សំបុត្រពីគណៈអភិបាល
ជូនចំពោះបងប្អូនសាក្សីព្រះយេហូវ៉ាជាទីស្រឡាញ:
យើងពិតជាមនុស្សដែលមានឯកសិទ្ធិប្រសើរមែន ដោយសារអាចធ្វើជាតំណាងនាមព្រះយេហូវ៉ាដែលជាមហាក្សត្រសកលលោក! នាមនោះគឺនៅជាប់ជានិច្ច មិនអាចរលត់សាបសូន្យ ហើយមិនអាចប្រៀបផ្ទឹមបានឡើយ។ ព្រះយេហូវ៉ាបានឲ្យយើងធ្វើជាតំណាងនាមលោក ហើយជាពិសេសតាំងពីឆ្នាំ១៩៣១ យើងបានត្រូវហៅតាមនាមដ៏វិសេសវិសាលនោះ។ (អេ. ៤៣:១០) យើងមានមោទនភាពក្នុងការបញ្ជាក់ថាយើងជាសាក្សីព្រះយេហូវ៉ា។
មេកំណាចខំព្យាយាមឥតឈប់ឈរដើម្បីបំបាត់នាមរបស់ព្រះ។ ក្រោមការគ្រប់គ្រងរបស់វា សាសន៍ទាំងឡាយបដិសេធនាមរបស់ព្រះយេហូវ៉ា។ បាប៊ីឡូនដ៏ខ្លាំងក្លាដែលជាសាសនាមិនពិតទូទៅ ស្អប់នាមរបស់ព្រះ ហើយក៏បានដកនាមនោះចេញពីសេចក្ដីបកប្រែគម្ពីរជាច្រើន។ ផ្ទុយទៅវិញ លោកយេស៊ូបានលើកតម្កើងនាមរបស់បិតាលោក ហើយទុកនាមនោះជាអ្វីសំខាន់បំផុតក្នុងសេចក្ដីអធិដ្ឋានជាគំរូ ដែលលោកបានបង្រៀនដល់ពួកអ្នកកាន់តាមរបស់លោក។ លោកបានមានប្រសាសន៍ថា៖ «ដូច្នេះ អ្នករាល់គ្នាត្រូវអធិដ្ឋានតាមរបៀបនេះវិញ៖ ‹ឱបិតារបស់យើងដែលនៅស្ថានសួគ៌ សូមឲ្យនាមរបស់លោកបានបរិសុទ្ធ›»។ (ម៉ាថ. ៦:៩) នៅគ្រាមួយផ្សេងទៀត លោកបានអធិដ្ឋានអស់ពីចិត្តទៅបិតាលោកថា៖ «ខ្ញុំបានសម្ដែងនាមរបស់លោកឲ្យពួកបុរសដែលលោកបានយកចេញពីពិភពលោករួចប្រគល់ឲ្យខ្ញុំ»។ (យ៉ូន. ១៧:៦) ដោយសារយើងចង់យកតម្រាប់តាមលោកយេស៊ូ យើងមានចិត្តប្ដេជ្ញាជាងមុនៗទៅទៀតដើម្បីខ្នះខ្នែងប្រកាសនាមរបស់ព្រះយេហូវ៉ាពេញពិភពលោក។
បទគម្ពីរប្រចាំឆ្នាំ២០០៩ ចូរ«ធ្វើជាសាក្សីបញ្ជាក់យ៉ាងសព្វគ្រប់ពីដំណឹងល្អ»បានជំរុញចិត្តយើងឲ្យបំពេញកិច្ចបម្រើផ្សាយរបស់យើងឲ្យបានសព្វគ្រប់។ (សកម្ម. ២០:២៤) ព្រះយេហូវ៉ាប្រាកដជាបានឲ្យពរយើងយ៉ាងវិសេសក្នុងអំឡុងឆ្នាំកិច្ចបម្រើកន្លងទៅនេះ។ ឆ្នាំមុននេះយើងបានផ្សព្វផ្សាយយ៉ាងច្រើនទូទាំងពិភពលោក ដើម្បីសរសើរសិរីរុងរឿង ហើយផ្ដល់កិត្ដិយសដល់នាមរបស់ព្រះយេហូវ៉ា។ ចំនួនអ្នកផ្សាយបានឡើងដល់កំពូលថ្មី គឺ៧.៣១៣.១៧៣នាក់បានចូលរួមផ្សព្វផ្សាយ និងបង្រៀនដល់មនុស្សទាំងឡាយដែលមានចិត្តស្មោះត្រង់ដែលរកដំណោះស្រាយចំពោះបញ្ហាជាច្រើនដែលគេប្រឈមមុខរៀងរាល់ថ្ងៃ។ ចំនួនអ្នកដែលបានមកចូលរួមពិធីរំលឹកមរណភាពរបស់គ្រិស្តគឺមាន១៨.១៦៨.៣២៣នាក់ ហើយនេះបង្ហាញថានៅមានរាប់លាននាក់ទៀតដែលប្រហែលជានឹងហៅរកនាមរបស់ព្រះយេហូវ៉ាមុនទីបញ្ចប់នៃរបៀបរបបពិភពលោកនេះមកដល់។
ដរាបណាដែលព្រះយេហូវ៉ាអនុញ្ញាតឲ្យផ្សព្វផ្សាយ នោះយើងនឹងបន្តខ្នះខ្នែងផ្សព្វផ្សាយដំណឹងល្អ ដោយប្រើគ្រប់មធ្យោបាយ ដើម្បីផ្សាយដល់មនុស្សក្នុងតំបន់ផ្សាយរបស់យើង។ (ម៉ាថ. ២៤:១៤; ម៉ាក. ១៣:១០) មិនថាពីផ្ទះមួយទៅផ្ទះមួយ តាមផ្លូវ តាមរយៈសំបុត្រ តាមទូរស័ព្ទ ឬក្រៅផ្លូវការក៏ដោយ សូមឲ្យយើងខំព្យាយាមធ្វើឲ្យនាមរបស់ព្រះយេហូវ៉ានិងបំណងប្រាថ្នារបស់លោកបានល្បីដល់មនុស្សជាច្រើន។
យើងមានហេតុល្អឲ្យជឿថាព្រះយេហូវ៉ានឹងចាត់វិធានការបន្ដិចទៀតដើម្បីញែកនាមរបស់លោកជាបរិសុទ្ធ។ (អេស. ៣៦:២៣) គ្រាដែលត្រូវបំផ្លាញចោលមនុស្សដែលបង្អាប់នាមព្រះ កំពុងឆ្ពោះមកកាន់តែលឿន។ ថ្ងៃនោះ នឹងទៅជាថ្ងៃដ៏អស្ចារ្យណាស់! ចំពោះអស់អ្នកដែលបម្រើព្រះយេហូវ៉ាយ៉ាងស្មោះភក្ដី ហើយធ្វើឲ្យនាមរបស់លោកបានឮសុសសាយ និងបានគាំទ្រលោកដែលមានសិទ្ធិគ្រប់គ្រងសកលលោកទាំងមូល!
យើងឃើញជាក់ស្តែងនូវសេចក្ដីស្រឡាញ់របស់ព្រះយេហូវ៉ាចំពោះរាស្ត្ររបស់លោកនៅឯមហាសន្និបាតប្រចាំតំបន់និងមហាសន្និបាតអន្តរជាតិដែលមានប្រធានថា«ចូរចាំយាម!»នៅឆ្នាំ២០០៩។ មហាសន្និបាតប្រចាំតំបន់ទាំងនោះពិតជាព្រឹត្ដិការណ៍ដ៏សំខាន់ក្នុងប្រវត្ដិសាស្ត្រនៃរាស្ត្ររបស់ព្រះ ដែលជំរុញចិត្តយើងឲ្យចាំយាមសម្រាប់ថ្ងៃនៃព្រះយេហូវ៉ា។—ម៉ាក. ១៣:៣៧; ១ថែ. ៥:១, ២, ៤
ព្រះយេហូវ៉ាពិតជាធ្វើល្អចំពោះយើងណាស់។ លោកធ្វើឲ្យយើងមានចិត្តអរសប្បាយ។ លោកឲ្យយើងដេកសម្រាកនៅទីមានស្មៅខៀវខ្ចី ហើយនាំយើងទៅក្បែរមាត់ទឹកដែលហូរគ្រឿនៗ។—ទំនុក. ២៣:១, ២; ១០០:២, ៥
អ្នកអាចជឿជាក់ថាព្រះយេហូវ៉ានឹងឲ្យពរអ្នកជានិច្ច កាលដែលអ្នកជាប់រវល់ក្នុងការបម្រើលោកក្នុងឆ្នាំ២០១០នេះ។
យើងសូមផ្ញើសេចក្ដីស្រឡាញ់យ៉ាងកក់ក្ដៅនិងសេចក្ដីរាប់អាន ជូនចំពោះបងប្អូនទូទាំងពិភពលោក។
ពីបងប្អូនរបស់អ្នក
Governing Body of Jehovah’s Witnesses
(គណៈអភិបាលនៃសាក្សីព្រះយេហូវ៉ា)