ចូរមានអំណរនៅរដូវពិធីរំលឹក!
១. នៅរដូវពិធីរំលឹក តើយើងអាចបង្កើនអំណររបស់ខ្លួនដោយធ្វើអ្វី?
១ តើអ្នកចង់បង្កើនអំណរក្នុងអំឡុងខែមីនា មេសានិងឧសភាទេ? វិធីមួយ គឺដោយបង្កើនកិច្ចផ្សព្វផ្សាយខ្លួន ហើយបើអាចធ្វើទៅបាន សូមធ្វើជាអ្នកត្រួសត្រាយជំនួយ។ ហេតុអ្វីការធ្វើដូច្នេះនឹងធ្វើឲ្យអ្នកមានអំណរថែមទៀត?
២. ហេតុអ្វីការបង្កើនកិច្ចបម្រើផ្សាយនាំឲ្យយើងមានអំណរខ្លាំងឡើង?
២ បង្កើនអំណររបស់អ្នក: របៀបព្រះយេហូវ៉ាបានបង្កើតយើង គឺយើងអាចមានអំណរនិងការស្កប់ចិត្តបាន លុះត្រាតែយើងគោរពប្រណិប័តន៍លោកនិងបំពេញសេចក្ដីស្រេកឃ្លានដែលមានតាំងពីកំណើតចំពោះការណែនាំពីព្រះ។ (ម៉ាថ. ៥:៣) តាមរបៀបនោះ លោកក៏បានបង្កើតយើងឲ្យមានសុភមង្គលដែលមកពីការឲ្យដល់អ្នកឯទៀតដែរ។ (សកម្ម. ២០:៣៥) កិច្ចបម្រើផ្សាយផ្ដល់ឱកាសឲ្យយើងធ្វើអ្វីទាំងពីរនេះ ពោលគឺគោរពប្រណិប័តន៍ព្រះនិងជួយអ្នកឯទៀត។ ដូច្នេះសមហេតុផលមែន ដែលការបង្កើនកិច្ចផ្សព្វផ្សាយនាំឲ្យមានអំណរច្រើនឡើង។ បន្ថែមទៅទៀត ពេលយើងផ្សព្វផ្សាយកាន់តែច្រើន យើងអាចមានភាពប៉ិនប្រសប់កាន់តែច្រើនដែរ។ កាលដែលយើងកាន់តែប៉ិនប្រសប់ យើងនឹងមានទំនុកចិត្តកាន់តែខ្លាំង ហើយការភ័យខ្លាចនឹងមានកាន់តែតិច។ យើងនឹងមានឱកាសថែមទៀតដើម្បីផ្សព្វផ្សាយនិងចាប់ផ្ដើមបង្រៀនគម្ពីរ។ អ្វីៗទាំងនេះធ្វើឲ្យយើងមានអំណរថែមទៀតក្នុងកិច្ចបម្រើផ្សាយ។
៣. ជាពិសេស ហេតុអ្វីខែមីនានិងមេសាជាខែល្អដើម្បីធ្វើជាអ្នកត្រួសត្រាយជំនួយ?
៣ ជាពិសេស ខែមីនានិងមេសាជាខែល្អសម្រាប់ត្រួសត្រាយជំនួយ ព្រោះយើងអាចជ្រើសយក៣០ម៉ោងឬ៥០ម៉ោងបាន។ បន្ថែមទៀត ចាប់ពីថ្ងៃសៅរ៍ទី២២ ខែមីនា រហូតដល់ពិធីរំលឹកនៅថ្ងៃច័ន្ទ ទី១៤ ខែមេសា យើងអាចរីករាយក្នុងការអញ្ជើញអ្នកឯទៀតឲ្យចូលរួមពិធីរំលឹក។ បងប្អូនក្នុងក្រុមជំនុំនឹងមានចិត្តរំភើបយ៉ាងខ្លាំង ពេលដែលពួកគាត់«ព្រមចិត្តគ្នា»ចែកលិខិតអញ្ជើញក្នុងតំបន់ផ្សាយឲ្យបានច្រើនបំផុតក្នុងរយៈពេលកំណត់នោះ។—សេផ. ៣:៩
៤. បើអ្នកចង់ធ្វើជាអ្នកត្រួសត្រាយជំនួយ តើអ្នកគួរធ្វើអ្វីខ្លះ?
៤ រៀបចំពីឥឡូវ: បើអ្នកមិនទាន់រៀបចំទេ សូមឆ្លៀតឱកាសនេះពិនិត្យមើលឡើងវិញនូវកាលវិភាគរបស់អ្នក និងមើលថាអ្នកអាចកែសម្រួលអ្វីខ្លះដើម្បីបង្កើនកិច្ចបម្រើផ្សាយរបស់អ្នកក្នុងមួយខែឬច្រើនខែ។ សូមអធិដ្ឋានជម្រាបព្រះអំពីរឿងនេះ។ (យ៉ា. ១:៥) សូមនិយាយរឿងនេះជាមួយក្រុមគ្រួសារនិងបងប្អូនឯទៀតក្នុងក្រុមជំនុំ។ (សុភ. ១៥:២២) បើអ្នកធ្វើដូច្នោះ អ្នកប្រហែលជាយល់ឃើញថា អ្នកអាចរីករាយធ្វើជាអ្នកត្រួសត្រាយជំនួយបាន ទោះជាមានបញ្ហាសុខភាពឬមានកិច្ចការមមាញឹកក្ដី។
៥. បើយើងបង្កើនកិច្ចបម្រើផ្សាយរបស់យើងនៅរដូវពិធីរំលឹកនេះ តើនឹងមានលទ្ធផលអ្វី?
៥ ព្រះយេហូវ៉ាចង់ឲ្យអ្នកបម្រើរបស់លោកមានចិត្តសប្បាយ។ (ទំនុក. ៣២:១១) ដោយខំប្រឹងព្យាយាមបង្កើនកិច្ចបម្រើផ្សាយរបស់យើងក្នុងរដូវពិធីរំលឹកនេះ នោះមិនគ្រាន់តែនឹងជួយយើងឲ្យមានអំណរថែមទៀតប៉ុណ្ណោះទេ តែនឹងនាំឲ្យបិតារបស់យើងនៅស្ថានសួគ៌មានអំណរដែរ។—សុភ. ២៣:២៤; ២៧:១១