ប្រអប់សំណួរ
◼ តើសមត្រឹមត្រូវឲ្យសាក្សីព្រះយេហូវ៉ាទទួលការព្យាបាលឬថែទាំសុខភាពពីមន្ទីរពេទ្យ ឬមជ្ឈមណ្ឌលថែទាំមនុស្សវ័យចំណាស់របស់អង្គការសាសនាឬទេ?
អង្គការសាសនាមួយចំនួនចាត់ចែងការងារនៅមន្ទីរពេទ្យឬមជ្ឈមណ្ឌលថែទាំមនុស្សវ័យចំណាស់។ តាមធម្មតាមន្ទីរព្យាបាលឬមជ្ឈមណ្ឌលថែទាំបែបនេះមិនបានស្ថាបនាឡើងដើម្បីផ្សព្វផ្សាយសាសនាមិនពិតទេ ពោលគឺបាប៊ីឡូនដ៏ជាធំ។ (វិវរ. ១៨:២, ៤) ប្រហែលនៅដើមដំបូងមន្ទីរព្យាបាលឬមជ្ឈមណ្ឌលថែទាំបែបនេះត្រូវបានបង្កើតមកឲ្យធ្វើជាប្រភពរកប្រាក់ចំណូលសម្រាប់អង្គការសាសនានោះ។ សព្វថ្ងៃនេះ មន្ទីរពេទ្យមួយចំនួនពាក់ព័ន្ធនឹងសាសនាត្រង់តែឈ្មោះប៉ុណ្ណោះ រីឯមន្ទីរពេទ្យផ្សេងទៀតនៅតែមានបព្វជិតកាន់កាប់។
ប្រសិនបើសាក្សីព្រះយេហូវ៉ាម្នាក់ត្រូវការទទួលការព្យាបាលនៅឯមន្ទីរព្យាបាលឬមជ្ឈមណ្ឌលថែទាំសុខភាពណាមួយ នោះគាត់ត្រូវសម្រេចចិត្តដោយខ្លួនឯងថា គួរទៅមន្ទីរព្យាបាលឬមជ្ឈមណ្ឌលថែទាំដែលជាប់ពាក់ព័ន្ធនឹងអង្គការសាសនាឬអត់។ ប្រហែលមនសិការរបស់បងប្អូនម្នាក់អាចឲ្យគាត់ទៅកន្លែងបែបនោះ តែមនសិការរបស់បងប្អូនម្នាក់ទៀតឃាត់មិនឲ្យគាត់ទៅទីនោះទេ។ (១ធី. ១:៥) មានចំណុចខ្លះដែលអាចមានអានុភាពទៅលើការសម្រេចចិត្តរបស់យើង ដូច្នេះយកល្អឲ្យយើងពិចារណាមើលចំណុចទាំងនោះ។
ជាឧទាហរណ៍ នៅតំបន់មួយប្រហែលមានមន្ទីរព្យាបាលឬមជ្ឈមណ្ឌលថែទាំមនុស្សវ័យចំណាស់តែមួយគត់ ហើយកន្លែងនោះមានឈ្មោះដែលទាក់ទងនឹងសាសនា។ ម្យ៉ាងទៀតទោះបើមានមន្ទីរព្យាបាលផ្សេងទៀតនៅតំបន់នោះក៏ដោយ តែមន្ទីរព្យាបាលដែលទាក់ទងនឹងសាសនានោះ ប្រហែលជំនាញជាងក្នុងការព្យាបាល។ មន្ទីរព្យាបាលដែលមានឈ្មោះទាក់ទងនឹងសាសនាបែបនោះ ប្រហែលជាកន្លែងតែមួយគត់ដែលមានបច្ចេកទេស ដែលត្រូវការសម្រាប់ព្យាបាលជំងឺយើង។ ណាមួយទៀត ប្រហែលមន្ទីរព្យាបាលដែលជាប់ពាក់ព័ន្ធនឹងអង្គការសាសនាអាចគោរពជំហររបស់យើងក្នុងការមិនចាក់បញ្ចូលឈាម តែមន្ទីរព្យាបាលរបស់រដ្ឋឬឯកជន ប្រហែលមិនព្រមព្យាបាលដោយឥតចាក់បញ្ចូលឈាមទេ។ ដូច្នេះ យើងអាចពិចារណាចំណុចខាងលើនេះ នៅពេលធ្វើការសម្រេចចិត្តទទួលការព្យាបាលនៅកន្លែងណាមួយ។
ប្រសិនបើអ្នកសម្រេចចិត្តទទួលការព្យាបាលពីមន្ទីរព្យាបាលឬមជ្ឈមណ្ឌលថែទាំសុខភាពដែលពាក់ព័ន្ធនឹងអង្គការសាសនា នោះអ្នកអាចចាត់ទុកការបង់ថ្លៃសម្រាប់ការព្យាបាលនោះ គឺដូចគ្នានឹងការបង់ថ្លៃសម្រាប់សេវារបស់ក្រុមហ៊ុនណាមួយ។ យើងអាចចាត់ទុកការបង់ថ្លៃសម្រាប់ការព្យាបាលនោះ មិនជាការផ្ដល់ប្រាក់ឧបត្ថម្ភសាសនាមិនពិតទេ តែផ្ទុយទៅវិញ គ្រាន់តែបង់ថ្លៃសម្រាប់សេវាឬទំនិញណាមួយប៉ុណ្ណោះ។
ពិតមែនដោយសារយើងជាគ្រិស្តសាសនិក បើយើងទទួលការព្យាបាលពីកន្លែងទាំងនោះ យើងត្រូវប្រយ័ត្នខ្លួនកុំឲ្យរួមចំណែកក្នុងការថ្វាយបង្គំមិនពិតជាដាច់ខាត។ ម្យ៉ាងទៀត យើងមិនហៅបុគ្គលិកឬភ្ញៀវតាមឋានន្តររបស់សាសនាមិនពិតទេ តួយ៉ាងដូចជា«លោកឪពុក លោកគ្រូ ឬអ្នកម៉ែ»នោះឡើយ។ (ម៉ាថ. ២៣:៩) យើងត្រូវប្រាកដថា យើងទទួលតែការព្យាបាលប៉ុណ្ណោះ។
ពេលចូលមន្ទីរព្យាបាលដំបូង អ្នកអាចប្រាប់គេថា អ្នកជាសាក្សីព្រះយេហូវ៉ាម្នាក់ ហើយចង់ឲ្យអ្នកចាស់ទុំក្រុមជំនុំមកលេង។ នេះនឹងជួយអ្នករក្សាឲ្យមានចំណងមិត្តភាពល្អជាមួយព្រះយេហូវ៉ា។—១ថែ. ៥:១៤
សមាជិកគ្រួសារដែលជាអ្នកជឿ អ្នកចាស់ទុំ និងអ្នកឯទៀតក្នុងក្រុមជំនុំ គួរយកចិត្តទុកដាក់ចំពោះការជួយពង្រឹងចំណងមិត្តភាពរបស់បងប្អូនវ័យចំណាស់ជាមួយព្រះយេហូវ៉ាដែលរស់នៅក្នុងមជ្ឈមណ្ឌលថែទាំសុខភាព។ ការជួយបងប្អូននោះរក្សាឲ្យមានចំណងមិត្តភាពជាមួយព្រះគឺសំខាន់ណាស់ ជាពិសេសបើមជ្ឈមណ្ឌលនោះកាន់កាប់ដោយអង្គការសាសនា។ ការយកចិត្តទុកដាក់អំពីរឿងនេះ ពិតជានឹងលើកទឹកចិត្តបងប្អូនវ័យចំណាស់ខ្លាំងណាស់ ហើយនឹងជួយបង្ការមិនឲ្យគាត់រួមចំណែកក្នុងកម្មវិធី ឬបុណ្យផ្សេងៗខាងសាសនាដែលធ្វើឡើងនៅកន្លែងនោះ។
ដោយថ្លឹងថ្លែងអំពីចំណុចទាំងអស់នេះ យើងម្នាក់ៗគួរតែសម្រេចចិត្តដោយខ្លួនឯងស្តីអំពីកន្លែងណាដែលយើងនឹងទទួលការព្យាបាលឬថែទាំសុខភាព។—កា. ៦:៥