ពិការតែអាចបង្កើតផលបាន
១ ប្រសិនបើអ្នកជាជនពិការនៅក្នុងចំណោមស្មរបន្ទាល់ព្រះយេហូវ៉ា នោះអ្នកនៅតែអាចបង្កើតផលក្នុងកិច្ចបំរើផ្សាយបាន។ តាមការពិត កាលៈទេសៈរបស់អ្នកផ្ដល់នូវឱកាសពិសេសឲ្យអ្នកធ្វើបន្ទាល់ហើយលើកទឹកចិត្តមនុស្សឯទៀត។
២ ឱកាសដើម្បីធ្វើបន្ទាល់: បងប្អូនជាច្រើនដែលជាអ្នកពិការ កំពុងតែចូលរួមយ៉ាងពេញលេញក្នុងកិច្ចបំរើផ្សាយ។ ជាឧទាហរណ៍ បងស្រីម្នាក់ដោយសារតែគាត់មានបញ្ហាពេលវះកាត់ នោះធ្វើឲ្យគាត់ពិបាកនិយាយឬធ្វើដំណើរ តែគាត់នៅតែចូលរួមក្នុងការផ្ដល់ទស្សនាវដ្ដីដែរ បើប្ដីគាត់ចតឡានក្បែរចិញ្ចើមថ្នល់ ជាកន្លែងដែលមនុស្សច្រើនឆ្លងកាត់នោះ។ មានម្ដង ដែលបងស្រីនេះបានផ្ដល់ទស្សនាវដ្ដីអស់៨០ក្បាលក្នុងរយៈពេលតែពីរម៉ោងប៉ុណ្ណោះ! កាលៈទេសៈពិសេសរបស់អ្នកក៏អាចបើកផ្លូវឲ្យអ្នកជួបមនុស្ស ដែលជាធម្មតាមិនសូវបានជួប។ បើដូច្នេះ សូមចាត់ទុកនេះជាឱកាសឲ្យអ្នកផ្ទាល់អាចនិយាយជាមួយនឹងមនុស្សទាំងនោះ។
៣ ការផ្សាយរបស់អ្នកអាចមានប្រសិទ្ធភាពច្រើនមែនទែន! ពេលដែលមនុស្សឯទៀតកត់សម្គាល់នូវការតាំងចិត្តរបស់អ្នក ថែមទាំងអានុភាពដ៏ល្អដែលសេចក្ដីពិតពីព្រះគម្ពីរបានមានទៅលើវិថីជីវិតរបស់អ្នក នេះប្រហែលអាចទាញចិត្តគេឲ្យចង់ស្គាល់សារអំពីព្រះរាជាណាចក្រដែរ។ ម្យ៉ាងវិញទៀត ពេលដែលអ្នកជួបមនុស្សដែលកំពុងតែឆ្លងកាត់ការលំបាក បទពិសោធន៍របស់អ្នកក្នុងជីវិតអាចជួយអ្នកឲ្យផ្ដល់នូវការសំរាលទុក្ខពីព្រះបន្ទូលរបស់ព្រះ។—២កូ. ១:៤
៤ ចូរជួយពង្រឹងកម្លាំងរបស់អ្នកដ៏ទៃ: តើអ្នកបានទទួលការលើកទឹកចិត្តឬទេ ពីរឿងនៃជីវិតរបស់បងស្រីឈ្មោះឡូរ៉លនិសបេត ដែលបានរស់នៅដោយប្រើម៉ាស៊ីនដកដង្ហើមសិប្បនិម្មិតអស់៣៧ឆ្នាំ តែបានជួយមនុស្ស១៧នាក់ទទួលចំណេះត្រឹមត្រូវអំពីសេចក្ដីពិតពីព្រះគម្ពីរ? ស្រដៀងគ្នាដែរ គំរូរបស់អ្នកក៏អាចញ៉ាំងឲ្យអ្នកជឿគ្នីគ្នាព្យាយាមក្នុងកិច្ចបំរើរបស់ព្រះយេហូវ៉ា។—gE៩៣ ២២/១ ទំព័រ១៨-២១
៥ ទោះបីជាកាលៈទេសៈរបស់អ្នកបង្ការអ្នកមិនឲ្យចូលរួមក្នុងកិច្ចបំរើដូចបំណងចិត្តក៏ដោយ អ្នកក៏នៅតែអាចលើកទឹកចិត្តបងប្អូនឯទៀតដែរ។ បងប្រុសម្នាក់បាននិយាយថា៖«ខ្ញុំបានរៀនដឹងថា សូម្បីតែអ្នកពិការធ្ងន់ក៏ដោយ ក៏អ្នកនៅតែអាចជួយអ្នកឯទៀតបានយ៉ាងច្រើនដែរ។ បងប្អូនខ្លះៗក្នុងក្រុមជំនុំបានចាត់ទុកប្រពន្ធខ្ញុំនិងខ្ញុំជាអ្នកគាំទ្រពួកគេ។ ដោយសារកាលៈទេសៈរបស់យើង បងប្អូនអាចជួបយើងរាល់តែដង ហើយយើងតែងតែអាចគាំទ្រពួកគេ»។ ក៏ប៉ុន្តែ ដោយព្រោះពិការភាពរបស់អ្នក បងប្អូនដឹងថា អ្នកមិនអាចសម្រេចតាមចិត្តខ្នះខ្នែងរបស់អ្នកបានរាល់តែដងទេ។ យ៉ាងណាក៏ដោយ ដោយមានជំនួយខ្លះ អ្នកក៏អាចចូលរួមយ៉ាងសកម្មក្នុងកិច្ចបំរើបាន។ ដូច្នេះ ប្រសិនបើអ្នកត្រូវការជំនួយ សូមកុំស្ទាក់ស្ទើរជំរាបប្រាប់អ្នកចាស់ទុំឬបងប្អូនក្នុងក្រុមជំនុំដែលអាចផ្ដល់ជំនួយនោះ។
៦ ព្រះយេហូវ៉ាទតឃើញអ្វីៗទាំងអស់ដែលអ្នកធ្វើដើម្បីបំរើទ្រង់ ហើយទ្រង់សព្វព្រះហឫទ័យនឹងកិច្ចបំរើដ៏អស់ពីចិត្តរបស់អ្នក។ (ទំនុក. ១៣៩:១-៤) ពេលដែលអ្នកពឹងពាក់ទៅលើទ្រង់ ទ្រង់នឹងផ្ដល់កម្លាំងឲ្យអ្នកបានកិច្ចបំរើដ៏មានន័យហើយបង្កើតផលបាន។—២កូ. ១២:៧-១០