តើអ្នកអាចមានជីវិតប្រសើរជាងយ៉ាងដូចម្ដេច?
ជីវិតនៅសព្វថ្ងៃនេះមិនមែនជាជីវិតដែលព្រះចង់ឲ្យមនុស្សមាននោះទេ។ ផែនដីនេះគួរតែពេញទៅដោយមនុស្សដែលចង់ឲ្យអ្នកបង្កើតយើងគ្រប់គ្រង ធ្វើតាមការណែនាំរបស់លោក ព្រមទាំងបង្ហាញសេចក្ដីស្រឡាញ់និងគុណសម្បត្ដិឯទៀតដូចលោក។ ព្រះចង់ឲ្យពួកគេមានក្រុមគ្រួសារនិងរស់នៅជាមួយគ្នាយ៉ាងសប្បាយរីករាយ រកឃើញអ្វីថ្មីៗ ហើយធ្វើឲ្យផែនដីទាំងមូលទៅជាសួនឧទ្យាន។
ព្រះសន្យាថានឹងផ្លាស់ប្ដូរជីវិតនៅផែនដីឲ្យដូចគោលបំណងដើមរបស់លោក
«ទ្រង់បណ្ដាលឲ្យការសង្គ្រាមស្ងប់រំងាប់ រហូតដល់ចុងផែនដី»។—ទំនុកតម្កើង ៤៦:៩
«ពេលកំណត់បានមកដល់ . . . សម្រាប់បំផ្លាញពួកអ្នកដែលកំពុងបង្ខូចផែនដី»។—ការបើកបង្ហាញ ១១:១៨
«ពួកអ្នកដែលនៅក្នុងក្រុងគេនឹងមិនថា៖ ‹ខ្ញុំឈឺ›ទៀតឡើយ»។—អេសាយ ៣៣:២៤
«ពួករើសតាំងរបស់អញនឹងប្រើប្រាស់ការដែលដៃគេធ្វើជាយឺនយូរទៅ»។—អេសាយ ៦៥:២២
តើទំនាយទាំងនេះនឹងត្រូវសម្រេចយ៉ាងដូចម្ដេច? ព្រះបានតែងតាំងលោកយេស៊ូដែលជាបុត្ររបស់លោកឲ្យធ្វើជាស្តេចនៃរដ្ឋាភិបាលដ៏ល្អឥតខ្ចោះមួយដែលនឹងគ្រប់គ្រងពីស្ថានសួគ៌មកលើផែនដី។ គម្ពីរហៅរដ្ឋាភិបាលនេះថារាជាណាចក្ររបស់ព្រះ។ (ដានីយ៉ែល ២:៤៤) គម្ពីរចែងអំពីលោកយេស៊ូថា៖ ‹ព្រះនឹងប្រគល់ឲ្យបុត្រនោះនូវបល្ល័ង្ក [ហើយ]លោកក៏នឹងគ្រប់គ្រងជាស្តេច›។—លូកា ១:៣២, ៣៣
កាលដែលលោកយេស៊ូនៅផែនដី លោកបានធ្វើការអស្ចារ្យជាច្រើនដើម្បីបង្ហាញថា ពេលលោកគ្រប់គ្រងជាស្តេច លោកនឹងធ្វើឲ្យជីវិតយើងល្អប្រសើរជាងនៅឥឡូវនេះ។
លោកយេស៊ូបានបង្ហាញនូវរបៀបដែលលោកនឹងផ្ដល់ប្រយោជន៍ដល់មនុស្សដែលស្ដាប់បង្គាប់
លោកបានធ្វើឲ្យមនុស្សជាសះស្បើយពីជំងឺគ្រប់យ៉ាង។ នេះបង្ហាញអំពីរបៀបដែលលោកនឹងបំបាត់ចោលជំងឺនិងរោគាពីមនុស្សជាតិ។—ម៉ាថាយ ៩:៣៥
លោកបានធ្វើឲ្យសមុទ្រស្ងប់ ហើយនេះបង្ហាញអំពីរបៀបដែលលោកនឹងការពារមនុស្សដោយគ្រប់គ្រងលើកម្លាំងធម្មជាតិ។—ម៉ាកុស ៤:៣៦-៣៩
លោកបានផ្ដល់អាហារដល់មនុស្សរាប់ពាន់នាក់ ដែលនេះបង្ហាញថាលោកនឹងផ្ដល់ឲ្យមនុស្សនូវអ្វីដែលចាំបាច់ក្នុងជីវិត។—ម៉ាកុស ៦:៤១-៤៤
លោកបានធ្វើឲ្យទឹកទៅជាស្រានៅឯពិធីអាពាហ៍ពិពាហ៍មួយ។ នេះបង្ហាញថាលោកនឹងជួយមនុស្សឲ្យសប្បាយនឹងជីវិត។—យ៉ូហាន ២:៧-១១
តើតាមរបៀបណាអ្នកអាចមានជីវិតដែលព្រះចង់ឲ្យមនុស្សដែលស្រឡាញ់លោកមាន? គឺមានអ្វីមួយដែលអ្នកត្រូវធ្វើ។ គម្ពីររៀបរាប់ថា អ្នកត្រូវដើរលើ«ផ្លូវដែលទៅឯជីវិត . . . ហើយមានមនុស្សតិចណាស់ដែលរកផ្លូវនោះឃើញ»។—ម៉ាថាយ ៧:១៤
ការរកផ្លូវដែលនាំទៅឯជីវិតដ៏ល្អប្រសើរជាង
តើអ្វីជាផ្លូវទៅឯជីវិត? ព្រះមានប្រសាសន៍ថា៖ «អញនេះ គឺយេហូវ៉ាជាព្រះនៃឯង ជាអ្នកដែលបង្រៀនឲ្យឯងបានទទួលប្រយោជន៍ ហើយក៏នាំឯងទៅក្នុងផ្លូវដែលឯងគួរដើរ»។ (អេសាយ ៤៨:១៧) បើអ្នកឲ្យព្រះបង្រៀនអ្នក នោះអ្នកកំពុងដើរនៅលើវិថីជីវិតដ៏ល្អបំផុត។
លោកយេស៊ូបានមានប្រសាសន៍ថា៖ «ខ្ញុំជាផ្លូវ ជាសេចក្ដីពិត និងជាជីវិត»។ (យ៉ូហាន ១៤:៦) បើយើងធ្វើតាមគំរូនិងប្រសាសន៍របស់លោកយេស៊ូ នោះយើងនឹងចូលទៅជិតព្រះ ហើយយើងនឹងទទួលប្រយោជន៍ក្នុងជីវិត។
តើអ្នកអាចរកឃើញផ្លូវទៅឯជីវិតយ៉ាងដូចម្ដេច? មានសាសនាជាច្រើន ក៏ប៉ុន្តែលោកយេស៊ូបានព្រមានថា៖ «មិនមែនអស់អ្នកដែលនិយាយមកខ្ញុំថា៖ ‹លោកម្ចាស់! លោកម្ចាស់!› នឹងចូលក្នុងរាជាណាចក្រស្ថានសួគ៌ឡើយ តែគឺអ្នកណាដែលធ្វើតាមបំណងប្រាថ្នានៃបិតារបស់ខ្ញុំដែលស្ថិតនៅស្ថានសួគ៌វិញ»។ (ម៉ាថាយ ៧:២១) លោកក៏បានមានប្រសាសន៍ដែរថា៖ «អ្នករាល់គ្នានឹងស្គាល់ពួកគេដោយផលផ្លែរបស់ពួកគេ»។ (ម៉ាថាយ ៧:១៦) គម្ពីរអាចជួយអ្នកឲ្យស្គាល់ថាសាសនាណាជាសាសនាពិត។—យ៉ូហាន ១៧:១៧
តើតាមរបៀបណាអ្នកអាចចាប់ផ្ដើមដើរនៅលើផ្លូវទៅឯជីវិត? អ្នកត្រូវរៀនអំពីបុគ្គលដែលបានផ្ដល់ជីវិតដល់មនុស្សគ្រប់គ្នា ដូចជា៖ តើលោកជាអ្នកណា? តើលោកមាននាមអ្វី? តើលោកជាបុគ្គលបែបណា? តើលោកកំពុងធ្វើអ្វីសម្រាប់យើងនៅឥឡូវនេះ? តើលោកចង់ឲ្យយើងធ្វើអ្វី?a
ព្រះបង្កើតមនុស្សយើងមកមិនគ្រាន់តែឲ្យធ្វើការ បរិភោគ លេង និងមានក្រុមគ្រួសារប៉ុណ្ណោះទេ។ យើងអាចស្គាល់លោកដែលជាអ្នកបង្កើតយើង និងទៅជាមិត្តសម្លាញ់របស់លោក។ យើងអាចបង្ហាញថាយើងស្រឡាញ់លោកដោយធ្វើតាមបំណងប្រាថ្នារបស់លោក។ លោកយេស៊ូមានប្រសាសន៍ថា៖ «ដើម្បីបានជីវិតដែលគ្មានទីបញ្ចប់ ពួកគាត់ត្រូវស្គាល់លោកដែលជាព្រះពិតតែមួយឲ្យបានច្បាស់»។—យ៉ូហាន ១៧:៣
ព្រះបង្រៀនអ្នកឲ្យ«ទទួលប្រយោជន៍»តាមរយៈគម្ពីរ។—អេសាយ ៤៨:១៧
ការចាប់ផ្ដើមដំណើររបស់អ្នកនៅលើផ្លូវទៅឯជីវិត
ពេលយើងស្គាល់អ្វីដែលព្រះចង់ឲ្យយើងធ្វើ នោះយើងប្រហែលជាត្រូវធ្វើការកែប្រែខ្លះៗ។ ការធ្វើដូច្នោះអាចជាការពិបាក។ ប៉ុន្តែនេះមានន័យថាជីវិតយើងនឹងប្រសើរជាង ពេលយើងចាប់ផ្ដើមដើរលើផ្លូវទៅឯជីវិត។ ដើម្បីជួយអ្នកឲ្យទទួលចម្លើយចំពោះសំណួរសំខាន់ៗអំពីព្រះ សាក្សីព្រះយេហូវ៉ាអញ្ជើញអ្នកឲ្យសិក្សាគម្ពីរដោយឥតគិតថ្លៃនៅពេលណានិងកន្លែងណាដែលល្អសម្រាប់អ្នក។ អ្នកអាចទាក់ទងយើងតាមរយៈគេហទំព័ររបស់យើង www.jw.org។