មេរៀនទី៩៤
ពួកអ្នកកាន់តាមទទួលឫទ្ធានុភាពបរិសុទ្ធ
ដប់ថ្ងៃបន្ទាប់ពីលោកយេស៊ូត្រឡប់ទៅស្ថានសួគ៌ ពួកអ្នកកាន់តាមលោកបានទទួលឫទ្ធានុភាពបរិសុទ្ធ។ ពេលនោះជាបុណ្យថ្ងៃទី៥០ ឆ្នាំ៣៣ គ.ស. ហើយមនុស្សពីស្រុកផ្សេងៗមកចូលរួមច្រើនកុះករក្នុងក្រុងយេរូសាឡិម។ ពួកអ្នកកាន់តាមលោកយេស៊ូប្រហែល១២០នាក់ កំពុងជួបជុំគ្នានៅបន្ទប់ខាងលើក្នុងផ្ទះមួយ។ រំពេចនោះ មានអព្ភូតហេតុកើតឡើង គឺសំឡេងសន្ធឹកខ្យល់យ៉ាងខ្លាំងលាន់ឮពេញក្នុងផ្ទះ។ រួចអ្វីមួយដែលមើលទៅដូចជាអណ្ដាតភ្លើងលេចមកសណ្ឋិតលើពួកគាត់ម្នាក់មួយៗ ហើយពួកគាត់ទាំងអស់គ្នាចាប់ផ្ដើមនិយាយភាសាផ្សេងៗ។
មនុស្សម្នាពីស្រុកឯទៀតដែលមកចូលរួមបុណ្យនៅក្រុងយេរូសាឡិម បានឮសំឡេងចេញពីផ្ទះនោះ។ ដូច្នេះ ពួកគេនាំគ្នារត់ទៅមើលថាមានអ្វីកើតឡើង។ ពេលពួកគេឮពួកអ្នកកាន់តាមលោកយេស៊ូកំពុងនិយាយភាសាផ្សេងៗ នោះពួកគេភ្ញាក់ផ្អើលជាខ្លាំង ហើយសួរគ្នាថា៖ ‹ប៉ុន្តែ អ្នកទាំងនេះមកពីស្រុកកាលីឡេ។ ហេតុអ្វីពួកគេអាចនិយាយភាសារបស់យើងបាន?›។
រួចមក ពេត្រុសនិងសាវ័កឯទៀតក៏ឈរនៅមុខក្រុមមនុស្ស។ ពេត្រុសបានប្រាប់ពួកគេអំពីការដែលលោកយេស៊ូត្រូវគេសម្លាប់ ហើយថាព្រះយេហូវ៉ាបានប្រោសលោកឲ្យរស់ឡើងវិញ។ ពេត្រុសនិយាយថា៖ ‹ឥឡូវ នៅស្ថានសួគ៌លោកយេស៊ូអង្គុយនៅខាងស្ដាំដៃព្រះ ហើយលោកបានចាក់ឫទ្ធានុភាពបរិសុទ្ធដូចដែលលោកបានសន្យា។ នេះជាមូលហេតុដែលអ្នករាល់គ្នាបានឮ និងឃើញអព្ភូតហេតុទាំងនេះ›។
ក្រោយពីបានស្ដាប់ពេត្រុស ក្រុមមនុស្សក៏រំជួលចិត្ត ហើយសួរគាត់ថា៖ ‹តើយើងគួរធ្វើអ្វី?›។ ពេត្រុសប្រាប់ពួកគេថា៖ ‹ចូរប្រែចិត្ត ហើយទទួលការជ្រមុជទឹកដោយនូវនាមលោកយេស៊ូ។ អ្នករាល់គ្នាក៏នឹងទទួលឫទ្ធានុភាពបរិសុទ្ធដែរ›។ នៅថ្ងៃនោះ មនុស្សប្រហែល៣.០០០នាក់បានទទួលការជ្រមុជទឹក។ ចាប់ពីពេលនោះមក ចំនួនអ្នកកាន់តាមក្នុងក្រុងយេរូសាឡិមបានកើនឡើងយ៉ាងឆាប់រហ័ស។ ដោយមានជំនួយពីឫទ្ធានុភាពបរិសុទ្ធ ពួកសាវ័កបានបង្កើតក្រុមជំនុំច្រើនថែមទៀត យ៉ាងនេះពួកគាត់អាចបង្រៀនអ្នកកាន់តាមឯទៀតនូវអ្វីទាំងអស់ ដែលលោកយេស៊ូបានបង្គាប់។
«បើមាត់របស់អ្នកប្រកាសជាសាធារណៈថាលោកយេស៊ូជាម្ចាស់ ហើយអ្នកមានជំនឿក្នុងចិត្តថាព្រះបានប្រោសលោកឲ្យរស់ពីស្លាប់ឡើងវិញ នោះអ្នកនឹងត្រូវសង្គ្រោះ»។—រ៉ូម ១០:៩