សេចក្ដីរាយការណ៍អំពីការរីកចំរើនផ្នែកកិច្ចផ្សព្វផ្សាយ
តាំងពីយូរយារមកហើយ ការរាយការណ៍ជាលំដាប់អំពីការរីកចំរើនផ្នែកការថ្វាយបង្គំពិតទូទាំងផែនដី ផ្ដល់ឲ្យនូវការលើកទឹកចិត្តចំពោះរាស្ត្ររបស់ព្រះយេហូវ៉ា។ ចាប់តាំងពីពេលព្រះយេស៊ូបានមានបន្ទូលទៅកាន់សិស្សរបស់ទ្រង់ថា ដំណឹងល្អដែលសម្ដែងពីព្រះរាជាណាចក្រ នឹងត្រូវផ្សព្វផ្សាយទូទាំងផែនដីនោះ គឺសំខាន់ដែលជនគ្រីស្ទានដ៏ពិតដឹងពីរបៀបកិច្ចការនេះកំពុងតែសម្រេច។—ម៉ាថ. ២៨:១៩, ២០; ម៉ាក. ១៣:១០; កិច្ច. ១:៨
អ្នកកាន់តាមព្រះយេស៊ូនៅសម័យដើម ក៏បានចាប់អារម្មណ៍យ៉ាងខ្លាំងទៅលើសេចក្ដីរាយការណ៍ស្តីអំពីការរីកចំរើននៃកិច្ចផ្សព្វផ្សាយដែរ។ (ម៉ាក. ៦:៣០) ពេលកិច្ចការនោះបានលូតលាស់ដុះដាលពាសពេញ សេចក្ដីរាយការណ៍ជាស្ថិតិលេខ បានត្រូវប្រមូលផ្ទៀងផ្ទាត់ជាមួយនឹងកំណត់ហេតុស្តីអំពីបទពិសោធន៍ល្អៗរបស់អ្នកដែលកំពុងតែចូលរួមក្នុងកិច្ចផ្សព្វផ្សាយដំណឹងល្អ។ សៀវភៅកិច្ចការចែងប្រាប់ថា មាន១២០នាក់ដែលមានវត្តមានពេលវិញ្ញាណបានត្រូវចាក់លើពួកសិស្សរបស់ព្រះយេស៊ូនៅបុណ្យថ្ងៃទី៥០។ មិនយូរក្រោយនោះ ចំនួនសិស្សបានកើនឡើងដល់ទៅ៣.០០០នាក់ ហើយក្រោយមកទៀតដល់ទៅ៥.០០០នាក់។ មានសេចក្ដីរាយការណ៍មួយដែលលើកទឹកចិត្តគឺថា៖ «ព្រះអម្ចាស់ ទ្រង់ក៏បន្ថែមនូវអស់អ្នក ដែលកំពុងតែបានសង្គ្រោះរាល់តែថ្ងៃ ទៅក្នុងពួកជំនុំថែមទៀត»ហើយថា«ពួកសង្ឃ ក៏មានសន្ធឹកចុះចូលជឿដែរ»។ (កិច្ច. ២:៥-១១, ៤១, ៤៧; ៦:៧; ១:១៥; ៤:៤) ដំណឹងអំពីការរីកចំរើននេះពិតជាបានលើកទឹកចិត្តបណ្ដាសិស្សរបស់ព្រះយេស៊ូណាស់! សេចក្ដីរាយការណ៍ដ៏គួរឲ្យរំភើបចិត្តនេះ ពិតជាបានជំរុញទឹកចិត្តពួកគេឲ្យឈានទៅមុខទៀតក្នុងការបំពេញនូវសេចក្ដីបង្គាប់ពីព្រះ ទោះជាមានការបៀតបៀនយ៉ាងឃោរឃៅពីសំណាក់ពួកសង្ឃសាសនាយូដាក៏ដោយ!
អំឡុងឆ្នាំ៦០-៦១ស.យ. ប៉ុលបានរាយការណ៍ក្នុងសំបុត្ររបស់គាត់ទៅកាន់បណ្ដាសិស្សនៅក្រុងកូល៉ុសថា ដំណឹងល្អ‹កំពុងតែបង្កើតផល ហើយចំរើនឡើងក្នុងលោកីយ៍ទាំងមូល› ហើយ«បានផ្សាយទៅដល់គ្រប់ទាំងមនុស្ស ដែលកើតក្រោមមេឃផង»។ (កូល. ១:៦, ២៣) បណ្ដាគ្រីស្ទាននេះបានស្ដាប់បង្គាប់តាមព្រះបន្ទូល ហើយវិញ្ញាណបរិសុទ្ធបានផ្ដល់ជាកម្លាំងចិត្តឲ្យពួកគេសម្រេចកិច្ចផ្សព្វផ្សាយទូទាំងពិភពលោកមុនទីបញ្ចប់នៃរបបយូដានៅឆ្នាំ៧០ស.យ.។ សេចក្ដីរាយការណ៍អំពីអ្វីដែលកំពុងតែត្រូវសម្រេច ពិតជាបានលើកទឹកចិត្តពួកគ្រីស្ទានដ៏ស្មោះត្រង់ណាស់! កិច្ចការនេះដែលមើលទៅដូចជាមិនអាចត្រូវសម្រេចបានឡើយ បានត្រូវបញ្ចប់សព្វគ្រប់ ហើយអ្នកដែលបានចូលរួមក្នុងកិច្ចការនោះទំនងជាបានយល់ថាព្រះអម្ចាស់បានមានបន្ទូលថា«ប្រពៃហើយ!» ចំពោះកិច្ចការរបស់ពួកគេនោះ។—ម៉ាថ. ២៥:២១
ដូចគ្នានឹងនេះដែរ អង្គការរបស់ព្រះយេហូវ៉ានៅសម័យយើងនេះ ព្យាយាមធ្វើបញ្ជីត្រឹមត្រូវស្តីអំពីកិច្ចការដែលកំពុងតែធ្វើក្នុងការសម្រេចតាមម៉ាថាយ ២៤:១៤ ថា៖ «ដំណឹងល្អនេះ ដែលសំដែងពីនគរ នឹងត្រូវប្រកាសប្រាប់ទូទៅគ្រប់ក្នុងលោកីយ ទុកជាទីបន្ទាល់ដល់អស់ទាំងសាសន៍ នោះទើបនឹងបានដល់ចុងបំផុត»។ ក្នុងនាមជាអ្នកបំរើព្រះយេហូវ៉ាដែលបានថ្វាយខ្លួនហើយនោះ យើងមានកិច្ចការដែលយើងត្រូវធ្វើជាបន្ទាន់។ តើអ្នកមិនចង់ឃើញកិច្ចបំរើផ្សាយនេះបញ្ចប់យ៉ាងសព្វគ្រប់មុនទីបញ្ចប់មកដល់ទេឬ? ការពិត ព្រះយេហូវ៉ានឹងចាត់ចែងកិច្ចការនេះឲ្យសម្រេចសព្វគ្រប់។ ប៉ុន្តែ តើយើងនឹងរួមចំណែកនិងទទួលព្រះគុណពីព្រះយេហូវ៉ាឬទេ? តើយើងនឹងឮទ្រង់មានបន្ទូលថា«ប្រពៃហើយ»ចំពោះកិច្ចការរបស់យើងឬទេ?