្បន្ននេះ មនុស្សជាច្រើននៅទូទាំងពិភពលោកជឿថាគ្មានសេចក្ដីពិតទេ។
ទស្សនៈនេះមិនមែនជាអ្វីថ្មីទេ។ ប្រមាណ២.០០០ឆ្នាំមុន អភិបាលរ៉ូមឈ្មោះប៉ុនទាស ពីឡាត បានសួរលោកយេស៊ូទាំងសង្ស័យថា៖«តើសេចក្ដីពិតជាអ្វី?»។ (យ៉ូហាន ១៨:៣៨) ប៉ុន្តែ គាត់មិនបានរង់ចាំចម្លើយពីលោកយេស៊ូទេ។ ទោះជាយ៉ាងនោះក្ដី សំណួររបស់គាត់គឺសំខាន់។ គម្ពីរផ្ដល់ចម្លើយមួយដែលប្រហែលជាធ្វើឲ្យលោកអ្នកស្កប់ចិត្ត ហើយគម្ពីរអាចជួយលោកអ្នកឲ្យដឹងអំពីអ្វីពិតនិងអ្វីមិនពិតដែលមនុស្សក្នុងពិភពលោកនេះបានភាន់ច្រឡំ។
តើមានសេចក្ដីពិតឬទេ?
ពិតជាមាន។ គម្ពីរប្រើពាក្យ«សេចក្ដីពិត»សំដៅទៅអ្វីដែលមានមូលដ្ឋានលើហេតុការណ៍ពិត ព្រមទាំងទៅលើអ្វីដែលត្រឹមត្រូវខាងសីលធម៌។ គម្ពីរបង្រៀនថាព្រះយេហូវ៉ាaជាប្រភពនៃសេចក្ដីពិតទាំងស្រុង។ គម្ពីរក៏ហៅលោកថា«ព្រះនៃសេចក្ដីពិត»។ (ចម្រៀងសរសើរព្រះ ៣១:៥) គម្ពីរមានសេចក្ដីពិតពីព្រះ។ គម្ពីរប្រៀបប្រដូចសេចក្ដីពិតទៅនឹងពន្លឺ ដែលអាចបំភ្លឺយើងពីការភាន់ច្រឡំទាំងអស់ក្នុងពិភពលោកនេះ។—ចម្រៀងសរសើរព្រះ ៤៣:៣; យ៉ូហាន ១៧:១៧
តើលោកអ្នកអាចរកឃើញសេចក្ដីពិតយ៉ាងដូចម្ដេច?
ព្រះមិនចង់ឲ្យយើងជឿសេចក្ដីពិតក្នុងគម្ពីរទាំងងងឹតងងល់ទេ។ ប៉ុន្តែ លោកលើកទឹកចិត្តយើងឲ្យពិនិត្យមើលគម្ពីរដោយប្រើសមត្ថភាពរិះគិត មិនមែនផ្អែកលើអារម្មណ៍របស់យើងឡើយ។ (រ៉ូម ១២:១) លោកចង់ឲ្យយើងស្គាល់លោកច្បាស់ និងចង់ឲ្យយើងស្រឡាញ់លោក«អស់ពីគំនិត» ហើយលោកលើកទឹកចិត្តយើងឲ្យរកហេតុផលដើម្បីជឿជាក់ថាអ្វីដែលយើងរៀនពីគម្ពីរគឺជាសេចក្ដីពិត។—ម៉ាថាយ ២២:៣៧, ៣៨; សកម្មភាព ១៧:១១
តើការកុហកផ្ដើមមកពីណា?
គម្ពីរចែងថាការកុហកបានផ្ដើមចេញពីសត្រូវរបស់ព្រះ គឺមេកំណាចសាថាន។ គម្ពីរបានហៅវាថា«ឪពុកនៃការភូតភរ»។ (យ៉ូហាន ៨:៤៤) វាបាននិយាយកុហកអំពីព្រះដល់មនុស្សដំបូង។ (ដើមកំណើត ៣:១-៦, ១៣, ១៧-១៩; ៥:៥) តាំងពីពេលនោះមក សាថានបានបន្តផ្សាយពាក្យកុហកនិងលាក់បាំងសេចក្ដីពិតអំពីព្រះ។—ការបើកបង្ហាញ ១២:៩
ហេតុអ្វីសព្វថ្ងៃនេះមានការកុហកច្រើនម្ល៉េះ?
នៅសម័យយើងដែលគម្ពីរហៅថា«គ្រាចុងក្រោយបង្អស់» សាថានកំពុងមានឥទ្ធិពលទៅលើមនុស្ស ហើយកំពុងបំភាន់ពួកគេច្រើនជាងពេលណាៗទាំងអស់។ ជាទូទៅ មនុស្សនិយាយកុហកដើម្បីបំភាន់និងទាញប្រយោជន៍ពីអ្នកឯទៀត។ (ធីម៉ូថេទី២ ៣:១, ១៣) សព្វថ្ងៃនេះ នៅក្នុងសាសនាភាគច្រើនក៏មានការកុហកដែរ។ ដូចគម្ពីរបានប្រាប់ទុកជាមុនអំពីសម័យរបស់យើង មនុស្ស«ប្រមូលពួកអ្នកបង្រៀនដែលនិយាយអ្វីដែលពួកគេចង់ស្ដាប់» ហើយសម្រេចចិត្ត«ឈប់ស្ដាប់សេចក្ដីពិត»។—ធីម៉ូថេទី២ ៤:៣, ៤
ហេតុអ្វីសេចក្ដីពិតសំខាន់ម្ល៉េះ?
មនុស្សត្រូវការសេចក្ដីពិតដើម្បីទុកចិត្តគ្នាទៅវិញទៅមក។ បើគ្មានសេចក្ដីពិតទេ មិត្តភាពនិងសង្គមមនុស្សច្បាស់ជាបែកបាក់គ្នាមិនខាន។ គម្ពីររៀបរាប់ថាព្រះចង់ឲ្យការគោរពប្រណិប័តន៍របស់យើងមានមូលដ្ឋានទៅលើសេចក្ដីពិត។ គម្ពីរចែងថា៖«អស់អ្នកដែលគោរពប្រណិប័តន៍[ព្រះ] ត្រូវតែគោរពប្រណិប័តន៍ដោយមានការដឹកនាំពីឫទ្ធានុភាពរបស់លោកនិងដោយសេចក្ដីពិត»។ (យ៉ូហាន ៤:២៤) ដើម្បីស្វែងយល់អំពីរបៀបដែលសេចក្ដីពិតអាចជួយលោកអ្នកសម្គាល់ពាក្យកុហកក្នុងសាសនានិងរួចផុតពីពាក្យកុហកទាំងនោះ សូមអានអត្ថបទដែលមានចំណងជើងថា«ពាក្យកុហកដែលធ្វើឲ្យមនុស្សពិបាកស្រឡាញ់ព្រះ»។
ហេតុអ្វីព្រះចង់ឲ្យខ្ញុំស្គាល់សេចក្ដីពិត?
ព្រះចង់ឲ្យលោកអ្នករស់ជារៀងរហូត ហើយដើម្បីអាចទទួលបានជីវិតដូចនេះ អ្នកត្រូវរៀនសេចក្ដីពិតអំពីលោក។ (ធីម៉ូថេទី១ ២:៤) បើលោកអ្នករៀនខ្នាតតម្រារបស់ព្រះស្ដីអំពីអ្វីខុសនិងអ្វីត្រូវ ហើយរស់នៅស្របតាមខ្នាតតម្រានោះ លោកអ្នកនឹងមានចំណងមិត្តភាពជិតស្និទ្ធជាមួយលោក។ (ចម្រៀងសរសើរព្រះ ១៥:១, ២) ម្ល៉ោះហើយ ព្រះបានចាត់លោកយេស៊ូឲ្យមកផែនដី ដើម្បីជួយមនុស្សឲ្យស្គាល់សេចក្ដីពិត។ ព្រះចង់ឲ្យយើងធ្វើតាមសេចក្ដីបង្រៀនរបស់លោកយេស៊ូ។—ម៉ាថាយ ១៧:៥; យ៉ូហាន ១៨:៣៧
តើព្រះនឹងបំបាត់ចោលការកុហកឬទេ?
លោកនឹងបំបាត់ចោលមែន។ ព្រះស្អប់ការកុហក ជាពិសេសពេលដែលមនុស្សកុហកអ្នកឯទៀតដើម្បីទាញយកផលប្រយោជន៍។ ព្រះបានសន្យាថា លោកនឹងបំបាត់ចោលអស់អ្នកដែលមិនព្រមឈប់និយាយកុហកចេញពីផែនដី។ (ចម្រៀងសរសើរព្រះ ៥:៦) ពេលលោកធ្វើដូច្នោះ សេចក្ដីសន្យាមួយទៀតរបស់លោកក៏នឹងសម្រេចដែរ គឺថា៖«មាត់ដែលពោលពាក្យពិតនឹងនៅជាប់ជារៀងរហូត»។—សុភាសិត ១២:១៩
a យេហូវ៉ាគឺជានាមរបស់ព្រះ។ (ចម្រៀងសរសើរព្រះ ៨៣:១៨) សូមមើលអត្ថបទដែលមានចំណងជើងថា«តើព្រះយេហូវ៉ាជានរណា?»។