មេរៀនទី២
រេបិកាចង់ធ្វើឲ្យព្រះយេហូវ៉ាមានចិត្តរីករាយ
រេបិកាជាស្ត្រីម្នាក់ដែលស្រឡាញ់ព្រះយេហូវ៉ា។ ប្ដីរបស់នាងឈ្មោះអ៊ីសាក។ គាត់ក៏ស្រឡាញ់ព្រះយេហូវ៉ាដែរ។ តើរេបិកាបានជួបអ៊ីសាកយ៉ាងដូចម្ដេច? តើតាមរបៀបណានាងបានបង្ហាញថា នាងចង់ធ្វើឲ្យព្រះយេហូវ៉ាមានចិត្តរីករាយ? មុនដំបូង សូមឲ្យយើងរៀនអំពីអ៊ីសាកដែលជាប្ដីរបស់នាងសិន។
ឪពុកម្ដាយរបស់អ៊ីសាកគឺអាប្រាហាំនិងសារ៉ា។ ពួកគាត់រស់នៅស្រុកកាណាន។ មនុស្សនៅកន្លែងនោះមិនគោរពប្រណិប័តន៍ព្រះយេហូវ៉ាទេ។ ប៉ុន្តែអាប្រាហាំចង់ឲ្យកូនប្រុសរបស់គាត់រៀបការជាមួយស្ត្រីម្នាក់ដែលគោរពប្រណិប័តន៍ព្រះយេហូវ៉ា។ ដូច្នេះ អាប្រាហាំបានចាត់អ្នកបម្រើរបស់គាត់ឲ្យទៅរកប្រពន្ធឲ្យអ៊ីសាក។ អ្នកបម្រើនោះប្រហែលជាអេលាស៊ើរ ហើយគាត់ត្រូវធ្វើដំណើរទៅស្រុកហារ៉ានជាកន្លែងដែលមានសាច់ញាតិខ្លះរបស់អាប្រាហាំរស់នៅ។
រេបិកាស្ម័គ្រចិត្តនឿយហត់ដងទឹកឲ្យសត្វអូដ្ឋផឹក
អេលាស៊ើរបានធ្វើដំណើរជាមួយអ្នកបម្រើឯទៀតរបស់អាប្រាហាំ។ ពួកគាត់ត្រូវធ្វើដំណើរឆ្ងាយណាស់។ ពួកគាត់បានយកសត្វអូដ្ឋ១០ក្បាល ហើយបានដាក់ម្ហូបអាហារនិងអំណោយផ្សេងៗនៅលើវា។ តើតាមរបៀបណាអេលាស៊ើរដឹងថា គាត់ត្រូវជ្រើសរើសស្ត្រីមួយណាឲ្យអ៊ីសាក? ពេលអេលាស៊ើរនិងអ្នកបម្រើឯទៀតបានទៅដល់ស្រុកហារ៉ាន ពួកគាត់ឈប់សម្រាកនៅត្រង់អណ្ដូងទឹកមួយ ពីព្រោះអេលាស៊ើរបានដឹងថាមិនយូរទៀតនឹងមានមនុស្សមកដងទឹក។ គាត់បានអធិដ្ឋានទៅព្រះយេហូវ៉ាថា៖ ‹បើខ្ញុំសុំទឹកពីស្ត្រីវ័យក្មេងណា ហើយនាងនោះឲ្យទឹកខ្ញុំផឹកនិងអូដ្ឋផឹកដែរ ខ្ញុំនឹងដឹងថានេះជាស្ត្រីដែលលោកជ្រើសរើស›។
រួចមករេបិកាបានមកឯអណ្ដូងទឹក។ គម្ពីរបានប្រាប់ថា នាងស្អាតណាស់។ អេលាស៊ើរបានសុំទឹកនាងផឹក ហើយនាងបាននិយាយថា៖ ‹ចាស អញ្ជើញពិសាចុះ ហើយខ្ញុំនឹងដងទឹកឲ្យអូដ្ឋរបស់លោកផឹកដែរ›។ សូមគិតទៅមើល! ពេលសត្វអូដ្ឋស្រេកទឹក វាផឹកទឹកច្រើនណាស់។ ដូច្នេះ រេបិកាត្រូវតែរត់ទៅដងទឹកពីអណ្ដូងម្ដងហើយម្ដងទៀត។ នាងពិតជាធ្វើការហត់នឿយណាស់ តើកូនឃើញក្នុងរូបភាពនេះទេ?— អេលាស៊ើរបានភ្ញាក់ផ្អើលយ៉ាងខ្លាំងអំពីរបៀបដែលព្រះយេហូវ៉ាបានធ្វើតាមសេចក្ដីអធិដ្ឋានរបស់គាត់។
អេលាស៊ើរបានឲ្យអំណោយស្អាតៗជាច្រើនដល់រេបិកា។ នាងបានអញ្ជើញអេលាស៊ើរនិងអ្នកបម្រើផ្សេងទៀតទៅផ្ទះក្រុមគ្រួសារនាង។ អេលាស៊ើរបានពន្យល់អំពីមូលហេតុដែលអាប្រាហាំបានចាត់គាត់ឲ្យមក និងអំពីរបៀបដែលព្រះយេហូវ៉ាបានធ្វើតាមសេចក្ដីអធិដ្ឋានរបស់គាត់។ ក្រុមគ្រួសាររបស់រេបិការីករាយនឹងឲ្យនាងទៅរៀបការជាមួយអ៊ីសាក។
រេបិកាធ្វើដំណើរទៅស្រុកកាណានជាមួយអេលាស៊ើរ ដើម្បីរៀបការនឹងអ៊ីសាក
ប៉ុន្តែ តើកូនគិតថារេបិកាចង់រៀបការជាមួយអ៊ីសាកទេ?— រេបិកាបានដឹងថាព្រះយេហូវ៉ាបានចាត់អេលាស៊ើរឲ្យមក។ ដូច្នេះពេលក្រុមគ្រួសាររបស់រេបិកាសួរនាងថា តើនាងចង់ទៅស្រុកកាណានដើម្បីរៀបការជាមួយអ៊ីសាកឬទេ? នាងបានឆ្លើយថា៖ ‹ចាស ខ្ញុំចង់ទៅ›។ ភ្លាមៗនោះ នាងបានចាកចេញទៅជាមួយនឹងអេលាស៊ើរ។ ពេលដែលពួកគាត់បានមកដល់ស្រុកកាណាន នាងបានរៀបការជាមួយអ៊ីសាក។
ដោយសាររេបិកាបានធ្វើអ្វីដែលព្រះយេហូវ៉ាពេញចិត្ត នោះលោកបានឲ្យពរដល់នាង។ ច្រើនឆ្នាំក្រោយមក លោកយេស៊ូបានកើតក្នុងវង្សត្រកូលរបស់នាង! បើកូនធ្វើដូចរេបិកា ហើយធ្វើឲ្យព្រះយេហូវ៉ាមានចិត្តរីករាយ លោកនឹងឲ្យពរដល់កូនដែរ។