ដំណឹងល្អត្រូវបានផ្ញើទុកនឹងយើង
១ យើងមានឯកសិទ្ធិដ៏ប្រសើរក្រៃលែងដោយសារដំណឹងល្អត្រូវបានផ្ញើទុកនឹងយើង! (១ថែ. ២:៤) ទោះបីមនុស្សខ្លះមិនព្រមស្ដាប់តាមសារបន្ទូលដ៏ពូកែនេះក៏ដោយ តែចំពោះមនុស្សស្មោះសវិញ សារដំណឹងល្អគឺប្រៀបដូចជាក្លិនសែនពិដោរដែលទាក់ទាញពួកគេ។ (២កូ. ២:១៤-១៦) អស់អ្នកណាដែលព្រមទទួលនិងប្រព្រឹត្តតាមដំណឹងល្អនេះនឹងទទួលសេចក្ដីសង្គ្រោះ។ (រ៉ូម ១:១៦) តើយើងគួរធ្វើយ៉ាងណាចំពោះដំណឹងល្អដែលត្រូវបានផ្ញើទុកនឹងយើង?
២ ព្រះយេស៊ូនិងពួកសាវ័ក: ព្រះយេស៊ូបានចាត់ទុកការប្រកាសដំណឹងល្អជាកិច្ចការដែលសំខាន់បំផុត!។ (លូ. ៤:១៨, ៤៣) សូម្បីតែទ្រង់អស់ព្រះកាយពល និងស្រេកឃ្លានក៏ដោយ តែសេចក្ដីស្រឡាញ់របស់ទ្រង់ចំពោះមនុស្ស និងការយល់នូវតម្លៃនៃសារដំណឹងល្អបានជំរុញឲ្យទ្រង់ប្រកាសផ្សាយដល់អ្នកឯទៀត។ (ម៉ាក. ៦:៣០-៣៤) តាមរយៈពាក្យសំដីនិងគំរូ ព្រះយេស៊ូបានចាត់ទុកសារៈសំខាន់នៃកិច្ចការប្រកាសសារព្រះរាជាណាចក្រឲ្យផ្ដិតជាប់ក្នុងចិត្តគំនិតរបស់សិស្សទ្រង់។—ម៉ាថ. ២៨:១៨-២០; ម៉ាក. ១៣:១០
៣ ពួកសាវ័កបានធ្វើតាមគំរូរបស់ព្រះយេស៊ូដោយខ្នះខ្នែងក្នុងការប្រកាសសារព្រះរាជាណាចក្រ។ សូម្បីតែនៅពេលដែលត្រូវវាយ និងបញ្ជាឲ្យឈប់ផ្សព្វផ្សាយក៏ដោយ ក៏ពួកគេ«ចេះតែបង្រៀន ព្រមទាំងប្រាប់ដំណឹងល្អពីព្រះយេស៊ូវគ្រីស្ទ នៅក្នុងព្រះវិហារ ហើយនៅអស់ទាំងផ្ទះរាល់តែថ្ងៃជានិច្ច»។ (កិច្ច. ៥:៤០-៤២) សាវ័កប៉ុលបានព្យាយាមក្នុងកិច្ចការនេះដោយគ្មានខ្លាចនឿយហត់ឡើយ។ (១កូ. ១៥:៩, ១០; កូល. ១:២៩) គាត់បានប្រៀបធៀបឯកសិទ្ធិផ្សាយដំណឹងល្អទៅនឹងការជំពាក់មនុស្សឯទៀត ហើយគាត់បានសុខចិត្តលះបង់ចោលនូវភាពស្រណុកស្រួលរបស់ខ្លួនដើម្បីបំពេញកិច្ចការនោះ។—កិច្ច. ២០:២៤; រ៉ូម ១:១៤-១៦
៤ ឯកសិទ្ធិរបស់យើងសព្វថ្ងៃនេះ: បើយើងយល់តម្លៃនៃការងារដ៏ពិសិដ្ឋដែលត្រូវបានផ្ញើទុកនឹងយើង នេះជំរុញយើងឲ្យស្វែងរកវិធីពង្រីកកិច្ចផ្សព្វផ្សាយរបស់យើងតទៅទៀត។ (រ៉ូម ១៥:១៦) លោកអេដ្វាដជាជនពិការត្រូវប្រើកៅអីមានកង់ជានិច្ច ហើយគាត់ធ្លាប់អង្គុយនៅមុខទ្វារសណ្ឋាគារមួយ ដើម្បីនិយាយជាមួយភ្ញៀវអំពីជំនឿរបស់គាត់។ ប៉ុន្តែ ដោយសារគាត់ចង់រួមចំណែកកិច្ចផ្សាយឲ្យបានច្រើនជាង គាត់សង់បន្ទប់ពិសេសនៅលើឡានដឹកទំនិញ ហើយតាមរយៈឡាននោះគាត់បានធ្វើជាអ្នកត្រួសត្រាយអស់ជាច្រើនឆ្នាំទាំងធ្វើដំណើររាប់ពាន់គីឡូម៉ែត្រ។ បងប្អូនជាច្រើនសព្វថ្ងៃនេះក៏ដូចជាអេដ្វាដដែរ ដ្បិតពួកគេបានកែសម្រួលកាលៈទេសៈរបស់ខ្លួនដើម្បីមានចំណែកច្រើនជាងក្នុងការផ្សព្វផ្សាយដំណឹងល្អ។
៥ ចូរឲ្យយើងយកតម្រាប់តាមព្រះយេស៊ូនិងពួកសាវ័ករបស់ទ្រង់! ដោយអនុញ្ញាតឲ្យកិច្ចផ្សព្វផ្សាយមានអាទិភាពក្នុងជីវិតរបស់យើងសព្វថ្ងៃនេះ។ ការធ្វើដូច្នេះនឹងបង្ហាញនូវសេចក្ដីស្រឡាញ់របស់យើងចំពោះមនុស្ស ព្រមទាំងបង្ហាញថាយើងយល់តម្លៃនៃដំណឹងល្អដែលត្រូវបានផ្ញើទុកនឹងយើង។