ពេលអ្នកមានអារម្មណ៍ថាលែងចង់រស់ទៀត
តើអ្នកធ្លាប់មានអារម្មណ៍ពិបាកចិត្តដល់ម្ល៉េះបានជាអ្នកលែងចង់រស់ទៀតឬទេ? យ៉ាងនេះអ្នកអាចយល់អារម្មណ៍របស់អាទ្រីអាណា។ នាងពិបាកចិត្តដោយសារមានទុក្ខកង្វល់យ៉ាងខ្លាំង ហើយមានអារម្មណ៍សោកសៅនិងអស់សង្ឃឹម។ អាទ្រីអាណាបានកើតជំងឺផ្លូវចិត្តដែលធ្វើឲ្យនាងមានទុក្ខសោកគ្រប់ពេល។
សូមពិចារណាផងដែរអំពីបុរសជនជាតិជប៉ុនម្នាក់ឈ្មោះខាអូរូដែលថែរក្សាឪពុកម្ដាយវ័យចាស់និងមានជំងឺ។ គាត់ពន្យល់ថា៖ «នៅពេលនោះ ខ្ញុំទទួលការបង្ខិតបង្ខំយ៉ាងខ្លាំងនៅកន្លែងធ្វើការ។ ខ្ញុំលែងចង់ញ៉ាំបាយ ហើយគេងមិនសូវលក់។ ខ្ញុំចាប់ផ្ដើមគិតថាបើខ្ញុំស្លាប់ បញ្ហាទាំងអស់របស់ខ្ញុំនឹងលែងមានទៀត»។
បុរសជនជាតិនីហ្សេរីយ៉ាម្នាក់ឈ្មោះអូចេបូដេនិយាយថា៖ «ខ្ញុំតែងតែកើតទុក្ខយ៉ាងខ្លាំងរហូតដល់ខ្ញុំយំ។ ដូច្នេះខ្ញុំបានស្វែងរកវិធីបញ្ចប់ជីវិតរបស់ខ្ញុំ»។ គឺល្អណាស់ដែលអូចេបូដេ ខាអូរូ និងអាទ្រីអាណាមិនបានសម្លាប់ខ្លួន។ ប៉ុន្តែរាល់ឆ្នាំមនុស្សរាប់ពាន់នាក់បានសម្លាប់ខ្លួន។
តើរកជំនួយនៅឯណា?
មនុស្សភាគច្រើនដែលសម្លាប់ខ្លួនគឺជាបុរស ពួកគេជាច្រើននាក់មានអារម្មណ៍អៀនខ្មាសពេកមិនហ៊ានសុំជំនួយ។ លោកយេស៊ូបានមានប្រសាសន៍ថាមនុស្សដែលឈឺត្រូវការគ្រូពេទ្យ។ (លូកា ៥:៣១) ដូច្នេះ បើអ្នកមានអារម្មណ៍ពិបាកចិត្តខ្លាំងរហូតគិតចង់បញ្ចប់ជីវិតរបស់អ្នក សូមកុំអៀនខ្មាសស្វែងរកជំនួយឡើយ។ មនុស្សជាច្រើនដែលមានបញ្ហាផ្លូវចិត្តបានឃើញថាការព្យាបាលដោយប្រើថ្នាំអាចជួយពួកគេឲ្យស៊ូទ្រាំនិងមានអារម្មណ៍ធូរស្រាលជាង។ អូចេបូដេ ខាអូរូនិងអាទ្រីអាណាបានទទួលការព្យាបាលដោយប្រើថ្នាំ ហើយឥឡូវពួកគាត់បានធូរច្រើន។
គ្រូពេទ្យប្រហែលជាប្រើថ្នាំ ឬផ្ដល់ប្រឹក្សា ឬទាំងពីរដើម្បីព្យាបាលអ្នកដែលមានជំងឺផ្លូវចិត្ត។ អ្នកដែលមានជំងឺផ្លូវចិត្តត្រូវការឲ្យក្រុមគ្រួសារនិងមិត្តភក្ដិយល់អារម្មណ៍ អត់ធ្មត់ យកចិត្តទុកដាក់និងគាំទ្រពួកគាត់។ មិត្តសម្លាញ់ល្អបំផុតដែលមនុស្សគ្រប់គ្នាអាចមាននោះគឺព្រះយេហូវ៉ា។ លោកផ្ដល់ជំនួយដ៏អស្ចារ្យតាមរយៈបណ្ដាំរបស់លោក ពោលគឺគម្ពីរ។
តើមានវិធីដោះស្រាយមួយដងជាការស្រេចឬទេ?
អ្នកដែលមានជំងឺផ្លូវចិត្តច្រើនតែត្រូវការការព្យាបាលរយៈពេលយូរ ហើយប្រហែលត្រូវផ្លាស់ប្ដូររបៀបរស់នៅរបស់ពួកគេ។ ប៉ុន្តែបើអ្នកមានបញ្ហាផ្លូវចិត្ត អ្នកអាចទន្ទឹងរង់ចាំអនាគតដ៏រីករាយ ដូចអូចេបូដេដែរ។ គាត់និយាយថា៖ «ខ្ញុំទន្ទឹងរង់ចាំការសម្រេចនៅអេសាយ ៣៣:២៤ ដែលប្រាប់ទុកជាមុនអំពីគ្រាមួយដែលគ្មានមនុស្សណានិយាយថា៖ ‹ខ្ញុំឈឺ›ទៀតឡើយ»។ ដូចអូចេបូដេ សូមទទួលការសម្រាលទុក្ខពីសេចក្ដីសន្យារបស់ព្រះអំពី«ផែនដីថ្មី»ដែលនឹងលែងមាន«ការឈឺចាប់»ទៀត។ (ការបើកបង្ហាញ ២១:១, ៤) សេចក្ដីសន្យានោះមានន័យថានឹងលែងមានការឈឺចាប់ទៀតទាំងផ្លូវចិត្តនិងសតិអារម្មណ៍។ ការឈឺចាប់របស់អ្នកនឹងបាត់ទៅជារៀងរហូត។ អ្នកនឹងមិន«នឹកឃើញ»អារម្មណ៍ឈឺចាប់ទៀតទេ «ហើយក៏មិនចងចាំនៅក្នុងចិត្ត[របស់អ្នក]ទៀតដែរ»។—អេសាយ ៦៥:១៧