ចំណេះពីព្រះឆ្លើយសំនួរជាច្រើន
១ មុនដែលអ្នករកឃើញចំណេះត្រឹមត្រូវនៃសេចក្ដីពិត អ្នកប្រហែលជាមានសំនួរច្រើនអំពីជីវិត ដែលអ្នកមិនអាចឆ្លើយដោយខ្លួនឯងបាន។ អ្នកសប្បាយចិត្តណាស់ ពេលដែលបានទទួលនូវចម្លើយពីព្រះគម្ពីរចំពោះសំនួរទាំងអស់នោះ! ឥឡូវនេះ អ្នកអាចជួយអ្នកដទៃដើម្បីស្វែងរកចម្លើយទាំងនោះដែរ។ (ប្រៀបធៀប ធីម៉ូថេទី២ ២:២) អ្នកអាចចែកប្រាប់គេនូវចំណេះនៃព្រះ ដែលនឹងនាំឲ្យមានជីវិតអស់កល្បជានិច្ច។ (យ៉ូហាន ១៧:៣) ប៉ុន្តែ តើអ្នកធ្វើយ៉ាងណា ដើម្បីជួយឲ្យគេអបអរនឹងតម្លៃនៃចំណេះនេះ? បើអញ្ចឹង សូមគិតនូវសំនួរដែលសេចក្ដីពិតបានឆ្លើយចំពោះអ្នក។ តើអ្វីទៅ ដែលពួកអ្នកស្វែងរកសេចក្ដីពិតចង់ដឹងនោះ? ដោយមានគំនិតបែបនេះ អាចជួយអ្នកផ្ដល់នូវសៀវភៅអ្នកអាចរស់នៅជានិរន្តរ៍ក្នុងសួនមនោរម្យនៅលើផែនដី។ យោបល់តទៅនេះ នឹងជួយអ្នកពេលរៀបចំផ្សាយក្នុងកំឡុងខែមិថុនា។
២ ដោយសារមនុស្សជាច្រើនឆ្ងល់នូវហេតុអ្វីការឈឺចាប់មានច្រើនម្ល៉េះក្នុងពិភពលោក របៀបមួយនេះអាចមានលទ្ធផលល្អ៖
▪ «ពេលមានមហន្តរាយកើតឡើង ឬពេលមានបទឧក្រិដ្ឋនិងអំពើឃោរឃៅកាន់តែច្រើនឡើង មនុស្សតែងតែសួរហេតុអ្វីការអាក្រក់ទាំងនេះកើតមានឡើង។ តើអ្នកនឹងឆ្លើយយ៉ាងណាដែរ»? អនុញ្ញាតឲ្យគាត់ឆ្លើយហើយទទួលព្រមនឹងចម្លើយគាត់។ បន្ទាប់មក បើកទៅជំពូក១១ក្នុងសៀវភៅរស់នៅជានិរន្តរ៍ ហើយបង្ហាញអ្វីដែលវគ្គ១បានថ្លែងមក។ ចូរពន្យល់ថា សៀវភៅនេះផ្ដល់នូវការពន្យល់ពីព្រះគម្ពីរ ថាហេតុអ្វីបានជាមានអំពើអាក្រក់កើតឡើង រួចហើយនិយាយថា៖ «អ្នកអាចយកសៀវភៅមួយក្បាលនេះជារបស់អ្នក ដោយវិភាគទានតែ៤.០០០រៀលប៉ុណ្ណោះ»។
៣ ពេលដែលអ្នកត្រឡប់ទៅជួបវិញនៅកន្លែងដែលអ្នកបានឲ្យសៀវភៅ«រស់នាជានិរន្តរ៍» អ្នកអាចនិយាយថា៖
▪ «ខ្ញុំចាប់អារម្មណ៍នូវសេចក្ដីសន្និដ្ឋានរបស់អ្នក អំពីហេតុអ្វីមានការឈឺចាប់ច្រើនម្ល៉េះក្នុងពិភពលោក។ តើអ្នកយល់ស្របនឹងចម្លើយដែលព្រះគម្ពីរបានចែងមក ដូចនៅក្នុងសៀវភៅនេះទេ»? អនុញ្ញាតឲ្យគេឆ្លើយ។ សូមអានវគ្គ៣នៅទំព័រ៩៩ក្នុងសៀវភៅរស់នៅជានិរន្តរ៍ ហើយសុំសេចក្ដីអនុញ្ញាតពីគេឲ្យយើងអាន រ៉ូម ៥:១២ពីព្រះគម្ពីររបស់អ្នកម្ចាស់ផ្ទះ។ បន្ទាប់មកនិយាយថា៖ «ដំណឹងល្អគឺថា មិនមែនព្រះទេដែលជាអ្នកបង្កបង្កើតការឈឺចាប់និងសេចក្ដីវេទនា។ ទ្រង់បានសន្យាថា នឹងឲ្យយើងនូវជីវិតអស់កល្បជានិច្ចប្រកបដោយសន្ដិភាពនិងសុភមង្គល។ នៅជំពូកទីមួយក្នុងសៀវភៅនេះ ដែលមានចំណងជើងថា‹ការរស់នៅជានិរន្តរ៍មិនមែនគ្រាន់តែជាការយល់សប្ដិប៉ុណ្ណោះទេ› ខ្ញុំចង់ពន្យល់នូវរបៀបដែលការនេះអាចទៅជាការពិតបានចំពោះអ្នកនិងបុគ្គលដ៏ជាទីស្រឡាញ់របស់អ្នក»។ សូមបើកទៅជំពូកទី១ ហើយបង្ហាញនូវរបៀបបង្រៀនរបស់យើង។ សូមរៀបរាប់ប្រាប់ឲ្យបានច្រើនក្នុងជំពូកនេះ ដោយយល់ដល់កាលៈទេសៈរបស់គេ។
៤ អ្នកប្រហែលចង់រើសរបៀបចាប់ផ្ដើមនិយាយ នៅទំព័រ១៤ក្នុងសៀវភៅReasoning នៅក្រោមចំណងជើង«ចាស់ជរា/សេចក្ដីស្លាប់»:
▪ «តើអ្នកធ្លាប់សួរថា៖ តើសេចក្ដីស្លាប់ជាទីបញ្ចប់នៃអ្វីៗទាំងអស់ឬ? ឬក៏មានអ្វីក្រោយពីស្លាប់? [អនុញ្ញាតឲ្យគេឆ្លើយ]។ ព្រះគម្ពីរពន្យល់ប្រាប់យ៉ាងច្បាស់ពីសំនួរណាដែលយើងឆ្ងល់អំពីសេចក្ដីស្លាប់។ [សូមអានសាស្ដា ៩:៥, ១០]។ នេះក៏បង្ហាញនូវសេចក្ដីសង្ឃឹមដ៏ពិតចំពោះអ្នកណាដែលមានជំនឿ។ [សូមបើកទៅវគ្គ១៤នៅទំព័រ៨០ក្នុងសៀវភៅរស់នៅជានិរន្តរ៍ ក្រោយពីអានវគ្គនោះរួចហើយ សូមអានហើយពន្យល់បន្ទូលរបស់ព្រះយេស៊ូនៅយ៉ូហាន ៥:២៨]។ ជំពូកទាំងមូលនេះនឹងឆ្លើយនូវសំនួរ តើមានអ្វីកើតឡើងក្រោយពីស្លាប់? ប្រសិនបើអ្នកចង់អានសៀវភៅនេះ ខ្ញុំអាចទុកសៀវភៅមួយក្បាលនេះជូនអ្នក»។
៥ ពេលដែលត្រឡប់ទៅជួបវិញ អ្នកអាចមានគំនាប់គ្នាជាថ្មីឡើងវិញ រួចនិយាយថា៖
▪ «ពេលមុន យើងបាននិយាយអំពីអ្វីដែលកើតឡើងក្រោយពីមនុស្សស្លាប់ទៅ។ មនុស្សជាច្រើនមានជំនឿថា ជីវិតក្រោយពីស្លាប់នឹងទៅស្ថានសួគ៌ឬទៅស្ថាននរក។ ប៉ុន្តែ តើអ្នកមានដែលគិតថា មនុស្សស្លាប់អាចរស់ឡើងវិញនៅផែនដីនេះទេ? [អនុញ្ញាតឲ្យគេឆ្លើយ]។ តាមព្រះគម្ពីរ អ្នកណាដែលបានប្រោសឲ្យរស់ឡើងវិញ គឺក្នុងចំណោមមនុស្សរាបសា ដែលនឹងបានផែនដីជាមរដក។ [សូមអានទំនុកដំកើង ៣៧:១១, ២៩, ហើយពិគ្រោះវគ្គ២០ នៅទំព័រ១៦៥ ក្នុងសៀវភៅរស់នៅជានិរន្តរ៍]។ សេចក្ដីសង្ឃឹមនោះផ្ដល់ឲ្យអត្ថន័យនិងគោលបំណងថ្មី ដល់ជីវិតនៃមនុស្សរាប់លាននាក់ ដែលរស់នៅក្រោមអំណាចនៃសេចក្ដីស្លាប់។ សៀវភៅនេះនឹងជួយអ្នកឲ្យយល់អំពីរឿងនេះថែមទៀត។ តើចង់ឲ្យខ្ញុំបង្ហាញនូវរបៀបរៀនបានទេ»?
៦ ប្រសិនបើអ្នកចង់បានការសម្ដែងស្រួលជាងនេះ អ្នកអាចសាករបៀបមួយនេះ៖
▪ «ខ្ញុំចង់បង្ហាញអ្នករូបភាពក្នុងសៀវភៅអ្នកអាចរស់នៅជានិរន្តរ៍ក្នុងសួនមនោរម្យនៅលើផែនដី។ រូបនេះស្អាតស្រស់ល្អណាស់មែនទេ»? សូមបើកសៀវភៅ ដើម្បីឲ្យអ្នកផ្ទះអាចឃើញទំព័រ១២-១៣។ អនុញ្ញាតឲ្យគាត់ឆ្លើយ។ រួចហើយ សូមអានវគ្គ១និង២នៅទំព័រ៧។ បញ្ចប់ដោយនិយាយថា៖ «អ្នកអាចយកសៀវភៅនេះសំរាប់អានដោយខ្លួនឯងចុះ។ មានវិភាគទានតែ៤.០០០រៀលទេ»។ រកពេលវេលាណាដែលសមរម្យជាមួយអ្នកម្ចាស់ផ្ទះ ដើម្បីត្រឡប់ទៅបន្តការពិភាក្សានោះទៀត។
៧ យើងមានចំណេះពីព្រះដែលឆ្លើយសំនួរដ៏សំខាន់ៗនៃជីវិត។ ចូររៀបចំដោយយកចិត្តទុកដាក់ ហើយព្រះយេហូវ៉ានឹងប្រទានពរដល់ការខំប្រឹងរបស់អ្នក ដើម្បីផ្សាយដំណឹងដែលផ្ដល់ឲ្យជីវិតដល់អ្នកដែលស្វែងរកសេចក្ដីពិត។