ស្មរបន្ទាល់ព្រះយេហូវ៉ា—ពួកអ្នកផ្សាយដំណឹងល្អដ៏ពិត
១ ព្រះយេស៊ូគ្រីស្ទបានទុកភារកិច្ចដើម្បីផ្សាយដំណឹងល្អលើពួកសិស្សរបស់ទ្រង់ទាំងអស់ ដោយបង្គាប់គេយ៉ាងចំៗឲ្យផ្សាយដំណឹងល្អនៃព្រះរាជាណាចក្រ។ (ម៉ាថាយ ២៤:១៤; កិច្ចការ ១០:៤២) ពួកសិស្សដំបូងរបស់ទ្រង់ បានទុកគំរូក្នុងការធ្វើនេះ កាលដែលគេនិយាយអំពីព្រះរាជាណាចក្រដោយឥតឈប់ឈរ—មិនគ្រាន់តែនៅកន្លែងនៃការថ្វាយបង្គំប៉ុណ្ណោះ តែនៅកន្លែងណាក៏ដោយ ដែលគេជួបមនុស្សតាមសាធារណៈ និងពីផ្ទះមួយទៅផ្ទះមួយ។ (កិច្ចការ ៥:៤២; ២០:២០) ជាស្មរបន្ទាល់ព្រះយេហូវ៉ាសព្វថ្ងៃនេះ យើងបានសឲ្យឃើញថា យើងជាពួកអ្នកផ្សាយដំណឹងល្អដ៏ពិត ដោយផ្សាយសារព្រះរាជាណាចក្រក្នុង២៣២ប្រទេស ហើយបានធ្វើបុណ្យជ្រមុជទឹកដល់ពួកសិស្សថ្មីជាងមួយលាននាក់ គ្រាន់តែក្នុងបីឆ្នាំមុននេះប៉ុណ្ណោះ! ហេតុអ្វីក៏កិច្ចការផ្សាយដំណឹងល្អរបស់យើងមានការជោគជ័យម្ល៉េះ?
២ ដំណឹងល្អជំរុញទឹកចិត្តយើង: ពួកអ្នកផ្សាយដំណឹងល្អជាអ្នកផ្សាយ ឬអ្នកនាំសារនៃដំណឹងល្អ។ ជាបុគ្គលបែបនេះ យើងមានឯកសិទ្ធិដ៏រំភើបនៃការប្រកាសសាររបស់ព្រះយេហូវ៉ា—ជាដំណឹងល្អដ៏ពិត ដែលអាចប្រទានដល់មនុស្សលោកដែលមានចិត្តតាងតឹង។ យើងមានចិត្តសាទរអំពីចំណេះដែលបានទទួលអំពីផ្ទៃមេឃថ្មី ដែលនឹងគ្រប់គ្រងដ៏សុចរិតលើផែនដីថ្មី ដែលពេញដោយមនុស្សលោកដ៏ស្មោះត្រង់ក្នុងសួនមនោរម្យនៅខាងមុខនេះ។ (ពេត្រុសទី២ ៣:១៣, ១៧) មានតែយើងប៉ុណ្ណោះដែលមានសេចក្ដីសង្ឃឹមនេះ ហើយយើងមានចិត្តខ្នះខ្នែងក្នុងការចែកប្រាប់ដល់អ្នកដទៃ។
៣ សេចក្ដីស្រឡាញ់ពិតជំរុញយើង: ការផ្សាយដំណឹងល្អជាកិច្ចការដ៏សង្គ្រោះ។ (រ៉ូម ១:១៦) ដូច្នេះបានជាយើងមានអំណរដ៏អស្ចារ្យក្នុងការពង្រីកសារព្រះរាជាណាចក្រ។ ជាពួកអ្នកផ្សាយដំណឹងល្អដ៏ពិត យើងស្រឡាញ់មនុស្ស ហើយនេះជំរុញយើងឲ្យចែកប្រាប់ដំណឹងល្អជាមួយគេ—ដល់គ្រួសាររបស់យើង អ្នកជិតខាង មិត្ត និងមនុស្សជាច្រើនទៀតដែលអាចធ្វើទៅបាន។ ធ្វើកិច្ចការនេះដ៏អស់ពីចិត្ត ជាការសម្ដែងដ៏ល្អបំផុតដែលយើងអាចធ្វើ នៃសេចក្ដីស្រឡាញ់ពិតរបស់យើងសំរាប់អ្នកដទៃ។—ថែស្សាឡូនីចទី១ ២:៨
៤ វិញ្ញាណរបស់ព្រះគាំទ្រយើង: បន្ទូលរបស់ព្រះធានារ៉ាប់រងយើងថា នៅពេលណាយើងធ្វើកិច្ចការដាំនិងស្រោចពូជព្រះរាជាណាចក្រ នោះគឺជាព្រះយេហូវ៉ាដែល«ធ្វើឲ្យដុះវិញ»។ នេះហើយគឺជាអ្វីដែលយើងឃើញកំពុងកើតឡើងក្នុងអង្គការរបស់យើងសព្វថ្ងៃនេះ។ (កូរិនថូសទី១ ៣:៥-៧) គឺជាវិញ្ញាណបរិសុទ្ធរបស់ព្រះ ដែលគាំទ្រយើងក្នុងសកម្មភាពផ្សាយដំណឹងល្អ ហើយផ្ដល់ឲ្យយើងមានការជោគជ័យដ៏អស្ចារ្យ។—យ៉ូអែល ២:២៨, ២៩
៥ ដោយដឹងនូវការលើកទឹកចិត្តនៅធីម៉ូថេទី២ ៤:៥ ដើម្បី«ធ្វើជាគ្រូផ្សាយដំណឹងល្អ» ហើយពីព្រោះយើងមានសេចក្ដីស្រឡាញ់ចំពោះមនុស្សទាំងអស់ សូមនេះជំរុញឲ្យយើងចូលរួមចែកប្រាប់អំពីដំណឹងល្អព្រះរាជាណាចក្រដ៏រំភើបក្នុងគ្រប់ឱកាស ដោយទុកចិត្តថា ព្រះយេហូវ៉ានឹងបន្តប្រទានពរដល់កិច្ចការរបស់យើង។