១០៥
ការរង់ចាំនៅក្រុងយេរូសាឡិម
មនុស្សទាំងអស់នៅទីនេះ គឺជាពួកអ្នកកាន់តាមព្រះយេស៊ូវ។ ពួកគេបានគោរពតាមទ្រង់ ហើយក៏បានស្នាក់នៅក្នុងក្រុងយេរូសាឡិម។ ហើយកាលដែលពួកគេកំពុងតែរង់ចាំទាំងអស់គ្នា នោះមានសម្លេងមួយយ៉ាងខ្លាំងខ្ទ័រពេញក្នុងផ្ទះ។ សម្លេងនោះឮដូចជាសន្ទុះខ្យល់យ៉ាងខ្លាំង។ ហើយបន្ទាប់មក នៅពីលើក្បាលនៃពួកសិស្សម្នាក់ៗ មានអណ្ដាតភ្លើងចាប់ផ្ដើមលេចចេញមក។ តើអ្នកអាចមើលឃើញភ្លើងនៅពីលើក្បាលនៃពួកគេម្នាក់ៗទេ? តើការទាំងអស់នេះមានន័យយ៉ាងណា?
នេះជាអព្ភូតហេតុមួយ! ព្រះយេស៊ូវគង់នៅជាមួយព្រះវរបិតារបស់ទ្រង់នៅឯស្ថានសួគ៌ ហើយទ្រង់កំពុងតែចាក់ព្រះវិញ្ញាណបរិសុទ្ធរបស់ព្រះមកលើអ្នកកាន់តាមទ្រង់ទាំងឡាយ។ តើអ្នកដឹងថា ព្រះវិញ្ញាណនេះបណ្ដាលឲ្យពួកគេធ្វើអ្វីទេ? គឺបានបណ្ដាលឲ្យពួកគេចាប់ផ្ដើមនិយាយភាសាផ្សេងៗទាំងអស់គ្នា។
ប្រជាជនជាច្រើននៅក្រុងយេរូសាឡិមបានឮសម្លេងដូចជាខ្យល់យ៉ាងខ្លាំង រួចពួកគេក៏នាំគ្នាមកមើលហេតុការណ៍ដែលទើបនឹងកើតឡើង។ ប្រជាជនខ្លះមកពីសាសន៍ផ្សេងៗ ពួកគេមកទីនេះដើម្បីធ្វើបុណ្យថ្ងៃទី៥០នៃសាសន៍អ៊ីស្រាអែល។ ពួកភ្ញៀវទាំងនេះមានសេចក្ដីអស្ចារ្យក្នុងចិត្តណាស់! ពួកគេឮពួកសិស្សទាំងឡាយកំពុងតែនិយាយក្នុងភាសារបស់គេ អំពីការដ៏អស្ចារ្យដែលព្រះបានធ្វើ។
ពួកភ្ញៀវទាំងនេះនិយាយថា៖ ‹មនុស្សទាំងនេះមកពីស្រុកកាលីឡេទាំងអស់ ចុះដូចម្ដេចបានជាពួកគេអាចនិយាយភាសាផ្សេងៗ ដែលជាភាសាពីស្រុកកំណើតរបស់យើងរៀងខ្លួនដូច្នេះ›?
ឥឡូវនេះ ពេត្រុសក៏ក្រោកឈរឡើង ដើម្បីពន្យល់ប្រាប់ប្រជាជន។ គាត់តម្លើងសម្លេងរបស់គាត់ ហើយពន្យល់ប្រាប់ទៅពួកគេអំពីរបៀបដែលព្រះយេស៊ូវត្រូវបានគេធ្វើគុត ហើយថាព្រះយេហូវ៉ាបានប្រោសទ្រង់ឲ្យមានព្រះជន្មរស់ឡើងវិញ។ ពេត្រុសមានប្រសាសន៍ថា៖ ‹ឥឡូវនេះ ព្រះយេស៊ូវគង់នៅឯស្ថានសួគ៌ នៅខាងស្ដាំព្រះហស្តនៃព្រះហើយ។ ទ្រង់បានចាក់ព្រះវិញ្ញាណបរិសុទ្ធដែលបានសន្យាមកនោះ។ ដូច្នេះហើយ បានជាអ្នករាល់គ្នាបានឮនិងឃើញអព្ភូតហេតុទាំងនេះ›។
កាលដែលពេត្រុសបាននិយាយសេចក្ដីទាំងនេះរួចហើយ មនុស្សជាច្រើនមានចិត្តសោកស្ដាយណាស់ ចំពោះការដែលគេបានប្រព្រឹត្តទៅលើព្រះយេស៊ូវនោះ។ ពួកគេបានសួរថា ‹តើត្រូវឲ្យយើងខ្ញុំធ្វើដូចម្ដេច›? ពេត្រុសឆ្លើយប្រាប់គេថា៖ ‹អ្នករាល់គ្នាត្រូវតែប្រែចិត្តរបស់អ្នក ហើយទទួលបុណ្យជ្រមុជទឹក›។ ដូច្នេះនៅថ្ងៃនោះ មានមនុស្សប្រហែល៣.០០០នាក់បានទទួលបុណ្យជ្រមុជទឹក ហើយក្លាយទៅជាអ្នកកាន់តាមព្រះយេស៊ូវ។