ជំពូកទី១៣១
ការលេចខ្លួនឲ្យឃើញចុងក្រោយ និងបុណ្យថ្ងៃទី៥០នៅឆ្នាំ៣៣ ស.យ.
នៅពេលមួយ ព្រះយេស៊ូបានរៀបចំឲ្យពួកសាវ័ក១១នាក់មកជួបទ្រង់នៅភ្នំមួយក្នុងស្រុកកាលីឡេ។ តាមមើលទៅ ពួកសិស្សឯទៀតក៏បានដឹងអំពីការប្រជុំនេះ ហើយមានសិស្សប្រមាណ៥០០នាក់បានមកជួបជុំគ្នា។ នេះជាការប្រជុំដ៏សប្បាយរីករាយមែន ពេលព្រះយេស៊ូបង្ហាញខ្លួនឲ្យពួកសិស្សឃើញ ហើយចាប់ផ្ដើមបង្រៀនពួកគេ!
ក្រៅពីការបង្រៀន ព្រះយេស៊ូក៏ពន្យល់ប្រាប់បណ្ដាជនថា ព្រះប្រទាននូវអំណាចទាំងអស់ជូនព្រះយេស៊ូ គឺទាំងនៅលើមេឃទាំងនៅផែនដីនេះ។ ទ្រង់ដាស់តឿនពួកសិស្សថា៖ «ដូច្នេះ ចូរទៅបញ្ចុះបញ្ចូលឲ្យមានសិស្សនៅគ្រប់ទាំងសាសន៍ ព្រមទាំងធ្វើបុណ្យជ្រមុជទឹកឲ្យ ដោយនូវព្រះនាមព្រះវរបិតា ព្រះរាជបុត្រា នឹងព្រះវិញ្ញាណបរិសុទ្ធចុះ! ហើយបង្រៀន ឲ្យគេកាន់តាមគ្រប់ទាំងសេចក្ដី ដែលខ្ញុំបានបង្គាប់មកអ្នករាល់គ្នាផង»។
ចូរគិតទៅមើល! បុរស ស្ត្រី និងក្មេងៗទទួលនូវមុខងារនេះដូចគ្នា ដើម្បីចូលរួមក្នុងកិច្ចការបង្កើតឲ្យមានសិស្ស។ គឺនឹងមានពួកប្រឆាំងដែលខំបញ្ឈប់កិច្ចការផ្សព្វផ្សាយនិងកិច្ចការបង្រៀនរបស់ពួកគាត់ តែព្រះយេស៊ូសម្រាលទុក្ខពួកគាត់ថា៖ «ហើយមើល! ខ្ញុំក៏នៅជាមួយនឹងអ្នករាល់គ្នាជារាល់ថ្ងៃដែរ ដរាបដល់បំផុតកល្ប»។ ព្រះយេស៊ូគង់នៅជាមួយពួកអ្នកកាន់តាមទ្រង់តាមរយៈវិញ្ញាណបរិសុទ្ធ ដើម្បីជួយពួកគាត់ឲ្យបំពេញនូវកិច្ចការផ្សព្វផ្សាយរបស់ខ្លួន។
សរុបទៅ ក្រោយពីដំណើររស់ឡើងវិញ ព្រះយេស៊ូបង្ហាញអង្គទ្រង់ឲ្យពួកសិស្សឃើញអស់រយៈពេល៤០ថ្ងៃ។ ក្នុងកំឡុងដែលបង្ហាញខ្លួនឲ្យពួកសិស្សឃើញនោះ ទ្រង់បង្រៀនពួកសិស្សអំពីព្រះរាជាណាចក្រនៃព្រះ ហើយទ្រង់បញ្ជាក់នូវភារកិច្ចរបស់ពួកគេជាសិស្សរបស់ទ្រង់។ នៅគ្រាមួយ ទ្រង់ព្រមទាំងបង្ហាញខ្លួនឲ្យយ៉ាកុបជាប្អូនឃើញដែរ ហើយបានធ្វើឲ្យអ្នកដែលមិនធ្លាប់ជឿ ទទួលស្គាល់ថាទ្រង់ជាព្រះគ្រីស្ទពិតមែន។
កាលពួកសាវ័កនៅស្រុកកាលីឡេនៅឡើយ តាមមើលទៅព្រះយេស៊ូទំនងជាបង្គាប់ពួកគាត់ឲ្យត្រឡប់ទៅក្រុងយេរូសាឡិមវិញ។ ពេលជួបពួកគាត់នៅទីនោះ ទ្រង់មានបន្ទូល «ហាមមិនឲ្យគេចេញពីក្រុងយេរូសាឡិមឡើយ ដោយបន្ទូលថា ត្រូវឲ្យនៅចាំសេចក្ដីសន្យានៃព្រះវរបិតា ដែលអ្នករាល់គ្នាបានឮ ខ្ញុំថ្លែងប្រាប់ហើយ ដ្បិតពិតជាលោកយ៉ូហានបានធ្វើបុណ្យជ្រមុជដោយទឹក ប៉ុន្តែនៅបន្ដិចទៀត អ្នករាល់គ្នានឹងទទួលបុណ្យជ្រមុជ ដោយព្រះវិញ្ញាណបរិសុទ្ធវិញ»។
ក្រោយមក ព្រះយេស៊ូជួបពួកសាវ័ករបស់ទ្រង់ម្ដងទៀត និងនាំពួកគាត់ចេញពីទីក្រុងរហូតដល់ភូមិបេថានី ដែលនៅទីជម្រាលខាងកើតនៃភ្នំអូលីវ។ គួរឲ្យអស្ចារ្យមែន ទោះជាទ្រង់បានមានបន្ទូលជាច្រើន ថាបន្ដិចទៀតទ្រង់នឹងយាងទៅស្ថានសួគ៌ ក៏ពួកសិស្សនៅតែជឿដដែលថា ព្រះរាជាណាចក្ររបស់ទ្រង់នឹងស្ថាបនាឡើងនៅលើផែនដីនេះ។ ដូច្នេះ ពួកសិស្សក៏ទូលសួរថា៖ «ព្រះអម្ចាស់អើយ! តើនៅគ្រានេះឬ . . . ដែលទ្រង់នឹងតាំងនគរឲ្យសាសន៍អ៊ីស្រាអែលឡើងវិញនោះ?»។
ព្រះយេស៊ូមិនកែតម្រូវនូវការយល់ច្រឡំរបស់ពួកសិស្សទេ តែទ្រង់គ្រាន់តែមានបន្ទូលថា៖«មិនត្រូវឲ្យអ្នករាល់គ្នាដឹងពេល ដឹងកំណត់ ដែលព្រះវរបិតាបានទុកនៅ ក្នុងអំណាចរបស់ទ្រង់នោះឡើយ»។ រួចមក ព្រះយេស៊ូបញ្ជាក់នូវកិច្ចការដែលពួកគាត់ត្រូវតែធ្វើ ដោយមានបន្ទូលថា៖ «កាលណាព្រះវិញ្ញាណបរិសុទ្ធបានមកសណ្ឋិតលើអ្នករាល់គ្នា នោះអ្នករាល់គ្នានឹងបានព្រះចេស្ដា ហើយនឹងធ្វើជាទីបន្ទាល់ពីខ្ញុំ នៅក្រុងយេរូសាឡិម ព្រមទាំងស្រុកយូដា នឹងស្រុកសាម៉ារីទាំងមូល ហើយរហូតដល់ចុងផែនដីបំផុតផង»។
កាលពួកសិស្សកំពុងតែសម្លឹងមើលព្រះយេស៊ូយាងឡើងទៅលើមេឃ ស្រាប់តែភ្លាមនោះមានពពករសាត់មកបាំងទ្រង់ពីក្រសែភ្នែកពួកគេទៅ។ ទ្រង់យាងឡើងទៅស្ថានសួគ៌ជាបុគ្គលវិញ្ញាណ ក្រោយពីផ្លាស់ប្រែពីរូបកាយជាមនុស្ស។ កាលដែលពួកសាវ័ក១១នាក់នៅតែសម្លឹងមើលទៅលើមេឃនៅឡើយ នោះមានមនុស្សពីរនាក់ស្លៀកពាក់សឈរនៅជិតពួកគាត់។ គឺជាពួកទេវតាដែលបានប្រែក្រឡា ហើយពោលថា៖ «ពួកអ្នកស្រុកកាលីឡេអើយ! ហេតុអ្វីបានជាឈរងើយមើលទៅលើមេឃដូច្នេះ? ព្រះយេស៊ូវនេះឯង ដែលព្រះបានលើកពីអ្នករាល់គ្នា ឡើងទៅលើស្ថានសួគ៌ ទ្រង់នឹងយាងមកវិញ តាមបែបដដែល ដូចជាអ្នករាល់គ្នាបានឃើញទ្រង់ទៅនោះដែរ»។
របៀបដែលព្រះយេស៊ូយាងចេញពីផែនដី គឺមិនមានភាពអធិកអធមគគ្រឹកគគ្រេងទេ ផ្ទុយទៅវិញមានតែពួកអ្នកកាន់តាមដ៏ស្មោះត្រង់របស់ទ្រង់ប៉ុណ្ណោះដែលបានឃើញ។ ដូច្នេះ ទ្រង់នឹងយាងត្រឡប់មកវិញតាមបែបដូចគ្នា ដោយឥតមានភាពអធិកអធមគគ្រឹកគគ្រេងឡើយ ហើយមានតែពួកអ្នកកាន់តាមដ៏ស្មោះត្រង់របស់ទ្រង់ប៉ុណ្ណោះដែលយល់ដឹងថា ទ្រង់បានយាងត្រឡប់មកវិញចាប់ផ្ដើមគ្រប់គ្រងក្នុងព្រះរាជាណាចក្រ។
ឥឡូវនេះ ពួកសាវ័កចុះពីភ្នំអូលីវ ឆ្លងកាត់ជ្រលងកេដ្រុន និងចូលក្រុងយេរូសាឡិមម្ដងទៀត។ ពួកគេនៅទីនោះដោយស្ដាប់បង្គាប់តាមបញ្ជារបស់ព្រះយេស៊ូ។ ដប់ថ្ងៃក្រោយមក នៅបុណ្យថ្ងៃទី៥០ឆ្នាំ៣៣ ស.យ. កាលពួកសិស្ស១២០នាក់កំពុងប្រជុំគ្នាក្នុងបន្ទប់ខាងលើមួយក្នុងក្រុងយេរូសាឡិម ស្រាប់តែឮសូរពីលើមេឃ ដូចជាខ្យល់បក់បោកយ៉ាងខ្លាំងចូលពេញក្នុងផ្ទះ។ ពួកគេឃើញហាក់ដូចជាមានអណ្ដាតភ្លើង មកសណ្ឋិតលើពួកគេម្នាក់ៗដែលមានវត្តមាន ហើយពួកសិស្សទាំងនោះចាប់ផ្ដើមនិយាយភាសាផ្សេងៗពីគ្នា។ នេះគឺជាការចាក់វិញ្ញាណបរិសុទ្ធ ដូចដែលព្រះយេស៊ូបានសន្យាមក! ម៉ាថាយ ២៨:១៦-២០; លូកា ២៤:៤៩-៥២; កូរិនថូសទី១ ១៥:៥-៧; កិច្ចការ ១:៣-១៥; ២:១-៤
▪ មុននឹងព្រះយេស៊ូយាងចេញទៅ តើព្រះយេស៊ូប្រទានសេចក្ដីបង្គាប់ដល់ពួកណានៅឯភ្នំក្នុងស្រុកកាលីឡេ? តើសេចក្ដីបង្គាប់នេះមានអ្វីខ្លះ?
▪ តើព្រះយេស៊ូប្រទាននូវការសម្រាលទុក្ខយ៉ាងណាដល់ពួកសិស្ស? ហើយតើទ្រង់នឹងគង់នៅជាមួយពួកគេយ៉ាងណា?
▪ ក្រោយពីព្រះយេស៊ូមានព្រះជន្មរស់ឡើងវិញ តើព្រះយេស៊ូបង្ហាញខ្លួនទ្រង់ឲ្យពួកសិស្សឃើញអស់រយៈពេលប៉ុន្មានថ្ងៃ? ហើយតើព្រះយេស៊ូបង្រៀនពួកគេអំពីអ្វី?
▪ ជាក់ស្តែង តើព្រះយេស៊ូបង្ហាញខ្លួនឲ្យអ្នកណាឃើញ ដែលគាត់មិនទាន់ក្លាយជាសិស្សរបស់ទ្រង់ផង មុនទ្រង់សោយទិវង្គត?
▪ តើកិច្ចប្រជុំពីរចុងក្រោយណា ដែលព្រះយេស៊ូជួបប្រជុំនឹងពួកសាវ័ក? តើមានអ្វីកើតឡើងក្នុងគ្រាទាំងពីរនេះ?
▪ តើតាមរបៀបណាដែលព្រះយេស៊ូនឹងត្រឡប់មកវិញ ដូចពេលដែលទ្រង់យាងចេញទៅនោះ?
▪ តើមានអ្វីកើតឡើងនៅបុណ្យថ្ងៃទី៥០ នៅឆ្នាំ៣៣ ស.យ.?