«ដើម្បីបានជីវិតដែលគ្មានទីបញ្ចប់»
«ដើម្បីបានជីវិតដែលគ្មានទីបញ្ចប់ ពួកគាត់ត្រូវស្គាល់លោកដែលជាព្រះពិតតែមួយឲ្យបានច្បាស់ ព្រមទាំងយេស៊ូគ្រិស្ត ដែលលោកបានចាត់ឲ្យមក»។—យ៉ូហាន ១៧:៣
ចំណេះអាចសង្គ្រោះជីវិត។ ជាឧទាហរណ៍ ម្ដាយម្នាក់នៅប្រទេសនីហ្សេធ្វើការជាអ្នកថែទាំសុខភាព។ ដូច្នេះ ពេលដែលកូនអាយុ១០ខែរបស់នាង ឈ្មោះនូហ៊ូធ្លាក់ខ្លួនឈឺ នាងបានដឹងអំពីអ្វីដែលនាងត្រូវធ្វើ។ នាងបានលាយទឹកស្អាតជាមួយស្ករនិងអំបិលឲ្យកូនផឹកដើម្បីបង្គ្រប់ជាតិទឹកក្នុងខ្លួនកូនឡើងវិញ។ មូលនិធិដើម្បីកុមារនៃអង្គការសហប្រជាជាតិបានរាយការណ៍ថា ដោយសារនាង«បានចាត់វិធានការភ្លាមៗ ហើយនាងមានចំណេះខាងការថែទាំសុខភាព នោះកូនរបស់នាងឆាប់ជាសះស្បើយ»។
ចំណេះពីគម្ពីរបរិសុទ្ធក៏អាចសង្គ្រោះជីវិតមនុស្សបានដែរ។ ម៉ូសេដែលជាអ្នកសរសេរសៀវភៅទី១ក្នុងគម្ពីរ គាត់បានរៀបរាប់ថា៖ «នេះមិនមែនជាសេចក្ដីឥតប្រយោជន៍ដល់ឯងរាល់គ្នាទេ គឺជាជីវិតដល់ឯងរាល់គ្នាវិញ ហើយដោយសារសេចក្ដីនេះ នោះឯងរាល់គ្នានឹងបានជីវិតជាយូរអង្វែងតទៅ»។ (ចោទិយកថា ៣២:៤៧) តើគម្ពីរបរិសុទ្ធពិតជាអាចជួយយើងឲ្យមានជីវិតយូរអង្វែងឬទេ? តើយើងអាចបានជីវិតយ៉ាងដូចម្ដេច?
ក្នុងអត្ថបទទាំងប្រាំខាងដើមនេះបានបង្ហាញថា គម្ពីរបរិសុទ្ធជាសៀវភៅដ៏ពិសេសដែលគ្មានសៀវភៅឯណាអាចប្រៀបផ្ទឹមបាន ដោយសារគម្ពីរបរិសុទ្ធមានទំនាយដែលគួរឲ្យទុកចិត្ត មានរឿងប្រវត្ដិសាស្ត្រនិងវិជ្ជាពេទ្យត្រឹមត្រូវ មានសាច់រឿងស្របគ្នាទាំងស្រុង និងមានការណែនាំដែលមានប្រយោជន៍។ នេះបង្ហាញថាគម្ពីរបរិសុទ្ធជាសៀវភៅពិសេស។ ដូច្នេះ ពេលដែលគម្ពីរបញ្ជាក់អំពីរបៀបដែលយើងអាចរស់នៅយូរអង្វែង ពោលគឺមានជីវិតដែលគ្មានទីបញ្ចប់ នោះលោកអ្នកគួរតែពិចារណាឲ្យបានដិតដល់ មែនទេ?
យើងសូមអញ្ជើញលោកអ្នករៀនអំពីមូលហេតុដែលចំណេះត្រឹមត្រូវពីគម្ពីរបរិសុទ្ធអាចនាំឲ្យលោកអ្នកមានសេចក្ដីសុខសាន្តក្នុងចិត្តនៅពេលឥឡូវនេះ និងមានសុភមង្គលនៅពេលអនាគតផងដែរ។ សាក្សីព្រះយេហូវ៉ានឹងរីករាយជួយលោកអ្នកឲ្យទទួលចំណេះបែបនេះ។
[ប្រអប់/រូបភាពនៅទំព័រ៩]
គម្ពីរបរិសុទ្ធជាសៀវភៅពិសេស ដោយសារមានតែគម្ពីរប៉ុណ្ណោះដែលផ្ដល់ឲ្យយើងនូវចម្លើយនានាដែលធ្វើឲ្យយើងអស់ចម្ងល់ក្នុងចិត្ត ស្តីអំពីសំណួរដ៏សំខាន់ៗដូចជា:
• ហេតុអ្វីយើងមានជីវិត នៅផែនដី?
• ហេតុអ្វីមានទុក្ខវេទនា ច្រើនម្ល៉េះ?
• តើមានសេចក្ដីសង្ឃឹមចំពោះមនុស្សជាទីស្រឡាញ់ដែលបានស្លាប់ឬទេ?
លោកអ្នកអាចរកឃើញចម្លើយពីគម្ពីរចំពោះសំណួរទាំងនេះក្នុងសៀវភៅនេះ តើព្រះគម្ពីរពិតជាបង្រៀន យ៉ាងណា? ដែលបានត្រូវបោះពុម្ពផ្សាយដោយសាក្សីព្រះយេហូវ៉ា។