កសារយោងសម្រាប់«កិច្ចបម្រើនិងជីវិត កំណត់សម្រាប់កិច្ចប្រជុំ»

ឯកសារយោងសម្រាប់កិច្ចបម្រើនិងជីវិត កំណត់សម្រាប់កិច្ចប្រជុំ

ថ្ងៃទី៤-១០ ខែវិច្ឆិកា

ចំណេះវិសេសពីបណ្ដាំរបស់ព្រះចម្រៀងសរសើរព្រះ ១០៥

«លោកចងចាំកិច្ចព្រមព្រៀងរបស់លោកជាដរាប»

it-2-E ទំ.១២០១ វ.២

ប្រសាសន៍

អ្វីដែលព្រះបានបង្កើតរួមមានអ្វីដែលមានជីវិតនិងអ្វីគ្មានជីវិត នៅក្រោមការបង្គាប់របស់លោក ហើយលោកអាចប្រើអ្វីៗទាំងនេះដើម្បីសម្រេចគោលបំណងរបស់លោក។ (ចសព. ១០៣:២០; ១៤៨:៨) ប្រសាសន៍របស់ព្រះគឺគួរឲ្យទុកចិត្ត ហើយលោកតែងតែចងចាំអ្វីដែលលោកបានសន្យា។ (បច. ៩:៥; ចសព. ១០៥:៤២-៤៥) ព្រះបានមានប្រសាសន៍ថាបណ្ដាំរបស់លោក«ស្ថិតស្ថេរជាដរាប» ហើយនឹងមិនវិលត្រឡប់មកលោកវិញដោយគ្មានលទ្ធផលនោះទេ។—អេ. ៤០:៨; ៥៥:១០, ១១; ១ពេ. ១:២៥

ចូរខំស្វែងរកចំណេះវិសេសពីបណ្ដាំរបស់ព្រះ

w៨៦-E ១/១១ ទំ.១៩ វ.១៥

ប្អូនៗវ័យក្មេង ប្អូនមានចំណែកក្នុងការធ្វើឲ្យក្រុមគ្រួសារមានសុភមង្គលនិងសាមគ្គីភាព

^១៥ «គេដាក់ខ្នោះជើងគាត់[យ៉ូសែប] ក៏យកខ្នោះដែកដាក់ក រហូតដល់ពាក្យរបស់លោកក្លាយជាការពិត។ ប្រសាសន៍របស់ព្រះយេហូវ៉ាបានធ្វើឲ្យគាត់ស្អាតបរិសុទ្ធ»។ (ចម្រៀងសរសើរព្រះ ១០៥:១៧-១៩) អស់រយៈពេល១៣ឆ្នាំ យ៉ូសែបបានរងទុក្ខជាខ្ញុំបម្រើនិងជាអ្នកទោស រហូតដល់សេចក្ដីសន្យារបស់ព្រះបានសម្រេច។ តាមរយៈបទពិសោធន៍នេះព្រះយេហូវ៉ាបានធ្វើឲ្យគាត់ទៅជាស្អាតបរិសុទ្ធ។ ព្រះយេហូវ៉ាមិនមែនជាដើមហេតុដែលធ្វើឲ្យគាត់រងទុក្ខវេទនាទេ តែលោកអនុញ្ញាតឲ្យរឿងនោះកើតឡើងដើម្បីសម្រេចគោលបំណងរបស់លោក។ តើយ៉ូសែបនៅតែអាចរក្សាសេចក្ដីសង្ឃឹមរបស់គាត់ទៅលើ«ប្រសាសន៍របស់ព្រះយេហូវ៉ា» ទោះជាគាត់ជួបទុក្ខលំបាកឬទេ? តើគាត់នឹងបង្ហាញថាគាត់មានគុណសម្បត្តិគ្រប់លក្ខណៈ ហើយបណ្ដុះឲ្យមានចិត្តអត់ធ្មត់ ចិត្តរាបទាប មានចំណងមិត្តភាពជាមួយព្រះ ហើយតាំងចិត្តបំពេញភារកិច្ចដ៏ពិបាករបស់គាត់ឬទេ? មែនហើយ ក្រោយពីជួបទុក្ខលំបាក យ៉ូសែបកាន់តែបរិសុទ្ធនិងមានតម្លៃចំពោះព្រះប្រៀបដូចជាមាសដែលបានត្រូវសម្រាំងដោយភ្លើង ជាលទ្ធផលព្រះបានផ្ដល់ភារកិច្ចដ៏អស្ចារ្យដល់គាត់។—ដើមកំណើត ៤១:១៤, ៣៨-៤១, ៤៦; ៤២:៦, ៩

ថ្ងៃទី១៨-២៤ ខែវិច្ឆិកា

ចំណេះវិសេសពីបណ្ដាំរបស់ព្រះចម្រៀងសរសើរព្រះ ១០៧-១០៨

«ចូរថ្លែងអំណរគុណដល់ព្រះយេហូវ៉ា ព្រោះលោកល្អ»

ចូរខំស្វែងរកចំណេះវិសេសពីបណ្ដាំរបស់ព្រះ

it-2-E ទំ.៤២០ វ.៤

ម៉ូអាប់

ក្រោយមក ពេលដាវីឌគ្រប់គ្រងជាស្ដេច ក៏នៅតែមានសង្គ្រាមរវាងអ៊ីស្រាអែលនិងម៉ូអាប់ដែរ។ ដាវីឌបានបង្ក្រាបនិងត្រួតត្រាទៅលើជនជាតិម៉ូអាប់ ហើយពួកគេត្រូវបង់សួយអាករជូនដាវីឌ។ ក្នុងចម្បាំងនោះ២ភាគ៣នៃកងទ័ពរបស់ជនជាតិម៉ូអាប់បានត្រូវសម្លាប់។ តាមមើលទៅដាវីឌបានសម្លាប់ពួកគេដោយឲ្យដេកតម្រៀបគ្នាលើដី រួចយកខ្សែទៅវាស់២ភាគ៣រួចសម្លាប់ពួកគេចោល ហើយទុកឲ្យរស់តែ១ភាគ៣ប៉ុណ្ណោះ។ (២សាំ. ៨:២, ១១, ១២; ១ប្រ. ១៨:២, ១១) ប្រហែលជានៅក្នុងចម្បាំងនោះ បេនណាយ៉ាដែលជាកូនប្រុសរបស់យេហូយ៉ាដា«បានសម្លាប់កូនពីរនាក់របស់អេរៀលជាជនជាតិម៉ូអាប់»។ (២សាំ. ២៣:២០; ១ប្រ. ១១:២២) ជ័យជំនះរបស់ដាវីឌទៅលើជនជាតិម៉ូអាប់បានសម្រេចទំនាយរបស់បាឡាម ដែលបានទាយទុកជាង៤០០ឆ្នាំមុនថា៖ «នឹងមានផ្កាយមួយចេញពីយ៉ាកុប នឹងមានដំបងរាជ្យលេចចេញពីអ៊ីស្រាអែល គាត់នឹងបំបែកថ្ងាសរបស់ជនជាតិម៉ូអាប់ ព្រមទាំងលលាដ៍ក្បាលរបស់កូនចៅពួកអ្នកដែលបង្កការវឹកវរ»។ (ជប. ២៤:១៧) តាមមើលទៅអ្នកតែងចម្រៀងសរសើរព្រះប្រហែលជាចង់សំដៅទៅលើជ័យជំនះនៃចម្បាំងនេះពេលដែលគាត់និយាយថាម៉ូអាប់ជា«ចានក្លាំ»សម្រាប់ព្រះ។—ចសព. ៦០:៨; ១០៨:៩

ថ្ងៃទី២៥ ខែវិច្ឆិកា–ថ្ងៃទី១ ខែធ្នូ

ចំណេះវិសេសពីបណ្ដាំរបស់ព្រះ ចម្រៀងសរសើរព្រះ ១០៩-១១២

សូមគាំទ្រលោកយេស៊ូដែលជាស្ដេច!

be-E ទំ.៧៦ វ.២

ចូរព្យាយាមឲ្យមានការរីកចម្រើនទៅមុខ

ដើម្បីឲ្យអ្នកប្រើអំណោយដែលអ្នកមាន អ្នកត្រូវចាត់វិធានការធ្វើអ្វីមួយ។ តើអ្នកព្យាយាមរៀបចំគម្រោងដើម្បីផ្សព្វផ្សាយជាមួយអ្នកឯទៀតឬទេ? តើអ្នកខំរកឱកាសដើម្បីជួយបងប្អូនថ្មីក្នុងក្រុមជំនុំ ប្អូនៗវ័យក្មេង ឬបងប្អូនពិការឬទេ? តើអ្នកបានស្ម័គ្រចិត្តជួយសម្អាតសាលប្រជុំ ឬជួយកិច្ចការផ្សេងៗនៅមហាសន្និបាតនិងសន្និបាតឬទេ? តើអ្នកអាចចុះឈ្មោះធ្វើជាអ្នកត្រួសត្រាយជំនួយម្ដងម្កាលឬទេ? តើអ្នកអាចត្រួសត្រាយពេញពេល ឬជួយក្រុមជំនុំដែលមានសេចក្ដីត្រូវការច្រើនជាងឬទេ? បើអ្នកជាបងប្រុស តើអ្នកព្យាយាមឲ្យមានគុណសម្បត្តិគ្រប់គ្រាន់ដើម្បីក្លាយជាជំនួយការអ្នកចាស់ទុំ ឬក្លាយជាអ្នកចាស់ទុំឬទេ? ដោយសារអ្នកបានស្ម័គ្រចិត្តផ្ដល់ជំនួយនិងព្រមទទួលភារកិច្ចផ្សេងៗ នោះបញ្ជាក់ថាអ្នកកំពុងតែរីកចម្រើនទៅមុខ។—ចសព. ១១០:៣

ចូរខំស្វែងរកចំណេះវិសេសពីបណ្ដាំរបស់ព្រះ

it-1-E ទំ.៥២៤ វ.២

កិច្ចព្រមព្រៀង

កិច្ចព្រមព្រៀងឲ្យក្លាយជាសង្ឃដូចម៉េលគីសេដិក។ កិច្ចព្រមព្រៀងនេះបានបញ្ជាក់នៅចម្រៀងសរសើរព្រះ ១១០:៤ ហើយនៅសៀវភៅហេប្រឺ. ៧:១-៣, ១៥-១៧។ អ្នកសរសេរបានបញ្ជាក់ថា នោះគឺសំដៅទៅលើគ្រិស្ត។ នេះគឺជាកិច្ចព្រមព្រៀងដែលព្រះយេហូវ៉ាបានធ្វើជាមួយនឹងលោកយេស៊ូតែប៉ុណ្ណោះ។ លោកយេស៊ូក៏បានលើកឡើងអំពីកិច្ចព្រមព្រៀងនេះដែរនៅពេលដែលលោកធ្វើកិច្ចព្រមព្រៀងរាជាណាចក្រជាមួយអ្នកកាន់តាមលោក។ (លូក. ២២:២៩) យោងទៅតាមសេចក្ដីសន្យារបស់ព្រះយេហូវ៉ា លោកយេស៊ូគ្រិស្តដែលជាបុត្ររបស់លោកនឹងក្លាយទៅជាសម្ដេចសង្ឃតាមរបៀបដូចម៉េលគីសេដិក។ ម៉េលគីសេដិកគឺជាស្ដេច និងជាសង្ឃរបស់ព្រះនៅផែនដី។ លោកយេស៊ូនឹងធ្វើជាស្ដេចផង និងសម្ដេចសង្ឃផងនៅស្ថានសួគ៌ មិនមែននៅផែនដីទេ។ ក្រោយលោកយេស៊ូឡើងទៅស្ថានសួគ៌ លោកបានត្រូវតែងតាំងឲ្យកាន់តំណែងនេះជារៀងរហូត។ (ហេ. ៦:២០; ៧:២៦, ២៨; ៨:១) កិច្ចព្រមព្រៀងនេះនឹងមានសុពលភាពជាដរាប ដោយសារលោកយេស៊ូនឹងគ្រប់គ្រងជាស្ដេច និងជាសង្ឃក្រោមការដឹកនាំរបស់ព្រះយេហូវ៉ា។—ហេ. ៧:៣

ថ្ងៃទី២-៨ ខែធ្នូ

ចំណេះវិសេសពីបណ្ដាំរបស់ព្រះ ចម្រៀងសរសើរព្រះ ១១៣-១១៨

តើយើងនឹងយកអ្វីដើម្បីតបស្នងព្រះយេហូវ៉ា?

w០៩-E ១៥/៧ ទំ.២៩ វ.៤-៥

ទទួលដោយចិត្តដឹងគុណ ហើយឲ្យដោយអស់ពីចិត្ត

អ្នកតែងចម្រៀងសរសើរព្រះឆ្ងល់ថា៖ «តើខ្ញុំនឹងយកអ្វីដើម្បីតបស្នងព្រះយេហូវ៉ា ចំពោះអ្វីល្អទាំងអស់ដែលលោកបានធ្វើសម្រាប់ខ្ញុំ?»។ (ចសព. ១១៦:១២) តើគាត់បានទទួលអ្វី? ព្រះយេហូវ៉ាបានជួយគាត់ក្នុងអំឡុងពេលដែលគាត់«មានទុក្ខកង្វល់ ហើយព្រួយចិត្តខ្លាំង»។ បន្ថែមទៅទៀត ព្រះយេហូវ៉ា‹បានជួយសង្គ្រោះគាត់ឲ្យរួចពីស្លាប់›។ ឥឡូវគាត់ចង់«តបស្នង»ព្រះយេហូវ៉ាវិញ។ តើអ្នកតែងចម្រៀងសរសើរព្រះអាចធ្វើដូច្នេះតាមរបៀបណា? គាត់បាននិយាយថា៖ «ខ្ញុំនឹងធ្វើតាមសម្បថរបស់ខ្ញុំចំពោះព្រះយេហូវ៉ា»។ (ចសព. ១១៦:៣, ៤, ៨, ១០-១៤) គាត់តាំងចិត្តធ្វើតាមពាក្យសន្យារបស់គាត់ចំពោះព្រះយេហូវ៉ា និងធ្វើតាមអ្វីដែលព្រះតម្រូវពីគាត់។

អ្នកក៏អាចធ្វើដូច្នេះដែរ។ តើតាមរបៀបណា? ដោយមានរបៀបរស់នៅសមស្របតាមច្បាប់និងគោលការណ៍របស់ព្រះគ្រប់ពេលវេលា។ ដូច្នេះ សូមចាត់ទុកការគោរពប្រណិប័តន៍ព្រះយេហូវ៉ាថាជាអ្វីដែលសំខាន់បំផុតក្នុងជីវិតរបស់អ្នក ហើយអនុញ្ញាតឲ្យឫទ្ធានុភាពរបស់ព្រះបន្តដឹកនាំអ្នកក្នុងគ្រប់ការទាំងអស់ដែលអ្នកធ្វើ។ (អទ. ១២:១៣; កាឡ. ៥:១៦-១៨) តាមពិត អ្នកមិនអាចតបស្នងព្រះយេហូវ៉ាចំពោះអ្វីទាំងអស់ដែលលោកបានធ្វើសម្រាប់អ្នកនោះទេ។ ប៉ុន្តែ ពេលអ្នកខំប្រឹងបម្រើព្រះយេហូវ៉ាដោយអស់ពីចិត្ត នោះអ្នកនឹង‹ធ្វើឲ្យចិត្តលោកត្រេកអរ›។ (សុភ. ២៧:១១) ពិតជាឯកសិទ្ធិដ៏អស្ចារ្យមែនដែលយើងអាចតបស្នងព្រះយេហូវ៉ាតាមរបៀបនេះ!

ថ្ងៃទី៩-១៥ ខែធ្នូ

ចូរខំស្វែងរកចំណេះវិសេសពីបណ្ដាំរបស់ព្រះចម្រៀងសរសើរព្រះ ១១៩:១-៥៦

«តើមនុស្សវ័យក្មេងអាចរក្សាឲ្យមានជីវិតស្អាតស្អំយ៉ាងដូចម្ដេច?»

w៨៧-E ១/១១ ទំ.១៨ វ.១០

តើអ្នកមានរបៀបរស់នៅស្អាតស្អំក្នុងគ្រប់ទិដ្ឋភាពនៃជីវិតរបស់អ្នកឬទេ?

^១០ នៅអេភេសូរ ៥:៥ ប៉ូលបានព្រមានថា៖ «ព្រោះអ្នករាល់គ្នាដឹង ហើយក៏យល់ច្បាស់ថា អ្នកដែលប្រព្រឹត្តអំពើប្រាសចាកសីលធម៌ខាងផ្លូវភេទ មនុស្សស្មោកគ្រោក ឬអ្នកលោភលន់ដែលប្រៀបដូចជាមនុស្សគោរពបូជារូបព្រះ នឹងមិនបានទទួលមត៌កក្នុងរាជាណាចក្ររបស់គ្រិស្តនិងរបស់ព្រះឡើយ»។ ជារៀងរាល់ឆ្នាំ បងប្អូនរាប់ពាន់នាក់បានត្រូវប្រដៅតម្រង់ ឬបណ្ដាច់មិត្តភាពដោយសារតែអំពើប្រាសចាកសីលធម៌ខាងផ្លូវភេទ ដែលជាការ‹ធ្វើខុសចំពោះរូបកាយខ្លួន›។ (កូរិនថូសទី១ ៦:១៨) ភាគច្រើន បញ្ហានេះកើតមានឡើងដោយសារពួកគេមិន«បន្តយកចិត្តទុកដាក់ធ្វើតាមបណ្ដាំរបស់[ព្រះ]»។ (ចម្រៀងសរសើរព្រះ ១១៩:៩) ជាឧទាហរណ៍ ក្នុងអំឡុងពេលវិសមកាល បងប្រុសៗជាច្រើននាក់មិនសូវប្រុងប្រយ័ត្នខ្លួនពីអំពើប្រាសចាកសីលធម៌ខាងផ្លូវភេទទេ។ ដោយសារពួកគេមិនបានចូលរួមកិច្ចប្រជុំឬសេពគប់ជាមួយបងប្អូន នោះពួកគេសេពគប់ជាមួយនឹងមនុស្សដែលពួកគេជួបកាលដែលពួកគេកំពុងធ្វើដំណើរកម្សាន្ត។ ពួកគេវែកញែកថាមនុស្សទាំងនោះមើលទៅជា‹មនុស្សល្អណាស់› ដូច្នេះពួកគេខ្លះក៏ចូលរួមធ្វើអ្វីដែលមិនស្របតាមគោលការណ៍គម្ពីរដូចមនុស្សទាំងនោះដែរ។ អ្នកខ្លះទៀតប្រហែលជាជិតស្និទ្ធខ្លាំងពេកជាមួយនឹងអ្នករួមការងាររបស់ពួកគេ។ អ្នកចាស់ទុំម្នាក់ចាប់ផ្ដើមទាក់ទងស្ត្រីម្នាក់ដែលជាមិត្តរួមការងាររបស់គាត់ ក្រោយមកគាត់បានបោះបង់ចោលគ្រួសាររបស់គាត់ហើយទៅរស់នៅជាមួយនឹងនាង! ដូច្នេះគាត់បានត្រូវបណ្ដាច់មិត្តភាព។ អ្វីដែលបានចែងក្នុងគម្ពីរគឺពិតជាត្រឹមត្រូវដែលថា៖ «ការសេពគប់អាក្រក់បង្ខូចការប្រព្រឹត្តល្អ»!—កូរិនថូសទី១ ១៥:៣៣

ថ្ងៃទី២៣-២៩ ខែធ្នូ

ចំណេះវិសេសពីបណ្ដាំរបស់ព្រះ ចម្រៀងសរសើរព្រះ ១១៩:១២១-១៧៦

របៀបជៀសវាងពីការឈឺចាប់ដែលមិនចាំបាច់

w៩៣-E ១៥/៤ ទំ.១៧ វ.១២

ប្អូនៗយុវវ័យ តើប្អូនៗកំពុងស្វែងរកអ្វី?

^១២ សំខាន់ជាងគេបំផុត ប្អូនត្រូវចេះស្អប់ខ្ពើមអ្វីដែលអាក្រក់។ (ចម្រៀងសរសើរព្រះ ៩៧:១០) តើតាមរបៀបណាប្អូនអាចស្អប់អ្វីដែលមើលទៅសប្បាយ? គឺដោយគិតអំពីលទ្ធផល! គម្ពីរចែងថា៖ «កុំច្រឡំឡើយ បញ្ឆោតព្រះមិនបានទេ។ ព្រោះមនុស្សទទួលផលតាមតែអ្វីដែលគេសាបព្រោះ។ ពីព្រោះអ្នកណាដែលសាបព្រោះដោយគិតអំពីសេចក្ដីប៉ងប្រាថ្នានៃរូបកាយ អ្នកនោះនឹងទទួលផលជាសេចក្ដីហិនវិនាសពីរូបកាយ»។ (កាឡាទី ៦:៧, ៨) ពេលទទួលការល្បួងឲ្យធ្វើតាមបំណងប្រាថ្នាមិនត្រឹមត្រូវ សូមគិតអំពីអារម្មណ៍របស់ព្រះយេហូវ៉ា ថាលោកនឹងឈឺចិត្តខ្លាំងយ៉ាងណាបើប្អូនធ្វើដូច្នេះ។ (សូមពិនិត្យបន្ថែម ចម្រៀងសរសើរព្រះ ៧៨:៤១) សូមគិតអំពីលទ្ធផលដែលមកពីការប្រព្រឹត្តអំពើប្រាសចាកសីលធម៌ ដែលអាចនាំឲ្យមានផ្ទៃពោះដោយមិនចង់បាន ឬមានជំងឺកាមរោគដូចជាជំងឺអេដស៍ជាដើម។ សូមពិចារណាថាប្អូនប្រហែលជានឹងឈឺចាប់ខ្លាំងយ៉ាងណានៅពេលក្រោយមក ហើយនេះនឹងនាំឲ្យប្អូនលែងឲ្យតម្លៃខ្លួន។ ប្អូនក៏នឹងប្រហែលជាទទួលលទ្ធផលអាក្រក់យ៉ាងយូរដែរ។ ជាឧទាហរណ៍ បងស្រីដែលជាគ្រិស្តសាសនិកម្នាក់បានសារភាពថា៖ «មុនប្ដីខ្ញុំនិងខ្ញុំជួបគ្នា យើងធ្លាប់រួមភេទជាមួយនឹងអ្នកឯទៀត។ ទោះជាឥឡូវយើងទាំងពីរនាក់ជាគ្រិស្តសាសនិកហើយក្ដី តែអ្វីដែលយើងធ្លាប់ធ្វើពីមុននៅតែមានឥទ្ធិពលអាក្រក់មកលើយើង ដូចជានាំឲ្យមានជម្លោះ និងមានការច្រណែនក្នុងចំណងអាពាហ៍ពិពាហ៍»។ បន្ថែមទៅទៀត សូមគិតអំពីគុណវិបត្តិមួយទៀតដែលជាការបាត់បង់ឯកសិទ្ធិក្នុងកិច្ចបម្រើរបស់ព្រះ ឬត្រូវបណ្ដាច់មិត្តភាពហើយឃ្លាតឆ្ងាយពីក្រុមជំនុំ! (កូរិនថូសទី១ ៥:៩-១៣) តើសមឲ្យយើងលះបង់អ្វីៗជាច្រើនដើម្បីគ្រាន់តែសប្បាយមួយរយៈពេលខ្លីឬទេ?