ចូរ«ប្រុងប្រៀបខ្លួនជាស្រេច»
១ ក្នុងទំនាយដ៏ធំរបស់ព្រះយេស៊ូស្តីអំពីទីបញ្ចប់នៃរបបលោកីយ៍នេះ ទ្រង់បានព្រមានយើងកុំឲ្យជក់គិតអំពីជីវិតប្រចាំថ្ងៃ។ (ម៉ាថ. ២៤:៣៦-៣៩; លូ. ២១:៣៤, ៣៥) ដោយសារយើងមិនដឹងថាសេចក្ដីវេទនាជាខ្លាំងនឹងចាប់ផ្ដើមនៅពេលណា នោះយើងចាំបាច់ត្រូវធ្វើតាមការដាស់តឿនរបស់ព្រះយេស៊ូជាដាច់ខាត។ ទ្រង់ដាស់តឿនយើងថា៖«[ចូរ]ឲ្យអ្នករាល់គ្នាប្រុងប្រៀបខ្លួនជាស្រេចដែរ ដ្បិតកូនមនុស្សនឹងមកនៅវេលាដែលអ្នករាល់គ្នាមិនគិត»។ (ម៉ាថ. ២៤:៤៤) តើអ្វីអាចជួយយើងប្រុងប្រៀបខ្លួននោះ?
២ ត្រូវប្រុងប្រយ័ត្នកង្វល់កង្វាយនិងអ្វីដែលបំបែរអារម្មណ៍: អន្ទាក់ខាងវិញ្ញាណមួយដែលយើងត្រូវប្រុងប្រយ័ត្ន គឺ«សេចក្ដីខ្វល់ខ្វាយនៅជីវិត»។ (លូ. ២១:៣៤) នៅប្រទេសខ្លះ ភាពក្រីក្រ ការគ្មានការងារធ្វើ និងតម្លៃទំនិញថ្លៃ ធ្វើឲ្យមនុស្សពិបាកទិញរបស់របរដែលត្រូវការសំរាប់ជីវិតប្រចាំថ្ងៃ។ នៅប្រទេសឯទៀត ការទិញវត្ថុទ្រព្យគឺជាទង្វើធម្មតា។ បើយើងចាប់ផ្ដើមខ្វល់ខ្វាយច្រើនពេកអំពីទ្រព្យសម្បត្ដិ នេះអាចនាំឲ្យយើងឈប់ប្រមូលអារម្មណ៍ទៅលើសច្ចភាពនៃអ្វីៗដែលទាក់ទងនឹងព្រះរាជាណាចក្ររបស់ព្រះ។ (ម៉ាថ. ៦:១៩-២៤, ៣១-៣៣) កិច្ចប្រជុំគ្រីស្ទានជួយយើងប្រមូលអារម្មណ៍ទៅលើអ្វីៗដែលទាក់ទងព្រះរាជាណាចក្រ។ តើអ្នកប្ដេជ្ញាចិត្តឲ្យមានវត្តមាននៅកិច្ចប្រជុំទាំងអស់ឬទេ?—ហេ. ១០:២៤, ២៥
៣ សព្វថ្ងៃលោកីយ៍នេះពោរពេញទៅដោយអ្វីផ្សេងៗដែលអាចស៊ីពេលវេលារបស់យើងយ៉ាងងាយ។ ការប្រើកុំព្យូទ័រអាចទៅជាអន្ទាក់មួយ បើយើងចំណាយពេលច្រើនពេកមើលអ៊ិនថឺណិត អាននិងផ្ញើអ៊ីមែល(E-mail) ឬលេងហ្គេមក្នុងកុំព្យូទ័រ។ យើងក៏អាចបាត់បង់ពេលវេលាជាច្រើនឥតគណនាដោយមើលទូរទស្សន៍ កុន ការកំសាន្ត អានសៀវភៅអំពីរឿងផ្សេងៗ ឬលេងកីឡា។ ជាលទ្ធផលយើងនឹងមានពេលតិចឬកម្លាំងតិចតួចសំរាប់អ្វីខាងវិញ្ញាណ។ ទោះជាការសំរាកកំសាន្តអាចធ្វើឲ្យមានកម្លាំងឡើងវិញជាបណ្ដោះអាសន្នក៏ពិតមែន តែការសិក្សាព្រះគម្ពីរផ្ទាល់ខ្លួននិងជាក្រុមគ្រួសារអាចផ្ដល់ផលប្រយោជន៍ដែលស្ថិតស្ថេរជារៀងរហូត។ (១ធី. ៤:៧, ៨) តើអ្នកឆ្លៀតពេលដើម្បីរំពឹងគិតអំពីព្រះបន្ទូលរបស់ព្រះជារៀងរាល់ថ្ងៃទេ?—អេភ. ៥:១៥-១៧
៤ យើងដឹងគុណណាស់! ដែលអង្គការរបស់ព្រះយេហូវ៉ាបានរៀបចំកម្មវិធីដើម្បីផ្ដល់ការណែនាំខាងវិញ្ញាណ ក្នុងបំណងជួយយើងឲ្យអាច«រួចពីការទាំងនេះដែលត្រូវមក ហើយឲ្យបានឈរនៅមុខកូនមនុស្សផង»។ (លូ. ២១:៣៦) ចូរយើងឆ្លៀតប្រយោជន៍ឲ្យបានពេញលេញពីសំវិធានការទាំងនេះ និង«ប្រុងប្រៀបខ្លួនជាស្រេច» ដើម្បីជំនឿរបស់យើងអាច«ជាសេចក្ដីសរសើរ កេរ្ដិ៍ឈ្មោះ នឹងសិរីល្អ ក្នុងកាលដែលព្រះយេស៊ូវគ្រីស្ទទ្រង់លេចមក»។—១ពេ. ១:៧