ជំពូកទី៦០
ការសម្ដែងឲ្យឃើញជាមុននូវសិរីរុងរឿងក្នុងព្រះរាជាណាចក្ររបស់ព្រះគ្រីស្ទ
ព្រះយេស៊ូបានយាងមកដល់ក្រវល់ភូមិសេសារាភីលីពហើយ នៅទីនោះទ្រង់កំពុងតែបង្រៀនហ្វូងមនុស្សនិងពួកសាវ័ករបស់ទ្រង់។ ព្រះយេស៊ូបានប្រកាសសេចក្ដីដ៏អស្ចារ្យដល់ពួកគេថា៖ «ខ្ញុំប្រាប់អ្នករាល់គ្នាជាប្រាកដថា ក្នុងពួកអ្នកដែលឈរនៅទីនេះ មានអ្នកខ្លះមិនត្រូវភ្លក់សេចក្ដីស្លាប់ ទាល់តែបានឃើញកូនមនុស្សមកក្នុងនគររបស់លោក»។
ពួកសិស្សច្បាស់ជាឆ្ងល់ ‹តើព្រះយេស៊ូចង់មានបន្ទូលយ៉ាងណាទៅ?›។ ប្រហែលមួយសប្ដាហ៍ក្រោយមក ព្រះយេស៊ូនាំពេត្រុស យ៉ាកុបនិងយ៉ូហានឡើងទៅលើភ្នំខ្ពស់ជាមួយនឹងទ្រង់។ ប្រហែលយប់ណាស់ទៅហើយ ហេតុនេះហើយពួកសាវ័កងងុយជាខ្លាំង។ កាលដែលព្រះយេស៊ូកំពុងតែអធិស្ឋាន នោះទ្រង់ផ្លាស់ប្រែទ្រង់ទ្រាយនៅមុខអ្នកទាំងនោះ។ ព្រះភ័ក្ដ្រទ្រង់បានភ្លឺដូចព្រះអាទិត្យ ហើយព្រះពស្ត្រទ្រង់ក៏ត្រឡប់ជាសដូចពន្លឺ។
រួចមក មានមនុស្សពីរនាក់ដែលត្រូវគេសម្គាល់ថាជា «លោកម៉ូសេ នឹងលោកអេលីយ៉ា»ក៏លេចមកដែរ កំពុងតែទូលនឹងព្រះយេស៊ូអំពី ‹ដំណើរចាកចេញដែលនឹងកើតឡើងក្នុងក្រុងយេរូសាឡិម›។ តាមពិត ការយាងចេញទៅនេះសំដៅទៅពេលដែលព្រះយេស៊ូសោយទិវង្គត និងពេលដែលប្រោសឲ្យរស់ឡើងវិញ។ ដូច្នេះហើយ ការសន្ទនានេះបង្ហាញឲ្យឃើញនូវការសោយទិវង្គតដ៏គ្មានកិត្ដិយស ដែលមិនមែនជាអ្វីដែលអាចជៀសផុតបានដូចសេចក្ដីប្រាថ្នារបស់ពេត្រុសនោះទេ។
លុះកាលដែលពួកសាវ័កភ្ញាក់ពីការលង់លក់វិញ នោះពួកគាត់មើលឃើញនិងឮដោយនឹកអស្ចារ្យក្នុងចិត្ត។ ថ្វីបើនេះជាចក្ខុនិមិត្តក៏ដោយ គឺដូចជាអ្វីកើតឡើងមែនទែន ហើយពេត្រុសចាប់ផ្ដើមទូលថា៖ «ព្រះអម្ចាស់អើយ! ដែលយើងខ្ញុំនៅទីនេះបានល្អណាស់ បើទ្រង់សព្វព្រះហឫទ័យ នោះយើងខ្ញុំនឹងធ្វើត្រសាល៣នៅទីនេះ គឺ១សំរាប់ទ្រង់ ១សំរាប់លោកម៉ូសេ ហើយ១សំរាប់លោកអេលីយ៉ា»។
កាលដែលពេត្រុសកំពុងតែទូលនៅឡើយ នោះមានពពកយ៉ាងភ្លឺបានមកបាំងពួកគាត់ ហើយមានឮសំឡេងចេញពីពពកនោះថា៖ «នេះជាកូនស្ងួនភ្ងាអញ ជាទីពេញចិត្តអញណាស់ ចូរស្ដាប់តាមចុះ!»។ កាលបានឮសម្លេងហើយនោះ ពួកសិស្សក៏ក្រាបផ្កាប់មុខនឹងដី។ ក៏ប៉ុន្តែ ព្រះយេស៊ូមានបន្ទូលថា៖ «ចូរក្រោកឡើង កុំភ័យឡើយ»។ កាលពួកសាវ័កងើបមុខឡើង ពុំឃើញមាននរណាទៀតឡើយ ឃើញតែព្រះយេស៊ូប៉ុណ្ណោះ។
ថ្ងៃស្អែកឡើងកំពុងដែលចុះពីភ្នំមក ព្រះយេស៊ូបង្គាប់ពួកសិស្សថា៖ «កុំឲ្យប្រាប់អ្នកណាពីការជាក់ស្តែងនេះឲ្យសោះ ទាល់តែកូនមនុស្សបានរស់ពីស្លាប់ឡើងវិញ»សិន។ ការមើលឃើញលោកអេលីយ៉ាក្នុងចក្ខុនិមិត្តនោះ ធ្វើឲ្យពួកសិស្សងឿងឆ្ងល់យ៉ាងខ្លាំង។ ពួកគាត់ក៏ទូលសួរថា៖ «ចុះហេតុអ្វីបានជាពួកអាចារ្យប្រាប់ថា លោកអេលីយ៉ាត្រូវតែមកជាមុន?»។
ព្រះយេស៊ូមានបន្ទូលថា៖ «លោកអេលីយ៉ាបានមកហើយ គេមិនបានស្គាល់លោកទេ»។ ប៉ុន្តែ ព្រះយេស៊ូកំពុងតែមានបន្ទូលអំពីយ៉ូហានជាអ្នកដែលធ្វើបុណ្យជ្រមុជទឹកឲ្យគេ ដែលបានបំពេញមុខនាទីស្រដៀងនឹងមុខនាទីរបស់លោកអេលីយ៉ា។ យ៉ូហានបានរៀបចំផ្លូវសំរាប់ព្រះគ្រីស្ទ ដូចជាលោកអេលីយ៉ារៀបចំផ្លូវសំរាប់លោកអេលីសេដែរ។
ចក្ខុនិមិត្តនេះពិតជាបានពង្រឹងកម្លាំងចិត្តដល់ព្រះយេស៊ូនិងពួកសិស្សរបស់ទ្រង់មែន!។ បើនិយាយជាការប្រៀបធៀប ចក្ខុនិមិត្តនេះគឺសម្ដែងឲ្យឃើញជាមុនអំពីសិរីរុងរឿងក្នុងព្រះរាជាណាចក្ររបស់ព្រះគ្រីស្ទ។ តាមពិត ពួកសិស្សឃើញ«កូនមនុស្សមកក្នុងនគររបស់លោក» ដូចអ្វីដែលព្រះយេស៊ូបានសន្យាមួយសប្ដាហ៍មុននេះ។ ក្រោយព្រះយេស៊ូសោយទិវង្គតទៅ នោះពេត្រុសបានសរសេរអំពីពួកគាត់‹ដែលជាសាក្សីអំពីសិរីរុងរឿងរបស់ព្រះគ្រីស្ទ កាលដែលពួកគាត់នៅជាមួយទ្រង់នៅលើភ្នំបរិសុទ្ធនោះ›។
ពួកផារីស៊ីបានទាមទារឲ្យព្រះយេស៊ូបង្ហាញនូវទីសម្គាល់ ដើម្បីសឲ្យឃើញថាទ្រង់ជាបុគ្គលដែលបានសន្យាមកក្នុងព្រះគម្ពីរ ជាស្តេចដែលព្រះតែងតាំងឡើងនោះ។ ព្រះយេស៊ូឥតបានប្រទានទីសម្គាល់ដល់ពួកគេទេ។ ម្យ៉ាងវិញទៀត ព្រះយេស៊ូបានអនុញ្ញាតឲ្យពួកសិស្សដ៏ស្និទ្ធស្នាលរបស់ទ្រង់ឃើញការផ្លាស់ប្រែទ្រង់ទ្រាយនេះ ជាការបញ្ជាក់ពីបទទំនាយទាំងប៉ុន្មានស្តីអំពីព្រះរាជាណាចក្រ។ ដូច្នេះហើយ ក្រោយមកពេត្រុសបានសរសេរថា៖ «ហើយយើងខ្ញុំមានពាក្យទំនាយដ៏ពិតជាង»។ ម៉ាថាយ ១៦:១៣, ម៉ាថា. ១៦:២៨–១៧:១៣; ម៉ាកុស ៩:១-១៣; លូកា ៩:២៧-៣៧; ពេត្រុសទី២ ១:១៦-១៩
▪ មុននឹងភ្លក់សេចក្ដីស្លាប់ តើមនុស្សខ្លះនឹងឃើញព្រះគ្រីស្ទយាងមកកាន់អំណាចព្រះរាជាណាចក្ររបស់ទ្រង់យ៉ាងដូចម្ដេច?
▪ ក្នុងចក្ខុនិមិត្តនោះ តើលោកម៉ូសេនិងលោកអេលីយ៉ាទូលព្រះយេស៊ូអំពីអ្វី?
▪ ហេតុអ្វីក៏ចក្ខុនិមិត្តនេះជាជំនួយដើម្បីពង្រឹងកម្លាំងចិត្តដល់ពួកសិស្សរបស់ព្រះយេស៊ូ?