ជំពូកទី២៣
អព្ភូតហេតុជាច្រើនទៀតនៅក្នុងក្រុងកាពើណិម
នៅថ្ងៃឈប់សំរាកក្រោយពីព្រះយេស៊ូបានអញ្ជើញពួកសិស្សបួននាក់ដំបូង ដែលមានឈ្មោះពេត្រុស អនទ្រេ យ៉ាកុប និងយ៉ូហានឲ្យមកជាមួយទ្រង់នោះ ទ្រង់និងពួកសិស្សទាំងអស់គ្នាក៏ទៅឯសាលាប្រជុំនៅតំបន់នោះក្នុងក្រុងកាពើណិម។ នៅទីនោះ ព្រះយេស៊ូចាប់ផ្ដើមបង្រៀន ហើយពួកបណ្ដាជនបានមានចិត្តអស្ចារ្យ ពីព្រោះទ្រង់បង្រៀនពួកគេ ប្រៀបដូចជាបុគ្គលដែលប្រកបដោយអំណាចមិនដូចពួកអាចារ្យនោះទេ។
នៅក្នុងថ្ងៃឈប់សំរាកនេះ នោះបុរសម្នាក់ដែលអារក្សចូលក៏មានវត្តមាននៅទីនោះដែរ។ មួយសន្ទុះក្រោយមក គាត់ក៏ស្រែកឡើងថា៖ «ហ៊ឹះ! តើយើងនឹងទ្រង់មានហេតុអ្វីនឹងគ្នា? នែ! ព្រះយេស៊ូពីភូមិណាសារ៉ែតអើយ! តើទ្រង់មកបំផ្លាញយើងឬអី? ខ្ញុំស្គាល់ជាក់ហើយ ថាទ្រង់ជាព្រះអង្គបរិសុទ្ធនៃព្រះ»។
បិសាចដែលមានអំណាចលើបុរសនេះ គឺពិតជាទេវតាមួយរូបដែលតាមសាតាំងហើយ។ ព្រះយេស៊ូបន្ទោសបិសាចនេះ ដោយមានបន្ទូលថា៖ «ចូរស្ងៀមទៅ! ហើយថយពីមនុស្សនេះចេញ!»។
បិសាចនេះក៏ធ្វើឲ្យបុរសនោះដួលប្រកាច់ប្រកិន ហើយស្រែកយ៉ាងខ្លាំង។ ក៏ប៉ុន្តែវាចេញពីបុរសនេះ ដោយឥតធ្វើបាបដល់គាត់ឡើយ។ មនុស្សម្នាទាំងអស់មានចិត្តស្ងើចខ្លាំងណាស់! ពួកគេសួរថា៖ «នេះជាអ្វី . . . បានជាលោកបង្គាប់ដល់អារក្សអសោចិ៍ ដោយអំណាចហើយវាក៏ស្ដាប់បង្គាប់លោកដូច្នេះ?»។ ដំណឹងអំពីរឿងនេះបានឮសុសសាយទូទាំងតំបន់ទាំងមូល។
កាលបានចេញពីសាលាប្រជុំ នោះព្រះយេស៊ូនិងពួកសិស្សរបស់ទ្រង់ ក៏ទៅឯផ្ទះរបស់ស៊ីម៉ូនហៅពេត្រុស។ នៅទីនោះ ម្ដាយក្មេករបស់ពេត្រុសកំពុងតែគ្រុនក្ដៅខ្លាំងណាស់។ ពួកគេអង្វរថា៖ ‹សូមជួយគាត់ផង!›។ ដូច្នេះព្រះយេស៊ូយាងចូលទៅចាប់ដៃគាត់លើកឡើង។ ស្រាប់តែគាត់បានជា ហើយចាប់ផ្ដើមរៀបចំអាហារជូនដល់ទាំងអស់គ្នា!
ក្រោយមក លុះដល់ពេលថ្ងៃលិច នោះពួកបណ្ដាជនពីកន្លែងផ្សេងៗ ក៏ចាប់ផ្ដើមយកពួកអ្នកជំងឺមកឯផ្ទះរបស់ពេត្រុស។ ភ្លាមៗនោះ ពួកអ្នកក្រុងទាំងអស់បានផ្ដុំគ្នាមកមើលនៅឯមាត់ទ្វារ! ហើយព្រះយេស៊ូប្រោសមនុស្សដែលមានជំងឺឲ្យបានជា ទោះជាពួកគេមានជំងឺអ្វីក៏ដោយ។ ទ្រង់ព្រមទាំងដេញអារក្សជាច្រើនដែរ។ កាលដែលពួកវាចេញ នោះពួកបិសាចដែលទ្រង់បណ្ដេញក៏ស្រែកថា៖ «ទ្រង់ជាព្រះរាជបុត្រានៃព្រះ»។ ក៏ប៉ុន្តែ ព្រះយេស៊ូបន្ទោសពួកវាហាមមិនឲ្យនិយាយសោះ ពីព្រោះពួកវាដឹងថាទ្រង់ពិតជាព្រះគ្រីស្ទ។ ម៉ាកុស ១:២១-៣៤; លូកា ៤:៣១-៤១; ម៉ាថាយ ៨:១៤-១៧
▪ តើមានអ្វីកើតឡើងនៅក្នុងសាលាប្រជុំ ក្រោយពីព្រះយេស៊ូបានអញ្ជើញពួកសិស្សបួនរូបដំបូងឲ្យមកតាមទ្រង់នោះ?
▪ តើព្រះយេស៊ូយាងទៅកន្លែងណា ពេលទ្រង់យាងចេញពីសាលាប្រជុំ? ហើយតើអព្ភូតហេតុអ្វីដែលទ្រង់បានធ្វើនៅទីនោះ?
▪ តើមានអ្វីកើតឡើងក្រោយមកនៅវេលាល្ងាចដដែលនេះ?