ភាគទី១០
ពិភពលោកថ្មីដ៏អស្ចារ្យដែលព្រះនឹងបង្កើតមក
១, ២ តើអ្វីនឹងកើតឡើងបន្ទាប់ពីសង្គ្រាមអើម៉ាគេដូនបានបោសសំអាតផែនដីនោះ?
បន្ទាប់ពីសង្គ្រាមអើម៉ាគេដូនបានបោសសំអាតផែនដី តើអ្វីនឹងកើតឡើងទៀតនោះ? នៅពេលនោះសម័យថ្មីដែលប្រកបទៅដោយសិរីល្អនឹងត្រូវចាប់ផ្ដើមឡើង។ ពួកអ្នករួចរស់ជីវិតពីសង្គ្រាមអើម៉ាគេដូន ដែលបានសម្ដែងចិត្តស្មោះត្រង់ចំពោះការគ្រប់គ្រងរបស់ព្រះ នឹងត្រូវបាននាំទៅចូលពិភពលោកថ្មី។ គឺនឹងមានសម័យថ្មីដ៏គួរឲ្យរំភើបចិត្តក្នុងប្រវត្ដិសាស្ត្រ ដែលនៅពេលនោះផលប្រយោជន៍យ៉ាងអស្ចារ្យហូរមកពីព្រះដល់ក្រុមគ្រួសារមនុស្សលោក!
២ នៅក្រោមការដឹកនាំនៃរាជាណាចក្ររបស់ព្រះ ពួកអ្នករួចរស់ជីវិតនឹងចាប់ផ្ដើមធ្វើសួនមនោរមឲ្យលូតលាស់ឡើង។ ពួកគេនឹងបូជាកម្លាំងរបស់គេចំពោះសកម្មភាពដែលមិនសម្រាប់តែប្រយោជន៍ផ្ទាល់ខ្លួនទេ តែដើម្បីនាំប្រយោជន៍ចំពោះមនុស្សគ្រប់ៗគ្នាដែលរស់នៅៗពេលនោះ។ ផែនដីនឹងត្រូវចាប់ផ្ដើមកែប្រែឲ្យទៅជាទីលំនៅដ៏ស្អាត ក្សេមក្សាន្ត ហើយជាទីស្កប់ចិត្តចំពោះមនុស្សលោកដែរ។
សេចក្ដីសុចរិតដាក់ជំនួសអំពើអាក្រក់
៣ តើសេចក្ដីធូរស្បើយយ៉ាងណាដែលយើងនឹងអាចទទួលក្រោយពីអើម៉ាគេដូនភ្លាមនោះ?
៣ ការបំផ្លាញលោកីយរបស់សាតាំង នឹងធ្វើឲ្យមានលទ្ធភាពនូវការទាំងអស់នេះ។ សាសនាមិនពិត ប្រព័ន្ធសង្គម ឬក៏រដ្ឋាភិបាលដែលធ្វើឲ្យមនុស្សលោកបែកខ្ញែកពីគ្នានោះ នឹងមិនមានទៀតឡើយ។ ក៏នឹងគ្មានឃោសនាពីសាតាំងដែលបំភាន់មនុស្សទៀតទេ ដ្បិតគ្រប់ទីភ្នាក់ងារដែលធ្វើឃោសនាបែបនេះ នឹងត្រូវបំផ្លាញចោលជាមួយនឹងរបបសម័យរបស់សាតាំងដែរ។ សូមអញ្ជើញគិតចុះ៖ «បរិយាកាស» ដែលពោរពេញទៅដោយ «ជាតិពុល» ទាំងមូលនៃលោកីយរបស់សាតាំង នឹងត្រូវលែងមានទៀតហើយ! តើនេះនឹងធ្វើឲ្យយើងមានការធូរស្បើយយ៉ាងណាទៅហ្ន៎!
៤ សូមពណ៌នាអំពីការផ្លាស់ប្ដូរក្នុងសេចក្ដីបង្រៀនដែលនឹងកើតមានឡើង។
៤ នៅពេលនោះ គំនិតនៃការគ្រប់គ្រងមនុស្សដែលនាំឲ្យមានអំពើអាក្រក់នឹងត្រូវផ្លាស់ជំនួសដោយការបង្រៀនដែលនាំប្រយោជន៍ពីព្រះវិញ។ «ឯកូនចៅទាំងប៉ុន្មានរបស់ឯង នឹងធ្វើជាសិស្សរបស់ព្រះយេហូវ៉ា»។ (អេសាយ ៥៤:១៣) ដោយមានការអប់រំដ៏មានប្រយោជន៍នេះជារៀងរាល់ឆ្នាំ នោះច្បាស់ជា «គ្រប់ទាំងអស់នឹងស្គាល់ព្រះយេហូវ៉ា នៅពេញពាសលើផែនដី ដូចជាទឹកនៅពេញពាសក្នុងសមុទ្រដែរ»។ (អេសាយ ១១:៩) មនុស្សនឹងលែងរៀនអំពើអាក្រក់ទៀតឡើយ តែ «ពួកមនុស្សនៅលោកីយ គេរៀនតាមសេចក្ដីសុចរិត»វិញ។ (អេសាយ ២៦:៩) គំនិតនិងសកម្មភាពដែលលើកទឹកចិត្តគ្នាទៅវិញទៅមក នឹងជាការធម្មតាជារៀងរាល់ថ្ងៃ។—កិច្ចការ ១៧:៣១; ភីលីព ៤:៨
៥ អ្វីនឹងកើតមានឡើងចំពោះគ្រប់អំពើសហ័សនិងគ្រប់មនុស្សអាក្រក់ទាំងអស់?
៥ ដោយហេតុនេះ នឹងលែងមានឃាតកម្ម អំពើឃោរឃៅ ការរំលោភ ការលួចប្លន់ ឬក៏អំពើឧក្រិដ្ឋអ្វីទៀតឡើយ។ គ្មានអ្នកណានឹងត្រូវរងទុក្ខវេទនាដោយសារអំពើអាក្រក់របស់អ្នកដទៃឡើយ។ បទគម្ពីរសុភាសិត ១០:៣០ ចែងថា៖ «មនុស្សសុចរិត នឹងមិនត្រូវរង្គើឡើយ តែមនុស្សអាក្រក់ នឹងអាស្រ័យនៅផែនដីមិនបាន» ឡើយ។
សុខភាពដ៏ល្អឥតខ្ចោះត្រូវមានឡើងវិញ
៦, ៧ (ក) តើហេតុការណ៍ដ៏ជាក់ស្តែងណា ដែលការគ្រប់គ្រងរាជាណាចក្រនឹងត្រូវបំបាត់ចោលនោះ? (ខ) តើព្រះយេស៊ូវបានសម្ដែងការនេះយ៉ាងណា កាលដែលទ្រង់គង់នៅផែនដីនៅឡើយ?
៦ នៅក្នុងពិភពលោកថ្មី គ្រប់លទ្ធផលអាក្រក់ទាំងអស់ដែលកើតមកពីការបះបោរដើម នឹងត្រូវបាត់សាបសូន្យអស់។ ជាឧទាហរណ៍ ការគ្រប់គ្រងនៃព្រះរាជាណាចក្រនឹងត្រូវបំបាត់នូវជម្ងឺនិងសេចក្ដីចាស់ជរា។ នៅសព្វថ្ងៃនេះ ទោះបីលោកអ្នកប្រហែលជាសប្បាយនឹងសុខភាពល្អយ៉ាងណាក៏ដោយ ហេតុការណ៍ដ៏ជាក់ស្តែងនោះគឺថា កាលដែលលោកអ្នកចាស់ទៅ ភ្នែកអ្នកនឹងកាន់តែអន់ ធ្មេញអ្នកនឹងពុកទៅ ត្រចៀកអ្នកស្ដាប់មិនសូវឮ ស្បែកអ្នកកើតមានជ្រួញ សរីរាង្គខាងក្នុងត្រូវដើរមិនស្រួល រហូតដល់ទីបញ្ចប់លោកអ្នកក៏ត្រូវស្លាប់ទៅវិញ។
៧ ប៉ុន្តែ លទ្ធផលទាំងអស់ដ៏គួរឲ្យលំបាកនេះដែលយើងបានទទួលជាមរតកពីឪពុកម្ដាយដើមរបស់យើង នោះនឹងទៅជារបស់នៃអតីតកាលហើយ។ តើអ្នកនៅចាំពីការសម្ដែងរបស់ព្រះយេស៊ូវអំពីសុខភាពទេ នៅពេលដែលទ្រង់គង់នៅផែនដីនៅឡើយនោះ? ព្រះគម្ពីរបានរាយការណ៍ថា៖ «នោះមានហ្វូងមនុស្សមកឯទ្រង់កកកុញ នាំទាំងមនុស្សខ្វិន ខ្វាក់ គ ពិការ នឹងមនុស្សឯទៀតជាច្រើន មកដាក់នៅទៀបព្រះបាទទ្រង់។ ហើយទ្រង់ក៏ប្រោសឲ្យគេបានជា ដល់ម្ល៉េះបានជាបណ្ដាមនុស្សទាំងប៉ុន្មានមានសេចក្ដីអស្ចារ្យ ដោយឃើញមនុស្សគនិយាយបាន មនុស្សពិការបានមាំមួន មនុស្សខ្វិនដើររួច នឹងមនុស្សខ្វាក់មើលឃើញ»។—ម៉ាថាយ ១៥:៣០, ៣១
៨, ៩ សូមពណ៌នានូវសុភមង្គលដែលនឹងត្រូវកើតមានឡើងនៅពិភពលោកថ្មី កាលដែលសុខភាពដ៏ល្អឥតខ្ចោះនឹងត្រូវបានធ្វើដូចដើមវិញ។
៨ នៅក្នុងពិភពលោកថ្មី កាលដែលគ្រប់បញ្ហាទាំងអស់របស់យើងត្រូវបំបាត់ចេញនោះ តើនឹងមានសុភមង្គលដ៏សម្បើមយ៉ាងណាទៅហ្ន៎! សេចក្ដីទុក្ខវេទនាដែលកើតពីសុខភាពមិនល្អ នឹងមិនដែលធ្វើទុក្ខដល់មនុស្សយើងទៀតឡើយ។ «ឯពួកអ្នកដែលនៅក្នុងក្រុង គេនឹងមិនថា ‹ខ្ញុំឈឺ› ទៀតឡើយ»។ «គ្រានោះ ភ្នែករបស់មនុស្សខ្វាក់ នឹងបានភ្លឺឡើង ហើយត្រចៀករបស់មនុស្សថ្លង់នឹងឮបាន។ គ្រានោះ ពួកមនុស្សខ្វិននឹងលោតដូចជាប្រើស ហើយអណ្ដាតរបស់មនុស្សគក៏នឹងច្រៀងឡើង»។—អេសាយ ៣៣:២៤; ៣៥:៥, ៦
៩ តើនឹងទៅជាការរំភើបចិត្តឬទេ ពេលភ្ញាក់ឡើងជារៀងរាល់ព្រឹក ហើយដឹងថាយើងឥឡូវសប្បាយនឹងសុខភាពដ៏ស្វាហាប់នោះ? តើនឹងមិនមែនទៅជាការស្កប់ចិត្តឬទេ ដែលមនុស្សចាស់ជរានឹងដឹងថា ពួកគាត់បានត្រូវប្រោសឲ្យមានសមត្ថកាលឡើងវិញ ហើយនឹងទទួលជាស្រេចនូវភាពល្អឥតខ្ចោះដែលពីដើម អ័ដាមនិងអេវ៉ាបានធ្លាប់មាននោះ? សេចក្ដីសន្យារបស់ព្រះគម្ពីរគឺថា៖ «យ៉ាងនោះសាច់គេនឹងបានស្រស់ជាងសាច់របស់កូនក្មេង ក៏នឹងប្រែទៅដូចកាលនៅក្មេងវិញ»។ (យ៉ូប ៣៣:២៥) តើនឹងជាការសប្បាយយ៉ាងណាទៅ ក្នុងការបោះចោលនូវ វ៉ែនតា គ្រឿងជំនួយត្រចៀក ឈើឆ្ពាប និងថ្នាំទាំងអស់ចោល! មន្ទីរពេទ្យ គ្រូពេទ្យ និងគ្រូពេទ្យធ្មេញទាំងឡាយ នឹងមិនត្រូវការទៀតឡើយ។
១០ តើអ្វីនឹងកើតមានឡើងចំពោះសេចក្ដីស្លាប់នោះ?
១០ មនុស្សដែលសប្បាយនឹងសុខភាពដ៏ស្វាហាប់នោះ នឹងមិនដែលចង់ស្លាប់ឡើយ។ ហើយពួកគេនឹងមិនត្រូវស្លាប់ទេ ដ្បិតមនុស្សលោកនឹងមិននៅក្រោមអានុភាពនៃភាពមិនល្អឥតខ្ចោះ ឬក៏នៃសេចក្ដីស្លាប់ទៀតឡើយ។ ព្រះគ្រីស្ទនឹង «សោយរាជ្យ ទាល់តែដាក់អស់ទាំងខ្មាំងសត្រូវនៅក្រោមព្រះបាទទ្រង់។ ឯខ្មាំងសត្រូវក្រោយបង្អស់ ដែលត្រូវបំផ្លាញ គឺជាសេចក្ដីស្លាប់»។ «អំណោយទាននៃព្រះ . . . គឺជាជីវិតដ៏នៅអស់កល្បជានិច្ច»។—កូរិនថូសទី១ ១៥:២៥, ២៦; រ៉ូម ៦:២៣; សូមអាន អេសាយ ២៥:៨ ដែរ។
១១ តើសៀវភៅវិវរណៈបានថ្លែងសង្ខេបអំពីផលប្រយោជន៍របស់ពិភពលោកថ្មីយ៉ាងណា?
១១ ក្នុងការថ្លែងសង្ខេបអំពីផលប្រយោជន៍ដែលនឹងហូរមកពីព្រះដែលប្រកបទៅដោយសេចក្ដីស្រឡាញ់ ដល់ក្រុមគ្រួសារមនុស្សដែលរស់នៅក្នុងសួនមនោរមនោះ សៀវភៅក្រោយបង្អស់នៃព្រះគម្ពីរបានចែងថា៖ «ព្រះទ្រង់នឹងជូតអស់ទាំងទឹកភ្នែក ពីភ្នែកគេចេញ នឹងគ្មានសេចក្ដីស្លាប់ ឬសេចក្ដីសោកសង្រេង ឬសេចក្ដីយំទួញ ឬទុក្ខលំបាកណាទៀតឡើយ ដ្បិតសេចក្ដីមុនទាំងប៉ុន្មាន បានកន្លងបាត់ទៅហើយ»។—វិវរណៈ ២១:៣, ៤
មនុស្សស្លាប់នឹងត្រឡប់មកវិញ
១២ តើព្រះយេស៊ូវបានសម្ដែងនូវអំណាចនៃសេចក្ដីប្រោសឲ្យរស់ឡើងវិញដែលព្រះប្រគល់ឲ្យទ្រង់តាមរបៀបណា?
១២ ព្រះយេស៊ូវមិនគ្រាន់តែប្រោសមនុស្សឈឺនិងពិការឲ្យបានជាប៉ុណ្ណោះទេ។ ទ្រង់ក៏បានប្រោសមនុស្សស្លាប់ឲ្យរស់ឡើងវិញដែរ។ ដោយប្រព្រឹត្តការនេះ ទ្រង់បានសម្ដែងអំណាចដ៏អស្ចារ្យនៃសេចក្ដីរស់ឡើងវិញដែលព្រះបានប្រគល់ដល់ទ្រង់។ តើអ្នកនៅចាំទេ កាលដែលព្រះយេស៊ូវបានចូលផ្ទះរបស់បុរសម្នាក់ ដែលកូនស្រីគាត់បានស្លាប់ទៅហើយនោះ? ព្រះយេស៊ូវបានមានបន្ទូលនឹងក្មេងស្រីស្លាប់នោះថា៖ «កូនស្រីអើយ អញប្រាប់ឲ្យឯងក្រោកឡើង»! តើមានកើតលទ្ធផលយ៉ាងណា? «ស្រាប់តែកូនស្រីនោះក៏ក្រោកឡើងដើរទៅ»។ ដោយឃើញការនោះ «មនុស្សរាល់គ្នា គេមានសេចក្ដីអស្ចារ្យជាខ្លាំងក្រៃលែង»។ ពួកគេមានសេចក្ដីសប្បាយរីករាយជាខ្លាំងម្ល៉េះ ដែលគេទប់ចិត្តមិនបានឡើយ!—ម៉ាកុស ៥:៤១, ៤២; សូមមើលដែរនៅ លូកា ៧:១១-១៦; យ៉ូហាន ១១:១-៤៥
១៣ តើមនុស្សប្រភេទណានឹងត្រូវបានប្រោសឲ្យរស់ឡើងវិញ?
១៣ នៅក្នុងពិភពលោកថ្មី «ទាំងមនុស្សសុចរិត នឹងមនុស្សទុច្ចរិត នឹងបានរស់ឡើងវិញ»។ (កិច្ចការ ២៤:១៥) នៅគ្រានោះ ព្រះយេស៊ូវនឹងប្រើអំណាចដែលព្រះបានប្រគល់ឲ្យ ដើម្បីនឹងប្រោសមនុស្សស្លាប់ឲ្យរស់វិញ ដូចជាទ្រង់បានមានបន្ទូលថា «ខ្ញុំជាសេចក្ដីរស់ឡើងវិញ ហើយជាជីវិត អ្នកណាដែលជឿដល់ខ្ញុំ ទោះបើបានស្លាប់ហើយ គង់តែនឹងរស់ឡើងវិញដែរ»។ (យ៉ូហាន ១១:២៥) ទ្រង់បានមានបន្ទូលទៀតថា៖ «អស់អ្នកណានៅក្នុងផ្នូររំឭក[ក្នុងសតិរបស់ព្រះ] នឹងឮសម្លេងទ្រង់[ព្រះយេស៊ូវ] ហើយនឹងចេញមក»។—យ៉ូហាន ៥:២៨, ២៩ពថ
១៤ ដោយព្រោះសេចក្ដីស្លាប់នឹងលែងមានទៀត តើរបស់អ្វីនឹងត្រូវបំបាត់ទៅនោះ?
១៤ នៅពេលដែលមនុស្សស្លាប់នឹងត្រូវប្រោសឲ្យមានជីវិតមកវិញមួយក្រុមហើយមួយក្រុមទៀត ដើម្បីមកចូលរួមជាមួយមនុស្សជាទីស្រឡាញ់របស់គេ នោះនឹងមានអំណរអរយ៉ាងសម្បើមនៅពេញផែនដីទាំងមូល! ក៏មិនមានបញ្ជីដំណឹងមរណភាពដែលនាំឲ្យមានសេចក្ដីទុក្ខព្រួយចំពោះអ្នកនៅរស់ទៀតឡើយ។ ជំនួសការនោះ ប្រហែលនឹងមានសេចក្ដីផ្ទុយវិញ៖ សេចក្ដីប្រកាសអំពីមនុស្សដែលទើបនឹងបានត្រូវប្រោសឲ្យរស់ឡើងវិញ ដើម្បីនាំឲ្យមានអំណរអរចំពោះអ្នកដែលបានស្រឡាញ់គេពីមុនមកនោះ។ ដូច្នេះហើយ នឹងគ្មានបុណ្យខ្មោច គ្មានគំនរអុសបូជាសព គ្មានឈាបនដ្ឋាន ឬក៏កន្លែងបញ្ចុះសពទៀតឡើយ!
ពិភពលោកដែលពិតជាក្សេមក្សាន្ត
១៥ តើបទទំនាយរបស់មីកានឹងត្រូវបានសម្រេចជាគ្រប់សព្វតាមរបៀបណា?
១៥ សេចក្ដីក្សេមក្សាន្តដ៏ពិតប្រាកដក្នុងគ្រប់ផ្នែកទាំងអស់នៃជីវភាពនឹងត្រូវបានសម្រេចហើយ។ សង្គ្រាម ពួកអ្នកដែលចង់ធ្វើឲ្យមានសង្គ្រាម ហើយការធ្វើសាស្ដ្រាវុធនឹងទៅជារបស់នៃអតីតកាលទៅវិញ។ តើហេតុអ្វីបានជាអញ្ចឹង? គឺពីព្រោះការប្រកាន់សាសន៍ ការប្រកាន់កុលសម្ពន្ធ និងការប្រកាន់ជាតិដែលបំបែកមនុស្សលោកពីគ្នានឹងត្រូវបាត់ទៅទាំងអស់ហើយ។ នៅពេលនោះ ការនេះនឹងត្រូវបានសម្រេចយ៉ាងគ្រប់សព្វ៖ «អស់ទាំងនគរនឹងលែងលើកដាវច្បាំងគ្នាទៀត ក៏មិនរៀនវិជ្ជាចំបាំងទៀតតទៅ»។—មីកា ៤:៣
១៦ តើព្រះនឹងរ៉ាប់រងយ៉ាងណាថានឹងគ្មានលទ្ធភាពឲ្យមានសង្គ្រាមទៀតនោះ?
១៦ ដោយយល់នូវប្រវត្ដិសាស្ត្ររបស់មនុស្សពោរពេញទៅដោយការបង្ហូរឈាម ក្នុងសង្គ្រាមដ៏ឥតឈប់ឈរ ហេតុការណ៍នេះហាក់ដូចជាការដែលប្លែកពីធម្មតាណាស់។ ប៉ុន្តែការអាក្រក់នេះបានកើតមានឡើង ពីព្រោះមនុស្សលោកបានស្ថិតនៅក្រោមការគ្រប់គ្រងរបស់មនុស្សនិងពួកព្រាយបិសាចនោះ។ នៅក្នុងពិភពលោកថ្មី ដោយស្ថិតនៅក្រោមការគ្រប់គ្រងព្រះរាជាណាចក្រនោះ ការនេះនឹងកើតមានឡើងទៅវិញ៖ «ចូរមកពិចារណាមើលអស់ទាំងការនៃព្រះយេហូវ៉ា . . . ទ្រង់បណ្ដាលឲ្យការសង្គ្រាមស្ងប់រំងាប់រហូតដល់ចុងផែនដី។ ទ្រង់បំបាក់ធ្នូ ហើយកាច់លំពែង ក៏ដុតអស់ទាំងរទេះចំបាំងនៅក្នុងភ្លើង»។—ទំនុកដំកើង ៤៦:៨, ៩
១៧, ១៨ នៅក្នុងពិភពលោកថ្មី តើនឹងមានទំនាក់ទំនងយ៉ាងណារវាងមនុស្សនឹងសត្វនោះ?
១៧ មនុស្សនិងសត្វនឹងមានសន្ដិភាពរវាងគ្នានឹងគ្នា ដូចជាមាននៅក្នុងសួនអេដែនដែរ។ (លោកុប្បត្តិ ១:២៨; ២:១៩) ព្រះទ្រង់បានមានបន្ទូលថា៖ «នៅថ្ងៃនោះ អញក៏នឹងតាំងសញ្ញាឲ្យគេ ជាមួយនឹងសត្វនៅផែនដី នឹងសត្វហើរលើអាកាស ហើយសត្វលូនវារនៅដីផង . . . ឲ្យគេបានដេកទៅដោយសុខសាន្ត»។—ហូសេ ២:១៨
១៨ តើសន្ដិភាពនោះនឹងមានរហូតដល់កម្រិតណា? «ឆ្កែព្រៃនឹងនៅជាមួយនឹងកូនចៀម ឯខ្លារខិន នឹងដេកនៅជាមួយនឹងកូនពពែ ឯកូនគោនឹងសិង្ហស្ទាវ ព្រមទាំងសត្វបំប៉នយ៉ាងធាត់នឹងនៅជាមួយគ្នា ហើយក្មេងតូចៗជាអ្នកគង្វាលវា»។ សត្វនឹងមិនដែលគំរាមកំហែងមនុស្ស ឬក៏សត្វគ្នាឯងទៀតឡើយ។ សូម្បីតែ «សិង្ហនឹងស៊ីចំបើងដូចជាគោវិញ»!—អេសាយ ១១:៦-៩; អេសាយ ៦៥:២៥
ផែនដីនឹងត្រូវកែប្រែទៅជាសួនមនោរម
១៩ ផែនដីនឹងត្រូវកែប្រែទៅជាអ្វី?
១៩ ផែនដីទាំងមូលនឹងត្រូវកែប្រែទៅជាសួនមនោរម ជាទីលំនៅសម្រាប់មនុស្សលោក។ ដោយហេតុនេះ បានជាព្រះយេស៊ូវអាចសន្យាដល់បុរសម្នាក់ដែលជឿទៅលើទ្រង់ថា៖ «អ្នកនឹងនៅក្នុងស្ថានបរមសុខជាមួយនឹងខ្ញុំដែរ»។ ព្រះគម្ពីរបានចែងថា៖ «ទីរហោស្ថាន ហើយទីហួតហែង នឹងមានសេចក្ដីអំណរ ឯសមុទ្រខ្សាច់នឹងរីករាយ ហើយផ្កាឡើងដូចជាកុឡាប។ . . . ដ្បិតនៅទីរហោស្ថាននឹងមានក្បាលទឹកផុសចេញ ហើយនឹងមានផ្លូវទឹកហូរនៅសមុទ្រខ្សាច់ដែរ»។—លូកា ២៣:៤៣; អេសាយ ៣៥:១, ៦
២០ តើហេតុអ្វីបានជាការអត់បាយនឹងមិនធ្វើទុក្ខដល់មនុស្សលោកទៀតនោះ?
២០ នៅក្រោមព្រះរាជាណាចក្រ ការអត់បាយនឹងមិនធ្វើទុក្ខដល់មនុស្សរាប់រយលាននាក់ទៀតឡើយ។ «នឹងមានស្រូវជាបរិបូរនៅក្នុងស្រុក រហូតដល់កំពូលភ្នំ»។ «ដើមឈើនៅផែនដីនឹងបង្កើតផ្លែ ហើយដីនឹងបានផលចំរើន វារាល់គ្នានឹងនៅក្នុងស្រុកខ្លួន ដោយសុខសាន្ត»។—ទំនុកដំកើង ៧២:១៦; អេសេគាល ៣៤:២៧
២១ តើការគ្មានទីជ្រកកោន តំបន់របស់មនុស្សក្រីក្រ និងសង្កាត់ដ៏អាក្រក់ នឹងទៅជាយ៉ាងណា?
២១ ភាពក្រ មនុស្សដែលគ្មានទីលំនៅ តំបន់រស់នៅរបស់មនុស្សក្រីក្រ ឬក៏សង្កាត់ដែលពោរពេញទៅដោយបទឧក្រិដ្ឋនឹងមិនមានទៀតទាល់តែសោះ។ «មនុស្សនឹងសង់ផ្ទះ ហើយនឹងអាស្រ័យនៅផង ក៏នឹងដាំចំការទំពាំងបាយជូរ ហើយនឹងបរិភោគផលដែរ។ គេនឹងមិនសង់ រួចមានម្នាក់ទៀតអាស្រ័យនៅ ឬដាំ រួចមានម្នាក់ទៀតបរិភោគផលនោះឡើយ»។ «គឺគ្រប់គ្នានឹងអង្គុយក្រោមដើមទំពាំងបាយជូរ ហើយក្រោមដើមល្វារបស់ខ្លួន ឥតមានអ្នកណាបំភ័យគេឡើយ»។—អេសាយ ៦៥:២១, ២២; មីកា ៤:៤
២២ តើព្រះគម្ពីរបានពណ៌នានូវពរដែលមកពីការគ្រប់គ្រងរបស់ព្រះយ៉ាងណា?
២២ មនុស្សលោកនឹងទទួលពរទាំងអស់នេះ ហើយពរជាច្រើនទៀតនៅក្នុងសួនមនោរមនោះ។ ទំនុកដំកើង ១៤៥:១៦ ចែងថា៖ «ទ្រង់[ព្រះ]លាព្រះហស្ត ក៏បំពេញចិត្តប្រាថ្នានៃជីវិតទាំងឡាយ»។ ដោយយល់ដល់ហេតុការណ៍ទាំងអស់នេះ បទទំនាយពីព្រះគម្ពីរបានប្រកាសថា៖ «ឯមនុស្សរាបសា គេនឹងបានផែនដីជាមរដក ហើយនឹងបានចិត្តរីករាយដោយសេចក្ដីក្សេមក្សាន្តដ៏បរិបូរ។ . . . ពួកអ្នកសុចរិតនឹងបានស្រុកទុកជាមរដក ហើយនឹងនៅក្នុងស្រុកនោះជានិច្ច»។—ទំនុកដំកើង ៣៧:១១, ២៩
ការជួសជុលនូវសេចក្ដីខូចខាតពីអតីតកាល
២៣ តើរាជាណាចក្ររបស់ព្រះនឹងជួសជុលគ្រប់ទាំងសេចក្ដីទុក្ខវេទនាដែលមនុស្សយើងបានពិសោធយ៉ាងណា?
២៣ ការគ្រប់គ្រងព្រះរាជាណាចក្រនឹងជួសជុលគ្រប់សេចក្ដីខូចខាត ដែលកើតឡើងដល់ក្រុមគ្រួសារមនុស្សលោកក្នុងកំលុងពេល៦ពាន់ឆ្នាំកន្លងទៅនោះ។ អំណរអរនៅគ្រានោះនឹងកើតឡើងយ៉ាងសន្ធឹក ហួសជាងគ្រប់សេចក្ដីទុក្ខវេទនាទាំងអស់ដែលមនុស្សបានពិសោធមក។ ជីវិតយើងនឹងមិនត្រូវរំខានដោយសារសេចក្ដីនឹកចាំអាក្រក់អំពីសេចក្ដីទុក្ខវេទនាពីមុនឡើយ។ គំនិតនិងសកម្មភាពដែលនាំឲ្យមានប្រយោជន៍ នឹងទៅជាជីវិតប្រចាំថ្ងៃនៃមនុស្ស ហើយការនោះនឹងជួយបំភ្លេចបន្ដិចម្ដងៗនូវសេចក្ដីនឹកចាំពីសេចក្ដីទុក្ខព្រួយពីមុនទាំងប៉ុន្មានឲ្យបានអស់សូន្យទៅ។
២៤, ២៥ (ក) តើហោរាអេសាយបានទាយថា អ្វីនឹងត្រូវកើតឡើងនោះ? (ខ) តើហេតុអ្វីបានជាយើងអាចដឹងជាប្រាកដថា សេចក្ដីនឹកចាំពីសេចក្ដីទុក្ខវេទនានៅអតីតកាលនឹងត្រូវរសាយអស់ទៅ?
២៤ ព្រះដែលពោរពេញទៅដោយសេចក្ដីស្រឡាញ់បានប្រកាសថា៖ «អញនឹងបង្កើតផ្ទៃមេឃថ្មី[រដ្ឋាភិបាលសួគ៌ាថ្មីលើមនុស្សលោក] ហើយនឹងផែនដីថ្មី[សង្គមមនុស្សដ៏សុចរិត] ឯរបស់ពីមុនៗ នោះនឹងគ្មានអ្នកណានឹកចាំទៀត ក៏មិនដែលចូលក្នុងគំនិតឡើយ។ ប៉ុន្តែត្រូវឲ្យឯងរាល់គ្នាមានសេចក្ដីអំណរ ហើយរីករាយឡើងជាដរាប ចំពោះការដែលអញបង្កើតនោះ»។ «ផែនដីទាំងមូលបានស្រាកស្រាន្តអស់ហើយ ក៏ស្ងៀមស្ងប់ដែរ។ គេទំលាយសំឡេងច្រៀងចេញមក»។—អេសាយ ១៤:៧; ៦៥:១៧, ១៨
២៥ ដូច្នេះ ដោយសារព្រះរាជាណាចក្ររបស់ទ្រង់ ព្រះនឹងជួសជុលឲ្យបានពេញលេញនូវស្ថានការណ៍អាក្រក់ដែលមានតាំងពីពេលយូរយារមកនោះ។ ក្នុងកំលុងពេលជាអនន្តភាព ព្រះអង្គនឹងសម្ដែងសេចក្ដីស្រឡាញ់យ៉ាងធំសម្បើមចំពោះមនុស្សយើង ដើម្បីសងយើង ដោយប្រទានពរជាច្រើនក្រៃលែង លើសជាងសេចក្ដីទុក្ខព្រួយដែលយើងបានរងទុក្ខក្នុងពេលអតីតកាលទៅទៀត។ សេចក្ដីទុក្ខវេទនាពីមុនដែលយើងបានពិសោធនោះ នឹងត្រូវរសាយចេញពីក្នុងសេចក្ដីនឹកចាំរបស់យើង យើងនឹងមិនត្រូវនឹកចាំការនោះទៀតឡើយ។
២៦ តើហេតុអ្វីបានជាព្រះនឹងសងយើង ចំពោះសេចក្ដីទុក្ខវេទនានៅអតីតកាលនោះ?
២៦ នោះហើយជារបៀបដែលព្រះនឹងសងយើងចំពោះសេចក្ដីទុក្ខវេទនា ដែលមនុស្សយើងបានរងទ្រាំនៅក្នុងលោកីយនេះ។ ទ្រង់ជ្រាបថាមិនមកពីកំហុសរបស់យើងទេ ដែលយើងបានកើតជាមនុស្សមិនល្អឥតខ្ចោះនោះ ដ្បិតយើងបានទទួលជាមរតកនូវភាពមិនល្អឥតខ្ចោះពីឪពុកម្ដាយដើមរបស់យើង។ ហើយមិនមកពីកំហុសរបស់យើងទេ ដែលយើងត្រូវបានកើតក្នុងលោកីយរបស់សាតាំងនោះដែរ ដ្បិតបើសិនជាអ័ដាមនិងអេវ៉ាបានរក្សាទុកនូវសេចក្ដីស្មោះដ៏គ្រប់លក្ខណ៍នោះ គឺយើងនឹងត្រូវកើតមកក្នុងសួនមនោរមទៅហើយ។ ដូច្នេះ ដោយមេត្ដាធម៌យ៉ាងធំសម្បើម ព្រះនឹងសងយើងដោយប្រទានពរយ៉ាងសន្ធឹកជាងសេចក្ដីអាក្រក់នៅអតីតកាលដែលបានធ្វើទុក្ខទោសដល់មនុស្សយើងទៅទៀត។
២៧ តើបទទំនាយណានឹងត្រូវបានសម្រេចឡើងយ៉ាងអស្ចារ្យក្នុងពិភពលោកថ្មី?
២៧ នៅក្នុងពិភពលោកថ្មី មនុស្សលោកនឹងត្រូវពិសោធនូវសេរីភាពដែលបានទាយទុកនៅក្នុងគម្ពីររ៉ូម ៨:២១, ២២៖ «ជីវិតទាំងនោះឯង នឹងបានរួចពីចំណងនៃសេចក្ដីពុករលួយ ឲ្យបានសេរីភាពនៃសិរីល្អរបស់ពួកកូនព្រះវិញ។ ដ្បិតយើងដឹងថា ជីវិតទាំងឡាយក៏ថ្ងូរ ហើយឈឺចាប់ជាមួយគ្នា ដរាបដល់គ្រាឥឡូវនេះ»។ មនុស្សនឹងត្រូវឃើញសេចក្ដីសម្រេចដ៏គ្រប់សព្វនៃសេចក្ដីអធិស្ឋាននេះ៖ «សូមឲ្យរាជ្យទ្រង់បានមកដល់ សូមឲ្យព្រះហឫទ័យទ្រង់បានសំរេចនៅផែនដី ដូចនៅស្ថានសួគ៌ដែរ»។ (ម៉ាថាយ ៦:១០) ស្ថានការណ៍ដ៏អស្ចារ្យនៅក្នុងផែនដីជាសួនមនោរម នឹងបានសម្រេចឡើងដូចស្ថានការណ៍នៅឯស្ថានសួគ៌ដែរ។
[រូបភាពនៅទំព័រ២៣]
នៅក្នុងពិភពលោកថ្មីមនុស្សចាស់ជរានឹងត្រឡប់ទៅជាសមត្ថកាលនៃយុវជនវិញ
[រូបភាពនៅទំព័រ២៤]
គ្រប់ជម្ងឺនិងពិការភាពទាំងអស់នឹងត្រូវបំបាត់ឲ្យអស់ នៅក្នុងពិភពលោកថ្មី
[រូបភាពនៅទំព័រ២៥]
នៅក្នុងពិភពលោកថ្មីមនុស្សស្លាប់នឹងត្រូវប្រោសឲ្យរស់ឡើងវិញ
[រូបភាពនៅទំព័រ២៦]
‹គេនឹងមិនរៀនវិជ្ជាចំបាំងទៀតទេ›
[រូបភាពនៅទំព័រ២៧]
មនុស្សលោកនិងសត្វនានានឹងមានសព្វសន្ដិភាពរវាងគ្នានឹងគ្នាក្នុងសួនមនោរម
[រូបភាពនៅទំព័រ២៧]
‹ព្រះនឹងលាព្រះហស្តក៏បំពេញចិត្តប្រាថ្នានៃជីវិតទាំងឡាយ›
[រូបភាពនៅទំព័រ២៨]
រាជាណាចក្ររបស់ព្រះនឹងនាំឲ្យមានផលប្រយោជន៍លើសជាងគ្រប់សេចក្ដីទុក្ខវេទនាដែលយើងបានរងទុក្ខទាំងប៉ុន្មានទៅទៀត