ជួយអ្នកថ្មីឲ្យចេះត្រៀមខ្លួនសម្រាប់គ្រាដែលមានការប្រឆាំង
១ ពេលដែលបុគ្គលម្នាក់ចាប់ផ្ដើមរៀនគម្ពីរ និង‹ចង់រស់ ដោយគោរពប្រតិបត្ដិតាមព្រះ› នោះអារក្សសាតាំងនឹងខំប្រឆាំងពួកគេជាខ្លាំង។ (២ធី. ៣:១២) ការប្រឆាំងដែលវាប្រើអាចមកពីអ្នកធ្វើការជាមួយ សិស្សរួមថ្នាក់ ឬអ្នកជិតខាងជាដើម។ ការប្រឆាំងពីសាច់ញាតិ ដែលប្រហែលជាមានចេតនាល្អ គឺពិបាកឲ្យស៊ូទ្រាំណាស់។—ម៉ាថ. ១០:២១; ម៉ាក. ៣:២១
២ គម្ពីរពន្យល់ថានឹងមានការប្រឆាំង : សិស្សថ្មីត្រូវយល់ថា ការប្រឆាំងបៀតបៀនមិនជាអ្វីចម្លែកឡើយ ហើយនេះបង្ហាញថាពួកគេជាសិស្សពិតប្រាកដរបស់គ្រិស្ត។ (យ៉ូន. ១៥:២០) ពេលខ្លះការប្រឆាំងពីអ្នកឯទៀតប្រហែលមកពីពួកគេយល់ខុសពីជំនឿរបស់សាក្សីព្រះយេហូវ៉ា។ សូមចាំថាការស៊ូទ្រាំនឹងសេចក្ដីប្រឆាំងបៀតបៀនដោយសារបានកាន់តាមលោកយេស៊ូ និងព្រះយេហូវ៉ានោះនឹងនាំឲ្យមានអំណរដ៏លើសលប់។ (កិច្ច. ៥:២៧-២៩, ៤០, ៤១) សូមប្រាប់សិស្សថ្មីៗឲ្យដឹងថា ព្រះយេហូវ៉ាដែលប្រកបទៅដោយសេចក្ដីស្រឡាញ់ទ្រង់នឹងគាំទ្រពួកគេ។ (ទំនុក. ២៧:១០; ម៉ាក. ១០:២៩, ៣០) ពេលពួកគេរក្សាចិត្តស្មោះភក្ដីចំពោះព្រះ បង្ហាញថាពួកគេនៅខាងព្រះយេហូវ៉ាដែលជាព្រះខ្ពស់បំផុតលើសកលលោកទាំងមូល។—សុ. ២៧:១១
៣ របៀបដែលចំណេះពិតអាចជួយយើង : ចូរជួយសិស្សគម្ពីរឲ្យចាំជាប់ក្នុងចិត្ត នូវសារៈសំខាន់នៃការបន្តក្រេបជញ្ជក់យកចំណេះពិត ទោះបីជាពួកគេកំពុងតែជួបប្រទះនឹងបញ្ហាណាខ្លះក៏ដោយ។ តាមរយៈការប្រឆាំង អារក្សសាតាំងព្យាយាមបង្ការមិនឲ្យអ្វីដែលពួកគេរៀនចាក់ឫសក្នុងចិត្តបានឡើយ។ (សុ. ៤:២៣; លូ. ៨:១៣) ពួកគេត្រូវតែបន្តក្រេបជញ្ជក់យកចំណេះពិតពីបណ្ដាំរបស់ព្រះ ដើម្បីឲ្យបានចាក់ឫសជាប់ក្នុងជំនឿ ឬមានជំនឿមាំមួន។—ទំនុក. ១:២, ៣; កូល. ២:៦, ៧
៤ ត្រូវការការស៊ូទ្រាំ : កាលៈទេសៈខ្លះគឺពិបាកណាស់ ប៉ុន្តែជាការចាំបាច់ឲ្យយើងចេះស៊ូទ្រាំ ពីព្រោះនេះអាចនាំមកនូវលទ្ធផលដ៏ប្រសើរ។ (លូ. ២១:១៦-១៩) ពេលអ្នកថ្មីចេះស៊ូទ្រាំនឹងការប្រឆាំង ខ្លួនគេផ្ទាល់និងអ្នកឯទៀត ក៏បានទទួលប្រយោជន៍ពីការស៊ូទ្រាំនោះដែរ។ ពួកគេនឹងទទួលពិសោធន៍ថា ព្រះយេហូវ៉ាមានសមត្ថភាពផ្ដល់ពរដ៏លើសលប់ដល់អស់អ្នកដែលស៊ូទ្រាំដោយចិត្តស្មោះត្រង់។—យ៉ា. ១:១២
៥ សាវ័កប៉ុលមានអំណរ ដោយបានឃើញជំនឿរបស់បងប្អូននៅទីក្រុងថែស្សាឡូនីចមានការរីកចម្រើនកាន់តែច្រើនឡើង។ គាត់អរគុណដល់ព្រះសម្រាប់ពួកគេ ដែលគាត់បានជួយពួកគេជាច្រើននាក់ឲ្យចូលក្នុងសេចក្ដីពិត។ (២ថែ. ១:៣-៥) យើងក៏អាចពិសោធន៍នូវអំណរ និងចិត្តស្កប់ផងដែរ ប្រសិនបើយើងជួយសិស្សគម្ពីរឲ្យចេះត្រៀមខ្លួន និងចេះស៊ូទ្រាំពេលប្រឈមមុខនឹងការប្រឆាំង។