៩០
នៅឯអណ្ដូងទឹកជាមួយនឹងស្ត្រី
ព្រះយេស៊ូវបានឈប់សំរាកនៅជិតអណ្ដូងទឹកមួយនៅស្រុកសាម៉ារី។ ពួកសិស្សរបស់ទ្រង់បានចូលទៅក្រុងដើម្បីនឹងទិញម្ហូបអាហារអស់ហើយ។ ស្ត្រីដែលព្រះយេស៊ូវកំពុងតែនិយាយជាមួយនេះ បានមកដងទឹក។ ទ្រង់មានបន្ទូលទៅនាងថា៖ ‹សូមឲ្យខ្ញុំផឹកផង›។
នេះធ្វើឲ្យស្ត្រីនោះភ្ញាក់ផ្អើលណាស់។ តើអ្នកដឹងមកពីហេតុអ្វីទេ? នេះគឺពីព្រោះព្រះយេស៊ូវជាសាសន៍យូដា ហើយនាងជាសាសន៍សាម៉ារី។ ហើយជនជាតិយូដាជាច្រើនមិនចូលចិត្តជនជាតិសាម៉ារីទេ។ គេមិនទាំងនិយាយរកគ្នាផង! ប៉ុន្តែ ព្រះយេស៊ូវស្រឡាញ់មនុស្សគ្រប់ប្រភេទ។ ដូច្នេះទ្រង់មានបន្ទូលថា៖ ‹បើសិនជានាងបានស្គាល់អ្នកដែលសូមទឹកផឹក នោះនាងនឹងសូមពីអ្នកនោះវិញ រួចអ្នកនោះនឹងឲ្យទឹករស់ដល់នាង›។
ស្ត្រីនោះនិយាយថា៖ ‹លោកម្ចាស់ អណ្ដូងទឹកគឺជ្រៅណាស់ ហើយលោកមិនទាំងមានអ្វីនឹងដងផង។ តើលោកនឹងយកទឹករស់នោះពីណាមក›?
ព្រះយេស៊ូវពន្យល់ថា៖ ‹បើនាងផឹកទឹកពីអណ្ដូងនេះ នាងនឹងស្រេកម្ដងទៀត។ ប៉ុន្តែទឹកដែលខ្ញុំនឹងឲ្យនោះ នឹងធ្វើឲ្យមនុស្សរស់នៅជានិរន្តរ៍›។
ស្ត្រីនិយាយថា៖ ‹លោកម្ចាស់អើយ សូមឲ្យទឹកនោះមកខ្ញុំផង! ដើម្បីកុំឲ្យខ្ញុំស្រេកទៀត។ ហើយខ្ញុំមិនមកដងទឹកនៅទីនេះទៀតឡើយ›។
ស្ត្រីនោះគិតស្មានថាព្រះយេស៊ូវកំពុងតែមានបន្ទូលអំពីទឹកមែនទែន។ ប៉ុន្តែ ទ្រង់កំពុងតែមានបន្ទូលអំពីសេចក្ដីពិតដែលទាក់ទងព្រះ និងព្រះរាជាណាចក្ររបស់ទ្រង់។ សេចក្ដីពិតនេះគឺដូចជាទឹករស់អញ្ចឹង។ នេះអាចធ្វើឲ្យមនុស្សទទួលជីវិតអស់កល្បជានិច្ចបាន។
ឥឡូវនេះព្រះយេស៊ូវមានបន្ទូលប្រាប់ស្ត្រីថា៖ ‹ចូរទៅហៅប្ដីរបស់នាងមកឯណេះ›។
នាងឆ្លើយថា៖ ‹ខ្ញុំឥតមានប្ដីទេ›។
ព្រះយេស៊ូវមានបន្ទូលថា៖ ‹អ្នកឆ្លើយត្រូវហើយ ប៉ុន្តែអ្នកបានមានប្ដីប្រាំមកហើយ ឯបុរសដែលអ្នករស់នៅជាមួយឥឡូវនេះ មិនមែនជាប្ដីរបស់អ្នកទេ›។
ស្ត្រីនោះមានសេចក្ដីអស្ចារ្យណាស់ ពីព្រោះនេះជាសេចក្ដីពិតទាំងអស់។ តើព្រះយេស៊ូវដឹងរឿងទាំងនេះពីណាមក? ត្រូវហើយ ពីព្រោះព្រះយេស៊ូវជាបុគ្គលដែលព្រះបានសន្យា ហើយចាត់ឲ្យមក ហើយព្រះបានប្រទានពត៌មានទាំងនេះទៅទ្រង់។ នៅខណៈនោះ ពួកសិស្សរបស់ទ្រង់បានមកដល់ ហើយពួកគេមានសេចក្ដីភ្ញាក់ផ្អើល ដែលទ្រង់កំពុងតែមានបន្ទូលជាមួយនឹងស្ត្រីសាសន៍សាម៉ារី។
តើយើងរៀនបានអ្វីខ្លះពីរឿងនេះ? នេះបង្ហាញថាព្រះយេស៊ូវមានចិត្តសប្បុរសដល់មនុស្សគ្រប់សាសន៍ទាំងអស់។ ហើយយើងក៏គួរមានចិត្តដូចនេះដែរ។ យើងមិនគួរគិតថា គេជាមនុស្សអាក្រក់ ដោយសារតែគេមកពីសាសន៍ណាមួយឡើយ។ ព្រះយេស៊ូវចង់ឲ្យមនុស្សទាំងអស់ដឹងអំពីសេចក្ដីពិតដែលនាំមកនូវជីវិតអស់កល្បជានិច្ច។ ហើយយើងក៏គួរតែចង់ជួយមនុស្សឲ្យរៀនអំពីសេចក្ដីពិតនេះដែរ។