១. តើព្រះជាអ្នកបណ្ដាលឲ្យយើងមានទុក្ខវេទនាឬ?
ហេតុអ្វីសំណួរនេះគឺសំខាន់?
មនុស្សជាច្រើនបដិសេធព្រះ ដោយសារពួកគេគិតថាលោកជាអ្នកដែលបណ្ដាលឲ្យមានទុក្ខវេទនា។
សូមគិតពិចារណា
សាសនាជាច្រើនបានបង្រៀនថា ព្រះជាអ្នកបណ្ដាលឲ្យយើងរងទុក្ខ។ ជាឧទាហរណ៍ សាសនាខ្លះថា៖
គ្រោះមហន្តរាយធម្មជាតិជាការដាក់ទោសពីព្រះ។
កូនក្មេងស្លាប់ ដោយសារព្រះចង់បានទេវតាថែមទៀតនៅស្ថានសួគ៌។
មានទុក្ខវេទនាជាច្រើនដោយសារតែព្រះចូលរួមធ្វើសង្គ្រាម។
ប៉ុន្តែ តើអាចទៅរួចទេ បើអ្វីដែលអ្នកដឹកនាំសាសនាកំពុងបង្រៀនអំពីព្រះគឺខុស? តើព្រះទទួលយកការគោរពប្រណិប័តន៍របស់ពួកគេឬទេ?
សូមរៀនថែមទៀត
សូមទស្សនាវីដេអូ ហេតុអ្វីគួររៀនគម្ពីរ? តាមរយៈគេហទំព័រjw.org/km។
អ្វីដែលគម្ពីរចែង
ព្រះមិនមែនជាដើមហេតុដែលបណ្ដាលឲ្យយើងមានទុក្ខវេទនានោះទេ។
បើលោកធ្វើដូច្នេះ គឺផ្ទុយពីគុណសម្បត្តិរបស់លោកដូចដែលបានរៀបរាប់ក្នុងគម្ពីរ។ ជាឧទាហរណ៍គម្ពីរចែងថា៖
«អស់ទាំងផ្លូវ[របស់ព្រះ]សុទ្ធតែប្រកបដោយយុត្តិធម៌ . . . ទ្រង់ក៏ត្រឹមត្រូវ ហើយទៀងត្រង់»។—ចោទិយកថា ៣២:៤
«កុំឲ្យយើងថាព្រះទ្រង់ធ្វើអាក្រក់ ឬថាព្រះដ៏មានគ្រប់ព្រះចេស្ដា ទ្រង់ប្រព្រឹត្តសេចក្ដីទុច្ចរិតនោះឡើយ»។—យ៉ូប ៣៤:១០
«ព្រះដ៏មានគ្រប់ព្រះចេស្ដាទ្រង់នឹងមិនបង្វែរសេចក្ដីយុត្តិធម៌»។—យ៉ូប ៣៤:១២
ព្រះបដិសេធសាសនាណាដែលបង្រៀនមិនពិតអំពីលោក។
នេះរួមបញ្ចូលសាសនាដែលបង្រៀនថាព្រះជាអ្នកបណ្ដាលឲ្យមានទុក្ខវេទនា និងសាសនាដែលចូលរួមឬគាំទ្រសង្គ្រាមនិងអំពើហិង្សា។
«ពួកហោរាគេទាយកុហកដោយនូវឈ្មោះអញ[ព្រះ]ទេ អញមិនបានចាត់ប្រើគេឡើយ ក៏មិនបានបង្គាប់គេ ឬនិយាយនឹងគេដែរ គេទាយប្រាប់ឯងរាល់គ្នាពីការជាក់ស្ដែងដែលមិនពិត . . . ហើយជាសេចក្ដីបញ្ឆោតនៃចិត្តខ្លួនគេវិញ»។—យេរេមា ១៤:១៤
លោកយេស៊ូបានផ្ដន្ទាទោសដល់សាសនាដែលលាក់ពុត។
«មិនមែនអស់អ្នកដែលនិយាយមកខ្ញុំថា៖ ‹លោកម្ចាស់! លោកម្ចាស់!› នឹងចូលក្នុងរាជាណាចក្រស្ថានសួគ៌ឡើយ តែគឺអ្នកណាដែលធ្វើតាមបំណងប្រាថ្នានៃបិតារបស់ខ្ញុំដែលស្ថិតនៅស្ថានសួគ៌វិញ។ នៅថ្ងៃនោះ មនុស្សជាច្រើននឹងនិយាយមកខ្ញុំថា៖ ‹លោកម្ចាស់! លោកម្ចាស់! តើយើងមិនបានប្រកាសទំនាយតាងនាមលោក ហើយបណ្ដេញវិញ្ញាណកំណាចតាងនាមលោក ថែមទាំងធ្វើការដែលប្រកបដោយឫទ្ធានុភាពជាច្រើនតាងនាមលោកទេឬ?›។ ទោះជាយ៉ាងនោះក៏ដោយ ខ្ញុំនឹងប្រកាសប្រាប់ពួកគេជាសាធារណៈនៅពេលនោះថា៖ នែ! មនុស្សប្រព្រឹត្តប្រឆាំងច្បាប់! ខ្ញុំមិនដែលស្គាល់អ្នករាល់គ្នាទេ! ចូរទៅឆ្ងាយពីខ្ញុំទៅ!»។—ម៉ាថាយ ៧:២១-២៣