ជំពូកទី២
ទ្រង់បានទទួលកិត្ដិយសមុននឹងទ្រង់ប្រសូតមក
ក្រោយពីទេវតាកាព្រីយ៉ែលប្រាប់ស្រីក្រមុំម៉ារាថានាងនឹងប្រសូតបានបុត្រមួយ ដែលនឹងក្លាយទៅជាស្តេចដ៏អស់កល្បជានិច្ច នោះម៉ារាសួរថា៖ «ខ្ញុំមិនស្គាល់ប្រុសណាផង ដូច្នេះ តើធ្វើដូចម្ដេចនឹងឲ្យការនេះសំរេចបាន?»។
ទេវតាកាព្រីយ៉ែលពន្យល់ថា៖ «ព្រះវិញ្ញាណបរិសុទ្ធនឹងយាងមកសណ្ឋិតលើនាង ហើយព្រះចេស្ដានៃព្រះដ៏ខ្ពស់បំផុត នឹងមកគ្របបាំងនាងដោយស្រមោល ហេតុដូច្នេះ បុត្របរិសុទ្ធដែលនឹងប្រសូតមកនោះ ត្រូវហៅថាជាព្រះរាជបុត្រានៃព្រះ»។
ទេវតាកាព្រីយ៉ែលក៏ជួយម៉ារាឲ្យជឿសារនោះ ដោយពោលទៀតថា៖ «មើល! ឥឡូវអេលីសាបិត ជាញាតិនាង ក៏មានផ្ទៃពោះជាកូនប្រុស ក្នុងកាលដែលចាស់ហើយដែរ គឺអ្នកដែលគេបានហៅជាស្ត្រីអារ នោះនាងមានផ្ទៃពោះ៦ខែមកហើយ។ ដ្បិតការអ្វីដែលព្រះទ្រង់ធ្វើពុំបាន នោះគ្មានសោះឡើយ»។
ម៉ារាក៏ព្រមជឿតាមពាក្យរបស់កាព្រីយ៉ែល។ តើនាងបានតបឆ្លើយយ៉ាងណា? នាងពោលថា៖ «មើល! ខ្ញុំនេះជាអ្នកបំរើរបស់ព្រះអម្ចាស់ ដូច្នេះ សូមឲ្យបានសំរេចដូចពាក្យលោកចុះ!»។
មិនយូរប៉ុន្មាន ទេវតាកាព្រីយ៉ែលក៏ចាកចេញពីនាងទៅ។ ម៉ារារៀបចំខ្លួនទៅលេងអេលីសាបិត និងស្វាមីរបស់គាត់ឈ្មោះ សាការី នៅតំបន់ភ្នំក្នុងស្រុកយូដា។ ចំងាយផ្លូវពីផ្ទះរបស់ម៉ារានៅភូមិណាសារ៉ែតទៅកាន់ទីនោះមានចំងាយឆ្ងាយណាស់ គឺត្រូវធ្វើដំណើរប្រហែលជាបីឬបួនថ្ងៃទើបទៅដល់។
នៅទីបំផុត ពេលម៉ារាមកដល់ផ្ទះរបស់លោកសាការី នោះនាងក៏ចូលទៅជំរាបសួរ។ ភ្លាមនោះ អេលីសាបិតបានត្រូវពេញដោយវិញ្ញាណបរិសុទ្ធ ហើយគាត់ពោលទៅកាន់ម៉ារាថា៖ «ក្នុងបណ្ដាពួកស្រីៗ គឺនាងហើយ ជាស្ត្រីមានពរពិត ព្រមទាំងកូននៅក្នុងផ្ទៃនាងផង ដូចម្ដេចហ្ន៎! បានជាដល់ទៅព្រះមាតាព្រះអម្ចាស់នៃខ្ញុំក៏មកសួរដូច្នេះដែរ ដ្បិតមើលកាលសំឡេងនាងជំរាបសួរឮមកដល់ត្រចៀកខ្ញុំ នោះកូននៅក្នុងពោះខ្ញុំក៏បង្រះដោយសេចក្ដីអំណរ»។
ពេលម៉ារាឮដូច្នេះ នាងក៏តបឆ្លើយដោយកតញ្ញូធម៌អស់ពីដួងចិត្តថា៖ «ព្រលឹងខ្ញុំលើកដំកើងព្រះអម្ចាស់ វិញ្ញាណខ្ញុំក៏រីករាយនឹងព្រះដ៏ជាព្រះអង្គសង្គ្រោះនៃខ្ញុំ ដ្បិតទ្រង់បានទតមើលសណ្ឋានទាបថោករបស់ខ្ញុំ ជាបាវបំរើទ្រង់ មើលចុះ! ពីនេះទៅមុខ គ្រប់ទាំងដំណមនុស្សនឹងរាប់ខ្ញុំថាជាអ្នកមានពរ ពីព្រោះព្រះដ៏មានព្រះចេស្ដា ទ្រង់បានប្រោសសេចក្ដីយ៉ាងល្អវិសេសដល់ខ្ញុំ»។ ប៉ុន្តែ ទោះជាម៉ារាទទួលព្រះគុណក៏ដោយ ក៏ម៉ារាថ្វាយកិត្ដិយសទាំងអស់ទៅព្រះវិញ។ ម៉ារាពោលថា៖ «ព្រះនាមទ្រង់បរិសុទ្ធ ទ្រង់មានសេចក្ដីមេត្ដាករុណាដល់គ្រប់ទាំងដំណមនុស្ស ដែលគេកោតខ្លាចទ្រង់តរៀងទៅ»។
ម៉ារាបន្តលើកសរសើរព្រះតាមចំរៀងជាទំនាយដែលបានបណ្ដាលឲ្យតែងមក ដោយប្រកាសថា៖ «ទ្រង់បានសំដែងឫទ្ធិ ដោយព្រះហស្តទ្រង់ ព្រមទាំងកំចាត់កំចាយមនុស្សអំនួត ដោយសារគំនិតដែលនៅក្នុងចិត្តខ្លួនគេ ទាំងទំលាក់ស្តេចពីបល្ល័ង្កចេញ ហើយលើកមនុស្សរាបសាឡើងវិញ ឯមនុស្សឃ្លាន ទ្រង់បានចំអែតដោយរបស់ល្អ តែពួកអ្នកមាន ទ្រង់បានបណ្ដេញឲ្យទៅទទេវិញ ទ្រង់បានជួយអ៊ីស្រាអែល ជាអ្នកបំរើទ្រង់ ឲ្យបាននឹកចាំពីសេចក្ដីមេត្ដាករុណាទ្រង់ ដូចជាទ្រង់មានបន្ទូលនឹងពួកឰយុកោយើង គឺនឹងលោកអ័ប្រាហាំ ហើយនឹងពូជលោកជារៀងរាបដរាបតមក»។
ម៉ារានៅជាមួយអេលីសាបិតអស់រយៈពេលប្រមាណបីខែ ហើយម៉ារាប្រាកដជាបានជួយធ្វើកិច្ចការឲ្យអេលីសាបិតជាច្រើន ជាពិសេសក្នុងកំឡុងប៉ុន្មានសប្ដាហ៍ចុងក្រោយដែលអេលីសាបិតពពោះនោះ។ គឺប្រាកដជាប្រសើរមែន ដែលស្ត្រីដ៏ស្មោះត្រង់ទាំងពីរនាក់នេះមានផ្ទៃពោះដោយសារជំនួយរបស់ព្រះ អាចនៅជាមួយគ្នាក្នុងគ្រានេះដែលប្រកបដោយព្រះពរ!
តើអ្នកបានកត់សម្គាល់នូវកិត្ដិយសដែលបានថ្វាយចំពោះព្រះយេស៊ូ មុននឹងទ្រង់ប្រសូតមកឬទេ? អេលីសាបិតបានហៅទ្រង់ «ព្រះអម្ចាស់» ហើយកូនរបស់គាត់បានបង្រះដោយសេចក្ដីអំណរ ពេលម៉ារាបានចូលក្នុងផ្ទះគាត់ជាលើកដំបូង។ តែផ្ទុយទៅវិញ ក្រោយមកយើងនឹងឃើញថា អ្នកឯទៀតបានប្រព្រឹត្តដោយមិនគោរពចំពោះម៉ារានិងបុត្រដែលត្រូវប្រសូតមកនេះ។ លូកា ១:២៦-៥៦
▪ តើកាព្រីយ៉ែលពោលយ៉ាងណា ដើម្បីជួយម៉ារាឲ្យយល់នូវរបៀបដែលនាងនឹងមានគភ៌នោះ?
▪ តើព្រះយេស៊ូបានទទួលកិត្ដិយសអ្វី មុននឹងទ្រង់ប្រសូតមក?
▪ តើម៉ារាពោលយ៉ាងណា នៅក្នុងចំរៀងជាទំនាយក្នុងការលើកសរសើរព្រះ?
▪ តើម៉ារានៅជាមួយអេលីសាបិតអស់រយៈពេលប៉ុន្មាន? ហើយតើហេតុអ្វីក៏សមហេតុផល ដែលម៉ារានៅជាមួយអេលីសាបិតក្នុងកំឡុងគ្រានោះ?