១៦
អ៊ីសាកយកប្រពន្ធដ៏ល្អមួយ
តើអ្នកស្គាល់ស្ត្រីនៅក្នុងរូបភាពនេះជាអ្នកណាទេ? ឈ្មោះរបស់នាងជា រេបិកា។ ហើយបុរសដែលនាងកំពុងតែដើរឆ្ពោះទៅជួបនេះជា អ៊ីសាក។ នាងនឹងទៅជាប្រពន្ធរបស់គាត់។ តើការនេះបានកើតឡើងមកដោយយ៉ាងណា?
អ័ប្រាហាំជាឪពុករបស់អ៊ីសាក លោកចង់រកប្រពន្ធដ៏ល្អម្នាក់ឲ្យកូនប្រុសរបស់លោក។ លោកមិនចង់ឲ្យអ៊ីសាករៀបការជាមួយនឹងស្ត្រីណាមួយនៅក្នុងក្រុងកាណានទេ ពីព្រោះពួកមនុស្សទាំងនេះបានថ្វាយបង្គំព្រះមិនពិត។ ដូច្នេះ លោកអ័ប្រាហាំបានហៅបាវរបស់លោកមក ហើយប្រាប់ថា៖ ‹អញចង់ឲ្យឯងត្រឡប់ទៅកន្លែងឯញាតិសន្ដានអញ រស់នៅឯក្រុងខារ៉ានវិញ ហើយយកប្រពន្ធមួយសំរាប់កូនប្រុសអ៊ីសាករបស់អញ›។
ភ្លាមនោះបាវរបស់លោកអ័ប្រាហាំបានយកអូដ្ឋដប់ ហើយក៏ធ្វើដំណើរយ៉ាងឆ្ងាយទៅ។ នៅពេលដែលគាត់បានទៅជិតកន្លែង ដែលញាតិសន្ដានរបស់លោកអ័ប្រាហាំរស់នៅនោះ គាត់ក៏បានឈប់សំរាកនៅឯអណ្ដូង។ វេលានោះជារសៀលគងភ្នំ គឺជាពេលដែលពួកស្ត្រីនៅក្រុងមកដងទឹកពីអណ្ដូង។ ដូច្នេះ បាវរបស់លោកអ័ប្រាហាំបានអធិស្ឋានទៅព្រះយេហូវ៉ាថា៖ ‹សូមឲ្យស្ត្រីណាដែលដងទឹកឲ្យខ្ញុំនិងអូដ្ឋរបស់ខ្ញុំ ជាស្ត្រីដែលទ្រង់ជ្រើសរើសជាប្រពន្ធរបស់អ៊ីសាក›។
មិនយូរប៉ុន្មាន រេបិកាក៏បានមកដងទឹក។ នៅពេលដែលបាវបានសុំទឹកពិសា នាងក៏ឲ្យគាត់ពិសាទៅ។ បន្ទាប់មក នាងក៏ដងទឹកឲ្យបានគ្រប់គ្រាន់ សំរាប់អូដ្ឋទាំងអស់ដែលស្រេកដែរ។ នោះជាការដ៏ពិបាក ពីព្រោះសត្វអូដ្ឋផឹកទឹកច្រើនណាស់។
នៅពេលដែលរេបិកាបានឲ្យសត្វអូដ្ឋផឹកទឹករួចហើយ បាវរបស់អ័ប្រាហាំបានសួរនាងពីឈ្មោះរបស់ឪពុកនាង។ គាត់ក៏បានសូមស្នាក់មួយយប់នៅឯផ្ទះរបស់គេដែរ។ នាងបាននិយាយថា៖ ‹ឪពុកខ្ញុំឈ្មោះបេធូអែល ហើយកន្លែងសំរាប់ឲ្យអ្នកស្នាក់នៅជាមួយយើងនោះក៏មានដែរ›។ បាវរបស់លោកអ័ប្រាហាំដឹងថា បេធូអែលជាកូនប្រុសរបស់ណាឃរ ដែលជាប្អូនប្រុសរបស់លោកអ័ប្រាហាំ។ ដូច្នេះ គាត់ក៏បានលុតជង្គង់ ហើយអរព្រះគុណដល់ព្រះយេហូវ៉ា ដែលបាននាំគាត់ទៅឯញាតិសន្ដានរបស់លោកអ័ប្រាហាំ។
នៅយប់នោះបាវរបស់លោកអ័ប្រាហាំបានប្រាប់បេធូអែលនិងបងប្រុសរបស់នាងរេបិកាឈ្មោះ ឡាបាន់អំពីហេតុដែលគាត់បានមក។ ពួកគេទាំងពីរបានយល់ព្រមឲ្យរេបិកាទៅជាមួយគាត់ ដើម្បីនឹងរៀបការជាមួយអ៊ីសាក។ តើរេបិកាបានឆ្លើយយ៉ាងណា នៅពេលដែលគេបានសួរនាងនោះ? នាងបានឆ្លើយថា នាងចង់ទៅ។ ដូច្នេះ នៅថ្ងៃស្អែកឡើង ពួកគេក៏ជិះអូដ្ឋចាប់ផ្ដើមធ្វើដំណើរយ៉ាងឆ្ងាយត្រឡប់ទៅឯក្រុងកាណានវិញ។
នៅពេលដែលគេបានមកដល់ នោះជាពេលល្ងាចបន្ដិចហើយ។ រេបិកាបានឃើញបុរសម្នាក់កំពុងតែដើរនៅឯវាល។ អ្នកនោះជាអ៊ីសាក។ គាត់មានចិត្តសប្បាយរីករាយណាស់ដោយឃើញរេបិកា។ ម្ដាយរបស់គាត់ នាងសារ៉ាទើបតែបានស្លាប់បីឆ្នាំមុននេះ ហើយគាត់នៅស្រងូតចិត្តនៅឡើយ។ ប៉ុន្តែ ឥឡូវនេះអ៊ីសាកស្រឡាញ់រេបិកាណាស់ ហើយគាត់ក៏មានចិត្តរីករាយឡើងវិញ។