គេអាចឃើញថាយើងជាមនុស្សខុសប្លែក
១ ឆ្នាំមុននេះ មនុស្សជាង៣០០.០០០នាក់បានចូលរួមជាមួយយើង ដោយទទួលបុណ្យជ្រមុជទឹក។ តើមនុស្សទាំងនេះបានឃើញអ្វីក្នុងស្មរបន្ទាល់ព្រះយេហូវ៉ា ដែលបណ្ដាលឲ្យគេចង់មានចំណែកក្នុងអង្គការរបស់ព្រះនោះ? ហេតុអ្វីក៏យើងលេចមកខុសប្លែកពីសាសនាទាំងអស់ឯទៀត? នេះជាចម្លើយដ៏ជាក់ស្តែងខ្លះៗ:
—យើងកាន់តាមព្រះគម្ពីរ ជាជាងមតិរបស់យើងផ្ទាល់: យើងថ្វាយព្រះយេហូវ៉ា«ដោយវិញ្ញាណ នឹងសេចក្ដីពិតដែរ» ដូចព្រះយេស៊ូគ្រីស្ទបានបង្គាប់ឲ្យធ្វើអីចឹង។ នេះមានសេចក្ដីថា បដិសេធចោលភាពក្លែងក្លាយ និងធ្វើតាមពាក្យបន្ទូលរបស់ព្រះ។—យ៉ូហាន ៤:២៣, ២៤; ធីម៉ូថេទី២ ៣:១៥-១៧
—យើងទៅឯមនុស្ស ជាជាងចាំឲ្យគេមកឯយើង: យើងបានទទួលយកសេចក្ដីបញ្ជារបស់ព្រះគ្រីស្ទ ដើម្បីឲ្យផ្សព្វផ្សាយនិងបង្រៀន ហើយយើងយកតម្រាប់តាមគំរូទ្រង់ ក្នុងការស្វែងរកមនុស្សដែលមានចិត្តស្មោះត្រង់។ យើងស្វែងរកពួកគេនៅតាមផ្ទះរបស់គេ នៅតាមផ្លូវ ឬក៏នៅកន្លែងណាដែលមានមនុស្ស។—ម៉ាថាយ ៩:៣៥; ១០:១១; ២៨:១៩, ២០; កិច្ចការ ១០:៤២
—យើងផ្ដល់ការបង្រៀនព្រះគម្ពីរដល់មនុស្សគ្រប់គ្នាដោយឥតគិតថ្លៃ: យើងចំណាយធនធាននិងកម្លាំងរបស់យើងដោយឥតគិតថ្លៃ ទាំងចំណាយជាងមួយរយកោដិម៉ោងរៀងរាល់ឆ្នាំក្នុងកិច្ចបំរើរបស់ព្រះ។ ដោយឥតរើសមុខ នោះយើងសិក្សាព្រះគម្ពីរជាមួយនឹងមនុស្សគ្រប់ប្រភេទ។—ម៉ាថាយ ១០:៨; កិច្ចការ ១០:៣៤, ៣៥; វិវរណៈ ២២:១៧
—យើងបានត្រូវបង្ហាត់បានល្អដើម្បីជួយមនុស្សខាងវិញ្ញាណ: តាមរយៈការសិក្សាផ្ទាល់ខ្លួននៃព្រះគម្ពីរ និងការអប់រំដែលបានផ្ដល់មកតាមរយៈកិច្ចប្រជុំក្រុមជំនុំ សន្និបាត និងមហាសន្និបាត នោះយើងទទួលការអប់រំខាងព្រះធិបតេយ្យដែលរកតម្លៃដាក់គ្មាន ដែលជួយយើងឲ្យបំភ្លឺខាងវិញ្ញាណដល់អ្នកឯទៀត។—អេសាយ ៥៤:១៣; ធីម៉ូថេទី២ ២:១៥; ពេត្រុសទី១ ៣:១៥
—យើងចាត់ទុកសេចក្ដីពិតយ៉ាងនឹងធឹង ដោយអនុវត្តក្នុងជីវិតរបស់យើងរាល់ថ្ងៃ: ដោយព្រោះសេចក្ដីស្រឡាញ់ព្រះ នោះយើងកែប្រែ នាំជីវិតរបស់យើងឲ្យស្របតាមបំណងព្រះហឫទ័យរបស់ទ្រង់។ បុគ្គលិកលក្ខណៈថ្មីដែលមានដូចព្រះគ្រីស្ទ ទាក់ទាញអ្នកឯទៀតមកឯសេចក្ដីពិត។—កូល៉ុស ៣:៩, ១០; យ៉ាកុប ១:២២, ២៥; យ៉ូហានទី១ ៥:៣
—យើងខំប្រឹងរស់នៅ និងធ្វើការជាមួយអ្នកដទៃដោយសុខសាន្ត: ការបណ្ដុះឲ្យមានគុណសម្បត្ដិរបស់ព្រះ ជួយយើងប្រុងប្រយ័ត្នដល់ការប្រព្រឹត្តនិងពាក្យសំដីរបស់យើង។ យើង«ស្វែងរក ហើយដេញតាមសេចក្ដីមេត្រីភាព»ជាមួយនឹងមនុស្សគ្រប់គ្នា។—ពេត្រុសទី១ ៣:១០, ១១; អេភេសូរ ៤:១-៣
២ គំរូនៃការរស់នៅជាគ្រីស្ទាន ដែលមនុស្សឃើញក្នុងអង្គការរបស់ព្រះយេហូវ៉ា ទាក់ទាញចិត្តមនុស្សជាច្រើនឲ្យទទួលសេចក្ដីពិត។ ចូរឲ្យគំរូផ្ទាល់ខ្លួនរបស់យើងមានឥទ្ធិពលលើអស់អ្នក ដែលស្គាល់ហើយពិនិត្យមើលយើងនោះ។