ចូរមានទំនុកចិត្តពេលផ្សាយ នៅតំបន់ធ្វើពាណិជ្ជកម្ម
១. ហេតុអ្វីយើងមិនគួរអស់សង្ឃឹមបើយើងខ្លាចផ្សព្វផ្សាយនៅតំបន់ធ្វើពាណិជ្ជកម្មនោះ?
១ តើអ្នកខ្លាចផ្សព្វផ្សាយនៅតំបន់ធ្វើពាណិជ្ជកម្មឬទេ? បើអ្នកខ្លាចមែន កុំអស់សង្ឃឹមឡើយ ព្រោះសូម្បីតែប៉ូលដែលមានចិត្តក្លាហានហើយមិនភ័យខ្លាចក្នុងការផ្សាយក៏ត្រូវ«តាំងចិត្តក្លាហាន»ដើម្បីផ្សព្វផ្សាយដែរ។ (១ថែ. ២:២) នៅខាងក្រោមនេះរៀបរាប់អំពីការពិបាកខ្លះៗដែលអ្នកផ្សាយមានជាធម្មតា ព្រមទាំងយោបល់ដែលអាចជួយយើងឲ្យយកឈ្នះលើការពិបាកទាំងនោះ។
២. ហេតុអ្វីយើងមិនគួរព្រួយបារម្ភអំពីការរំខានដល់បុគ្គលិក?
២ តើការនិយាយជាមួយបុគ្គលិកជាការរំខានឬទេ? នៅក្នុងហាងជាច្រើន បុគ្គលិករង់ចាំទទួលស្វាគមន៍អស់អ្នកដែលមកកន្លែងពួកគេ ហេតុនេះហើយពួកគេដឹងថានឹងមានមនុស្សមកជួបពួកគេដែលនាំឲ្យពួកគេផ្អាកកិច្ចការរបស់ខ្លួន។ ជារឿយៗពួកគេបង្ហាញការគួរសម ដោយសារពួកគេគិតថា អ្នកប្រហែលជាទិញអីវ៉ាន់ឬត្រូវការសេវារបស់ពួកគេ។ បើអ្នកស្លៀកពាក់តាមរបៀបដ៏ថ្លៃថ្នូរ ហើយបង្ហាញអារម្មណ៍កក់ក្ដៅនិងរាក់ទាក់ នោះអ្នកនឹងធ្វើឲ្យពួកគេគោរពអ្នក។
៣. តើយើងអាចជៀសវាងពីការរំខានភ្ញៀវឯទៀតយ៉ាងដូចម្ដេច?
៣ តើខ្ញុំត្រូវផ្សាយនៅពេលមានភ្ញៀវច្រើនឬទេ? ជាការល្អ សូមចេះជ្រើសរើសពេលដែលហាងទាំងនោះមិនសូវមមាញឹកខ្លាំង ជាឧទាហរណ៍ដូចជាពេលចាប់ផ្ដើមបើកហាង។ មុនយើងទៅនិយាយជាមួយម្ចាស់ហាងឬអ្នកលក់ សូមរង់ចាំរហូតដល់គាត់មិនជាប់ភ្ញៀវ។ សូមនិយាយពាក្យផ្សាយរបស់អ្នកយ៉ាងខ្លី។
៤. ពេលផ្សព្វផ្សាយនៅតំបន់ធ្វើពាណិជ្ជកម្ម តើយើងប្រហែលជាអាចនិយាយអ្វីខ្លះ?
៤ តើខ្ញុំគួរនិយាយអ្វីខ្លះ? បើឃើញមានបុគ្គលិកច្រើន សូមនិយាយជាមួយអ្នកទទួលខុសត្រូវ។ អ្នកអាចនិយាយថា៖ «ដើម្បីជួបអ្នកជំនួញនៅផ្ទះជាការពិបាកណាស់ នេះជាមូលហេតុដែលយើងមកលេងលោកអ្នកនៅកន្លែងធ្វើការ។ ខ្ញុំដឹងថា លោកអ្នកកំពុងធ្វើការ ដូច្នេះខ្ញុំសូមនិយាយយ៉ាងខ្លី»។ ដើម្បីកុំឲ្យគេយល់ច្រឡំថាយើងជាអ្នកលក់ដូរ នោះជាការល្អបំផុត បើយើងមិនបញ្ជាក់អំពីការធ្វើវិភាគទាន លើកលែងតែពួកគេសួរថា តើកិច្ចការរបស់យើងបានត្រូវទទួលការឧបត្ថម្ភតាមរបៀបណា? អាស្រ័យទៅលើមុខជំនួញរបស់ពួកគេ អ្នកអាចស្នើសុំការអនុញ្ញាតពីអ្នកគ្រប់គ្រងដើម្បីនិយាយយ៉ាងសង្ខេបជាមួយនឹងពួកបុគ្គលិក។ សូមនិយាយពាក្យផ្សាយរបស់អ្នកម្ដងទៀតដល់បុគ្គលិក។ បើយើងឃើញបុគ្គលិកដូចជារវល់ សូមនិយាយពាក្យផ្សាយឲ្យកាន់តែខ្លី ហើយជូនខិត្តប័ណ្ណមួយដល់គាត់។ បើយើងមិនអាចនិយាយជាមួយពួកបុគ្គលិកបានទេ ប្រហែលជាយើងនឹងទទួលការអនុញ្ញាតឲ្យទុកសៀវភៅនៅបន្ទប់ដែលពួកគេឈប់សម្រាក ឬកន្លែងផ្សេងទៀតដែលពួកគេអាចមើលឃើញ។
៥. តើមានមូលហេតុអ្វីខ្លះដែលជួយយើងឲ្យមានទំនុកចិត្តពេលផ្សព្វផ្សាយនៅតំបន់ធ្វើពាណិជ្ជកម្ម?
៥ លោកយេស៊ូ និងប៉ូលបានមានទំនុកចិត្តពេលផ្សព្វផ្សាយដល់មនុស្សនៅតំបន់ធ្វើពាណិជ្ជកម្ម ហើយអ្នកក៏អាចធ្វើដូច្នេះដែរ។ (ម៉ាថ. ៤:១៨-២១, ៩:៩; សកម្ម. ១៧:១៧) សូមអធិដ្ឋានសុំព្រះយេហូវ៉ាជួយអ្នកឲ្យមានចិត្តស្ងប់ និងមានចិត្តក្លាហាន។ (សកម្ម. ៤:២៩) នៅតំបន់ធ្វើពាណិជ្ជកម្មកម្រគ្មានមនុស្សនៅណាស់ ដូច្នេះសូមឲ្យយើងប្រើវិធីដ៏មានប្រសិទ្ធភាពនេះដើម្បីព្យាយាមផ្សព្វផ្សាយដល់មនុស្សឯទៀត។