របៀបដែលយើងអាចមានសុភមង្គលនិងស្កប់ចិត្ត
យើងទាំងអស់គ្នាមិនថានៅលីវ រៀបការហើយ ក្មេងឬចាស់ ចង់មានសុភមង្គលនិងស្កប់ចិត្ត។ អ្នកបង្កើតរបស់យើងក៏ចង់ឲ្យយើងមានអារម្មណ៍បែបនេះដែរ។ ដូច្នេះលោកបានផ្ដល់ឲ្យយើងនូវការណែនាំដ៏ឈ្លាសវៃ។
ខំប្រឹងធ្វើការ
«អ្នកដែលលួចត្រូវឈប់លួចតទៅទៀត តែត្រូវឲ្យអ្នកនោះខំប្រឹងធ្វើការដោយទៀងត្រង់តាមរយៈដៃរបស់ខ្លួន ដើម្បីអាចមានអ្វីចែកដល់អ្នកដែលខ្វះខាត»។—អេភេសូរ ៤:២៨
អ្នកបង្កើតរបស់យើងលើកទឹកចិត្តឲ្យយើងមានទស្សនៈល្អចំពោះការងារ។ ហេតុអ្វី? បុគ្គលដែលខំប្រឹងធ្វើការមានសុភមង្គល ដោយសារគាត់អាចផ្គត់ផ្គង់សម្រាប់ខ្លួនគាត់និងក្រុមគ្រួសារ។ គាត់ក៏ប្រហែលជាអាចជួយអ្នកដែលត្រូវការជំនួយផងដែរ។ ចៅហ្វាយរបស់គាត់ឲ្យតម្លៃដល់គាត់។ ដូច្នេះ បុគ្គលិកដ៏ល្អអាចរក្សាការងាររបស់គាត់។ បទគម្ពីររៀបរាប់យ៉ាងត្រឹមត្រូវពីលទ្ធផលនៃការខំប្រឹងធ្វើការថាជា«អំណោយពីព្រះ»។—អ្នកទូន្មាន ៣:១៣
ប្រព្រឹត្តដោយទៀងត្រង់
«យើងជឿជាក់ថាសមត្ថភាពវិនិច្ឆ័យរបស់យើងនឹងមិនផ្ដន្ទាទោសយើងទេ ដោយសារយើងចង់ធ្វើការទាំងអស់ដោយទៀងត្រង់»។—ហេប្រឺ ១៣:១៨
ពេលយើងប្រព្រឹត្តដោយទៀងត្រង់ យើងឲ្យតម្លៃចំពោះខ្លួនយើង រក្សាសេចក្ដីសុខសាន្តក្នុងចិត្ត ហើយយើងអាចគេងលក់ស្កប់ស្កល់នៅពេលយប់។ បន្ថែមទៅទៀត អ្នកឯទៀតនឹងទុកចិត្តហើយគោរពយើង។ ប៉ុន្តែ មនុស្សដែលប្រព្រឹត្តដោយមិនទៀងត្រង់នឹងមិនទទួលអ្វីទាំងអស់នោះទេ។ មិនត្រឹមតែប៉ុណ្ណោះ សមត្ថភាពវិនិច្ឆ័យរបស់ពួកគេប្រហែលជានឹងធ្វើទុក្ខពួកគេ ហើយពួកគេប្រហែលជារស់នៅដោយភាពភ័យខ្លាច ថាថ្ងៃណាមួយអ្នកឯទៀតនឹងដឹងអំពីការប្រព្រឹត្តមិនទៀងត្រង់ដែលពួកគេបានធ្វើ។
មានទស្សនៈត្រឹមត្រូវចំពោះលុយកាក់
«ចូរមានរបៀបរស់នៅដែលប្រាសចាកពីការស្រឡាញ់ប្រាក់ ហើយចូរស្កប់ចិត្តនឹងអ្វីដែលអ្នករាល់គ្នាមាន»។—ហេប្រឺ ១៣:៥
យើងត្រូវការលុយដើម្បីទិញម្ហូបនិងអ្វីផ្សេងទៀតដែលយើងត្រូវការ។ ប៉ុន្តែ«ការស្រឡាញ់ប្រាក់»នាំឲ្យមានគ្រោះថ្នាក់ ដោយសារនេះអាចនាំឲ្យបុគ្គលម្នាក់ប្រើពេលវេលា និងកម្លាំងរបស់គាត់ស្ទើរតែទាំងអស់ ដើម្បីរកលុយថែមទៀត។ ការខំរកលុយអាចធ្វើឲ្យមានបញ្ហាផ្សេងៗក្នុងចំណងអាពាហ៍ពិពាហ៍ មិនមានពេលជាមួយកូនៗ ហើយអាចធ្វើឲ្យមានបញ្ហាសុខភាពទៀតផង។ (ធីម៉ូថេទី១ ៦:៩, ១០) បន្ថែមទៅទៀត បុគ្គលដែលស្រឡាញ់លុយអាចទទួលការល្បួងឲ្យធ្វើអ្វីដែលមិនទៀងត្រង់។ បុរសដែលមានប្រាជ្ញាម្នាក់បាននិយាយថា៖«មនុស្សស្មោះត្រង់នឹងទទួលពរជាច្រើន តែអ្នកដែលចង់មានឆាប់នឹងធ្វើខុសជាមិនខាន»។—សុភាសិត ២៨:២០
ជ្រើសរើសការអប់រំដ៏ល្អបំផុត
«ចូររក្សាទុកប្រាជ្ញា ហើយការពារសមត្ថភាពរិះគិត»។—សុភាសិត ៣:២១
ការអប់រំល្អជួយយើងឲ្យក្លាយទៅជាមនុស្សពេញវ័យដែលគួរឲ្យទុកចិត្ត និងឪពុកម្ដាយដ៏ល្អ។ ប៉ុន្តែ ការរៀនបានខ្ពស់តែប៉ុណ្ណោះ មិនអាចធានាថាយើងនឹងមានអ្វីៗទាំងអស់ដែលយើងត្រូវការឬសុភមង្គលរហូតទេ។ ដើម្បីឲ្យយើងទទួលជោគជ័យក្នុងគ្រប់ទិដ្ឋភាពទាំងអស់ក្នុងជីវិត យើងត្រូវការការអប់រំពីព្រះ។ បទគម្ពីរចែងអំពីបុគ្គលដែលស្ដាប់ព្រះថា៖«អ្វីៗដែលគាត់ធ្វើនឹងបានសម្រេច»។—ចម្រៀងសរសើរព្រះ ១:១-៣